Kʼuʼkaʼa Kaʼ Mas Pulʼoolte a Kambʼal?

1. Kʼuʼ u kiʼil tiʼi tech wa kaʼ a pulʼoolte a xok Bʼibʼle?

Leʼek kʼuʼ a kambʼalta waʼyeʼ tupektzil a walak u kaʼansik a Bʼibʼle u mukʼaʼankunta a yakunaj tiʼi Jehovah. A yakunaj adʼaʼa tzaj ti meyajtik u pach tiʼi kaʼ mukʼaanak. (1 Pedro 2:2) Leʼek a kuxtal a tan a wooltik tech pʼatal wa kaʼ mas natzʼakech tutzeel a Dʼioso tanil a xokik u Tʼan. Xoko Juan 17:3; Judas 21.

Tanil a mas eeltik a Dʼioso, a tzʼoksaj mukʼaantal u kaʼa. A Tzʼoksaj bʼel u kaʼa u yaanteech a bʼeteʼ kʼuʼ u kʼati a Dʼioso. (Hebreos 11:1, 6) Bʼel u kaʼa u jiseech kaʼ a jeleʼ a tukul y kaʼ a jeleʼ a kuxtal tiʼi a mas kiʼ. Xoko Hechos 3:19.

2. Bʼikiʼ ti jedʼeʼek a waantik u laakʼ a mak etel kʼuʼ a tan a kambʼaltik?

Chen, a kʼatijak a adʼä tiʼi u laakʼ mak kʼuʼ a kambʼalta—laj kiʼ tiki wich ti wadʼik a kichʼpan pektzil. Tanil a mas kambʼaltik a Bʼibʼle, bʼel a kaʼa känä bʼikiʼ kaʼ usarte a Bʼibʼle tiʼi kaʼ explenarte a tzʼoksaj tupach Jehovah y a kichʼpan pektzil. Xoko Romanos 10:13-15.

Yaabʼ mak walak u kaal u adʼä a kichʼpan pektzil tiʼi u ʼamiigoj wa xan tiʼi u yetʼokilooʼ. Adʼä ich kʼuʼunil. Tuwich kaʼ adʼä ti maʼ tojooʼ u religion, adʼä tiʼijooʼ u pektzil u promesaj a Dʼioso. U laakʼa, kʼäjaʼanak tech ti leʼek a kristiyaano mas kiʼooʼ tuwich a modʼo a kiʼ, tuwich a bʼaʼal a kaʼ adʼä. Xoko 2 Timoteo 2:24, 25.

3. Kʼuʼ ti ʼamiigojil etel a Dʼios jedʼeʼek a wilik u kiʼil?

Tanil a xokik u Tʼan a Dʼioso jedʼeʼek u yaantikech kaʼ chʼiik a tzʼoksaj. Chunbʼeelil, jedʼeʼek a ʼamiigojtik a Jehovah. Jedʼeʼek a tatintik a Dʼioso inchech juntuulak ichil u familia. Xoko 2 Corintios 6:18.

4. Bʼikiʼ ti jedʼeʼek a mas chʼiil?

Jedʼeʼek a chʼiil ichil a tzʼoksaj wa kaʼ a pulʼoolte a xokik u Tʼan a Dʼioso. (Hebreos 5:13, 14) Kʼaate tiʼi juntuul Testigo tiʼi Jehovah kaʼ uchuk u xok Bʼibʼle ta wetel, usarte a juʼum What Can the Bible Teach Us? Ti kaʼ mas känä kʼuʼ a yan ichil u Tʼan a Dʼioso mas u kiʼtal a kuxtal. Xoko Salmo 1:1-3; 73:27, 28.

A kichʼpan pektzil walak u talel etel a Jehovah, leʼek a Dʼios a kiʼ u yool. Jedʼeʼek a natzʼtal tutzeel tanil a natzʼtal tutzeel u jente. (Hebreos 10:24, 25) Tanil a yaaltik a wich a bʼetik kʼuʼ u kʼati a Jehovah, tan a käxtik a chukul kuxtal—kuxtal ti bʼebʼeel. Natzʼtal tutzeel Dʼios a mas kiʼ kaʼ a bʼeteʼ. Xoko 1 Timoteo 1:11; 6:19.