3 | ബൈബിൾകഥാപാത്രങ്ങളിൽനിന്ന്‌ പ്രയോജനം നേടുക
ബൈബിളിൽ . . . ‘നമ്മുടേതുപോലെ വികാരങ്ങളുള്ള’ വിശ്വസ്‌തരായ സ്‌ത്രീപുരുഷന്മാരെക്കുറിച്ച്‌ പറയുന്നുണ്ട്‌.—യാക്കോബ്‌ 5:17.
ഈ ബൈബിൾവാക്യത്തിന്റെ അർഥം:
പലപല മനോവികാരങ്ങളിലൂടെ കടന്നുപോയവരുടെ ജീവിതാനുഭവങ്ങൾ ബൈബിളിലുണ്ട്‌. അതു വായിക്കുമ്പോൾ നമ്മുടേതിനു സമാനമായ അനുഭവങ്ങളുള്ളവരെ കണ്ടെത്താൻ കഴിഞ്ഞേക്കും.
ഇത്‌ എങ്ങനെ സഹായിക്കും?
മറ്റുള്ളവർ നമ്മളെ മനസ്സിലാക്കണമെന്നാണ്‌ നമ്മുടെയെല്ലാം ആഗ്രഹം, പ്രത്യേകിച്ചും മാനസികപ്രശ്‌നവുമായി നമ്മൾ മല്ലിടുകയാണെങ്കിൽ. ബൈബിളിലെ സ്‌ത്രീപുരുഷന്മാരുടെ ജീവിതാനുഭവങ്ങൾ വായിക്കുമ്പോൾ നമ്മൾ ചിന്തിക്കുന്നതുപോലെ തന്നെയാണല്ലോ അവരും ചിന്തിക്കുന്നത്‌, നമ്മുടെ അതേ വികാരങ്ങളാണല്ലോ അവർക്കുമുള്ളത്‌ എന്നു നമ്മൾ തിരിച്ചറിഞ്ഞേക്കാം. നമുക്കു മാത്രമല്ല ഇതുപോലുള്ള പ്രശ്‌നങ്ങൾ ഉണ്ടായിട്ടുള്ളത്‌ എന്ന്‌ ഓർക്കുമ്പോൾ നമുക്ക്‌ ഒരു ആശ്വാസം തോന്നും.
നിങ്ങൾക്ക്‌ എപ്പോഴെങ്കിലും തോന്നിയിട്ടുണ്ടോ: ‘ഇനി വയ്യ, മടുത്തു,’ ‘അൽപ്പംപോലും മുന്നോട്ടുപോകാനാകില്ല’ എന്ന്‌? അങ്ങനെ തോന്നിയിട്ടുള്ള പലരെയുംകുറിച്ച്‌ ബൈബിൾ പറയുന്നുണ്ട്‌. അവരിൽ ചിലരാണ്‌ മോശ, ഏലിയ, ദാവീദ്‌.—സംഖ്യ 11:14; 1 രാജാക്കന്മാർ 19:4; സങ്കീർത്തനം 55:4.
“കടുത്ത മനോദുഃഖത്തിലായിരുന്ന” ഹന്ന എന്നൊരു സ്‌ത്രീയെക്കുറിച്ച്‌ ബൈബിൾ പറയുന്നുണ്ട്‌. കുട്ടികളില്ലാതിരുന്നതും അതിന്റെ പേരിൽ ഭർത്താവിന്റെ രണ്ടാം ഭാര്യ കുത്തുവാക്കുകൾ പറഞ്ഞ്‌ നോവിച്ചതും ആണ്‌ ഹന്നയെ വിഷമിപ്പിച്ചത്‌.—1 ശമുവേൽ 1:6, 10.
ഇയ്യോബാണ്‌ മറ്റൊരു വ്യക്തി. നല്ല വിശ്വാസമുള്ള ഒരാളായിരുന്നെങ്കിലും അദ്ദേഹം കടുത്ത മാനസികവേദന അനുഭവിച്ചു. ഇയ്യോബ്‌ ഒരിക്കൽ ഇങ്ങനെ പറഞ്ഞു: “ഈ ജീവിതത്തോട്‌ എനിക്കു വെറുപ്പാണ്‌, എനിക്ക്‌ ഇനി ജീവിക്കേണ്ടാ.”—ഇയ്യോബ്‌ 7:16.
അസ്വസ്ഥമാക്കുന്ന ചിന്തകൾ വന്നപ്പോൾ ഇവരെല്ലാം എന്താണ്‌ ചെയ്‌തത്‌ എന്നു പഠിക്കുന്നത്‌ നമുക്കു പ്രയോജനം ചെയ്യും. സമാനമായ പ്രശ്‌നങ്ങൾ നേരിടുമ്പോൾ പിടിച്ചുനിൽക്കാനുള്ള മനോബലം നമുക്ക്‌ അതിലൂടെ കിട്ടും.