Амьдрал ба үхлийн тухай үнэн

Библийн «Эхлэл» номыг уншвал Бурхан анхны хүн Адамд «Чи энэ цэцэрлэгийн аль ч модны жимсийг дураараа идэж болно. Харин чи сайн мууг мэдүүлэгч модны жимснээс огт идэж болохгүй. Чи түүнээс идсэн тэр өдөртөө л зайлшгүй үхнэ! хэмээн айлдав» гэж хэлсэн байдаг (Эхлэл 2:16, 17). Тэгэхлээр Бурхны тушаалыг биелүүлбэл Адам үхэхгүй, Еден дэх цэцэрлэгт үүрд мөнх амьдрах байжээ.

Дуулгавартай байж, мөнх амьдрах байсан Адам Бурхны тушаалыг зөрчин эхнэр Евагийнхаа өгсөн хориотой модны жимснээс идсэн (Эхлэл 3:1–6). Үүнийх нь хор уршгийг бид өнөөдөр амсдаг. Элч Паул үүнийг ингэж тайлбарласан: «Нэг хүнээс болж бүх хүн нүгэлтэй болсон. Нүгэлтэйн улмаас үхдэг болсон. Ийнхүү үхэл бүх хүнд тархжээ. Яагаад гэвэл бүгдээрээ нүгэл үйлджээ» (Ром 5:12). «Нэг хүн» гэдэг нь Адам юм. Тэгвэл нүгэл гэж юу вэ? Нүгэл нь яагаад үхэлд хүргэдэг вэ?

Адам Бурхны хуулийг зориуд зөрчсөн нь нүгэл байлаа (1 Ёохан 3:4). Бурхны хэлсэн ёсоор нүглийн шийтгэл нь үхэл байв. Адам болон түүний үр удам Бурханд дуулгавартай байсан бол нүгэлгүй, хэзээ ч үхэхгүй байх байсан. Бурхан хүнийг үхдэгээр биш, үүрд амьдрахаар бүтээсэн.

Үнэхээр ч Библид бичсэнээр, үхэл «бүх хүнд тархжээ». Гэхдээ хүнийг үхэхэд биеэс нь гараад үргэлжлэн амьдардаг зүйл байдаг уу? Олон хүн үүнтэй санал нийлж, хүний биед үхэшгүй мөнхийн сүнс байдаг гэж хэлэх биз ээ. Хэрэв тийм бол Бурхан Адамд худал хэлсэн гэсэн үг. Яагаад тэгж хэлж болох вэ? Хэрэв хүнийг үхэхэд биеэс нь гараад өөр ертөнцөд очдог зүйл байсан бол үхэл нь шийтгэл биш болж таарна. Библид Бурхныг «худал ярьдаггүй» гэж байдаг (Еврей 6:18). Үнэн хэрэгтээ Сатан Евад «Та нар ерөөсөө үхэхгүй» гэж хэлсэн (Эхлэл 3:4).

Тэгвэл үхэшгүй мөнхийн сүнс байдаггүй юм бол, хүн үхээд яг яадаг вэ гэсэн асуулт гарч ирнэ.

БИБЛИД ҮНЭН БИЙ

Библийн «Эхлэл» номонд «ЭЗЭН Бурхан тоос шорооноос хүнийг бүтээж, амин амьсгалыг хамраар нь үлээж оруулахад, хүн амьд оршигч болжээ» хэмээн бичсэн байдаг. «Амьд оршигч» гэж орчуулсан нефешa гэдэг еврей үгийг үгчлэн орчуулбал «амьсгалтай бүтээл» гэсэн утгатай (Эхлэл 2:7).

Тэгэхлээр Бурхан Адамд «амин амьсгал» буюу амийн хүчийг өгөхөд тэрээр амьд оршигч болсон гэж Библид тодорхой бичсэн байна. Харин Бурхан хүнд үхэшгүй мөнхийн сүнс өгсөн гэж бичээгүй. Тийм учраас Библиэс «үхэшгүй мөнхийн сүнс» гэсэн үг хайсан ч олдохгүй байх нь ээ.

Тэгвэл Библид байдаггүй энэ сургаалыг яагаад олон шашин номлодог вэ? Энэ асуултад хариу авахын тулд эртний Египетийн тухай мэдэж авъя.

БИБЛИЙН БУС СУРГААЛ ДЭЛГЭРСЭН НЬ

МЭӨ V зуунд амьдарч байсан түүхч Херодот, «үхэшгүй мөнхийн сүнс байдаг гэсэн үзлийг анх дэмжсэн хүмүүс» бол египетчүүд юм гэжээ. Мөн эртний вавилончууд үхэшгүй мөнхийн сүнс байдаг гэсэн үзлийг шууд хүлээн зөвшөөрч байв. МЭӨ 332 онд Их Александр Ойрх Дорнодыг эзэлсэн үед Грекийн философичид энэ сургаалыг дэлгэрүүлсэн. Удалгүй Грекийн эзэнт гүрэн даяар тархжээ.

МЭ I зуунд иудейн шашны ессенчүүд, фарисайчууд гэсэн нэр нөлөө бүхий хоёр бүлэглэл, хүнийг үхэхэд сүнс нь үлддэг хэмээн номлож байжээ. Нэгэн нэвтэрхий тольд «Иудейчүүд грекчүүдийн үзэл бодлыг, гол нь Платоны гүн ухааныг дэмждэг болсон учраас үхэшгүй мөнхийн сүнсэнд итгэх болсон» хэмээн бичжээ («Jewish Encyclopedia»). Мөн түүнчлэн I зууны иудейн түүхч Иосеф энэ сургаалыг Ариун Судраас биш, «Грекчүүдийн итгэл үнэмшил»-ээс гаралтай гэжээ. Энэхүү итгэл үнэмшлийг тэрээр үлгэр домгийн цуглуулга гэж үздэг байсан.

Грекийн соёлын нөлөө ихсэхийн хэрээр Христийн дагалдагч хэмээн нэрийдэгчид христийн бус сургаалыг баримтлах болжээ. Түүхч Иона Лендерин: «Платон хүний сүнс сайхан газар байснаа уруудан доройтсон ийм ертөнцөд амьдрах болдог гэсэн таамаг дэвшүүлсэн. Үүнээс болоод Христийн шашин Платоны сургаалд ууссан» гэжээ. Ийнхүү Библийн бус сургаал «Христийн» гэгдэх сүмд нэвтрэн орж, гол сургаал нь болсон.

«ҮНЭН ТА НАРЫГ ЧӨЛӨӨЛНӨ»

I зууны үед элч Паул ингэж анхааруулж байжээ. «Хожмын цагт зарим хүн итгэдэг юмандаа итгэхээ болихыг Бурхан тодорхой хэлдэг. Учир нь тэд Бурхнаас эхтэй гэмээр худал үг болон чөтгөрүүдийн сургаалыг анхаарснаас болж итгэхээ болино» (1 Тимот 4:1). Юутай үнэн үг вэ! Үхэшгүй мөнхийн сүнсний тухай сургаал бол «чөтгөрүүдийн сургаал» юм. Библийн үндэсгүй бөгөөд эртний хуурамч шашны сургаал, гүн ухаанаас үүдэлтэй ажээ.

Есүс: «[Та нар] үнэнийг ойлгож, үнэн та нарыг чөлөөлнө» гэж хэлсэн (Ёохан 8:32). Библийн үнэнийг зөв ойлговол өнөөгийн шашны олон ёс заншил, Бурхныг гутаан доромжилдог сургаалд боолчлогдохгүй. Түүнээс гадна Бурхны Үгийн ачаар нас барагсдын хойноос хийдэг зан үйл, мухар сүсэг гэдэг дөнгөнөөс чөлөөлөгдөнө («Нас барагсад хаана байдаг вэ?» гэсэн хавсралтыг үзнэ үү).

Бүтээгч маань биднийг 70, 80-хан жил дэлхий дээр амьдруулаад, өөр ертөнцөд мөнхөд амьдруулахыг зориогүй. Дуулгавартай хүмүүсийг энэ дэлхий дээр мөнх амьдруулах нь түүний анхны санаа зорилго байжээ. Энэхүү агуу санаа зорилго нь хүн төрөлхтнийг гэсэн Бурхны хайрын илрэл бөгөөд заавал хэрэгжинэ (Малахи 3:6). Бурхнаар удирдуулан дуулалч: «Зөв шударга хүн газар нутгийг өвлөж, түүнд мөнхөд оршин суух болно» хэмээн бичжээ (Дуулал 37:29).