പുരോഗമനാത്മകമായ ബൈബിളധ്യയനങ്ങൾ നടത്തൽ
ഭാഗം 12: ബൈബിളധ്യയനങ്ങൾ ആരംഭിക്കാനും നടത്താനും വിദ്യാർഥികളെ സഹായിക്കൽ
1 നമ്മുടെ ബൈബിൾ വിദ്യാർഥികൾ വയൽശുശ്രൂഷയിൽ പങ്കുപറ്റാൻ തുടങ്ങുമ്പോൾ, സ്വന്തമായി ബൈബിളധ്യയനങ്ങൾ ആരംഭിക്കുകയും നടത്തുകയും ചെയ്യുകയെന്ന ചിന്തതന്നെ അവരെ ഭയപ്പെടുത്തിയേക്കാം. നമ്മുടെ ശുശ്രൂഷയുടെ ഈ അനിവാര്യ ഭാഗത്തോടു ക്രിയാത്മകമായ ഒരു മനോഭാവം വളർത്തിയെടുക്കാൻ അവരെ നമുക്ക്‌ എങ്ങനെ സഹായിക്കാനാകും?—മത്താ. 24:14; 28:19, 20.
2 ഒരു ബൈബിൾ വിദ്യാർഥി സ്‌നാപനമേറ്റിട്ടില്ലാത്ത പ്രസാധകൻ ആയിരിക്കാനുള്ള യോഗ്യതയിൽ എത്തിച്ചേരുമ്പോഴേക്കും അദ്ദേഹം സാധ്യതയനുസരിച്ച്‌ ദിവ്യാധിപത്യ ശുശ്രൂഷാസ്‌കൂളിൽനിന്നു പൂർണ പ്രയോജനം നേടാൻ ആരംഭിച്ചിട്ടുണ്ടാകും. വിദ്യാർഥിനിയമനങ്ങൾ തയ്യാറാകുന്നതിലും അവതരിപ്പിക്കുന്നതിലും അദ്ദേഹത്തിനു ലഭിക്കുന്ന പരിശീലനം, “സത്യവചനത്തെ യഥാർത്ഥമായി പ്രസംഗിച്ചുകൊണ്ടു ലജ്ജിപ്പാൻ സംഗതിയില്ലാത്ത വേലക്കാരനായി” പ്രവർത്തിക്കുന്നതിന്‌ ഒരുവന്‌ ആവശ്യമായിരിക്കുന്ന പഠിപ്പിക്കൽ വൈദഗ്‌ധ്യങ്ങൾ വളർത്തിയെടുക്കാൻ അദ്ദേഹത്തെ സഹായിക്കും.—2 തിമൊ. 2:15.
3 നിങ്ങളുടെ മാതൃകയിലൂടെ പഠിപ്പിക്കുക: വ്യക്തമായ നിർദേശങ്ങൾ നൽകിക്കൊണ്ടും നല്ല മാതൃക വെച്ചുകൊണ്ടും യേശു തന്റെ ശിഷ്യരെ പരിശീലിപ്പിച്ചു. “അഭ്യാസം തികഞ്ഞവൻ എല്ലാം ഗുരുവിനെപ്പോലെ ആകും,” അവൻ പറഞ്ഞു. (ലൂക്കൊ. 6:40) നിങ്ങളുടെ ശുശ്രൂഷയിൽ ഉചിതമായ മാതൃക വെച്ചുകൊണ്ട്‌ നിങ്ങൾ യേശുവിനെ അനുകരിക്കുന്നതു മർമപ്രധാനമാണ്‌. ശുശ്രൂഷയിലെ നിങ്ങളുടെ മാതൃക വിദ്യാർഥി നിരീക്ഷിക്കുമ്പോൾ, ബൈബിളധ്യയനങ്ങൾ ആരംഭിക്കുക എന്നതാണ്‌ മടക്കസന്ദർശനങ്ങൾ നടത്തുന്നതിന്റെ ഉദ്ദേശ്യമെന്ന്‌ അദ്ദേഹത്തിനു മനസ്സിലാകും.
4 ഒരു അധ്യയനം വാഗ്‌ദാനം ചെയ്യുമ്പോൾ സാധാരണഗതിയിൽ, ബൈബിളധ്യയനം നടത്തുന്നവിധം സംബന്ധിച്ചു വിശദമായി വിവരിക്കേണ്ടതില്ലെന്നു വിദ്യാർഥിക്കു പറഞ്ഞു കൊടുക്കുക. അധ്യയനത്തിനുള്ള ഒരു പ്രസിദ്ധീകരണത്തിലെ ഒന്നോ രണ്ടോ ഖണ്ഡികകൾ ഉപയോഗിച്ചുകൊണ്ട്‌ അധ്യയനം പ്രകടിപ്പിച്ചുകാണിക്കുന്നതാണു മിക്കപ്പോഴും ഏറ്റവും നല്ലത്‌. ഇതു ചെയ്യുന്നതിനുള്ള സഹായകമായ നിർദേശങ്ങൾ, നമ്മുടെ രാജ്യ ശുശ്രൂഷയുടെ ഈ ലക്കത്തിന്റെ 8-ാം പേജിലും 2002 ജനുവരി ലക്കത്തിന്റെ 6-ാം പേജിലും കാണാൻ കഴിയും.
5 ഉചിതമായ സന്ദർഭങ്ങളിൽ, നിങ്ങളോ അനുഭവസമ്പന്നനായ മറ്റൊരു പ്രസാധകനോ നടത്തുന്ന ബൈബിളധ്യയനങ്ങൾക്കു വിദ്യാർഥിയെ ക്ഷണിക്കുക. ഒരു ഖണ്ഡികയെക്കുറിച്ചോ ഒരു സുപ്രധാന തിരുവെഴുത്തിനെക്കുറിച്ചോ അഭിപ്രായം പറയുന്നതിൽ പങ്കുചേരാൻ അദ്ദേഹത്തിനു കഴിഞ്ഞേക്കും. അങ്ങനെ നിരീക്ഷണത്തിലൂടെ, പുരോഗമനാത്മകമായ ബൈബിളധ്യയനങ്ങൾ നടത്തുന്നതു സംബന്ധിച്ചു ധാരാളം കാര്യങ്ങൾ പഠിക്കാൻ വിദ്യാർഥിക്കു കഴിയും. (സദൃ. 27:17; 2 തിമൊ. 2:2) അദ്ദേഹത്തെ അഭിനന്ദിക്കുകയും എങ്ങനെ പുരോഗമിക്കാമെന്നു വിശദീകരിക്കുകയും ചെയ്യുക.
6 ദൈവവചനം പഠിപ്പിക്കുന്നവർ ആയിരിക്കാൻ പുതിയ പ്രസാധകരെ പരിശീലിപ്പിക്കുന്നത്‌, സ്വന്തമായി ബൈബിളധ്യയനങ്ങൾ ആരംഭിക്കുകയും നടത്തുകയും ചെയ്യുകയെന്ന “സൽപ്രവൃത്തി” ചെയ്യാൻ അവരെ സജ്ജരാക്കും. (2 തിമൊ. 3:16) “ഇച്ഛിക്കുന്നവൻ ജീവജലം സൌജന്യമായി വാങ്ങട്ടെ” എന്ന സ്‌നേഹപുരസ്സരമായ ക്ഷണം വെച്ചുനീട്ടുന്നതിൽ അവരോടൊപ്പം തോളോടുതോൾ ചേർന്നു പ്രവർത്തിക്കാൻ കഴിയുന്നത്‌ എത്ര സംതൃപ്‌തിദായകമാണ്‌!—വെളി. 22:17.