യുവജ​നങ്ങൾ ചോദി​ക്കു​ന്നു . . .

വണ്ണത്തെ കുറി​ച്ചുള്ള ഉത്‌കണ്‌ഠ എനിക്ക്‌ എങ്ങനെ ഇല്ലാതാ​ക്കാ​നാ​കും?

“ജീവി​ത​ത്തി​ലെ ഏറ്റവും വലിയ പ്രശ്‌നം ഇതാണ്‌: എന്റെ സാൻഡ്‌വി​ച്ചിൽ ഞാൻ മേയൊനെയ്‌സ്‌* പുരട്ട​ണോ വേണ്ടയോ. മേയൊ​നെ​യ്‌സ്‌ എന്നെ ഇത്രമാ​ത്രം ഉത്‌ക​ണ്‌ഠാ​കു​ല​യാ​ക്കു​മ്പോൾ, ഞാൻ എങ്ങനെ​യാ​ണു മറ്റു കാര്യ​ങ്ങ​ളിൽ ശ്രദ്ധപ​തി​പ്പി​ക്കുക? അവസാനം, എന്തു തീരു​മാ​നി​ച്ചു? മേയൊ​നെ​യ്‌സോ, വേണ്ടേ വേണ്ട! അതിൽ കണക്കി​ല​ധി​കം കലോ​റി​യുണ്ട്‌. വീണ്ടും അനൊ​റെ​ക്‌സിയ ജയിച്ചു. ഞാൻ തോറ്റു.”—ജെയ്‌മി.

ലക്ഷക്കണ​ക്കി​നു യുവജ​ന​ങ്ങൾക്ക്‌ ആഹാര​ശീല വൈക​ല്യ​ങ്ങൾ ഉണ്ട്‌.a തുടക്ക​ത്തിൽ പക്ഷേ, സ്വയം പട്ടിണി​ക്കി​ടാ​നോ (അനൊ​റെ​ക്‌സിയ) അല്ലെങ്കിൽ വലിച്ചു​വാ​രി തിന്നിട്ട്‌ അതു മുഴുവൻ പുറത്തു കളയുന്ന ശീലം (ബൂളി​മിയ) വളർത്തി​യെ​ടു​ക്കാ​നോ മിക്കവ​രും ഉദ്ദേശി​ച്ചി​രു​ന്നില്ല. നേരെ മറിച്ച്‌, തൂക്കം ഏതാനും കിലോ കുറയ്‌ക്കുക എന്ന ലക്ഷ്യം മാത്രം മുന്നിൽ കണ്ടാണ്‌ ഒട്ടുമി​ക്ക​വ​രും ഇത്‌ ആരംഭി​ച്ചത്‌. എന്നിരു​ന്നാ​ലും, സ്വയം തിരി​ച്ച​റി​യു​ന്ന​തി​നു മുമ്പു തന്നെ, അവർ അനൊ​റെ​ക്‌സി​യ​യു​ടെ​യോ ബൂളി​മി​യ​യു​ടെ​യോ നീരാ​ളി​പ്പി​ടി​ത്ത​ത്തിൽ അകപ്പെ​ടു​ന്നു. “എന്റെ തൂക്ക​മൊ​ന്നു നിയ​ന്ത്രി​ക്കാ​നാ​ണു ഞാൻ ഈ ആഹാര​ക്രമം പിൻപ​റ്റാൻ തുടങ്ങി​യത്‌, എന്നാൽ ഇപ്പോൾ, ഇത്‌ എന്നെ നിയ​ന്ത്രി​ക്കു​ക​യാണ്‌,” ജെയ്‌മി പറയുന്നു.

ആഹാര​വും അതു നിങ്ങളു​ടെ വണ്ണത്തെ ബാധി​ക്കുന്ന വിധവും സംബന്ധി​ച്ചു നിങ്ങൾക്ക്‌ ഉത്‌കണ്‌ഠ തോന്നു​ന്നെ​ങ്കിൽ എന്തു ചെയ്യാൻ കഴിയും? ആദ്യം തന്നെ, ഇതേ പ്രശ്‌ന​ത്തോ​ടു മല്ലടി​ച്ചി​ട്ടുള്ള മറ്റനേകം യുവജ​നങ്ങൾ ഉണ്ടെന്നും അവർക്ക​തിൽ വിജയം വരിക്കാൻ കഴിഞ്ഞി​ട്ടു​ണ്ടെ​ന്നും തിരി​ച്ച​റി​യുക! പക്ഷേ, എങ്ങനെ?

സ്വയം നോക്കി​ക്കാ​ണൽ

ഒരു ആഹാര​ശീല വൈക​ല്യ​ത്തിന്‌ എതി​രെ​യുള്ള പോരാ​ട്ട​ത്തിൽ വിജയി​ക്കാ​നുള്ള പ്രമു​ഖ​മായ ഒരു നടപടി, നിങ്ങളു​ടെ ആകാരം സംബന്ധിച്ച്‌ വാസ്‌ത​വി​ക​മായ ഒരു വീക്ഷണം വളർത്തി​യെ​ടു​ക്കുക എന്നതാണ്‌. “ആഹാര​ശീല വൈക​ല്യ​ങ്ങ​ളുള്ള മിക്കവർക്കും തങ്ങളുടെ ശരീര​ത്തെ​ക്കു​റിച്ച്‌ ഒരു വികല​മായ വീക്ഷണ​മാണ്‌ ഉള്ളത്‌” എന്ന്‌ മാറുന്ന ശരീരങ്ങൾ, മാറുന്ന ജീവി​തങ്ങൾ (ഇംഗ്ലീഷ്‌) എന്ന പുസ്‌തകം പറയുന്നു. “അവർ യാഥാർഥ്യ ബോധ​ത്തോ​ടെ തങ്ങളുടെ ശരീര​ങ്ങളെ കാണു​ന്നില്ല എന്നുമാ​ത്രമല്ല, തങ്ങളെ കുറിച്ച്‌, പ്രത്യേ​കി​ച്ചു തങ്ങളുടെ ബാഹ്യാ​കാ​രം സംബന്ധിച്ച്‌ അമിത വിമർശന മനോ​ഭാ​വം വെച്ചു​പു​ലർത്തു​ന്ന​വ​രു​മാണ്‌.”

ചില കൗമാ​ര​പ്രാ​യ​ക്കാർ സ്വയം അളക്കു​ന്നത്‌ അവരുടെ ശാരീ​രിക ആകാര​ത്തി​ന്റെ അടിസ്ഥാ​ന​ത്തി​ലാണ്‌. എന്തെങ്കി​ലും കുറവു​ണ്ടെ​ങ്കിൽ പിന്നെ ജീവി​ച്ചി​രു​ന്നി​ട്ടു കാര്യ​മില്ല എന്ന ചിന്തയാണ്‌ ഇവരെ ഭരിക്കു​ന്നത്‌. പതി​നേഴു വയസ്സുള്ള വിക്കി പറയുന്നു: “എന്റെ വണ്ണം കണ്ടിട്ട്‌ എനിക്കു സഹിക്കാൻ കഴിയു​ന്നില്ല. അരവണ്ണം കാരണം ‘ഇൻ’ ചെയ്യേണ്ട വസ്‌ത്ര​ങ്ങ​ളൊ​ന്നും എനിക്ക്‌ ഇടാൻ സാധി​ക്കു​ന്നില്ല.” തൂക്കം പത്തു കിലോ കുറച്ചി​ട്ടും വിക്കി അതിൽ സംതൃ​പ്‌ത​യാ​യി​രു​ന്നില്ല. ഒന്നുകിൽ അവൾ പട്ടിണി കിടക്കു​മാ​യി​രു​ന്നു അല്ലെങ്കിൽ വലിച്ചു​വാ​രി തിന്നതി​നു ശേഷം അതു മുഴുവൻ ഛർദ്ദിച്ചു കളയു​മാ​യി​രു​ന്നു.

തീർച്ച​യാ​യും, നിങ്ങളു​ടെ ബാഹ്യാ​കാ​രം സംബന്ധിച്ച്‌ ഒരള​വോ​ളം ചിന്ത ഉണ്ടായി​രി​ക്കു​ന്നതു തെറ്റല്ല. രസകര​മെന്നു പറയട്ടെ, സാറാ, റാഹേൽ, യോ​സേഫ്‌, ദാവീദ്‌, അബീഗ​യിൽ എന്നിവ​രു​ടെ ശാരീ​രിക സൗന്ദര്യ​ത്തെ​യും ആകാര​സൗ​ഷ്‌ഠ​വ​ത്തെ​യും കുറിച്ചു ബൈബിൾ പ്രശം​സാ​പൂർവം സംസാ​രി​ക്കു​ന്നു.b ദാവീ​ദി​ന്റെ പരിചാ​രി​ക​യാ​യി​രുന്ന അബീശഗ്‌ “അതിസു​ന്ദ​രി​യാ​യി​രു​ന്നു” എന്നു പോലും അതു പറയുന്നു.—1 രാജാ​ക്ക​ന്മാർ 1:4.

യഥാർഥ സൗന്ദര്യം

എന്നിരു​ന്നാ​ലും, ഒരുവന്റെ ബാഹ്യ​പ്ര​കൃ​തി​ക്കോ ആകാര​സൗ​ഷ്‌ഠ​വ​ത്തി​നോ ബൈബിൾ പ്രഥമ സ്ഥാനം കൊടു​ക്കു​ന്നില്ല. മറിച്ച്‌, അതു ‘ഹൃദയ​ത്തി​ന്റെ ഗൂഢമ​നു​ഷ്യ​നെ’ പ്രകീർത്തി​ച്ചു സംസാ​രി​ക്കു​ന്നു. (1 പത്രൊസ്‌ 3:4) ദൈവ​ത്തി​ന്റെ​യും മനുഷ്യ​രു​ടെ​യും ദൃഷ്ടി​യിൽ ഒരുവനെ യഥാർഥ​ത്തിൽ ആകർഷ​ണീ​യ​നോ വെറു​ക്ക​ത്ത​ക്ക​വ​നോ ആക്കിത്തീർക്കു​ന്നത്‌ ഒരുവന്റെ ആന്തരിക മനുഷ്യ​നാണ്‌.—സദൃശ​വാ​ക്യ​ങ്ങൾ 11:20, 22.

ദാവീദ്‌ രാജാ​വി​ന്റെ പുത്ര​നാ​യി​രുന്ന അബ്‌ശാ​ലോ​മി​ന്റെ കാര്യം പരിചി​ന്തി​ക്കുക. ബൈബിൾ ഇപ്രകാ​രം പ്രസ്‌താ​വി​ക്കു​ന്നു: “എല്ലായി​സ്രാ​യേ​ലി​ലും സൌന്ദ​ര്യം​കൊ​ണ്ടു അബ്‌ശാ​ലോ​മി​നോ​ളം ശ്ലാഘ്യ​നായ ഒരുത്ത​നും ഉണ്ടായി​രു​ന്നില്ല; അടി​തൊ​ട്ടു​മു​ടി​വരെ അവന്നു ഒരു ഊനവും ഇല്ലായി​രു​ന്നു.” (2 ശമൂവേൽ 14:25) പക്ഷേ, ഈ ചെറു​പ്പ​ക്കാ​രൻ ഒരു വഞ്ചകനാ​യി​രു​ന്നു. യഹോ​വ​യു​ടെ നിയുക്ത രാജാ​വി​നെ അധികാ​ര​ഭ്ര​ഷ്ട​നാ​ക്കാൻ ശ്രമം നടത്തു​ന്ന​തിന്‌ അഹങ്കാ​ര​വും അത്യാ​ഗ്ര​ഹ​വും അവനെ പ്രേരി​പ്പി​ച്ചു. അതു​കൊണ്ട്‌, ബൈബിൾ അബ്‌ശാ​ലോ​മി​ന്റെ ഒരു സുന്ദര ചിത്രമല്ല വരച്ചു കാട്ടു​ന്നത്‌. പകരം, ഹിംസാ​ത്മക വിദ്വേ​ഷ​വും ലജ്ജ തൊട്ടു​തീ​ണ്ടാത്ത തരത്തി​ലുള്ള അവിശ്വ​സ്‌ത​യും പ്രകട​മാ​ക്കിയ ഒരുവ​നാ​യി അവനെ വർണി​ച്ചി​രി​ക്കു​ന്നു.

ഒരു വ്യക്തി​യു​ടെ യഥാർഥ സൗന്ദര്യം അവന്റെ ബാഹ്യാ​കാ​രത്തെ ആശ്രയി​ച്ചി​രി​ക്കു​ന്നില്ല. നല്ല കാരണ​ത്തോ​ടെ​യാണ്‌ ബൈബിൾ ഇപ്രകാ​രം പ്രസ്‌താ​വി​ക്കു​ന്നത്‌: “ജ്ഞാനം സമ്പാദിക്ക; നിന്റെ സകലസ​മ്പാ​ദ്യ​ത്താ​ലും വിവേകം നേടുക. അതു നിന്റെ തലയെ അലങ്കാ​ര​മാല അണിയി​ക്കും; അതു നിന്നെ ഒരു മഹത്വ​കി​രീ​ടം [“മനോഹര കിരീടം,” NW] ചൂടി​ക്കും.”—സദൃശ​വാ​ക്യ​ങ്ങൾ 4:7, 9.

എന്നിരു​ന്നാ​ലും, ബാഹ്യാ​കാ​രത്തെ പ്രതി​യുള്ള അതൃപ്‌തി മാത്രമല്ല ആഹാര​ശീല വൈക​ല്യ​ങ്ങൾക്കു പലപ്പോ​ഴും ഇടയാ​ക്കു​ന്നത്‌ എന്നു സമ്മതി​ക്കേ​ണ്ടി​യി​രി​ക്കു​ന്നു. ഒരു പരാമർശ കൃതി ഇപ്രകാ​രം പറയുന്നു: “ആഹാരത്തെ കുറിച്ച്‌ അമിത​മാ​യി ഉത്‌ക​ണ്‌ഠാ​കു​ല​രാ​യി​ത്തീ​രു​ക​യും അനൊ​റെ​ക്‌സിയ നെർവോസ, ബൂളി​മിയ, അമിത​മാ​യി ആഹാരം കഴിക്കൽ എന്നീ ആഹാര​ശീല വൈക​ല്യ​ങ്ങൾക്കു വശംവ​ദ​രാ​കു​ക​യും ചെയ്യു​ന്ന​വർക്കു പൊതു​വെ ആത്മാഭി​മാ​നം കുറവാണ്‌. അവർക്കു​തന്നെ അവരെ കുറിച്ച്‌ ഒരു നല്ല ധാരണ​യില്ല, മാത്രമല്ല മറ്റുള്ള​വ​രും അവരെ വിലമ​തി​ക്കു​ന്നി​ല്ലെന്ന്‌ അവർ വിചാ​രി​ക്കു​ന്നു.”

ആത്മാഭി​മാ​നം കുറഞ്ഞു പോകു​ന്ന​തി​നു പല കാരണങ്ങൾ ഉണ്ട്‌. ഉദാഹ​ര​ണ​ത്തിന്‌, താരു​ണ്യ​ത്തി​ന്റെ തുടക്ക​ത്തിൽ നിങ്ങളു​ടെ ഉള്ളിൽ സംശയ​ങ്ങ​ളു​ടെ ഒരു വേലി​യേറ്റം തന്നെ ഉണ്ടാ​യേ​ക്കാം, വിശേ​ഷിച്ച്‌ സമപ്രാ​യ​ക്കാ​രെ​ക്കാൾ നേര​ത്തേ​യാണ്‌ നിങ്ങൾ താരു​ണ്യ​ത്തിൽ എത്തുന്ന​തെ​ങ്കിൽ. ഇനി, ചില യുവ​പ്രാ​യ​ക്കാർ വളർന്നു വരുന്നത്‌ സദാ വഴക്കും ബഹളവു​മുള്ള വീടു​ക​ളി​ലാണ്‌. അവർക്ക്‌ ശാരീ​രി​ക​മോ ലൈം​ഗി​ക​മോ ആയ ദ്രോഹം പോലും സഹി​ക്കേണ്ടി വന്നേക്കാം. സംഗതി എന്തുതന്നെ ആയിരു​ന്നാ​ലും, ആത്മാഭി​മാന കുറവ്‌ എന്ന പ്രശ്‌നം പരിഹ​രി​ക്ക​ണ​മെ​ങ്കിൽ സാധാ​ര​ണ​ഗ​തി​യിൽ അതി​ലേക്കു നയിക്കുന്ന ഘടകങ്ങൾ തിരി​ച്ച​റി​യേ​ണ്ടത്‌ ആവശ്യ​മാണ്‌. ഒരു വ്യക്തി എന്ന നിലയി​ലുള്ള നിങ്ങളു​ടെ യഥാർഥ മൂല്യം മനസ്സി​ലാ​ക്കു​ന്നത്‌ അതിൽ ഉൾപ്പെ​ടു​ന്നു. നിശ്ചയ​മാ​യും, പ്രശം​സ​നീ​യ​മായ ചില ഗുണങ്ങ​ളെ​ങ്കി​ലും എല്ലാവർക്കു​മുണ്ട്‌. (1 കൊരി​ന്ത്യർ 12:14-18 താരത​മ്യം ചെയ്യുക.) ഒരുപക്ഷേ നിങ്ങൾക്കതു സ്വയം കണ്ടെത്താൻ കഴി​ഞ്ഞെന്നു വരില്ല. എന്നാൽ ഒരു പക്വത​യുള്ള സുഹൃ​ത്തിന്‌ അവ നിങ്ങൾക്കു പറഞ്ഞു​ത​രാൻ കഴി​ഞ്ഞേ​ക്കും.

എന്നാൽ, ന്യായ​മായ ചില ആരോഗ്യ കാരണ​ങ്ങ​ളാൽ നിങ്ങൾക്കു യഥാർഥ​ത്തിൽ വണ്ണം കുറയ്‌ക്കേ​ണ്ട​തു​ണ്ടെ​ങ്കി​ലോ? ‘സംയമ​ന​മു​ള്ളവർ’ ആയിരി​ക്കാൻ ബൈബിൾ നമ്മെ പ്രോ​ത്സാ​ഹി​പ്പി​ക്കു​ന്നു. (1 തിമൊ​ഥെ​യൊസ്‌ 3:11, പി. ഒ. സി ബൈബിൾ) അതു​കൊണ്ട്‌ ആഹാര​ക്രമം പാലി​ക്കു​ന്ന​തിൽ അങ്ങേയറ്റം പോകാ​തി​രി​ക്കുക. ഒറ്റയടി​ക്കു വണ്ണം കുറയ്‌ക്കു​ന്ന​തി​നുള്ള മാർഗങ്ങൾ അവലം​ബി​ക്കാ​തി​രി​ക്കാ​നും ശ്രദ്ധി​ക്കുക. ആവശ്യ​ത്തി​ല​ധി​ക​മുള്ള വണ്ണം കുറയ്‌ക്കു​ന്ന​തിന്‌ ഏറ്റവും നല്ല മാർഗം ഒരുപക്ഷേ, ആരോ​ഗ്യാ​വ​ഹ​മായ ഭക്ഷണ​ക്ര​മ​വും മിതമായ അളവി​ലുള്ള വ്യായാ​മ​വു​മാണ്‌. എഫ്‌ഡിഎ കൺസ്യൂ​മർ മാസിക പറയുന്നു: “മിക്കവാ​റും മറ്റെല്ലാ സംഗതി​ക​ളെ​യും പോലെ, വണ്ണം കുറയ്‌ക്കാ​നും ഒരു ശരിയായ മാർഗ​വും തെറ്റായ മാർഗ​വും ഉണ്ട്‌. ചില നേരം ആഹാരം കഴിക്കാ​തി​രി​ക്കു​ന്ന​തും റൊട്ടി​യും വെള്ളവും മാത്രം കഴിച്ചു വിശപ്പ​ട​ക്കു​ന്ന​തും ഡയറ്റ്‌ ഗുളി​കകൾ കഴിക്കു​ന്ന​തും അല്ലെങ്കിൽ കഴിച്ച ആഹാരം ഛർദ്ദിച്ചു കളയു​ന്ന​തും എല്ലാം തെറ്റായ മാർഗ​ത്തിൽ പെടുന്നു.”

ആരോ​ടെ​ങ്കി​ലും പ്രശ്‌നങ്ങൾ തുറന്നു പറയു​ന്ന​തി​ന്റെ പ്രയോ​ജ​ന​ങ്ങൾ

സാമൂഹ്യ പ്രവർത്ത​ക​യായ നാൻസി കൊ​ളൊ​ഡ്‌നി ഒരു ആഹാര​ശീല വൈക​ല്യ​മു​ള്ള​തി​നെ “ഒരു മാപ്പോ വടക്കു​നോ​ക്കി യന്ത്രമോ കൈയിൽ കരുതാ​തെ ഒറ്റയ്‌ക്ക്‌ കുടു​ക്കു​വ​ഴി​കൾ നിറഞ്ഞ ഒരു കോട്ട​യിൽ പ്രവേ​ശി​ക്കു​ന്ന​തി​നോ​ടു താരത​മ്യ​പ്പെ​ടു​ത്തു​ന്നു. പുറ​ത്തേ​ക്കുള്ള വഴികൾ എവി​ടെ​യാ​ണെന്നു നിങ്ങൾക്കു യാതൊ​രു പിടി​യു​മില്ല. മാത്രമല്ല, നിങ്ങൾ അത്‌ എപ്പോൾ കണ്ടുപി​ടി​ക്കു​മെ​ന്നോ അല്ലെങ്കിൽ കണ്ടുപി​ടി​ക്കാൻ സാധി​ക്കു​മെന്നു തന്നെയോ ഉറപ്പില്ല. . . . എത്രയ​ധി​കം സമയം അതിന​കത്തു തങ്ങുന്നു​വോ അത്രയ​ധി​കം അതു നിങ്ങളെ കുഴപ്പി​ക്കു​ക​യും അവിടെ നിന്നു രക്ഷപ്പെ​ടാ​നുള്ള ശ്രമങ്ങളെ നിഷ്‌ഫ​ല​മാ​ക്കി​ക്കൊണ്ട്‌ നിങ്ങളെ നിരാ​ശ​യി​ലാ​ഴ്‌ത്തു​ക​യും ചെയ്യും.” അതു​കൊണ്ട്‌, അനൊ​റെ​ക്‌സി​യ​യു​ടെ​യോ ബൂളി​മി​യ​യു​ടെ​യോ ലക്ഷണങ്ങൾ നിങ്ങൾക്ക്‌ ഉണ്ടെങ്കിൽ, നിങ്ങൾ സഹായം തേടേ​ണ്ട​തുണ്ട്‌. നിങ്ങൾക്കു ‘കുടു​ക്കു​വ​ഴി​കൾ നിറഞ്ഞ ഈ കോട്ട’യിൽ നിന്നു തനിയെ രക്ഷപ്പെ​ടാ​നാ​വില്ല. അതു​കൊണ്ട്‌, മാതാ​പി​താ​ക്ക​ളോ​ടോ അല്ലെങ്കിൽ നിങ്ങൾക്കു വിശ്വാ​സ​മുള്ള ഒരു മുതിർന്ന വ്യക്തി​യോ​ടൊ പ്രശ്‌നങ്ങൾ തുറന്നു പറയുക. ഒരു ബൈബിൾ സദൃശ​വാ​ക്യം ഇപ്രകാ​രം പ്രസ്‌താ​വി​ക്കു​ന്നു: “സ്‌നേ​ഹി​തൻ [“ഒരു യഥാർഥ സ്‌നേ​ഹി​തൻ,” NW] എല്ലാകാ​ല​ത്തും സ്‌നേ​ഹി​ക്കു​ന്നു; അനർത്ഥ​കാ​ലത്തു അവൻ സഹോ​ദ​ര​നാ​യ്‌തീ​രു​ന്നു.”—സദൃശ​വാ​ക്യ​ങ്ങൾ 17:17

യഹോ​വ​യു​ടെ സാക്ഷി​ക​ളിൽ അനേകർ, ക്രിസ്‌തീയ സഭയിലെ മൂപ്പന്മാർക്കി​ട​യിൽ ആശ്രയ​യോ​ഗ്യ​രായ അത്തരം സ്‌നേ​ഹി​തരെ കണ്ടെത്തി​യി​രി​ക്കു​ന്നു. തീർച്ച​യാ​യും, മൂപ്പന്മാർ വൈദ്യ​ന്മാ​രൊ​ന്നു​മല്ല, മാത്രമല്ല, അവരുടെ പിന്തുണ വൈദ്യ​സ​ഹാ​യം സ്വീക​രി​ക്കു​ന്ന​തി​ന്റെ ആവശ്യം ഇല്ലാതാ​ക്കു​ക​യു​മില്ല. എന്നിരു​ന്നാ​ലും, ക്രിസ്‌തീയ മേൽവി​ചാ​ര​ക​ന്മാർ “എളിയ​വന്റെ നിലവി​ളി​ക്കു ചെവി പൊത്തി​ക്ക​ളയു”കയില്ല. മാത്രമല്ല, അവരുടെ പ്രാർഥ​ന​കൾക്കും ബുദ്ധി​യു​പ​ദേ​ശ​ത്തി​നും “ദീനക്കാ​രനെ” ആത്മീയ​മാ​യി “രക്ഷി”ക്കാനും കഴിയും.—സദൃശ​വാ​ക്യ​ങ്ങൾ 21:13; യാക്കോബ്‌ 5:13-15.

എന്നാൽ പ്രശ്‌നങ്ങൾ ഒരാ​ളോ​ടു നേരിട്ടു പറയാൻ നിങ്ങൾക്കു ബുദ്ധി​മുട്ട്‌ അനുഭ​വ​പ്പെ​ടു​ന്നെ​ങ്കിൽ എന്ത്‌? നിങ്ങളു​ടെ മനസ്സി​ലുള്ള കാര്യങ്ങൾ ഒരു കത്തിൽ പകർത്തിയ ശേഷം ഒരു മറുപ​ടി​ക്കാ​യി അഭ്യർഥി​ക്കുക. പ്രധാ​ന​പ്പെട്ട സംഗതി, മനസ്സി​ലു​ള്ളത്‌ ആരെ​യെ​ങ്കി​ലും അറിയി​ക്കുക എന്നതാണ്‌. നാൻസി കൊ​ളൊ​ഡ്‌നി ഇങ്ങനെ എഴുതു​ന്നു: “കാര്യങ്ങൾ ഇനിയും സ്വയം കൈകാ​ര്യം ചെയ്യാൻ കഴിയു​ക​യില്ല എന്നു സമ്മതി​ക്കുക വഴി, മറ്റുള്ളവർ നിങ്ങളെ സഹായി​ക്കാൻ നിങ്ങൾ ആഗ്രഹി​ക്കു​ന്നു​വെന്ന്‌ വെളി​പ്പെ​ടു​ത്തു​ക​യാ​വും ചെയ്യു​ന്നത്‌.” അവർ ഇങ്ങനെ കൂട്ടി​ച്ചേർക്കു​ന്നു: “ഈ പടിക​ളൊ​ക്കെ സ്വീക​രി​ക്കു​ന്ന​തി​നെ കുറിച്ചു ചിന്തി​ക്കാ​നോ അവ കൈ​ക്കൊ​ള്ളാ​നോ നിങ്ങൾക്കു ബുദ്ധി​മു​ട്ടാ​യി​രു​ന്നേ​ക്കാം. പക്ഷേ അവ ഫലകര​മാണ്‌, ‘കുടു​ക്കു​വ​ഴി​കൾ നിറഞ്ഞ കോട്ട​യിൽ’ നിന്നു പുറത്തു​ക​ട​ക്കു​ന്ന​തി​നു നിങ്ങളെ സഹായി​ക്കുന്ന തരം പടിക​ളാണ്‌ അവ.”

ക്രിസ്‌തീ​യ യുവജ​ന​ങ്ങൾക്ക്‌ ആശ്വാ​സ​ത്തി​ന്റെ​യും ശക്തിയു​ടെ​യും മറ്റൊരു ഉറവുണ്ട്‌—പ്രാർഥന. അനേകർ വിചാ​രി​ക്കു​ന്നതു പോലെ അതു കേവലം ഒരു മനഃശാ​സ്‌ത്ര​പ​ര​മായ ഊന്നു​വ​ടി​യല്ല. അത്‌ സ്രഷ്ടാ​വി​നോ​ടുള്ള യഥാർഥ​വും മർമ​പ്ര​ധാ​ന​വു​മായ ആശയവി​നി​മ​യ​മാണ്‌. നിങ്ങളെ നിങ്ങൾതന്നെ മനസ്സി​ലാ​ക്കു​ന്ന​തി​ലും നന്നായി മനസ്സി​ലാ​ക്കുന്ന ഒരുവ​നു​മാ​യുള്ള ആശയവി​നി​മയം! (1 യോഹ​ന്നാൻ 3:19, 20) അതു​കൊണ്ട്‌, എല്ലാ രോഗ​ങ്ങ​ളും തുടച്ചു​നീ​ക്കാ​നുള്ള യഹോ​വ​യു​ടെ നിയമിത സമയം ഇതുവരെ എത്തി​ച്ചേർന്നി​ട്ടി​ല്ലെ​ങ്കിൽ പോലും, നമ്മുടെ സ്‌നേ​ഹ​നി​ധി​യായ ദൈവ​ത്തിന്‌ നിങ്ങൾ കുലു​ങ്ങി​പ്പോ​കാ​തി​രി​ക്കാൻ തക്കവണ്ണം നിങ്ങളു​ടെ കാലടി​കളെ നയിക്കാൻ കഴിയും. (സങ്കീർത്തനം 55:22) സ്വന്തം അനുഭ​വ​ത്തിൽ നിന്നു സങ്കീർത്ത​ന​ക്കാ​ര​നായ ദാവീദ്‌ ഇങ്ങനെ എഴുതി: “ഞാൻ യഹോ​വ​യോ​ടു അപേക്ഷി​ച്ചു; അവൻ എനിക്കു ഉത്തരമ​രു​ളി എന്റെ സകലഭ​യ​ങ്ങ​ളിൽനി​ന്നും എന്നെ വിടു​വി​ച്ചു. ഈ എളിയവൻ നിലവി​ളി​ച്ചു; യഹോവ കേട്ടു; അവന്റെ സകലക​ഷ്ട​ങ്ങ​ളിൽനി​ന്നും അവനെ രക്ഷിച്ചു.”—സങ്കീർത്തനം 34:4, 6.

അതു​കൊണ്ട്‌ ഏതു വിധേ​ന​യും, നിങ്ങളു​ടെ ഏറ്റവും ആഴമേ​റിയ വികാ​രങ്ങൾ പോലും യഹോ​വ​യാം ദൈവത്തെ അറിയി​ക്കുക. അപ്പൊ​സ്‌ത​ല​നായ പത്രൊസ്‌ ഇങ്ങനെ എഴുതി, “അവൻ നിങ്ങൾക്കാ​യി കരുതു​ന്ന​താ​ക​യാൽ നിങ്ങളു​ടെ സകല ചിന്താ​കു​ല​വും അവന്റെ​മേൽ ഇട്ടു​കൊൾവിൻ.” (1 പത്രൊസ്‌ 5:7) യഹോ​വ​യു​ടെ സ്‌നേ​ഹ​ദ​യയെ പ്രതി വിലമ​തി​പ്പു വളർത്തി​യെ​ടു​ക്കു​ന്ന​തിന്‌, 34, 77, 86, 103, 139 എന്നീ സങ്കീർത്ത​നങ്ങൾ എന്തു​കൊണ്ട്‌ ശ്രദ്ധാ​പൂർവം ഒന്നു വായിച്ചു കൂടാ? ഇവയെ കുറി​ച്ചുള്ള ധ്യാനം, യഹോവ വിശ്വ​സ്‌ത​നാണ്‌ എന്നും നിങ്ങൾ വിജയം വരിക്കാൻ അവൻ ആഗ്രഹി​ക്കു​ന്നു എന്നും ഉള്ള നിങ്ങളു​ടെ ബോധ്യ​ത്തെ ശക്തി​പ്പെ​ടു​ത്തും. അവന്റെ വചനം വായി​ക്കു​ന്ന​തി​നാൽ, ദാവീദ്‌ രാജാ​വി​നെ പോലെ തന്നെ നിങ്ങൾക്കും അനുഭ​വ​പ്പെ​ടും. അവൻ ഇങ്ങനെ എഴുതി: “എന്റെ ഹൃദയ​ത്തി​ന്റെ ആകുല​തകൾ വർധി​ക്കു​മ്പോൾ അങ്ങ്‌ നൽകുന്ന ആശ്വാസം എന്നെ ഉന്മേഷ​വാ​നാ​ക്കു​ന്നു.”—സങ്കീർത്തനം 94:19, പി. ഒ. സി ബൈബിൾ.

ക്ഷമ പ്രകട​മാ​ക്കുക—പൂർവ​സ്ഥി​തി​യി​ലാ​കാൻ സമയ​മെ​ടു​ക്കും

മറ്റുള്ള​വ​രു​ടെ സഹായ​ത്തോ​ടെ ഒരു ആഹാര​ശീല വൈക​ല്യ​ത്തിന്‌ എതിരെ പോരാ​ടു​ന്ന​വ​രിൽ മിക്കവ​രും ഒരൊറ്റ രാത്രി കൊണ്ട്‌ പൂർവ​സ്ഥി​തി പ്രാപി​ക്കു​ന്നില്ല. തുടക്ക​ത്തിൽ പരാമർശിച്ച ജെയ്‌മി​യു​ടെ കാര്യ​മെ​ടു​ക്കുക. സഹായം ലഭിച്ചു തുടങ്ങി​യ​തി​നു ശേഷം പോലും ആഹാരം കഴിക്കാൻ അവൾക്കു ബുദ്ധി​മു​ട്ടാ​യി​രു​ന്നു, ഒരു പാത്രം സിരീയൽ പോലും. അവൾ പറയുന്നു: “ഇത്‌ എന്റെ ആരോ​ഗ്യ​ത്തിന്‌ അത്യാ​വ​ശ്യ​മാണ്‌ എന്ന്‌ ഞാൻ കൂടെ​ക്കൂ​ടെ എന്നെത്തന്നെ ഓർമി​പ്പി​ക്കേ​ണ്ടി​യി​രു​ന്നു, അല്ലാത്ത​പക്ഷം ഞാൻ മരിച്ചു​പോ​കു​മെ​ന്നും. ഓരോ സ്‌പൂൺ സിരീ​യ​ലും ഞാൻ എത്ര കഷ്ടപ്പെ​ട്ടാണ്‌ ഇറക്കി​യി​രു​ന്നത്‌ എന്നോ!”

ഒരവസ​ര​ത്തിൽ മരണത്തി​ന്റെ വക്കോ​ളം​പോ​ലും എത്തിയ ജെയ്‌മി തന്റെ ആഹാര​ശീല വൈക​ല്യം തരണം​ചെ​യ്യാൻതന്നെ നിശ്ചയി​ച്ചു. അവൾ ഇപ്രകാ​രം പറഞ്ഞു: “മരണത്തി​നു കീഴട​ങ്ങാൻ ഞാൻ തയ്യാറല്ല. ഇതി​നെ​തി​രെ ഞാൻ പോരാ​ടി ജയിക്കു​ക​തന്നെ ചെയ്യും. അനൊ​റെ​ക്‌സി​യയെ ഞാൻ കീഴ്‌പെ​ടു​ത്തും. അതു ബുദ്ധി​മു​ട്ടാണ്‌, പക്ഷേ ഞാൻ അതു ചെയ്‌തി​രി​ക്കും.” നിങ്ങൾക്കും അതിനാ​കും!

[അടിക്കു​റി​പ്പു​കൾ]

ഉല്‌പത്തി 12:11; 29:17; 39:7; 1 ശമൂവേൽ 17:42; 25:3 എന്നിവ കാണുക.

[19-ാം പേജിലെ ചിത്രം]

ഒരു സമീകൃത ആഹാര​ക്ര​മ​ത്തി​നും മിതമായ അളവി​ലുള്ള വ്യായാ​മ​ത്തി​നും വണ്ണം നിയ​ന്ത്രി​ക്കു​ന്ന​തി​നു നിങ്ങളെ സഹായി​ക്കാൻ കഴിയും