MAAN-KƲƲR SEBRE

1 A Zeova boola a Moyiizi, n zĩnd sɛk-roogẽ wã+ n gom ne-a n yeele: 2 “Gom ne Israyɛll nebã n yeel-b yaa: ‘Yãmb sʋka, ned sã n dat n yãk rũng yir-dũmsã sʋk n kõ a Zeova tɩ yɩ maoongo, a segd n yãk-a-la rũm-bõonegã wall rũm-bɛdã sʋka.+

3 “‘A maoongã sã n yaa maoong sẽn yõogd bugum a sẽn yãk rũm-bɛdã sʋka, a segd n waa ne raoog sẽn pa tar zanga.+ A segd n tall-a-la ne yamleoog+ n wa a Zeova taoore, sɛk-roogã rignoorẽ. 4 A segd n tika maoong sẽn yõogd bugmã zugã ne a nugu, la Wẽnnaam na n deega kũunã, n kõ a yel-wẽnã sugri.

5 “‘Rẽ poore, b segd n kodga lol-pollã a Zeova taoore, la a Aarõ kom-dibli wã sẽn yaa maan-kʋʋdbã+ na n talla zɩɩmã n wa, n yãk n mes tẽn-kugrã sẽn be sɛk-roogã rignoorẽ wã kɩremsã fãa.+ 6 B segd n sɩɩga maoong sẽn yõogd bugmã rũngã, la b bees-a.+ 7 A Aarõ kom-dibli wã sẽn yaa maan-kʋʋdbã segd n ninga bugum tẽn-kugrã zugu,+ la b maneg raad n ning bugmã zugu. 8 A Aarõ kom-dibli wã sẽn yaa maan-kʋʋdbã na n manega maoongã nemd+ ne a zugã, n paas kaamã sẽn lud yiimã n dogl raadã sẽn be bugmẽ wã zugu, tẽn-kugrã zugu. 9 B segd n pegsa a yãadã ne a karsã ne koom, la maan-kʋʋdã segd n yõoga a tõrã fãa tẽn-kugrã zug sẽn na yɩl t’a bug-zõosã nus tɩ yɩ maoong sẽn yõogd bugum, rat n yeel tɩ maoong b sẽn maand ne bugum, tɩ tar yũ-noog* a Zeova yĩnga.+

10 “‘A maoongã sã n yaa maoong sẽn yõogd bugum a sẽn yãk rũm-bõonegã sʋka,+ rat n yeel tɩ pe-ra-poal wall bʋʋsã sʋka, a segd n waa ne raoog sẽn pa tar zanga.+ 11 B segd n kodg-a-la tẽn-kugrã rɩtg sẽnes a Zeova taoore, la a Aarõ kom-dibli wã sẽn yaa maan-kʋʋdbã na n yãka zɩɩmã n mes tẽn-kugrã kɩremsã fãa.+ 12 Maan-kʋʋdã na n beesa a nemdã, n naag a zugã ne kaamã sẽn lud yiimã n maneg n dogl raadã sẽn be bugmẽ wã zugu, tẽn-kugrã zugu. 13 B na n pegsa yãadã ne karsã ne koom, la maan-kʋʋdã segd n talla a tõrã fãa n wa yõog tẽn-kugrã zug sẽn na yɩl t’a bug-zõosã nusi. Yaa maoong sẽn yõogd bugum, rat n yeel tɩ maoong b sẽn maand ne bugum, tɩ tar yũ-noog* a Zeova yĩnga.

14 “‘La a sã n na n kõo a Zeova bõn-yɩgdg tɩ yɩ maoong sẽn yõogd bugum, a na n yãka walã bɩ marwan-bi+ wã sʋk n kõ. 15 Maan-kʋʋdã na n tall-a lame n wa tẽn-kugrẽ wã n kodg-a ne a nug-yẽega, la a yõog-a tẽn-kugrã zug t’a bug-zõosã nusi. La b segd n basame t’a zɩɩmã rʋʋg tẽn-kugrã kɩrengã. 16 A segd n yãka a yoosengã, la a gʋs a kõbdã n lob tẽn-kugrã sɛɛga, yaang sẽnese, tompɛglmã*+ zĩigẽ. 17 B na n pãrg-a-la a pɩgsã zĩigẽ, la b pa segd n pasg-a a yiib ye. Rẽ poore, maan-kʋʋdã na n yõog-a-la tẽn-kugrã zugu, raadã sẽn be bugmã zugã zug sẽn na yɩl t’a bug-zõosã nusi. Yaa maoong sẽn yõogd bugum, rat n yeel tɩ maoong b sẽn maand ne bugum, tɩ tar yũ-noog* a Zeova yĩnga.

2 “‘Ned* sã n tall kood biis kũun+ n wa na n kõ a Zeova, a kũunã segd n yɩɩ zom-bãanega. A segd n walga kaam zom-bãanegã zugu, la a rogl wisd sẽn yaa pɛɛlg a zugu.+ 2 Rẽ poore, a na n talla kũunã n wa kõ a Aarõ kom-dibli wã sẽn yaa maan-kʋʋdbã. Maan-kʋʋdã na n yãka zomã ne kaamã sẽn kalem taabã nug-pidingu, la a yãk wisdã sẽn yaa pɛɛlgã, tɩ makd kũunã tõre.*+ A na n yõoga rẽ tẽn-kugrã zug t’a bug-zõosã nusi, tɩ yɩ kũun b sẽn yõogd ne bugum, tɩ tar yũ-noog* a Zeova yĩnga. 3 Bũmb ning fãa sẽn kell kood biis kũunã pʋgẽ wã yaa a Aarõ ne a kom-dibli wã rẽnda.+ Yaa bũmb sẽn yaa sõng wʋsgo,+ maand nins sẽn maand ne bugum n kõt a Zeova wã sʋka.

4 “‘Yãmb sã n wa ne bur b sẽn maan wʋngẽ n na n kõ tɩ yɩ kũuni, segd n yɩɩ bur sẽn maan ne zom-bãanega, rat n yeel tɩ bur sẽn pa ning rabɩll la sẽn yaa gils wa maanf n kalem kaam, wall bur-pakls sẽn pa ning rabɩll n mes kaam.+

5 “‘Yãmb kũunã sã n yaa bur sẽn kɩɩm koɛɛng ne powalle,+ segd n yɩɩ bur sẽn maan ne zom-bãanega, sẽn pa ning rabɩlle, la sẽn kalem ne kaam. 6 B segd n kao-a lame. Yãmb segd n walga kaam a zugu.+ Yaa kood biis kũuni.

7 “‘Yãmb kũunã sã n yaa bur b sẽn kɩɩm kaam pʋg ne rʋko, segd n yɩɩ bur sẽn maan ne zom-bãaneg sẽn kalem ne kaam. 8 Yãmb segd n waa ne kood biis kũun sẽn maan ne bõn-kãensã n kõ a Zeova. Y na n talla kũunã n wa kõ maan-kʋʋdã, tɩ maan-kʋʋdã tall-a n kolg tẽn-kugrã. 9 Maan-kʋʋdã na n yãka kood biis kũunã bilf tɩ makd kũunã tõre,*+ n yõog tẽn-kugrã zug t’a bug-zõosã nusi, tɩ yɩ kũun b sẽn yõogd ne bugum, tɩ tar yũ-noog* a Zeova yĩnga.+ 10 Bũmb ning sẽn kell kood biis kũunã pʋgẽ wã yaa a Aarõ ne a kom-dibli wã rẽnda. Yaa bũmb sẽn yaa sõng wʋsgo, maand nins sẽn maand ne bugum n kõt a Zeova wã sʋka.+

11 “‘Kood biis kũun y sẽn na n kõ a Zeova pa segd n ning rabɩll ye.+ Bala yãmb pa segd n yõog bũmb sẽn ning rabɩlle, wall y yõog sɩɩd sẽn na yɩl t’a bug-zõosã nusi, tɩ yɩ kũun b sẽn yõogd ne bugum n kõ a Zeova ye.

12 “‘Yãmb tõe n tall-b lame n wa kõ a Zeova tɩ yɩ dẽenem biis kũuni,+ la y pa segd n yõog-b tẽn-kugrã zug sẽn na yɩl tɩ yɩ kũun sẽn tar yũ-noog ye.

13 “‘Kood biis kũun fãa yãmb sẽn na n kõ segd n ninga yamsem. Yãmb pa segd n bas tɩ y Wẽnnaamã kaool yamsem kong yãmb kood biis kũun pʋgẽ ye. Yãmb na n naaga yamsem+ n kõ y kood biis kũun fãa.

14 “‘Yãmb sã n na n kõ a Zeova dẽenem biis tɩ yɩ kood biis kũuni, yãmb segd n waa ne kood biis sẽn yaa paal* sẽn sẽ n pãre, tɩ yɩ yãmb dẽenem biisã kood biis kũuni.+ 15 Yãmb segd n walga kaam kũunã zugu, la y rogl wisd sẽn yaa pɛɛlg a zugu. Yaa kood biis kũuni. 16 Maan-kʋʋdã na n yãka kũunã bilf tɩ makd kũunã tõre,*+ rat n yeel tɩ zom-pãrgã ne kaamã bilfu, n paas wisd sẽn yaa pɛɛlgã fãa n yõog tẽn-kugrã zug t’a bug-zõosã nusi, tɩ yɩ kũun b sẽn yõogd ne bugum n kõ a Zeova.

3 “‘Ned maoong sã n yaa zems-n-taar maoong*+ a sẽn yãk a rũm-bɛdã sʋka, tɩ yaa raoog wall yãanga, a segd n talla rũng sẽn pa tar zang n wa a Zeova taoore. 2 A segd n tika a maoongã zugã ne a nugu. B na n kodga rũngã sɛk-roogã rignoorẽ. A Aarõ kom-dibli wã sẽn yaa maan-kʋʋdbã na n mesa zɩɩmã tẽn-kugrã kɩremsã fãa. 3 A na n yãka zems-n-taar maoongã bũmb kẽer n kõ tɩ yɩ maoong b sẽn maand ne bugum n kõ a Zeova:+ Yaa kaamã+ sẽn lud yãadã, la kaamã fãa sẽn tab yãadã, 4 n paas yiim a yiibã ne kaamã sẽn be b zutã sẽn pẽ pendã. A na n yãka sãoorã kaamã me n paas yiimã.+ 5 A Aarõ kom-dibli wã na n dogla bõn-kãens tẽn-kugrã zugu, maoong sẽn yõogd bugmã sẽn be raadã sẽn be bugmã zugã zugu, sẽn na yɩl tɩ b bug-zõosã nusi.+ Yaa maoong b sẽn maand ne bugum, tɩ tar yũ-noog* a Zeova yĩnga.+

6 “‘A sã n yãka a maoongã rũm-bõonegã sʋk n na n kõ a Zeova zems-n-taar maoongo, a na n waa ne rũng sẽn pa tar zanga, raoog wall yãanga.+ 7 A sã n waa ne pe-ra-poll n na n kõ tɩ yɩ maoongo, a na n tall-a lame n wa a Zeova taoore. 8 A na n tika a maoongã zugã ne a nugu. B na n kodga rũngã sɛk-roogã taoore. A Aarõ kom-dibli wã na n mesa zɩɩmã tẽn-kugrã kɩremsã fãa. 9 A na n yãka zems-n-taar maoongã kaamã n kõ tɩ yɩ maoong b sẽn maand ne bugum n kõ a Zeova.+ A na n yãka zʋʋrã tõr sẽn yaa kaamã sẽn pẽ zʋ-kɛɛgã, kaamã sẽn lud yãadã, la kaamã fãa sẽn tab yãadã, 10 n paas yiim a yiibã ne kaamã sẽn be b zutã sẽn pẽ pendã. A na n yãka sãoorã kaamã me n paas yiimã.+ 11 Maan-kʋʋdã na n yõoga bõn-kãens tẽn-kugrã zug tɩ yɩ rɩɩbo.* Yaa maoong b sẽn maand ne bugum n kõ a Zeova.+

12 “‘A maoongã sã n yaa bʋʋga, a na n tall-a lame n wa a Zeova taoore. 13 A na n tika bʋʋgã zugã ne a nugu. B na n kodga bʋʋgã sɛk-roogã taoore. A Aarõ kom-dibli wã na n mesa zɩɩmã tẽn-kugrã kɩremsã fãa. 14 A rũngã babs nins a sẽn na n kõ tɩ yɩ maoong b sẽn maand ne bugum n kõ a Zeova wã yaa kaamã sẽn lud yãadã, kaamã fãa sẽn tab yãadã,+ 15 n paas yiim a yiibã ne kaamã sẽn be b zutã sẽn pẽ pendã. A na n yãka sãoorã kaamã me n paas yiimã. 16 Maan-kʋʋdã na n yõog-b-la tẽn-kugrã zug tɩ yɩ rɩɩbo.* Yaa maoong b sẽn maand ne bugum, tɩ tar yũ-noogo.* Rũng kaam fãa yaa a Zeova n so.+

17 “‘Ad noor yãmb sẽn segd n tũ wakat fãa y zãmaan-dãmbã fãa pʋsẽ, y sẽn be zĩis ninsã fãa: Yãmb pa segd n dɩ rũng kaam wall zɩɩm+ a bada.’”

4 A Zeova le yeela a Moyiiz yaa: 2 “Togs Israyɛll nebã yaa: ‘Ned* sã n tudg n maan yel-wẽnde,+ a sẽn maan bũmb a Zeova sẽn yeel tɩ b pa segd n maan yĩnga, ad a sẽn segd n maane:

3 “‘Maan-kʋʋd ning b sẽn zae kaamã+ sã n maan yel-wẽnd+ n wa ne taal nin-buiidã zugu, a segd n talla lol-poll sẽn pa tar zang n wa a Zeova taoore, tɩ yɩ maoong yel-wẽndã a sẽn maanã yĩnga.+ 4 A na n talla loalgã n wa a Zeova taoor sɛk-roogã rignoorẽ,+ n tik loalgã zugã ne a nugu. A segd n kodga loalgã a Zeova taoore.+ 5 Rẽ poore, maan-kʋʋd ning b sẽn zae kaamã+ na n yãka zɩɩmã n kẽ sɛk-roogã pʋgẽ. 6 Maan-kʋʋdã na n suka a nug-bilã zɩɩmã pʋgẽ+ naoor a yopoe, n mes zɩɩmã naoor a yopoe+ a Zeova taoore, zĩ-sõngã fu-lilldgã taoore. 7 Sẽn paase, maan-kʋʋdã na n yãka zɩɩmã n ning wisd sẽn tar yũ-noog tẽn-kugrã yɩɩlã zutu,+ tẽn-kugr ning sẽn be sɛk-roogã pʋgẽ, a Zeova taoorã. A na n daaga loalgã zɩɩmã sẽn ketã fãa maoong sẽn yõogd bugmã tẽn-kugrã sɛɛgẽ,+ tẽn-kugr ning sẽn be sɛk-roogã rignoorẽ wã.

8 “‘Rẽ poore, a na n yãka yel-wẽnd maoongã loalgã kaamã fãa, rat n yeel tɩ kaamã sẽn lud yãadã, la kaamã sẽn tab yãadã, 9 n paas yiim a yiibã ne kaamã sẽn be b zutã sẽn pẽ pendã. A na n yãka sãoorã kaamã me n paas yiimã.+ 10 Na n yɩɩ a ye ne bũmb nins b sẽn yãkd zems-n-taar maoongã loalgã pʋgẽ wã.+ Maan-kʋʋdã na n yõog-b-la maoong sẽn yõogd bugmã tẽn-kugrã zug sẽn na yɩl tɩ b bug-zõosã nusi.

11 “‘La sã n yaa ne loalgã gãongã, a nemdã fãa n paas a zugã, a karsã, a yãadã la a bĩndã,+ 12 rat n yeel tɩ loalgã sẽn ketã, a na n kɩtame tɩ b rɩk n yi sik-zĩigã kɩrenga, n kẽng zĩig sẽn yaa yɩlemdẽ, zĩig ning b sẽn lobd tompɛglmã,* n tɩ yõog-a raad bugmẽ.+ B segd n yõog-a-la zĩig ning b sẽn lobd tompɛglmã.

13 “‘Israyɛll nin-buiidã fãa sã n paam taal b sẽn tudg n maan yel-wẽnd yĩnga,+ tɩ nin-buiidã yaool n da pa miẽ tɩ b maanã bũmb a Zeova sẽn yeel tɩ b ra maane,+ 14 tɩ rẽ poor tɩ b wa bãng tɩ b maana yel-wẽnde, b segd n talla lol-poll n wa sẽn na yɩl tɩ b kõ yel-wẽnd maoongo. B na n tall-a lame n wa sɛk-roogã noore. 15 Nin-buiidã kãsem-dãmbã na n tika loalgã zugã ne b nusã a Zeova taoore. B na n kodga loalgã a Zeova taoore.

16 “‘Maan-kʋʋd ning b sẽn zae kaamã na n yãka loalgã zɩɩm n kẽ sɛk-roogã pʋgẽ. 17 Maan-kʋʋdã segd n suka a nug-bilã zɩɩmã pʋgẽ naoor a yopoe, n mes naoor a yopoe a Zeova taoore, fu-lilldgã+ taoore. 18 Rẽ poore, a na n yãka zɩɩmã n ning tẽn-kugr ning sẽn be a Zeova taoorã yɩɩl zutu,+ tẽn-kugr ning sẽn be sɛk-roogẽ wã. A na n daaga loalgã zɩɩmã sẽn ketã fãa maoong sẽn yõogd bugmã tẽn-kugrã sɛɛgẽ, rat n yeel tɩ tẽn-kugr ning sẽn be sɛk-roogã rignoorẽ wã.+ 19 A na n yãka loalgã kaamã fãa, n yõog tẽn-kugrã+ zug sẽn na yɩl t’a bug-zõosã nusi. 20 A segd n maana loalgã wa a sẽn maan yel-wẽnd maoongã loalg a to wã. Yaa woto la a na n maan-a. Maan-kʋʋdã na n maana paasg* b yĩnga,+ la b na n paama sugri. 21 A na n kɩtame tɩ b tall loalgã n yi sik-zĩigã kɩrenga, n yõog-a wa b sẽn yõog pipi loalgã to-to wã.+ Yaa yel-wẽnd maoong nin-buiidã yĩnga.+

22 “‘Nin-buiidã nanambsã nin-yend+ sã n tudg n maan yel-wẽnde, a sẽn maan bũmb a Wẽnnaam a Zeova sẽn yeel tɩ b pa segd n maan yĩng n paam taale, 23 pa rẽ bɩ a wa n bãngame t’a maana yel-wẽnd a sẽn kɩɩs noorã yĩnga, a segd n talla boɛɛg sẽn yaa poll la sẽn pa tar zang n wa tɩ yɩ a maoongo. 24 A na n tika boɛɛgã sẽn yaa pollã zugã ne a nugu, la a kodg-a zĩig ning b sẽn koot maand sẽn yõogd bugmã a Zeova taoorã.+ Yaa yel-wẽnd maoongo. 25 Maan-kʋʋdã na n tẽka yel-wẽndã maoongã zɩɩm ne a nug-bilã, n ning maoong sẽn yõogd bugmã tẽn-kugrã yɩɩlã zutu,+ la a raag zɩɩmã sẽn ketã maoong sẽn yõogd bugmã tẽn-kugrã sɛɛgẽ.+ 26 A na n yõoga maoongã kaamã fãa tẽn-kugrã zug sẽn na yɩl t’a bug-zõosã nus wa zems-n-taar maoongã kaam.+ Maan-kʋʋdã na n maana paasg a yel-wẽndã yĩnga, la a na n paama sugri.

27 “‘Nin-buiidã sʋk ned* sã n tudg n maan yel-wẽnde, a sẽn maan bũmb a Zeova sẽn yeel tɩ b pa segd n maane,+ n paam taale, 28 pa rẽ bɩ a wa n bãngame t’a maana yel-wẽnde, a segd n talla bʋ-yãang sẽn yaa poll la sẽn pa tar zang n wa tɩ yɩ a maoongo. 29 A na n tika yel-wẽndã maoongã zugã ne a nugu, la a kodg-a zĩig ning b sẽn koot maand sẽn yõogd bugmã.+ 30 Maan-kʋʋdã na n tẽka yel-wẽndã maoongã zɩɩm ne a nug-bilã, n ning maoong sẽn yõogd bugmã tẽn-kugrã yɩɩlã zutu, la a raag zɩɩmã sẽn ketã fãa maoong sẽn yõogd bugmã tẽn-kugrã sɛɛgẽ.+ 31 A na n yãka maoongã kaamã fãa+ wa b sẽn yãkd zems-n-taar maoongã kaam+ to-to wã, la maan-kʋʋdã na n yõog-a-la tẽn-kugrã zug sẽn na yɩl t’a bug-zõosã nusi, tɩ yɩ maoong sẽn tar yũ-noog* a Zeova yĩnga. Maan-kʋʋdã na n maana paasg a yĩnga, la a na n paama sugri.

32 “‘La a sã n na n kõ pe-bil tɩ yɩ a yel-wẽndã maoongo, a segd n talla pe-bil sẽn yaa yãang la sẽn pa tar zang n wa. 33 A na n tika yel-wẽndã maoongã zugã ne a nugu, la a kodg-a zĩig ning b sẽn koot maand sẽn yõogd bugmã tɩ yɩ yel-wẽnd maoongo.+ 34 Maan-kʋʋdã na n tẽka yel-wẽndã maoongã zɩɩm ne a nug-bilã, n ning maoong sẽn yõogd bugmã tẽn-kugrã yɩɩlã zutu,+ la a raag zɩɩmã sẽn ketã fãa maoong sẽn yõogd bugmã tẽn-kugrã sɛɛgẽ. 35 A na n yãka maoongã kaamã fãa wa b sẽn yãkd zems-n-taar maoongã pe-ra-pollã kaam to-to wã, la maan-kʋʋdã na n yõog-a-la tẽn-kugrã zugu, maand nins sẽn yõogd ne bugum n kõt a Zeova wã zutu,+ sẽn na yɩl t’a bug-zõosã nusi. Maan-kʋʋdã na n maana paasg yel-wẽndã a sẽn maanã yĩnga, la a na n paama sugri.+

5 “‘Ned* sã n yã bũmb b sẽn maan tɩ pa sõma, wall a wʋmame tɩ b gomd rẽ yelle, n wa wʋm tɩ b moond zãma wã sʋk n dat tɩ b wa kõ rẽ kaset*+ t’a pa togse, a na n paama yel-wẽnd taale. B na n sɩbg-a-la a kongrã yĩnga.

2 “‘Pa rẽ bɩ ned* sã n sɩɩs bũmb sẽn yaa rẽgdo, tɩ yaa we-rũng sẽn yaa rẽgd kũum, yir-dũng sẽn yaa rẽgd kũum, wall rũm-bõoneg nins sẽn tũud taab wʋsg n yaa rẽgdã kũum,+ a yaa rẽgdo, la a tar taale, baa a sã n pa miẽ. 3 Wall ned sã n sɩɩs ninsaal rẽgd+ n pa bãnge, rat n yeel tɩ rẽgd buud fãa sẽn tõe n kɩt t’a lebg rẽgdo, n wa bãnge, a tara taale.

4 “‘Pa rẽ bɩ ned* sã n wẽen t’a na n maana bũmb n pa reng n tagse, tɩ yaa sõma bɩ wẽnga, baa sẽn yaa bũmb ning fãa, n yaool n wa bãng t’a wẽename n pa reng n tagse, a tara taale.*+

5 “‘Ned sã n paam taal bõn-kãensã a ye wɛɛngẽ, a segd n vẽnega a sẽn maan yel-wẽnd ningã n togse.+ 6 Sẽn paase, a na n talla a taalã maoong n wa kõ a Zeova, yel-wẽndã a sẽn maanã yĩnga,+ rat n yeel tɩ rũm-yãang a sẽn yãk rũm-bõonegã sʋka, pe-yãang wall bʋ-yãang sẽn yaa polle, n kõ tɩ yɩ yel-wẽnd maoongo. Rẽ poore, maan-kʋʋdã na n maana paasg* a yĩnga, a yel-wẽndã yĩnga.

7 “‘La a sã n pa tõe n paam pesgo, a segd n talla wal a yiib bɩ marwan-bi a yiib+ n wa kõ a Zeova tɩ yɩ a taalã maoongo, a yel-wẽndã yĩnga: A yembr n na n yɩ yel-wẽnd maoongo, t’a to wã yɩ maoong sẽn yõogd bugum.+ 8 A segd n tall-b lame n wa kõ maan-kʋʋdã. Maan-kʋʋdã na n deng n kolga ne sẽn yaa-a yel-wẽndã maoong yĩngã, n kodg-a ne a nug-yẽega, la a pa segd n fiuug a zugã ye. 9 A na n mesa yel-wẽndã maoongã zɩɩm bilf tẽn-kugrã kɩrenga, la a na n basa zɩɩmã sẽn ketã tɩ rʋʋg tẽn-kugrã sɛɛgẽ.+ Yaa yel-wẽnd maoongo. 10 A na n maana a to wã wa sẽn zems noy nins b sẽn kõ maoong sẽn yõogd bugmã wɛɛngẽ wã.+ Maan-kʋʋdã na n maana paasg a yĩnga, yel-wẽndã a sẽn maanã yĩnga, la a na n paama sugri.+

11 “‘La a sã n pa tõe n paam wal a yiib bɩ marwan-bi a yiibu, a segd n talla zom-bãaneg efa*+ pʋɩɩr a ye pʋɩ piig zug n wa kõ a yel-wẽndã yĩnga, tɩ yɩ kũun b sẽn kõt yel-wẽnd yĩnga. A pa segd n kalem kaam bɩ n dogl wisd sẽn yaa pɛɛlg a zug ye. Bala yaa kũun b sẽn kõt yel-wẽnd yĩnga. 12 A na n tall-a lame n wa kõ maan-kʋʋdã. Maan-kʋʋdã na n yãka zomã nug-pidung tɩ makd kũunã tõre.* A na n yõog-a-la tẽn-kugrã zugu, maand nins sẽn maand ne bugum n kõt a Zeova wã zugu, sẽn na yɩl t’a bug-zõosã nusi. Yaa kũun b sẽn kõt yel-wẽnd yĩnga. 13 Maan-kʋʋdã na n maana paasg a yĩnga, yel-wẽndã a sẽn maanã yĩnga, sẽn yaa yel-wẽnd ning fãa yel-wẽn-kãensã sʋka, la a na n paama sugri.+ Kũunã sẽn ketã na n lebga maan-kʋʋdã rẽnda,+ wa sẽn yaa to-to ne kood biis kũunã.’”+

14 A Zeova kell n goma ne a Moyiiz n yeel yaa: 15 “Ned* sã n pa maan sɩd ne maam n tudg n kɩɩs noy nins b sẽn kõ a Zeova bõn-sõamyã wã wɛɛngẽ wã,+ a segd n talla pe-raoog sẽn pa tar zang a sẽn yãk rũm-bõonegã sʋk n wa kõ a Zeova, tɩ yɩ taal maoongo.+ Maan-kʋʋdã na n wilga pe-raoogã ligd sẽn zems wanzuri sɩkl* to-to, wa sẽn zems zĩ-sõngã sɩklã.*+ 16 A na n dola yel-wẽndã a sẽn maan n kɩɩs noy nins b sẽn kõ zĩ-sõngã wɛɛngẽ wã. A na n paasa maoongã ligdã pʋɩɩr a ye pʋɩ a nu zugu.+ A na n kõ-a-la maan-kʋʋdã, sẽn na yɩl tɩ maan-kʋʋdã tall taal maoongã pe-raoog n maan paasg a yĩnga,+ la a na n paama sugri.+

17 “Ned* sã n maan yel-wẽnde, a sẽn maan bũmb a Zeova sẽn yeel tɩ b pa segd n maan yĩnga, baa a sã n pa bãnge, a baas n tara taale.+ B na n sɩbg-a-la a kongrã yĩnga. 18 A segd n yãka pe-raoog sẽn pa tar zang rũm-bõonegã sʋk wa sẽn zems ligdã b sẽn wilgã, n wa kõ maan-kʋʋdã tɩ yɩ taal maoongo.+ Maan-kʋʋdã na n maana paasg a yĩnga, yel-wẽndã a sẽn tudg n maan n pa bãngã yĩnga, la a na n paama sugri. 19 Yaa taal maoongo. Sɩd-sɩda, a beega a Zeova, n tar taale.”

6 A Zeova le yeela a Moyiiz yaa: 2 “Ned* sã n maan yel-wẽnde, n pa maan sɩd ne a Zeova,+ a sẽn zãmb a to bũmb a sẽn kõ-a t’a bĩng wall bũmb a sẽn gãneg ne-a wɛɛngẽ,+ pa rẽ bɩ a zuka a to bũmb wall a maana zãmb n deege, 3 wall a yãa bũmb sẽn meneme, n pa maan pʋ-peelem bũmbã wɛɛngẽ, bɩ a sã n wẽen n yag ziri yel-wẽnd a woto buud a sẽn maan wɛɛngẽ,+ ad a sẽn segd n maane: 4 A sã n maana yel-wẽnd n tar taale, a segd n lebsa bũmb ning a sẽn zukã, bũmb ning a sẽn maan pãng n deegã, bũmb ning a sẽn maan zãmb n deegã, bũmb ning b sẽn da kõ-a t’a bĩngã, wall bũmb ning sẽn menem t’a yã wã, 5 pa rẽ bɩ bũmb ning wɛɛngẽ a sẽn wẽen n yag ziri wã. A segd n dola zãnga,+ la a paas bũmbã ligdã pʋɩɩr a ye pʋɩ a nu zugu. A na n kõo bõn-kãens bũmbã soaba, daar ning b sẽn na n wilg t’a tara taalã. 6 Sẽn paase, a na n talla a taal maoongã n wa kõ maan-kʋʋdã, rat n yeel tɩ pe-raoog sẽn pa tar zang a sẽn yãk rũm-bõonegã sʋk wa sẽn zems ligdã b sẽn wilgã, tɩ maan-kʋʋdã kõ a Zeova tɩ yɩ taal maoongo.+ 7 Maan-kʋʋdã na n maana paasg* a yĩng a Zeova taoore, la sẽn yaa bũmb ning fãa la a sẽn da maan n tar taalã, a na n paama sugri.”+

8 A Zeova kell n goma ne a Moyiiz n yeele: 9 “Yeel a Aarõ ne a kom-dibli wã yaa: ‘Ad maoong sẽn yõogd bugmã noore:+ Maoongã sẽn yõogd bugmã na n paa tẽn-kugrã bug-toaalgẽ yʋngã tõr n tãag yibeoogo. B na n kɩtame tɩ bugmã kell n wid tẽn-kugrã zugu. 10 Maan-kʋʋdã na n yeelga a tʋʋmdã fuug sẽn wʋg ne lẽ* gĩsã,+ la a sẽgen lẽ gĩs kur-koɛɛgã*+ n lud a yĩngã. Rẽ poore, a na n wʋka maoong sẽn yõogd bugmã tompɛglmã*+ bugmã sẽn dɩ tẽn-kugrã zugã, n ning tẽn-kugrã kɩrenga. 11 A na n yeesa a futã+ n ning fut a taaba, la a wʋk tompɛglmã n yi sik-zĩigẽ wã n tɩ lob zĩig sẽn yaa yɩlemdẽ.+ 12 B na n kɩtame tɩ bugmã kell n wid tẽn-kugrã zugu. A pa segd n ki ye. Yibeoog fãa, maan-kʋʋdã segd n yõgna bugum ne raad tẽn-kugrã zugu,+ la a maneg maoong sẽn yõogd bugmã n dogl a zugu. A na n yõogda zems-n-taar maandã kaamã a zugu, sẽn na yɩl tɩ b bug-zõosã nusi.+ 13 B na n kɩtame tɩ bugum wit tẽn-kugrã zug wakat fãa. A pa segd n ki ye.

14 “‘Ad kood biis kũunã noore:+ Yaa a Aarõ kom-dibli wã n segd n tall-a n wa tẽn-kugrẽ wã, a Zeova taoore. 15 B nin-yend na n yãka kood biis kũunã zom-bãanegã nug-pidingu, ne a kaamã bilfu, n paas wisd sẽn yaa pɛɛlgã fãa sẽn be kood biis kũunã zugã, n yõog tẽn-kugrã zug tɩ makd kũunã tõr* sẽn na yɩl t’a bug-zõosã nusi, tɩ yɩ kũun sẽn tar yũ-noog* a Zeova yĩnga.+ 16 A Aarõ ne a kom-dibli wã n na n tall kũunã sẽn kellã.+ B na n dɩk-a lame n maan bur sẽn pa ning rabɩlle, n wãb-a zĩ-sõng pʋgẽ. B na n wãb-a-la sɛk-roogã samandã pʋgẽ.+ 17 B pa segd n maan-a ne rabɩll ye.+ Mam kõo rẽ tɩ yaa b pʋɩɩr maand nins b sẽn maand ne bugum n kõt maamã sʋka.+ Yaa bũmb sẽn yaa sõng wʋsgo,+ wa yel-wẽndã maoongã ne taal maoongã. 18 Yaa a Aarõ kambã la a yagens nins sẽn yaa rapã bal n na n wãb-a.+ Yaa b wakat fãa pʋɩɩr sẽn yit maand nins sẽn maand ne bugum n kõt a Zeova wã sʋka,+ y zãmaan-dãmbã fãa pʋsẽ. Bũmb ning fãa sẽn sɩɩs maoong-kãens na n lebga sõngo.’”

19 A Zeova le yeela a Moyiiz yaa: 20 “Ad kũun ning a Aarõ ne a kom-dibli wã sẽn segd n kõ a Zeova, daar ning b sẽn na n zae a Aarõ ne kaamã:+ Yaa zom-bãaneg efa*+ pʋɩɩr a ye pʋɩ piig zug la b segd n kõ tɩ yɩ kood biis kũuni.+ B na n kõo pʋɩ-sʋkã yibeoogo, la b kõ pʋɩ-sʋk a to wã zaabre. 21 B segd n kalm-a-la kaam n kɩɩm koɛɛng ne powalle.+ Yãmb segd n kao-a-la zõm-zõme, n kalm-a ne kaam sõma, n tall n wa kõ tɩ yɩ kood biis kũun b sẽn kɩɩme, tɩ tar yũ-noog* a Zeova yĩnga. 22 A kom-dibli wã sʋka, maan-kʋʋd ning b sẽn zae kaamã sẽn na n ledg-a wã+ na n kõo kũun-kãnga. Yaa noor sẽn paad wakat fãa: B segd n yõoga a zangã n kõ a Zeova tɩ yɩ kũun sẽn yõogd bugum sẽn na yɩl t’a bug-zõosã nusi. 23 Kood biis kũun fãa maan-kʋʋd sẽn kõ segd n yɩɩ kũun sẽn yõogd bugum zãnga. Ned pa segd n dɩ-a ye.”

24 A Zeova le goma ne a Moyiiz n yeele: 25 “Yeel a Aarõ ne a kom-dibli wã yaa: ‘Ad yel-wẽnd maoongã noore:+ Yaa zĩig ning b sẽn koot maoong sẽn yõogd bugmã+ la b na n kodg yel-wẽnd maoongã me a Zeova taoore. Yaa bũmb sẽn yaa sõng wʋsgo. 26 Maan-kʋʋd ning sẽn kõt rũngã tɩ yɩ yel-wẽnd maoongã na n wãb-a lame.+ B segd n wãb-a-la zĩ-sõng pʋgẽ, rat n yeel tɩ sɛk-roogã samandẽ wã.+

27 “‘Bũmb ning fãa sẽn na n sɩɩs a nemdã na n lebga sõngo. Ned sã n maan tɩ maoongã zɩɩm mes a fuugu, yãmb segd n peka fuug ning zɩɩmã sẽn mesã zĩ-sõng pʋgẽ. 28 B segd n wãa tãnd rʋk ning b sẽn tall n dʋg-a wã. La b sã n dʋg-a ne rʋk sẽn maan ne zũudu, b segd n duu rʋkã, la b pek-a ne koom.

29 “‘Rap nins sẽn yaa maan-kʋʋdbã bal n na n wãb-a.+ Yaa bũmb sẽn yaa sõng wʋsgo.+ 30 La b sã n yãk yel-wẽnd maoong zɩɩm n kẽ sɛk-roogẽ wã n maan paasg zĩ-sõngã pʋgẽ,+ ned pa segd n wãb a nemdã ye. B segd n yõog-a-la bugum.

7 “‘Ad taal maoongã noore:+ Yaa bũmb sẽn yaa sõng wʋsgo. 2 B na n kodga taal maoongã zĩig ning b sẽn koot maand sẽn yõogd bugmã, la b segd n mesa a zɩɩmã+ tẽn-kugrã kɩremsã fãa.+ 3 A na n waa ne taal maoongã kaamã fãa,+ rat n yeel tɩ zʋʋrã sẽn yaa kaamã, kaamã sẽn lud yãadã, 4 n paas yiim a yiibã ne b kaamã sẽn pẽ pendã. A na n yãka sãoorã kaamã me n paas yiimã.+ 5 Maan-kʋʋdã na n yõog-b-la tẽn-kugrã zugu, tɩ yɩ maoong b sẽn maand ne bugum n kõ a Zeova.+ Yaa taal maoongo. 6 Rap nins sẽn yaa maan-kʋʋdbã bal n na n wãb-a.+ B segd n wãb-a-la zĩ-sõng pʋgẽ. Yaa bũmb sẽn yaa sõng wʋsgo.+ 7 Noor ning b sẽn kõ yel-wẽnd maoongã wɛɛngẽ wã yaa a ye ne taal maoongã: Yaa maan-kʋʋd ning sẽn tall rũngã n maan paasgã* n so a nemdã.+

8 “‘Maan-kʋʋdã sã n kõ Wẽnnaam maoong sẽn yõogd bugum ned sẽn wa ne, maoong sẽn yõogd bugmã nedã sẽn wa ne wã gãongã+ na n lebga maan-kʋʋdã rẽnda.

9 “‘Kood biis kũun buud fãa b sẽn wʋm wʋng pʋgẽ, wall b sẽn kɩɩm ne rʋk wall powall*+ yaa maan-kʋʋd ning sẽn tall-a n wa Wẽnnaam taoorã n so. A na n lebga yẽ rẽnda.+ 10 La kood biis kũun buud fãa sẽn kalem kaam+ wall sẽn yaa koɛɛng+ na n yɩɩ a Aarõ kom-dibli wã fãa rẽnda. B ned kam fãa pʋɩɩr na n zema a to.

11 “‘Ad zems-n-taar maoong+ ned sẽn tõe n kõ a Zeova wã noore: 12 A sã n na n kõ-a bark pʋʋsg yĩnga, a na n waa ne a bark pʋʋsg maoongã,+ n paas bur sẽn pa ning rabɩll la sẽn yaa gils wa maanf n kalem kaam, la bur-pakls sẽn pa ning rabɩll n mes kaam, ne bur sẽn yaa gils wa maanf sẽn maan ne zom-bãaneg sẽn kalem sõma, la sẽn nag ne kaam. 13 A na n kõo a maoongã ne bur sẽn ning rabɩll la sẽn yaa gils wa maanfo, n paas zems-n-taar maandã sẽn yaa bark pʋʋsg maoongã. 14 A segd n yãka a maoongã pʋgẽ bur buud fãa a yembr tɩ yɩ pʋɩɩr sẽn yaa sõng n kõ a Zeova. Pʋɩ-kãng na n yɩɩ maan-kʋʋd ning sẽn na n mes zems-n-taar maandã zɩɩmã rẽnda.+ 15 B segd n wãba a zems-n-taar maandã sẽn yaa bark pʋʋsg maoong nemdã daar ning a sẽn kõ-a wã. A pa segd n bĩng baa fʋɩ tɩ vẽeg beoog ye.+

16 “‘A maoongã sã n yaa a sẽn da maan pʋleng yĩnga,+ wall yamleoog kũuni,+ b segd n wãb-a-la daar ning a sẽn kõ-a wã, la b tõe n wãba bũmb ning sẽn na n kellã vẽkembeoogã me. 17 La maoongã nemd sã n kell rasem a tãab-n-soabã, b segd n yõog-a-la bugmẽ.+ 18 La b sã n wãb a zems-n-taar maoongã rasem a tãab-n-soabã, sẽn kõ-a maoongã pa na n paam Wẽnnaam lohorem ye. A pa na n dɩ a yõod ye. Yaa bõn-põosgo, tɩ ned* ning sẽn wãb-a wã na n paam sɩbgr a kongrã yĩnga.+ 19 Nemd sã n sɩɩs bũmb sẽn yaa rẽgdo, b pa segd n wãb-a ye. B segd n yõog-a-la bugmẽ. Ned sẽn yaa yɩlemd fãa tõe n wãba nemdã sẽn yaa yɩlemdã.

20 “‘La ned* sã n yaa rẽgdo, n wãb zems-n-taar maoongã nemd sẽn yaa a Zeova rẽndã, b segd n yiisa* nin-kãng* a buudã sʋka.+ 21 Ned* sã n sɩɩs bũmb sẽn yaa rẽgdo, tɩ yaa ninsaal rẽgd+ wall rũng sẽn yaa rẽgdo,+ pa rẽ bɩ bõn-yook sẽn yaa rẽgdo,+ la a wãb zems-n-taar maoongã nemd sẽn yaa a Zeova rẽndã, b segd n yiisa* nin-kãng* a buudã sʋka.’”

22 A Zeova kell n goma ne a Moyiiz n yeele: 23 “Yeel Israyɛll nebã yaa: ‘Yãmb pa segd n dɩ loalg kaam, pe-ra-poll wall bʋʋg kaam ye.+ 24 Yãmb sã n yã rũng sẽn ki a toore, wall rũng a to sẽn kʋ, y tõe n talla a kaamã n maan y sẽn dat fãa, la y pa segd n dɩ a kaamã a bada.+ 25 Ned sã n kõ a Zeova rũng tɩ yɩ maoong sẽn maand ne bugum la a rɩ a kaamã, b segd n yiisa* nin-kãng a buudã sʋka.

26 “‘Zĩig ning fãa yãmb sẽn be, y pa segd n dɩ zɩɩm buud baa a ye,+ tɩ yaa liuul zɩɩm wall rũng zɩɩm ye. 27 B segd n yiisa*+ ned* ning fãa sẽn dɩ zɩɩm buud fãa, a buudã sʋka.’”

28 A Zeova le goma ne a Moyiiz n yeele: 29 “Yeel Israyɛll nebã yaa: ‘Ned ning fãa sẽn tall a zems-n-taar maoong n wa a Zeova taoor na n yãka a maoongã n kõ a Zeova.+ 30 A na n talla kaamã ne rũngã yãoogã a toor n wa,+ tɩ yɩ maoong b sẽn maand ne bugum n kõ a Zeova. A na n yuum-a-la poorẽ la taoor tɩ yɩ maoong b sẽn yuumd+ a Zeova taoore. 31 Maan-kʋʋdã na n yõoga kaamã tẽn-kugrã zugu,+ sẽn na yɩl t’a bug-zõosã nusi, la rũngã yãoogã na n yɩɩ a Aarõ ne a kom-dibli wã rẽnda.+

32 “Yãmb zems-n-taar maandã pʋgẽ, y na n yãka rɩtg gerã n kõ maan-kʋʋdã tɩ yɩ pʋɩɩr sẽn yaa sõngo.+ 33 A Aarõ bi-ribl ning sẽn na n kõ Wẽnnaam zems-n-taar maandã zɩɩmã ne a kaamã na n paama rɩtg gerã tɩ yɩ a pʋɩɩre.+ 34 Bala zems-n-taar maandã Israyɛll nebã sẽn kõtã sʋka, mam deegda maoong b sẽn yuumdã yãoogã ne pʋɩɩr sẽn yaa sõngã gerã, n kõt maan-kʋʋd a Aarõ ne a kom-dibli wã. Yaa noor sẽn paad wakat fãa Israyɛll nebã yĩnga.+

35 “Maand nins sẽn maand ne bugum n kõt a Zeova wã sʋka, yaa bõn-kãensã la b welg toor maan-kʋʋdbã yĩnga, rat n yeel t’a Aarõ ne a kom-dibli wã yĩnga, daar ning b sẽn tall-b n wa a Zeova taoor tɩ b na n yɩ maan-kʋʋdbã tɛka.+ 36 A Zeova yeelame tɩ daar ning b sẽn zae maan-kʋʋdbã b kaamã tɛka, b segd n yãka bõn-kãens maand nins Israyɛll nebã sẽn kõtã pʋsẽ n kõ-ba.+ Yaa noor sẽn paad wakat fãa, b zãmaan-dãmbã fãa pʋsẽ.’”

37 No-kãensã yaa maoong sẽn yõogd bugmã noyã,+ kood biis kũunã,+ yel-wẽnd maoongã,+ taal maoongã,+ maan-kʋʋdbã zĩnigr maoongã,+ la zems-n-taar maoongã noyã,+ 38 wa a Zeova sẽn yeel a Moyiiz Sinayi tãngẽ wã,+ daar ning a sẽn yeel Israyɛll nebã Sinayi we-raoogẽ wã tɩ b kõt a Zeova b maandã.+

8 A Zeova kell n goma ne a Moyiiz n yeel yaa: 2 “Peeg a Aarõ ne a kom-dibli wã sẽn be ne-a wã,+ la f rɩk futã,+ zaeebã kaamã,+ yel-wẽnd maoongã loalgã, pe-raad a yiibã, bur sẽn pa ning rabɩllã yaagã,+ 3 la f kɩt tɩ nin-buiidã fãa tigim taab sɛk-roogã rignoorẽ.”

4 Dẽ, a Moyiiz maana wa a Zeova sẽn yeel-a wã, tɩ nin-buiidã tigim taab sɛk-roogã rignoorẽ. 5 A Moyiiz yeela nin-buiidã yaa: “Ad bũmb ning a Zeova sẽn yeel tõnd tɩ d maanã.” 6 A Moyiiz talla a Aarõ ne a kom-dibli wã n kolge, n so-b koom.+ 7 Rẽ poore, a rɩka kasaabã+ n yeelg a Aarõ, n sẽbg-a sẽbdgã+ la a yeelg-a kobr sẽn yaa bãg-vɩɩdã.+ A rɩka efoodã*+ n yeelg-a, n sẽbg efoodã ne efoodã sẽbdgã b sẽn wʋgã.+ A sẽbg-a-la kãn-kãe. 8 Sẽn pʋgde, a rɩka yãoog lutgã+ n ning a Aarõ zugu, la a sagl Urimmã ne Tumimmã+ yãoog lutgã pʋgẽ. 9 A Moyiiz rɩka zu-vindgã+ n vil a Aarõ zugã, la a ning sãnem bõn-paklgã sẽn pɩndã, rat n yeel tɩ sãnem bõn-paklgã sẽn yaa sõngã*+ zu-vindgã taoore, wa a Zeova sẽn da yeel-a wã.

10 A Moyiiz rɩka zaeebã kaam n zae sɛk-roogã ne bũmb nins fãa sẽn be a pʋgẽ wã,+ n kɩt tɩ b lebg sõamyã. 11 Rẽ poore, a yãka zaeebã kaam n mes tẽn-kugrã zug naoor a yopoe, la a zae tẽn-kugrã ne a teedã fãa, n paas la-pokã ne a roagendgã, n kɩt tɩ b lebg sõamyã. 12 Sẽn na n baase, a kɩrga a Aarõ zugã zaeebã kaam, n zae-a sẽn na yɩl n kɩt t’a lebg sõngo.+

13 A Moyiiz talla a Aarõ kom-dibli wã n kolge, n dɩk kasaabsã n yeelg-ba, n sẽbg-b ne sẽbdsã, la a fõgen-b pugli,+ wa a Zeova sẽn da yeel-a wã.

14 Dẽ, a talla yel-wẽnd maoongã loalg n wa, t’a Aarõ ne a kom-dibli wã tik yel-wẽnd maoongã loalgã zugã ne b nusi.+ 15 A Moyiiz kodga loalgã, n tẽk a zɩɩmã+ ne a nug-bilã n ning tẽn-kugrã yɩɩlã fãa zutu, n kɩt tɩ tẽn-kugrã lebg sõngo. La a raaga zɩɩmã sẽn ketã tẽn-kugrã sɛɛgẽ, sẽn na yɩl n kɩt t’a lebg sõngo, tɩ b tõe n maand paasg* a zugu. 16 Rẽ poore, a yãka kaamã fãa sẽn be yãadã zutã, sãoorã kaamã, la yiim a yiibã ne b kaamã. A Moyiiz yõog-b-la tẽn-kugrã zug sẽn na yɩl tɩ b bug-zõosã nusi.+ 17 Dẽ, a Moyiiz kɩtame tɩ b tall loalgã sẽn ketã, rat n yeel t’a gãongã, a nemdã la a bĩndã n yi sik-zĩigã kɩreng n yõoge,+ wa a Zeova sẽn da yeel-a wã.

18 Rẽ poore, a talla maoong sẽn yõogd bugmã pe-raoog n wa, t’a Aarõ ne a kom-dibli wã tik pe-raoogã zugã ne b nusi.+ 19 A Moyiiz kodg-a lame, n mes a zɩɩmã tẽn-kugrã kɩremsã fãa. 20 A beesa pe-raoogã wa sẽn zems a babs toor-toorã. A yõoga a zugã, a babsã ne kaamã sẽn lud yiimã sẽn na yɩl tɩ b bug-zõosã nusi. 21 A Moyiiz pegsa yãadã la karsã ne koom, la a yõog pe-raoogã tõr tẽn-kugrã zug sẽn na yɩl t’a bug-zõosã nusi. Yɩɩ maoong b sẽn yõogd bugum, n tar yũ-noogo.* Yɩɩ maoong sẽn maand ne bugum n kõ a Zeova, wa a Zeova sẽn da yeel a Moyiizã.

22 Rẽ poore, a talla pe-raoog a yiib-n-soabã sẽn yaa maan-kʋʋdbã zĩnigr pe-raoogã n wa,+ t’a Aarõ ne a kom-dibli wã tik pe-raoogã zugã ne b nusi.+ 23 A Moyiiz kodga pe-raoogã n yãk a zɩɩmã n tẽk a Aarõ rɩtg tʋbrã, la a tẽk a rɩtg nug-raoogã ne a rɩtg na-raoogã. 24 Rẽ poore, a Moyiiz talla a Aarõ kom-dibli wã n kolge, n yãk zɩɩmã n tẽk b rɩtg tʋbã, la a tẽk b rɩtg nug-raadã ne b rɩtg na-raadã. La a Moyiiz mesa zɩɩmã sẽn ketã tẽn-kugrã kɩremsã fãa.+

25 Rẽ poore, a yãka kaamã, rat n yeel tɩ zʋʋrã sẽn yaa kaamã, kaamã fãa sẽn be yãadã zutã, sãoorã kaamã, yiim a yiibã ne b kaamã, n paas rɩtg gerã.+ 26 A tʋma bur sẽn pa ning rabɩllã yaagã sẽn da be a Zeova taoorã pʋgẽ, n yãk bur a ye sẽn pa ning rabɩll la sẽn yaa gilg wa maanfo,+ ne bur a ye sẽn yaa gilg wa maanf b sẽn maan ne kaam,+ n paas bur-paklg a ye. A rɩk-b lame n dogl kaamã b sẽn yãkã ne rɩtg gerã zugu. 27 Rẽ poore, a rɩka bõn-kãens fãa n ning a Aarõ nusẽ, la a kom-dibli wã nusẽ, tɩ b yuum-b poorẽ la taoore, tɩ yɩ maoong b sẽn yuumd a Zeova taoore. 28 A Moyiiz reega bõn-kãens b nusẽ wã n yõog tẽn-kugrã zugu, maoong sẽn yõogd bugmã zugu, sẽn na yɩl tɩ b bug-zõosã nusi. B yɩɩ maan-kʋʋdbã zĩnigr maoong sẽn tar yũ-noogo.* Yɩɩ maoong b sẽn maand ne bugum n kõ a Zeova.

29 A Moyiiz rɩka yãoogã n yuum poorẽ la taoore, tɩ yɩ maoong b sẽn yuumd a Zeova taoore.+ Maan-kʋʋdbã zĩnigr maoongã pe-raoogã pʋgẽ, yãoogã n yɩ a Moyiiz pʋɩɩre, wa a Zeova sẽn da yeel-a wã.+

30 A Moyiiz yãka zaeebã kaam+ ne zɩɩmã sẽn da be tẽn-kugrã zugã, n mes a Aarõ ne a futã, la a mes a kom-dibli wã sẽn da be ne-a wã ne b futã. Woto, a kɩtame t’a Aarõ ne a futã, la a kom-dibli wã+ ne b futã lebg sõamyã.+

31 Rẽ poore, a Moyiiz yeela a Aarõ ne a kom-dibli wã yaa: “Rʋg-y+ nemdã sɛk-roogã rignoorẽ, n wãb-a be, ne bur ning sẽn be maan-kʋʋdbã zĩnigr yaagã pʋgẽ wã. Bala ad noor ning b sẽn kõ maamã: ‘A Aarõ ne a kom-dibli wã na n wãb-a lame.’+ 32 Yãmb segd n yõoga nemdã ne burã sẽn na n kellã bugum.+ 33 Rasem a yopoe pʋgẽ, yãmb pa segd n yi sɛk-roogã rignoorẽ, n tãag yãmb zĩnigrã rasem sõor sẽn na n pidi. Bala yaa rasem a yopoe la b na n dɩk n zĩnig-y maan-kʋʋrã tʋʋmd pʋgẽ.+ 34 A Zeova yeelame tɩ d maan bũmb ning tõnd sẽn maan dũndã wã, sẽn na yɩl n maan paasg yãmb yĩnga.+ 35 Yãmb na n paa sɛk-roogã rignoorẽ rasem a yopoe,+ wĩndg la yʋngo, n maan a Zeova sẽn yeel yãmbã+ sẽn na yɩl n da wa ki ye. Bala yaa woto la b yeel maam.”

36 A Aarõ ne a kom-dibli wã maana bũmb nins fãa a Zeova sẽn kɩt t’a Moyiiz togs-bã.

9 Rasem a nii-n-soabã,+ a Moyiiz boola a Aarõ ne a kom-dibli wã la Israyɛll kãsem-dãmbã. 2 A yeela a Aarõ yaa: “Fo mengã yĩnga, yõk nag-bil yel-wẽnd maoong yĩnga,+ la pe-raoog maoong sẽn yõogd bugum yĩnga, n tall n wa a Zeova taoore. B pa segd n tall zang ye. 3 La fo na n yeela Israyɛll nebã yaa: ‘Yõk-y boɛɛg yel-wẽnd maoong yĩnga, la nag-bil ne pe-ra-poll maoong sẽn yõogd bugum yĩnga. B fãa segd n zemsa yʋʋmde, n pa tar zang me ye. 4 Yõk-y loalg ne pe-raoog zems-n-taar maand yĩnga,+ sẽn na yɩl tɩ b maan maand a Zeova taoore, la y tall kood biis kũun+ sẽn kalem kaam n wa, bala rũndã, a Zeova na n vẽnega a meng ne yãmba.’”+

5 Dẽ, b talla bũmb nins a Moyiiz sẽn yeelã n wa sɛk-roogã taoore. Nin-buiidã fãa kolgame n yals a Zeova taoore. 6 A Moyiiz yeelame: “Ad bũmb ning a Zeova sẽn yeel tɩ y maane, sẽn na yɩl t’a Zeova ziirã puk yãmb taoore.”+ 7 Rẽ poore, a Moyiiz yeela a Aarõ yaa: “Kolg tẽn-kugrã n tall f yel-wẽnd maoongã+ ne f maoong sẽn yõogd bugmã n wa kõ Wẽnnaam, n maan paasg* fo mengã yĩnga,+ la f zakã rãmb yĩnga. Tall nin-buiidã maoong n wa kõ Wẽnnaam,+ n maan paasg b yĩng+ wa a Zeova sẽn da yeelã.”

8 Tao-tao bala, a Aarõ kolga tẽn-kugrã, n kodg yel-wẽnd maoongã nag-bilã sẽn yaa yẽ meng yĩngã.+ 9 Rẽ poore, a Aarõ kom-dibli wã kõ-a-la zɩɩmã,+ t’a suk a nug-bilã zɩɩmã pʋgẽ n ning tẽn-kugrã yɩɩlã zutu, la a raag zɩɩmã sẽn ketã tẽn-kugrã sɛɛgẽ.+ 10 A yãka kaamã ne yiimã la sãoorã kaamã yel-wẽnd maoongã pʋgẽ, n yõog tẽn-kugrã zug sẽn na yɩl t’a bug-zõosã nusi, wa a Zeova sẽn da yeel a Moyiizã.+ 11 La a talla nemdã ne a gãongã n yi sik-zĩigã kɩreng n yõoge.+

12 A Aarõ kodga maoong sẽn yõogd bugmã, t’a kom-dibli wã kõ-a zɩɩmã t’a mes tẽn-kugrã kɩremsã fãa.+ 13 B kõ-a-la maoong sẽn yõogd bugmã nemdã sẽn beesã ne zugã, t’a yõog tẽn-kugrã zug sẽn na yɩl tɩ b bug-zõosã nusi. 14 Sẽn paase, a pegsa yãadã ne karsã, n yõog maoong sẽn yõogd bugmã zugu, tẽn-kugrã zug sẽn na yɩl tɩ b bug-zõosã nusi.

15 Rẽ poore, a rɩka nin-buiidã maoong n kõ Wẽnnaam: A yõka yel-wẽnd maoongã boɛɛgã sẽn yaa nin-buiidã yĩngã n kodge, n maan yel-wẽnd maoong wa a sẽn maan to-to ne pipi rũngã. 16 A kõo Wẽnnaam maoong sẽn yõogd bugmã. A maana wa sẽn zems noy nins b sẽn kõ maoong sẽn yõogd bugmã wɛɛngẽ wã.+

17 Sẽn pʋgde, a kõo Wẽnnaam kood biis kũuni.+ A yãka kũunã nug-pidung n yõog tẽn-kugrã zug sẽn na yɩl t’a bug-zõosã nusi. Rẽ tɩ b zoe n kõo yibeoog maoong sẽn yõogd bugmã.+

18 Rẽ poore, a kodga zems-n-taar maoongã loalg ne pe-raoogã sẽn yaa nin-buiidã yĩngã. A Aarõ kom-dibli wã kõ-a-la zɩɩmã t’a mes tẽn-kugrã kɩremsã fãa.+ 19 Sã n yaa ne loalgã kaamã b sẽn yãkã,+ pe-raoogã zʋʋrã sẽn yaa kaamã, kaamã sẽn lud pʋ-teedã, yiimã la sãoorã kaamã,+ 20 b rogla ka-kãens fãa loalgã yãoogã ne pe-raoogã yãoogã zutu. A Aarõ yõoga kaamã tẽn-kugrã zug sẽn na yɩl t’a bug-zõosã nusi.+ 21 La a Aarõ rɩka loalgã yãoogã ne pe-raoogã yãoogã n paas rɩtg gerã, n yuum poorẽ la taoore, tɩ yɩ maoong b sẽn yuumd a Zeova taoore, wa a Moyiiz sẽn da yeelã.+

22 Rẽ poore, a Aarõ zẽka a nusã n tees nin-buiidã n ning-b barka.+ A sẽn wa n maan yel-wẽnd maoongã ne maoong sẽn yõogd bugmã la zems-n-taar maandã n sa wã, a sigame. 23 Sẽn na n baase, a Moyiiz ne a Aarõ tũu taab n kẽ sɛk-roogã pʋgẽ, la b yi n ning nin-buiidã barka.+

Dẽ, a Zeova ziirã puka nin-buiidã fãa taoore.+ 24 Bugum n yi a Zeova nengẽ+ n dɩ maoong sẽn yõogd bugmã ne rũmsã kaamã sẽn be tẽn-kugrã zugã. Nin-buiidã fãa sẽn yã rẽ wã, b sɩnga kaasgo, la b lʋɩ n fõgen b nens tẽnga.+

10 A Nadaab ne a Abiyu+ sẽn yaa a Aarõ kom-dibli wã ned kam fãa wa n dɩka a bugum laag n ning bugum a pʋgẽ, n yãk wisd n dogl bugmã zugu.+ B yõoga wisd sẽn pa zems ne tõogã a Zeova taoore,+ wisd Wẽnnaam sẽn pa kõ-b noor tɩ b yõoge. 2 Dẽ, bugum n yi a Zeova nengẽ n dɩ-ba,+ tɩ b ki a Zeova taoore.+ 3 A Moyiiz yeela a Aarõ yaa: “Ad a Zeova sẽn yeel bũmb ningã: ‘Neb nins sẽn pẽ maamã segd n tẽegdame tɩ mam yaa sõngo,+ la b segd n waooga maam nin-buiidã fãa taoore.’” La a Aarõ kell n sĩnda a noore.

4 Dẽ, a Moyiiz boola a Misayɛll ne a Elizafan sẽn yaa a Aarõ baaba-bil a Uziyɛll+ kom-dibli wã n yeel-b yaa: “Wa-y ka. Rɩk-y y saam-biisã n yi zĩ-sõngã taoore, n kẽng sik-zĩigã kɩrenga.” 5 Dẽ, b kolgame n dɩk rapã ne b kasaabsã n yi sik-zĩigã kɩrenga, wa a Moyiiz sẽn da yeel-bã.

6 A Moyiiz yeela a Aarõ ne a Eleazaar la a Itamaar sẽn yaa a Aarõ kom-dibli a taabã yaa: “Ra bas-y y zutã tɩ zũndg wall y pãrs y futã,+ sẽn na yɩl tɩ y ra wa ki, la tɩ Wẽnnaam sũur da wa yik ne nin-buiidã fãa ye. Israyɛll nebã fãa sẽn yaa yãmb saam-biisã na n yãba neb nins a Zeova sẽn kʋ ne bugmã yĩnga. 7 Yãmb pa segd n yi sɛk-roogã rignoorẽ ye. Sã n pa rẽ, y na n kiime, bala a Zeova zaeebã kaamã bee yãmb zutu.”+ Dẽ, b maana wa a Moyiiz sẽn yeelã.

8 Rẽ poore, a Zeova yeela a Aarõ yaa: 9 “Foo ne f kom-dibli wã sã n wa na n kẽ sɛk-roogẽ wã,+ y pa segd n yũ divẽ wall rãam buud a to, sẽn na yɩl n da wa ki ye. Woto yaa noor sẽn paad wakat fãa yãmb zãmaan-dãmbã fãa pʋsẽ. 10 Yaa sẽn na n welg bũmb ning sẽn yaa sõngã ne bũmb ning sẽn pa sõngã, la welg bũmb ning sẽn yaa rẽgdã ne sẽn yaa-a yɩlemdã,+ 11 la sẽn na n zãms Israyɛll nebã noy nins fãa a Zeova sẽn kɩt t’a Moyiiz taas-bã.”+

12 Rẽ poore, a Moyiiz goma ne a Aarõ, la ne a Eleazaar la a Itamaar sẽn yaa a Aarõ kom-dibli nins sẽn ketã n yeele: “Maand nins b sẽn maand ne bugum n kõt a Zeova wã sʋka, rɩk-y kood biis kũunã sẽn kellã, n maan bur sẽn pa ning rabɩll n wãb tẽn-kugrã sɛɛga,+ bala yaa bũmb sẽn yaa sõng wʋsgo.+ 13 Yãmb segd n wãb-a-la zĩ-sõng pʋgẽ,+ bala rẽ yaa fo pʋɩɩre, la fo kom-dibli wã pʋɩɩre, maand nins b sẽn maand ne bugum n kõt a Zeova wã sʋka, bala yaa woto la b yeel maam. 14 Sẽn paase, foo ne f kom-dibli wã la f kom-pugli wã+ na n wãba maoong b sẽn yuumdã yãoogã, la pʋɩɩr sẽn yaa sõngã gerã+ zĩig sẽn yaa yɩlemdẽ. Bala b kõo bõn-kãens tɩ yaa fo pʋɩɩre, la f kom-dibli wã pʋɩɩr b sẽn yãk Israyɛll nebã zems-n-taar maandã sʋka. 15 B na n waa ne pʋɩɩr sẽn yaa sõngã gerã, ne maoong b sẽn yuumdã yãoogã, n paas maand b sẽn maand ne bugmã kaamã, sẽn na yɩl n yuum maoong b sẽn yuumdã poorẽ la taoor a Zeova taoore. Rẽ n na n yɩ foo ne f kom-dibli wã pʋɩɩr wakat fãa,+ wa a Zeova sẽn da yeelã.”

16 A Moyiiz gẽesa yel-wẽnd maoongã boɛɛgã,+ n wa mik tɩ b yõog-a lame. Rẽ n so t’a sũurã puug ne a Eleazaar la a Itamaar sẽn yaa a Aarõ kom-dibli nins sẽn ketã. A sok-b lame yaa: 17 “Bõe yĩng tɩ yãmb pa wãb yel-wẽnd maoongã zĩ-sõngẽ wã?+ Bala yaa bũmb sẽn yaa sõng wʋsg b sẽn kõ yãmba, sẽn na yɩl tɩ y yiis nin-buiidã kongrã, la y maan paasg* b yĩng a Zeova taoore. 18 B pa tall a zɩɩmã n kẽ zĩ-sõngẽ wã ye.+ Woto wã, yãmb da segd n wãb-a-la zĩ-sõngã pʋgẽ, wa b sẽn da yeel maamã.” 19 A Aarõ leoka a Moyiiz yaa: “Rũndã, b waa ne b yel-wẽnd maoongã ne b maoong sẽn yõogd bugmã a Zeova taoore.+ La bũmb nins fãa sẽn paam maamã poore, mam sã n da wãb yel-wẽnd maoongã rũndã, rẽ ra na n yɩɩ a Zeova noog sɩda?” 20 A Moyiiz sẽn wʋm dẽ wã, a wʋma a Aarõ sẽn maan woto wã võore.

11 A Zeova yeela a Moyiiz ne a Aarõ yaa: 2 “Yeel-y Israyɛll nebã yaa: ‘Ad bõn-vɩɩs nins yãmb sẽn tõe n wãbe:+ 3 Yãmb tõe n wãba rũms nins fãa sẽn tar nao-bend sẽn yaa boaga, la sẽn bɩɩsd yamdo.

4 “‘La ad rũms nins sẽn bɩɩsd yamd wall sẽn tar nao-bend sẽn yaa boag y sẽn pa segd n wãbe: Yaa yʋgemde. A bɩɩsda yamd la a pa tar nao-bend sẽn yaa boag ye. A na n yɩɩ rẽgd yãmb nifẽ.+ 5 Ne seere,+ bala a bɩɩsda yamd la a pa tar nao-bend sẽn yaa boag ye. A na n yɩɩ rẽgd yãmb nifẽ. 6 Ne soaamba, bala a bɩɩsda yamd la a pa tar nao-bend sẽn yaa boag ye. A na n yɩɩ rẽgd yãmb nifẽ. 7 Ne kurkuri,+ bala a tara nao-bend sẽn yaa boaga, la a pa bɩɩsd yamd ye. A na n yɩɩ rẽgd yãmb nifẽ. 8 Yãmb pa segd n wãb b nemdo, wall y sɩɩs b kũum ye. B na n yɩɩ rẽgd yãmb nifẽ.+

9 “‘Ad koomẽ bũmb nins y sẽn tõe n wãbe: Yãmb tõe n wãba bũmb nins fãa sẽn be koomẽ n tar gɛd la pagdo, tɩ yaa mogrã pʋg wall kʋɩlsã pʋsẽ.+ 10 La bũmb nins sẽn be mogrã pʋg wall kʋɩlsã pʋsẽ, n pa tar gɛd la pagdo, rat n yeel tɩ bõn-vɩɩs nins sẽn tũud taab wʋsgã fãa sʋka, la bõn-vɩɩs* a taabã sẽn be koomẽ wã sʋk na n yɩɩ rẽgd yãmb nifẽ. 11 B sẽn na n yɩ rẽgd yãmb nifẽ wã yĩnga, yãmb pa segd n wãb b nemd+ wall y sɩɩs b kũum ye. 12 Bũmb nins fãa sẽn be koomẽ n pa tar gɛd la pagd na n yɩɩ rẽgd yãmb nifẽ.

13 “‘Ad bõn-yɩgdɩ nins sẽn segd n yɩ rẽgd yãmb nifẽ. Yãmb pa segd n wãb-b ye. Bala b yaa rẽgdo: Yaa pa-nand-tugri,+ kʋɩl-sɩlga, yɩbren-sablga,+ 14 kosenkonde, sɩl-faoog buud fãa, 15 gãabg buud fãa, 16 naneoongo, viuugu, bulyẽoog buudu, wɩbg buud fãa, 17 viuug-liuula, koom daoogo, viuug sẽn tar tʋb-wogdo, 18 koomẽ lade, pelikã,* yɩbrengo, 19 kʋl-yaadga, raong buud fãa, nakomsugr la zãnkita. 20 Bõn-yɩgdɩ nins sẽn tũud taab wʋsg la sẽn kẽnd ne nao a naasã yaa rẽgd yãmb nifẽ.

21 “‘Bõn-yɩgdɩ nins sẽn tũud taab wʋsg la sẽn kẽnd ne nao a naasã sʋka, yãmb tõe n wãba sẽn tar-b gɛy a yiib n tõe n tão n yɩk n tĩimsã bala. 22 Bõn-kãens sʋka, ad yãmb sẽn tõe n wãb b rãmba: Yaa kalwaar buud toor-toor sẽn yɩgd n zãagd zĩiga, kalwaar a taab b sẽn wãbde,+ mogdrzẽems la sʋya. 23 Bõn-yɩgdɩ a taabã sẽn tar nao a naasã na n yɩɩ rẽgd yãmb nifẽ. 24 Yãmb sã n wãb bõn-kãensã, y na n dẽgma y mense. Ned sã n sɩɩs b kũumã, a na n yɩɩ rẽgd n tãag zaabre.+ 25 Ned sã n dɩk b kũumã, a segd n pegsa a futã,+ la a na n kell n yɩɩ rẽgd n tãag zaabre.

26 “‘Rũms nins fãa sẽn tar nao-bend sẽn pa boagã, la sẽn pa bɩɩsd yamd na n yɩɩ rẽgd yãmb nifẽ. Ned sã n sɩɩs-ba, a na n yɩɩ rẽgdo.+ 27 Bõn-vɩɩs nins sẽn kẽnd ne nao a naasã sʋka, sẽn kẽnd-b ne nao-kidã* fãa na n yɩɩ rẽgd yãmb nifẽ. Ned sã n sɩɩs b kũum, a na n kell n yɩɩ rẽgd n tãag zaabre. 28 Ned sã n dɩk b kũum, a segd n pegsa a futã,+ la a na n kell n yɩɩ rẽgd n tãag zaabre.+ B na n yɩɩ rẽgd yãmb nifẽ.

29 “‘Ad bõn-vɩɩs nins sẽn yaa kɩds la sẽn na n yɩ rẽgd yãmb nifẽ wã: Yaa sãbtõaasg buudu, yõngre,+ bũmb buud fãa sẽn wõnd bõn-poaka: 30 Yaa kõsenkõogo, wiuugu, bãngenlegsre, sẽnemde, la gomtɩʋʋgo. 31 Bõn-vɩ-kãensã sẽn yaa kɩdsã na n yɩɩ rẽgd yãmb nifẽ.+ Ned sã n sɩɩs b kũum, a na n kell n yɩɩ rẽgd n tãag zaabre.+

32 “‘B sã n ki n lʋɩ bũmb pʋgẽ, bõn-kãng na n yɩɩ rẽgdo, tɩ yaa laok sẽn maan ne raoogo, wall fuugu, gãongo, pa rẽ bɩ boto. Sã n yaa laok b sẽn tar n tʋmdẽ, b segd n los-a-la koomẽ, la a na n kell n yɩɩ rẽgd n tãag zaabre. Rẽ poore, a na n lebga yɩlemde. 33 B sã n lʋɩ tãnd laokẽ, y segd n wã-a lame. La bũmb ning fãa sẽn da be a pʋgẽ wã na n yɩɩ rẽgdo.+ 34 Laok a woto koom sã n sɩɩs rɩɩb buud fãa, rɩɩbã na n yɩɩ rẽgdo. Bõn-yũudl buud fãa sẽn be laok a woto pʋgẽ na n yɩɩ rẽgdo. 35 B kũumã sã n lʋɩ bũmb zugu, bõn-kãng na n yɩɩ rẽgdo. Sã n yaa wʋng wall yɩgre,* b segd n wã-a lame. B yaa rẽgdo, n na n kell n yɩ rẽgd yãmb nifẽ. 36 Yaa ko-bundg zĩig la bok b sẽn maneg n ningd koom bal n na n kell n yɩ yɩlemde. La ned sã n sɩɩs b kũumã, a na n yɩɩ rẽgdo. 37 B kũumã sã n lʋɩ bõn-buud b sẽn dat n bʋd zugu, bõn-buudã yaa yɩlemde. 38 La b sã n wʋlg kood tɩ b kũumã lʋɩ a pʋgẽ, koodã na n yɩɩ rẽgd yãmb nifẽ.

39 “‘Rũng yãmb sẽn wãbd sã n ki, ned ning fãa sẽn sɩɩs a kũumã na n kell n yɩɩ rẽgd n tãag zaabre.+ 40 Ned ning fãa sẽn wãb a nemdã segd n pegsa a futã, la a na n kell n yɩɩ rẽgd n tãag zaabre.+ Ned ning fãa sẽn dɩk a kũumã segd n pegsa a futã, la a na n kell n yɩɩ rẽgd n tãag zaabre. 41 Bõn-vɩɩs nins fãa sẽn kẽnd n pʋgd taab wʋsgã yaa rẽgdo.+ Yãmb pa segd n wãb-b ye. 42 Yãmb pa segd n wãb bõn-vɩɩs nins sẽn vũud b pʋsã zutã, bõn-vɩɩs nins sẽn kẽnd ne nao a naasã, wall bõn-vɩɩs nins sẽn tũud taab wʋsg n tar nao ka tɛkã ye. Bala b yaa rẽgdo.+ 43 Ra rẽgm-y y mens* ne bõn-vɩɩs nins sẽn tũud taab wʋsgã baa a yembr ye. Ra wãb-y bõn-kãensã baa a ye n dẽgem y mens ye.+ 44 Bala mam yaa yãmb Wẽnnaam a Zeova.+ Yãmb segd n yɩlga y mens n lebg sõamyã,+ bala mam yaa sõngo.+ Woto wã, yãmb pa segd n dẽgem y mens* ne bõn-vɩɩs nins sẽn kẽnd n tũud taab wʋsgo, n saagd tẽngã zugã baa a yembr ye. 45 Bala mam yaa a Zeova, soab ning sẽn yiis yãmb Ezɩpt soolmẽ wã sẽn na yɩl n wilg yãmb tɩ mam yaa Wẽnnaamã.+ Yãmb segd n yɩɩ sõamyã,+ bala mam yaa sõngo.+

46 “‘Woto yaa tõog rũmsã wɛɛngẽ, bõn-yɩgdɩ wã, bõn-vɩɩs* nins sẽn be koomẽ wã, la bõn-vɩɩs* nins sẽn kẽnd n tũud taab wʋsg tẽngã zugã wɛɛngẽ. 47 Yaa sẽn na n welg sẽn yaa rẽgd ne sẽn yaa yɩlemde, la bõn-vɩɩs nins b sẽn tõe n wãbã ne b sẽn pa segd n wãb b rãmbã.’”+

12 A Zeova le yeela a Moyiiz yaa: 2 “Yeel Israyɛll nebã yaa: ‘Pag sã n dɩk pʋg n dog bi-ribla, a na n yɩɩ rẽgd rasem a yopoe, wa a sẽn yaa rẽgd a pekr sasa wã.+ 3 Rasem a nii-n-soabã, b segd n kẽesa biigã bãongo.+ 4 Pagã na n kell n yɩlga a meng rasem pis-tã la a tã nins sẽn pʋgdã, zɩɩmã yĩnga. A pa segd n sɩɩs bũmb sẽn yaa sõng ye. A pa segd me n wa zĩ-sõngẽ wã, hal n tãag a yɩlgrã ray sõor sẽn na n pidi.

5 “‘A sã n doga bi-pugla, a na n yɩɩ rẽgd rasem piig la a naase, wa a sẽn yaa rẽgd a pekr sasa wã. A na n kell n yɩlga a meng rasem pis-yoob la a yoob nins sẽn pʋgdã, zɩɩmã yĩnga. 6 A yɩlgrã ray sõor sã n wa pidi, tɩ yaa bi-ribl wall bi-pugl yĩnga, a na n talla pe-ra-poll sẽn pa yɩɩd yʋʋmd n wa sɛk-roogã rignoorẽ, maoong sẽn yõogd bugum yĩnga,+ la marwan-bil bɩ walle, yel-wẽnd maoong yĩnga. A na n kõo maan-kʋʋdã bõn-kãense. 7 Maan-kʋʋdã na n tall-b lame n wa a Zeova taoore, n maan paasg* pagã yĩnga. Rẽ la a na n lebg yɩlemd a zɩɩmã sẽn daagã yĩnga. Woto yaa tõog pag sẽn dog yĩnga, tɩ yaa bi-ribl wall bi-pugl la a rog-yã. 8 La a sã n pa tõe n paam pe-raoogo, a segd n waa ne wal a yiib bɩ marwan-bi a yiibu:+ A ye wã maoong sẽn yõogd bugum yĩnga, t’a to wã yel-wẽnd maoong yĩnga. Maan-kʋʋdã na n maana paasg a yĩnga, t’a lebg yɩlemde.’”

13 A Zeova kell n goma ne a Moyiiz la a Aarõ n yeele: 2 “Ned yĩn-gãong sã n wa yãk zĩig n mode, wall a tara yãmd wall tẽgsame, tɩ tõe n wa lebg wãoodo,*+ b segd n tall-a lame n wa maan-kʋʋd a Aarõ nengẽ, wall a kom-dibli wã sẽn yaa maan-kʋʋdbã+ nin-yend nengẽ. 3 Maan-kʋʋdã na n maaga a yĩng n ges nodrã sẽn be a yĩn-gãongẽ wã. Sã n mik tɩ kõbdã sẽn be nodrẽ wã lebga pɛɛla, tɩ wõnd nodrã rɩ n kẽeme, yaa wãoodo. Maan-kʋʋdã na n maaga a yĩng n ges-a, la a yeel t’a soabã yaa rẽgdo. 4 La yĩn-gãongã sẽn tẽgsã sã n yaa pɛɛla, tɩ wõnd nodrã pa rɩ n kẽ, la kõbdã me sã n pa pelge, maan-kʋʋdã na n kɩtame tɩ nin-kãng yi kɛɛng rasem a yopoe.+ 5 Maan-kʋʋdã na n maaga a yĩng n ges-a rasem a yopoe-n-soabã. Sã n wõnd nodrã pa yãnge, n pa yalg yĩn-gãongã zug me, maan-kʋʋdã na n le kɩtame t’a yi kɛɛng rasem a yopoe yɛsa.

6 “Maan-kʋʋdã segd n maaga a yĩng n le ges-a rasem a yopoe-n-soabã. Sã n wõnd nodrã maagdame, n pa yalg yĩn-gãongã zugu, maan-kʋʋdã na n yeelame t’a yaa yɩlemde.+ Ra yaa yãmd bala. Nin-kãng na n pegsa a futã n yɩ yɩlemde. 7 La a sẽn wa maan-kʋʋdã taoor sẽn na yɩl t’a wilg t’a yaa yɩlemdã poore, yãmdã sã n yalg a yĩn-gãongã zugu, a segd n waa maan-kʋʋdã nengẽ yɛsa.* 8 Maan-kʋʋdã na n maaga a yĩng n ges yãmdã. Sã n mik t’a yalga yĩn-gãongã zugu, maan-kʋʋdã na n yeelame t’a yaa rẽgdo. Yaa wãoodo.+

9 “Wãood sã n yõk neda, b segd n tall-a lame n wa maan-kʋʋdã nengẽ, 10 tɩ maan-kʋʋdã maag a yĩng n ges-a.+ Sã n mik t’a yĩn-gãongã zĩig ning sẽn modã yaa pɛɛlga, tɩ kõbdã lebg pɛɛla, la sã n mik tɩ nodr+ n be a zugu, 11 yaa wãood sẽn tõt saab n be a yĩn-gãongẽ wã. Maan-kʋʋdã na n yeelame t’a yaa rẽgdo. A pa segd n kɩt t’a yi kɛɛng ye.+ Bala a yaa rẽgdo. 12 Sã n mik tɩ wãoodã puka a yĩn-gãongã tõre, tɩ wãoodã be a yĩngã tõr sẽn sɩng ne a zugã n tãag a naoã, rat n yeel tɩ maan-kʋʋdã sẽn tõe n yã zĩis ninsã, 13 la tɩ maan-kʋʋdã sẽn maag a yĩng n ges-a wã, a yãame tɩ wãoodã bee a yĩn-gãongã tõre, a na n yeelame tɩ nin-kãng yaa yɩlemde. Wãoodã fãa sẽn lebg pɛɛlgã, a yaa yɩlemde.* 14 La sẽn yaa wakat ning fãa la nodr puk zĩig ning sẽn yaa pɛɛlgã, a soabã na n yɩɩ rẽgdo. 15 Maan-kʋʋdã sã n ges nodrã, a na n yeelame t’a yaa rẽgdo.+ Nodrã yaa rẽgdo. Yaa wãoodo.+ 16 La nodrã sã n le pelge, a na n waa maan-kʋʋdã nengẽ. 17 Maan-kʋʋdã na n maaga a yĩng n ges-a.+ Sã n mik tɩ nodrã pelgame, maan-kʋʋdã na n yeelame t’a soabã yaa yɩlemde. A yaa yɩlemde.

18 “Nod-tãoodr sã n puk ned yĩn-gãongẽ n maage, 19 t’a zĩigã wa mod n yaa pɛɛlga, pa rẽ bɩ a zĩigã sã n tẽgs pɛɛl la miidu, a segd n tɩ wilga a meng maan-kʋʋdã. 20 Maan-kʋʋdã na n maaga a yĩng n gese,+ la sã n mik tɩ sẽn tẽgsã rɩ n kẽeme, tɩ kõbdã me pelge, maan-kʋʋdã na n yeelame t’a yaa rẽgdo. Yaa wãood n puk nod-tãoodrã zĩigẽ. 21 La maan-kʋʋdã sã n maag a yĩng n ges n mik tɩ kõb-pɛɛl pa be a pʋgẽ, la tɩ pa rɩ n kẽ, la sã n wõnd maagdame, maan-kʋʋdã na n kɩtame t’a yi kɛɛng rasem a yopoe.+ 22 La sã n yaa vẽeneg tɩ yãnga yĩn-gãongã zugu, maan-kʋʋdã na n yeelame t’a yaa rẽgdo. Yaa bãaga. 23 La sẽn tẽgsã sã n bee zĩ-yɛng n pa ta zĩis a taaba, rẽnd yaa nod-tãoodrã bal n mode. Maan-kʋʋdã na n yeelame t’a yaa yɩlemde.+

24 “Pa rẽ bɩ ned sã n tar bugum nodre, tɩ zĩig ning nemsã sẽn tondã tẽgs miid-miid wall pɛɛl-pɛɛla, 25 maan-kʋʋdã na n maaga a yĩng n gese. Kõbdã sẽn be a pʋgẽ wã sã n pelgame, tɩ wõnd me t’a rɩ n kẽeme, yaa wãood n puk nodrẽ wã. Maan-kʋʋdã na n yeelame t’a yaa rẽgdo. Yaa wãoodo. 26 La maan-kʋʋdã sã n maag a yĩng n ges n mik tɩ kõbd sẽn pelg pa be zĩig ning sẽn tẽgsã, tɩ pa rɩ n kẽ, la tɩ maagdame, maan-kʋʋdã na n welg-a-la toor rasem a yopoe.+ 27 Maan-kʋʋdã na n maaga a yĩng n ges-a rasem a yopoe-n-soabã. Sã n yaa vẽeneg tɩ sẽn tẽgsã taa zĩis a taab yĩn-gãongã zugu, maan-kʋʋdã na n yeelame t’a yaa rẽgdo. Yaa wãoodo. 28 La sã n mik tɩ sẽn tẽgsã bee zĩ-yɛng n pa ta zĩis a taab yĩn-gãongã zugu, la tɩ maagdame, rẽnd yaa nodrã bal n mode. Maan-kʋʋdã na n yeelame t’a yaa yɩlemde, bala yaa nodrã n mode.

29 “Nodr sã n puk pag bɩ rao zugẽ wall a lemdẽ, 30 maan-kʋʋdã na n maaga a yĩng n ges nodrã.+ Sã n wõnd a rɩ n kẽeme, tɩ zoobdã yaa kõodr la kar-kare, maan-kʋʋdã na n yeelame t’a soabã yaa rẽgdo. Yaa bãag n puk zu-gãongã zug wall toɛɛngẽ wã. Yaa zug bɩ lemd wãoodo. 31 La maan-kʋʋdã sã n yã tɩ nodrã pa rɩ n kẽ, la tɩ zoob-sabl pa be a pʋgẽ, a segd n welga nin-kãng toor rasem a yopoe.+ 32 Maan-kʋʋdã na n maaga a yĩng n ges nodrã rasem a yopoe-n-soabã. Nodrã zĩig sã n pa yalge, tɩ zoobd sẽn yaa kõodr pa yi a pʋgẽ, tɩ nodrã zĩig wõnd pa rɩ n kẽ, 33 a soabã segd n kɩtame tɩ b põng a zugã bɩ a toɛɛngã, la a pa na n kɩt tɩ b põng nodrã zĩigẽ ye. Rẽ poore, maan-kʋʋdã na n welga a soabã toor rasem a yopoe.

34 “Maan-kʋʋdã na n le maaga a yĩng n ges nodrã zĩig rasem a yopoe-n-soabã. Sã n mik tɩ zu-gãongã bɩ toɛɛngã nodrã pa yãng yĩn-gãongã zugu, la a pa rɩ n kẽ, maan-kʋʋdã segd n yeelame tɩ nedã yaa yɩlemde. A segd n pegsa a futã n yɩ yɩlemde. 35 La a yɩlgrã poore, sã n wa lebg vẽeneg tɩ nodrã yãnga yĩn-gãongã zugu, 36 maan-kʋʋdã na n le maaga a yĩng n ges-a. Sã n mik tɩ nodrã yãnga yĩn-gãongã zugu, pa tɩlɛ tɩ maan-kʋʋdã gẽes zoobd sẽn yaa kõodr ye. A soabã yaa rẽgdo. 37 La sã n mik t’a sẽn gesã, a yãame tɩ nodrã pa yãnge, la tɩ zoob-sabl yii a pʋgẽ, wilgdame tɩ nodrã maagame. A yaa yɩlemde, tɩ maan-kʋʋdã na n yeel t’a yaa yɩlemde.+

38 “Pag bɩ rao yĩn-gãong sã n tẽgse, tɩ sẽn tẽgsã yaa pɛɛla, 39 maan-kʋʋdã na n maaga a yĩng n ges-ba.+ Yĩn-gãongã sẽn tẽgsã sã n yaa pɛɛl-pɛɛla, yaa bãag sẽn pa toaag n puk yĩn-gãongã zugu. Nin-kãng yaa yɩlemde.

40 “Rao zoobd sã n sʋʋg t’a lebg zu-kõogo, a yaa yɩlemde. 41 A rĩirã zoobd sã n sʋʋg tɩ zĩigã kõoge, a yaa yɩlemde. 42 La nodr sẽn yaa miuug n tẽgs pɛɛl sã n puk a zugã wall a rĩirã zĩig ning sẽn kõogã, yaa wãood n puk a zugã wall a rĩirẽ wã. 43 Maan-kʋʋdã na n maaga a yĩng n ges-a. Sã n mik tɩ nodrã sẽn be a zugã wall a rĩirã zĩig ning sẽn kõogã yaa miuug n tẽgs pɛɛla, n wõnd wãood a yĩn-gãongã zugu, 44 a yaa wãoore. A yaa rẽgdo. Maan-kʋʋdã segd n yeelame t’a yaa rẽgdo, bãagã sẽn be a zugẽ wã yĩnga. 45 Sã n yaa ne wãoorã, a segd n pãrsa a futã, n bas a zugã tɩ zũndgi, la a pil a no-kõbdã, n zẽkd a koɛɛg n yetẽ: ‘Rẽgdo, rẽgdo!’ 46 A na n yɩɩ rẽgd a bãagã sasa fãa. A sẽn yaa rẽgdã yĩnga, a segd n vɩɩmda kɛɛnga. A yirã segd n zĩnda sɛk-zĩigã kɩrenga.+

47 “Wãood sã n yõk fuugu, tɩ yaa rũms kõbd wall lẽ* gĩs fuugu, 48 tɩ yaa lẽ gĩs wall rũms kõbd gĩs b sẽn na n tall n wʋg fuugu, pa rẽ bɩ yaa gãongo, wall bũmb buud fãa b sẽn maan ne gãongo, 49 tɩ bãagã kɩt tɩ fuugã, gĩsã b sẽn na n tall n wʋg fuugã, pa rẽ bɩ gãongã wall bũmb buud fãa b sẽn maan ne gãongã tẽgs kõodr-kõodr wall miuugu, yaa wãood n yõk-a. B segd n tɩ wilg-a-la maan-kʋʋdã. 50 Maan-kʋʋdã na n maaga a yĩng n ges bãagã. A segd n welga bũmb ning wãoodã sẽn yõkã toor rasem a yopoe.+ 51 A sã n maag a yĩng n ges bũmb ning bãagã sẽn yõkã rasem a yopoe-n-soabã, n mik tɩ wãoodã yãnga fuugã zugu, gĩsã b sẽn na n tall n wʋg fuugã zugu, wall gãongã zugu, (baa sẽn yaa bũmb ning fãa la b tall gãongã n maane,) bãagã yaa wãood sẽn yaa toaaga. Bũmbã yaa rẽgdo.+ 52 A segd n yõoga fuugã wall lẽ gĩsã bɩ rũms kõbd gĩsã b sẽn na n tall n wʋg fuugã, wall bũmb buud fãa sẽn maan ne gãong tɩ wãoodã yõkã, bala yaa wãood sẽn yaa toaaga. B segd n yõog-a-la bugum.

53 “La maan-kʋʋdã sã n maag a yĩng n ges bãagã n mik t’a pa yãng fuugã zugu, wall gĩsã b sẽn na n tall n wʋg fuugã, pa rẽ bɩ bũmb buud fãa b sẽn maan ne gãongã zugu, 54 maan-kʋʋdã na n yeelame tɩ b pek bũmb ning wãoodã sẽn yõkã, la a welg-a toor rasem a yopoe yɛsa. 55 Maan-kʋʋdã na n maaga a yĩng n ges bũmbã, b sẽn pek-a sõma wã poore. Bãagã sẽn yaa to-to wã sã n pa toeeme, baa a sã n pa yãnge, bũmbã yaa rẽgdo. Yãmb segd n yõog-a-la bugum, bala a rɩɩme n lebg faaga, tɩ yaa a nen-lebendẽ wã bɩ a nen-sõngẽ wã.

56 “La maan-kʋʋdã sã n maag a yĩng n ges-a, n mik tɩ bãagã zĩigã pelga b sẽn pek-a sõma wã poore, a na n wãaga zĩ-kãng fuugẽ wã, wall gãongẽ wã, pa rẽ bɩ gĩsã b sẽn na n tall n wʋg fuugẽ wã. 57 La wãoodã sã n le puk zĩig a to fuugã zugu, gĩsã b sẽn na n tall n wʋg fuugã, wall bũmb buud fãa b sẽn maan ne gãong zugu, a yãngdame. Bũmb ning fãa wãood sẽn yõke, yãmb segd n yõog-a-la bugum.+ 58 La wãood sã n yõk fuugu, gĩs b sẽn na n tall n wʋg fuugu, wall bũmb buud fãa sẽn maan ne gãong tɩ yãmb pek-a tɩ wãoodã meneme, y segd n le pek-a-la naoor a yiib-n-soaba. Rẽ la a na n yɩ yɩlemde.

59 “Woto yaa tõog b sẽn kõ wãood sẽn yõk rũms kõbd fuug wall lẽ gĩs fuug wɛɛngẽ, pa rẽ bɩ gĩs b sẽn na n tall n wʋg fuugu, wall bũmb buud fãa sẽn maan ne gãong wɛɛngẽ, sẽn na yɩl tɩ b tõe n yeel t’a yaa yɩlemd wall rẽgdo.”

14 A Zeova kell n goma ne a Moyiiz n yeele: 2 “Ad noy nins wãoor sẽn segd n tũ daar ning b sẽn na n wilg t’a lebga yɩlemdã, b sẽn na n tall-a n wa maan-kʋʋdã nengẽ daar ningã.+ 3 Maan-kʋʋdã na n yii sik-zĩigã kɩreng n maag a yĩng n ges-a. Sã n mik tɩ wãoodã saame, 4 maan-kʋʋdã na n yeel-a lame t’a wa ne liuun-vɩɩs a yiib sẽn yaa yɩlma, sɛɛdr daoogo, peen-miuug la izop* a yɩlgrã yĩnga.+ 5 Maan-kʋʋdã na n yeelame tɩ b kʋ liuul a ye wã tãnd laok pʋgẽ, tãnd laok sẽn tar koom b sẽn yãk ko-zoetem zĩigẽ. 6 La maan-kʋʋdã segd n dɩka liuun-vɩɩgã n paas sɛɛdr daoogã, peen-miuugã la izopã n suk-b fãa liuul ning b sẽn kʋ ko-zoetmã pʋgẽ wã zɩɩmẽ wã. 7 Rẽ poore, a na n mesa zɩɩmã naoor a yopoe ned ning sẽn yɩlgd a meng ne wãoodã zugu, la a yeel t’a yaa yɩlemde. A na n basa liuun-vɩɩgã t’a yɩk n kẽ weoogã.+

8 “Ned ning sẽn yɩlgd a mengã segd n pegsa a futã, n põng a zugã ne a yĩngã kõbdã fãa la a so koom. A na n lebga yɩlemde. Rẽ poore, a tõe n waa sik-zĩigẽ wã, la rasem a yopoe pʋgẽ, a pa segd n kẽ a fu-roogã pʋgẽ ye. 9 Rasem a yopoe-n-soabã, a segd n põnga a zugã zoobdo, a lemdã la a nin-kõbdã fãa. A sã n põng a kõbdã fãa poore, a na n pegsa a futã la a so koom n yɩ yɩlemde.

10 “Rasem a nii-n-soabã, a na n waa ne pe-ra-poal a yiib sẽn pa tar zanga, pe-sadg sẽn pa yɩɩd yʋʋmd n pa tar zanga,+ zom-bãaneg efa pʋɩ a tãab pʋɩ piig zug* sẽn kalem ne kaam, kood biis kũun+ yĩnga, la kaam log* a yembre.+ 11 Maan-kʋʋd ning sẽn yeel tɩ ned ning sẽn yɩlgd a mengã yaa yɩlemdã na n tall-a-la ne maandã, n wa a Zeova taoore, sɛk-roogã rignoorẽ. 12 Maan-kʋʋdã na n yõka pe-raoog a ye n kõ tɩ yɩ taal maoongo,+ ne kaam log a yembrã. A na n yuum-b-la poorẽ la taoor tɩ yɩ maoong b sẽn yuumd a Zeova taoore.+ 13 Rẽ poore, a na n kodga pe-ra-pollã zĩig ning b sẽn wae n koot yel-wẽnd maoongã ne maoong sẽn yõogd bugmã,+ rat n yeel tɩ zĩ-sõng pʋgẽ. Bala taal maoongã yaa maan-kʋʋdã rẽnda,+ wa yel-wẽnd maoongã. Yaa bũmb sẽn yaa sõng wʋsgo.+

14 “Maan-kʋʋdã na n yãka taal maoongã zɩɩmã, n tẽk ned ning sẽn yɩlgd a mengã rɩtg tʋbrã, a rɩtg nug-raoogã, la a rɩtg na-raoogã. 15 Maan-kʋʋdã na n dɩka kaam log a yembrã+ n pʋdg bilf a meng goabg nug-pʋgẽ wã. 16 Maan-kʋʋdã na n suka a rɩtg nug-bilã kaamã sẽn be a goabg nug-pʋgẽ wã, n yãk kaamã ne a nug-bilã n mes a Zeova taoor naoor a yopoe. 17 Rẽ poore, a na n yãka kaamã sẽn ket a nug-pʋgẽ wã n tẽk ned ning sẽn yɩlgd a mengã rɩtg tʋbrã, a rɩtg nug-raoogã, la a rɩtg na-raoogã, taal maoongã zɩɩm zugu. 18 Maan-kʋʋdã na n kiiga kaamã sẽn ket a nug-pʋgẽ wã ned ning sẽn yɩlgd a mengã zugẽ, n maan paasg* a yĩng a Zeova taoore.+

19 “Maan-kʋʋdã na n kʋʋ yel-wẽnd maoongã,+ n maan paasg ned ning sẽn yɩlgd a meng a rẽgdã yĩngã yĩnga. Rẽ poore, a na n kodga maoong sẽn yõogd bugmã. 20 Maan-kʋʋdã na n yõoga maoong sẽn yõogd bugmã ne kood biis kũunã+ tẽn-kugrã zugu, n maan paasg a yĩnga,+ t’a yɩ yɩlemde.+

21 “La a sã n yaa naong soab n pa tõe n paam bõn-kãense, a na n waa ne pe-ra-poll a ye tɩ yɩ taal maoongo, maoong b sẽn yuumd yĩnga, sẽn na yɩl n maan paasg a meng yĩnga, n paas zom-bãaneg efa pʋɩɩr a yembr pʋɩ piig zug* sẽn kalem ne kaam, kood biis kũun yĩnga, la kaam log a yembre, 22 ne wal a yiib bɩ marwan-bi a yiib wa sẽn zems a tarem. A yembr na n yɩɩ yel-wẽnd maoongo, t’a to wã yɩ maoong sẽn yõogd bugum.+ 23 Rasem a nii-n-soabã,+ a na n tall-b lame n wa kõ maan-kʋʋdã sɛk-roogã rignoorẽ, a Zeova taoore, sẽn na yɩl tɩ b yeel t’a yaa yɩlemde.+

24 “Maan-kʋʋdã na n deega taal maoongã pe-ra-pollã+ ne kaam log a yembrã, n yuum poorẽ la taoor tɩ yɩ maoong b sẽn yuumd a Zeova taoore.+ 25 Rẽ poore, a na n kodga taal maoongã pe-ra-pollã, n yãk taal maoongã zɩɩmã n tẽk ned ning sẽn yɩlgd a mengã rɩtg tʋbrã, a rɩtg nug-raoogã la a rɩtg na-raoogã.+ 26 Maan-kʋʋdã na n pʋdga kaamã bilf a meng goabg nug-pʋgẽ wã,+ 27 la a yãk kaamã sẽn be a goabg nug-pʋgẽ wã ne a rɩtg nug-bilã n mes a Zeova taoor naoor a yopoe. 28 Rẽ poore, maan-kʋʋdã na n yãka kaamã sẽn be a nug-pʋgẽ wã n tẽk ned ning sẽn yɩlgd a mengã rɩtg tʋbrã, a rɩtg nug-raoogã la a rɩtg na-raoogã, zĩis nins a sẽn tẽgs taal maoongã zɩɩmã. 29 Maan-kʋʋdã na n kiiga kaamã sẽn ket a nug-pʋgẽ wã ned ning sẽn yɩlgd a mengã zugẽ, sẽn na yɩl n maan paasg a yĩng a Zeova taoore.

30 “A na n kõo wall a ye wã bɩ marwan-bil a ye wã wa sẽn zems a tarmã,+ 31 a sẽn tõe n da a soabã tɩ yɩ yel-wẽnd maoongo, la a kõ a to wã tɩ yɩ maoong sẽn yõogd bugum,+ n naag kood biis kũunã. Maan-kʋʋdã na n maana paasg ned ning sẽn yɩlgd a mengã yĩng a Zeova taoore.+

32 “Woto yaa tõog b sẽn kõ ned wãood sẽn da yõk wɛɛngẽ, t’a yaool n pa tar paoong wakat ning b sẽn na n yeel t’a yaa yɩlemdã ye.”

33 Rẽ poore, a Zeova yeela a Moyiiz ne a Aarõ yaa: 34 “Yãmb sã n wa kẽ Kanaã soolmẽ wã,+ soolem ning mam sẽn na n kõ yãmb tɩ y soogã+ pʋgẽ, tɩ mam kɩt tɩ wãood+ yõk roog yãmb tẽngã pʋgẽ, 35 ned ning sẽn so roogã segd n wa yeela maan-kʋʋdã yaa: ‘Bãag buud n puk mam doogã pʋgẽ.’ 36 Maan-kʋʋdã na n kɩtame tɩ b yiis roogã teed fãa nand t’a wa maag a yĩng n ges bãagã, sẽn na yɩl t’a ra wa yeel tɩ bũmb nins fãa sẽn be roogẽ wã yaa rẽgd ye. Rẽ poore, maan-kʋʋdã na n wa kẽeme n ges roogã. 37 A sã n maag a yĩng n ges bãagã, n mik tɩ bãagã bee roogã lalg zugu, n tẽgs kõodr-kõodr la miid-miidu, la tɩ wõnda sẽn tẽgsẽ wã võd n kẽe lalgã pʋgẽ, 38 a na n yii roogã pʋgẽ n yaas rignoorẽ wã, n yeel tɩ b pag roogã rasem a yopoe.+

39 “Maan-kʋʋdã na n lebg n wa gesa roogã rasem a yopoe-n-soabã. Sã n mik tɩ bãagã taa zĩis a taab roogã lalg zugu, 40 a na n kɩtame tɩ b yãgs kug nins bãagã sẽn ta wã, n yi tẽngã kɩreng n tɩ lob zĩig sẽn yaa rẽgdẽ. 41 Rẽ poore, a na n kɩtame tɩ b kẽ roogã pʋg n pẽeg lalgã zãnga, la b wʋk boalgã ne tãndã b sẽn pẽegã n yi tẽngã kɩreng n tɩ lob zĩig sẽn yaa rẽgdẽ. 42 B na n baoo kug a taab n ledg kug nins b sẽn yãgsã. B segd n me-b-la ne tãnd a to, la b bol roogã yɛsa.

43 “La b sẽn yãgs kugã, n pẽeg roogã la b lebs n bol-a wã poore, bãagã sã n le puk roogã zĩis a taaba, 44 maan-kʋʋdã na n le kẽeme n ges-a. Sã n mik tɩ bãagã taa zĩis a taab roogã pʋgẽ, yaa wãood sẽn yaa toaag+ n yõk roogã. Roogã yaa rẽgdo. 45 A na n kɩtame tɩ b lub roogã, n wʋk a kugã, a raadã, a boalgã la a tãndã fãa n yi tẽngã kɩreng n tɩ lob zĩig sẽn yaa rẽgdẽ.+ 46 La wakat ning b sẽn kɩt tɩ b pag roogã,+ ned sã n kẽ a pʋgẽ, a na n yɩɩ rẽgd n tãag zaabre.+ 47 Ned sã n gãand a pʋgẽ, a segd n pegsa a futã. Ned sã n zĩnd a pʋgẽ n dɩ, a segd n pegsa a futã.

48 “La b sẽn lebs n bol roogã poore, maan-kʋʋdã sã n wa, n mik tɩ bãagã pa ta zĩis a taab roogã pʋgẽ, a na n yeelame tɩ roogã yaa yɩlemde, bala bãagã saame. 49 Sẽn na yɩl n yɩlg roogã n yiis rẽgdã,* a na n dɩka liuuli a yiibu, sɛɛdr daoogo, peen-miuugu, la izope.+ 50 A segd n kʋʋ liuul a ye wã tãnd laok pʋgẽ, tãnd laok sẽn tar koom b sẽn yãk ko-zoetem zĩigẽ. 51 Rẽ poore, a na n dɩka sɛɛdr daoogã, izopã, peen-miuugã la liuun-vɩɩgã, n suk-b fãa liuul ning b sẽn kʋ wã zɩɩmẽ wã, la ko-zoetmã pʋgẽ. A segd n teesa roogã n mes naoor a yopoe.+ 52 A na n talla liuulã zɩɩmã, ko-zoetmã, liuun-vɩɩgã, sɛɛdr daoogã, izopã ne peen-miuugã n yɩlg roogã n yiis rẽgdã.* 53 Rẽ poore, a na n talla liuun-vɩɩgã n yi tẽngã kɩreng n bas-a t’a yɩk n kẽ weoogã. Woto, a na n yiisa rẽgdã* roogã zugu, t’a yɩ yɩlemde.

54 “Woto yaa tõog wãood buud fãa wɛɛngẽ, zug wall toɛɛng bãaga,+ 55 fuug+ wall roog+ wãood wɛɛngẽ, 56 ned yĩn-gãong sẽn wa n yãk zĩig n mode, sẽn tar yãmd wall sẽn tẽgs+ wɛɛngẽ, 57 sẽn na yɩl n wilg bũmb sã n yaa rẽgd wall bũmb sã n yaa yɩlemde.+ Woto yaa tõog wãoodã wɛɛngẽ.”+

15 A Zeova kell n goma ne a Moyiiz la a Aarõ n yeele: 2 “Gom-y ne Israyɛll nebã n yeel-b yaa: ‘Koom sã n yit rao raoolmẽ,* koomã sẽn yitã kɩtame t’a yaa rẽgdo.+ 3 A yaa rẽgd koomã sẽn yitã yĩnga. Koomã yita a raoolmẽ wã wall kɩtame t’a raoolmã noor yẽd me, a yaa rẽgdo.

4 “‘Rao ning raoolem sẽn yit koomã sã n gãand gãag zugu, gãagã na n yɩɩ rẽgdo. Bũmb ning fãa zug a sẽn zĩnd na n yɩɩ rẽgdo. 5 Ned sã n sɩɩs a gãagã, a soabã segd n pegsa a futã, la a so koom. La a na n kell n yɩɩ rẽgd n tãag zaabre.+ 6 Ned ning fãa sẽn zaoond bũmb rao ning raoolem sẽn yit koomã sẽn zaoond segd n pegsa a futã, la a so koom. La a na n kell n yɩɩ rẽgd n tãag zaabre. 7 Ned sã n sɩɩs rao ning raoolem sẽn yit koomã, a segd n pegsa a futã, la a so koom. La a na n kell n yɩɩ rẽgd n tãag zaabre. 8 Raoã sã n tʋbs ned sẽn yaa yɩlemd zugu, nin-kãng segd n pegsa a futã, la a so koom. La a na n kell n yɩɩ rẽgd n tãag zaabre. 9 Rao ning raoolem sẽn yit koomã sã n zomb rũng gaare, gaarã na n yɩɩ rẽgdo. 10 Ned ning sẽn sɩɩs bũmb buud fãa a sẽn zomb na n yɩɩ rẽgd n tãag zaabre. Ned ning fãa sẽn dɩk bõn-kãens na n pegsa a futã la a so koom. La a na n kell n yɩɩ rẽgd n tãag zaabre. 11 Raoã+ sã n pa pegs a nusã ne koom n yaool n sɩɩs neda, nin-kãng segd n pegsa a futã, la a so koom. La a na n kell n yɩɩ rẽgd n tãag zaabre. 12 Rao ning raoolem sẽn yit koomã sã n sɩɩs tãnd laoko, b segd n wãa-a lame. La a sã n sɩɩs laok b sẽn maan ne raoogo, b segd n pek-a lame.+

13 “‘Koomã sẽn yitã sã n wa yõk t’a paam a menga, a na n sõda rasem a yopoe a yɩlgrã yĩnga. A segd n pegsa a futã, la a yãk ko-zoetem n so n yɩ yɩlemde.+ 14 Rasem a nii-n-soabã, a segd n talla wal a yiib bɩ marwan-bi+ a yiib n wa kõ maan-kʋʋdã sɛk-roogã rignoorẽ, a Zeova taoore. 15 Maan-kʋʋdã na n tall-b lame n maan maoongo. A yembrã na n yɩɩ yel-wẽnd maoongo, t’a to wã yɩ maoong sẽn yõogd bugum. Maan-kʋʋdã na n maana paasg* a yĩng a Zeova taoore, a koomã sẽn da yitã yĩnga.

16 “‘Rao rog-biis koom sã n yi, a segd n soo koom, la a na n kell n yɩɩ rẽgd n tãag zaabre.+ 17 A segd n peka fuug wall gãong ning fãa rog-biisã koom sẽn made. La bõn-kãng na n kell n yɩɩ rẽgd n tãag zaabre.

18 “‘Rao sã n kẽ ne pag t’a rog-biisã koom yi, b segd n soo koom, la b na n kell n yɩɩ rẽgd n tãag zaabre.+

19 “‘Pag zɩɩm sã n yita, a na n kell n yɩɩ rẽgd a pekrã yĩng rasem a yopoe.+ Ned ning fãa sẽn sɩɩs-a na n kell n yɩɩ rẽgd n tãag zaabre.+ 20 A sã n gãand bũmb zug a pekrã sẽn kɩt t’a yaa rẽgdã sasa, bõn-kãng na n yɩɩ rẽgdo. A sã n zaoond bũmbu, bõn-kãng na n yɩɩ rẽgdo.+ 21 Ned ning fãa sẽn sɩɩs a gãagã segd n pegsa a futã, la a so koom. La a na n kell n yɩɩ rẽgd n tãag zaabre. 22 Ned ning fãa sẽn sɩɩs bũmb a sẽn zaoond segd n pegsa a futã, la a so koom. La a na n kell n yɩɩ rẽgd n tãag zaabre. 23 Pagã sã n zĩnd gãag wall bũmb a to zugu, ned ning fãa sẽn sɩɩs bõn-kãng na n kell n yɩɩ rẽgd n tãag zaabre.+ 24 Rao sã n kẽ ne-a t’a pekrã rẽgd mad-a,+ raoã na n yɩɩ rẽgd rasem a yopoe. Gãag ning fãa zug raoã sẽn na n gãand na n yɩɩ rẽgdo.

25 “‘Pag zɩɩm sã n yit rasem wʋsg+ tɩ yaool n pa a pekrã wakate,+ pa rẽ bɩ a pekrã zɩɩm yiime n kaoos n yɩɩg raasenkamã, a na n yɩɩ rẽgd ray nins fãa zɩɩmã sẽn yitã, wa a pekrã sẽn kɩt t’a yaa rẽgd wakat ningã. 26 Gãag ning fãa zug a sẽn gãand a zɩɩmã sẽn yit wakat ningã na n yɩɩ rẽgdo, wa gãag ning zug a sẽn gãe a pekrã sasa wã.+ Bũmb ning fãa zug a sẽn zaoond na n lebga rẽgdo, wa sẽn yaa to-to a pekrã rẽgd wakatã. 27 Ned ning fãa sẽn sɩɩs bõn-kãens na n yɩɩ rẽgdo. A segd n pegsa a futã, la a so koom. La a na n kell n yɩɩ rẽgd n tãag zaabre.+

28 “‘La a zɩɩmã sẽn yitã sã n wa yõke, a na n sõda rasem a yopoe, n yaool n yɩ yɩlemde.+ 29 Rasem a nii-n-soabã, a segd n talla wal a yiib bɩ marwan-bi+ a yiib n wa kõ maan-kʋʋdã sɛk-roogã rignoorẽ.+ 30 Maan-kʋʋdã na n kõo a ye wã tɩ yɩ yel-wẽnd maoongo, la a to wã tɩ yɩ maoong sẽn yõogd bugum. Maan-kʋʋdã na n maana paasg pagã yĩng a Zeova taoore, a zɩɩmã sẽn yaa rẽgdã sẽn da yitã yĩnga.+

31 “‘Woto, yãmb na n kɩtame tɩ Israyɛll nebã welg toor ne b rẽgdã, sẽn na yɩl tɩ b ra wa rẽgem mam sɛk-roogã sẽn be b sʋkã, n wa ki b rẽgdã yĩng ye.+

32 “‘Woto yaa tõog rao raoolem sẽn yit koom wɛɛngẽ, rao sẽn yaa rẽgd a rog-biisã koom sẽn yi yĩnga,+ 33 pag pekr sẽn kɩt t’a yaa rẽgdo,+ pag wall rao sẽn tar bõn-kãensã a ye,+ la rao sẽn kẽ ne pag a rẽgd wakat wɛɛngẽ.’”

16 A Zeova goma ne a Moyiizi, a Aarõ kom-dibli a yiibã sẽn ki b sẽn kolg a Zeova wã poore.+ 2 A Zeova yeela a Moyiiz yaa: “Togs f ba-biig a Aarõ t’a pa segd n kẽ zĩ-sõngã pʋgẽ+ yaare, rat n yeel tɩ fu-lilldgã poore,+ n yals Koglgã limdã taoor ye. Yaa sẽn na yɩl t’a ra wa ki,+ bala mam na n vẽnega m meng limdã zugu,+ sawadg pʋgẽ.+

3 “Ad bũmb nins a Aarõ sẽn segd n tall n wa, a sã n wa na n kẽ zĩ-sõngẽ wã: Yaa lol-poll yel-wẽnd maoong yĩnga,+ la pe-raoog maoong sẽn yõogd bugum yĩnga.+ 4 A segd n yeelga lẽ gĩs kasaabã+ sẽn yaa sõngã. Lẽ gĩs kur-koɛɛgã*+ segd n luda a yĩngã.* A segd n sẽbga a sɛɛgã ne lẽ gĩs sẽbdgã,+ la a vil a zugã ne lẽ gĩs zu-vindgã.+ Yaa fut sẽn yaa sõamyã.+ A na n soo koom+ la a yaool n yeelg-ba.

5 “A segd n deega boees a yiib sẽn yaa poal Israyɛll nebã+ nengẽ yel-wẽnd maoong yĩnga, la pe-raoog a ye maoong sẽn yõogd bugum yĩnga.

6 “A Aarõ segd n kolga ne yel-wẽnd maoongã loalgã sẽn yaa yẽ meng yĩngã, n maan paasg* yẽ meng yĩnga,+ la a zakã rãmb yĩnga.

7 “Rẽ poore, a na n talla boees a yiibã n wa yals a Zeova taoore, sɛk-roogã rignoorẽ. 8 A Aarõ na n maana bãnd boees a yiibã yĩnga, n yãk a ye wã tɩ yɩ a Zeova rẽnda, la a to wã Azazɛll* yĩnga. 9 A Aarõ na n kõo boɛɛg ning bãndã sẽn yãk+ tɩ yaa a Zeova rẽndã tɩ yɩ yel-wẽnd maoongo. 10 La b segd n talla boɛɛg ning bãndã sẽn yãk Azazɛll yĩngã vɩɩg n wa yaas a Zeova taoore, sẽn na yɩl tɩ b maan paasg a zugu, la b tall-a n tɩ bas we-raoogẽ wã+ Azazɛll yĩnga.

11 “A Aarõ na n kolga ne yel-wẽnd maoongã loalgã sẽn yaa yẽ meng yĩngã, n maan paasg yẽ meng yĩnga, la a zakã rãmb yĩnga. Rẽ poore, a na n kodga yel-wẽnd maoongã loalgã sẽn yaa yẽ meng yĩngã.+

12 “A na n dɩka bugum laagã,+ n yãk bug-saal tẽn-kugrã+ sẽn be a Zeova taoorã zug n pids-a, la a yãk wisd sẽn tar yũ-noog+ b sẽn were, nug-pidung a yiib n tall n kẽ fu-lilldgã poore.+ 13 A na n ninga wisdã me bugmã zug a Zeova taoore,+ tɩ wisdã bug-zõosã lud Koglgã limdã+ sẽn be Kasetã kug-walsã+ zugã, sẽn na yɩl t’a ra wa ki ye.

14 “A na n yãka loalgã zɩɩmã,+ n tẽk ne a nug-bilã n mes limdã taoore, yaang sẽnese, la a yãk zɩɩmã ne a nug-bilã n mes limdã taoor naoor a yopoe.+

15 “Rẽ poore, a na n kodga yel-wẽnd maoongã boɛɛgã sẽn yaa nin-buiidã yĩngã,+ la a tall zɩɩmã n kẽ fu-lilldgã poore,+ n maan-a wa a sẽn maan ne loalgã zɩɩmã.+ A segd n teesa limdã n mes zɩɩmã, la a mes limdã taoore.

16 “A segd n maana paasg zĩ-sõngã yĩnga, bũmb nins Israyɛll nebã sẽn maand tɩ kɩt tɩ b yaa rẽgdã wɛɛngẽ, la b beegrã ne b yel-wẽnã wɛɛngẽ.+ Yaa woto me la a segd n maan sɛk-roogã sẽn be Israyɛll nebã sẽn yaa rẽgdã sʋkã yĩnga.

17 “A sã n wa kẽ sɛk-roogẽ wã n na n maan paasg zĩ-sõngã pʋgẽ, ned a to pa segd n kẽ sɛk-roogẽ wã, hal n tãag a yiibu. A na n maana paasg yẽ meng yĩnga, a zakã rãmb yĩnga,+ la Israyɛll nin-buiidã fãa yĩnga.+

18 “Rẽ poore, a na n yiime n kẽng tẽn-kugr+ ning sẽn be a Zeova taoorã sɛɛga, n maan paasg tẽn-kugrã yĩnga. A na n yãka loalgã zɩɩmã ne boɛɛgã zɩɩmã n ning tẽn-kugrã yɩɩlã fãa zutu. 19 Sẽn paase, a na n mesa zɩɩmã tẽn-kugrã zug ne a nug-bilã naoor a yopoe, n yɩlg-a ne bũmb nins Israyɛll nebã sẽn maand tɩ kɩt tɩ b yaa rẽgdã t’a lebg sõngo.

20 “A sã n wa maan paasg+ zĩ-sõngã ne sɛk-roogã la tẽn-kugrã yĩng+ n sa, a na n waa ne boɛɛg ning sẽn yaa vɩɩgã+ me. 21 A Aarõ na n tika boɛɛg ning sẽn yaa vɩɩgã zugã ne a nus a yiibã, n vẽneg Israyɛll nebã kongrã fãa n togse, b beegrã la b yel-wẽnã fãa. A na n ninga rẽ boɛɛgã zugu,+ la a kɩt tɩ ned b sẽn yãk rẽ yĩng* tall-a n tɩ bas we-raoogẽ wã. 22 Boɛɛgã na n talla b kongrã fãa+ n kẽng we-rasempʋɩɩgẽ wã.+ Ned ning b sẽn yãkã na n tɩ basa boɛɛgã we-raoogẽ wã.+

23 “Rẽ poore, a Aarõ na n kẽe sɛk-roogẽ wã, n yeeg lẽ gĩs futã a sẽn da yer a sẽn wa n kẽed zĩ-sõngẽ wã, n dɩgl be. 24 A segd n soo koom+ zĩ-sõng pʋgẽ la a ning a futã.+ Rẽ poore, a na n yiime n maan a maoong sẽn yõogd bugmã,+ la nin-buiidã maoong sẽn yõogd bugmã,+ n maan paasg a meng yĩnga, la nin-buiidã yĩnga.+ 25 A na n yõoga yel-wẽnd maoongã kaamã tẽn-kugrã zugu, sẽn na yɩl t’a bug-zõosã nusi.

26 “Ned ning sẽn tall Azazɛll boɛɛgã+ n tɩ basã segd n pegsa a futã, la a so koom. Rẽ poore, a tõe n waa sik-zĩigẽ wã.

27 “La sã n yaa ne yel-wẽnd maoongã loalgã la yel-wẽnd maoongã boɛɛgã b sẽn yãk b zɩɩmã n kẽ zĩ-sõngẽ wã n maan paasgã, b na n tall-b lame n yi sik-zĩigã kɩrenga, n yõog b gãndã, b nemdã, la b bĩndã bugmẽ.+ 28 Ned ning sẽn yõog-bã segd n pegsa a futã, la a so koom. Rẽ poore, a tõe n waa sik-zĩigẽ wã.

29 “Yãoã na n yɩɩ noor sẽn paad wakat fãa yãmb yĩnga: Kiuug a yopoe-n-soabã rasem piigã, yãmb segd n kibla y mense.* Yãmb pa segd n tʋm tʋʋmd baa a yembr ye.+ Tɩ yaa tẽng-n-nebã wall sãamb nins sẽn be yãmb sʋkã. 30 Daar-n-kãnga, b na n maana paasg+ yãmb yĩnga, sẽn na yɩl n yeel tɩ yãmb yaa yɩlma. Yãmb na n paama sugr y yel-wẽnã fãa yĩnga, n yɩ yɩlem a Zeova nifẽ.+ 31 Yãmb ned kam fãa segd n vʋʋsame, bala yaa vʋʋsg daare. Yãmb segd n kibla y mense.*+ Yaa noor sẽn paad wakat fãa.

32 “Maan-kʋʋd ning b sẽn na n zae kaam,+ n zĩnig t’a ledg a ba wã+ zĩig n tʋm maan-kʋʋr tʋʋmdã+ na n maana paasgo, la a yeelg lẽ gĩs futã+ sẽn yaa fut sẽn yaa sõamyã wã.+ 33 A na n maana paasg Zĩ-sõng sẽn yɩɩdã yĩnga,+ la sɛk-roogã+ ne tẽn-kugrã+ yĩnga. A leb n na n maana paasg maan-kʋʋdbã yĩnga, la nin-buiidã fãa yĩnga.+ 34 Yãoã na n yɩɩ noor sẽn paad wakat fãa yãmb yĩnga,+ sẽn na yɩl n maand paasg vugr yʋʋmd fãa+ Israyɛll nebã yĩnga, b yel-wẽnã fãa wɛɛngẽ.”

Dẽ, a Aarõ maana wa a Zeova sẽn da yeel a Moyiizã.

17 A Zeova le yeela a Moyiiz yaa: 2 “Gom ne a Aarõ la a kom-dibli wã ne Israyɛll nebã fãa n yeel-b yaa: ‘Ad a Zeova sẽn yeele:

3 “‘“Israyɛll buudã ned sã n kodg loalg bɩ pe-ra-poll wall bʋʋg sik-zĩigẽ wã bɩ sik-zĩigã kɩrenga, 4 n pa tall-a n wa sɛk-roogã rignoorẽ sẽn na yɩl n kõ a Zeova tɩ yɩ maoong a Zeova sɛk-roogã taoore, zɩɩm taal na n zĩnda a zugu. A raaga zɩɩm, tɩ b segd n yiis-a* a buudã sʋka. 5 Yaa sẽn na yɩl tɩ Israyɛll nebã talld maand nins b sẽn kõt vɩʋʋgẽ wã, n wat maan-kʋʋdã nengẽ, n kõt a Zeova sɛk-roogã rignoorẽ. B segd n kõo a Zeova maan-kãens tɩ yɩ zems-n-taar maando.+ 6 Maan-kʋʋdã na n mesa zɩɩmã a Zeova tẽn-kugr ning sẽn be sɛk-roogã rignoorẽ wã zugu, la a yõog kaamã sẽn na yɩl t’a bug-zõosã nusi, tɩ yɩ yũ-noog* a Zeova yĩnga.+ 7 Dẽ, b pa na n le maan maand n kõ b wẽnnaam-dãmb nins sẽn wõnd bʋʋsã*+ b sẽn waoogdã*+ ye. Woto na n yɩɩ noor sẽn paad wakat fãa yãmb yĩnga, y zãmaan-dãmbã fãa pʋsẽ.”’

8 “Fo segd n yeel-b lame yaa: ‘Israyɛll buudã ned bɩ sãan sẽn be yãmb sʋkã sã n maan maoong sẽn yõogd bugum, wall maoong a to 9 n pa tall-a n wa sɛk-roogã rignoor n kõ a Zeova, b segd n yiisa* nin-kãng a buudã sʋka.+

10 “‘Israyɛll buudã ned bɩ sãan sẽn be yãmb sʋkã sã n dɩ zɩɩm buud fãa, mam na n daaga nin-kãng* sẽn dɩt zɩɩmã+ n base. Mam na n yiis-a-la a buudã sʋka.* 11 Bala bõn-vɩɩg vɩɩm* bee a zɩɩmã pʋgẽ.+ Mam kõo yãmb zɩɩmã sẽn na yɩl tɩ y maan paasg* tẽn-kugrã+ zug y mens* yĩnga. Bala yaa zɩɩm n maand paasgo,+ vɩɩmã* sẽn be a pʋgẽ wã yĩnga. 12 Rẽ n so tɩ mam yeel Israyɛll nebã yaa: “Yãmb ned* baa a ye pa segd n dɩ zɩɩm ye. Sãan sẽn be yãmb sʋkã+ pa segd n dɩ zɩɩm+ ye.”

13 “‘Israyɛll ned bɩ sãan sẽn be yãmb sʋkã sã n kẽng tãoosgo, n tɩ paam we-rũng bɩ liuul b sẽn kõ sor tɩ b wãbe, a segd n daaga a zɩɩmã,+ n bus ne tom. 14 Bala bõn-vɩɩg buud fãa vɩɩm* yaa a zɩɩmã, vɩɩmã* sẽn be zɩɩmã pʋgẽ wã yĩnga. Rẽ wã, mam yeta Israyɛll nebã yaa: “Yãmb pa segd n dɩ bõn-vɩɩg buud baa a yembr zɩɩm ye. Bala bõn-vɩɩg buud fãa vɩɩm* yaa a zɩɩmã. Ned ning fãa sẽn dɩt zɩɩm, b na n kʋ-a lame.”+ 15 Ned* sã n wãb rũng sẽn ki a toor wall we-rũng sẽn kʋ,+ tɩ yaa tẽng-n-ned wall sãana, a segd n pegsa a futã, la a so koom. La a na n kell n yɩɩ rẽgd n tãag zaabre.+ Rẽ poore, a na n yɩɩ yɩlemde. 16 La a sã n pa pegs a futã la a so koom, b na n sɩbg-a-la a kongrã yĩnga.’”+

18 A Zeova kell n goma ne a Moyiiz n yeele: 2 “Gom ne Israyɛll nebã n yeel-b yaa: ‘Mam yaa yãmb Wẽnnaam a Zeova.+ 3 Yãmb pa segd n maan wa b sẽn maand to-to Ezɩpt soolmẽ wã, tẽng ning pʋg yãmb sẽn da be wã ye. Yãmb pa segd me n maan bũmb nins b sẽn maand Kanaã soolmẽ wã, tẽng ning pʋgẽ mam sẽn tar yãmb n dabdã ye.+ Yãmb pa segd n tũ b rog-n-migsã ye. 4 Yãmb segd n tũu mam noyã la y sak mam tõodã.+ Mam yaa yãmb Wẽnnaam a Zeova. 5 Yãmb segd n tũu mam tõodã ne m noyã. Ned ning fãa sẽn maand woto na n vɩɩmda bãmb maasem yĩnga.+ Mam yaa a Zeova.

6 “‘Yãmb ned baa a ye pa segd n kẽ ne pag sẽn kĩ ne-a ye.+ Mam yaa a Zeova. 7 Fo pa segd n kẽ ne f ba ye. Fo pa segd n kẽ ne f ma ye. A yaa fo ma, tɩ f pa segd n kẽ ne-a ye.

8 “‘Fo pa segd n kẽ ne f ba pag ye.+ Yaa f ba wã la f ningd yãnde.

9 “‘Fo pa segd n kẽ ne f tão ye. A yaa f ba wã bi-pugl wall f ma wã bi-pugla, baa t’a roga zak a ye ne foo wall a roga kɛɛnga.+

10 “‘Fo pa segd n kẽ ne f bi-ribl bi-pugla, wall f bi-pugl bi-pugl ye. Bala f na n paooga f menga.

11 “‘Fo pa segd n kẽ ne f ba wã pag bi-pugl sẽn yaa f ba wã biig ye. Bala a yaa f tão.

12 “‘Fo pa segd n kẽ ne f ba wã tão ye. A yaa f ba wã roagda.+

13 “‘Fo pa segd n kẽ ne f ma wã ba-bi-poak ye. Bala a yaa f ma wã roagda.

14 “‘Fo pa segd n kẽ ne f ba wã ba-biig paga, n ning f ba wã ba-biigã yãnd ye. A pagã yaa f ma.+

15 “‘Fo pa segd n kẽ ne f bi-pag ye.+ A yaa f biigã paga, tɩ fo pa segd n kẽ ne-a ye.

16 “‘Fo pa segd n kẽ ne f ba-biig pag ye.+ Bala yaa f ba-biigã la f ningd yãnde.

17 “‘Fo pa segd n kẽ ne pag la f kẽ ne a bi-pugl ye.+ Fo pa segd n peeg a bi-ribl bi-pugla, wall a bi-pugl bi-pugla, sẽn na yɩl n kẽ ne-a ye. B kĩi ne-a. Rẽ yaa tʋʋm-dẽgdo.*

18 “‘Fo pa segd n dɩk pag n paas a tão tɩ yɩ a pʋg-to,+ n kẽ ne-a a tãoã sẽn ket n vɩ sasa ye.

19 “‘Fo pa segd n kẽ ne paga, a pekrã sẽn kɩt t’a yaa rẽgdã sasa ye.+

20 “‘Fo pa segd n kẽ ne f to* paga, n dẽgem f meng ye.+

21 “‘Fo pa segd n sak tɩ b rɩk f biig wall f yageng n kõ* a Molɛk+ ye. Fo pa segd n maan woto n sãam f Wẽnnaamã yʋʋr ye.+ Mam yaa a Zeova.

22 “‘Fo pa segd n kẽ ne rao wa f sẽn kẽed ne pag to-to wã ye.+ Yaa bũmb Wẽnnaam sẽn kisi.

23 “‘Rao pa segd n lagem ne rũnga, n dẽgem a meng ne-a ye. Pag me pa segd n dɩk a meng n kõ rũng t’a lagem ne-a ye.+ Yaa wɩɩbdo.

24 “‘Ra maan-y bõn-kãensã baa a ye n dẽgem y mens ye. Bala yaa bõn-kãensã fãa la buud nins mam sẽn na n dig yãmb taoorã maan n dẽgem b mense.+ 25 Rẽ n so tɩ tẽngã lebg rẽgdo. Mam na n sɩbga tẽngã neb b yel-wẽnã yĩnga. Tẽngã na n wʋba a nebã.+ 26 La yãmb segd n tũu mam tõodã la m noyã.+ Yãmb pa segd n maan bõn-kãens baa a ye mam sẽn kisã, tɩ yaa tẽng-n-ned wall sãan sẽn be yãmb sʋkã ye.+ 27 Bala neb nins sẽn deng yãmb n be tẽngã pʋgẽ wã ra maanda bõn-kãensã fãa mam sẽn kisã,+ tɩ tẽngã lebg rẽgdo. 28 Dẽ, tẽngã pa na n wʋb yãmb y sẽn dẽgm-a yĩnga, wa a sẽn na n wʋb buud nins sẽn deng yãmb n be a pʋgẽ wã ye. 29 Ned* ning fãa sẽn na n maan bõn-kãensã mam sẽn kisã baa yaa a ye, b na n yiis-a-la* a buudã sʋka. 30 Yãmb segd n tũu bũmb nins mam sẽn yeel yãmbã, n da maan sẽn deng-b yãmbã rog-n-migsã mam sẽn kisã ye.+ Yaa sẽn na yɩl tɩ y ra wa rẽgem y mens ne b rog-n-migsã ye. Mam yaa yãmb Wẽnnaam a Zeova.’”

19 A Zeova le goma ne a Moyiiz n yeele: 2 “Gom ne Israyɛll nebã fãa n yeel-b yaa: ‘Yãmb segd n yɩɩ sõamyã, bala maam a Zeova sẽn yaa yãmb Wẽnnaamã yaa sõngo.+

3 “‘Yãmb ned kam fãa segd n waooga* a ba ne a ma.+ Yãmb segd n tũu noor ning mam sẽn kõ vʋʋsg rayã wɛɛngẽ wã.+ Mam yaa yãmb Wẽnnaam a Zeova. 4 Ra tũ-y wẽn-faado,+ wall y yõg bõn-naands n maan y wẽnnaam-dãmb ye.+ Mam yaa yãmb Wẽnnaam a Zeova.

5 “‘Yãmb sã n na n maan zems-n-taar maoong n kõ a Zeova,+ yãmb segd n kõo maoongã wa sẽn zemse, sẽn na yɩl t’a sak n deege.+ 6 B segd n wãba maoongã nemdã a kʋʋbã raar la a vẽkembeoogã. La maoongã nemdã sã n kell n tãag rasem a tãab-n-soabã, b segd n yõog-a-la bugmẽ.+ 7 La b sã n wãb-a rasem a tãab-n-soabã, yaa bõn-põosgo, tɩ Wẽnnaam pa na n deeg maoongã ye. 8 Ned sã n wãb-a, b na n sɩbg-a-la a kongrã yĩnga, bala a rẽgma bũmb sẽn yaa sõng sẽn yaa a Zeova rẽnda. B segd n yiisa* nin-kãng* a buudã sʋka.

9 “‘Yãmb sã n wa kẽebd y tẽngã koodo, yãmb pa segd n kẽeb sẽn be y pʋtã kɩremsã zãng ye. Yãmb pa segd n yiis kood nins sẽn pa kẽebgã poorã me ye.+ 10 Sẽn paase, yãmb pa segd n yiis bũmb nins sẽn kell y viyn pʋtẽ wã, wall y wʋk viyn biis nins sẽn dʋʋg y viyn pʋtẽ wã ye. Yãmb segd n bas-b-la naong rãmbã*+ ne sãambã yĩnga. Mam yaa yãmb Wẽnnaam a Zeova.

11 “‘Yãmb pa segd n zu ye.+ Yãmb pa segd n belg y to ye.+ Y pa segd n zãmb taab me ye. 12 Yãmb pa segd n wẽen ne mam yʋʋrã n yag ziri,+ n sãam yãmb Wẽnnaamã yʋʋr ye. Mam yaa a Zeova. 13 Fo pa segd n wẽg f to ye.+ Fo pa segd n fã f to ye.+ Fo sã n dɩk ned tʋʋmde, f pa segd n bas a yaoodã fo nengẽ yʋngã tõr n tãag yibeoog ye.+

14 “‘Fo pa segd n tʋ wʋnga,* wall f ning bũmb zoang taoor sẽn na yɩl t’a lak n lʋɩ ye.+ Fo segd n zoee f Wẽnnaamã.+ Mam yaa a Zeova.

15 “‘Yãmb pa segd n kao bʋʋd kɛgr ye. Yãmb pa segd n bak naong soab wall rakãagr n sõng ye.+ Yãmb segd n kaoa y to bʋʋd ne tɩrlem.

16 “‘Fo pa segd n gilg n yelg ziri f nin-buiidã sʋk ye.+ Fo pa segd n bao n yãk f to yõor ye.*+ Mam yaa a Zeova.

17 “‘Fo pa segd n kisg f saam-biig f sũurẽ ye.+ Fo segd n wilga f to a kongre,+ n da wa naag-a n paam taal a yel-wẽndã pʋgẽ ye.

18 “‘Fo pa segd n dok f sũuri,+ wall f tug beem ne f buudã ned ye. Fo segd n nonga f to wa f menga.+ Mam yaa a Zeova.

19 “‘Yãmb segd n tũu mam noyã: Fo pa segd n kɩt tɩ yir dũms buk a yiib rʋ taab ye. Fo pa segd n bʋd kood buk a yiib f pʋʋg pʋgẽ ye.+ Fo pa segd n yeelg fuug b sẽn wʋg ne gĩs buk a yiib sẽn naag taab ye.+

20 “‘Rao sã n kẽ ne pag sẽn yaa yem-poaka, tɩ mik tɩ b pʋlma yem-poakã rao t’a na n maan a paga, tɩ b yaool n nan pa yao n fãag-a wall b nan pa kõ-a lohorem, b segd n sɩbga b yiibã fãa. La b pa segd n kʋ-b ye. Bala b ra nan pa kõ yem-poakã lohorem ye. 21 Raoã segd n talla a taal maoongã n wa kõ a Zeova sɛk-roogã rignoorẽ. Yaa pe-raoog la a segd n kõ tɩ yɩ taal maoongo.+ 22 Maan-kʋʋdã na n talla taal maoongã pe-raoog n maan paasg* a yĩng a Zeova taoore, yel-wẽnd ning a sẽn maanã yĩnga. La a na n paama yel-wẽndã a sẽn maanã sugri.

23 “‘Yãmb sã n wa kẽ soolmã pʋgẽ, n sel tɩɩg buud fãa sẽn dɩte, yãmb segd n gesame t’a biisã yaa rẽgdo, la bũmb b sẽn gɩdge. Yʋʋm a tãab pʋgẽ, yãmb na n gesa a biisã wa bũmb b sẽn gɩdge.* Yãmb pa segd n dɩ a biisã ye. 24 La yʋʋm a naas-n-soabã, a biisã fãa na n yɩɩ sõamyã. Yãmb na n dɩk-b lame n kõ a Zeova ne sũ-noogo.+ 25 Yʋʋm a nu soabã, yãmb tõe n dɩ-b lame la y wob-b n paas bũmb nins y sẽn paamã. Mam yaa yãmb Wẽnnaam a Zeova.

26 “‘Yãmb pa segd n dɩ baa fʋɩ sẽn naag zɩɩm ye.+

“‘Yãmb pa segd n ges bãn n bao n bãng beoog yɛla, wall y maan tɩt ye.+

27 “‘Yãmb pa segd n põng* y zutã kɩremsã zoobdo, wall y põng y toeemsã kɩrems n sãam-b ye.+

28 “‘Yãmb pa segd n bog y yĩnsã ned sẽn ki yĩng ye.*+ Yãmb pa segd n gʋl y yĩnsã ye. Mam yaa a Zeova.

29 “‘Fo pa segd n kɩt tɩ f bi-pugl lebg pʋg-yoodre,+ n ning-a yãnd ye. Yaa sẽn na yɩl tɩ tẽngã nebã ra wa yo, tɩ tẽngã pid ne yãn-tʋʋm ye.+

30 “‘Yãmb segd n tũu noy nins mam sẽn gãneg vʋʋsg dayã wɛɛngẽ wã.+ Yãmb segd n waooga* mam doogã. Mam yaa a Zeova.

31 “‘Ra bao-y sẽn gomd-b ne kɩɩmsã+ sõngre, la y ra kẽng bag-bʋgdbã+ nengẽ, sẽn na yɩl n da wa lebg rẽgd bãmb sabaab yĩng ye. Mam yaa yãmb Wẽnnaam a Zeova.

32 “‘Fo segd n yika zoob-peend soab taoore,+ la fo segd n waooga nin-kẽema.+ Fo segd n zoee fo Wẽnnaamã.+ Mam yaa a Zeova.

33 “‘Sãan sã n be ne yãmb y soolmẽ wã, yãmb pa segd n nams-a ye.+ 34 Sãan sẽn be ne yãmb segd n lebga wa tẽng-n-ned yãmb nifẽ.+ Yãmb segd n nong-a-la wa y mense, bala yãmb da yaa sãamb Ezɩpt soolmẽ wã.+ Mam yaa yãmb Wẽnnaam a Zeova.

35 “‘Yãmb sã n na n mak bũmb woglem, a zɩslem wall a waooglem,+ y pa segd n tall makdg sẽn pa zems n mak ye. 36 Yãmb segd n talla balãns sẽn zemse, kɩlo* sẽn zemse, efa* sẽn zemse, la hĩn* sẽn zems n mage.+ Mam yaa yãmb Wẽnnaam a Zeova sẽn yiis yãmb Ezɩpt soolmẽ wã. 37 Woto wã, yãmb segd n tũu mam tõodã la m noyã fãa.+ Mam yaa a Zeova.’”

20 A Zeova le goma ne a Moyiiz n yeele: 2 “Fo segd n yeela Israyɛll nebã yaa: ‘Israyɛll ned wall sãan sẽn be Israyɛll sã n dɩk a biig wall a yageng n kõ a Molɛke, b segd n kʋ-a lame n da bas-a ye.+ Tẽngã neb segd n lob-a-la kug n kʋ. 3 Mam mengã na n daaga nin-kãng n base, la m yiis-a* a buudã sʋka, bala a rɩka a biig wall a yageng n kõ a Molɛke, n dẽgem mam zĩ-sõngã,+ la a sãam mam yʋʋrã sẽn yaa sõngã. 4 Tẽngã neb sã n mum b nin n maan wa b pa yã bũmb ning nin-kãng sẽn maan n dɩk a biig wall a yageng n kõ a Molɛkã, n pa kʋ-a,+ 5 mam mengã na n daaga yẽ ne a zakã rãmb n base.+ Mam na n yiis-a-la* a buudã sʋka, yẽ ne neb nins sẽn naag-a n waoog* a Molɛkã.

6 “‘Ned* sã n pa maand sɩd ne maam,* n baood sẽn gomd-b ne kɩɩmsã+ la bag-bʋgdbã+ sõngre, mam na n daaga nin-kãng* n base, la m yiis-a a buudã sʋka.*+

7 “‘Yãmb segd n yɩlga y mens n lebg sõamyã,+ bala mam yaa yãmb Wẽnnaam a Zeova. 8 Yãmb segd n saka mam tõodã la y tũ-ba.+ Mam yaa a Zeova, soab ning sẽn kɩt tɩ y lebgd sõamyã wã.+

9 “‘Ned sã n tʋʋs a ba wall a ma,* b segd n kʋ-a lame n da bas-a ye.+ A sẽn tʋʋs a ba wall a ma wã yĩnga, a zɩɩmã taal bee a meng zugu.

10 “‘Ad noor rao sẽn yo ne a to pag wɛɛngẽ: B segd n kʋʋ rao ning sẽn yo ne a to pagã n da bas-a ye. B segd n kʋʋ rao ning sẽn yo wã ne pag ning sẽn yo wã fãa.+ 11 Ned sã n kẽ ne a ba paga, yaa a ba wã la a ning yãnde.+ B segd n kʋʋ nin-kãng ne pagã fãa n da bas-b ye. B zɩɩmã taal bee b mens zutu. 12 Rao sã n kẽ ne a bi-paga, b segd n kʋʋ b yiibã fãa. B sẽn maanã yaa wɩɩbdo. B zɩɩmã taal bee b mens zutu.+

13 “‘Rao sã n kẽ ne rao wa b sẽn kẽed ne pag to-to wã, b yiibã fãa maana bũmb Wẽnnaam sẽn kisi.+ B segd n kʋ-b lame n da bas-b ye. B zɩɩmã taal bee b mens zutu.

14 “‘Rao sã n dɩk pag ne a ma, yaa tʋʋm-dẽgdo.*+ B segd n yõoga yẽ ne pagb a yiibã fãa bugmẽ,+ sẽn na yɩl tɩ tʋʋm-dẽgd ra kell n zĩnd yãmb sʋk ye.

15 “‘Rao sã n lagem ne rũnga, b segd n kʋ-a lame n da bas-a ye. Y segd n kʋʋ rũngã+ me. 16 Pag sã n kɩt tɩ rũng lagem ne-a,+ yãmb segd n kʋʋ pagã ne rũngã. B segd n kʋ-b lame n da bas-b ye. B* zɩɩmã taal bee b mens zutu.

17 “‘Rao sã n kẽ ne a tão sẽn yaa a ba wã bi-pugl wall a ma wã bi-pugla, n yã-a a zaala, tɩ pagã me yã yẽ a zaala, yaa yãnde.+ B segd n kʋ-b-la b buudã neb taoore. A ninga a tãoã yãnde. B segd n sɩbg-a-la a yel-wẽndã yĩnga.

18 “‘Rao sã n kẽ ne pag a pekr sasa, b yiibã fãa wilgame tɩ bãmb nifẽ, zɩɩm pa sõng ye.+ B segd n yiisa* b yiibã fãa b buudã sʋka.

19 “‘Fo pa segd n kẽ ne f ma wã ba-bi-poak wall ne f ba wã tão ye. Bala yaa ned f sẽn kĩ ne la f ningd yãnde.+ B segd n sɩbg-b-la b yel-wẽndã yĩnga. 20 Rao sã n kẽ ne a ba wã ba-biig paga, a ningda a ba wã ba-biigã yãnde.+ B segd n sɩbga raoã ne pagã b yel-wẽndã yĩnga. B segd n kiime n pa paam biig ye. 21 Rao sã n dɩk a ba-biig paga, yaa bũmb sẽn kisi.+ A ninga a ba-biigã yãnde. B segd n kiime n pa paam biig ye.

22 “‘Yãmb segd n saka mam tõodã la m noyã fãa+ la y tũ-ba,+ sẽn na yɩl tɩ tẽng ning mam sẽn tar yãmb n dabd tɩ y na n tɩ zĩnd a pʋgẽ wã ra wa wʋb yãmb ye.+ 23 Yãmb pa segd n tũ buud nins mam sẽn na n dig yãmb taoorã rog-n-migsã ye.+ Bala b maana bõn-kãensã fãa, tɩ mam kis-ba.+ 24 Yaa rẽ n so tɩ mam yeel yãmb yaa: “Yãmb na n deega b soolmã. Mam na n kõ-a-la yãmb tɩ y sooge. Yaa tẽng sẽn pid ne bĩisim la sɩɩdo.+ Mam yaa yãmb Wẽnnaam a Zeova, soab ning sẽn welg yãmb toor ne buud a taabã.”+ 25 Yãmb segd n bãng n welga rũng sẽn yaa yɩlemd ne rũng sẽn yaa rẽgdo, la liuul sẽn yaa rẽgd ne liuul sẽn yaa yɩlemde.+ Yãmb pa segd n dẽgem y mens* ne rũng wall liuul bɩ bũmb sẽn vuud tẽnga, mam sẽn welg n wilg yãmb tɩ yaa rẽgdã ye.+ 26 Yãmb segd n yɩɩ sõamyã mam yĩnga, bala maam a Zeova yaa sõngo.+ Mam welga yãmb toor ne buud a taabã, sẽn na yɩl tɩ y yɩ mam dẽnda.+

27 “‘Rao wall pag sã n gomd ne kɩɩmse, wall a bʋgd bagre, b segd n kʋ-a lame n da bas-a ye.+ Nin-buiidã segd n lob-a-la kug n kʋ. A zɩɩmã taal bee a meng zugu.’”

21 A Zeova kell n goma ne a Moyiiz n yeele: “Yeel a Aarõ kom-dibli wã sẽn yaa maan-kʋʋdbã yaa: ‘Yãmb ned baa a ye pa segd n dẽgem a menga, nin-buiidã sʋk ned sẽn ki yĩng ye.*+ 2 La sã n yaa ned a sẽn kĩ ne, a tõe n dẽgma a menga. Wala makre, a ma, a ba, a bi-ribla, a bi-pugla, wall a ba-biiga. 3 A tõe n dẽgma a meng a tão yĩnga, sã n mik t’a yaa pʋg-sad sẽn pa mi raoa, n be ne-a n nan pa kẽ kãadem ye. 4 La pag sẽn yaa a buudã ned pag yĩnga, a pa tõe n dẽgem a menga, n pa le yaa sõng ye. 5 Maan-kʋʋdbã pa segd n põng b zutã,+ wall b põng b toeemsã kɩremse, pa rẽ bɩ b bog b yĩnsã ye.+ 6 B segd n yɩɩ sõamyã b Wẽnnaamã nifẽ.+ B pa segd n sãam b Wẽnnaamã yʋʋre,+ bala yaa bãmb n kõt a Zeova maand nins b sẽn maand ne bugmã sẽn yaa b Wẽnnaamã rɩɩbã.* B segd n yɩɩ sõamyã.+ 7 Maan-kʋʋd pa segd n kẽ kãadem ne pʋg-yoodre,+ pag b sẽn dẽgme, wall pag a sɩd sẽn bas ye.+ Bala maan-kʋʋdã yaa sõng a Wẽnnaamã nifẽ. 8 Yãmb segd n kɩtame tɩ maan-kʋʋdã yɩ sõngo,+ bala yaa yẽ n kõt yãmb Wẽnnaamã rɩɩbã. A segd n yɩɩ sõng yãmb nifẽ, bala maam a Zeova sẽn yaa soab ning sẽn kɩtd tɩ yãmb lebgd sõamyã wã yaa sõngo.+

9 “‘Maan-kʋʋd bi-pugl sã n yo n paoog a menga, a paooga a ba wã. B segd n yõog-a-la bugmẽ.+

10 “‘Maan-kʋʋdb kãsmã b sẽn yãk a ba-biisã sʋka, n kɩrg a zugã zaeebã kaam,+ n zĩnig-a t’a na n yer maan-kʋʋrã futã+ pa segd n bas a zugã tɩ zũndgi, wall a pãrs a futã ye.+ 11 A pa segd n pẽneg ned baa a ye kũum ye.*+ Baa yaa a ba bɩ a ma yĩnga, a pa tõe n dẽgem a meng ye. 12 A pa segd n yi zĩ-sõngẽ wã ye. A pa segd n dẽgem a Wẽnnaamã zĩ-sõngã ye.+ Bala bãnd ning sẽn wilgd t’a rɩka a meng n kõ Wẽnnaamã bee a zugu, rat n yeel t’a Wẽnnaamã zaeebã kaamã.+ Mam yaa a Zeova.

13 “‘A segd n peega pʋg-sad sẽn pa mi rao+ n maan a paga. 14 A pa tõe n kẽ kãadem ne pʋg-kõore, pag a sɩd sẽn base, pag b sẽn dẽgme, wall pʋg-yoodr ye. A segd n peega Israyɛll buudã pʋg-sad sẽn pa mi rao n maan a paga. 15 A pa segd n paoog a kambã la a yagensã a buudã sʋk ye.+ Bala mam yaa a Zeova, soab ning sẽn kɩtd t’a lebgd sõngã.’”

16 A Zeova kell n goma ne a Moyiiz n yeele: 17 “Yeel a Aarõ yaa: ‘Fo kambã ne f yagensã zãmaan-dãmbã fãa pʋsẽ, b sʋkã ned sẽn tar zang pa segd n kolg tẽn-kugrã n kõ a Wẽnnaamã rɩɩbã ye. 18 Ned sã n tar zanga, a pa segd n kolg tẽn-kugrã ye: Yaa zoanga, woabga, ned yõor sẽn pãrge, ned nug bɩ a karg a ye sẽn yaa wok n yɩɩd a to, 19 ned karg bɩ a nug sẽn kao, 20 kũnd soaba, rɩgre,* ned sẽn tar nin bãaga, ned sẽn bẽed sʋlga, ned sẽn tar rasempʋɩɩga, wall ned lan-biis sẽn sãame.+ 21 A Aarõ sẽn yaa maan-kʋʋdã biig bɩ a yageng sẽn tar zang pa segd n kolg tẽn-kugrã, n kõ a Zeova maand nins b sẽn maand ne bugmã ye. A sẽn tar zangã yĩnga, a pa tõe n kolg tẽn-kugrã n kõ a Wẽnnaamã rɩɩbã ye. 22 A tõe n dɩɩ a Wẽnnaamã rɩɩbã, rat n yeel tɩ bũmb nins sẽn yaa sõamyã wʋsgã,+ ne bũmb nins sẽn yaa sõamyã wã.+ 23 La a pa tõe n kolg fu-lilldgã+ ye. A pa tõe n kolg tẽn-kugrã+ me, a sẽn tar zangã yĩnga. A pa segd n dẽgem mam zĩ-sõngã+ ye. Bala mam yaa a Zeova, soab ning sẽn kɩtd tɩ b lebgd sõamyã wã.’”+

24 Woto la a Moyiiz yeel a Aarõ ne Israyɛll nebã fãa.

22 A Zeova le goma ne a Moyiiz n yeele: 2 “Yeel a Aarõ ne a kom-dibli wã tɩ b segd n maana gũusg ne b sẽn zãad* Israyɛll nebã bõn-sõamyã wã to-to wã, n da wa sãam mam yʋʋrã sẽn yaa sõngã,+ bũmb nins b sẽn welgd toor n kõt maamã wɛɛngẽ ye.+ Mam yaa a Zeova. 3 Yeel-b yaa: ‘Yãmb zãmaan-dãmbã fãa pʋsẽ, yãmb biig wall y yageng sã n kolg bõn-sõamyã nins Israyɛll nebã sẽn welgd toor n kõt a Zeova wã a sẽn yaa rẽgd wakate, b na n yiisa* nin-kãng* mam taoore.+ Mam yaa a Zeova. 4 A Aarõ biig wall a yageng sẽn yaa rao sã n yaa wãoore,+ wall a raoolem sã n yit koom,+ a pa segd n dɩ bõn-sõamyã wã hal n tãag a sẽn na n lebg yɩlemde.+ Yaa woto me ne rao sẽn sɩɩs ned sẽn dẽgem a meng ne kũum,*+ wall rao rog-biis koom sẽn yi,+ 5 pa rẽ bɩ rao sẽn sɩɩs rũng sẽn yaa rẽgdo,+ bɩ sẽn sɩɩs ned sẽn yaa rẽgdo, sẽn wa n yaa bũmb ning fãa n kɩt t’a yaa rẽgdã.+ 6 Ned* sẽn sɩɩs bũmb sẽn yaa rẽgd na n kell n yɩɩ rẽgd n tãag zaabre, n pa tõe n dɩ bõn-sõamyã wã ye. La a segd n soo koom.+ 7 Wĩndgã sã n wa kẽ, a na n lebga yɩlemde. Rẽ poore, a tõe n dɩɩ bõn-sõamyã wã, bala yaa a rɩɩbo.+ 8 Sẽn paase, a pa segd n wãb rũng sẽn ki a toor wall we-rũng sẽn kʋ, n lebg rẽgd ye.+ Mam yaa a Zeova.

9 “‘Maan-kʋʋdbã segd n tũu bũmb nins mam sẽn yeel-bã, sẽn na yɩl n da wa maan yel-wẽnd bõn-sõamyã wã wɛɛngẽ n wa ki, b sẽn paoog bõn-sõamyã wã yĩng ye. Mam yaa a Zeova, soab ning sẽn kɩtd tɩ b lebgd sõamyã wã.

10 “‘Ned sẽn pa tar sor* pa segd n dɩ bũmb sẽn yaa sõng ye.+ Sãan sẽn sig maan-kʋʋda, wall ned a sẽn dɩk tʋʋm pa segd n dɩ bũmb sẽn yaa sõng ye. 11 La maan-kʋʋd sã n da ned* ne a meng ligdi, a soabã tõe n naag n dɩɩ bõn-sõamyã wã. Yembs nins sẽn dog a zakẽ wã me tõe n naag n dɩɩ a rɩɩbã.+ 12 Maan-kʋʋd bi-pugl sã n kẽ kãadem ne ned sẽn pa maan-kʋʋda,* a pa tõe n dɩ bõn-sõamyã wã b sẽn kõtã ye. 13 La maan-kʋʋd bi-pugl sã n lebg pʋg-kõore, wall a sɩdã sã n bas-a t’a yaool n pa tar biiga, t’a lebg n wa a ba wã zakẽ n tɩ zĩnd wa a pʋg-sademdẽ wã, a tõe n dɩɩ a ba wã rɩɩbã.+ La ned sẽn pa tar sor* pa tõe n dɩ bõn-sõamyã wã ye.

14 “‘Ned sã n dɩ bũmb sẽn yaa sõng n pa bãnge, a segd n dola maan-kʋʋdã bũmbã, la a paas pʋɩɩr a yembr pʋɩ a nu zugu.+ 15 Maan-kʋʋdbã pa segd n paoog bõn-sõamyã wã Israyɛll nebã sẽn kõt a Zeova wã,+ 16 n kɩt tɩ Israyɛll nebã wa paam sɩbgr b taalã yĩnga, b sẽn dɩ b bõn-sõamyã yĩng ye. Bala mam yaa a Zeova, soab ning sẽn kɩtd tɩ b lebgd sõamyã wã.’”

17 A Zeova kell n goma ne a Moyiiz n yeele: 18 “Gom ne a Aarõ la a kom-dibli wã ne Israyɛll nebã fãa n yeel-b yaa: ‘Israyɛll ned wall sãan sẽn be Israyɛll sã n wa na n kõ a Zeova maoong sẽn yõogd bugum+ n pids a pʋlengo, wall tɩ na n yɩ yamleoog kũuni,+ 19 a segd n yãka rũng sẽn yaa raoog la sẽn pa tar zang+ rũm-bɛdã sʋka, pe-ra-poalã wall bʋʋsã sʋka, sẽn na yɩl n ta mam yam. 20 Yãmb pa segd n kõ rũng sẽn tar zang ye.+ Bala pa na n kɩt tɩ yãmb ta mam yam ye.

21 “‘Ned sã n na n kõ a Zeova zems-n-taar maoong+ n pids a pʋleng wall tɩ na n yɩ yamleoog kũuni, segd n yɩɩ rũng sẽn pa tar zang a sẽn yãk rũm-bɛdã wall rũm-bõonegã sʋka, sẽn na yɩl n ta mam yam. A pa segd n tall zang baa bilf ye. 22 Rũng b sẽn na n kõ tɩ yɩ maoong pa segd n yaa zoanga, bɩ sẽn tar bũmb sẽn kao, sãmpogre, ãbre, burgumdi, wall rasempʋɩɩg ye. Yãmb pa segd n kõ a Zeova rũng a woto buudu, wall y maan maoong a woto buud tẽn-kugrã zug a Zeova yĩng ye. 23 Yãmb tõe n kõo loalg wall pesg sẽn tar karg sẽn yaa wok wall koɛɛg n yɩɩd a taabã tɩ yɩ yamleoog kũuni. La y sã n kõ rũng a woto sẽn na yɩl n pids y pʋlengo, mam pa na n deeg ye. 24 Yãmb pa segd n kõ a Zeova rũng lan-biis sẽn sãam wall sẽn bedse, pa rẽ bɩ b sẽn kɩsg ye. Yãmb pa segd n kõ rũng a woto yãmb soolmẽ wã ye. 25 Sẽn paase, yãmb pa segd n deeg rũng a woto sãan nugẽ n kõ tɩ yɩ yãmb Wẽnnaamã rɩɩb* ye. Bala a tara zanga, n pa sõma ye. Y sã n kõ rũng a woto, mam pa na n deeg ye.’”

26 A Zeova le goma ne a Moyiiz n yeele: 27 “Nag-bil wall pe-bil bɩ bull sã n doge, a na n paa ne a ma wã rasem a yopoe.+ La rasem a nii-n-soabã tɛka, yãmb sã n kõ-a tɩ yɩ maoongo, maoong b sẽn maand ne bugum n kõ a Zeova, mam na n deegame. 28 Sã n yaa ne loalg wall pesgo, yãmb pa segd n kʋ rũngã ne a biigã raar-n-yɛng ye.+

29 “Yãmb sã n na n kõ a Zeova bark pʋʋsg maoongo,+ yãmb segd n kõo maoongã sẽn na yɩl n ta a yam. 30 B segd n wãba a nemdã daar-n-kãnga. Yãmb pa segd n bas baa fʋɩ tɩ vẽeg beoog ye.+ Mam yaa a Zeova.

31 “Yãmb segd n saka mam noyã la y tũ-ba.+ Mam yaa a Zeova. 32 Yãmb pa segd n sãam mam yʋʋrã sẽn yaa sõngã ye.+ Mam segd n paama waoogr Israyɛll nebã sʋka.+ Mam yaa a Zeova, soab ning sẽn kɩtd tɩ yãmb lebgd sõamyã wã,+ 33 la sẽn yiis yãmb Ezɩpt soolmẽ wã sẽn na yɩl n wilg yãmb tɩ mam yaa Wẽnnaamã.+ Mam yaa a Zeova.”

23 A Zeova kell n goma ne a Moyiiz n yeele: 2 “Gom ne Israyɛll nebã n yeel-b yaa: ‘A Zeova tigã+ yãmb sẽn segd n moondẽ wã+ yaa tigiss sẽn yaa sõamyã. Ad mam tigã:

3 “‘Yãmb tõe n tʋma rasem a yoobe, la rasem a yopoe-n-soabã, yãmb ned kam fãa segd n vʋʋsame, bala yaa vʋʋsg daare.+ Yaa tigsg sẽn yaa sõngo. Yãmb pa segd n tʋm tʋʋmd baa a yembr ye. Segd n yɩɩ vʋʋsg daar a Zeova yĩnga, zĩig ning fãa yãmb sẽn be.+

4 “‘Ad a Zeova tigã sẽn yaa tigiss sẽn yaa sõamyã, tɩ yãmb segd n moond wakat ning mam sẽn yãk tɩ y segd n maan-bã: 5 Pipi kiuugã rasem piig la a naas-n-soabã+ zĩ-sobdo, yaa Pak+ a Zeova yĩnga.

6 “‘Ki-kãng rasem piig la a nu soabã tɛk yaa Bur sẽn pa ning rabɩll tigr a Zeova yĩnga.+ Rasem a yopoe pʋgẽ, yãmb segd n wãba bur sẽn pa ning rabɩlle.+ 7 Pipi daarã, yãmb na n maana tigsg sẽn yaa sõngo.+ Yãmb pa segd n tʋm tʋʋm-kɛgeng baa a yembr ye. 8 La rasem a yopoe tõre, yãmb segd n maana maoong b sẽn maand ne bugum n kõ a Zeova. Tigsg sẽn yaa sõng n na n zĩnd rasem a yopoe-n-soabã. Yãmb pa segd n tʋm tʋʋm-kɛgeng baa a yembr ye.’”

9 A Zeova kell n goma ne a Moyiiz n yeele: 10 “Gom ne Israyɛll nebã n yeel-b yaa: ‘Yãmb sã n wa kẽ tẽng ning mam sẽn na n kõ yãmbã pʋgẽ, n kẽeb a koodã, yãmb segd n talla dẽenem koodã ka-gĩnd+ n wa kõ maan-kʋʋdã.+ 11 A na n yuuma ka-gĩndã poorẽ la taoor a Zeova taoore, sẽn na yɩl tɩ y ta mam yam. Maan-kʋʋdã segd n yuum-a-la Vʋʋsg daarã vẽkembeoogo. 12 Daar ning yãmb sẽn kɩt tɩ b yuum ka-gĩndã, yãmb segd n kõo a Zeova pe-ra-poll sẽn pa yɩɩd yʋʋmde, tɩ yɩ maoong sẽn yõogd bugum. 13 A kood biis kũunã na n yɩɩ zom-bãaneg efa pʋɩ a yiib pʋɩ piig zug* sẽn kalem ne kaam, tɩ yɩ maoong b sẽn maand ne bugum n kõ a Zeova, tɩ tar yũ-noogo.* A divẽ kũunã na n yɩɩ divẽ hĩn* pʋɩɩr a ye pʋɩ a naas zugu. 14 Daar-n-kãng sã n pa ta, rat n yeel tɩ y sã n nan pa tall maoongã n wa kõ y Wẽnnaamã, y pa segd n dɩ ka-paala, wall kood biis b sẽn sẽ, bɩ n dɩk ka-paal n maan bur n wãb ye. Yaa noor sẽn paad wakat fãa yãmb zãmaan-dãmbã fãa pʋsẽ, zĩig ning fãa y sẽn be.

15 “‘Vʋʋsg daarã vẽkembeoogo, rat n yeel tɩ daar ning yãmb sẽn tall maoong b sẽn yuumdã ka-gĩndã n tɩ kõ wã tɛka, yãmb segd n sõda vʋʋsg ray a yopoe.+ Segd n yɩɩ semen a yopoe tõre. 16 Yãmb na n sõda rasem pis-nu+ n tãag Vʋʋsg daar a yopoe-n-soabã vẽkembeoogo, n yaool n kõ a Zeova ka-paal kũuni.+ 17 Yãmb segd n talla bur a yiib y zagsẽ wã n wa kõ tɩ yɩ kũun b sẽn yuumdi. Burã segd n maana ne zom-bãaneg efa* pʋɩ a yiib pʋɩ piig zugu. B segd n ning-b-la rabɩlle,+ tɩ yɩ dẽenem biis b sẽn kõ a Zeova.+ 18 Yãmb segd n kõo burã n paas pe-bi-raad a yopoe sẽn tar yʋʋmde, la sẽn pa tar zanga, ne lol-poll a ye la pe-raad a yiibu.+ B na n yɩɩ maoong sẽn yõogd bugum a Zeova yĩnga, ne b kood biis kũunã la b divẽ kũunã, tɩ yɩ maoong b sẽn maand ne bugum n kõ a Zeova, tɩ tar yũ-noogo.* 19 Sẽn paase, yãmb segd n kõo bʋ-poll a yembr tɩ yɩ yel-wẽnd maoongo,+ la pe-bi-raad a yiib sẽn tar yʋʋmde, tɩ yɩ zems-n-taar maoongo.+ 20 Maan-kʋʋdã na n yuum-b-la poorẽ la taoore, ne dẽenem biisã burã, la pe-bi-raad a yiibã tɩ yɩ maoong b sẽn yuumd a Zeova taoore. B segd n yɩɩ bũmb sẽn yaa sõng a Zeova yĩnga, n yɩ maan-kʋʋdã rẽnda.+ 21 Daar-n-kãnga, yãmb na n mooname+ n wilg tɩ yaa tigsg sẽn yaa sõngo. Yãmb pa segd n tʋm tʋʋm-kɛgeng baa a yembr ye. Yaa noor sẽn paad wakat fãa yãmb zãmaan-dãmbã fãa pʋsẽ, zĩis nins fãa y sẽn be wã.

22 “‘Yãmb sã n wa kẽebd y tẽngã koodo, yãmb pa segd n kẽeb sẽn be y pʋtã kɩremsã zãng ye. Yãmb pa segd n yiis kood nins sẽn pa kẽebgã poorã me ye.+ Yãmb segd n bas-b-la naong rãmbã*+ ne sãambã yĩnga.+ Mam yaa yãmb Wẽnnaam a Zeova.’”

23 A Zeova le goma ne a Moyiiz n yeele: 24 “Yeel Israyɛll nebã yaa: ‘Kiuug a yopoe-n-soabã pipi daarã, yãmb segd n basa y tʋʋmã fãa n vʋʋse. B na n peeba tãntãoog n moon daar-n-kãnga,+ sẽn na yɩl tɩ y tẽeg tɩ yaa tigsg sẽn yaa sõngo. 25 Yãmb pa segd n tʋm tʋʋm-kɛgeng baa a yembr ye. Yãmb na n maana maoong b sẽn maand ne bugum n kõ a Zeova.’”

26 A Zeova le goma ne a Moyiiz n yeele: 27 “La kiuug a yopoe-n-soabã rasem piigã yaa Paasg daare.*+ Yãmb segd n maana tigsg sẽn yaa sõngo. Sẽn paase, y segd n kibla y mense,*+ la y maan maoong b sẽn maand ne bugum n kõ a Zeova. 28 Yãmb pa segd n tʋm tʋʋmd baa a yembr daar-n-kãng sẽn yaa zallã ye. Bala yaa paasg daare, sẽn na yɩl tɩ b maan paasg+ yãmb yĩng y Wẽnnaam a Zeova taoore. 29 Ned ning fãa* sẽn pa na n kibl a meng* daar-n-kãnga, b na n yiisa* a soabã a buudã sʋka.+ 30 Ned* ning sẽn na n tʋm tʋʋmd buud fãa daar-n-kãnga, mam na n sãam-a-la a buudã sʋka. 31 Yãmb pa segd n tʋm tʋʋmd buud baa a yembr ye. Yaa noor sẽn paad wakat fãa yãmb zãmaan-dãmbã fãa pʋsẽ, zĩig ning fãa y sẽn be. 32 Yãmb ned kam fãa segd n vʋʋsame, bala yaa vʋʋsg daare. Yãmb na n kibla y mens*+ kiuugã rasem a wɛ soabã zaabre. Yãmb segd n maana y vʋʋsg daarã zaabr n tãag zaabr ning sẽn pʋgdã.”

33 A Zeova kell n goma ne a Moyiiz n yeele: 34 “Yeel Israyɛll nebã yaa: ‘Kiuug a yopoe-n-soabã rasem piig la a nu wã yaa Zãn tigrã sẽn kaoosd rasem a yopoe a Zeova yĩngã.+ 35 Tigsg sẽn yaa sõng n segd n zĩnd pipi daarã, la yãmb pa segd n tʋm tʋʋm-kɛgeng baa a yembr ye. 36 Rasem a yopoe pʋgẽ, yãmb segd n maana maoong sẽn maand ne bugum n kõ a Zeova. Rasem a nii-n-soabã, yãmb segd n maana tigsg sẽn yaa sõngo,+ la y maan maoong b sẽn maand ne bugum n kõ a Zeova. Yaa tigsg sẽn yaa zalle. Yãmb pa segd n tʋm tʋʋm-kɛgeng baa a yembr ye.

37 “‘Woto yaa a Zeova tigã+ y sẽn segd n moon n wilg tɩ yaa tigiss sẽn yaa sõamyã.+ Wakat-kãense, y na n maana maoong b sẽn maand ne bugum n kõ a Zeova: Yaa maoong sẽn yõogd bugmã+ ne kood biis kũunã,+ n paas divẽ kũunã,+ wa sẽn zems b sẽn segd n maan daar fãa wã. 38 Bõn-kãensã naaga bũmb nins b sẽn kõt a Zeova vʋʋsg rayã+ sasa wã, ne y kũunã,+ y pʋleng maandã,+ la y yamleoog kũunã+ y sẽn segd n kõ a Zeova wã. 39 La kiuug a yopoe-n-soabã rasem piig la a nu soabã, yãmb sã n wa tigs tẽngã koodã n sa, yãmb segd n maana a Zeova tigrã rasem a yopoe.+ Pipi daarã, yãmb ned kam fãa segd n vʋʋsame, bala yaa vʋʋsg daare. Rasem a nii-n-soabã me, yãmb ned kam fãa segd n vʋʋsame, bala yaa vʋʋsg daare.+ 40 Pipi daarã, yãmb na n yãka tɩ-bɛd biisi, koms vãado,+ la tɩɩs sẽn tar vãad wʋsg ne tɩɩs* sẽn be londẽ* wila, n maan sũ-noog+ a Zeova sẽn yaa yãmb Wẽnnaamã taoor rasem a yopoe.+ 41 Yãmb na n maan-a lame tɩ yɩ a Zeova tigr rasem a yopoe yʋʋmd fãa.+ Yãmb segd n maan-a-la kiuug a yopoe-n-soabã. Yaa noor sẽn paad wakat fãa yãmb zãmaan-dãmbã fãa pʋsẽ. 42 Yãmb segd n zĩnda zãn tẽngr rasem a yopoe.+ Israyɛll nebã fãa segd n zĩnda zãn tẽngre, 43 sẽn na yɩl tɩ yãmb zãmaan-dãmb nins sẽn watã bãng+ tɩ yaa zãn tẽngr la mam kɩt tɩ Israyɛll nebã zĩndi, mam sẽn wa n yiis-b Ezɩpt soolmẽ wã.+ Mam yaa yãmb Wẽnnaam a Zeova.’”

44 Woto, a Moyiiz goma a Zeova tigã yell ne Israyɛll nebã.

24 A Zeova kell n goma ne a Moyiiz n yeele: 2 “Yeel Israyɛll nebã tɩ b wa ne oliiv kaam sẽn yaa sõma fɩtl-dãmbã yĩnga, sẽn na yɩl tɩ fɩtl-dãmbã tõog n wid wakat fãa.+ 3 A Aarõ segd n gesame tɩ fɩtl-dãmbã wid a Zeova taoor wakat fãa, zaabr n tãag yibeoogo, Kaset fu-lilldgã sẽn be sɛk-roogẽ wã taoore. Yaa noor sẽn paad wakat fãa yãmb zãmaan-dãmbã fãa yĩnga. 4 A segd n manega fɩtl-dãmbã n ning b zĩisẽ fɩtl-doagendgã+ sẽn maan ne sãnem halaalã zugu, a Zeova taoor wakat fãa.

5 “Fo segd n dɩka zom-bãaneg n maan bur piig la a yiib sẽn yaa gils wa maanfo. Bʋr fãa segd n maana ne zom efa pʋɩ a yiib pʋɩ piig zugu.* 6 Fo na n dɩgl-b-la taablã sẽn maan ne sãnem halaalã zugu, a Zeova taoore.+ Fo na n dɩgl-b lame n dogl taab ruls a yiibu, tɩ rulg fãa tar bur a yoobe.+ 7 Fo segd n ninga wisd halaal sẽn yaa pɛɛlg rulg fãa zugu. Wisdã na n makda burã kũunã, n yɩ kũun*+ b sẽn yõogd ne bugum n kõt a Zeova. 8 Vʋʋsg daar fãa, a segd n dɩgend-b-la a Zeova taoor wakat fãa.+ Yaa kaool sẽn paad wakat fãa maam ne Israyɛll nebã sʋka. 9 Burã na n lebga a Aarõ ne a kom-dibli wã rẽnda.+ B na n wãb-a-la zĩ-sõng pʋgẽ,+ bala yaa bũmb sẽn yaa sõng wʋsgo, n yaa maan-kʋʋdã rẽnda, kũun nins b sẽn yõogd ne bugum n kõt a Zeova wã sʋka. Yaa noor sẽn paad wakat fãa.”

10 Israyɛll nebã sʋka, rao n da be be n yaa Israyɛll pag ne Ezɩpt rao biiga.+ La zabr n wa n yik yẽ ne Israyɛll rao sʋk sik-zĩigẽ wã. 11 La Israyɛll pagã biigã sɩnga Wẽnnaam yʋʋrã tʋya, la a kãabd-a wẽnga.+ Rẽ n so tɩ b tall-a n wa a Moyiiz nengẽ.+ A ma wã ra yaa a Selomit sẽn yaa Dan buudã ned a Dibri bi-puglã. 12 B kɩtame tɩ b gũ-a hal n tãag a Zeova sẽn na n yeel a soab takɩ.+

13 Dẽ, a Zeova yeela a Moyiiz yaa: 14 “Tall sẽn kãab-a mam yʋʋrã wẽngã* n yi sik-zĩigã kɩrenga, tɩ neb nins fãa sẽn wʋm a goamã tik a zugã ne b nusi. Rẽ poore, nin-buiidã fãa segd n lob-a-la kuga.+ 15 Fo segd n yeela Israyɛll nebã yaa: ‘Ned sã n kãab a Wẽnnaamã wẽnga, b na n sɩbg-a-la a yel-wẽndã yĩnga. 16 Woto, b segd n kʋʋ ned ning sẽn tʋʋs a Zeova yʋʋrã n da bas-a ye. Nin-buiidã fãa segd n lob-a-la kug n da bas-a ye.+ Sãan sã n tʋʋs Wẽnnaam yʋʋrã, b segd n kʋ-a-la wa b sẽn na n kʋ Israyɛll neda.

17 “‘Ned sã n yãk a to yõore,* b segd n kʋ-a lame n da bas-a ye.+ 18 Ned sã n wẽ a to rũng n kʋ,* a segd n dola rũngã, vɩɩm vɩɩm yĩnga.* 19 Ned sã n pogl a to, b segd n maana a soabã bũmb ning a sẽn maan a to wã:+ 20 Kaoob kaoob yĩnga, nifr nifr yĩnga, yẽnd yẽnd yĩnga. A sẽn pogl a to wã to-to wã, b segd n pogla yẽ me woto.+ 21 Ned sã n wẽ a to rũng n kʋ, a segd n dola rũngã,+ la ned sã n wẽ a to n kʋ, b segd n kʋ-a lame.+

22 “‘Sãambã ne tẽng-n-nebã fãa segd n tũu no-yɛngã.+ Bala mam yaa yãmb Wẽnnaam a Zeova.’”

23 Dẽ, a Moyiiz goma ne Israyɛll nebã, tɩ b tall ned ning sẽn da kãab Wẽnnaam yʋʋrã wẽngã n yi sik-zĩigã kɩrenga, n lob-a kuga.+ Woto, Israyɛll nebã maana wa a Zeova sẽn da yeel a Moyiizã.

25 A Zeova le goma ne a Moyiiz Sinayi tãngã zug n yeele: 2 “Gom ne Israyɛll nebã n yeel-b yaa: ‘Yãmb sã n wa kẽ tẽng ning mam sẽn na n kõ yãmbã pʋgẽ,+ yãmb segd n basa tẽngã t’a vʋʋse,+ la y maan vʋʋsg yʋʋmd a Zeova yĩnga. 3 Yʋʋm a yoob pʋgẽ, yãmb segd n bʋda y pʋtã, n yolem y viyn tɩɩsã, la y tigs tẽngã koodã.+ 4 La yʋʋm a yopoe-n-soabã na n yɩɩ vʋʋsg yʋʋmde, tɩ tẽngã vʋʋse. Yaa vʋʋsg yʋʋmd a Zeova yĩnga. Yãmb pa segd n bʋd y pʋtã, wall y yolem y viyn tɩɩsã ye. 5 Kood nins sẽn lʋɩ kẽebgã wakat n yi b toorã, yãmb pa segd n kẽeb ye. Yãmb pa segd me n wob viyn tɩɩsã y sẽn bas n pa yolmã biis ye. Segd n yɩɩ vʋʋsg yʋʋmde, tɩ tẽngã vʋʋse. 6 La yãmb tõe n dɩɩ kood nins sẽn na n yi soolmã pʋgẽ vʋʋsg yʋʋmdã. Yãmb ne y yem-daadã la y yem-pogsã, la neb nins y sẽn dɩk tʋʋmã, n paas sãambã sẽn be ne yãmbã tõe n dɩɩ koodã. 7 Yir dũmsã ne we-rũmsã sẽn be y soolmẽ wã me tõe n wãba koodã. Y tõe n dɩɩ bũmb ning fãa sẽn na n yi soolmẽ wã.

8 “‘Yãmb na n sõda vʋʋsg yʋʋm bãmb b yopoe, rat n yeel tɩ yʋʋm a yopoe naoor a yopoe. Vʋʋsg yʋʋm a yopoe wã na n yɩɩ yʋʋm pis-naas la a wɛ. 9 Rẽ poore, yãmb na n peeba baorg* ne pãng kiuug a yopoe-n-soabã rasem piigã. Paasg daarã,*+ yãmb segd n kɩtame tɩ nebã wʋm baorgã rãamd soolmã fãa pʋgẽ. 10 Yãmb segd n welga yʋʋm pis-nu soabã toore, la y moon lohorem soolmã pʋgẽ nin-buiidã fãa yĩnga.+ Na n yɩɩ Kɩdeng yʋʋmd yãmb yĩnga, tɩ ned ning sẽn da koos a pʋʋg na n lebs n deeg-a, tɩ ned ning b sẽn da koos yembd na n leb a zakẽ.+ 11 Yʋʋm pis-nu soabã na n lebga Kɩdeng yʋʋmd yãmb yĩnga. Yãmb pa na n bʋd koodo, wall y kẽeb kood nins sẽn yi b toorã, wall y wob viyn tɩɩsã y sẽn bas n pa yolmã biis ye.+ 12 Bala yaa Kɩdeng yʋʋmde. A segd n yɩɩ sõng yãmb nifẽ. Yãmb tõe n dɩɩ bũmb nins tẽngã sẽn na n wom a toorã bala.+

13 “‘Yʋʋm-kãng sẽn yaa Kɩdeng yʋʋmdã, yãmb ned kam fãa segd n lebs n deega a pʋʋgo.+ 14 Yãmb sã n koos bũmb ne y to, wall y ra bũmb a nengẽ, bɩ y ra wẽg taab ye.+ 15 Yãmb sã n da y to pʋʋgo, yãmb segd n sõda yʋʋm nins sẽn loog Kɩdeng yʋʋmdã tɛkã, tɩ sẽn koos-a pʋʋgã tik yʋʋm sõor nins b sẽn na n tigs koodã n wilg y sẽn segd n yao wã.+ 16 Koodã tigsgã sã n keta yʋʋm wʋsgo, a tõe n paasa pʋʋgã ligdi, la sã n pa ket yʋʋm wʋsgo, a segd n booga pʋʋgã ligdi. Bala yaa kood nins y sẽn na n kẽebã la a sẽn koosdã. 17 Yãmb ned baa a ye pa segd n wẽg a to ye.+ Yãmb segd n zoee y Wẽnnaamã,+ bala mam yaa yãmb Wẽnnaam a Zeova.+ 18 Yãmb sã n tũud mam tõodã la y sakd mam noyã, yãmb na n zĩnda ne bãan soolmã pʋgẽ.+ 19 Tẽngã na n saka koodo.+ Yãmb na n dɩ n tɩgame, n zĩnd be bãane.+

20 “‘La tõe tɩ y sok y mens yaa: “Tõnd na n dɩɩ bõe yʋʋm a yopoe-n-soabã, d sã n pa bʋde, bɩ n tigs koodo?”+ 21 Da maan-y yɩɩr ye. Mam na n kɩtame tɩ m barkã zĩnd yãmb zut yʋʋm a yoob-n-soabã, tɩ tẽngã bõn-koaadlã wom tɩ sek yãmb yʋʋm a tãabo.+ 22 Rẽ poore, yãmb na n bʋda yʋʋm a nii-n-soabã, la y rɩ ka-kʋdgã n tãag yʋʋm a wɛ soabã. Nand tɩ ka-paalgã bɩ, yãmb na n dɩta ka-kʋdgã.

23 “‘Yãmb pa segd n koos pʋʋg wakat fãa yĩnga,+ tẽngã sẽn yaa maam n so wã yĩnga.+ Bala mam nifẽ, yãmb yaa sãamba.+ 24 Yãmb soolmã fãa pʋgẽ, ned sẽn koos a pʋʋg segd n paama sor n tõe n lebs n da-a.

25 “‘Yãmb saam-biig sã n lebg naong soaba, tɩ lebg tɩlɛ t’a pasg a pʋʋg n koose, ned a sẽn kĩ ne, la sẽn tar sor n na n yao n deeg pʋʋgã segd n tɩ lebs n daa pʋʋgã a saam-biigã sẽn koosã.+ 26 La ned sã n pa tar roagd sẽn tar sor n na n yao n deeg bũmbu, tɩ yẽ mengã wa paam ligd n tõe n lebs n da-a, 27 a segd geela ligdã sẽn zem to-to yʋʋmd ning a sẽn koos-a wã tɛkã, la a kõ ned ning sẽn da pʋʋgã yʋʋm nins sẽn ketã ligdi. Rẽ poore, a tõe n lebs n deega a pʋʋgã.+

28 “‘La a sã n pa paam ligd n na n lebs n da pʋʋgã, pʋʋgã a sẽn koosã na n kell n paa ne sẽn da-a wã n tãag Kɩdeng yʋʋmdã.+ Kɩdeng yʋʋmdã sasa, b na n lebs-a-la pʋʋgã, tɩ lebg yẽ rẽnda.+

29 “‘La ned sã n koos a zak sẽn be tẽng b sẽn gũbg pʋgẽ, a sẽn koos-a wã tɛka, a tara sor n tõe n lebs n da-a. A tara sor n tõe n lebs n da-a+ yʋʋmd tõr pʋgẽ. 30 La yʋʋmd tõr sã n loog t’a pa tõog n lebs n da a zakã sẽn be tẽng b sẽn gũbg pʋgẽ wã, zakã na n lebga ned ning sẽn da-a wã rẽnd wakat fãa yĩnga, a zãmaan-dãmbã fãa pʋsẽ. B pa segd n lebs zakã Kɩdeng yʋʋmdã ye. 31 La zags nins sẽn be tẽn-bõones nins b sẽn pa gũbg lalgã pʋgẽ segd n yɩɩ wa pʋtã. B rãmbã tara sor n tõe n lebs n da-ba. Kɩdeng yʋʋmdã sasa me, b segd n lebs-b lame.

32 “‘La sã n yaa ne Levi nebã zags sẽn be bãmb tẽnsẽ wã,+ Levi nebã tara sor wakat fãa n na n lebs n da-ba. 33 Levi ned sã n pa tõog n lebs n da a zaka, Kɩdeng yʋʋmdã sasa,+ b na n lebs-a-la zakã sẽn be tẽngẽ wã a sẽn koosã. Bala zagsã sẽn be Levi nebã tẽnsẽ wã yaa bãmb dẽnd Israyɛll nebã sʋka.+ 34 Sẽn paase, b pa segd n koos pʋt nins sẽn gũbg tẽnsã tɩ b wãbend rũmsã be wã ye.+ Bala yaa bãmb dẽnd wakat fãa yĩnga.

35 “‘Fo ba-biig sẽn pẽ foo sã n lebg naong soab n pa tõe n le ges a meng yelle, fo segd n sõng-a-la+ wa f sẽn segd n sõng sãan to-to wã,+ sẽn na yɩl t’a kell n vɩɩmd ne foo. 36 Da sõng-a f sẽn baood yõod yĩng ye.+ Fo segd n zoee f Wẽnnaamã+ tɩ f ba-biigã kell n vɩɩmd ne foo. 37 Fo pa segd n peng-a ligd n dogl yõodo,+ wall f kõ-a rɩɩb n bao yõod ye. 38 Mam yaa yãmb Wẽnnaam a Zeova, soab ning sẽn yiis yãmb Ezɩpt soolmẽ wã,+ n na n kõ-y Kanaã soolmã, n wilg tɩ mam yaa yãmb Wẽnnaamã.+

39 “‘Fo saam-biig sẽn pẽ foo sã n lebg naong soab n segd n koos a meng ne foo,+ fo pa segd n modg-a t’a tʋm yamb tʋʋm ye.+ 40 Fo segd n ges-a-la wa ned f sẽn dɩk tʋʋma,+ wa sãan sẽn wa n be ne yãmba. A segd n tʋm n kõo foo n tãag Kɩdeng yʋʋmdã. 41 Dẽ, a na n yii fo nengẽ, yẽ ne a kambã* n leb a buudẽ. A segd n leba a yaab-rãmbã zĩigẽ.+ 42 Bala b yaa mam yembs m sẽn yiis Ezɩpt soolmẽ wã.+ B pa segd n koos b mens wa b sẽn koosd yamb to-to wã ye. 43 Fo pa segd n nams-a ye.+ Fo segd n zoee f Wẽnnaamã.+ 44 Fo yem-daadã la f yem-pogsã segd n yita buud nins sẽn gũbg yãmbã pʋsẽ. Yaa bãmb sʋk la yãmb tõe n da yem-daoog wall yem-poaka. 45 Yãmb tõe n daa yembs sãambã sẽn be ne yãmbã kamb sʋka.+ Yaa bãmb sʋka, la b buudã kamb nins sẽn dog yãmb soolmẽ wã sʋka. B na n lebga yãmb rẽnda. 46 Yãmb tõe n dɩka bãmb n kõ y kambã ne y yagensã sẽn na n pʋgl yãmbã tɩ yɩ b rogem-pʋɩɩr wakat fãa yĩnga. Yãmb tõe n kɩtame tɩ b yɩ y tʋm-tʋmdba. La yãmb pa segd n nams Israyɛll ned sẽn yaa y saam-biigã ye.+

47 “‘La sãan sẽn be yãmb sʋk sã n lebg rakãagre, tɩ fo ba-biig sẽn lebg naong soab segd n koos a meng ne sãanã sẽn be yãmb sʋkã, bɩ ne sãanã buud neda, 48 a ket n tara sor tɩ b tõe n yao n deeg-a, a sẽn koos a mengã poore. A ba-biig tõe n lebs n yao n deeg-a lame.+ 49 A ba wã ba-biiga, bɩ a ba wã ba-biig biiga, pa rẽ bɩ ned a to a sẽn kĩ ne, rat n yeel t’a roagd a ye tõe n yao n deeg-a-lame.

“‘Wall a mengã sã n lebga rakãagre, a tõe n yao n sooga a menga.+ 50 Yẽ ne ned ning sẽn da-a wã segd n sõda yʋʋm nins a sẽn koos a meng ne-a wã, n sɩng ne yʋʋmd ning a sẽn koos a mengã, n tãag Kɩdeng yʋʋmdã.+ A sẽn koos a mengã ligd tog n zemsa yʋʋmã sõore.+ A sẽn tʋm ray nins tɩ b segd n yao-a wã segd n zemsa ne yaood ning b sẽn kõt ned b sẽn dɩk tʋʋma.+ 51 Yʋʋm nins sẽn ketã sã n yaa wʋsgo, a segd n yaoo sẽn da-a yẽ wã ligdã tɩ zems ne yʋʋm nins sẽn ketã. 52 La sã n ketã yʋʋm a wãn bal tɩ Kɩdeng yʋʋmdã ta, a segd n geelame n yao ned ning sẽn da yẽ wã tɩ zems ne yʋʋm nins sẽn ketã. 53 A segd n ket n tʋmd n kõt-a-la yʋʋmd fãa, wa ned b sẽn dɩk tʋʋma. La y segd n gesame t’a ra nams-a ye.+ 54 La a sã n pa tõe n yao n soog a meng wa sẽn zems no-kãensã, Kɩdeng yʋʋmdã sã n ta, yẽ ne a kambã* na n paama sor n looge.+

55 “‘Bala Israyɛll nebã yaa mam mengã yembse. B yaa mam yembs m sẽn yiis Ezɩpt soolmẽ wã.+ Mam yaa yãmb Wẽnnaam a Zeova.

26 “‘Yãmb pa segd n maan wẽn-faad y mens yĩng ye.+ Yãmb pa segd n pees bõn-naandga,+ wall y lug kug n pʋʋsdẽ ye. Y pa segd n pees kugr n maan bõn-naandg+ y soolmã pʋgẽ sẽn na yɩl n wõgemd a taoor ye.+ Bala mam yaa yãmb Wẽnnaam a Zeova. 2 Yãmb segd n tũu mam vʋʋsg rayã noyã, la y waoog* mam zĩ-sõngã. Mam yaa a Zeova.

3 “‘Yãmb sã n kell n tũ mam tõodã, la y sak mam sẽn yeel yãmbã,+ 4 mam na n kɩtame tɩ saagã ni a wakate,+ tɩ tẽngã bõn-koaadlã wome,+ tɩ tɩɩsã sẽn be weoogẽ wã me wom biisi. 5 Yãmb koodã pãbr wakat na n tall n tãaga viyn wã wobr wakate, tɩ viyn wã wobr wakat tall n tãag bʋdbã wakate. Y na n dɩɩ rɩɩb n tɩge, la y zĩnd bãan y soolmã pʋgẽ.+ 6 Mam na n kɩtame tɩ laafɩ zĩnd soolmã pʋgẽ.+ Y na n gãandame tɩ ned pa kẽes-y rabeem ye.+ Mam na n diga we-rũm-toosã tɩ b yi y soolmẽ wã, la zabr sʋʋg pa na n pɩʋʋg yãmb soolmẽ wã ye. 7 Hakɩɩka, yãmb na n diga y bɛɛbã n kʋ-b ne sʋʋse. 8 Yãmb sʋkã neb a nu na n diga neb koabga, tɩ neb koabg rig neb tus-piiga. Yãmb na n kʋʋ y bɛɛbã ne sʋʋse.+

9 “‘Mam na n ninga yãmb barka, la m kɩt tɩ y rog kamb n lebg wʋsgo.+ Mam na n pidsa m kaoolã m sẽn maan ne yãmbã.+ 10 Yãmb na n dɩɩ rɩẽ koodã, hal n wa yiis ka-kʋdgã n paam vɩʋʋg n kẽes ka-paalgã. 11 Mam na n tilga m sɛk-roogã yãmb sʋka,+ la mam* kõn tol n daag yãmb n bas ye. 12 Mam na n zĩnda ne yãmba, la m yɩ yãmb Wẽnnaam.+ La yãmb na n yɩɩ mam nin-buiidu.+ 13 Mam yaa yãmb Wẽnnaam a Zeova, soab ning sẽn yiis yãmb Ezɩpt soolmẽ wã, sẽn na yɩl tɩ y ra le yɩ b yembsã. Mam kaoo yãmb yubl-balgdgã n kɩt tɩ y roog y zut n kẽne.*

14 “‘La yãmb sã n pa kelg maam wall y pa sak mam sẽn yeel yãmbã fãa,+ 15 n zãgs mam tõodã+ la y* kisg mam noyã n pa sak n maan mam sẽn yeel yãmbã fãa, la y pa pids mam kaoolã,+ 16 ad mam sẽn na n maan yãmb bũmb ninsã: Mam na n kɩtame tɩ sũ-sãang paam yãmba, la m kɩt tɩ kõs-kʋdg la yĩn-wɩngr yõk yãmba, tɩ y ninã pãng booge, tɩ y pãngã me sa zãnga. Yãmb na n bʋda zaalem yĩnga, bala yaa y bɛɛbã n na n dɩ koodã.+ 17 Mam na n daaga yãmb n base, tɩ y bɛɛbã tõog yãmba.+ Neb nins sẽn kis yãmbã na n weooga yãmba,+ la yãmb na n zoetame tɩ ned pa rigd-y ye.+

18 “‘Baa ne rẽ fãa y sã n kell n pa kelg maam, mam na n sɩbga yãmb naoor a yopoe n yɩɩd pĩndã, y yel-wẽnã yĩnga. 19 Mam na n kɩtame tɩ yãmb wuk-m-mengã sa, la m kɩt tɩ y saasã lebg wa kutu,*+ tɩ y tẽngã lebg wa zũudu.* 20 Yãmb na n tʋmame tɩ y pãngã sa zaalem, bala yãmb soolmã bõn-koaadl pa na n wom ye.+ Soolmã tɩɩs me pa na n wom biis ye.

21 “‘Baasgo, yãmb sã n kell n kɩɩs maam, n zãgs n pa kelg maam, mam na n sɩbga yãmb naoor a yopoe n yɩɩd pĩndã, wa sẽn zems y yel-wẽnã. 22 Mam na n kɩtame tɩ we-rũmsã wa yãmb sʋka.+ B na n kɩtame tɩ y kong y kambã,+ la b sãam y yir dũmsã, tɩ yãmb sõorã booge. Yãmb soayã na n lebga vɩɩdo.+

23 “‘Baa ne bõn-kãensã, yãmb sã n pa sak mam kiblgã,+ n kell n bas maam, 24 ma-me na n daaga yãmb n base. La mam mengã na n sɩbga yãmb naoor a yopoe y yel-wẽnã yĩnga. 25 Mam na n kɩtame tɩ bɛɛbã wa zab ne yãmb ne sʋʋse, n sɩbg yãmb y sẽn sãam kaoolã yĩnga.+ Yãmb sã n tigim taab y tẽnsẽ wã, mam na n kɩtame tɩ bãag kẽ yãmb sʋka.+ La yãmb na n lʋɩɩ bɛ nugẽ.+ 26 Mam sã n wa boog yãmb rɩɩbã,*+ pagb piig na n wẽe yãmb burã wʋng a yembr bal pʋgẽ. B na n maka burã n yãk gɩrg n kõ yãmba.+ Yãmb na n wãbame la kõn sek yãmb ye.+

27 “‘Yãmb sã n baas n pa kelg maam, n kell n kɩɩs maam, 28 mam sũurã na n maneg n yika ne yãmba,+ la mam mengã na n sɩbga yãmb naoor a yopoe, y yel-wẽnã yĩnga. 29 Dẽ, yãmb na n wãba y kom-dibli wã nemdo, la y wãb y kom-pugli wã nemdo.+ 30 Mam na n sãama yãmb zĩ-zãntsã,*+ n wã yãmb wisd tẽn-kugã, la m wʋk y kũ-rãmbã n dʋʋg y bõn-naandsã sẽn yaa bõn-yood* m sẽn wã wã zutu.+ Mam* na n daaga yãmb n bas wa bõn-põosgo.+ 31 Mam na n sãama yãmb tẽnsã,+ la m kɩt tɩ y zĩ-sõamyã lebg raboodo. Mam pa na n kok yãmb maandã yũ-noogã ye.* 32 Mam mengã na n kɩtame tɩ y tẽngã lebg raboogo.+ Yãmb bɛɛbã sẽn be soolmẽ wã na n gesame n yɛɛse.+ 33 Mam na n sãeega yãmb buud toɛy-toɛyã neb sʋka,+ la m wõog sʋʋg n pʋgl yãmba.+ Y tẽngã na n lebga raboogo,+ tɩ y galʋ-tẽnsã sãame.

34 “‘Yãmb sã n wa be y bɛɛbã tẽngẽ tɩ y tẽngã lebg raboogo, tẽngã na n vʋʋsame.* Wakat kãnga, tẽngã na n vʋʋsa wa a sẽn da segd n vʋʋs vʋʋsg yʋʋmã sasa wã.+ 35 Wakat nins fãa tẽngã sẽn na n yɩ raboogã, a na n vʋʋsame, bala a pa vʋʋs vʋʋsg yʋʋmã sasa, yãmb sẽn wa n ket be wã ye.

36 “‘La sã n yaa ne neb nins sẽn põsã,+ mam na n kɩtame tɩ b sũyã pid ne yɩɩr b bɛɛbã soolmẽ. Tɩɩg vãoog sẽn miimd bʋrg na n kɩtame tɩ b zoe. B na n zoee wa neb sẽn zoet n na n põs sʋʋg n tɩ lʋɩ, tɩ ned yaool n pa rigd-b ye.+ 37 B na n lags n lʋɩɩ taab zut wa neb sẽn zoet n dat n põs sʋʋga, tɩ ned yaool n pa rigd-b ye. Yãmb pa na n tõog n zab ne y bɛɛbã ye.+ 38 Yãmb na n kii buud toɛy-toɛyã sʋka,+ tɩ y bɛɛbã soolem rɩ yãmba. 39 Yãmb neb nins sẽn ketã na n põoga y bɛɛbã soolem toɛy-toɛyã pʋsẽ,+ b beegrã yĩnga. Sɩd-sɩda, b na n põoga b ba-rãmbã beegrã yĩnga.+ 40 Rẽ poore, b na n vẽnega bãmb mensã beegrã n togse,+ b ba-rãmbã beegrã, la b ba-rãmbã sẽn pa maan sɩd ne maamã. B na n sak n deegame tɩ b kɩɩsa maam, n pa maan sɩd ne maam ye.+ 41 Dẽ, ma-me raag-b lame n base,+ n tall-b n kẽng b bɛɛbã soolmẽ.+

“‘Tõe tɩ b* na n sika b mense.+ Woto, b na n yaoo b beegrã yĩnga. 42 Mam na n tẽega m kaoolã m sẽn maan ne a Zakoobã,+ la m kaoolã m sẽn maan ne a Izaakã+ yelle. M na n tẽega m kaoolã m sẽn maan ne a Abrahaamã,+ la m tẽeg soolmã yelle. 43 B sã n wa bas tẽngã, a na n vʋʋsa wa a sẽn da segd n vʋʋs vʋʋsg yʋʋmã,+ n pa raboog tɩ b ka be ye. B na n yaoo b beegrã yĩnga, bala b zãgsa mam noyã la b* kisg mam tõodã.+ 44 Baa ne rẽ fãa, b sã n wa be b bɛɛbã soolmẽ wã, mam pa na n tol n daag-b n bas zãnga,+ wall m kisg-b hal n sãam-b fasɩ, tɩ sãam m kaoolã+ m sẽn maan ne-bã ye. Bala mam yaa bãmb Wẽnnaam a Zeova. 45 Bãmb yĩnga, mam na n tẽega kaoolã m sẽn maan ne b yaab-rãmbã+ m sẽn yiis buud toɛy-toɛyã nifẽ Ezɩpt soolmẽ wã,+ sẽn na yɩl n wilg tɩ mam yaa bãmb Wẽnnaam. Mam yaa a Zeova.’”

46 Woto yaa noy la tõod a Zeova sẽn tũnug ne a Moyiiz n lugl yẽ mengã ne Israyɛll nebã sʋka, Sinayi tãngẽ wã.+

27 A Zeova kell n goma ne a Moyiiz n yeele: 2 “Gom ne Israyɛll nebã, n yeel-b yaa: ‘Ned sã n maan pʋleng sẽn yaa toor zalle,+ n na n kõ a Zeova ninsaala,* rat n yeel t’a na n yaoo ligd b sẽn yãk tɩ zems ne nin-kãnga, 3 sã n yaa rao la a rat n dɩk n kõ t’a yʋʋmã ta pisi n digd pis-yoobe, yaoodã na n yɩɩ wanzuri sɩkl* pis-nu, wa sẽn zems zĩ-sõngã sɩklã.* 4 La sã n yaa paga, na n yɩɩ sɩkl pis-tã. 5 A soabã yʋʋm sã n taa nu n digd pisi n yaa raoa, yaoodã na n yɩɩ sɩkl pisi, la sã n yaa paga, na n yɩɩ sɩkl piiga. 6 A soabã sã n taa kiuug n digd yʋʋm a nu n yaa raoa, yaoodã na n yɩɩ wanzuri sɩkl a nu, la sã n yaa paga, na n yɩɩ wanzuri sɩkl a tãabo.

7 “‘A soabã yʋʋm sã n taa pis-yoob bɩ n yɩɩd rẽ n yaa raoa, yaoodã na n yɩɩ sɩkl piig la a nu, la sã n yaa paga, yaoodã na n yɩɩ sɩkl piiga. 8 Sẽn maan-a pʋlengã sã n sɩd yaa naong soab n pa tõe n yao yaoodã,+ a sẽn dat n dɩk ned ning n kõ wã na n waa maan-kʋʋdã taoore, tɩ maan-kʋʋdã ges-a n togs ligd ning b sẽn segd n yao wã. Maan-kʋʋdã na n geelga ligdã, tɩ zems sẽn maan-a pʋlengã sẽn tõe n paam n yao.+

9 “‘Sã n yaa rũng b sẽn tõe n tall n maan maoong n kõ a Zeova la a soabã pʋlem-yã, bũmb ning fãa b sẽn tõe n dɩk n kõ a Zeova na n lebga bũmb sẽn yaa sõngo. 10 A pa segd n dɩk rũng sẽn yaa sõma n ledg wall a tek ne sẽn pa sõma, bɩ n dɩk sẽn pa sõma n ledg wall a tek ne sẽn yaa sõma ye. A sã n segd n teka rũngã ne rũng a to, pipi soabã ne a sẽn na n tek ne a soabã fãa na n lebga sõamyã. 11 Sã n yaa rũng sẽn yaa rẽgdo,+ tɩ b pa tõe n tall n maan maoong n kõ a Zeova, a soabã na n talla rũngã n wa maan-kʋʋdã taoore. 12 Maan-kʋʋdã na n gesa rũngã sẽn yaa to-to wã, rat n yeel t’a sã n yaa sõma bɩ a pa sõma, n togs a ligdã. Maan-kʋʋdã sẽn na n togs ligd ningã la b na n yao. 13 La a soabã sã n dat n yao n lebs n deeg rũngã, a segd n yaoo ligdã, la a paas ligdã pʋɩɩr a ye pʋɩ a nu zugu.+

14 “‘Ned sã n dɩk a zak n kõ a Zeova tɩ na n yɩ bũmb sẽn yaa sõngo, maan-kʋʋdã na n gesa zakã sẽn yaa to-to wã, rat n yeel t’a sã n yaa sõma bɩ a pa sõma, n togs a ligdã. Maan-kʋʋdã sẽn na n togs ligd ningã, rẽ n na n yɩ zakã ligdi.+ 15 La ned ning sẽn dɩk a zak n kõ Wẽnnaamã sã n dat n yao n lebs n deege, a segd n yaoo ligdã, la a paas ligdã pʋɩɩr a ye pʋɩ a nu zugu, tɩ zakã le lebg yẽ rẽnda.

16 “‘Ned sã n pasg a pʋʋg n na n kõ a Zeova, b na n geelga pʋʋgã ligd tɩ zems ne bõn-buudã b sẽn segd n bʋd a pʋgẽ wã: Orz* bõn-buud homɛɛr* a yembr na n yɩɩ wanzuri sɩkl pis-nu. 17 Sã n yaa Kɩdeng yʋʋmdã sasa la a kõ a pʋʋgã,+ a na n yaoo ligd ning b sẽn wilgã. 18 Sã n yaa Kɩdeng yʋʋmdã poor la a kõ a pʋʋgã, maan-kʋʋdã na n geelga pʋʋgã ligd tɩ zems ne yʋʋm nins sẽn ket tɩ Kɩdeng yʋʋmd ning sẽn pʋgdã ta wã, n boog ligdã.+ 19 Sẽn kõ-a pʋʋgã sã n dat n yao n lebs n deeg a pʋʋgã, a segd n yaoo ligdã, la a paas ligdã pʋɩɩr a ye pʋɩ a nu zugu. Dẽ, pʋʋgã na n kell n yɩɩ yẽ rẽnda. 20 La a sã n pa yao n lebs n deeg pʋʋgã, tɩ b koos pʋʋgã ne ned a to, a pa le tõe n yao n deeg ye. 21 B sã n lebs pʋʋgã Kɩdeng yʋʋmdã sasa, na n lebga bũmb sẽn yaa sõng a Zeova yĩnga, tɩ yɩ pʋʋg b sẽn dɩk n kõ-a. Pʋʋgã na n lebga maan-kʋʋdbã n so.+

22 “‘Ned sã n dɩk pʋʋg a sẽn da n kõ a Zeova, tɩ pʋʋgã pa a rogem-pʋɩɩre,+ 23 maan-kʋʋdã na n geelga pʋʋgã ligd wakat kãng tɛk n tɩ tãag Kɩdeng yʋʋmdã, n togs-a ligd ning a sẽn segd n yao wã, t’a yao ligdã daar-n-kãnga.+ Pʋʋgã yaa bũmb sẽn yaa sõng a Zeova yĩnga. 24 Kɩdeng yʋʋmdã sasa, b na n lebsa pʋʋgã ned ning sẽn koos-a wã, rat n yeel tɩ sẽn so-a pʋʋgã.+

25 “‘B segd n geelga bũmb fãa ligd tɩ zems zĩ-sõngã sɩklã. Sɩklã segd n taa geera* pisi.

26 “‘La ned baa a ye pa segd n dɩk rũng bi-rẽeng n kõ ye. Bala bi-rẽeng fãa yaa a Zeova n so.+ Yaa loalg tɩ yaa pesgo, zoe n yaa a Zeova n so.+ 27 Sã n yaa rũng sẽn yaa rẽgdo, t’a rat n yao ligd ning b sẽn togsã n lebs n deege, a segd n yaoo ligdã la a paas ligdã pʋɩɩr a ye pʋɩ a nu zugu.+ La a sã n pa yao n lebs n deege, b na n koosa rũngã tɩ zems ne a ligdã.

28 “‘La ned sã n yãk bũmb a paoongã sʋk n kõ a Zeova wakat fãa yĩnga, b pa tõe n koos-a bɩ n yao n lebs n deeg-a, tɩ yaa ninsaal wall rũng bɩ pʋʋg ye. Bũmb ning fãa ned sẽn dɩk n kõ a Zeova yaa bũmb sẽn yaa sõng wʋsgo.+ 29 Sẽn paase, b sã n kao ned bʋʋd t’a segd ne kũum, b pa tõe n yao n lebs n deeg a soabã ye.+ B segd n kʋ-a lame n da bas-a ye.+

30 “‘Tẽngã bũmb fãa biis pʋɩɩr a ye pʋɩ piig zug+ yaa a Zeova n so, tɩ yaa koodã wall tɩɩsã biisi. Yaa bũmb sẽn yaa sõng a Zeova yĩnga. 31 Ned sã n kõ pʋɩɩr a ye pʋɩ piig zugu, n dat n yao n lebs n deeg bũmb pʋɩ-kãng pʋgẽ, a segd n yaoo ligdã la a paas ligdã pʋɩɩr a ye pʋɩ a nu zugu. 32 Sã n yaa rũm-bɛdã la rũm-bõonegã pʋɩɩr a ye pʋɩ piig zugã wɛɛngẽ, rũms nins sẽn na n tũ rũm-kɩɩmã rasaar tẽngr n loogã, piig soabã segd n lebga bũmb sẽn yaa sõng a Zeova yĩnga. 33 A pa segd n ges rũngã sã n yaa sõma bɩ a pa sõma, wall a tek-a ye. La a sã n dat n tek-a, pipi soabã ne a sẽn na n tek ne a soabã fãa segd n lebga sõamyã.+ B pa tõe n yao n lebs n deeg ye.’”

34 Woto yaa noy nins a Zeova sẽn tũnug ne a Moyiiz n kõ Israyɛll nebã Sinayi tãngẽ wã.+