കൂടുതൽ ചെയ്യാൻ നിങ്ങൾ ആഗ്രഹിക്കുന്നുവോ?
1 യേശു രാജ്യത്തെ അമൂല്യമായ ഒരു നിധിയോട്‌ ഉപമിച്ചു. (മത്താ. 13:44-46) രാജ്യസുവാർത്ത പ്രചരിപ്പിക്കുന്ന വേലയും വിലയേറിയ ഒരു നിധിയാണ്‌. ഈ ശുശ്രൂഷയിൽ പൂർണമായ ഒരു പങ്കുണ്ടായിരിക്കാൻ ഒരു അളവോളം ആത്മത്യാഗം ആവശ്യമാണെങ്കിലും നമ്മുടെ ജീവിതത്തിൽ അതിനായിരിക്കണം പ്രഥമസ്ഥാനം. (മത്താ. 6:19-21) രാജ്യസേവനത്തിൽ കൂടുതൽ ചെയ്യാൻ നിങ്ങൾ ആഗ്രഹിക്കുന്നുവോ?
2 ഈ അവശ്യകാര്യങ്ങൾ പരിഗണിക്കുക: ശുശ്രൂഷയിൽ നമ്മുടെ വ്യക്തിപരമായ പങ്കു വർധിപ്പിക്കാൻ ചെയ്യേണ്ട ചില അവശ്യകാര്യങ്ങളുണ്ട്‌: (1) രാജ്യതാത്‌പര്യങ്ങൾ ജീവിതത്തിൽ ഒന്നാമതു വെക്കാൻ ദൃഢചിത്തരായിരിക്കണം (മത്താ. 6:33); (2) യഹോവയിൽ വിശ്വസിക്കുകയും ആശ്രയിക്കുകയും വേണം (2 കൊരി. 4:1, 7); (3) ആത്മാർഥവും നിരന്തരവുമായ പ്രാർഥനയിലൂടെ ദൈവത്തിന്റെ സഹായം തേടണം (ലൂക്കോ. 11:8-10); (4) പ്രാർഥനയ്‌ക്കു ചേർച്ചയിൽ പ്രവർത്തിക്കണം.—യാക്കോ. 2:14, 17.
3 നമ്മുടെ ശുശ്രൂഷ വികസിപ്പിക്കുന്നതിനുള്ള മാർഗങ്ങൾ: ഓരോ മാസവും ക്രമമായി ശുശ്രൂഷയിൽ കുറച്ചു സമയം ചെലവഴിക്കുക എന്ന അടിസ്ഥാനലക്ഷ്യം നമുക്കെല്ലാം വെക്കാനാകും. എന്നാൽ അനൗപചാരിക സാക്ഷീകരണത്തിനുള്ള എല്ലാ അവസരങ്ങളും ഉപയോഗപ്പെടുത്തുന്നതിനെയും അവതരണങ്ങൾ കൂടുതൽ അർഥവത്താക്കുന്നതിനെയും മടക്കസന്ദർശനങ്ങളുടെ ഫലപ്രദത്വം വർധിപ്പിക്കുന്നതിനെയും പുരോഗമനാത്മകമായ ഭവന ബൈബിളധ്യയനങ്ങൾ നടത്താൻ ശ്രമിക്കുന്നതിനെയും കുറിച്ച്‌ നിങ്ങൾ ചിന്തിച്ചിട്ടുണ്ടോ? നിങ്ങൾക്കു സഹായ പയനിയറിങ്‌ അല്ലെങ്കിൽ സാധാരണ പയനിയറിങ്‌ നടത്താനോ ആവശ്യം അധികമുള്ളിടത്തു സേവിക്കാനോ കഴിയുമോ? നിങ്ങൾ സ്‌നാനമേറ്റ സഹോദരനാണെങ്കിൽ ശുശ്രൂഷാദാസനോ മൂപ്പനോ വേണ്ട യോഗ്യതയിൽ എത്തിച്ചേരാനാകുമോ? (1 തിമൊ. 3:1, 10) ബെഥേൽ സേവനത്തിനോ ഏകാകികളായ സഹോദരന്മാർക്കുള്ള ബൈബിൾ സ്‌കൂളിലോ ക്രിസ്‌തീയ ദമ്പതികൾക്കുള്ള ബൈബിൾ സ്‌കൂളിലോ പങ്കെടുക്കുന്നതിന്‌ അപേക്ഷിച്ചുകൊണ്ട്‌ നിങ്ങൾക്കു ശുശ്രൂഷ വികസിപ്പിക്കാനാകുമോ?—ലൂക്കോ. 10:2.
4 കായികവിനോദത്തിൽ വളരെയധികം സമയം ചെലവഴിച്ചിരുന്ന മുഴുസമയ ജോലിക്കാരനായ ഒരു സഹോദരനെ സാധാരണ പയനിയറിങ്‌ ഏറ്റെടുക്കാൻ പ്രോത്സാഹിപ്പിക്കുകയുണ്ടായി. അദ്ദേഹം സഹായ പയനിയറിങ്‌ തുടങ്ങി, തുടർന്ന്‌ തന്റെ കാര്യാദികൾ ക്രമീകരിച്ചുകൊണ്ട്‌ മുഴുസമയ ശുശ്രൂഷ ഏറ്റെടുത്തു. പിന്നീടു ശുശ്രൂഷാ പരിശീലന സ്‌കൂളിൽ (ഏകാകികളായ സഹോദരന്മാർക്കുള്ള ബൈബിൾ സ്‌കൂൾ) പങ്കെടുത്തു, സർക്കിട്ട്‌ മേൽവിചാരക നിയമനം ഏറ്റെടുക്കാൻ അത്‌ അദ്ദേഹത്തെ സഹായിച്ചു. ലഭിച്ച പ്രോത്സാഹനത്തോട്‌ അനുകൂലമായി പ്രതികരിച്ചതിൽ സഹോദരൻ വളരെ സന്തുഷ്ടനാണ്‌. രാജ്യസേവനത്തിൽ കൂടുതൽ ചെയ്യാൻ തീരുമാനിച്ചതിന്റെ ഫലമായി താൻ ഇപ്പോൾ ഏറെ സന്തുഷ്ടനാണെന്ന്‌ അദ്ദേഹത്തിന്‌ ഉറപ്പുണ്ട്‌.
5 തങ്ങളെത്തന്നെ ലഭ്യമാക്കുന്നവരെ യഹോവ അനുഗ്രഹിക്കുന്നു. (യെശ. 6:8) നിങ്ങളുടെ ശുശ്രൂഷ വികസിപ്പിക്കുന്നതിൽനിന്നും തത്‌ഫലമായി ഉണ്ടാകുന്ന വർധിച്ച സംതൃപ്‌തിയും നവോന്മേഷവും ആസ്വദിക്കുന്നതിൽനിന്നും യാതൊന്നും നിങ്ങളെ തടയാതിരിക്കട്ടെ.