SÕDB SEBRE

1 A Zeova goma ne a Moyiiz sɛk-roogẽ wã+ Sinayi we-raoogẽ wã.+ Yɩɩ kiuug a yiib-n-soabã pipi daarã, b sẽn yi Ezɩpt soolmẽ wã yʋʋm a yiib poore.+ A yeelame: 2 “Sõd+ Israyɛll nin-buiidã* fãa yembr-yembre, wa sẽn zems b buudu, sẽn zems b buudã roto, la f gʋls rapã fãa yʋya. 3 Foo ne a Aarõ segd n sõda neb nins fãa yʋʋm sẽn ta pisi bɩ sẽn yɩɩd rẽ+ tɩ b tõe n naag Israyɛll tãb-biisã, wa sẽn zems b buudu.*

4 “Yãk-y rao a ye buud fãa pʋgẽ t’a sõng-yã. B ned fãa segd n yaa a buudã roog taoor soaba.+ 5 Ad rap nins sẽn na n sõng yãmbã yʋya: Rubɛn buudẽ wã yaa a Sedewuur biig a Elisʋʋre.+ 6 Sɩmeyõ buudẽ wã yaa a Zurisadayi biig a Selumiyɛlle.+ 7 Zida buudẽ wã yaa a Aminadaab biig a Naasõ.+ 8 Isakaar buudẽ wã yaa a Zuwaar biig a Netanɛlle.+ 9 Zabulõ buudẽ wã yaa a Helon biig a Eliyaabe.+ 10 A Zozɛf kambã sʋka: Efrayim+ buudẽ wã yaa a Amiwuud biig a Elisama, t’a Manase buudẽ wã yaa a Pedasʋʋr biig a Gamaliyɛlle. 11 Bẽnzame buudẽ wã yaa a Gideoni biig a Abidanne.+ 12 Dan buudẽ wã yaa a Amisadayi biig a Ahiyezɛɛre.+ 13 Asɛɛr buudẽ wã yaa a Okran biig a Pagiyɛlle.+ 14 Gaad buudẽ wã yaa a Dewuwɛll biig a Eliyazafe.+ 15 Naftali buudẽ wã yaa a Enan biig a Ahira.+ 16 Yaa nin-kãensã la b yãk nin-buiidã sʋka. B yaa b ba-rãmbã buudã nanambse,+ rat n yeel tɩ Israyɛll neb tusr-tusrã taoor dãmba.”+

17 Dẽ, a Moyiiz ne a Aarõ yãka nin-kãensã b sẽn gʋls b yʋyã. 18 B tigma nin-buiidã fãa kiuug a yiib-n-soabã pipi daarã, n gʋls rap nins fãa yʋʋm sẽn ta pisi bɩ sẽn yɩɩd rẽ+ wã yʋya, wa sẽn zems b buud la b buudã roto, 19 wa a Zeova sẽn da yeel a Moyiizã. Dẽ, a Moyiiz sõda bãmb Sinayi we-raoogẽ wã.+

20 B gʋlsa a Rubɛn sẽn yaa a Israyɛll bi-kãsengã+ yagensã yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã yembr-yembre. 21 Rubɛn buudã rap sõor da yaa tus-pis-naas la a yoobe, la kobs-nu.

22 B gʋlsa a Sɩmeyõ yagensã+ yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã yembr-yembre. 23 Sɩmeyõ buudã rap sõor da yaa tus-pis-nu la a wɛ, la kobs-tã.

24 B gʋlsa a Gaad yagensã+ yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã. 25 Gaad buudã rap sõor da yaa tus-pis-naas la a nu, la kobs-yoob la pis-nu.

26 B gʋlsa a Zida yagensã+ yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã. 27 Zida buudã rap sõor da yaa tus-pis-yopoe la a naase, la kobs-yoobe.

28 B gʋlsa a Isakaar yagensã+ yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã. 29 Isakaar buudã rap sõor da yaa tus-pis-nu la a naase, la kobs-naase.

30 B gʋlsa a Zabulõ yagensã+ yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã. 31 Zabulõ buudã rap sõor da yaa tus-pis-nu la a yopoe, la kobs-naase.

32 B gʋlsa a Zozɛf biig a Efrayim yagensã+ yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã. 33 Efrayim buudã rap sõor da yaa tus-pis-naase, la kobs-nu.

34 B gʋlsa a Manase yagensã+ yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã. 35 Manase buudã rap sõor da yaa tus-pis-tã la a yiibu, la kobs-yi.

36 B gʋlsa a Bẽnzame yagensã+ yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã. 37 Bẽnzame buudã rap sõor da yaa tus-pis-tã la a nu, la kobs-naase.

38 B gʋlsa a Dan yagensã+ yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã. 39 Dan buudã rap sõor da yaa tus-pis-yoob la a yiibu, la kobs-yopoe.

40 B gʋlsa a Asɛɛr yagensã+ yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã. 41 Asɛɛr buudã rap sõor da yaa tus-pis-naas la a yembre, la kobs-nu.

42 B gʋlsa a Naftali yagensã+ yʋya, sẽn zems b buudu, la b buudã roto. B sõda rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag tãb-biisã. 43 Naftali buudã rap sõor da yaa tus-pis-nu la a tãabo, la kobs-naase.

44 Yaa a Moyiiz ne a Aarõ n paas Israyɛll buudã nanambs piig la a yiibã n sõd nin-kãensã. Nanambs piig la a yiibã ned kam fãa yaa a buudã roog taoor soaba. 45 B sõda Israyɛll rap nins fãa yʋʋm sẽn ta pisi bɩ sẽn yɩɩd rẽ tɩ b tõe n naag Israyɛll tãb-biisã, tɩ zems ne b buudã roto. 46 B fãa sõorã yaa tus-kobs-yoob la a tãabo, la kobs-nu la pis-nu.+

47 La b pa sõd Levi buudã+ rot rãmb n naag bãmb ye.+ 48 Dẽ, a Zeova yeela a Moyiiz yaa: 49 “Yaa Levi buudã neb bal la yãmb pa segd n sõde. La y pa segd n naag b sõorã Israyɛll neb a taabã ye.+ 50 Yãmb segd n yãka Levi buudã neb tɩ b get Kasetã sɛk-roogã+ yelle, ne bũmb nins fãa sẽn be a pʋgẽ wã yelle.+ Bãmb n na n dɩkd sɛk-roogã ne a teedã fãa,+ la b tʋmd a pʋgẽ.+ B segd n tii b fu-rotã n gũbg sɛk-roogã.+ 51 Y sã n wa na n loog ne sɛk-roogã, yaa Levi nebã n segd n siig-a.+ Y sã n wa yalse, yaa Levi nebã n segd n tilg-a. Ned sẽn pa tar sor* sã n kolge, b segd n kʋ-a lame.+

52 “Israyɛll ned fãa segd n tilga a fu-roog a sik-zĩigẽ, tɩ zems ne zĩis nins buud a tãab-tãabã sẽn tilgã,*+ tɩ zems ne a tãb-biisi. 53 Levi buudã neb segd n tilga b fu-rotã n gũbg Kasetã sɛk-roogã, tɩ m sũurã ra wa yik ne Israyɛll nin-buiidã ye.+ Yaa Levi buudã neb n segd n get Kasetã sɛk-roogã yelle.”*+

54 Israyɛll nebã maana bũmb nins fãa a Zeova sẽn yeel a Moyiizã. B maana woto bal kɛpɩ.

2 A Zeova goma ne a Moyiiz la a Aarõ n yeele: 2 “Israyɛll nebã segd n tilga b fu-rotã zĩis nins b buud a tãab-tãabã sẽn segd n tilgã.+ Ned fãa segd n tilgame n yɛgl a buudã roog bãnde. B segd n tilgame n tees sɛk-roogã, n gũbg-a.

3 “Buud a tãab nins sẽn na n tilg b fu-rotã yaang sẽnese, n tees wĩndgã sẽn pukdẽ wã yaa Zida buudã n lʋɩt b taoor wa sẽn zems b tãb-biisi. A Zida yagensã naab yaa a Aminadaab biig a Naasõ.+ 4 A tãb-biisã b sẽn gʋlsã sõor yaa tus-pis-yopoe la a naase, la kobs-yoobe.+ 5 Yaa Isakaar buudã n na n tilg b fu-rotã n yɛgl-a. A Isakaar yagensã naab yaa a Zuwaar biig a Netanɛlle.+ 6 A tãb-biisã b sẽn gʋlsã sõor yaa tus-pis-nu la a naase, la kobs-naase.+ 7 Sẽn pʋgd yaa Zabulõ buudã. A Zabulõ yagensã naab yaa a Helon biig a Eliyaabe.+ 8 A tãb-biisã b sẽn gʋlsã sõor yaa tus-pis-nu la a yopoe, la kobs-naase.+

9 “Zida buudã tãb-biis sullã neb yʋy b sẽn gʋlsã sõor yaa tus-koabg la pis-nii la a yoobe, la kobs-naase. Bãmb la pipi sull sẽn segd n yiki.+

10 “Buud a tãab nins sẽn na n tilg b fu-rotã goabg sẽnesã, yaa Rubɛn buudã+ n lʋɩt b taoor wa sẽn zems b tãb-biisi. A Rubɛn yagensã naab yaa a Sedewuur biig a Elisʋʋre.+ 11 A tãb-biisã b sẽn gʋlsã sõor yaa tus-pis-naas la a yoobe, la kobs-nu.+ 12 Yaa Sɩmeyõ buudã n na n tilg b fu-rotã n yɛgl-a. A Sɩmeyõ yagensã naab yaa a Zurisadayi biig a Selumiyɛlle.+ 13 A tãb-biisã b sẽn gʋlsã sõor yaa tus-pis-nu la a wɛ, la kobs-tã.+ 14 Sẽn pʋgd yaa Gaad buudã. A Gaad yagensã naab yaa a Rewuyɛll biig a Eliyazafe.+ 15 A tãb-biisã b sẽn gʋlsã sõor yaa tus-pis-naas la a nu, la kobs-yoob la pis-nu.+

16 “Rubɛn buudã tãb-biis sullã neb yʋy b sẽn gʋlsã sõor yaa tus-koabg la pis-nu la a yembre, la kobs-naas la pis-nu. Bãmb la sull a yiib-n-soab sẽn segd n yiki.+

17 “B sã n wa na n loog ne sɛk-roogã,+ Levi buudã segd n zĩnda sul a taabã tẽn-sʋka.

“B segd n tũu taab tɩ zems b fu-rotã sẽn tilg to-to wã,+ tɩ ned fãa be a zĩigẽ wa sẽn zems buud a tãab ning sʋk a sẽn be wã.

18 “Buud a tãab nins sẽn na n tilg b fu-rotã nin-taoor sẽnesã yaa Efrayim buudã n lʋɩt b taoor wa sẽn zems b tãb-biisi. A Efrayim yagensã naab yaa a Amiwuud biig a Elisama.+ 19 A tãb-biisã b sẽn gʋlsã sõor yaa tus-pis-naase, la kobs-nu.+ 20 Sẽn pʋgd yaa Manase buudã.+ A Manase yagensã naab yaa a Pedasʋʋr biig a Gamaliyɛlle.+ 21 A tãb-biisã b sẽn gʋlsã sõor yaa tus-pis-tã la a yiibu, la kobs-yi.+ 22 Sẽn pʋgd yaa Bẽnzame buudã. A Bẽnzame yagensã naab yaa a Gideoni biig a Abidanne.+ 23 A tãb-biisã b sẽn gʋlsã sõor yaa tus-pis-tã la a nu, la kobs-naase.+

24 “Efrayim buudã tãb-biis sullã neb yʋy b sẽn gʋlsã sõor yaa tus-koabg la a nii, la koabga. Bãmb la sull a tãab-n-soab sẽn segd n yiki.+

25 “Buud a tãab nins sẽn na n tilg b fu-rotã rɩtg sẽnesã yaa Dan buudã n lʋɩt b taoor wa sẽn zems b tãb-biisi. A Dan yagensã naab yaa a Amisadayi biig a Ahiyezɛɛre.+ 26 A tãb-biisã b sẽn gʋlsã sõor yaa tus-pis-yoob la a yiibu, la kobs-yopoe.+ 27 Yaa Asɛɛr buudã n na n tilg b fu-rotã n yɛgl-a. A Asɛɛr yagensã naab yaa a Okran biig a Pagiyɛlle.+ 28 A tãb-biisã b sẽn gʋlsã sõor yaa tus-pis-naas la a yembre, la kobs-nu.+ 29 Sẽn pʋgd yaa Naftali buudã. A Naftali yagensã naab yaa a Enan biig a Ahira.+ 30 A tãb-biisã b sẽn gʋlsã sõor yaa tus-pis-nu la a tãabo, la kobs-naase.+

31 “Dan buudã tãb-biis sullã neb yʋy b sẽn gʋlsã sõor yaa tus-koabg la pis-nu la a yopoe, la kobs-yoobe. Bãmb la yaoolem sull sẽn segd n yiki,+ wa sẽn zems buud a tãab ning sʋk b sẽn be wã.”

32 Nin-kãensã yaa Israyɛll neb nins yʋy b sẽn gʋlsã wa sẽn zems b buudã roto. Neb nins fãa sẽn be sulẽ wã tɩ b gʋls b yʋy tɩ b na n naag tãb-biisã sõor yaa tus-kobs-yoob la a tãabo, la kobs-nu la pis-nu.+ 33 La b pa sõd Levi buudã neb+ n naag Israyɛll neb a taabã,+ wa a Zeova sẽn da yeel a Moyiizã. 34 Israyɛll nebã maana bũmb nins fãa a Zeova sẽn da yeel a Moyiizã. Yaa woto la buud a tãab-tãabã ra tilgd+ b fu-rotã, la b ra yikdẽ,+ tɩ zemsd ne ned fãa buudu, la a buudã roogo.

3 Ad a Aarõ ne a Moyiiz pendã neba,* wakat ning a Zeova sẽn gom ne a Moyiiz Sinayi tãngẽ wã.+ 2 Ad a Aarõ kom-dibli wã yʋya: Yaa a Nadaab sẽn yaa a bi-kãsengã, n paas a Abiyu+ ne a Eleazaar+ la a Itamaare.+ 3 Woto yaa a Aarõ kom-dibli wã yʋya, rat n yeel tɩ maan-kʋʋdb nins b sẽn zae kaam n zĩnig maan-kʋʋrã tʋʋmd pʋgẽ wã.+ 4 La a Nadaab ne a Abiyu kii a Zeova taoore, b sẽn wa n yõog wisd sẽn pa zems ne tõogã a Zeova taoor+ Sinayi we-raoogẽ wã. B pa paam kom-dibli ye. La a Eleazaar+ ne a Itamaar+ kell n naaga b ba a Aarõ n yɩ maan-kʋʋdba.

5 A Zeova yeela a Moyiiz yaa: 6 “Tall Levi buudã neb+ n kolge, tɩ b yaas maan-kʋʋd a Aarõ taoore. B na n sõngd-a+ lame. 7 B na n tʋmda sɛk-roogã tʋʋm nins fãa b sẽn na n kõ-bã. Woto, b na n tʋmda a Aarõ yĩnga, la Israyɛll nebã fãa yĩng sɛk-roogã taoore. 8 B segd n gesa sɛk-roogã teedã fãa yelle,+ la b tʋm sɛk-roogã tʋʋmã,+ Israyɛll nebã yĩnga. 9 Fo segd n dɩka Levi buudã neb n kõ a Aarõ ne a kom-dibli wã. B yaa neb b sẽn dɩk n kõ, rat n yeel tɩ neb b sẽn yãk Israyɛll nebã sʋk n kõ a Aarõ.+ 10 Fo segd n yãka a Aarõ ne a kom-dibli wã tɩ b tʋmd maan-kʋʋrã tʋʋmã.+ Ned sẽn pa tar sor* sã n kolg sɛk-roogã, b segd n kʋ-a lame.”+

11 A Zeova kell n goma ne a Moyiiz n yeele: 12 “Sã n yaa ne maam, mam yãka Levi buudã neb Israyɛll nebã sʋk n ledg Israyɛll nebã kom-dẽemsã fãa.+ Levi buudã neb na n lebga mam dẽnda. 13 Bala bi-rẽeng fãa yaa mam dẽnda.+ Daar ning mam sẽn kʋ Ezɩpt soolmã kom-dẽemsã fãa wã,+ mam welga Israyɛll kom-dẽemsã fãa toor mam mengã yĩnga, sẽn sɩng ne ninsaal n tɩ tãag rũnga.+ B segd n lebga mam dẽnda. Mam yaa a Zeova.”

14 A Zeova le goma ne a Moyiiz Sinayi we-raoogẽ wã+ n yeele: 15 “Gʋls Levi buudã kom-dibli wã yʋy wa sẽn zems b buudã roto, la wa sẽn zems b buudu. Fo segd n gʋlsa rao fãa sẽn ta kiuug bɩ sẽn yɩɩd rẽ yʋʋre.”+ 16 Dẽ, a Moyiiz gʋlsa b yʋyã wa a Zeova sẽn da yeel-a wã. 17 Ad a Levi kom-dibli wã yʋya: A Gɛrsonne, a Kehat ne a Merari.+

18 Ad a Gɛrson kom-dibli wã yʋy wa sẽn zems b buudu: A Libni ne a Simeyi.+

19 A Kehat kom-dibli wã yʋy wa sẽn zems b buud yaa a Amram, a Izehaare, a Ebrõ la a Uziyɛlle.+

20 A Merari kom-dibli wã yʋy wa sẽn zems b buud yaa a Mali+ ne a Musi.+

Woto yaa Levi buudã neb wa sẽn zems b buudã roto.

21 Libni buudã+ ne Simeyi buudã neb yaa a Gɛrson yagense. Bãmb yaa Gɛrson buudã neba. 22 B rap nins fãa sẽn ta kiuug bɩ sẽn yɩɩd rẽ wã yʋy b sẽn gʋlsã sõor yaa tus a yopoe, la kobs-nu.+ 23 Gɛrson buudã neb tilga b fu-rotã sɛk-roogã+ poore, n tees nin-taoore. 24 Gɛrson buudã roog naab yaa a Layɛll biig a Eliyazafe. 25 A Gɛrson kom-dibli wã+ tʋʋmd sɛk-roogẽ wã yaa b ges sɛk-roogã yelle, pɛɛlã,+ a gãndã sẽn lud-a wã,+ fu-lilldgã+ sẽn be sɛk-roogã rignoorẽ wã, 26 samandã fu-lilldsã,+ ne samandã sẽn gũbg sɛk-roogã ne tẽn-kugrã rignoorẽ fu-lilldgã,+ la a wĩyã yelle, la tʋʋm a taab rẽ wɛɛngẽ.

27 Amram buudã, Izehaar buudã ne Ebrõ buudã la Uziyɛll buudã yaa a Kehat yagense. Bãmb yaa Kehat buudã neba.+ 28 Rap nins fãa sẽn ta kiuug bɩ sẽn yɩɩd rẽ wã sõor yaa tus a nii, la kobs-yoobe. B tʋʋmd yaa ges zĩ-sõngã yelle.+ 29 Kehat buudã neb tilga b fu-rotã sɛk-roogã goabg sẽnese.+ 30 Kehat buudã roog naab yaa a Uziyɛll+ biig a Elizafanne. 31 B tʋʋmd yaa ges Koglgã+ yelle, taablã,+ fɩtl-doagendgã,+ tẽn-kugã,+ teed+ nins b sẽn tar n tʋmd zĩ-sõngã pʋgẽ wã la fu-lilldgã+ yelle, n paas tʋʋm a taab rẽ wɛɛngẽ.+

32 Levi buudã na-kãsengã yaa maan-kʋʋd a Aarõ biig a Eleazaare.+ Yẽ n get neb nins tʋʋmd sẽn yaa b ges zĩ-sõngã yellã yelle.

33 Mali buudã ne Musi buudã neb yaa a Merari yagense. Bãmb yaa Merari buudã neba.+ 34 Rap nins fãa sẽn ta kiuug bɩ sẽn yɩɩd rẽ wã yʋy b sẽn gʋlsã sõor yaa tus a yoobe, la kobs-yi.+ 35 Merari buudã roog naab yaa a Abihayɩll biig a Zuriyɛlle. B tilga b fu-rotã sɛk-roogã rɩtg sẽnese.+ 36 A Merari kom-dibli wã tʋʋmd yaa ges sɛk-roogã kaadr-dãmb*+ yelle, ne a ra-wogdã,+ a ra-lugsã,+ a nao sẽn tar bogdã, la a teedã fãa+ yelle, n paas tʋʋm a taab rẽ wɛɛngẽ.+ 37 B segd n gesa ra-lugs nins sẽn gũbg samandã me ne b naoã sẽn tar bogdã+ yelle, la b bayã ne b wĩyã yelle.

38 Neb nins sẽn tilg b fu-rotã sɛk-roogã taoorã, rat n yeel tɩ yaang sẽnese, wĩndgã sẽn pukdẽ wã yaa a Moyiizi, n paas a Aarõ ne a kom-dibli wã. B tʋʋmd yaa ges zĩ-sõngã yelle, Israyɛll nebã yĩnga. Ned sẽn pa tar sor* sã n kolge, b segd n kʋ-a lame.+

39 Levi buudã rap nins fãa sẽn ta kiuug bɩ sẽn yɩɩd rẽ, t’a Moyiiz ne a Aarõ gʋls b yʋyã wa sẽn zems b buudu, wa a Zeova sẽn yeelã sõor yaa tus-pisi la a yiibu.

40 Rẽ poore, a Zeova yeela a Moyiiz yaa: “Gʋls Israyɛll kom-dẽemsã fãa sẽn yaa kom-dibli sẽn ta kiuug bɩ sẽn yɩɩd rẽ+ wã yʋya. Sõd-ba, la f gʋls b yʋyã. 41 Fo segd n welga Levi buudã neb toor mam yĩnga, tɩ b ledg Israyɛll nebã kom-dẽemsã fãa,+ la f welg Levi buudã neb yir dũmsã toor tɩ b ledg Israyɛll nebã yir dũmsã fãa kom-dẽemsã.+ Mam yaa a Zeova.” 42 Dẽ, a Moyiiz gʋlsa kom-dẽems nins fãa sẽn da be Israyɛll nebã sʋkã yʋya, wa a Zeova sẽn da yeel-a wã. 43 Kom-dẽems nins fãa sẽn yaa rap n ta kiuug bɩ sẽn yɩɩd rẽ, tɩ b gʋls b yʋyã sõor yaa tus-pisi la a yiibu, la kobs-yi la pis-yopoe la a tãabo.

44 A Zeova kell n goma ne a Moyiiz n yeele: 45 “Welg Levi buudã neb toore, tɩ b ledg kom-dẽemsã fãa sẽn be Israyɛll nebã sʋkã, la f welg Levi buudã neb yir dũmsã toor tɩ b ledg Israyɛll nebã yir dũmsã. Levi buudã neb segd n yɩɩ mam dẽnda. Mam yaa a Zeova. 46 Israyɛll nebã kom-dẽems kobs-yi la pis-yopoe la a tãab n yɩɩd Levi buudã nebã sõore.+ Sẽn na yɩl n yao n dol+ nin-kãens yĩnga, 47 fo segd n deega sɩkl* a nu ned fãa yĩnga,+ wa sẽn zems zĩ-sõngã sɩklã.* Sɩkl yaa geera* pisi.+ 48 Fo segd n kõo a Aarõ ne a kom-dibli wã ligdã, tɩ yɩ yaood b sẽn yao n dol neb nins sõor sẽn yɩɩg Levi buudã nebã.” 49 Dẽ, a Moyiiz reega ligd ning b sẽn kõ neb nins sõor sẽn yɩɩg Levi buudã nebã yĩngã. 50 A reega ligdã Israyɛll nebã kom-dẽemsã nengẽ. Yɩɩ sɩkl tusr la kobs-tã la pis-yoob la a nu, wa sẽn zems zĩ-sõngã sɩklã. 51 A Moyiiz kõo a Aarõ ne a kom-dibli wã ligdã b sẽn yao kom-dẽemsã yĩngã, wa sẽn zems a Zeova gomdã,* rat n yeel tɩ wa a Zeova sẽn da yeel a Moyiizã.

4 A Zeova goma ne a Moyiiz la a Aarõ n yeele: 2 “Yãmb segd n sõda a Kehat kom-dibli wã+ sẽn be Levi nebã sʋkã wa sẽn zems b buud la b buudã roto. 3 Yaa b neb nins fãa sẽn ta yʋʋm pis-tã+ n dabd pis-nu,+ n naag b sẽn yãk b rãmb tɩ b na n tʋmd sɛk-roogẽ wã.+

4 “Ad a Kehat kom-dibli wã tʋʋmd sɛk-roogẽ wã.+ B tʋʋmdã yaa sõng wʋsgo: 5 B sã n wa na n yi sik-zĩigẽ wã, a Aarõ ne a kom-dibli wã na n kẽeme n sik fu-lilldgã+ n lud Kasetã koglgo.+ 6 B na n pil-a-la ne lutg b sẽn maan ne fok* gãongo, n lud-a ne peend sẽn yaa kẽeg haoo,* la b tui a ra-bɩlmã+ b sẽn na n tall n dɩk-a wã b zĩisẽ.

7 “Sẽn paase, b na n pila taablã b sẽn dogend bur ning b sẽn kõt Wẽnnaamã*+ ne peend sẽn yaa kẽeg haoo, la b roglg laasã, wũmbli wã, la-bõonegã, la yubli wã b sẽn na n tar n kiigd maandã divẽ wã.+ Burã b sẽn kõt Wẽnnaam wakat fãa wã+ segd n paa taablã zugu. 8 B na n pil-b-la ne peen-moomde, n lud ne lutg b sẽn maan ne fok gãongo, la b tui a ra-bɩlmã+ b sẽn na n tall n dɩk-a wã b zĩisẽ. 9 Rẽ poore, b na n dɩka peend sẽn yaa kẽeg haoo n lud fɩtl-doagendgã,+ n paas a fɩtl-dãmbã,+ a yɩʋʋsã, a bugmã laase,+ la a fɩtl-dãmbã kaamã tʋgd fãa. 10 B na n pil-a-la ne a teedã fãa ne lutg b sẽn maan ne fok gãongo, n dogl-a ra-wok zug tɩ b tall n dɩk-a. 11 B na n pila sãnem tẽn-kugrã+ ne peend sẽn yaa kẽeg haoo, n lud-a ne lutg b sẽn maan ne fok gãongo, la b tui a ra-bɩlmã+ b sẽn na n tall n dɩk-a wã b zĩisẽ. 12 Rẽ poore, b na n dɩka teed nins fãa+ b sẽn tar n tʋmd zĩ-sõngẽ wã wakat fãa wã, n ning-b peend sẽn yaa kẽeg haoo pʋgẽ, la b pil-b ne lutg b sẽn maan ne fok gãongo, n dogl-b ra-wok zug tɩ b tall n dɩk-ba.

13 “B segd n wʋka tompɛglmã* tẽn-kugrẽ wã,+ la b pil-a ne peend b sẽn maan ne rũms kõbd gĩs sẽn yaa miid-miidu. 14 B na n dogla a teed nins fãa b sẽn tar n tʋmd tẽn-kugrẽ wã a zugu: Yaa bugmã laase, yaagdsã, pell-dãmbã, laasã, la tẽn-kugrã teed a taabã fãa.+ B segd n lud-b-la ne lutg b sẽn maan ne fok gãongo, la b tui a ra-bɩlmã+ b sẽn na n tall n dɩk-a wã b zĩisẽ.

15 B sã n wa na n yi sik-zĩigẽ wã, a Aarõ ne a kom-dibli wã segd n luda zĩ-sõngã,+ ne a teedã fãa n sa, t’a Kehat kom-dibli wã yaool n kẽ n dɩk-ba.+ La b pa segd n sɩɩs zĩ-sõngã, sã n pa rẽ b na n kiime.+ Woto yaa a Kehat kom-dibli wã tʋʋmd sɛk-roogã yĩnga.

16 “Maan-kʋʋd a Aarõ biig a Eleazaar+ tʋʋmd yaa ges fɩtl-dãmbã kaamã+ yelle, wisdã sẽn tar yũ-noogã,+ kood biis kũunã b sẽn kõt wakat fãa wã, la zaeebã kaamã+ yelle. A segd n gesa sɛk-roogã tõr yelle, bũmb nins fãa sẽn be a pʋgẽ wã, n paas zĩ-sõngã ne a teedã yelle.”

17 A Zeova le goma ne a Moyiiz la a Aarõ n yeele: 18 “Ra bas-y t’a Kehat kambã ne a yagensã+ menem Levi buudã sʋk ye. 19 Maan-y woto b yĩnga, sẽn na yɩl tɩ b kell n vɩɩmd la b ra ki, b sẽn kolg teed nins sẽn yaa sõng wʋsgã+ yĩng ye. A Aarõ ne a kom-dibli wã na n kõo b ned kam fãa a tʋʋmde, la b wilg-a a sẽn segd n dɩkd bũmb ninga. 20 B pa segd n kẽ n yã bũmb nins sẽn yaa sõamyã baa wakat bilf pʋgẽ ye. Sã n pa rẽ, b na n kiime.”+

21 Rẽ poore, a Zeova goma ne a Moyiiz n yeele: 22 “Sõd a Gɛrson kom-dibli wã+ wa sẽn zems b buudã roto, la b buudu. 23 Fo segd n gʋlsa neb nins fãa sẽn ta yʋʋm pis-tã n dabd pis-nu wã yʋya, sẽn naag-b b sẽn yãk b rãmb tɩ b na n tʋmd sɛk-roogẽ wã. 24 Ad a Gɛrson buudã neb sẽn segd n ges bũmb nins yelle, la b sẽn segd n dɩkd bũmb ninsi:+ 25 B na n dɩkda fu-roogã pɛɛla,+ sɛk-roogã, a lutgã, ne lutgã b sẽn maan ne fok gãong tɩ be a zugã,+ sɛk-roogã rignoorẽ fu-lilldgã,+ 26 samandã fu-lilldsã,+ samandã sẽn gũbg sɛk-roogã ne tẽn-kugrã rignoorẽ fu-lilldgã,+ b wĩyã, n paas b teedã fãa, la bũmb nins fãa b sẽn tar n tʋmdẽ wã. Bãmb tʋʋmd la woto. 27 A Aarõ ne a kom-dibli wã segd n gesa Gɛrson buudã nebã+ tʋʋm fãa, la b sẽn segd n dɩk bũmb ninsã yelle. Fo na n wilg-b-la bõn-kãensã fãa b sẽn segd n dɩkdẽ wã tɩ yɩ b tʋʋmde. 28 Woto yaa tʋʋmd ning Gɛrson buudã neb sẽn segd n tʋm sɛk-roogẽ wã.+ Yaa maan-kʋʋd a Aarõ biig a Itamaar+ n segd n ges b tʋʋmã yelle.

29 “Sã n yaa ne a Merari kom-dibli wã,+ fo na n gʋlsa b yʋyã wa sẽn zems b buudu, la wa sẽn zems b buudã roto. 30 Fo na n gʋlsa b neb nins fãa sẽn ta yʋʋm pis-tã n dabd pis-nu wã yʋya, sẽn naag-b b sẽn yãk b rãmb tɩ b na n tʋmd sɛk-roogẽ wã. 31 Ad teed nins b sẽn segd n dɩkdẽ wã,+ wa sẽn zems b tʋʋm sẽn yaa a soab sɛk-roogẽ wã: Yaa sɛk-roogã kaadr-dãmbã,*+ a ra-wogdã,+ a ra-lugsã,+ a nao sẽn tar bogdã,+ 32 ra-lugsã+ sẽn gũbg samandã, b nao sẽn tar bogdã,+ b bayã,+ ne b wĩyã n paas b teedã fãa, la tʋʋm a taabã fãa rẽ wɛɛngẽ. Fo na n wilga b ned kam fãa bũmb ning a sẽn segd n dɩkdẽ. 33 Woto yaa tʋʋmd ning Merari buudã neb+ sẽn segd n tʋm sɛk-roogẽ wã, tɩ maan-kʋʋd a Aarõ biig a Itamaar get b tʋʋmã yelle.”+

34 Dẽ, a Moyiiz ne a Aarõ la nin-buiidã nanambs+ gʋlsa Kehat buudã neb+ yʋya, wa sẽn zems b buudu, la wa sẽn zems b buudã roto. 35 Yaa b neb nins fãa sẽn ta yʋʋm pis-tã n dabd pis-nu, n naag b sẽn yãk b rãmb tɩ b na n tʋmd sɛk-roogẽ wã.+ 36 Neb nins fãa yʋy b sẽn gʋls wa sẽn zems b buudã sõor yaa tus a yi, la kobs-yopoe la pis-nu.+ 37 B gʋlsa Kehat buudã neb yʋy wa sẽn zems b buudu. Yaa neb nins fãa sẽn tʋmd sɛk-roogẽ wã. A Moyiiz ne a Aarõ gʋlsa b yʋyã wa a Zeova sẽn tũnug ne a Moyiiz n yeelã.+

38 B gʋlsa a Gɛrson kom-dibli wã+ yʋy wa sẽn zems b buudu, la wa sẽn zems b buudã roto. 39 Yaa b neb nins fãa sẽn ta yʋʋm pis-tã n dabd pis-nu, n naag b sẽn yãk b rãmb tɩ b na n tʋmd sɛk-roogẽ wã. 40 Neb nins fãa yʋy b sẽn gʋls wa sẽn zems b buudu, la wa sẽn zems b buudã rotã sõor yaa tus a yi, la kobs-yoob la pis-tã.+ 41 Woto yaa Gɛrson buudã neb yʋy b sẽn gʋlsã. Yaa neb nins fãa sẽn tʋmd sɛk-roogẽ wã. A Moyiiz ne a Aarõ gʋlsa b yʋyã wa a Zeova sẽn yeelã.+

42 B gʋlsa a Merari kom-dibli wã yʋy wa sẽn zems b buudu, la wa sẽn zems b buudã roto. 43 Yaa b neb nins fãa sẽn ta yʋʋm pis-tã n dabd pis-nu, n naag b sẽn yãk b rãmb tɩ b na n tʋmd sɛk-roogẽ wã.+ 44 Neb nins fãa yʋy b sẽn gʋls wa sẽn zems b buudã sõor yaa tus a tãabo, la kobs-yi.+ 45 Woto yaa Merari buudã neb yʋy b sẽn gʋlsã. A Moyiiz ne a Aarõ gʋlsa b yʋyã wa a Zeova sẽn tũnug ne a Moyiiz n yeelã.+

46 A Moyiiz ne a Aarõ la Israyɛll nebã nanambs gʋlsa Levi bu-kãensã fãa neb yʋya, wa sẽn zems b buudu, la wa sẽn zems b buudã roto. 47 B yʋʋmã yaa pis-tã n dabd pis-nu, tɩ b yãk-b tɩ b tʋmd sɛk-roogã tʋʋma,+ la b rɩkd zɩɩbã. 48 Neb nins fãa yʋy b sẽn gʋlsã sõor yaa tus a nii, la kobs-nu la pis-nii.+ 49 B gʋlsa b yʋyã wa a Zeova sẽn tũnug ne a Moyiiz n yeelã, ned kam fãa wa sẽn zems a tʋʋmde, la bũmb nins a sẽn segd n dɩke. B gʋlsa b yʋyã wa sẽn zems a Zeova sẽn da yeel a Moyiizã.

5 A Zeova le goma ne a Moyiiz n yeel yaa: 2 “Yeel Israyɛll nebã tɩ ned sã n yaa wãoore, rao raoolem sã n yit koom bãag yĩnga, pag zɩɩm sã n yit bãag yĩnga,+ la ned sã n sɩɩs kũum*+ n dẽgem a menga, bɩ b yiis-a sik-zĩigẽ wã.+ 3 Yaa pag tɩ yaa raoa, y segd n yiis-b lame. Y segd n yiis-b-la sik-zĩigẽ wã, tɩ b bãagã ra wa long sikã zĩig neba,+ neb nins sʋk mam sẽn be wã ye.”+ 4 Dẽ, Israyɛll nebã maana woto, n yiis-b sik-zĩigẽ wã. Israyɛll nebã sɩd maana wa a Zeova sẽn yeel a Moyiizã.

5 A Zeova kell n goma ne a Moyiiz n yeele: 6 “Yeel Israyɛll nebã yaa: ‘Rao bɩ pag sã n maan yel-wẽnd a sẽn pa maan sɩd ne a Zeova yĩnga, a* tara taale.+ 7 A* segd n vẽneg n togsa+ a sẽn maan* yel-wẽnd ningã, la a yao ligd ning fãa a sẽn segd n yao n dol a taalã, la a paas ligdã pʋɩɩr a ye pʋɩ a nu zugu.+ A segd n kõo ligdã ned ning a sẽn beegã. 8 La ned ning a sẽn beegã sã n maana kaalem, n pa tar ned a sẽn kĩ ne sẽn tõe n wa reeg ligdã, b segd n dɩka ligdã n kõ a Zeova, tɩ yɩ maan-kʋʋdã rẽnda, paasg pe-raoogã b sẽn na n tall n maan paasg* a yĩngã sẽn yãk a toogo.+

9 “‘Bũmb nins fãa sẽn yaa sõamyã+ Israyɛll nebã sẽn na n kõ maan-kʋʋdã tɩ yɩ Wẽnnaam dẽndã, na n yɩɩ maan-kʋʋdã rẽnda.+ 10 Ned kam fãa bũmb sẽn yaa sõng na n kell n yɩɩ a mengã rẽnda. La sẽn yaa bũmb ning fãa la ned kõ maan-kʋʋdã, na n yɩɩ maan-kʋʋdã rẽnda.’”

11 A Zeova kell n goma ne a Moyiiz n yeele: 12 “Gom ne Israyɛll nebã, n yeel-b yaa: ‘Pag sã n pa maan sɩd ne a sɩda, 13 tɩ rao a to kẽ ne-a+ t’a sɩdã pa bãnge, tɩ yellã kell n solge, rat n yeel tɩ pagã sã n dẽgma a meng tɩ kaset kae n wilgd rẽ, tɩ ned me pa yã-a, ad bũmb ning b sẽn segd n maane: 14 A sɩdã sã n maanda sũ-kiiri, t’a yamã yood a pagã sã n maanda sɩd ne-a, tɩ mik tɩ pagã sɩd rẽgma a menga, wall a sã n maanda sũ-kiir t’a yam yood a pagã sã n maanda sɩd ne-a, tɩ pagã yaool n pa rẽgem a menga, 15 raoã segd n talla pagã n wa maan-kʋʋdã nengẽ, n paas orz* zom efa pʋɩɩr a ye pʋɩ piig zugu,* tɩ yɩ kũun pagã yĩnga. A pa segd n walg kaam zomã zug wall a rogl wisd sẽn yaa pɛɛlg ye. Bala yaa kood biis kũun sũ-kiir yĩnga, kood biis kũun sẽn tẽegd ned taale.

16 “‘Maan-kʋʋdã na n talla pagã n kolge, n kɩt t’a yals a Zeova taoore.+ 17 Maan-kʋʋdã na n yãka ko-sõng n ning tãnd laag pʋgẽ, la a yõng tom sɛk-roogã pʋgẽ n ning koomã pʋgẽ. 18 Maan-kʋʋdã na n kɩtame tɩ pagã yals a Zeova taoore, t’a lok a zoobdã n base, la a rɩk tẽegr kood biis kũunã, rat n yeel tɩ kood biis kũun sũ-kiir yĩngã+ n ning pagã nusẽ. Maan-kʋʋdã na n zãada ko-toog sẽn wat ne kãab-wẽngã+ a nugẽ.

19 “‘Rẽ poore, maan-kʋʋdã na n kɩtame tɩ pagã wẽene. A na n yeela pagã yaa: “Rao a to sã n pa kẽ ne foo, fo sẽn be f sɩdã nugẽ wã tɛka,+ la fo sã n pa yi n dẽgem f menga, bɩ ko-toogã sẽn wat ne kãab-wẽngã ra maan foo wẽng ye. 20 La fo sẽn be f sɩdã nugẽ wã tɛka, fo sã n yi n dẽgma f menga, n kẽ ne rao a to+ n zʋʋg f sɩdã . . .” 21 Maan-kʋʋdã na n kɩtame tɩ pagã wẽene,* la a yeel pagã yaa: “Bɩ a Zeova kɩt tɩ f gerã* faage,* la a kɩt tɩ f pʋgã wuki, t’a Zeova kɩt tɩ fo nin-buiidã sʋka, ned sã n na n kãab wẽng la a wẽene, bɩ a pʋd fo yʋʋrã. 22 Ko-kãngã sẽn wat ne kãab-wẽngã na n kẽe fo yãadẽ wã n kɩt tɩ f pʋgã wuki, la a kɩt tɩ f gerã* faage.”* La pagã segd n deesdame tɩ “Ãmiina! Ãmiina!”*

23 “‘Rẽ poore, maan-kʋʋdã segd n gʋlsa kãab-wẽn-kãensã sebr zugu, n pek-b ko-toogã pʋgẽ. 24 A na n kɩtame tɩ pagã yũ ko-toogã sẽn wat ne kãab-wẽngã, la koomã sẽn wat ne kãab-wẽngã na n kẽe pagã pʋgẽ n wa ne toog pagã zugu. 25 Maan-kʋʋdã segd n deega kood biis kũun sũ-kiir yĩngã+ pagã nugẽ, n yuum poorẽ la taoor a Zeova taoore, la a tall n kolg tẽn-kugrã. 26 Maan-kʋʋdã na n yãka kood biis kũunã nug-pidung tɩ makd kũunã tõre, n yõog-a bugum tẽn-kugrã zug+ t’a bug-zõosã nusi. Rẽ poore, a na n kɩtame tɩ pagã yũ koomã. 27 A sã n kɩt tɩ pagã yũ koomã, tɩ mik tɩ pagã rẽgma a meng la a maan yel-wẽnd n pa maan sɩd ne a sɩdã, koomã sẽn wat ne kãab-wẽngã na n kẽe a pʋgẽ wã, n lebg bũmb sẽn yaa toogo. A pʋgã na n wukame, t’a gerã* me faage,* t’a nin-buiidã sʋk ned sã n na n kãab wẽnga, bɩ a pʋd a yʋʋrã. 28 La sã n mik tɩ pagã pa rẽgem a meng n yaa yɩlemde, a na n põsa sɩbg-kãngã. A na n tõog n dɩka pʋg n dog kamba.

29 “‘Woto yaa tõog sũ-kiir wɛɛngẽ,+ pag sã n wa yi n dẽgem a meng n yaool n be a sɩdã nugẽ, 30 wall rao sã n maand sũ-kiiri, t’a yam yood a pagã sã n maanda sɩd ne-a. A segd n kɩtame t’a pagã yals a Zeova taoore, tɩ maan-kʋʋdã maan wa sẽn zems no-kãensã. 31 Taal pa na n zĩnd raoã zug ye. La b na n sɩbga a pagã a sẽn tar taalã yĩnga.’”

6 A Zeova le goma ne a Moyiiz n yeele: 2 “Gom ne Israyɛll nebã n yeel-b yaa: ‘Rao bɩ pag sã n pʋlem t’a na n yɩɩ Nazireyẽ*+ a Zeova yĩnga, 3 a segd n zãaga a meng ne divẽ la rãam buud fãa. A pa segd n yũ divẽ-miisga, bɩ rãam buud fãa sẽn yaa miisg ye.+ A pa segd n yũ viyn biis koom, bɩ n wãb viyn biisi, tɩ yaa maas wall koeems ye. 4 Sasa nins fãa a sẽn na n yɩ Nazireyẽ wã, a pa segd n dɩ bũmb b sẽn maan ne viyn biisi, tɩ yaa ne a bi-kãsã wall ne a pagdã la b tall n maan ye.

5 “‘A sẽn pʋlem t’a na n yɩɩ Nazireyẽ wã tɛka, barg pa segd n sɩɩs a zugã ye.+ A segd n kell n yɩɩ sõngo, n bas a zoobdã tɩ yi wʋsg n tãag wakat ning a sẽn welg a meng toor a Zeova yĩngã sẽn na n pidi. 6 A sẽn welg a meng toor a Zeova yĩngã sasa, a pa segd n pẽneg ned* sẽn ki ye. 7 Baa a ba bɩ a ma wall a ba-bi-raoog pa rẽ bɩ a ba-bi-poak sã n maan kaalem, a pa segd n dẽgem a meng ye.+ Bala bãnd ning sẽn wilgd t’a yaa Nazireyẽ a Wẽnnaamã yĩngã bee a zugẽ wã.

8 “‘Sasa nins fãa a sẽn yaa Nazireyẽ wã, a yaa sõng a Zeova yĩnga. 9 La ned sã n tiig n ki a sɛɛgẽ+ tɩ kɩt t’a rẽgem a zoobdã sẽn makd a sẽn welg toor Wẽnnaam yĩngã,* a segd n põnga a zugã+ daar ning a sẽn na n yɩlg a mengã. A segd n põnga a zugã rasem a yopoe-n-soabã. 10 Rasem a nii-n-soabã, a segd n talla wal a yiib bɩ marwan-bi a yiib n wa kõ maan-kʋʋdã sɛk-roogã rignoorẽ. 11 Maan-kʋʋdã na n dɩka a ye tɩ yɩ yel-wẽnd maoongo, la a rɩk a to wã tɩ yɩ maoong sẽn yõogd bugum, n maan paasg* a yĩnga, a yel-wẽndã yĩnga,+ bala a rẽgma a meng ne ned* sẽn ki. Rẽ poore, a segd n yɩlga a meng* daar-n-kãnga. 12 A segd n le welga a meng toor a Zeova yĩnga, sasa nins fãa a sẽn na n yɩ Nazireyẽ wã. A na n talla pe-ra-poll sẽn pa yɩɩd yʋʋmd n wa kõ tɩ yɩ taal maoongo. La b pa na n geelg ray nins sẽn loogã ye. Bala a rẽgma a meng a sẽn da yaa Nazireyẽ wã sasa.

13 “‘Ad noor ned sẽn yaa Nazireyẽ wɛɛngẽ: Wakat ning a sẽn yãk n na n yɩ Nazireyẽ wã sã n wa pidi,+ b na n tall-a lame n wa sɛk-roogã rignoorẽ. 14 Yaa beenẽ la a segd n kõ a Zeova a maoongã: Yaa pe-ra-poll sẽn pa yɩɩd yʋʋmd la sẽn pa tar zang tɩ yɩ maoong sẽn yõogd bugum,+ pe-yãang sẽn pa yɩɩd yʋʋmd la sẽn pa tar zang tɩ yɩ yel-wẽnd maoongo,+ pe-raoog sẽn pa tar zang tɩ yɩ zems-n-taar maoongo,+ 15 bur sẽn pa ning rabɩll la sẽn yaa gils wa maanf n kalem kaam n be yaag pʋgẽ, bur-pakls sẽn pa ning rabɩll n mes kaam, ne b kood biis kũuni,+ la b divẽ kũuni.+ 16 Maan-kʋʋdã na n tall n waa a Zeova taoore, n maan yel-wẽnd maoong la maoong sẽn yõogd bugum a soabã yĩnga. 17 Maan-kʋʋdã na n kõo a Zeova pe-raoogã tɩ yɩ zems-n-taar maoongo, ne bur sẽn pa ning rabɩllã ne yaagã, la a paas maoongã kood biis kũunã,+ ne a divẽ kũunã.

18 “‘Rẽ poore, Nazireyẽ wã segd n põnga a zoobdã a sẽn da basã*+ sɛk-roogã rignoorẽ, la a wʋk a zoobdã sẽn da yi wʋsg a sẽn wa n yaa Nazireyẽ wã, n los bugmã sẽn be zems-n-taar maoongã tẽngrã pʋgẽ. 19 Maan-kʋʋdã segd n yãka pe-raoogã bãok a ye b sẽn dʋgã,+ la a yãk bur sẽn pa ning rabɩll la sẽn yaa gils wa maanfã a ye yaagã pʋgẽ, n paas bur-pakls sẽn pa ning rabɩllã a ye n ning Nazireyẽ wã nusẽ. Yaa a sẽn põng bãndã sẽn wilgd t’a yaa Nazireyẽ wã poor la a segd n maan woto. 20 Maan-kʋʋdã segd n yuuma rẽ poorẽ la taoor tɩ yɩ kũun b sẽn yuumd a Zeova taoore.+ B na n kõo maan-kʋʋdã rẽ tɩ yɩ a pʋɩɩre. Yaa bũmb sẽn yaa sõngo, tɩ b na n kõ maan-kʋʋdã. Maoong b sẽn yuumdã yãoogã ne pʋɩɩr sẽn yaa sõngã gerã me yaa maan-kʋʋdã rẽnda.+ Rẽ poore, Nazireyẽ wã tõe n le yũu divẽ.

21 “‘Ad noor Nazireyẽ+ sẽn maan pʋleng wɛɛngẽ: Nazireyẽ sã n pʋlem t’a na n kõo a Zeova maoongo, n tõe n kõ tɩ yɩɩg bũmb nins Nazireyẽ sẽn segd n kõ, a segd n pidsa a pʋlengã tɩ zems ne noor ning Nazireyẽ sẽn segd n tũ wã.’”

22 Rẽ poore, a Zeova yeela a Moyiizi: 23 “Yeel a Aarõ ne a kom-dibli wã yaa: ‘Ad yãmb sẽn segd n ning Israyɛll nebã bark+ to-to. Yeel-y-b yaa:

24 “Bɩ a Zeova ning yãmb bark+ la a kogl-yã.

25 Bɩ a Zeova kɩt t’a nengã vẽenem yãg yãmb zugu,+ la bɩ a maan-y neere.

26 Bɩ a Zeova zẽk a neng n tees yãmba, la a kɩt tɩ y zĩnd ne laafɩ.”’+

27 B segd n ninga mam yʋʋrã Israyɛll nebã zutu,+ tɩ m ning-b barka.”+

7 Daar ning a Moyiiz sẽn tilg sɛk-roogã n sa wã,+ a zae-a-la kaam+ la a kɩt t’a lebg sõngo. Yaa sɛk-roogã ne a teedã fãa, la tẽn-kugrã ne a teedã fãa.+ A sẽn wa n zae bõn-kãens fãa kaam la a kɩt tɩ b lebg sõamyã poore,+ 2 Israyɛll nanambsã+ sẽn yaa b buudã rot taoor dãmbã kõo kũuni. Buudã nanamb-kãens sẽn lʋɩ taoor nebã yʋyã gʋlsg sasa wã 3 talla niis sarɛt-rãmb a yoob sẽn pili, ne lols piig la a yiib n wa a Zeova taoore: Nanambs a yiib fãa waa ne niis sarɛt a yembre, tɩ naab fãa wa ne loalga.* B talla bõn-kãens n wa sɛk-roogã noore. 4 A Zeova yeela a Moyiiz yaa: 5 “Reeg bõn-kãensã b sẽn tall n wa wã, bala b na n tar-b lame n tʋmd sɛk-roogã tʋʋma. Fo segd n dɩk-b lame n kõ Levi buudã nebã, ned kam fãa wa sẽn zems tʋʋmd ning a sẽn tʋmde.”

6 Dẽ, a Moyiiz reega sarɛt-rãmbã ne niisã n kõ Levi buudã nebã. 7 A kõo Gɛrson buudã neb niis sarɛt-rãmb a yiibu, la lols a naase, wa sẽn zems tʋʋmd ning b sẽn tʋmdã.+ 8 A kõo Merari buudã neb niis sarɛt-rãmb a naase, ne niis a nii, wa sẽn zems tʋʋmd ning b sẽn tʋmdã. Yaa maan-kʋʋd a Aarõ biig a Itamaar n get bãmb fãa tʋʋmã yelle.+ 9 La a pa kõ Kehat buudã neb bũmb ye. Bala b ra zɩta teed nins b sẽn tar n tʋmd zĩ-sõngẽ wã,+ n da palgd bõn-kãens b bãgdẽ.+

10 B sẽn dɩk tẽn-kugrã n kõ Wẽnnaamã daare,+ rat n yeel tɩ daar ning b sẽn zae-a kaamã, nanambsã le waa ne kũuni. B sẽn wa ne b kũunã tẽn-kugrã taoorã, 11 a Zeova yeela a Moyiiz yaa: “Naab fãa na n waa ne a kũunã tẽn-kugrã rɩk n kõ Wẽnnaamã yĩnga, ned kam fãa ne a daare.”

12 Naab ning sẽn wa ne a kũunã pipi daarã yɩɩ a Aminadaab biig a Naasõ+ sẽn yaa Zida buudã nedã. 13 A kũunã yɩɩ wanzuri laag zɩslem sẽn yaa sɩkl* koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.*+ Laag fãa pida ne zom-bãaneg sẽn kalem kaam, kood biis kũun+ yĩnga, 14 sãnem wũmbl zɩslem sẽn yaa sɩkl piiga, n pid ne wisdu, 15 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 16 boɛɛg sẽn yaa poll a ye, yel-wẽnd maoong+ yĩnga, 17 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Aminadaab+ biig a Naasõ kũunã.

18 Rasem a yiib-n-soabã, a Zuwaar biig a Netanɛll+ sẽn yaa Isakaar buudã naabã waa ne kũuni. 19 A kũunã yɩɩ wanzuri laag zɩslem sẽn yaa sɩkl koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.+ Laag fãa pida ne zom-bãaneg sẽn kalem kaam, kood biis kũun+ yĩnga, 20 sãnem wũmbl zɩslem sẽn yaa sɩkl piiga, n pid ne wisdu, 21 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 22 boɛɛg sẽn yaa poll a ye, yel-wẽnd maoong+ yĩnga, 23 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Zuwaar biig a Netanɛll kũunã.

24 Rasem a tãab-n-soabã, a Helon biig a Eliyaab+ sẽn yaa Zabulõ buudã naabã 25 waa ne a kũunã. Yɩɩ wanzuri laag zɩslem sẽn yaa sɩkl koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.+ Laag fãa pida ne zom-bãaneg sẽn kalem kaam, kood biis kũun+ yĩnga, 26 sãnem wũmbl zɩslem sẽn yaa sɩkl piiga, n pid ne wisdu, 27 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 28 boɛɛg sẽn yaa poll a ye, yel-wẽnd maoong+ yĩnga, 29 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Helon biig a Eliyaab+ kũunã.

30 Rasem a naas-n-soabã, a Sedewuur biig a Elisʋʋr+ sẽn yaa Rubɛn buudã naabã 31 waa ne a kũunã. Yɩɩ wanzuri laag zɩslem sẽn yaa sɩkl koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.+ Laag fãa pida ne zom-bãaneg sẽn kalem kaam, kood biis kũun+ yĩnga, 32 sãnem wũmbl zɩslem sẽn yaa sɩkl piiga, n pid ne wisdu, 33 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 34 boɛɛg sẽn yaa poll a ye, yel-wẽnd maoong+ yĩnga, 35 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Sedewuur biig a Elisʋʋr+ kũunã.

36 Rasem a nu soabã, a Zurisadayi biig a Selumiyɛll+ sẽn yaa Sɩmeyõ buudã naabã 37 waa ne a kũunã. Yɩɩ wanzuri laag zɩslem sẽn yaa sɩkl koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.+ Laag fãa pida ne zom-bãaneg sẽn kalem kaam, kood biis kũun+ yĩnga, 38 sãnem wũmbl zɩslem sẽn yaa sɩkl piiga, n pid ne wisdu, 39 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 40 boɛɛg sẽn yaa poll a ye, yel-wẽnd maoong+ yĩnga, 41 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Zurisadayi biig a Selumiyɛll+ kũunã.

42 Rasem a yoob-n-soabã, a Dewuwɛll biig a Eliyazaf+ sẽn yaa Gaad buudã naabã 43 waa ne a kũunã. Yɩɩ wanzuri laag zɩslem sẽn yaa sɩkl koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.+ Laag fãa pida ne zom-bãaneg sẽn kalem kaam, kood biis kũun+ yĩnga, 44 sãnem wũmbl zɩslem sẽn yaa sɩkl piiga, n pid ne wisdu, 45 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 46 boɛɛg sẽn yaa poll a ye, yel-wẽnd maoong+ yĩnga, 47 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Dewuwɛll biig a Eliyazaf+ kũunã.

48 Rasem a yopoe-n-soabã, a Amiwuud biig a Elisama+ sẽn yaa Efrayim buudã naabã 49 waa ne a kũunã. Yɩɩ wanzuri laag zɩslem sẽn yaa sɩkl koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.+ Laag fãa pida ne zom-bãaneg sẽn kalem kaam, kood biis kũun+ yĩnga, 50 sãnem wũmbl zɩslem sẽn yaa sɩkl piiga, n pid ne wisdu, 51 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 52 boɛɛg sẽn yaa poll a ye, yel-wẽnd maoong+ yĩnga, 53 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Amiwuud biig a Elisama+ kũunã.

54 Rasem a nii-n-soabã, a Pedasʋʋr biig a Gamaliyɛll+ sẽn yaa Manase buudã naabã 55 waa ne a kũunã. Yɩɩ wanzuri laag zɩslem sẽn yaa sɩkl koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.+ Laag fãa pida ne zom-bãaneg sẽn kalem kaam, kood biis kũun+ yĩnga, 56 sãnem wũmbl zɩslem sẽn yaa sɩkl piiga, n pid ne wisdu, 57 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 58 boɛɛg sẽn yaa poll a ye, yel-wẽnd maoong+ yĩnga, 59 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Pedasʋʋr biig a Gamaliyɛll+ kũunã.

60 Rasem a wɛ soabã, a Gideoni biig a Abidan+ sẽn yaa Bẽnzame buudã naabã+ 61 waa ne a kũunã. Yɩɩ wanzuri laag zɩslem sẽn yaa sɩkl koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.+ Laag fãa pida ne zom-bãaneg sẽn kalem kaam, kood biis kũun+ yĩnga, 62 sãnem wũmbl zɩslem sẽn yaa sɩkl piiga, n pid ne wisdu, 63 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 64 boɛɛg sẽn yaa poll a ye, yel-wẽnd maoong+ yĩnga, 65 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Gideoni biig a Abidan+ kũunã.

66 Rasem piig soabã, a Amisadayi biig a Ahiyezɛɛr+ sẽn yaa Dan buudã naabã 67 waa ne a kũunã. Yɩɩ wanzuri laag zɩslem sẽn yaa sɩkl koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.+ Laag fãa pida ne zom-bãaneg sẽn kalem kaam, kood biis kũun+ yĩnga, 68 sãnem wũmbl zɩslem sẽn yaa sɩkl piiga, n pid ne wisdu, 69 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 70 boɛɛg sẽn yaa poll a ye, yel-wẽnd maoong+ yĩnga, 71 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Amisadayi biig a Ahiyezɛɛr+ kũunã.

72 Rasem piig la a ye soabã, a Okran biig a Pagiyɛll+ sẽn yaa Asɛɛr buudã naabã 73 waa ne a kũunã. Yɩɩ wanzuri laag zɩslem sẽn yaa sɩkl koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.+ Laag fãa pida ne zom-bãaneg sẽn kalem kaam, kood biis kũun+ yĩnga, 74 sãnem wũmbl zɩslem sẽn yaa sɩkl piiga, n pid ne wisdu, 75 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 76 boɛɛg sẽn yaa poll a ye, yel-wẽnd maoong+ yĩnga, 77 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Okran biig a Pagiyɛll+ kũunã.

78 Rasem piig la a yiib-n-soabã, a Enan biig a Ahira+ sẽn yaa Naftali buudã naabã 79 waa ne a kũunã. Yɩɩ wanzuri laag zɩslem sẽn yaa sɩkl koabg la pis-tã, la wanzuri la-bil zɩslem sẽn yaa sɩkl pis-yopoe, wa sẽn zems zĩ-sõngã sɩklã.+ Laag fãa pida ne zom-bãaneg sẽn kalem kaam, kood biis kũun+ yĩnga, 80 sãnem wũmbl zɩslem sẽn yaa sɩkl piiga, n pid ne wisdu, 81 lol-poll a yembre, pe-raoog a yembre, la pe-bil sẽn pa yɩɩd yʋʋmd n yaa raoogo, maoong sẽn yõogd bugum+ yĩnga, 82 boɛɛg sẽn yaa poll a ye, yel-wẽnd maoong+ yĩnga, 83 n paas niis a yiibu, pe-raad a nu, boees a nu la pe-bi a nu sẽn pa yɩɩd yʋʋmd n yaa raado, zems-n-taar maoong+ yĩnga. Rẽ n yɩ a Enan biig a Ahira+ kũunã.

84 Woto n yɩ kũun ning Israyɛll nanambsã sẽn kõ, tẽn-kugrã rɩk n kõ Wẽnnaamã yĩnga,+ wakat ning b sẽn zae-a kaamã: Yɩɩ wanzuri laas piig la a yiibu, wanzuri la-bõoneg piig la a yiibu, sãnem wũmbli piig la a yiibu.+ 85 Wanzuri laag fãa zɩslem yaa sɩkl koabg la pis-tã, tɩ la-bil fãa zɩslem yaa sɩkl pis-yopoe. Laasã fãa wanzuri wã zɩslem yaa sɩkl tus a yi la kobs-naase, wa sẽn zems zĩ-sõngã sɩklã.+ 86 Sãnem wũmbli piig la a yiibã sẽn pid ne wisdã wũmbl fãa zɩslem yaa sɩkl piiga, wa sẽn zems zĩ-sõngã sɩklã. Wũmbli wã sãnemã fãa zɩslem yaa sɩkl koabg la pisi. 87 Maoong sẽn yõogd bugmã rũmsã fãa yɩɩ lols piig la a yiibu, pe-raad piig la a yiibu, pe-bi piig la a yiib sẽn pa yɩɩd yʋʋmde, n paas b kood biis kũunã, la boees piig la yiib sẽn yaa poal yel-wẽnd maoong yĩnga. 88 Zems-n-taar maoongã rũmsã fãa yɩɩ lols pisi la a naase, pe-raad pis-yoobe, boees pis-yoobe, la pe-bi pis-yoob sẽn yaa raado, n pa yɩɩd yʋʋmde. Woto n yɩ tẽn-kugrã rɩk n kõ Wẽnnaamã kũuni,+ b sẽn zae tẽn-kugrã kaamã+ poore.

89 A Moyiiz sã n da kẽ sɛk-roogẽ wã n na n gom ne Wẽnnaam+ fãa, a ra wʋmda koɛɛgã sẽn yit Kaset koglgã limd+ zugu, seribẽ-rãmb+ a yiibã sʋk n sõsd ne-a. Woto la Wẽnnaam da gomd ne-a.

8 A Zeova goma ne a Moyiiz n yeele: 2 “Gom ne a Aarõ n yeel-a yaa: ‘Fo sã n wa yõgen fɩtl-dãmbã, fɩtl-dãmb a yopoe wã segd n vẽnega zĩig ning sẽn be fɩtl-doagendgã+ taoorã.’” 3 A Aarõ maana woto. A yõgna fɩtl-dãmbã sẽn na yɩl tɩ vẽneg zĩig ning sẽn be fɩtl-doagendgã+ taoorã, wa a Zeova sẽn da yeel a Moyiizã. 4 Ad b sẽn maan fɩtl-doagendgã to-to: Ra yaa bũmb b sẽn kud ne sãnem. B kuda+ a naoorã n tãag a puudã. B maana fɩtl-doagendgã wa sẽn zems a Zeova sẽn vẽneg+ a Moyiiz t’a yã bũmb ningã.

5 A Zeova le goma ne a Moyiiz n yeel yaa: 6 “Welg Levi buudã neb Israyɛll nebã sʋka, n yɩlg-ba.+ 7 Ad fo sẽn segd n yɩlg-b to-to: Mes-b koom sẽn yiisd yel-wẽna. B segd n põnga b yĩngã tõr ne barga, n peg b futã la b yɩlg b mense.+ 8 Rẽ poore, b na n waa ne lol-poll+ ne a kood biis kũun+ sẽn yaa zom-bãaneg sẽn kalem ne kaam, tɩ fo-me wa ne lol-poll a to yel-wẽnd maoong+ yĩnga. 9 Fo segd n talla Levi buudã neb n wa sɛk-roogã taoore, la f tigim Israyɛll nebã fãa.+ 10 Fo sã n wa tall Levi buudã neb n wa a Zeova taoore, Israyɛll nebã segd n tika Levi buudã neb+ ne b nusi. 11 A Aarõ segd n dɩka Levi buudã neb n kõ* tɩ yɩ Israyɛll nebã kũun b sẽn yuumd+ a Zeova taoore. Dẽ, b na n tʋmda a Zeova tʋʋmdã.+

12 “Levi buudã neb na n tika lolsã zutã+ ne b nusi. Loalg a yembr segd n yɩɩ yel-wẽnd maoongo, t’a to wã yɩ maoong sẽn yõogd bugum b sẽn kõ a Zeova sẽn na yɩl n maan paasg*+ Levi buudã neb yĩnga. 13 Fo na n kɩtame tɩ Levi buudã neb yaas a Aarõ ne a kom-dibli wã taoore, tɩ f rɩk-b n kõ* tɩ yɩ kũun b sẽn yuumd a Zeova yĩnga. 14 Fo segd n welga Levi buudã neb Israyɛll nebã sʋka, tɩ b lebg mam dẽnda.+ 15 Rẽ poore, Levi buudã neb na n waa sɛk-roogẽ wã n tʋme. Yaa woto la fo segd n yɩlg-ba, la f rɩk-b n kõ* tɩ yɩ kũun b sẽn yuumdi. 16 Bala b yaa neb b sẽn dɩk n kõ, rat n yeel tɩ neb b sẽn yãk Israyɛll nebã sʋk n kõ maam. Mam na n deeg-b lame tɩ b yɩ mam dẽnda, n ledg Israyɛll nebã kom-dẽemsã fãa.+ 17 Bala bi-rẽeng fãa sẽn be Israyɛll nebã sʋk yaa maam n so, tɩ yaa ninsaal biig wall rũng biiga.+ Daar ning mam sẽn kʋ Ezɩpt soolmã kom-dẽemsã fãa wã,+ mam welg-b-la toor mam mengã yĩnga. 18 Mam na n dɩka Levi buudã neb n ledg kom-dẽems nins fãa sẽn be Israyɛll nebã sʋkã. 19 Mam na n dɩka Levi buudã neb n kõ a Aarõ ne a kom-dibli wã, tɩ b yɩ neb b sẽn yãk Israyɛll nebã sʋk n kõ, sẽn na yɩl tɩ b tʋmd sɛk-roogẽ wã+ Israyɛll nebã yĩnga, la b maand paasg Israyɛll nebã yĩnga. Dẽ, yel-beed kõn zĩnd Israyɛll nebã sʋka,+ Israyɛll nebã sẽn kolg zĩ-sõngã yĩng ye.”

20 A Moyiiz ne a Aarõ la Israyɛll nebã fãa maana Levi buudã neb woto. Israyɛll nebã maan-b-la woto, tɩ zems bũmb nins fãa a Zeova sẽn da yeel a Moyiiz Levi buudã neb wɛɛngẽ wã. 21 Levi buudã neb yɩlga b mens la b peg b futã.+ Rẽ poore, a Aarõ rɩk-b lame n kõ* tɩ yɩ kũun b sẽn yuumd a Zeova taoore,+ la a maan paasg b yĩnga, sẽn na yɩl n yɩlg-ba.+ 22 Rẽ zugẽ, Levi buudã neb waa sɛk-roogẽ wã n tʋm b tʋʋmdã, a Aarõ ne a kom-dibli wã taoore. B maana Levi buudã neb tɩ zems a Zeova sẽn da yeel a Moyiiz bũmb ning Levi buudã neb wɛɛngẽ wã.

23 A Zeova goma ne a Moyiiz n yeele: 24 “Ad noor Levi buudã neb yĩnga: Rao sẽn tar yʋʋm pisi la a nu n tar n dabd na n naaga neb nins sẽn tʋmd sɛk-roogẽ wã. 25 La a sã n wa yõsg yʋʋm pis-nu, a na n basa tʋʋmdã, n pa le naag tʋm-tʋmdbã ye. 26 A tõe n sõnga a saam-biisã sẽn tʋmd sɛk-roogẽ wã, la b pa segd n yãk tʋʋmd n kõ-a be ye. Yaa woto la fo segd n maane, Levi buudã neb ne b tʋʋmã wɛɛngẽ.”+

9 A Zeova goma ne a Moyiiz Sinayi we-raoogẽ wã, b sẽn yi Ezɩpt soolmẽ wã yʋʋm a yiib-n-soabã pipi kiuugã+ pʋgẽ, n yeele: 2 “Israyɛll nebã segd n segla Pakã maoongã+ wakat ning mam sẽn yãkã.+ 3 Ki-kãngã rasem piig la a naas-n-soabã zĩ-sobdo, yãmb segd n segl-a-la wakat ning mam sẽn yãkã. Yãmb segd n segl-a lame+ tɩ zems a noyã fãa la a minimdã fãa.”

4 Dẽ, a Moyiiz yeela Israyɛll nebã tɩ b segl Pakã maoongã. 5 B segla Pakã maoongã Sinayi we-raoogẽ wã, pipi kiuugã rasem piig la a naas-n-soabã zĩ-sobdo. Israyɛll nebã maana wa sẽn zems bũmb nins fãa a Zeova sẽn da yeel a Moyiizã.

6 La neb n da be be n sɩɩs kũum+ n lebg rẽgdo, n pa tõe n segl Pakã maoongã daar-n-kãng ye. Nin-kãens waa a Moyiiz la a Aarõ taoor daar-n-kãnga,+ 7 n yeel a Moyiiz yaa: “Tõnd yaa rẽgdo, bala d sɩɩsa kũum. Bõe yĩng tɩ b na n gɩdg tõnd tɩ d pa maan maoong Israyɛll nebã sʋk n kõ a Zeova wakat ning b sẽn yãkã?”+ 8 Rẽ la a Moyiiz yeel-b yaa: “Yaas-y ka, tɩ m kelg a Zeova sẽn na n kõ noor ning yãmb wɛɛngẽ.”+

9 Dẽ, a Zeova yeela a Moyiiz yaa: 10 “Yeel Israyɛll nebã yaa: ‘Baa yãmb sʋkã ned wall yãmb zãmaan-dãmb nins sẽn watã ned sã n sɩɩs kũum+ n lebg rẽgdo, wall a toga so-woko, a segd n segla Pakã maoongã a Zeova yĩnga. 11 Nin-kãens segd n segl-a-la kiuug a yiib-n-soabã+ rasem piig la a naas-n-soabã zĩ-sobdo. B segd n wãb-a-la ne bur sẽn pa ning rabɩlle, la zẽ-vãad sẽn yaa toogo.+ 12 B pa segd n bas a bũmb baa a ye tɩ vẽeg beoog ye.+ B pa segd n kaoog a kõbr baa a yembr ye.+ B segd n segl-a-la wa sẽn zems Pakã noyã fãa. 13 La ned sã n yaa yɩlemde, la a pa tog sor n yaool n maan yaal-yaal n pa segl Pakã maoongã, b segd n yiisa* nin-kãng* a buudã sʋka.+ Bala a pa maan maoongã n kõ maam a Zeova, wakat ning mam sẽn yãkã ye. B na n sɩbga nin-kãng a yel-wẽndã yĩnga.

14 “‘Sãan sã n be yãmb sʋka, yẽ me segd n segla Pakã maoongã a Zeova yĩnga.+ A segd n maana rẽ tɩ zems Pakã noyã la a minimdã.+ No-yɛng n segd n zĩnd yãmb yĩnga, rat n yeel tɩ sãambã ne tẽng-n-nebã fãa yĩnga.’”+

15 Sɛk-roogã tilgrã raare,+ sawadgã luda sɛk-roogã. La zaabr n tãag yibeoogo,+ sawadgã wita wa bugum Kasetã fu-roogã zugu. 16 Kell n yɩɩ woto wakat fãa: Wĩndga, sawadgã luta sɛk-roogã, tɩ yʋng bɩ sawadgã wit wa bugum.+ 17 Sawadgã sã n da zẽk n bas sɛk-roogã fãa, Israyɛll nebã yikda tao-tao n dɩk sore.+ Sawadgã sẽn tɩ yaas zĩig ninga, be la Israyɛll nebã tilgd b sik-zĩigã.+ 18 A Zeova n da kõt noor tɩ Israyɛll nebã yik n dɩk sore. Leb n da yaa a Zeova n kõt noor tɩ b tilg b sik-zĩigã.+ Sawadgã sẽn pa sɛk-roogã zug n kaoos to-to, bãmb me paada b sik-zĩigẽ wã n kaoos woto. 19 Sawadgã sã n pa sɛk-roogã zug rasem wʋsgo, Israyɛll nebã sakda a Zeova, n pa yik n dɩk sor ye.+ 20 Wakat ninga, sawadgã paada sɛk-roogã zug rasem a wãn bala. A Zeova n da kõt noor tɩ b kell n pa b sik-zĩigẽ wã. Leb n da yaa a Zeova n kõt noor tɩ b yik n dɩk sore. 21 Wakat ninga, sawadgã paada zaabr n tãag yibeoog bala. Sawadgã sã n wa zẽk yibeoogã, b yikdame n dɩk sore. Tɩ yaa wĩndg wall yʋng la sawadgã zẽk-yã, b yikdame n dɩk sore.+ 22 Sawadgã sã n pa sɛk-roogã zug rasem a yiibu, kiuug wall sẽn yɩɩd rẽ, a sẽn pa be n kaoos to-to fãa, Israyɛll nebã paada b sik-zĩigẽ wã, n pa yik n dɩk sor ye. La a sã n wa zẽke, b yikdame n dɩk sore. 23 A Zeova n da kõt noor tɩ Israyɛll nebã tilg b sik-zĩigã. Leb n da yaa a Zeova n kõt noor tɩ b yik n dɩk sore. B saka a Zeova noorã, noor ning a Zeova sẽn kɩt t’a Moyiiz taas-bã.

10 Rẽ poore, a Zeova yeela a Moyiiz yaa: 2 “Maan tãntãad+ a yiib f meng yĩnga. Kud-b ne wanzuri, n tar-b n tigimd nin-buiidã la f kɩtdẽ tɩ b yikd n dɩkd sore. 3 B sã n peeb tãntãad a yiibã, nin-buiidã fãa segd n tigma taab fo nengẽ, sɛk-roogã+ rignoorẽ. 4 Sã n yaa a ye bal la b peeb-yã, nanambsã sẽn yaa Israyɛll neb tusr-tusr taoor dãmbã bal n na n tigim taab fo nengẽ.+

5 “Yãmb sã n peeb tãntãoogã n maan tɩ rãamdã zẽkdẽ la sigda, neb nins sẽn tilg b sik-zĩigã yaang sẽnesã+ segd n yik n dɩka sore. 6 Yãmb sã n peeb tãntãoogã naoor a yiib-n-soab n maan tɩ rãamdã zẽkdẽ la sigda, neb nins sẽn tilg b sik-zĩigã goabg sẽnesã+ segd n yik n dɩka sore. B segd n peeba tãntãoogã woto, sull fãa sã n na n yik n dɩk sore.

7 “Yãmb sã n na n tigim nin-buiidã, yãmb segd n peeba tãntãadã,+ la y pa segd n maan tɩ rãamdã zẽkdẽ la sigd ye. 8 Yaa a Aarõ kom-dibli wã sẽn yaa maan-kʋʋdbã n segd n peebd tãntãadã.+ Tãntãadã peebg na n yɩɩ noor sẽn paad wakat fãa, yãmb zãmaan-dãmbã fãa pʋsẽ.

9 “Yãmb tẽngẽ wã, y sã n wa segd n zab ne bɛ sẽn weoogd yãmba, bɩ y peeb zabr peebgo.+ Woto, yãmb Wẽnnaam a Zeova na n tẽega y yelle, n fãag yãmb y bɛɛbã nusẽ.

10 “Sẽn paase, yãmb kɩdeng fãa sasa,+ rat n yeel tɩ y tigã+ la y ki-paalã sasa, yãmb segd n peeba tãntãadã, y sã n wa kõt y maand sẽn yõogd bugmã+ ne y zems-n-taar maandã.+ Tãntãadã peebg na n kɩtame tɩ yãmb Wẽnnaamã tẽeg y yelle. Mam yaa yãmb Wẽnnaam a Zeova.”+

11 Yʋʋm a yiib-n-soabã kiuug a yiib-n-soabã rasem pisi wã daare,+ sawadgã zẽk n basa Kasetã sɛk-roogã.+ 12 Dẽ, Israyɛll nebã yii Sinayi we-raoogẽ wã n looge. B looga pʋgdg-pʋgdg wa sẽn zems noor ning b sẽn kõ loogrã+ wɛɛngẽ wã. Sawadgã tɩ yaasa Paaran we-raoogẽ wã.+ 13 Rẽ n yɩ pipi b sẽn yik n dɩk sor wa sẽn zems noor ning a Zeova sẽn kɩt t’a Moyiiz taas-bã.+

14 Zida buudã sullã sẽn yaa buud a tãabã n deng n yik n dɩk sor ne b tãb-biis sulã.* A Aminadaab biig a Naasõ+ n da yaa Zida buudã sullã naaba. 15 A Zuwaar biig a Netanɛll+ n da yaa Isakaar buudã sullã naaba. 16 A Helon biig a Eliyaab+ n da yaa Zabulõ buudã sullã naaba.

17 B sẽn wa n siig sɛk-roogã,+ Gɛrson buudã neb+ ne Merari buudã neb+ sẽn zɩt sɛk-roogã rɩka sore.

18 Rẽ poore, Rubɛn buudã sullã sẽn yaa buud a tãabã yik n dɩka sor ne b tãb-biis sulã.* A Sedewuur biig a Elisʋʋr+ n da yaa Rubɛn buudã sullã naaba. 19 A Zurisadayi biig a Selumiyɛll+ n da yaa Sɩmeyõ buudã sullã naaba. 20 A Dewuwɛll biig a Eliyazaf+ n da yaa Gaad buudã sullã naaba.

21 Rẽ poore, Kehat buudã neb sẽn zɩt sɛk-roogã teedã+ rɩka sore. B segd n taame n mik tɩ sɛk-roogã zoe n tilgame.

22 Bãmb loogr poore, Efrayim buudã sullã sẽn yaa buud a tãabã yik n dɩka sor ne b tãb-biis sulã.* A Amiwuud biig a Elisama+ n da yaa Efrayim buudã sullã naaba. 23 A Pedasʋʋr biig a Gamaliyɛll+ n da yaa Manase buudã sullã naaba. 24 A Gideoni biig a Abidan+ n da yaa Bẽnzame buudã sullã naaba.

25 Sẽn na n pʋgle, Dan buudã sullã sẽn yaa buud a tãabã yik n dɩka sor ne b tãb-biis sulã.* Bãmb n da be sulã fãa poorẽ, n kogend-ba. A Amisadayi biig a Ahiyezɛɛr+ n da yaa Dan buudã sullã naaba. 26 A Okran biig a Pagiyɛll+ n da yaa Asɛɛr buudã sullã naaba. 27 A Enan biig a Ahira+ n da yaa Naftali buudã sullã naaba. 28 Ra yaa woto la Israyɛll nebã loogd pʋgdg-pʋgdg ne b tãb-biis sulã,* b sã n wa na n yik n dɩk sore.+

29 A Moyiiz yeela a Hobaab sẽn yaa a rɛɛmb a Rewuyɛll*+ sẽn yaa Madiyã nedã biigã yaa: “Tõnd dabda tẽng ning a Zeova sẽn yeel t’a na n kõo tõndã pʋgẽ.+ Bɩ f tũ tõndo,+ tɩ d na n maan-f-la neere, bala a Zeova pʋlma Israyɛll nebã bõn-sõma.”+ 30 La a leok-a lame yaa: “Mam pa na n tũ ye. Mam na n lebg n leba m tẽngẽ wã, m buudẽ wã.” 31 Rẽ la a Moyiiz yeel-a yaa: “M bõos tɩ f ra loog n bas-d ye. Bala fo mii zĩis nins tõnd sẽn tõe n tilg d sik-zĩigã we-raoogẽ wã. Fo tõe n wilga tõnd sore. 32 Fo sã n tũ tõndo,+ a Zeova sẽn wa n maan tõnd neer to-to fãa, tõnd me na n maana foo neer woto.”

33 Dẽ, b yii a Zeova tãngẽ wã,+ n sɩng kẽnd sẽn na n kaoos rasem a tãabo. Rasem a tãabã kẽnd sasa, a Zeova kaoolã koglg+ ra bee b taoore, n baood zĩig b sẽn na n vʋʋse.+ 34 B sã n wa yik n loogdẽ, wĩndgã tõre, a Zeova sawadgã+ bee b zugẽ wã.

35 B sã n da rɩk Koglgã n na n loog fãa, a Moyiiz yetame: “Zeova, yik-y-yã.+ Bɩ yãmb bɛɛbã sãeege, la bɩ sẽn kis-b yãmbã zoe yãmb taoore.” 36 La b sã n wa sikd Koglgã, a yetame: “Zeova, lebg-y n wa-y Israyɛll neb tus ka tɛkã nengẽ.”+

11 Nin-buiidã wa n sɩnga yẽgeng wʋsg a Zeova taoore. A Zeova sẽn wʋm dẽ wã, a sũurã puuga wʋsgo. A Zeova kɩtame tɩ bugum sig b zut n dɩ kẽer sik-zĩigã kɩrenga. 2 Nin-buiidã sẽn wa n sɩng yãbr n boond a Moyiizã, a yõka a Zeova sɛɛga,+ tɩ bugmã ki. 3 Dẽ, b pʋda zĩigã yʋʋr tɩ Tabeera,* bala a Zeova kɩtame tɩ bugum sig b zutu.+

4 Neb kʋʋngã sẽn naag*+ n da be b sʋkã wilgame tɩ b yaa yão-be-neba,+ tɩ Israyɛll nebã me le sɩng yãbr la b yetẽ: “Ãnda n na n kõ tõnd nemd tɩ d wãbe?+ 5 Tõnd tẽra d sẽn da wãbd zĩm Ezɩpt soolmẽ wã zaalmã, n paas kõnkõmbrã, pastɛkã, powaaro wã,* gɛba wã ne lay wã.+ 6 La masã tõnd* faagdame. D pa yãt bũmb a to n zʋʋg mannã ye.”+

7 Mannã+ ra yaa wa baninga,*+ n wõnd bedeliyʋm.* 8 Nin-buiidã ra saagda zĩig fãa n wʋkd mannã. B ra werd-a-la neerẽ, wall b tood-a teoog pʋgẽ, tɩ rẽ poor bɩ b rʋg-a rʋk pʋgẽ, pa rẽ bɩ b tall-a n maan bur-gilsi.+ A noosmã ra yaa wa bur sẽn maan ne sɩɩd la kaam. 9 Yʋngo, meenemã sã n wa sigd sik-zĩigẽ wã, mannã me sigda be.+

10 A Moyiiz wʋma zak fãa neb sẽn yãbde, tɩ ned fãa be a fu-roog noore. A Zeova sũurã puugame,+ t’a Moyiiz me sũur sãam wʋsgo. 11 Dẽ, a Moyiiz yeela a Zeova yaa: “Bõe yĩng tɩ fo nams f tʋm-tʋmdã? Bõe la mam maan tɩ kɩt tɩ mam pa ta fo yam, tɩ f na n kɩt tɩ m tʋk nin-kãensã fãa zɩɩbo?+ 12 Mam yaa nin-kãensã fãa ma bɩ? Yaa maam n dog-b la, tɩ fo na n yeel maam tɩ m dɩk-b n ning m yãoogẽ wa bi-yaool* sẽn zãad biig sẽn nan yẽsemde, n tɩ kẽes-b tẽng ning fo sẽn wẽen tɩ f na n kõo b yaab-rãmbã pʋgẽ?+ 13 Yɛ la m na n paam nemd n kõ nin-kãensã fãa? Bala b yãbda mam taoor wakat fãa la b yetẽ yaa: ‘Kõ tõnd nemd tɩ d wãbe!’ 14 Mam pa tõe n zã nin-kãensã fãa m yembr ye. Yɩɩda mam pãnga.+ 15 Sã n yaa woto la fo na n maan maam, bɩ m bõos tɩ f kʋ maam mas-masã.+ Mam sã n taa fo yam, bɩ f ra bas tɩ m le paam toog ye.”

16 A Zeova leoka a Moyiiz n yeele: “Yãk rap pis-yopoe Israyɛll kãsem-dãmbã sʋka, rap fo sẽn mi tɩ b yaa nin-buiidã kãsem-dãmb la b nanambse,+ n tall-b n wa sɛk-roogẽ wã, n kɩt tɩ b yaas be ne foo. 17 Mam na n sigame+ n gom ne foo,+ la m yãk m vʋʋsmã sẽn be fo zugã bilf+ n ning b zutu, sẽn na yɩl tɩ b sõngd foo n tʋkd nin-buiidã zɩɩbã, tɩ f ra tʋk-a f yembr ye.+ 18 Yeel nin-buiidã yaa: ‘Yɩlg-y y mens beoog yĩnga,+ tɩ y na n wãba nemdo. Bala yãmb yãbame t’a Zeova wʋme,+ la y yeele: “Ãnda n na n kõ tõnd nemd tɩ d wãbe? Tõnd sẽn da be Ezɩpt soolmẽ wã n são.”+ Sãmbg sẽn kae, a Zeova na n kõo yãmb nemd tɩ y wãbe.+ 19 Yãmb pa na n wãb-a daar-n-yɛnga, rasem a yi, rasem a nu, rasem piiga, wall rasem pisi ye. 20 Yaa kiuug tõr la y na n wãb-a, hal t’a wa yit y yõyẽ wã, la hal tɩ y yamã wa yi-a.+ Bala yãmb basa a Zeova, soab ning sẽn be yãmb sʋkã, n da yãbd a taoor la y yetẽ: “Bõe yĩng tɩ tõnd yi Ezɩpt soolmẽ wã?”’”+

21 T’a Moyiiz yeele: “Rap tus-kobs-yoob+ n be nin-buiid nins sʋk mam sẽn be wã. Baasgo, yãmb yeelame: ‘Mam na n kõ-b-la nemdo, tɩ sek b na wãb kiuug tõre’! 22 B sã n kood rũm-bõonegã ne rũm-bɛdã fãa, na sek-b sɩda? Wall b sã n yõg mogrã zĩmã fãa, na sek-b sɩda?”

23 Rẽ la a Zeova yeel a Moyiiz yaa: “A Zeova pa tõe n maan bõn-kãngã sɩda?+ Masã, fo na n yãa mam sẽn yeelã na n yɩɩme bɩ pa na n yɩ.”

24 Dẽ, a Moyiiz yiime n togs nin-buiidã a Zeova goamã. A yãka rap pis-yopoe nin-buiidã kãsem-dãmbã sʋka, n kɩt tɩ b karg n gũbg sɛk-roogã.+ 25 Rẽ poore, a Zeova siga sawadg pʋgẽ+ n gom ne-a,+ la a yãk a vʋʋsmã sẽn da be a zugã bilf+ n ning rap pis-yopoe wã ned kam fãa zugu. Wẽnnaam vʋʋsmã sẽn sig b zutã bala, b sɩngame n maand wa no-rɛɛsdba.*+ La rẽ poore, b pa le maan woto yɛs ye.

26 Rap nins b sẽn yãkã neb a yiib n da ket sik-zĩigẽ wã. B yʋyã la a Ɛldaad ne a Medaade. Wẽnnaam vʋʋsmã siga b zutu, b sẽn da naag neb nins yʋy b sẽn gʋlsã yĩnga. La b pa yi n kẽng sɛk-roogẽ wã ye. B sɩngame n maand wa no-rɛɛsdb sik-zĩigã pʋgẽ. 27 Bi-bɩɩg a ye n zoe n tɩ yeel a Moyiiz yaa: “A Ɛldaad ne a Medaad bee sik-zĩigẽ wã n maand wa no-rɛɛsdba!” 28 T’a Nun biig a Zozuwe+ sẽn yaa a Moyiiz sõangd hal a yãadmẽ wã yeel yaa: “M zu-soab a Moyiizi, gɩdg-y-ba!”+ 29 La a Moyiiz leok-a lame yaa: “Fo maanda sũ-kiir mam yĩng la? Ra maan sũ-kiir ye. Bala mam sẽn da rat yaa a Zeova nin-buiidã fãa sẽn na n yɩ no-rɛɛsdba, t’a Zeova ning a vʋʋsmã b zutu!” 30 Rẽ zugẽ, a Moyiiz lebg n leba sik-zĩigẽ wã ne Israyɛll kãsem-dãmbã.

31 Rẽ poore, sobg n yi a Zeova nengẽ zĩig pʋgẽ n fug n kãag kodens mogrã sẽnes n wa rʋʋg-b n gilg sik-zĩigã.+ Kodensã rʋra kɩreng a ye n tãag daar a yembr kẽnd la bala, la kɩreng a to wã me n tãag daar a yembr kẽnd la bala, n gilg sik-zĩigã fãa. B sẽn dʋrã zãntlem ra yaa na maan kãntɩɩg* a yiibu. 32 Daar-n-kãng ne a yʋngã tõre, la vẽkembeoogã fãa, nin-buiidã sõs n wʋka kodensã. Ned kae n wʋk tɩ pa ta homɛɛr* piig ye. B ra yɛdgd-b lame n gũbgd sik-zĩigã. 33 La nemdã sẽn wa n ket b noyẽ wã tɩ b nan pa wãbe, a Zeova sũurã puuga wʋsg ne nin-buiidã. A Zeova kʋʋ neb wʋsg+ nin-buiidã sʋka.

34 Dẽ, b pʋda zĩigã yʋʋr tɩ Kibrot-hataava,*+ bala yɩɩ be la b mum neb nins sẽn wilg tɩ b yaa yão-be-nebã.+ 35 Nin-buiidã yii Kibrot-hataava n dɩk Hazerot sore. B tɩ siga Hazerote.+

12 A Miryam ne a Aarõ wa n sɩnga a Moyiiz wɩdga, a sẽn kẽ kãadem ne Kuus pag ningã poorẽ. Bala a ra rɩka Kuus bi-pugl n maan a paga.+ 2 B ra yetame yaa: “Yaa ne a Moyiiz bal la a Zeova tũnugd ne n gomd bɩ? A pa tũnugd ne tõnd me n gomd sɩda?”+ La a Zeova ra kelgdame.+ 3 A Moyiiz yaool n da yaa sik-m-meng soab n yɩɩd neb nins fãa*+ sẽn be dũniyã zugã.

4 Zĩig pʋgẽ, a Zeova yeela a Moyiiz ne a Aarõ la a Miryam yaa: “Bɩ yãmb y tãabã yi n kẽng sɛk-roogẽ wã.” Dẽ, bãmb b tãabã yiime n kẽnge. 5 A Zeova siga sawadgã pʋgẽ,+ n yaas sɛk-roogã rignoorẽ, n bool a Aarõ ne a Miryam, tɩ b yiibã kolge. 6 Wẽnnaam yeelame: “M bõos tɩ y kelg mam goamã. A Zeova no-rɛɛs sã n da be yãmb sʋka, yaa vẽnegr pʋgẽ la m na n kɩt t’a bãng maam.+ Mam na n gomda ne-a zãmsd pʋgẽ.+ 7 La pa woto ne mam tʋm-tʋmd a Moyiiz ye! Mam dɩka m zakã fãa n bobl-a.*+ 8 Mam gomda ne-a neng ne nenga.+ Yaa vẽeneg-vẽeneg la m gomd ne-a, pa ne pagd ye. Maam a Zeova vẽnegda m meng ne-a t’a tõe n yã maam. Bõe yĩng tɩ yãmb pa zoe rabeem, n wɩd mam tʋm-tʋmd a Moyiizi?”

9 A Zeova sũurã puuga ne a Aarõ la a Miryam, t’a loog n bas-ba. 10 Sawadgã zẽkame n yi sɛk-roogã zugu. La gese! Wãood n yõk a Miryam t’a lebg pɛɛlg wa sa-lamdo.+ A Aarõ wẽnemdame n ges a Miryam, n mik tɩ wãood n yõk-a.+ 11 Tao-tao bala, a Aarõ yeela a Moyiiz yaa: “M zu-soaba, y sugri! M bõos tɩ y ra sɩbg-d yel-wẽn-kãngã poorẽ ye. Tõnd sẽn maan bũmb ningã yaa yalemdo. 12 M bõos tɩ y ra bas a Miryam t’a kell n yɩ wa bi-pɛɛlg sẽn dog kɩɩnga, t’a yĩngã zĩis kẽer põogã ye!” 13 A Moyiiz yõka a Zeova sɛɛg n yeel yaa: “M Wẽnnaam, m bõos tɩ y kɩt t’a paam laafɩ! Y sugri!”+

14 A Zeova leoka a Moyiiz yaa: “A ba wã sã n tʋbs a nengã kolkoodo, a kõn paam yãnd rasem a yopoe sɩda? Bɩ b yiis-a sik-zĩigã kɩreng rasem a yopoe.+ Rẽ poore, b tõe n le tall-a lame n wa.” 15 Dẽ, b yiisa a Miryam sik-zĩigã kɩreng rasem a yopoe yĩnga.+ La nin-buiidã pa yik n dɩk sore, n tãag b sẽn le wa n tall a Miryam n wa wã. 16 Rẽ zugẽ, nin-buiidã yii Hazerot+ n tɩ tilg b sik-zĩigã Paaran we-raoogẽ wã.+

13 A Zeova goma ne a Moyiiz n yeele: 2 “Tʋm rap tɩ b tɩ soos n ges Kanaã soolmã, tẽng ning mam sẽn na n kõ Israyɛll nebã. Fo segd n yãka rao a yembr buud fãa sʋka, tɩ b ned kam fãa yaa naab+ buudã pʋgẽ.”+

3 Dẽ, a Moyiiz tʋm-b lame tɩ b yi Paaran we-raoogẽ wã+ n looge, wa a Zeova sẽn yeelã. Rapã fãa ra yaa Israyɛll nebã taoor dãmba. 4 Ad b yʋyã: Rubɛn buudã pʋgẽ, yɩɩ a Zakʋʋr biig a Samuwa. 5 Sɩmeyõ buudã pʋgẽ, yɩɩ a Hoori biig a Safate. 6 Zida buudã pʋgẽ, yɩɩ a Yefune biig a Kalɛɛbe.+ 7 Isakaar buudã pʋgẽ, yɩɩ a Zozɛf biig a Yigalle. 8 Efrayim buudã pʋgẽ, yɩɩ a Nun biig a Ooze.+ 9 Bẽnzame buudã pʋgẽ, yɩɩ a Rafu biig a Palti. 10 Zabulõ buudã pʋgẽ, yɩɩ a Sodi biig a Gadiyɛlle. 11 Zozɛf buudã+ pʋgẽ, rat n yeel tɩ Manase buudã+ pʋgẽ, yɩɩ a Susi biig a Gadi. 12 Dan buudã pʋgẽ, yɩɩ a Gemali biig a Amiyɛlle. 13 Asɛɛr buudã pʋgẽ, yɩɩ a Mikayɛll biig a Setuure. 14 Naftali buudã pʋgẽ, yɩɩ a Vofsi biig a Naabi. 15 Gaad buudã pʋgẽ, yɩɩ a Maki biig a Gewuwɛlle. 16 Woto yaa rap nins a Moyiiz sẽn tʋm tɩ b tɩ soos n ges soolmã yʋya. A Moyiiz pʋda a Nun biig a Ooze t’a Zozuwe.*+

17 A Moyiiz sẽn wa n na n tʋm-b tɩ b tɩ soos n ges Kanaã soolmã, a yeel-b lame yaa: “Kẽng-y Negɛɛbe, tɩ rẽ poor bɩ y kẽng soolmã zĩig ning sẽn yaa tãensã.+ 18 Yãmb segd n tɩ gesa soolmã sẽn yaa to-to,+ la y ges neb nins sẽn be a pʋgẽ wã sã n tara pãng wall b pa tare, b sõorã sã n yaa bilf bɩ wʋsgo, 19 soolmã sã n yaa noog bɩ pa noogo, la tẽns nins pʋsẽ b sẽn be wã sã n gũbga lals bɩ pa gũbgi. 20 Bao-y n bãng-y soolmã sã n sakda kood bɩ pa sakde,+ la tɩɩs sã n bee be bɩ ka be. Yãmb segd n talla raoodo,+ n yãk soolmã tɩɩsã biis n zã n wa.” Wakat kãng ra yaa viyn tɩɩsã dẽenem biis sasa.+

21 Dẽ, b loogame n tɩ soos n ges soolmã, sẽn sɩng ne Zĩn we-raoogã+ n tãag Rewoob+ sẽn pẽ Lebo-hamatã.*+ 22 B sẽn ta Negɛɛbã, b kẽnga Ebrõ,+ tẽng ning pʋgẽ a Ahiman ne a Sesayi la a Talmayi+ sẽn yaa Anak nebã+ sẽn da be wã. Ebrõ tilga yʋʋm a yopoe nand tɩ b tilg Zowan sẽn be Ezɩpt soolmẽ wã. 23 B sẽn wa n ta Ɛskoll longẽ*+ wã, b kɛɛga viyn tɩɩg will a ye sẽn tar viyn biis gĩndi, tɩ yɩ tɩlɛ tɩ b sʋkã neb a yiib rɩk-a ne rasaare. B yãgsa gernaad-dãmb ne kankam+ me. 24 B pʋda zĩigã yʋʋr tɩ Ɛskoll* longo,*+ viyn biis gĩndã Israyɛll nebã sẽn kɛɛg be wã yĩnga.

25 B tɩ soos n gesa soolmã n lebg n wa rasem pis-naas poore.+ 26 Dẽ, b lebg n waa a Moyiiz ne a Aarõ la Israyɛll nebã fãa nengẽ Kadɛɛse,+ Paaran we-raoogẽ wã. B wa n togsa nin-buiidã fãa bãmb sẽn yã bũmb ningã, la b wilg-b soolmã tɩɩsã biisi. 27 Ad b sẽn yeel a Moyiiz bũmb ningã: “Tõnd kẽnga soolem ning yãmb sẽn tʋm tõndã pʋgẽ. Sɩd yaa tẽng sẽn pid ne bĩisim la sɩɩdo.+ Wã yaa a tɩɩsã biisi.+ 28 La neb nins sẽn be soolmã pʋgẽ wã tara pãnga, tɩ galʋ-tẽns nins sẽn gũbgã me yaa bɛda. Sẽn paase, tõnd yãa Anak nebã be.+ 29 Amalɛk nebã+ bee Negɛɛb+ soolmẽ wã, tɩ Hɛt nebã, Zebuus nebã+ ne Amoor nebã+ be soolmã zĩig ning sẽn yaa tãensã. Kanaã nebã+ bee mogrã noore,+ la Zʋrdẽ kʋɩlgã wogelle.”

30 Dẽ, a Kalɛɛb makame n na n kɩt tɩ nin-buiidã sẽn yas a Moyiiz taoorã sĩndi, n yeele: “Bɩ d kẽng mas-masã. Tõnd kɩsa sɩd tɩ d na n deega soolmã, bala sãmbg kae tɩ d tõe n zab n deeg-a lame ye.”+ 31 La rap nins sẽn da tũ-a n kẽngã yeelame: “Tõnd pa tõe n tɩ zab ne nin-kãensã ye. Bala b pãngã yɩɩda tõndo.”+ 32 B kell n togsa Israyɛll nebã goam sẽn komsd raood+ soolem ning b sẽn tɩ soos n gesã wɛɛngẽ, n yetẽ: “Soolem ning tõnd sẽn soos n gilg n gesã yaa soolem sẽn dɩt a neba. Rap nins fãa tõnd sẽn yã wã yaa wogd wʋsgo.+ 33 Be, tõnd yãa Nefilim-dãmbã, rat n yeel tɩ Anak nebã+ sẽn yaa Nefilim-dãmbã yagensã. Tõnd sẽn yã-bã, tõnd lebga wa sʋy d mensã nifẽ. Yaa woto la bãmb me ra get tõndo.”

14 Nin-buiidã sẽn wʋm nanambsã sẽn yeel bũmb ninsã, b zẽka b koees n kaase, la b yãb yʋngã tõre.+ 2 Israyɛll nebã fãa sɩnga yẽgeng ne a Moyiiz la a Aarõ.+ Nin-buiidã fãa ra gomda bãmb n yetẽ yaa: “Tõnd sã n da ki Ezɩpt soolmẽ wã, wall d ra ki we-raoogẽ wã n são! 3 Bõe yĩng t’a Zeova tar tõnd n dabd soolem-kãng pʋgẽ tɩ b na n kʋ-d ne sʋʋse?+ B na n yõga tõnd kambã ne d pagbã n looge.+ D sẽn lebd Ezɩpt pa são sɩda?”+ 4 B ra yeta taab meng yaa: “Bɩ d yãk ned t’a lʋɩ tõnd taoore, tɩ d leb Ezɩpti!”+

5 Rẽ la a Moyiiz ne a Aarõ lʋɩ n fõgen b nens tẽnga, Israyɛll nin-buiidã fãa sẽn da tigim taabã taoore. 6 A Nun biig a Zozuwe,+ ne a Yefune biig a Kalɛɛb+ sẽn naag neb nins sẽn tɩ soos n ges soolmã pãrsa b futã, 7 la b yeel Israyɛll nin-buiidã fãa yaa: “Tẽng ning tõnd sẽn tɩ soos n gilg n gesã yaa tẽng sẽn yaa noog hal wʋsgo.+ 8 A Zeova sũur sã n noom ne tõndo, a na n talla tõnd n tɩ kẽes soolem-kãng pʋgẽ, n dɩk-a n kõ tõndo. Yaa tẽng sẽn pid ne bĩisim la sɩɩdo.+ 9 La yãmb pa segd n kɩɩs a Zeova ye. Y pa segd me n zoe soolmã nebã,+ bala tõnd na n tõog-b-la nana-nana.* B pa le paamd koglg ye. Sẽn paase, a Zeova bee ne tõndo.+ Ra zoe-y soolmã nebã ye.”

10 Baasgo, nin-buiidã fãa ra yetame tɩ b na n lob-b-la kuga.+ La a Zeova ziirã puka sɛk-roogã zugu, Israyɛll nebã fãa nifẽ.+

11 A Zeova yeela a Moyiiz yaa: “Nin-kãensã na n paooga maam n ta dabʋre?+ Hal tɩ ta dabʋr la b na n zãgs n pa tẽ maam, baa ne yel-soalem nins fãa mam sẽn maan b sʋkã?+ 12 Bas tɩ m kɩt tɩ bã-loangdg yõk-ba, tɩ b menem zãnga, la m kɩt tɩ fo lebg buud sẽn yaa kãseng la sẽn tar pãng n yɩɩd-ba.”+

13 La a Moyiiz yeela a Zeova yaa: “Sã n yɩ woto, Ezɩpt nebã, neb nins sʋk yãmb sẽn yiis nin-kãensã ne y pãngã na n wʋmame,+ 14 n gom rẽ yell ne Kanaã nebã. Bãmb me wʋmame tɩ yãmb a Zeova bee y nin-buiidã sʋka,+ la tɩ y vẽnega y meng ne bãmba, tɩ b yã-y neng ne nenga.+ Yãmb yaa a Zeova. Yãmb sawadgã bee b zugẽ, tɩ yãmb lʋɩt b taoor wĩndg ne sawadgã maasem, la yʋng ne bugum maasem.+ 15 Yãmb sã n kʋ nin-kãensã fãa wakat-yɛnga,* buud nins sẽn wʋm tɩ b gomd yãmb yellã na n yeelame yaa: 16 ‘A Zeova ra pa tõe n tall-b n tɩ kẽes soolem ning pʋgẽ a sẽn wẽen t’a na n kõ-b lame wã ye. Rẽ n so t’a kʋ-b we-raoogẽ wã.’+ 17 Y sugri, Zeova! Bɩ y pãngã yɩ kãsenga, wa y sẽn da yeelã. Y ra yeelame: 18 ‘Zeova, Wẽnnaam sũur sẽn pa yikd tao-tao, la sẽn pid ne maan-neere,+ sẽn kõt tudgr ne beegr sugri. Baasgo, a pa na n bas ned sẽn tar taal n pa sɩbg ye. A sɩbgda kamb la yagense, hal n tãag b zãmaan a tãab-n-soab ne a naas-n-soaba,+ b ba-rãmbã beegr yĩnga.’ 19 M bõos tɩ y kõ nin-buiidã sugr b kongrã yĩnga, yãmb maan-neerã sẽn yaa kãsengã yĩnga, wa yãmb sẽn kõ-b sugr hal Ezɩpt n tãag ka wã.”+

20 Dẽ, a Zeova yeelame: “Mam kõt-b-la sugr wa fo sẽn kosã.+ 21 La m wẽenda ne m mengã tɩ dũniyã fãa na n pida ne a Zeova ziirã.+ 22 Baa ne rẽ, neb nins sẽn yã mam ziirã ne m yel-soalmã+ mam sẽn maan Ezɩpt soolmẽ wã la we-raoogẽ wã, n baas n mak maam+ naoor wʋsgo,* la b pa kelg mam koɛɛgã+ 23 pa na n tol n yã soolem ning mam sẽn da wẽen tɩ m na n kõo b yaab-rãmbã ye. Nin-kãensã sẽn paoogd maamã baa a yembr pa na n yã-a ye.+ 24 La mam tʋm-tʋmd a Kalɛɛb+ sẽn tar yam sẽn yaa toore, la sẽn kell n tũ maam ne a sũur fãa wã yĩnga, mam na n tall-a lame n tɩ kẽes soolem ning a sẽn kẽngã pʋgẽ, t’a yagensã soog-a.+ 25 Sẽn mik tɩ Amalɛk nebã ne Kanaã nebã+ bee longẽ wã,* beoogo, yãmb segd n lebg n dɩka Mog-miuugã sore,+ n tees we-raoogã sẽnese.”

26 Rẽ poore, a Zeova yeela a Moyiiz ne a Aarõ yaa: 27 “Nin-kãensã sẽn yaa wẽnsã na n kell n yẽgma ne maam n ta dabʋre?+ Mam wʋma bũmb ning Israyɛll nebã sẽn yẽgemd ne maam n yetẽ wã.+ 28 Yeel-y-b yaa: ‘A Zeova yeelame: “Mam wẽenda ne m meng tɩ m na n maana yãmb wa mam sẽn wʋm tɩ y yetẽ wã!+ 29 Yãmb na n kii we-rao-kãngã pʋgẽ.+ Yaa yãmb sʋkã neb nins fãa sẽn tar yʋʋm pisi bɩ sẽn yɩɩd rẽ, tɩ b gʋls b yʋyã, rat n yeel tɩ yãmb fãa sẽn yẽgem ne maamã.+ 30 Yãmb ned baa a ye pa na n kẽ soolem ning mam sẽn wẽen* n yeel tɩ m na n kɩtame tɩ y zĩnd a pʋgẽ wã ye.+ Sã n pa a Yefune biig a Kalɛɛbe, n paas a Nun biig a Zozuwe bala.+

31 “‘“Yaa yãmb kambã y sẽn yeel tɩ b na n yõg n loogame wã+ la m na n kẽes soolmã pʋgẽ. Bãmb n na n bãng tẽng ning yãmb sẽn zãgsã.+ 32 La yãmb mensã na n kii we-rao-kãngã pʋgẽ. 33 Yãmb kambã na n lebga rũm-kɩɩmb we-raoogã pʋgẽ yʋʋm pis-naase.+ B segd n paama sɩbgr yãmb sẽn pa maan sɩdã* yĩnga, hal n tãag yãmb yaoolem soabã sẽn na n ki we-raoogẽ wã.+ 34 Yãmb sẽn tɩ soos n ges soolmã rasem pis-naasã,+ y na n paama sɩbgr y kongrã yĩng wa sẽn zems ra-kãens sõorã, rat n yeel tɩ yʋʋm pis-naase.+ Raar a ye na n maka yʋʋmd a ye. Woto, y na n bãnga mam kɩɩsg sẽn wat ne bũmb ninga.

35 “‘“Yaa maam a Zeova n yeele. Ad bũmb ning sẽn na n paam nin-kãensã sẽn yaa wẽnse, neb nins sẽn tigim taab n kɩɩs maamã: B yõyã na n saa we-rao-kãngã pʋgẽ, tɩ b ki ka.+ 36 Rap nins a Moyiiz sẽn tʋm tɩ b tɩ soos n ges soolmã tɩ b lebg n wa ne goam sẽn komsd raood soolmã wɛɛngẽ, tɩ kɩt tɩ nin-buiidã yẽgem ne-a wã,+ 37 nin-kãensã sẽn wa n togs goam sẽn komsd raood soolmã wɛɛngẽ wã na n paama sɩbgre, n ki a Zeova taoore.+ 38 La a Nun biig a Zozuwe ne a Yefune biig a Kalɛɛb sẽn naag neb nins sẽn tɩ soos n ges soolmã na n kell n vɩɩmdame.”’”+

39 A Moyiiz sẽn togs Israyɛll nebã fãa gom-kãensã wã, nin-buiidã maana sũ-sãang wʋsgo. 40 Sẽn paase, b yika yibeoogã pĩnda, n mak n na n dʋ tãngã, n yeele: “Ade! Tõnd segl n saame n na n kẽng zĩig ning yell a Zeova sẽn gomã, bala d maana yel-wẽnde.”+ 41 La a Moyiiz yeelame yaa: “Bõe yĩng tɩ yãmb kɩɩsd a Zeova noorã? Yãmb sẽn datã pa na n yãk neng ye. 42 Ra kẽng-y ye. Bala a Zeova pa be ne yãmb ye. Yãmb bɛɛbã na n tõog-y lame.+ 43 Amalɛk nebã ne Kanaã nebã bee be n na n zab ne yãmba.+ B na n kʋʋ yãmb ne sʋʋse. Yãmb sẽn bas a Zeova wã yĩnga, a Zeova pa na n zĩnd ne yãmb ye.”+

44 Baa ne rẽ, b maana tɩtaam n sɩng tãngã+ rʋʋbo, la a Zeova kaoolã koglg ne a Moyiiz kell n paa sik-zĩigẽ wã.+ 45 Dẽ, Amalɛk nebã ne Kanaã neb nins sẽn da be tãngẽ wã sigame n zab ne-ba, n dig-b n tãag hal Horma.+

15 A Zeova le goma ne a Moyiiz n yeele: 2 “Gom ne Israyɛll nebã n yeel-b yaa: ‘Yãmb sã n wa kẽ soolem ning mam sẽn na n kõ yãmb tɩ y zĩndã pʋgẽ,+ 3 n yãk rũng rũm-bɛdã wall rũm-bõonegã sʋk n na n maan maoong sẽn maand ne bugum n kõ a Zeova, sẽn na yɩl n maan bũmb sẽn tar yũ-noog* a Zeova yĩnga,+ tɩ yaa maoong sẽn yõogd bugum,+ maoong b sẽn maand pʋleng sẽn yaa toor zall yĩnga, yamleoog kũuni,+ wall y tigã+ sasa maoongo, 4 ned ning sẽn na n kõ maoongã segd n waa ne kood biis kũun me sẽn yaa zom-bãaneg+ n kõ a Zeova. Segd n yɩɩ zom-bãaneg efa pʋɩɩr a ye pʋɩ piig zug* sẽn kalem ne kaam hĩn* pʋɩɩr a ye pʋɩ a naas zugu. 5 Sẽn paase, maoong sẽn yõogd bugum+ bɩ pe-bil sẽn yaa raoog fãa maoong yĩnga, yãmb segd n kõo divẽ hĩn pʋɩɩr a ye pʋɩ a naas zugu, tɩ yɩ divẽ kũuni. 6 Sã n yaa pe-raoogo, yãmb segd n kõo kood biis kũuni. Segd n yɩɩ zom-bãaneg efa pʋɩ a yiib pʋɩ piig zug sẽn kalem ne kaam hĩn pʋɩɩr a ye pʋɩ a tãab zugu. 7 Yãmb segd n waa ne divẽ me hĩn pʋɩɩr a ye pʋɩ a tãab zug tɩ yɩ divẽ kũuni, tɩ tar yũ-noog* a Zeova yĩnga.

8 “‘La yãmb sã n na n kõ a Zeova loalg tɩ yɩ maoong sẽn yõogd bugum,+ wall maoong b sẽn maand pʋleng sẽn yaa toor zall+ yĩnga, pa rẽ bɩ zems-n-taar maando,+ 9 yãmb segd n waa ne kood biis kũun+ n paas loalgã. Segd n yɩɩ zom-bãaneg efa pʋɩ a tãab pʋɩ piig zug sẽn kalem ne kaam hĩn pʋɩ-sʋka. 10 Yãmb segd n waa ne divẽ hĩn pʋɩ-sʋk me tɩ yɩ divẽ kũuni,+ maoong b sẽn maand ne bugum tɩ tar yũ-noog* a Zeova yĩnga. 11 Yaa woto la yãmb segd n maan ne loalg fãa, pe-raoog fãa, pe-bil sẽn yaa raoog fãa, wall ne bʋʋg fãa. 12 Sẽn yaa rũms sõor ning fãa la y na n kõ, yaa woto la yãmb segd n maan ne rũng fãa, wa sẽn zems b sõorã. 13 Yaa woto la Israyɛll tẽng-n-ned fãa segd n kõ maoong b sẽn maand ne bugum tɩ tar yũ-noog* a Zeova yĩnga.

14 “‘Sãan sẽn sig yãmba, wall sẽn be yãmb sʋkã n kaoos yʋʋm wʋsg sã n na n maan maoong b sẽn maand ne bugum tɩ tar yũ-noog* a Zeova yĩnga, a segd n maana wa yãmb sẽn maandã.+ 15 Yãmb a Israyɛll nebã ne sãambã sẽn be ne yãmbã na n tũu no-yɛnga. Na n yɩɩ noor sẽn paad wakat fãa yãmb zãmaan-dãmbã fãa pʋsẽ. A Zeova taoore, yãmb ne sãambã segd n yɩɩ yembre.+ 16 No-yɛng la tõ-yɛng n segd n zĩnd yãmb ne sãambã sẽn be ne yãmbã yĩnga.’”

17 A Zeova le yeela a Moyiiz yaa: 18 “Gom ne Israyɛll nebã n yeel-b yaa: ‘Yãmb sã n wa kẽ soolem ning mam sẽn na n tall yãmb n kẽngã pʋgẽ, 19 n dɩ soolmã rɩɩbo,*+ yãmb segd n kõo a Zeova kũuni. 20 Yãmb segd n yãka y dẽenem koodã biis+ n pãr n maan bur sẽn yaa gils wa maanf n kõ tɩ yɩ kũuni. Yãmb segd n kõ-a-la wa y sẽn kõt kood y sẽn yãk zɛɛgẽ. 21 Yãmb segd n yãkda y dẽenem koodã biis y sẽn pãrã n kõt a Zeova, yãmb zãmaan-dãmbã fãa pʋsẽ.

22 “‘Yãmb sã n tudgi, n pa tõog n tũ no-kãensã fãa a Zeova sẽn togs a Moyiizã, 23 sẽn sɩng daar ning a Zeova sẽn kõ noyã, rat n yeel tɩ noy nins fãa a Zeova sẽn kɩt t’a Moyiiz taas yãmb ne y zãmaan-dãmb nins sẽn watã, 24 la sã n mik tɩ y tudg n maana rẽ tɩ nin-buiidã pa bãnge, nin-buiidã fãa segd n kõo lol-poll a yembr tɩ yɩ maoong b sẽn yõogd bugum tɩ tar yũ-noog* a Zeova yĩnga, ne a kood biis kũunã la a divẽ kũunã, sẽn zems noy nins b sẽn kõ rẽ wɛɛngẽ wã,+ n paas bull tɩ yɩ yel-wẽnd maoongo.+ 25 Maan-kʋʋdã na n maana paasg* Israyɛll nin-buiidã fãa yĩnga, tɩ b paam sugri.+ Bala ra yaa tudgri, tɩ b wa ne b maoong b tudgrã yĩnga. B waa ne maoong b sẽn maand ne bugum n kõ a Zeova, n paas yel-wẽnd maoong a Zeova taoore. 26 Israyɛll nebã ne sãambã sẽn be b sʋkã fãa na n paama sugri, bala nin-buiidã fãa ra tudgame.

27 “‘Ned* buud fãa sã n maan yel-wẽnd ne tudgri, a segd n waa ne bʋ-yãang sẽn pa yɩɩd yʋʋmde, tɩ yɩ yel-wẽnd maoongo.+ 28 Maan-kʋʋdã na n maana paasg ned* ning sẽn tudg n maan yel-wẽnd a Zeova taoorã yĩnga, la a na n paama sugri.+ 29 Tudg n maan yel-wẽndã wɛɛngẽ, no-yɛng n na n zĩnd Israyɛll tẽng-n-ned ne sãan sẽn be b sʋkã yĩnga.+

30 “‘La ned* sã n maan yel-wẽnd ne yamleoogo,+ t’a yaa tẽng-n-ned wall sãana, a tʋʋsa a Zeova, tɩ b segd n yiis-a* a buudã sʋka. 31 A sẽn paoog a Zeova gomdã la a kɩɩs a noorã yĩnga, b segd n kʋ-a lame.*+ A kongrã bee a meng zugu.’”+

32 Israyɛll nebã sẽn wa n be we-raoogẽ wã, b yãa rao a ye t’a wɩɩsd raad Vʋʋsg daare.+ 33 Neb nins sẽn yã-a t’a wɩɩsd raadã tall-a lame n kẽng a Moyiiz ne a Aarõ la nin-buiidã fãa nengẽ. 34 B kɩtame tɩ b gũ-a,+ bala Wẽnnaam ra nan pa wilg b sẽn segd n maan-a bũmb ningã takɩ ye.

35 A Zeova yeela a Moyiiz yaa: “B segd n kʋʋ raoã n da bas-a ye.+ Nin-buiidã fãa segd n lob-a-la kug sik-zĩigã kɩrenga.”+ 36 Dẽ, nin-buiidã fãa tall-a lame n yi sik-zĩigã kɩrenga, n lob-a kug t’a ki, wa a Zeova sẽn yeel a Moyiizã.

37 A Zeova le yeela a Moyiiz yaa: 38 “Gom ne Israyɛll nebã n yeel-b tɩ b zãmaan-dãmbã fãa pʋsẽ, b segd n maana b futã noy tɩ yaa zerdo, la b ning gĩs sẽn yaa kẽeg haoo* zerdã zugẽ.+ 39 ‘Yãmb segd n maana zerdã, sẽn na yɩl tɩ y sã n yã bɩ y tẽeg a Zeova noyã fãa yelle, la y tũ.+ Yãmb pa segd n tũ y sũyã ne y ninã ratem sẽn kɩtd tɩ y pa maand sɩd ne maamã* ye.+ 40 Rẽ na n sõngda yãmb tɩ y tẽegd mam noyã fãa la y tũudẽ, n yɩ sõamyã yãmb Wẽnnaamã yĩnga.+ 41 Mam yaa yãmb Wẽnnaam a Zeova sẽn yiis yãmb Ezɩpt soolmẽ wã, n na n wilg tɩ mam yaa yãmb Wẽnnaam.+ Mam yaa yãmb Wẽnnaam a Zeova.’”+

16 Rẽ poore, a Koore+ zemsa ne a Datã la a Abiram sẽn yaa a Eliyaab+ kambã, n paas a Onn sẽn yaa a Pelɛt biigã. Bãmb b tãabã fãa yaa a Rubɛn+ yagense. A Koore yaa a Izehaar+ biiga, t’a Izehaar yaa a Kehat+ biiga, t’a Kehat yaa a Levi+ biiga. 2 B yika zabr ne a Moyiizi, bãmb ne Israyɛll rap kobs-yi la pis-nu sẽn yaa nin-buiidã nanambse, rap b sẽn yãk nin-buiidã sʋka, n yaa nin-kãsemse. 3 B tigma taab n na n zab+ ne a Moyiiz la a Aarõ. B yeel-b lame: “Tõnd yamã yaa n yii ne yãmba! Nin-buiidã fãa yaa sõamyã,+ bãmb fãa, t’a Zeova be b sʋk me.+ Bõe yĩng masã tɩ yãmb zẽkd y mens a Zeova nin-buiidã zutu?”

4 A Moyiiz sẽn wʋm dẽ wã, a lʋɩɩ zĩig pʋgẽ n fõgen a neng tẽnga. 5 A yeela a Koore ne a poorẽ dãmbã fãa yaa: “Beoog yibeoogo, a Zeova na n kɩtame tɩ b bãng ned ning sẽn yaa yẽ rẽnda,+ la ned ning sẽn yaa sõngo, n segd n kolg-a wã.+ Ned ning fãa a sẽn na n yãkã+ n na n kolg-a. 6 Ad y sẽn na n maane: Bɩ foom a Koore ne f poorẽ dãmbã+ fãa bao bugum laase,+ 7 tɩ beoog bɩ y ning bugum b pʋsẽ, la y rogl wisd bugmã zug a Zeova taoore. Ned ning a Zeova sẽn na n yãkã,+ yẽ soabã n yaa sõngo. Yãmb a Levi yagensã+ yaa n maaname tɩ loog nugu!”

8 Rẽ poore, a Moyiiz yeela a Koore yaa: “Yãmb a Levi yagense, m bõos tɩ y kelge. 9 Israyɛll Wẽnnaamã sẽn welg yãmb toor Israyɛll nin-buiidã+ sʋka, n kõ yãmb sor tɩ y tõe n kolg-a n tʋm a Zeova sɛk-roogã tʋʋmã, la y yaas nin-buiidã taoor n tʋm b yĩngã pa sek yãmba?+ 10 A leb n kɩtame tɩ foo ne f saam-biisã fãa sẽn yaa a Levi yagensã pẽneg-a. Yãmb segd n bao n deega maan-kʋʋrã tʋʋmd me sɩda?+ 11 Woto yĩnga, foo ne f poorẽ dãmbã fãa sẽn tigimd taabã zabda ne a Zeova. Sã n yaa a Aarõ, a yaa ãnda tɩ yãmb na n yẽgem ne-a?”+

12 A Moyiiz wa n tʋmame tɩ b tɩ bool a Datã ne a Abiram+ sẽn yaa a Eliyaab kambã, la b yeelame yaa: “Tõnd pa na n wa ye! 13 Fo sẽn yiis tõnd tẽng sẽn pid ne bĩisim la sɩɩd pʋgẽ, n tall n wa we-raoogẽ wã n na n kʋ-dã pa sek foo la?+ Fo ratame masã n tolg n soog tõnd zãng bɩ? 14 Yaa vẽeneg tɩ fo pa tall tõnd n tɩ kẽes tẽng sẽn pid ne bĩisim la sɩɩd+ pʋgẽ, la tɩ f pa kõ tõnd pʋt la viyn pʋt tɩ lebg d pʋɩɩr ye. Fo rat n pusa nin-kãensã ninã la? Tõnd pa na n wa ye!”

15 Dẽ, a Moyiiz sũurã puuga wʋsg t’a yeel a Zeova yaa: “Ra wẽnemd-y n ges-y b kood biis kũunã ye. Mam pa reeg b bõanga, wall m maan b ned baa a ye wẽng ye.”+

16 Rẽ poore, a Moyiiz yeela a Koore yaa: “Bɩ foo ne f poorẽ dãmbã fãa wa a Zeova taoor beoogo. Foo ne bãmba, la a Aarõ. 17 Ned kam fãa segd n dɩka a bugum laaga, n ning wisd bugmã zugu. Ned kam fãa na n waa ne a bugum laag a Zeova taoore. Yaa bugum laas kobs-yi la pis-nu. Foo ne a Aarõ me ned kam fãa na n waa ne a bugum laaga.” 18 Dẽ, b ned kam fãa rɩka a bugum laaga, n ning bugum a pʋgẽ, la a rogl wisd bugmã zugu, n tɩ yaas sɛk-roogã rignoorẽ ne a Moyiiz la a Aarõ. 19 A Koore sẽn wa n tigim a poorẽ dãmbã+ fãa tɩ b na n zab ne a Moyiiz la a Aarõ sɛk-roogã rignoorẽ wã, a Zeova ziirã puka nin-buiidã fãa nifẽ.+

20 A Zeova yeela a Moyiiz ne a Aarõ yaa: 21 “Yi-y sul-kãngã pʋgẽ, tɩ m sãam-b nif kamsg pʋgẽ.”+ 22 Rẽ la a Moyiiz ne a Aarõ lʋɩ n fõgen b nens tẽnga, n yeele: “Tõnd Wẽnnaam, yãmb sẽn yaa soab ning sẽn kõt ninsaalbã fãa vɩɩmã,+ nin-yɛng yel-wẽnd yĩnga, yãmb sũurã na n puuga ne nin-buiidã fãa sɩda?”+

23 A Zeova yeela a Moyiiz yaa: 24 “Gom ne nin-buiidã n yeel-b yaa: ‘Lak-y n bas-y-yã a Koore ne a Datã la a Abiram fu-rotã!’”+

25 Dẽ, a Moyiiz yikame n kẽng a Datã ne Abiram nengẽ, tɩ Israyɛll nebã kãsem-dãmbã+ tũ-a. 26 A yeela nin-buiidã yaa: “M bõos tɩ y lak n bas nin-wẽn-kãensã fu-rotã, la y ra sɩɩs baa fʋɩ sẽn yaa b rẽnd ye. Yaa sẽn na yɩl tɩ b ra wa sãam yãmb b yel-wẽndã yĩng ye.” 27 Tao-tao bala, nin-buiidã lakame n bas a Koore, a Datã la a Abiram fu-rotã kɩremsã fãa. A Datã ne a Abiram yiime n yaas b fu-rotã noy ne b pagbã la b kambã.

28 T’a Moyiiz yeele: “Ad bũmb ning sẽn na n kɩt tɩ yãmb bãng tɩ yaa a Zeova n tʋm maam tɩ m maand bõn-kãensã fãa, la tɩ pa maam n yãk m toorẽ yam n maand rẽ ye: 29 Nin-kãensã sã n ki wa nebã fãa sẽn kiid to-to wã, la b sɩbgrã sã n yɩ wa ninsaalbã fãa sẽn paamd sɩbgr to-to wã, rẽnd pa a Zeova n tʋm maam ye.+ 30 La a Zeova sã n maan-b bũmb nebã sẽn zɩ n yã, tẽngã sã n yaag a noorã n vel-b ne bũmb nins fãa b sẽn so wã, tɩ b sig Yaoogẽ* wã vɩɩse, yãmb na n bãnga vẽeneg tɩ b paooga a Zeova.”

31 A sẽn togs gom-kãensã n sa wã bala, tẽngã pãrga b naoã tẽngre.+ 32 Tẽngã yaaga a noorã n vel-ba, bãmb ne b zagsã rãmba, la neb nins fãa sẽn yaa a Koore rẽndã,+ n paas b teedã fãa. 33 Bãmb ne neb nins fãa b sẽn so wã siga Yaoogẽ* wã vɩɩse, tɩ tẽngã lebs n lud-ba. Woto, b menema nin-buiidã+ sʋka. 34 Israyɛll nebã fãa sẽn karg n gũbg-bã sẽn wʋm b sẽn da kaasdã zoeeme, bala b yeelame: “Tõnd yɛɛsda tẽngã na wa n vel-do!” 35 Rẽ poore, bugum n yi a Zeova nengẽ,+ n dɩ rap kobs-yi la pis-nu wã sẽn da yõogd wisdã.+

36 A Zeova yeela a Moyiiz yaa: 37 “Yeel maan-kʋʋd a Aarõ biig a Eleazaar t’a yiis bugum laasã+ bugmẽ wã, bala b yaa sõamyã. Yeel-a me t’a zãag bilf n tɩ fãeeg bugmã. 38 B segd n dɩka neb nins sẽn maan yel-wẽndã tɩ tũ ne b yõorã* bugum laasã n kud tɩ lebg paklse, n lud tẽn-kugrã.+ B sẽn tall-b n wa a Zeova taoorã yĩnga, b lebga sõamyã. B segd n yɩɩ bãnd Israyɛll nebã yĩnga.”+ 39 Dẽ, maan-kʋʋd a Eleazaar rɩka zũud bugum laasã neb nins bugmã sẽn dɩ wã sẽn tall n wa wã, n kud n lud tẽn-kugrã, 40 wa a Zeova sẽn kɩt t’a Moyiiz togs-a wã. Ra yaa bũmb sẽn tẽegd Israyɛll nebã tɩ ned sẽn pa tar sore,* rat n yeel tɩ sẽn pa-a a Aarõ biig wall a yageng pa segd n kolg a Zeova taoor n yõog wisdu,+ la tɩ ned baa a ye pa segd n lebg wa a Koore ne a poorẽ dãmbã+ ye.

41 Vẽkembeoogã bala, Israyɛll nin-buiidã fãa sɩnga yẽgeng ne a Moyiiz la a Aarõ,+ n yetẽ: “Yaa yãmb y yiibã n kʋ a Zeova nebã.” 42 Nin-buiidã sẽn wa n tigim taab n na n zab ne a Moyiiz la a Aarõ wã, b wẽnemdame n tees sɛk-roogã, la b mikame tɩ sawadgã lud-a lame, t’a Zeova ziirã sɩng pukri.+

43 A Moyiiz ne a Aarõ kẽnga sɛk-roogã+ taoore, 44 t’a Zeova yeel a Moyiiz yaa: 45 “Lak-y n bas-y nin-buiidã, tɩ m sãam-b nif kamsg pʋgẽ.”+ Rẽ la a Moyiiz ne a Aarõ lʋɩ n fõgen b nens tẽnga.+ 46 A Moyiiz yeela a Aarõ yaa: “Rɩk bugum laagã, n yãk bugum tẽn-kugrã+ zug n ning a pʋgẽ, la f rogl wisd bugmã zugu, n kẽng nin-buiidã nengẽ tao-tao n tɩ maan paasg* b yĩnga,+ bala a Zeova sũurã puudame. Bã-loangdgã sɩngame!” 47 A Aarõ yɩɩ tao-tao n dɩk bugum laagã wa a Moyiiz sẽn yeelã, n zoe n tɩ kẽ nin-buiidã sʋka, n mik tɩ bã-loangdgã zoe n sɩngame. Dẽ, a rogla wisd bugum laagã zugu, n sɩng n na n maan paasg nin-buiidã yĩnga. 48 A kell n yaasa sẽn ki-bã ne sẽn vɩ-bã sʋka. La bã-loangdgã wa n saame. 49 Neb nins bã-loangdgã sẽn kʋ wã yɩɩ neb tus-piig la a naas la kobs-yopoe, a Koore sẽn yɩ sabab tɩ neb nins ki wã sẽn yãk b toogo. 50 A Aarõ sẽn wa n lebg n leb a Moyiiz nengẽ sɛk-roogã rignoorẽ wã, rẽ tɩ bã-loangdgã saame.

17 A Zeova yeela a Moyiiz yaa: 2 “Gom ne Israyɛll nebã, la f kɩt tɩ buud fãa wa ne rasaare. Buud naab+ fãa ne a rasaare, tɩ fãa yaa rasab piig la a yiibu. Gʋls ned kam fãa yʋʋr a rasaar zugu. 3 Fo segd n gʋlsa a Aarõ yʋʋrã Levi buudã rasaar zugu, bala yaa rasaar a ye buud naab fãa yĩnga. 4 Rʋʋg rasabã sɛk-roogã pʋgẽ, Kasetã koglg+ taoore, zĩig ning mam sẽn wae n vẽnegd m meng ne foomã.+ 5 Ned ning mam sẽn yãkã+ rasaar na n tobame, tɩ m kɩt tɩ yẽgeng ning Israyɛll nebã sẽn yẽgemd ne maam+ la ne yãmbã+ sa.”

6 Dẽ, a Moyiiz goma ne Israyɛll nebã tɩ b nanambsã fãa kõ-a rasaba. Buud naab fãa ne a rasaare, tɩ fãa yaa rasab piig la a yiibu. A Aarõ rasaarã ra naaga b rasabã. 7 Rẽ poore, a Moyiiz rʋʋga rasabã a Zeova taoore, Kasetã sɛk-roogã pʋgẽ.

8 Vẽkembeoogã, a Moyiiz sẽn wa n kẽ Kasetã sɛk-roogẽ wã, a mikame t’a Aarõ rasaarã sẽn yaa Levi buudã rẽndã tobame. A tobame n ning puudu, la a wom amand biis sẽn bɩ. 9 A Moyiiz yiisa rasabã fãa a Zeova taoore, n tall n kẽng Israyɛll nin-buiidã nengẽ. Bãmb gesa rasabã, tɩ naab fãa rɩk a rasaare.

10 Rẽ poore, a Zeova yeela a Moyiiz yaa: “Tall a Aarõ rasaarã+ n tɩ lebs Kasetã koglg taoore, tɩ yɩ bũmb b sẽn na n bĩng tɩ yɩ bãnd+ kɩɩsdbã+ yĩnga. Yaa sẽn na yɩl tɩ b sẽn yẽgemd ne maamã sa, la tɩ b ra ki ye.” 11 Tao-tao bala, a Moyiiz maana wa a Zeova sẽn yeel-a wã. A maana woto kɛpɩ.

12 Israyɛll nebã yeela a Moyiiz yaa: “Tõnd na n kiime! Yaa vẽeneg tɩ tõnd na n kiime! D na n saa zãnga! 13 Ned ning fãa sẽn na n kolg a Zeova sɛk-roogã na n kiime!+ Tõnd fãa segd n kii woto bɩ?”+

18 A Zeova yeela a Aarõ yaa: “Ned sã n kɩɩs noy nins sẽn gãneg zĩ-sõngã wɛɛngẽ wã, yaa foo ne f kambã la f yagensã la b na n soke.+ Ned sã n kɩɩs noy nins sẽn gãneg maan-kʋʋrã wɛɛngẽ wã, yaa foo ne f kambã la f yagensã la b na n soke.+ 2 Sẽn paase, tall f saam-biisã sẽn yaa Levi buudã nebã, rat n yeel tɩ fo yaab-rãmbã buudã n kolge, tɩ b naag foo, n sõng foo+ ne f kom-dibli wã n tʋm Kasetã sɛk-roogã+ taoore. 3 B segd n tʋma tʋʋm nins fo sẽn na n kõ-bã, la b tʋm sɛk-roogã tʋʋm fãa.+ La b pa segd n pẽneg zĩ-sõngã teedo, wall tẽn-kugrã ye. Yaa sẽn na yɩl tɩ bãmb ne yãmb baa a ye ra wa ki ye.+ 4 B na n naaga foo n tʋm tʋʋm nins b sẽn segd n tʋm sɛk-roogẽ wã, la b tʋm sɛk-roogã tʋʋmã fãa. Ned sẽn pa tar sor* pa segd n kolg yãmb ye.+ 5 Yãmb segd n tʋma y tʋʋm nins sẽn kẽed zĩ-sõngã+ la tẽn-kugrã+ wɛɛngẽ wã, tɩ m sũurã ra le puug+ ne Israyɛll nebã ye. 6 Mam mengã n yãk Levi buudã neb sẽn yaa yãmb saam-biisã Israyɛll nebã sʋka, n kõ yãmba.+ B yaa kũun b sẽn kõ a Zeova, sẽn na yɩl tɩ b ges sɛk-roogã tʋʋm yelle.+ 7 Foo ne f kom-dibli wã n segd n ges y maan-kʋʋrã tʋʋm yelle, sẽn kẽed tẽn-kugrã wɛɛngẽ, la bũmb nins sẽn be fu-lilldgã poorã+ wɛɛngẽ. Yãmb segd n tʋma tʋʋm-kãense.+ Mam kõo yãmb maan-kʋʋrã tʋʋmd tɩ yaa kũuni. Ned sẽn pa tar sor* sã n kolg sɛk-roogã, b segd n kʋ-a lame.”+

8 A Zeova le yeela a Aarõ yaa: “Mam mengã n yãk foo tɩ f ges kũunã b sẽn kõt maamã+ yelle. Mam yãka pʋɩɩr bõn-sõamyã nins fãa Israyɛll nebã sẽn kõtã pʋgẽ, n kõ foo ne f kambã tɩ na n yɩ y pʋɩɩr wakat fãa yĩnga.+ 9 Ad bũmb nins sẽn na n yɩ yãmb dẽnda, maand nins sẽn yaa sõamyã wʋsgã b sẽn maand ne bugmã sʋka: Yaa maand nins fãa Israyɛll nebã sẽn kõtã, rat n yeel tɩ b kood biis kũunã,+ b yel-wẽn maandã,+ la b taal maandã+ b sẽn wat n kõt maamã. Yaa bũmb sẽn yaa sõng wʋsg foo ne f kom-dibli wã yĩnga. 10 Yãmb segd n wãb-b-la zĩig sẽn yaa sõng wʋsg pʋgẽ.+ Rao fãa tõe n wãb-b lame. Na n yɩɩ bũmb sẽn yaa sõng yãmb yĩnga.+ 11 Ad bũmb a taab sẽn yaa yãmb rẽnd me: Yaa kũun nins Israyɛll nebã sẽn wat ne wã,+ n paas b maand nins sẽn yuumdã fãa.+ Mam kõ-b-la foo ne f kom-dibli wã la f kom-pugli wã, tɩ na n yɩ y pʋɩɩr wakat fãa yĩnga.+ Fo zakã ned ning fãa sẽn yaa yɩlemd tõe n wãb-b lame.+

12 “Mam kõta foo+ kaam sẽn yaa sõma n yɩɩdã fãa ne divẽ-paalg sẽn yaa sõma n yɩɩdã fãa, la koodã, rat n yeel tɩ dẽenem biisã+ b sẽn kõt a Zeova wã. 13 B pʋtã dẽenem biisã fãa b sẽn na n tall n wa kõ a Zeova wã na n lebga fo rẽnda.+ Fo zakã ned ning fãa sẽn yaa yɩlemd tõe n wãb-b lame.

14 “Israyɛll soolmã pʋgẽ, bũmb ning fãa b sẽn dɩk n kõ Wẽnnaam zãng-zãng* na n lebga fo rẽnda.+

15 “Bõn-vɩɩg fãa*+ pipi biig b sẽn na n tall n wa kõ a Zeova, tɩ yaa ninsaal wall rũng na n lebga fo rẽnda. La fo segd n basame tɩ b tek ninsaal pipi biiga.+ Fo segd n basame tɩ b tek rũng sẽn yaa rẽgd pipi biig me.+ 16 A sã n ta kiuug n tar n dabda, fo segd n basame tɩ b yao yaood ning b sẽn segd n yao n tek-a wã. Yaa wanzuri sɩkl*+ a nu wa b sẽn wilgã, sẽn zems zĩ-sõngã sɩklã,* rat n yeel tɩ geera* pisi. 17 Yaa nag-bi-raoog sẽn yaa pipi biiga, pe-bi-raoog sẽn yaa pipi biiga, la boɛɛg sẽn yaa pipi biig bal la b pa segd n teke.+ B yaa sõamyã. Fo segd n mesa b zɩɩmã tẽn-kugrã zugu,+ la f yõog b kaamã tɩ yɩ maoong b sẽn maand ne bugum, tɩ tar yũ-noog* a Zeova yĩnga.+ 18 B nemdã na n lebga fo rẽnda. A na n lebga fo rẽnda, wa maoong b sẽn yuumdã yãoogã ne a rɩtg gerã sẽn yaa fo rẽndã.+ 19 Mam kõta foo ne f kom-dibli wã la f kom-pugli wã kũun nins fãa sẽn yaa sõamyã Israyɛll nebã sẽn na n kõ a Zeova wã,+ tɩ na n yɩ y pʋɩɩr wakat fãa.+ Yaa yamsem kaool* sẽn paad wakat fãa a Zeova taoore, foo ne f kambã la f yagensã yĩnga.”

20 A Zeova le yeela a Aarõ yaa: “Israyɛll nebã soolmã pʋgẽ, fo pa na n paam pʋɩɩr ye. Fo pa na n paam zĩig bãmb sʋk tɩ yɩ fo rẽnd ye.+ Maam n yaa fo pʋɩɩr Israyɛll nebã sʋka.+

21 “Bãng tɩ mam dɩka bũmb buud fãa pʋɩɩr a ye pʋɩ piig zug b sẽn kõt Israyɛll soolmẽ wã, n kõ Levi buudã nebã tɩ na n yɩ b pʋɩɩre,+ tʋʋmd ning b sẽn tʋmdã yĩnga, rat n yeel tɩ sɛk-roogã tʋʋmdã yĩnga. 22 Israyɛll nebã pa le segd n kolg sɛk-roogã ye. Sã n pa rẽ, b na n maana yel-wẽnd n ki. 23 Yaa Levi buudã nebã b toor n segd n tʋm sɛk-roogã tʋʋma. Israyɛll nebã sã n kɩɩs noy nins sẽn gãneg zĩ-sõngã wɛɛngẽ wã, Levi buudã neb la b na n soke.+ B pa segd n paam pʋɩɩr Israyɛll nebã sʋk ye. Yaa noor sẽn paad wakat fãa yãmb zãmaan-dãmbã fãa pʋsẽ.+ 24 Bala mam dɩka pʋɩɩr a ye pʋɩ piig zugã Israyɛll nebã sẽn na n kõt a Zeova wã, n kõ Levi buudã tɩ na n yɩ b pʋɩɩre. Yaa rẽ yĩng la mam sẽn yeel-b tɩ ‘Israyɛll nebã sʋka, b pa segd n paam pʋɩɩrã.’”+

25 Rẽ poore, a Zeova yeela a Moyiiz yaa: 26 “Fo segd n yeela Levi buudã neb yaa: ‘Yãmb na n deegda pʋɩɩr a ye pʋɩ piig zug Israyɛll nebã nengẽ. Yaa pʋɩɩr a ye pʋɩ piig zugã mam sẽn deeg bãmb nengẽ n kõ tɩ yaa yãmb pʋɩɩrã.+ Yãmb sã n deeg rẽ, yãmb segd n yãka pʋɩɩr a ye pʋɩ piig zug n kõ a Zeova.+ 27 Wẽnnaam na n gesa yãmb kũunã wa kood y sẽn yãk y zɛɛgẽ,+ pa rẽ bɩ divẽ wall kaam y sẽn wẽk tɩ yaa wʋsgo, tɩ y yãk n kõ. 28 Woto, yãmb me na n yãkda kũun pʋɩɩr a ye pʋɩ piig zugã y sẽn deegd Israyɛll nebã nengẽ wã pʋgẽ, n kõt a Zeova. Yaa pʋɩɩr a ye pʋɩ piig zugã pʋgẽ la yãmb segd n yãk kũun a Zeova yĩnga, n kõ maan-kʋʋd a Aarõ. 29 Bũmb nins sẽn yaa sõamyã wã b sẽn kõt yãmbã+ sʋka, yãmb na n yãka kũun buud fãa bũmb nins sẽn yaa sõma n yɩɩdã pʋgẽ, n kõ a Zeova.’

30 “Sẽn paase, fo segd n yeel-b lame yaa: ‘Yãmb sã n kõ bũmb nins sẽn yaa sõma n yɩɩdã, Wẽnnaam na n gesame tɩ yaa wa Levi buudã neb yãka kood b zɛɛgẽ, la divẽ bɩ kaam b sẽn wẽke, n wa kõ. 31 Yãmb ne y zagsã rãmb tõe n dɩɩ rẽ zĩig ning fãa y sẽn date, bala yaa yãmb yaoodo, y sẽn tʋmd sɛk-roogẽ+ wã yĩnga. 32 Yãmb sã n yãkd pʋɩɩr a ye pʋɩ piig zugã pʋgẽ bũmb nins sẽn yaa sõma n yɩɩdã n kõtẽ fãa, yãmb pa maand yel-wẽnd ye. Yãmb pa segd n paoog Israyɛll nebã bõn-sõamyã wã ye. Sã n pa rẽ, y na n kiime.’”+

19 A Zeova le goma ne a Moyiiz la a Aarõ, n yeele: 2 “Ad noor a Zeova sẽn kõ: ‘Yeel Israyɛll nebã tɩ b segd n wa kõo foo nag-zẽeg sẽn pa tar zanga,+ la b sẽn zɩ n balge. 3 Yãmb segd n dɩk-a lame n kõ maan-kʋʋd a Eleazaare, t’a tall-a n yi sik-zĩigã kɩrenga, n kɩt tɩ b kodg-a a taoore. 4 Rẽ poore, maan-kʋʋd a Eleazaar na n tẽka naafã zɩɩmã ne a nug-bilã, n tees sɛk-roogã rignoor sẽnes n mes naoor a yopoe.+ 5 B segd n yõoga naafã a nifẽ. B segd n yõoga a gãongã, a nemdã, a zɩɩmã la a bĩndã fãa.+ 6 Maan-kʋʋdã na n dɩka sɛɛdr raoogo, izope,+ la peen-miuug n los bugum ning naafã sẽn be n dɩtẽ wã pʋgẽ. 7 Maan-kʋʋdã na n pegsa a futã, la a so koom. Rẽ poore, a tõe n kẽe sik-zĩigẽ wã, la a na n yɩɩ rẽgd n tãag zaabre.

8 “‘Ned ning sẽn yõog naafã na n pegsa a futã la a so koom, la a na n yɩɩ rẽgd n tãag zaabre.

9 “‘Ned sẽn yaa yɩlemd n na n wʋk naafã tompɛglmã+ n tɩ bao zĩig sẽn yaa yɩlemd sik-zĩigã kɩreng n bĩngi. Israyɛll nebã segd n bĩng-a lame, sẽn na yɩl n tar-a n maand yɩlgrã koom.+ Naafã yaa yel-wẽnd maoongo. 10 Ned ning sẽn wʋk naafã tompɛglmã na n pegsa a futã, la a na n yɩɩ rẽgd n tãag zaabre.

“‘Ad noor sẽn paad wakat fãa Israyɛll nebã ne sãambã sẽn be b sʋkã yĩnga:+ 11 Ned ning fãa sẽn na n sɩɩs ned sẽn ki* na n yɩɩ rẽgd rasem a yopoe.+ 12 Nin-kãng segd n yɩlga a meng ne koomã rasem a tãab-n-soabã. Woto, a na n lebga yɩlemd rasem a yopoe-n-soabã. La a sã n pa yɩlg a meng rasem a tãab-n-soabã, a pa na n yɩ yɩlemd rasem a yopoe-n-soabã ye. 13 Ned ning fãa sẽn sɩɩs ned sẽn ki* n pa yɩlg a menga, a rẽgma a Zeova sɛk-roogã.+ B segd n yiisa* nin-kãng* Israyɛll nebã sʋka.+ B sẽn pa mes-a ne yɩlgrã koomã+ yĩnga, a ket n yaa rẽgdo. A rẽgdã keta ne-a.

14 “‘Ned sã n ki fu-roog pʋgẽ, ad noor ning yãmb sẽn segd n tũ: Ned ning fãa sẽn na n kẽ fu-roogã pʋgẽ, ne ned ning fãa sẽn zoe n be a pʋgẽ na n yɩɩ rẽgd rasem a yopoe. 15 Laok buud fãa sẽn pa pag sõma* na n yɩɩ rẽgdo.+ 16 Ned sã n kẽng weoogẽ, n tɩ sɩɩs ned b sẽn kʋ ne sʋʋga, ned sẽn ki a toore, ninsaal kõbre, wall yaoogo, nin-kãng na n yɩɩ rẽgd rasem a yopoe.+ 17 Sẽn na yɩl n yɩlg sẽn yaa-a rẽgdã, b segd n yãka yel-wẽnd maoongã b sẽn yõogã tompɛglmã bilf n ning laok pʋgẽ, la b yãk koom ko-zoetem zĩigẽ n kiig tompɛglmã zugu. 18 Rẽ poore, ned sẽn yaa yɩlemd+ n na n dɩk izop*+ n suk koomã pʋgẽ, n mes fu-roogã ne teedã la neb* nins fãa sẽn da be a pʋgẽ wã, la a mes ned ning sẽn sɩɩs kõbrã, ned b sẽn kʋ wã, ned sẽn ki a toorã, wall yaoogã. 19 Ned ning sẽn yaa yɩlemdã na n mesa sẽn yaa-a rẽgdã koomã rasem a tãab-n-soabã, la rasem a yopoe-n-soabã. A na n yɩlg-a lame n yiis a yel-wẽndã rasem a yopoe-n-soabã.+ Rẽ poore, a segd n pegsa a futã la a so koom, la yaa zaabr la a na n lebg yɩlemde.

20 “‘La ned sã n yaa rẽgd la a pa yɩlg a menga, b segd n yiisa* nin-kãng* nin-buiidã sʋka,+ bala a rẽgma a Zeova sɛk-roogã. B sẽn pa mes-a ne yɩlgrã koomã yĩnga, a yaa rẽgdo.

21 “‘Ad noor sẽn paad wakat fãa b sẽn segd n tũ: Ned ning sẽn na n mes yɩlgrã koomã+ segd n pegsa a futã. Ned ning sẽn sɩɩs yɩlgrã koomã na n yɩɩ rẽgd n tãag zaabre. 22 Bũmb ning fãa sẽn yaa-a rẽgdã sẽn sɩɩs na n yɩɩ rẽgdo. Ned* sã n sɩɩs bõn-kãnga, a na n yɩɩ rẽgd n tãag zaabre.’”+

20 Pipi kiuugã pʋgẽ, Israyɛll nin-buiidã fãa taa Zĩn we-raoogẽ wã. B tilga b sik-zĩigã Kadɛɛse.+ Yɩɩ be la a Miryam+ ki-yã, tɩ b mum-a.

2 La koom ra pa be nin-buiidã+ yĩnga, tɩ b tigim taab n na n zab ne a Moyiiz la a Aarõ. 3 B ra zabda ne a Moyiiz+ n yetẽ: “Tõnd sã n da ki wakat ning tõnd saam-biisã sẽn ki a Zeova taoorã n são! 4 Bõe yĩng tɩ fo tall a Zeova nin-buiidã n wa we-rao-kãngã pʋgẽ, sẽn na yɩl tɩ tõnd ne d rũmsã ki ka?+ 5 Bõe yĩng tɩ fo yiis tõnd Ezɩpti, n tall-d n wa zĩ-yo-kãngã+ pʋgẽ? Tõnd pa tõe n bʋd ka ye. Kankams wall viyn tɩɩs bɩ gernaad tɩɩs pa na n yi ka ye. Koom me pa be ka sẽn na n yũ ye.”+ 6 Dẽ, a Moyiiz ne a Aarõ yii nin-buiidã taoore, n kẽng sɛk-roogã rignoorẽ n tɩ lʋɩ n fõgen b nens tẽnga, t’a Zeova ziirã puk b nifẽ.+

7 A Zeova yeela a Moyiiz yaa: 8 “Rɩk rasaarã, tɩ foo ne f ba-biig a Aarõ tigim nin-buiidã. Gom-y ne pĩigã b nifẽ t’a kõ a koomã. Woto, yãmb na n kɩtame tɩ koom yi pĩigẽ wã, tɩ y kõ nin-buiidã ne b rũmsã tɩ b yũ.”+

9 Dẽ, a Moyiiz rɩka rasaarã a Zeova taoor+ wa a sẽn yeel-a wã. 10 A Moyiiz ne a Aarõ boola nin-buiidã n tigim pĩigã taoore, n yeel-b yaa: “Yãmb a tõatba, kelg-y-yã! Yãmb datame tɩ tõnd yiis koom pĩ-kãngã pʋgẽ n kõ yãmb bɩ?”+ 11 Rẽ la a Moyiiz zẽk a nugã n wẽ pĩigã naoor a yiib ne a rasaarã, tɩ koom yi wʋsgo, tɩ nin-buiidã ne b rũmsã sɩng yũubu.+

12 A Zeova wa n yeela a Moyiiz ne a Aarõ yaa: “Yãmb sẽn pa tẽ maamã, la y sẽn pa waoog maam Israyɛll nebã taoorã yĩnga, y pa na n tall nin-kãensã n tɩ kẽ soolem ning mam sẽn na n kõ-bã pʋgẽ ye.”+ 13 Ko-kãng yaa Meriba*+ koomã, zĩig ning Israyɛll nebã sẽn zab ne a Zeova, t’a wilg-b t’a yaa Wẽnnaam sẽn yaa sõngã.

14 Rẽ poore, a Moyiiz paa Kadɛɛs n tʋm koe-taasdb tɩ b tɩ yeel Edom rĩmã+ yaa: “Ad Israyɛll nebã sẽn yaa yãmb saam-biisã+ sẽn yeele: ‘Yãmb meng mii zu-loees nins fãa tõnd sẽn paamã sõma. 15 Tõnd yaab-rãmbã kẽnga Ezɩpti,+ tɩ tõnd zĩnd be yʋʋm* wʋsgo.+ Ezɩpt nebã namsa tõnd ne d yaab-rãmbã.+ 16 Tõnd wa n baas n kelmame n bool a Zeova,+ t’a wʋm n tʋm malɛk+ t’a yiis tõnd Ezɩpti. Masã, tõnd bee Kadɛɛs sẽn yaa tẽng sẽn be yãmb soolmã toadgẽ wã. 17 D bõos tɩ y bas tɩ d pasg y soolmã n looge. Tõnd pa na n pasg pʋʋg wall viyn pʋʋg baa a yembr ye. Sẽn paase, d pa na n yũ bulg baa a yembr koom ye. Tõnd na n kẽna sor ning b sẽn boond tɩ Rĩmã sorã zugu, n da bʋdg goabg wall rɩtgo, hal tɩ d wa yi yãmb soolmã.’”+

18 La Edom rĩmã yeel-b lame yaa: “Yãmb pa tõe n pasg tõnd soolmã n loog ye. Yãmb sã n bao n na n pasge, mam na n yii ne sʋʋg n seg yãmba.” 19 Tɩ Israyɛll nebã yeel-a yaa: “Tõnd na n tũu so-kõodrã n looge. Tõnd mensã wall d rũmsã sã n yũ yãmb koom, d na n yaoome.+ Tõnd pa rat baa fʋɩ n zʋʋg kẽn ne nao n pasg yãmb soolmã ye.”+ 20 Baa ne rẽ, a yeelame: “Yãmb pa tõe n pasg ye.”+ Rẽ poore, Edom rĩmã yii ne tãb-biis wʋsg sẽn tar pãnga,* n na n seg-ba. 21 Woto, Edom rĩmã zãgsame t’a kõn bas Israyɛll nebã tɩ b pasg a soolmã ye. Rẽ n so tɩ Israyɛll nebã gil n loog n bas-a.+

22 Israyɛll nebã fãa yii Kadɛɛs n kẽng Hoor tãngẽ+ wã. 23 Dẽ, a Zeova yeela a Moyiiz ne a Aarõ Hoor tãngã sẽn be Edom soolmã toadgẽ wã yaa: 24 “A Aarõ na n kiime tɩ b mum-a wa b sẽn mum a yaab-rãmbã.+ A pa na n kẽ soolem ning mam sẽn na n kõ Israyɛll nebã pʋgẽ ye. Bala Meriba koomã+ wɛɛngẽ, yãmb y yiibã kɩɩsa mam noorã. 25 Peeg a Aarõ ne a biig a Eleazaar tɩ y rʋ Hoor tãngã. 26 Yees a Aarõ futã+ n yeelg a biig a Eleazaare,+ t’a Aarõ na n kii be.”

27 Dẽ, a Moyiiz maana wa a Zeova sẽn yeelã. B rʋʋ Hoor tãngã nin-buiidã fãa nifẽ. 28 A Moyiiz yeesa a Aarõ futã n yeelg a biig a Eleazaare. Rẽ poore, a Aarõ kii be,+ t’a Moyiiz ne a Eleazaar sig tãngã zugu. 29 Israyɛll nebã sẽn yã t’a Aarõ kiime wã, b fãa yãba a Aarõ yĩng rasem pis-tã.+

21 Araad rĩmã+ sẽn yaa Kanaã neda, n da be Negɛɛbã sẽn wʋm tɩ Israyɛll nebã rɩka Atarim sorã n watẽ wã, a yiime n zab ne-ba, n yõg b neb kẽer n looge. 2 Dẽ, Israyɛll nebã pʋlma a Zeova n yeele: “Yãmb sã n ning nin-kãensã tõnd nusẽ, d na n sãama b tẽnsã.” 3 A Zeova kelga Israyɛll nebã kosgã, n ning Kanaã nebã b nusẽ, tɩ b sãam bãmb ne b tẽnsã. Rẽ n so tɩ b pʋd zĩigã yʋʋr tɩ Horma.*+

4 B sẽn yi Hoor tãngẽ wã+ n dɩk Mog-miuugã sor sẽn na yɩl n gil Edom soolmã,+ nin-buiidã* yamã wa n yii ne so-toakã. 5 B ra gomda a Moyiiz ne Wẽnnaam wẽnga,+ n yetẽ: “Bõe yĩng tɩ yãmb yiis tõnd Ezɩpt tɩ d na n ki we-raoogẽ wã ka? Rɩɩb la koom pa be ka ye.+ Tõnd* yamã yaa n yii* mannã* sẽn yaa nimbãan-dɩɩbã.”+ 6 Dẽ, a Zeova kɩtame tɩ wag-toos kẽ Israyɛll nebã sʋk n kɛɛd-ba, hal tɩ b wʋsg ki.+

7 Rẽ n so tɩ nin-buiidã wa a Moyiiz nengẽ n yeel yaa: “Tõnd sẽn gom foo ne a Zeova wẽngã, d maana yel-wẽnde.+ Yõk a Zeova sɛɛga, t’a kɩt tɩ wag-toosã yi d sʋka.” Dẽ, a Moyiiz yõka Wẽnnaam sɛɛg nin-buiidã yĩnga.+ 8 A Zeova yeela a Moyiiz yaa: “Maan wag-toaag naand n yagl ra-luk zugu. Woto, waaf sã n kɛ neda, a segd n nak n ges-a lame n kell n vɩɩmde.” 9 Zĩig pʋgẽ, a Moyiiz maana zũud waaf+ n yagl ra-luk zugu.+ Waaf sã n da kɛ ned t’a nak n ges zũud waafã, a põsdame.+

10 Rẽ poore, Israyɛll nebã yikame n tɩ tilg b sik-zĩigã Obote.+ 11 B yii Obot n tɩ tilg b sik-zĩigã Iye-abarim,+ we-raoog ning sẽn be yaang sẽnes n tees Mowaabã pʋgẽ. 12 B wa n yii be n tɩ tilg b sik-zĩigã Zerɛɛd longã*+ noore. 13 B wa n yii be n tɩ tilg b sik-zĩigã Arno soolmã+ sẽn be we-raoog ning sẽn tall n tãag Amoor nebã toadgã. Bala Arno kosoogã yaa Mowaab toadga, n be Mowaab ne Amoor nebã tẽngã sʋka. 14 Rẽ n so tɩ sebr ning sẽn gomd a Zeova zabã yellã pʋgẽ, b gomd “Vahɛɛb sẽn be Sufa wã yelle, Arno kosoodã,* 15 la kosoodã* sẽn sigdẽ wã* yelle, rat n yeel tɩ kosood nins sẽn teesd Aar tẽngã, n tɩ yek Mowaab toadgã.”

16 Rẽ poore, b taa Bɛɛre. Bulg ning yell a Zeova sẽn gom ne a Moyiiz n yeele: “Tigim nin-buiidã, tɩ m kõ-b koomã” bee be.

17 Wakat kãnga, Israyɛll nebã yɩɩla yɩɩlle, n yeele:

“Bulga, buli! Rees-y-yã* a yɩɩllã!

Rẽ poore, Israyɛll nebã yii we-raoogẽ wã n kẽng Matana. 19 B wa n yii Matana n kẽng Nahaliyɛlle, la b yi Nahaliyɛll n kẽng Bamote.+ 20 B yii Bamot n kẽng long ning sẽn be Pisga zugã, Mowaab soolmẽ* wã.+ F sã n be Pisga zugu,+ f sulgd n geta Zesimonne.*+

21 Israyɛll nebã tʋma koe-taasdb tɩ b tɩ yeel a Siyon sẽn yaa Amoor nebã rĩmã yaa:+ 22 “Bas-y tɩ d pasg y soolmã n looge. Tõnd pa na n bʋdg n kẽ pʋʋg wall viyn pʋʋg ye. D pa na n yũ bulg baa a yembr koom ye. Tõnd na n kẽna sor ning b sẽn boond tɩ Rĩmã sorã zugu, hal tɩ d wa yi yãmb soolmã.”+ 23 La a Siyon pa bas Israyɛll nebã tɩ b pasg a soolmã n loog ye. A pʋd n tigma a tãb-biisã fãa n yi n na n tɩ zab ne Israyɛll nebã we-raoogẽ wã. A waa Zahaaz n sɩng zabr ne Israyɛll nebã.+ 24 La Israyɛll nebã zaba ne-b ne sʋʋse,+ n tõog n deeg b soolmã,+ sẽn sɩng ne Arno kosoogã+ n tãag Zabok kosoogã+ sẽn pẽ Amon nebã soolmã, bala Yazɛɛr+ bee Amon nebã soolmã toadgẽ.+

25 Dẽ, Israyɛll nebã reesa tẽn-kãens fãa, n zĩnd Amoor nebã+ tẽnsã fãa pʋsẽ, rat n yeel tɩ Hɛsbon ne tẽns nins a sẽn so wã* fãa pʋsẽ. 26 Bala Hɛsbon ra yaa Amoor nebã rĩm a Siyon galʋ-tẽnga. Yaa Siyon-kãng la sẽn zab ne Mowaab rĩmã n deeg a soolmã fãa n tãag Arno longã. 27 Yaa rẽ yĩng la b sẽn mi n wẽ yel-bũnd n yeele:

“Wa-y Hɛsbonne.

Bɩ b me a Siyon galʋ-tẽngã, t’a lugl kãn-kãe.

28 Bala bugum n yi Hɛsbonne. Bug-witim n yi a Siyon tẽngẽ wã.

A rɩɩ Aar sẽn yaa Mowaab tẽngã, ne Arno kunkubã zu-soben-dãmbã.

29 Mowaabe, fo na n paama toogo! Yãmb a Kemos neba,+ b na n sãama yãmba!

A kɩtame t’a kom-dibli wã lebg neb sẽn lamsde, la a kɩt t’a kom-pugli wã lebg Amoor nebã rĩm a Siyon yembse.

31 Woto, Israyɛll nebã zĩnda Amoor nebã soolmã pʋgẽ. 32 A Moyiiz tʋma neb tɩ b tɩ soos n ges Yazɛɛre.+ Israyɛll nebã zab n deega tẽns nins a sẽn so wã,* n dig Amoor neb nins sẽn da be be wã. 33 Rẽ poore, b lebgame n dɩk Basan sore. La Basan rĩm a Oog+ yii ne a tãb-biisã fãa n wa seg-b Edreyi+ n na n zabe. 34 A Zeova yeela a Moyiiz yaa: “Ra zoe-a ye.+ Bala mam na n dɩka yẽ ne a tãb-biisã fãa n paas a soolmã n ning fo nugẽ.+ Fo na n maana yẽ wa fo sẽn maan Amoor nebã rĩm a Siyon sẽn da be Hɛsbonnã.”+ 35 Dẽ, b kʋʋ yẽ, a kom-dibli wã ne a tãb-biisã fãa, hal t’a ned baa a ye pa kelle,+ la b reeg a soolmã.+

22 Rẽ poore, Israyɛll nebã yikame n tɩ tilg b sik-zĩigã Mowaab we-rasempʋɩɩgã sẽn yaa tẽn-nabrã pʋgẽ, Zʋrdẽ kʋɩlgã rʋʋnde, n tees Zeriko.+ 2 A Zipoor biig a Balak+ yãa bũmb nins fãa Israyɛll nebã sẽn maan Amoor nebã, 3 tɩ Mowaab nebã yɛɛs wʋsg Israyɛll nebã yĩnga, bala b ra yaa wʋsgo. Sɩd me, Mowaab nebã ra zoeta Israyɛll nebã wʋsg la b kis-ba.+ 4 Rẽ n so tɩ Mowaab nebã yeel Madiyã kãsem-dãmbã yaa:+ “Nin-kãensã na n dɩɩ d soolmã fãa, wa loalg sẽn wãbd yamdo.”

A Zipoor biig a Balak n da yaa Mowaab rĩm wakat kãnga. 5 A tʋma koe-taasdb tɩ b tɩ bool a Beoor biig a Balaam a ba-yirã sẽn yaa Petoor+ sẽn be Efrat kʋɩlgã* noorã. A yeelame tɩ b togs-a yaa: “Neb n yi Ezɩpti. B pida tẽngã* fãa,+ la b tilga b sik-zĩigã n tees mam soolmã. 6 M bõos tɩ y wa kãab nin-kãens wẽng n kõ-ma,+ bala b pãngã yɩɩda maam. Tõe tɩ rẽ la m na n tõog-ba, n dig-b n yiis soolmã. Bala mam mii vẽeneg tɩ yãmb sẽn ning a soab bark tara barka, la tɩ yãmb sẽn kãab a soab wẽnga, kãab wẽng bee a zugu.”

7 Dẽ, Mowaab kãsem-dãmbã ne Madiyã kãsem-dãmbã rɩka sor ne bagrã bʋgb yaoodo, n kẽng a Balaam+ nengẽ n tɩ taas-a a Balak koɛɛgã. 8 T’a yeel-b yaa: “Pa-y ka yʋngã, tɩ m na n togs-y-la gomd ning fãa a Zeova sẽn na n togs-mã.” Dẽ, Mowaab nanambsã paa be ne a Balaam.

9 Wẽnnaam waa a Balaam nengẽ, n sok-a yaa:+ “Nin-kãensã sẽn be ne foomã yaa ãnda rãmba?” 10 A Balaam yeela Wẽnnaam yaa: “A Zipoor biig a Balak sẽn yaa Mowaab rĩmã tʋma koɛɛg n yeel maam yaa: 11 ‘Neb nins sẽn yi Ezɩptã pida tẽngã* fãa. Wa kãab-b wẽng n kõ-ma,+ tɩ tõe tɩ rẽ la m na n tõog n zab ne-ba, n dig-ba.’” 12 La Wẽnnaam yeela a Balaam yaa: “Fo pa segd n tũ-b n kẽng ye. Fo pa segd n kãab nin-kãensã wẽnga, bala b tara barka.”+

13 A Balaam yika yibeoogã n yeel nanambs nins a Balak sẽn tʋmã yaa: “Leb-y y soolmẽ wã, bala a Zeova zãgsame tɩ m kõn tũ yãmb n kẽng ye.” 14 Mowaab nanambsã rɩka sor n lebg n kẽng a Balak nengẽ n tɩ yeele: “A Balaam zãgsame t’a kõn tũ tõnd n wa ye.”

15 La a Balak le tʋma nanambse. B sõorã ne b naamã yɩɩda pipi rãmbã. 16 B kẽnga a Balaam nengẽ n tɩ yeel-a yaa: “Ad bũmb ning a Zipoor biig a Balak sẽn yeele: ‘M bõos tɩ y ra bas tɩ baa fʋɩ gɩdg-y tɩ y ra wa mam nengẽ ye. 17 Bala mam na n keoo yãmb wʋsgo, la m maan bũmb ning fãa yãmb sẽn na n yeel tɩ m maane. Woto wã, m bõos tɩ y wa kãab nin-kãensã wẽng n kõ-ma.’” 18 La a Balaam yeela a Balak tʋm-tʋmdbã yaa: “Baa a Balak sã n kõ maam a mengã roog sẽn pid ne wanzuri la sãnem, mam pa tõe n maan baa fʋɩ n zʋʋg mam Wẽnnaam a Zeova noorã, tɩ yaa bũmb sẽn yaa bilf wall kãseng ye.+ 19 La m bõos tɩ yãmb me pa ka yʋngã, sẽn na yɩl tɩ m bao n bãng gomd ning a Zeova sẽn na n yeel-m yɛsa.”+

20 Wẽnnaam waa a Balaam nengẽ ne yʋngã n yeel-a: “Nin-kãensã sã n waame n na n bool foom, bɩ f tũ-b n kẽnge. La fo segd n togsa goam nins mam sẽn na n yeel foomã bala.”+ 21 A Balaam yika yibeoogã n ning a bõangã* gaare, n tũ Mowaab nanambsã n looge.+

22 La Wẽnnaam sũurã puuga a sẽn loogã yĩnga. Dẽ, a Zeova malɛkã tɩ yalsa sorã zug n na n gɩdg-a. A Balaam ra zaoo a bõangã, t’a tʋm-tʋmdb a yiib tũud-a. 23 Bõangã sẽn yã a Zeova malɛkã sẽn yas sorã zug n zãad sʋʋgã, a bʋdgame n pãrg weoogã. La a Balaam sɩnga bõangã pãbre, sẽn na yɩl t’a lebs n dɩk sorã. 24 Rẽ poore, a Zeova malɛkã tɩ yaasa so-bãaneg zugu, viyn pʋt a yiib sʋka, tɩ kug lals be kɩrems a yiibã. 25 Bõangã sẽn yã a Zeova malɛkã, a tɩ rɩdga lalgã, n duug a Balaam naoorã ne lalgã, t’a Balaam le sɩng a pãbre.

26 A Zeova malɛkã le loogame n tɩ yals zĩig sẽn yaa sẽka, tɩ weer kae n bʋdgd goabg wall rɩtg ye. 27 Bõangã sẽn yã a Zeova malɛkã, a gãanda tẽng ne a Balaam, t’a Balaam sũurã puug t’a pãbd-a ne a rasaarã n pa basdẽ ye. 28 A Zeova wa n kɩtame tɩ bõangã gome.*+ A soka a Balaam yaa: “Mam maana foo bõe tɩ fo pãb maam naoor a tãab fãa?”+ 29 T’a Balaam leok bõangã yaa: “Yaa fo sẽn yaal maamã yĩnga. Mam sã n da zãadẽ sʋʋga, m da na n kʋ-f lame!” 30 Tɩ bõangã le sok a Balaam yaa: “Mam pa fo bõang f sẽn sɩng n zao n tãag rũndã sɩda? Mam zoe n maana foom a buud sɩda?” T’a leok tɩ “ayo!” 31 Dẽ, a Zeova puka a Balaam ninã+ t’a yã a Zeova malɛkã sẽn yas sorã zug n zãad sʋʋgã. Zĩig pʋgẽ, a Balaam wõgemdame n fõgen a neng tẽnga.

32 Rẽ la a Zeova malɛkã yeel-a yaa: “Bõe yĩng tɩ fo pãb bõangã naoor a tãab fãa? Yaa mam mengã n yi n na n gɩdg foo. Bala fo sẽn maandã pa zems ne mam daabã ye.+ 33 Bõangã yãa maam n lak n bas maam naoor a tãab fãa.+ Mams wa a sã n da pa lak n bas maam. Woto tɩ mam kʋʋ foo, n bas bõangã!” 34 A Balaam yeela a Zeova malɛkã yaa: “Mam maana yel-wẽnde. Bala mam da pa mi tɩ yaa yãmb n yas sorã zug n na n seg maam ye. Sã n mik tɩ mam so-toakã pa ta yãmb yam, m na n lebgame.” 35 La a Zeova malɛkã yeela a Balaam yaa: “Tũ rapã n kẽnge. La fo segd n togsa goam nins mam sẽn na n yeel foomã bala.” Dẽ, a Balaam kell n tũu nanambs nins a Balak sẽn tʋmã.

36 A Balak sẽn wa n wʋm t’a Balaam watame wã, a yii tao-tao n tɩ seg-a Mowaab galʋ-tẽngẽ wã. Tẽn-kãng bee Arno kosoogã noore, soolmã toadgẽ. 37 A Balak yeela a Balaam yaa: “Mam tʋmame tɩ b wa bool yãmba. Bõe yĩng tɩ yãmb pa wa? Yãmb tagsdame tɩ mam pa tõe n keo yãmb wʋsg la?”+ 38 T’a Balaam yeel a Balak yaa: “Be neere. Mam waame masã. La mam tara sor n na n yeel bũmb sɩda? Yaa goam nins Wẽnnaam sẽn ningd mam noorẽ wã bal la m tõe n togse.”+

39 A Balaam tũu a Balak n kẽng Kiryat-huzote. 40 A Balak kʋʋ niis la piis n maan maando, la a yãk nemdã n tʋm tɩ b tɩ kõ a Balaam ne nanambs nins sẽn da be ne-a wã. 41 Vẽkembeoogã yibeoogo, a Balak talla a Balaam n dʋ Bamot-baalle. A sã n yas be, a tõe n yãa Israyɛll nebã fãa.+

23 A Balaam yeela a Balak yaa: “Maan-y tẽn-kug a yopoe ka,+ la y bao lols a yopoe ne pe-raad a yopoe n wa kõ maam.” 2 A Balak yɩɩ tao-tao n maan wa a Balaam sẽn yeelã. Yẽ ne a Balaam yõka loalg la pe-raoog n maan maoong tẽn-kugr fãa zugu.+ 3 A Balaam yeela a Balak yaa: “Yaas-y y maoong sẽn yõogd bugmã sɛɛg ka, tɩ m zãag bilfu. Tõe t’a Zeova na n vẽnega a meng ne maam. A sẽn yeel maam bũmb ning fãa, m na n togs-y lame.” Dẽ, a Balaam tɩ rʋʋ kunkubr bũmb sẽn pa yit a zugu.

4 Wẽnnaam vẽnega a meng ne a Balaam+ t’a yeel-a yaa: “Mam maana tẽn-kug a yopoe wã n tong taaba, la m kʋ loalg ne pe-raoog n maan maoong tẽn-kugr fãa zugu.” 5 A Zeova ninga goam a Balaam noorẽ wã, la a yeele:+ “Leb a Balak nengẽ, la yaa woto la fo segd n yeele.” 6 Dẽ, a lebame n tɩ mik t’a Balak ne Mowaab nanambsã fãa yasa a Balak maoong sẽn yõogd bugmã sɛɛgẽ. 7 A togsa Wẽnnaam koɛɛgã n yeele:+

‘Wa n kãab-y a Zakoob yagensã wẽng n kõ-ma.

Wa n sãbs-y Israyɛll nebã.’+

 8 Mam na n yɩɩ wãn n kãab neb Wẽnnaam sẽn pa kãab wẽnga?

Mam na n yɩɩ wãn n sãbs neb a Zeova sẽn pa sãbse?+

11 A Balak yeela a Balaam yaa: “Yaa bõe la yãmb sẽn maan maam woto wã? Mam boola yãmb tɩ y wa kãab mam bɛɛbã wẽnga. La yãmb pa maand baa fʋɩ tɩ pa b bark ningr ye.”+ 12 T’a sok yaa: “Mam pa segd n togs bũmb ning fãa a Zeova sẽn ning mam noorẽ wã sɩda?”+

13 A Balak yeel-a lame: “M bõos tɩ y tũ maam n kẽng zĩig a to y sẽn tõe n yã-ba. Yãmb na n yãa b neb kẽer bala. Yãmb pa na n yã b fãa ye. Yaas-y be n kãab-b wẽng n kõ-ma.”+ 14 Woto, a tall-a lame n kẽng Zofim weoogẽ wã, Pisga tãngã zugu,+ n maan tẽn-kug a yopoe, la a kʋ loalg ne pe-raoog tẽn-kugr fãa zugu.+ 15 A Balaam yeela a Balak yaa: “Yaas-y y maoong sẽn yõogd bugmã sɛɛg ka, tɩ m na n kẽngame n tɩ gom ne Wẽnnaam.” 16 A Zeova vẽnega a meng ne a Balaam, n ning goam a Balaam noorẽ wã,+ la a yeele: “Leb a Balak nengẽ, la yaa woto la fo segd n yeele.” 17 A lebame n tɩ mik t’a Balak ne Mowaab nanambsã fãa yasa a Balak maoong sẽn yõogd bugmã sɛɛg n gũudẽ. T’a Balak sok-a yaa: “A Zeova yeelame tɩ bõe?” 18 A togsa Wẽnnaam koɛɛgã n yeele:+

“Balake, yik-y n kelg-y-yã.

A Zipoor biiga, kelg-y maam.

A sã n yeel bũmbu, a pa na n maan-a sɩda?

A sã n gome, a pa na n pids a gomdã sɩda?+

22 Wẽnnaam yiis-b-la Ezɩpti.+

Wẽnnaam yaa wa we-naaf yɩɩl b yĩnga.+

Masã menga, b tõe n yeela a Zakoob yagensã sẽn yaa Israyɛll nebã wɛɛngẽ yaa:

‘Ges-y bũmb ning Wẽnnaam sẽn maanã!’

25 T’a Balak yeel a Balaam yaa: “Yãmb sã n pa tõe n kãab-b wẽnga, bɩ y ra ning-b bark wɛ!” 26 A Balaam soka a Balak yaa: “Mam pa yeel yãmb tɩ ‘m na n maana bũmb ning fãa a Zeova sẽn na n yeelã’ sɩda?”+

27 T’a Balak yeel a Balaam: “M bõos tɩ y wa tɩ m tall-y n kẽng zĩig a to. Tõe tɩ beenẽ, na n taa Wẽnnaam yam t’a bas tɩ y kãab-b wẽng n kõ-ma.”+ 28 Woto, a Balak talla a Balaam n tɩ rʋ Pewoor tãngã sẽn teesd Zesimonnã.*+ 29 Dẽ, a Balaam yeela a Balak yaa: “Maan-y tẽn-kug a yopoe ka, la y bao lols a yopoe ne pe-raad a yopoe n wa kõ maam.”+ 30 A Balak maana wa a Balaam sẽn yeelã. A yõka loalg ne pe-raoog n maan maoong tẽn-kugr fãa zugu.

24 A Balaam sẽn wa n yã tɩ Israyɛll nebã bark ningr nooma a Zeova wã,* a pa le bao bũmb sẽn wilgd tɩ wẽng n na n paam-b ye.+ A wẽnemda a neng n tees we-raoogã. 2 A Balaam sẽn zẽk a neng n yã Israyɛll nebã sẽn tilg b sik-zĩigã buud-buudã,+ Wẽnnaam vʋʋsmã siga a zugu.+ 3 Dẽ, a togsa Wẽnnaam koɛɛgã n yeele:+

10 Dẽ, a Balak sũurã puuga ne a Balaam. A Balak wẽe nug-pogse, la a yeel a Balaam yaa: “Mam boola yãmb tɩ y wa kãab mam bɛɛbã wẽnga.+ La naoor a tãabã fãa, yãmb pa maand baa fʋɩ tɩ pa b bark ningr ye. 11 Kẽng-y n kuil-y tao-tao. Mam da rat n keo-y-la wʋsgo,+ la a Zeova monga yãmb keoore.”

12 A Balaam leoka a Balak yaa: “Mam yeela koe-taasdb nins yãmb sẽn tʋmã yaa: 13 ‘Baa a Balak sã n kõ maam a roogã sẽn pid ne wanzuri la sãnem, mam pa tõe n maan baa fʋɩ wa sẽn zems mam daabo,* n zʋʋg a Zeova noorã, tɩ yaa sõma wall wẽng ye. Yaa bũmb ning a Zeova sẽn na n yeel maamã bal la m na n togse.’+ 14 Masã, mam na n leba m nebẽ wã. Bɩ y wa tɩ m wilg-y bũmb ning nin-kãensã sẽn na n maan yãmb buudã beoog-daare.”* 15 Dẽ, a togsa Wẽnnaam koɛɛgã n yeele:+

20 A Balaam sẽn yã Amalɛkã, a kell n togsa Wẽnnaam koɛɛgã n yeele:

21 A sẽn yã Kɛn nebã,+ a kell n togsa Wẽnnaam koɛɛgã n yeele:

“Yãmb sik-zĩigã paamda koglgo. Yãmb gãagã zĩig lugla pĩigã zugu.

22 La ned n na n yõog Kayin ne bugum.

Na n kaoosa yʋʋm a wãn tɩ Asiiri nebã yaool n tall yãmb n kẽng yembdo?”

23 A kell n togsa Wẽnnaam koɛɛgã n yeele:

“Kayto! Wakat ning Wẽnnaam sẽn na n maan dẽ wã, ãnda n na n põse?

La yẽ me na n wa sãama zãnga.”

25 Rẽ poore, a Balaam+ yikame n looge, t’a Balak me rɩk a sore.

25 Israyɛll nebã sẽn wa n be Sitimmã,+ b wa n sɩnga yoob ne Mowaab kom-pugli wã.+ 2 Kom-pugli wã bool-b lame tɩ b wa wakat ning Mowaab nebã sẽn maand maand n kõt b wẽnnaam-dãmbã.+ Israyɛll nebã tɩ rɩɩme la b wõgemd b wẽnnaam-dãmbã taoore.+ 3 Woto, b tɩ naag n waooga Pewoor Baallã,+ t’a Zeova sũurã puug ne-ba. 4 A Zeova yeela a Moyiiz yaa: “Yõg nin-kãensã taoor dãmbã fãa n kʋ, la f luul b kũ-rãmbã a Zeova taoor ne wĩntoogo, sẽn na yɩl t’a Zeova sũurã sẽn puud ne Israyɛll nebã sigi.” 5 Dẽ, a Moyiiz yeela Israyɛll bʋ-kaoodbã yaa:+ “Yãmb ned kam fãa segd n kʋʋ a neb nins sẽn tɩ naag n waoog Pewoor Baallã.”+

6 La Israyɛll nebã sẽn wa n be sɛk-roogã rignoor n yãbdã, Israyɛll ned a ye n tall Madiyã bi-pugl+ n wa a saam-biisã sʋka, a Moyiiz ne Israyɛll nebã fãa nifẽ. 7 A Eleazaar biig a Fineyaas+ sẽn yaa maan-kʋʋd a Aarõ yagengã sẽn yã rẽ wã, zĩig pʋgẽ, a yika nin-buiidã sʋka, n dɩk kãnde. 8 A pʋgla Israyɛll nedã n tɩ kẽ fu-roogẽ wã n kõs yẽ ne pagã fãa. Yɩɩ pagã pendã* la a kõs-yã. Dẽ, bã-loangdgã sẽn da yõkd Israyɛll nebã saame.+ 9 Neb nins bã-loangdgã sẽn kʋ wã sõor taa tus-pisi la a naase.+

10 Rẽ poore, a Zeova yeela a Moyiiz yaa: 11 “A Eleazaar biig a Fineyaas+ sẽn yaa maan-kʋʋd a Aarõ yagengã kɩtame tɩ m sũurã sẽn da puud ne Israyɛll nebã sigi. Bala a pa sak tɩ b na n waoog wẽnnaam a to n zʋʋg maam ye.+ Yaa rẽ yĩng la mam sẽn pa sãam Israyɛll nebã, baa mam sẽn dat tɩ b waoog maam m ye tãa balã.+ 12 Rẽ wã, yeel-a tɩ ‘mam na n maana laafɩ kaool ne-a. 13 Na n yɩɩ kaool sẽn paad wakat fãa sẽn na yɩl tɩ yẽ ne a kambã la a yagensã sẽn na n pʋgl yẽ wã yɩ maan-kʋʋdba.+ Bala a pa sak tɩ b na n waoog wẽnnaam a to n zʋʋg maam ye.+ Sẽn paase, a maana paasg* Israyɛll nebã yĩnga.’”

14 Israyɛll ned ning b sẽn naag Madiyã bi-puglã n kʋ wã yɩɩ a Salu biig a Zimri sẽn da yaa Sɩmeyõ buudã roog a ye naabã. 15 Madiyã bi-pugl ning b sẽn kʋ wã yɩɩ a Zʋʋr+ biig a Kozbi. A Zʋʋr ra yaa Madiyã+ buudã rot sull a ye taoor soaba.

16 A Zeova wa n yeela a Moyiiz yaa: 17 “Zab ne Madiyã nebã n kʋ-ba.+ 18 Bala b maana sɩlem n kɩt tɩ yãmb nams Pewoor+ yellã poorẽ, la a Kozbi sẽn yaa Madiyã naab a yembr bi-puglã yellã poorẽ. Yaa b tão ning b sẽn kʋ+ bã-loangdg ning Pewoor+ yellã sẽn wa ne wã sasa wã.”

26 Bã-loangdgã poore,+ a Zeova yeela a Moyiiz ne maan-kʋʋd a Aarõ biig a Eleazaar yaa: 2 “Sõd-y Israyɛll nin-buiidã fãa wa sẽn zems b buudã roto. Yaa sẽn tar-b yʋʋm pisi n tar n dabdã, rat n yeel tɩ neb nins fãa sẽn tõe n naag Israyɛll tãb-biisã.”+ 3 Dẽ, a Moyiiz ne maan-kʋʋd a Eleazaar+ goma ne nin-buiidã Mowaab we-rasempʋɩɩgã+ sẽn yaa tẽn-nabrẽ wã. Rẽ tɩ b bee Zʋrdẽ kʋɩlgã rʋʋnde, zĩig sẽn pa zãr ne Zeriko.+ B yeelame: 4 “Sõd-y nin-buiidã. Yaa sẽn tar-b yʋʋm pisi n tar n dabdã, wa a Zeova sẽn yeel a Moyiizã.”+

Ad Israyɛll neb nins sẽn yi Ezɩptã: 5 A Rubɛn+ sẽn yaa a Israyɛll bi-kãsengã buudã yagensã+ yaa: Hanok buudã sẽn yaa a Hanok yagensã. Palu buudã sẽn yaa a Palu yagensã, 6 Ɛsron buudã sẽn yaa a Ɛsron yagensã, la Karmi buudã sẽn yaa a Karmi yagensã. 7 Bãmb n yaa Rubɛn buudã roto. B neb nins yʋy b sẽn gʋlsã sõor yɩɩ tus-pis-naas la a tãabo, la kobs-yopoe la pis-tã.+

8 A Palu biigã yɩɩ a Eliyaabe. 9 A Eliyaab kom-dibli wã yɩɩ a Nemuwɛlle, a Datã la a Abiram. Yaa Datã-kãng ne Abiram-kãng la sẽn zab ne a Moyiiz+ la a Aarõ, la sẽn naag a Koore sullã+ wakat ning b sẽn zab ne a Zeova wã.+ B ra yaa rap b sẽn yãk nin-buiidã sʋka.

10 Tẽngã yaaga a noorã n vel-ba. La a Koore kii ne a poorẽ dãmbã, wakat ning bugmã sẽn dɩ neb kobs-yi la pis-nu wã.+ Bũmb ning sẽn paam-bã yɩɩ keoogr neb a taabã yĩnga.+ 11 La a Koore kom-dibli wã pa ki ye.+

12 Ad a Sɩmeyõ+ yagensã wa sẽn zems b buudu: Nemuwɛll buudã sẽn yaa a Nemuwɛll yagensã, Yamin buudã sẽn yaa a Yamin yagensã, Yakin buudã sẽn yaa a Yakin yagensã, 13 Zeera buudã sẽn yaa a Zeera yagensã, la Sawull buudã sẽn yaa a Sawull yagensã. 14 Bãmb n yaa Sɩmeyõ buudã roto. B sõorã yɩɩ tus-pisi la a yiibu, la kobs-yi.+

15 Ad a Gaad+ yagensã wa sẽn zems b buudu: Zefon buudã sẽn yaa a Zefon yagensã, Hagi buudã sẽn yaa a Hagi yagensã, Suni buudã sẽn yaa a Suni yagensã, 16 Ozni buudã sẽn yaa a Ozni yagensã, Eri buudã sẽn yaa a Eri yagensã, 17 Arood buudã sẽn yaa a Arood yagensã, la Aareli buudã sẽn yaa a Aareli yagensã. 18 Bãmb n yaa a Gaad yagensã roto. B neb nins yʋy b sẽn gʋlsã sõor yɩɩ tus-pis-naase, la kobs-nu.+

19 A Zida+ kom-dibli wã yɩɩ a Ɛɛr ne a Onanne.+ La a Ɛɛr ne a Onan kii Kanaã+ soolmẽ wã. 20 Ad a Zida yagensã wa sẽn zems b buudu: Sela buudã sẽn yaa a Sela+ yagensã, Perɛɛz buudã sẽn yaa a Perɛɛz+ yagensã, la Zeera+ buudã sẽn yaa a Zeera yagensã. 21 A Perɛɛz yagensã yɩɩ Ɛsron buudã sẽn yaa a Ɛsron+ yagensã, la Hamull+ buudã sẽn yaa a Hamull yagensã. 22 Bãmb n yaa a Zida yagensã roto. B neb nins yʋy b sẽn gʋlsã sõor yɩɩ tus-pis-yopoe la a yoobe, la kobs-nu.+

23 Ad a Isakaar+ yagensã wa sẽn zems b buudu: Tola+ buudã sẽn yaa a Tola yagensã, Puuva buudã sẽn yaa a Puuva yagensã, 24 Yasuub buudã sẽn yaa a Yasuub yagensã, la Simron buudã sẽn yaa a Simron yagensã. 25 Bãmb n yaa a Isakaar yagensã roto. B neb nins yʋy b sẽn gʋlsã sõor yɩɩ tus-pis-yoob la a naase, la kobs-tã.+

26 Ad a Zabulõ+ yagensã wa sẽn zems b buudu: Serɛɛd buudã sẽn yaa a Serɛɛd yagensã, Elon buudã sẽn yaa a Elon yagensã, la Yaleyɛll buudã sẽn yaa a Yaleyɛll yagensã. 27 Bãmb n yaa Zabulõ buudã roto. B neb nins yʋy b sẽn gʋlsã sõor yɩɩ tus-pis-yoobe, la kobs-nu.+

28 Ad a Zozɛf+ kambã la a yagensã wa sẽn zems b buudu: A Manase ne a Efrayim.+ 29 A Manase+ yagensã yɩɩ Makɩɩr+ buudã sẽn yaa a Makɩɩr yagensã. A Makɩɩr roga a Galaade.+ A Galaad yagensã yaa Galaad buudã. 30 A Galaad yagensã yɩɩ Yezɛɛr buudã sẽn yaa a Yezɛɛr yagensã, Helɛk buudã sẽn yaa a Helɛk yagensã, 31 Asriyɛll buudã sẽn yaa a Asriyɛll yagensã, Sikɛm buudã sẽn yaa a Sikɛm yagensã, 32 Semida buudã sẽn yaa a Semida yagensã, la Hefɛɛr buudã sẽn yaa a Hefɛɛr yagensã. 33 La a Hefɛɛr biig a Zelofehaad pa rog kom-dibli ye. Yɩɩ kom-pugli bala.+ A Zelofehaad+ kom-pugli wã yʋy yaa a Maala, a Nowa, a Ogla, a Milka, la a Tɩrza. 34 Bãmb n yaa a Manase yagensã roto. B neb nins yʋy b sẽn gʋlsã sõor yɩɩ tus-pis-nu la a yiibu, la kobs-yopoe.+

35 Ad a Efrayim+ yagensã wa sẽn zems b buudu: Sutela+ buudã sẽn yaa a Sutela yagensã, Bekɛɛr buudã sẽn yaa a Bekɛɛr yagensã, la Tahãn buudã sẽn yaa a Tahãn yagensã. 36 A Sutela yagensã yɩɩ Eran buudã sẽn yaa a Eran yagensã. 37 Bãmb yaa a Efrayim yagensã roto. B neb nins yʋy b sẽn gʋlsã sõor yɩɩ tus-pis-tã la a yiibu, la kobs-nu.+ Bãmb n yaa a Zozɛf yagensã wa sẽn zems b buudu.

38 Ad a Bẽnzame+ yagensã wa sẽn zems b buudu: Bela+ buudã sẽn yaa a Bela yagensã, Asbɛll buudã sẽn yaa a Asbɛll yagensã, Ahiram buudã sẽn yaa a Ahiram yagensã, 39 Sefufam buudã sẽn yaa a Sefufam yagensã, la Ufam buudã sẽn yaa a Ufam yagensã. 40 A Bela kom-dibli wã yɩɩ a Ard ne a Naama.+ A Ard yagensã yaa Ard buudã, t’a Naama yagensã yaa Naama buudã. 41 Bãmb n yaa a Bẽnzame yagensã wa sẽn zems b roto. B neb nins yʋy b sẽn gʋlsã sõor yɩɩ tus-pis-naas la a nu, la kobs-yoobe.+

42 Ad a Dan+ yagensã wa sẽn zems b buudu: Suwam buudã sẽn yaa a Suwam yagensã. Bãmb n yaa a Dan yagensã wa sẽn zems b roto. 43 Suwam buudã rot fãa neb yʋy b sẽn gʋlsã sõor yɩɩ tus-pis-yoob la a naase, la kobs-naase.+

44 Ad a Asɛɛr+ yagensã wa sẽn zems b buudu: Yimna buudã sẽn yaa a Yimna yagensã, Isvi buudã sẽn yaa a Isvi yagensã, la Beriya buudã sẽn yaa a Beriya yagensã. 45 A Beriya yagensã yɩɩ Hebɛɛr buudã sẽn yaa a Hebɛɛr yagensã, la Malkiyɛll buudã sẽn yaa a Malkiyɛll yagensã. 46 A Asɛɛr bi-puglã yʋʋr la a Seera. 47 Bãmb n yaa a Asɛɛr yagensã roto. B neb nins yʋy b sẽn gʋlsã sõor yɩɩ tus-pis-nu la a tãabo, la kobs-naase.+

48 Ad a Naftali+ yagensã wa sẽn zems b buudu: Yazeyɛll buudã sẽn yaa a Yazeyɛll yagensã, Guni buudã sẽn yaa a Guni yagensã, 49 Yesɛɛr buudã sẽn yaa a Yesɛɛr yagensã, la Silɛm buudã sẽn yaa a Silɛm yagensã. 50 Bãmb n yaa a Naftali yagensã wa sẽn zems b roto. B neb nins yʋy b sẽn gʋlsã sõor yɩɩ tus-pis-naas la a nu, la kobs-naase.+

51 Ad Israyɛll neb nins fãa yʋy b sẽn gʋlsã sõore: Tus-kobs-yoob la a ye, la kobs-yopoe la pis-tã.+

52 Rẽ poore, a Zeova yeela a Moyiiz yaa: 53 “Yaa bu-kãensã la yãmb segd n pʋɩ soolmã n kõ wa sẽn zems yʋyã b sẽn gʋlsã* tɩ yɩ b pʋɩɩre.+ 54 Buud neb sã n yaa wʋsgo, b pʋɩɩrã segd n yɩɩ bedre. La buud neb sã n pa waoogẽ, b pʋɩɩrã segd n yɩɩ bilfu.+ Buud fãa segd n paama pʋɩɩr sẽn zems a nebã b sẽn gʋlsã sõore. 55 La b segd n maana bãnd n pʋɩ soolmã.+ Buudã roog fãa segd n paama pʋɩɩr soolmã babg ning b sẽn kõ a buudã nebã pʋgẽ. 56 B segd n maana bãnd n bãng buud fãa pʋɩɩre, la b kõ tɩ zems buudã neb sõore.”

57 Ad Levi buudã+ neb nins yʋy b sẽn gʋlsã, wa sẽn zems b buudã roto: Gɛrson buudã sẽn yaa a Gɛrson yagensã, Kehat buudã+ sẽn yaa a Kehat yagensã, la Merari buudã sẽn yaa a Merari yagensã. 58 Ad Levi buudã neba: A Libni+ yagensã, a Ebrõ+ yagensã, a Mali+ yagensã, a Musi+ yagensã, la a Koore+ yagensã.

A Kehat roga a Amram.+ 59 A Amram pagã yɩɩ a Levi bi-pugl a Zokebɛɛde,+ a Levi pagã sẽn dog n kõ-a Ezɩpt soolmẽ wã. A Zokebɛɛd roga a Aarõ ne a Moyiiz la b tão a Miryam+ n kõ a Amram. 60 A Aarõ roga a Nadaab ne a Abiyu la a Eleazaar ne a Itamaare.+ 61 La a Nadaab ne a Abiyu kiime, b sẽn yõog wisd sẽn pa zems ne tõogã a Zeova taoorã+ yĩnga.

62 Neb nins fãa yʋy b sẽn gʋlsã sõor yɩɩ tus-pisi la a tãabo. Yɩɩ rap nins fãa sẽn zems kiuug n tar n dabdã.+ B pa gʋls b yʋyã n naag Israyɛll neb a taabã ye.+ Bala b pa segd n kõ-b pʋɩɩr Israyɛll nebã sʋk ye.+

63 Yɩɩ nin-kãensã yʋy la a Moyiiz ne maan-kʋʋd a Eleazaar sẽn gʋlsã, wakat ning b sẽn gʋls Israyɛll nebã yʋy Mowaab we-rasempʋɩɩgã sẽn yaa tẽn-nabrẽ wã. Rẽ tɩ b bee Zʋrdẽ kʋɩlgã rʋʋnde, zĩig sẽn pa zãr ne Zeriko. 64 La a Moyiiz ne maan-kʋʋd a Aarõ sẽn gʋls b rãmb yʋy b sẽn wa n sõt Israyɛll nebã Sinayi we-raoogẽ+ wã ned baa a ye pa naag ye. 65 Bala nin-kãens wɛɛngẽ, a Zeova ra yeelame: “B na n kii we-raoogẽ wã.”+ Sɩd me, sã n pa a Yefune biig a Kalɛɛb ne a Nun biig a Zozuwe, b ned baa a yembr ra pa ket ye.+

27 A Hefɛɛr biig a Zelofehaad+ sẽn yaa Manase buudã nedã kom-pugli wã kolgame. A Hefɛɛr yaa a Galaad biiga, t’a Galaad yaa a Makɩɩr biiga, t’a Makɩɩr yaa a Manase biiga, t’a Manase yaa a Zozɛf biiga. A Zelofehaad kom-pugli wã yaa a Maala, a Nowa, a Ogla, a Milka ne a Tɩrza. 2 B yaasa a Moyiiz taoore, maan-kʋʋd a Eleazaare, nanambsã+ la nin-buiidã fãa taoor sɛk-roogã rignoorẽ n yeele: 3 “Tõnd ba wã kii we-raoogẽ wã, la a pa naag neb nins sẽn naag taab n zab ne a Zeova, rat n yeel t’a Koore poorẽ dãmbã+ ye. Yaa yẽ meng yel-wẽn poorẽ la a sẽn ki wã. La a pa paam bi-ribl ye. 4 Bõe yĩng tɩ tõnd ba wã yʋʋr na n menem a buudã sʋka, a sẽn pa paam bi-riblã yĩnga? Kõ-y tõnd pʋɩɩr d ba wã ba-biisã sʋka.” 5 Dẽ, a Moyiiz talla b yellã n kẽng a Zeova taoore.+

6 T’a Zeova yeel a Moyiiz yaa: 7 “A Zelofehaad kom-pugli wã bee bʋʋm. Fo segd n maana f sẽn tõe fãa n kõ-b pʋɩɩr b ba wã ba-biisã sʋka. Fo segd n dɩka b ba wã pʋɩɩr n kõ-ba.+ 8 Sẽn paase, yeel Israyɛll nebã yaa: ‘Rao sã n ki n pa paam bi-ribla, yãmb segd n dɩka a rogem-pʋɩɩrã n kõ a bi-pugla. 9 La a sã n pa paam bi-pugla, yãmb na n dɩka a rogem-pʋɩɩrã n kõ a ba-biisã. 10 A sã n pa tar ba-biisi, yãmb na n dɩka a rogem-pʋɩɩrã n kõ a ba wã ba-biisi. 11 A ba wã sã n pa tar ba-biisi, yãmb na n dɩka a rogem-pʋɩɩrã n kõ a roagd ning sẽn kĩ ne-a n yɩɩdã, t’a sooge. Yam-yãk-kãngã na n yɩɩ noor Israyɛll nebã yĩnga, wa a Zeova sẽn yeel a Moyiizã.’”

12 Rẽ poore, a Zeova yeela a Moyiiz yaa: “Rʋ Abarim tãngã+ n ges soolem ning mam sẽn na n kõ Israyɛll nebã.+ 13 Fo sã n yã-a poore, fo na n kiime tɩ b mum foo wa b sẽn mum f yaab-rãmbã,+ wa sẽn yɩ to-to ne f ba-biig a Aarõ wã.+ 14 Bala nin-buiidã sẽn wa n zabd ne maam Zĩn we-raoogẽ wã, yãmb kɩɩsa mam noorã n pa waoog maam b taoore, wakat ning mam sẽn kõ-b koomã+ ye. Yɩɩ Meriba+ koomã sẽn be Kadɛɛsã,+ Zĩn we-raoogẽ wã.”+

15 T’a Moyiiz yeel a Zeova yaa: 16 “Bɩ a Zeova sẽn yaa Wẽnnaam ning sẽn kõt nebã fãa vɩɩmã yãk rao sẽn na n yɩ nin-buiidã taoor soaba, 17 t’a lʋɩt b taoor bũmb fãa pʋgẽ, la a wilgd-b sor b manesem fãa pʋgẽ, sẽn na yɩl t’a Zeova nin-buiidã ra wa lebg wa piis sẽn pa tar kɩɩm ye.” 18 Rẽ la a Zeova yeel a Moyiiz yaa: “Yãk a Nun biig a Zozuwe sẽn yaa rao sẽn tar minimã, n tik-a ne f nusi.+ 19 Rẽ poor bɩ f kɩt t’a yals maan-kʋʋd a Eleazaar ne nin-buiidã fãa taoore. Fo segd n yãk-a-la b nifẽ,+ t’a lebg taoor soaba. 20 Fo segd n yãka f ziirã bilf n kõ-a,+ sẽn na yɩl tɩ Israyɛll nebã fãa kelg-a.+ 21 A na n yalsda maan-kʋʋd a Eleazaar taoore, t’a Eleazaar tar Urimmã+ n sokd a Zeova a yĩng sẽn na yɩl n bãng a yam-yãkre. Yaa yẽ n na n kõt noor tɩ Israyɛll nebã yita, la a kõt noor tɩ b kẽedẽ, yẽ ne Israyɛll nebã fãa, rat n yeel tɩ nin-buiidã fãa.”

22 A Moyiiz maana wa a Zeova sẽn yeel-a wã. A talla a Zozuwe n tɩ yals maan-kʋʋd a Eleazaar ne nin-buiidã fãa taoore. 23 A Moyiiz tik-a-la ne a nusi, n yãk-a t’a lebg taoor soaba,+ wa a Zeova sẽn kɩt t’a togsã.+

28 Rẽ poore, a Zeova yeela a Moyiiz yaa: 2 “Gom ne Israyɛll nebã n yeel-ba: ‘Yãmb segd n modgdame n kõt maam m maoongã, rat n yeel tɩ mam dɩɩbã.* Yãmb segd n kõta mam maand nins sẽn maand ne bugum tɩ tar yũ-noog* mam yĩngã b wakate.’+

3 “Yeel-b yaa: ‘Ad maand nins sẽn maand ne bugmã yãmb sẽn na n kõt a Zeova wã: Daar fãa, yãmb segd n kõo pe-bi-raad a yiib sẽn pa tar zams la sẽn zems yʋʋmde, tɩ yɩ maoong sẽn yõogd bugum. Segd n yɩɩ wakat fãa.+ 4 Yãmb na n kʋʋ pe-bil a ye wã yibeoog tɩ yɩ maoongo, la y kʋ a to wã zĩ-sobdo,+ 5 n paas zom-bãaneg efa pʋɩɩr a ye pʋɩ piig zug* sẽn kalem ne oliiv kaam hĩn* pʋɩɩr a ye pʋɩ a naas zugu, tɩ yɩ kood biis kũuni.+ 6 Yaa maand sẽn yõogd bugum+ b sẽn segd n kõt wakat fãa tɩ tar yũ-noogo,* wa noor ning Wẽnnaam sẽn kõ Sinayi tãngẽ wã, rat n yeel tɩ maand b sẽn maand ne bugum n kõt a Zeova. 7 B segd n paasa divẽ kũun hĩn pʋɩɩr a ye pʋɩ a naas zug pe-bil+ fãa yĩnga. Yãmb na n pʋdga rãamã zĩ-sõngẽ wã tɩ yɩ divẽ kũun a Zeova yĩnga. 8 Yãmb na n kʋʋ pe-bil a to wã zĩ-sobdo. Yãmb na n paasa kood biis kũun wa yibeoogã kood biis kũunã, ne divẽ kũun wa yibeoogã divẽ kũunã. Yãmb na n kõo pe-bilã tɩ yɩ maoong b sẽn maand ne bugum tɩ tar yũ-noog* a Zeova+ yĩnga.

9 “‘La Vʋʋsg daarã+ maandã na n yɩɩ pe-bi-raad a yiib sẽn pa tar zams la sẽn zems yʋʋmde, n paas zom-bãaneg efa pʋɩ a yiib pʋɩ piig zug sẽn kalem ne kaam tɩ yɩ kood biis kũuni, ne divẽ kũuni. 10 Rẽ n yaa Vʋʋsg daarã maandã b sẽn yõogd bugmã, sẽn segd n paas wakat fãa maoong b sẽn yõogd bugmã ne a divẽ kũunã.+

11 “‘Kiuug fãa* sɩngr daare, yãmb na n kõo a Zeova lol-poal a yiibu, pe-raoog a ye, la pe-bi-raad a yopoe sẽn pa tar zams la sẽn zems yʋʋmde,+ tɩ yɩ maand sẽn yõogd bugum, 12 ne zom-bãaneg pʋɩ a tãab pʋɩ piig zug sẽn kalem ne kaam tɩ yɩ kood biis kũun+ loalg fãa yĩnga, la zom-bãaneg pʋɩ a yiib pʋɩ piig zug sẽn kalem ne kaam tɩ yɩ kood biis kũun pe-raoogã+ yĩnga, 13 n paas zom-bãaneg pʋɩɩr a ye pʋɩ piig zug sẽn kalem ne kaam tɩ yɩ kood biis kũun pe-bil fãa yĩnga. Rẽ fãa na n yɩɩ maand sẽn yõogd bugum tɩ tar yũ-noogo,*+ rat n yeel tɩ maand b sẽn maand ne bugum n kõ a Zeova. 14 Maan-kãens divẽ kũunã segd n yɩɩ hĩn pʋɩ-sʋk loalg fãa yĩnga,+ la hĩn pʋɩɩr a ye pʋɩ a tãab zug pe-raoogã yĩnga,+ ne hĩn pʋɩɩr a ye pʋɩ a naas zug pe-bil fãa yĩnga.+ Woto yaa kiuug fãa maand sẽn yõogd bugum, yʋʋmdã fãa pʋgẽ. 15 Sẽn paase, b segd n kʋʋ bull n kõ a Zeova tɩ yɩ yel-wẽnd maoongo, n paas maand sẽn yõogd bugmã b sẽn kõt wakat fãa wã, ne divẽ kũunã.

16 “‘Pipi kiuugã rasem piig la a naas-n-soabã na n yɩɩ a Zeova Pakã.+ 17 Ki-kãng rasem piig la a nu soabã na n yɩɩ tigri. Rasem a yopoe pʋgẽ, yãmb na n wãba bur sẽn pa ning rabɩlle.+ 18 Tigsg sẽn yaa sõng n na n zĩnd pipi daarã. Yãmb pa segd n tʋm tʋʋm-kɛgeng baa a yembr ye. 19 Yãmb na n kõo a Zeova maand sẽn yõogd bugum. Yaa lol-poal a yiibu, pe-raoog a ye, la pe-bi-raad a yopoe sẽn zems yʋʋmde. Yãmb segd n kõo rũms sẽn pa tar zamse.+ 20 Yãmb segd n kõo maandã ne kood biis kũuni. Yaa zom-bãaneg sẽn kalem ne kaam.+ Pʋɩ a tãab pʋɩ piig zug loalg fãa yĩnga, la pʋɩ a yiib pʋɩ piig zug pe-raoogã yĩnga. 21 Yãmb na n kõo pʋɩɩr a ye pʋɩ piig zug pe-bi a yopoe wã pe-bil fãa yĩnga, 22 n paas bʋʋg tɩ yɩ yel-wẽnd maoongo, sẽn na yɩl n maan paasg* yãmb yĩnga. 23 Yibeoogã maoong sẽn yõogd bugmã sẽn yaa wakat fãa maoong sẽn yõogd bugmã sẽn yãk a toogo, yãmb segd n kõo maan-kãensã me. 24 Yãmb na n kõo maan-kãensã daar fãa rasem a yopoe pʋgẽ tɩ yɩ rɩɩbo,* wa y sẽn na n maan to-to pipi daarã. Yaa maand b sẽn maand ne bugum tɩ tar yũ-noog* a Zeova yĩnga. Yãmb segd n kõ-b lame, n paas wakat fãa maoong sẽn yõogd bugmã, ne a divẽ kũunã. 25 Rasem a yopoe-n-soabã, yãmb segd n maana tigsg sẽn yaa sõngo.+ Yãmb pa segd n tʋm tʋʋm-kɛgeng baa a yembr ye.+

26 “‘Kẽebgã tigrã* daare,+ yãmb sã n wa na n kõ a Zeova y dẽenem kood biis kũunã,+ yãmb segd n maana tigsg sẽn yaa sõngo.+ Yãmb pa segd n tʋm tʋʋm-kɛgeng baa a yembr ye.+ 27 Yãmb segd n kõo a Zeova maand sẽn yõogd bugum tɩ tar yũ-noogo.* Yaa lol-poal a yiibu, pe-raoog a ye, la pe-bi-raad a yopoe sẽn zems yʋʋmde.+ 28 B kood biis kũunã na n yɩɩ zom-bãaneg sẽn kalem ne kaam. Pʋɩ a tãab pʋɩ piig zug loalg fãa yĩnga, la pʋɩ a yiib pʋɩ piig zug pe-raoogã yĩnga, 29 ne pʋɩɩr a ye pʋɩ piig zug pe-bi a yopoe wã pe-bil fãa yĩnga. 30 Y segd n kõo bull me sẽn na yɩl n maan paasg yãmb yĩnga.+ 31 Yãmb na n kõo maan-kãensã fãa, n paas wakat fãa maoong sẽn yõogd bugmã ne a kood biis kũunã. Segd n yɩɩ rũms sẽn pa tar zamse,+ ne b divẽ kũunã.

29 “‘Kiuug a yopoe-n-soabã pipi daare, yãmb segd n maana tigsg sẽn yaa sõngo. Yãmb pa segd n tʋm tʋʋm-kɛgeng baa a yembr ye.+ Yaa daar yãmb sẽn segd n peeb tãntãoogo.+ 2 Yãmb segd n kõo a Zeova maand sẽn yõogd bugum tɩ tar yũ-noogo.* Yaa lol-poll a yembre, pe-raoog a ye, la pe-bi-raad a yopoe sẽn zems yʋʋmde. B baa a ye pa segd n tall zang ye. 3 B kood biis kũunã na n yɩɩ zom-bãaneg sẽn kalem ne kaam. Efa pʋɩ a tãab pʋɩ piig zug loalgã yĩnga, pʋɩ a yiib pʋɩ piig zug pe-raoogã yĩnga, 4 ne pʋɩɩr a ye pʋɩ piig zug pe-bi a yopoe wã pe-bil fãa yĩnga. 5 Y segd n kõo boɛɛg sẽn yaa poll me tɩ yɩ yel-wẽnd maoongo, sẽn na yɩl n maan paasg* yãmb yĩnga. 6 Rẽ segd n paasa kiuug-kiuug maand sẽn yõogd bugmã ne b kood biis kũunã,+ la wakat fãa maoong sẽn yõogd bugmã ne a kood biis kũunã,+ n paas b divẽ kũunã+ wa sẽn zems noy nins b sẽn kõ rẽ wɛɛngẽ wã, tɩ tar yũ-noogo.* Yaa maand b sẽn maand ne bugum n kõ a Zeova.

7 “‘Kiuug a yopoe-n-soabã rasem piigã, yãmb segd n maana tigsg sẽn yaa sõngo,+ la y kibl y mense.* Yãmb pa segd n tʋm tʋʋmd baa a yembr ye.+ 8 Yãmb segd n kõo a Zeova maand sẽn yõogd bugum tɩ tar yũ-noogo.* Yaa lol-poll a yembre, pe-raoog a ye, la pe-bi-raad a yopoe sẽn zems yʋʋmde. B baa a ye pa segd n tall zang ye.+ 9 B kood biis kũunã na n yɩɩ zom-bãaneg sẽn kalem ne kaam. Pʋɩ a tãab pʋɩ piig zug loalgã yĩnga, pʋɩ a yiib pʋɩ piig zug pe-raoogã yĩnga, 10 ne pʋɩɩr a ye pʋɩ piig zug pe-bi a yopoe wã pe-bil fãa yĩnga. 11 Y segd n kõo bʋ-poll me tɩ yɩ yel-wẽnd maoongo, n paas Paasg daarã yel-wẽnd maoongã,+ ne wakat fãa maoong sẽn yõogd bugmã ne a kood biis kũunã, ne b fãa divẽ kũunã.

12 “‘Kiuug a yopoe-n-soabã rasem piig la a nu wã, yãmb segd n maana tigsg sẽn yaa sõngo. Yãmb pa segd n tʋm tʋʋm-kɛgeng baa a yembr ye. Yãmb segd n maana tigr a Zeova yĩng rasem a yopoe.+ 13 Yãmb segd n kõo a Zeova maand sẽn yõogd bugum,+ rat n yeel tɩ maand b sẽn maand ne bugum tɩ tar yũ-noogo.* Yaa lol-poal piig la a tãabo, pe-raad a yiibu, la pe-bi-raad piig la a naas sẽn zems yʋʋmde. B baa a ye pa segd n tall zang ye.+ 14 B kood biis kũunã na n yɩɩ zom-bãaneg sẽn kalem ne kaam. Pʋɩ a tãab pʋɩ piig zug lols piig la a tãabã loalg fãa yĩnga, pʋɩ a yiib pʋɩ piig zug pe-raad a yiibã pe-raoog fãa yĩnga, 15 ne pʋɩɩr a ye pʋɩ piig zug pe-bi piig la a naasã pe-bil fãa yĩnga. 16 Y segd n kõo bʋ-poll me tɩ yɩ yel-wẽnd maoongo, n paas wakat fãa maoong sẽn yõogd bugmã ne a kood biis kũunã, la a divẽ kũunã.+

17 “‘Rasem a yiib-n-soabã, na n yɩɩ lol-poal piig la a yiibu, pe-raad a yiibu, la pe-bi-raad piig la a naas sẽn zems yʋʋmde. B baa a ye pa segd n tall zang ye.+ 18 Yãmb na n naaga b kood biis kũunã ne divẽ kũun n kõ ne lolsã, pe-raadã la pe-bi wã wa sẽn zems b sõorã, la noy nins b sẽn kõ rẽ wɛɛngẽ wã. 19 Y segd n kõo bull me tɩ yɩ yel-wẽnd maoongo, n paas wakat fãa maoong sẽn yõogd bugmã ne a kood biis kũunã, la b fãa divẽ kũunã.+

20 “‘Rasem a tãab-n-soabã, na n yɩɩ lols piig la a ye, pe-raad a yiibu, la pe-bi-raad piig la a naas sẽn zems yʋʋmde. B baa a ye pa segd n tall zang ye.+ 21 Yãmb na n naaga b kood biis kũunã ne divẽ kũun n kõ ne lolsã, pe-raadã la pe-bi wã wa sẽn zems b sõorã, la noy nins b sẽn kõ rẽ wɛɛngẽ wã. 22 Y segd n kõo bʋʋg me tɩ yɩ yel-wẽnd maoongo, n paas wakat fãa maoong sẽn yõogd bugmã ne a kood biis kũunã, la a divẽ kũunã.+

23 “‘Rasem a naas-n-soabã, na n yɩɩ lols piiga, pe-raad a yiibu, la pe-bi-raad piig la a naas sẽn zems yʋʋmde. B baa a ye pa segd n tall zang ye.+ 24 Yãmb na n naaga b kood biis kũunã ne divẽ kũun n kõ ne lolsã, pe-raadã la pe-bi wã wa sẽn zems b sõorã, la noy nins b sẽn kõ rẽ wɛɛngẽ wã. 25 Y segd n kõo bull me tɩ yɩ yel-wẽnd maoongo, n paas wakat fãa maoong sẽn yõogd bugmã ne a kood biis kũunã, la a divẽ kũunã.+

26 “‘Rasem a nu soabã, na n yɩɩ lols a wɛ, pe-raad a yiibu, la pe-bi-raad piig la a naas sẽn zems yʋʋmde. B baa a ye pa segd n tall zang ye.+ 27 Yãmb na n naaga b kood biis kũunã ne divẽ kũun n kõ ne lolsã, pe-raadã la pe-bi wã wa sẽn zems b sõorã, la noy nins b sẽn kõ rẽ wɛɛngẽ wã. 28 Y segd n kõo bʋʋg me tɩ yɩ yel-wẽnd maoongo, n paas wakat fãa maoong sẽn yõogd bugmã ne a kood biis kũunã, la a divẽ kũunã.+

29 “‘Rasem a yoob-n-soabã, na n yɩɩ lols a nii, pe-raad a yiibu, la pe-bi-raad piig la a naas sẽn zems yʋʋmde. B baa a ye pa segd n tall zang ye.+ 30 Yãmb na n naaga b kood biis kũunã ne divẽ kũun n kõ ne lolsã, pe-raadã la pe-bi wã wa sẽn zems b sõorã, la noy nins b sẽn kõ rẽ wɛɛngẽ wã. 31 Y segd n kõo bʋʋg me tɩ yɩ yel-wẽnd maoongo, n paas wakat fãa maoong sẽn yõogd bugmã ne a kood biis kũunã, la a divẽ kũunã.+

32 “‘Rasem a yopoe-n-soabã, na n yɩɩ lols a yopoe, pe-raad a yiibu, la pe-bi-raad piig la a naas sẽn zems yʋʋmde. B baa a ye pa segd n tall zang ye.+ 33 Yãmb na n naaga b kood biis kũunã ne divẽ kũun n kõ ne lolsã, pe-raadã la pe-bi wã wa sẽn zems b sõorã, la noy nins b sẽn kõ rẽ wɛɛngẽ wã. 34 Y segd n kõo bʋʋg me tɩ yɩ yel-wẽnd maoongo, n paas wakat fãa maoong sẽn yõogd bugmã ne a kood biis kũunã, la a divẽ kũunã.+

35 “‘Rasem a nii-n-soabã, yãmb segd n maana tigsg sẽn yaa zalle. Yãmb pa segd n tʋm tʋʋm-kɛgeng baa a yembr ye.+ 36 Yãmb segd n kõo a Zeova maand sẽn yõogd bugum, rat n yeel tɩ maand b sẽn maand ne bugum tɩ tar yũ-noogo.* Yaa loalg a ye, pe-raoog a ye, la pe-bi-raad a yopoe sẽn zems yʋʋmde. B baa a ye pa segd n tall zang ye.+ 37 Yãmb na n naaga b kood biis kũunã ne divẽ kũun n kõ ne loalgã, pe-raoogã la pe-bi wã wa sẽn zems b sõorã, la noy nins b sẽn kõ rẽ wɛɛngẽ wã. 38 Y segd n kõo bʋʋg me tɩ yɩ yel-wẽnd maoongo, n paas wakat fãa maoong sẽn yõogd bugmã ne a kood biis kũunã, la a divẽ kũunã.+

39 “‘Yaa maan-kãensã la yãmb na n kõt a Zeova y tigã sasa.+ Yãmb segd n kõo y pʋleng maandã,+ la y yamleoog kũunã+ me tɩ yɩ y maand b sẽn yõogd bugum,+ n paas y kood biis kũunã,+ y divẽ kũunã,+ la y zems-n-taar maandã.’”+ 40 A Moyiiz togsa Israyɛll nebã bũmb nins fãa a Zeova sẽn yeel-a wã.

30 A Moyiiz goma ne Israyɛll buud toor-toorã taoor dãmb+ n yeel yaa: “Ad bũmb ning a Zeova sẽn yeele: 2 Rao sã n pʋlem+ a Zeova bũmbu, wall a wẽename+ t’a na n monga a meng bũmbu, a pa segd n lebs a noorã poorẽ ye.+ A segd n maana bũmb ning fãa a sẽn pʋlem t’a na n maaname wã.+

3 “Pʋg-sad sẽn ket a ba zakẽ sã n pʋlem a Zeova bũmbu, wall a wẽename t’a na n monga a meng bũmbu, 4 a ba wã sã n wa wʋm pʋlengã wall a sẽn wẽen t’a na n monga a meng bũmbã, n pa yeel tɩ bũmbu, pʋg-sadã segd n pidsa a sẽn pʋlmã fãa, la a mong a meng bũmb ning fãa a sẽn wẽen t’a na n monga a mengã. 5 La a ba wã sã n gɩdg-a wakat ning a sẽn wʋm pʋlems nins a sẽn maanã, wall a sẽn wẽen n na n mong a mengã, a pa segd n pids-b ye. A Zeova na n kõ-a-la sugri, bala a ba wã gɩdg-a lame.+

6 “La a sã n kuil sɩd a pʋlengã poore, wall a sẽn wẽen n pa yaas n tagsã poore, 7 t’a sɩdã wʋm dẽ n pa yeel tɩ bũmb daar ning a sẽn wʋmã, pagã segd n pidsa a pʋlengã, wall a mong a meng bũmb ning fãa a sẽn wẽen t’a na n monga a mengã. 8 La a sɩdã sã n gɩdg-a daar ning a sẽn wʋmã, a kɩtame tɩ pʋlengã wall a sẽn wẽen bũmb ning n pa yaas n tagsã lebg zaalem.+ A Zeova na n kõ-a-la sugri.

9 “La pʋg-kõor wall pag a sɩd sẽn bas sã n pʋlem t’a na n maana bũmbu, a segd n pidsa bũmb ning fãa a sẽn pʋlmã.

10 “La pag sẽn be a sɩd zakẽ sã n pʋlem t’a na n maana bũmbu, wall a wẽen t’a na n monga a meng bũmbu, 11 t’a sɩdã wʋm dẽ n pa yeel tɩ bũmb bɩ n pa yeel t’a pa sake, a pagã segd n maana bũmb ning a sẽn pʋlmã, wall a mong a meng bũmb ning fãa a sẽn wẽen t’a na n monga a mengã. 12 La daar ning a sɩdã sẽn wʋmã, a sã n yeel tɩ bũmb ning fãa pagã sẽn pʋlmã, wall a sẽn wẽen t’a na n monga mengã fãa yaa zaalem,+ pagã pa segd n pids a pʋlengã bɩ a sẽn wẽen bũmb ningã ye. A sɩdã kɩtame tɩ b lebg zaalem, t’a Zeova na n kõ-a sugri. 13 Pag sã n pʋlem t’a na n maana bũmbu, wall a wẽen t’a na n monga a meng bũmbu, yaa a sɩdã n segd n wilg pagã sã n na n pidsa a pʋlengã wall a wẽenegã. 14 La a sɩdã sã n pa yeel tɩ bũmb ray nins sẽn pʋglã, wilgdame t’a sakame t’a pagã na n pids a pʋlemsã wall a sẽn wẽen t’a na n monga a meng bũmb ninsã, tɩ pagã segd n pids-ba. A sakame t’a pagã na n maan woto, bala a pa gɩdg-a daar ning a sẽn wʋmã ye. 15 La a sẽn wʋmã, a sã n bas tɩ kaoos t’a wa yeel tɩ bũmb ning a pagã sẽn pʋlmã yaa zaalem, pagã taalã bee a sɩdã zugu.+

16 “Woto yaa noy nins a Zeova sẽn kõ a Moyiiz pag ne a sɩd wɛɛngẽ, la ba ne a bi-pugl sẽn ket n be a zakẽ wã wɛɛngẽ.”

31 A Zeova yeela a Moyiiz yaa: 2 “Tɩ zab ne Madiyã nebã+ n dok Israyɛll nebã sũuri.+ Rẽ poore, fo na n kiime tɩ b mum-f wa b sẽn mum f yaab-rãmbã.”+

3 Dẽ, a Moyiiz goma ne nin-buiidã n yeele: “Yãk-y rap yãmb sʋkã n kõ-b zab-teedo, tɩ b tɩ zab ne Madiyã nebã n dok a Zeova sũuri. 4 Yãmb segd n yãka tãb-biis tusr Israyɛll buud fãa sʋka.” 5 Woto, Israyɛll neb tusa wã+ sʋka, b yãka neb tusr buud fãa sʋka. Yɩɩ tãb-biis tus-piig la a yiib sẽn bob zab-teed zabrã yĩnga.

6 Rẽ poore, a Moyiiz kɩtame tɩ buud fãa neb tusr kẽng zabrã. Maan-kʋʋd a Eleazaar biig a Fineyaas+ me tũ-b lame. Yẽ n get teed nins sẽn yaa sõamyã wã, ne zabr tãntãadã+ yelle. 7 B tɩ zaba ne Madiyã nebã wa a Zeova sẽn yeel a Moyiizã, n kʋ b rapã fãa. 8 B kʋʋ Madiyã rĩm-dãmbã me. Yaa a Evi, a Rekɛm, a Zʋʋre, a Huur la a Reba sẽn yaa Madiyã rĩm-dãmb a nu wã. Sẽn paase, b kʋʋ a Beoor biig a Balaam+ ne sʋʋga. 9 La Israyɛll nebã yõga Madiyã nebã pagbã ne b kambã n looge. B wʋka b rũm-bõonegã ne b rũm-bɛdã, la b paoongã fãa me n looge. 10 B yõo galʋ-tẽns nins pʋsẽ b sẽn da be wã, ne b tẽns nins sẽn gũbg lalsã fãa. 11 B talla teedã b sẽn wʋkã, ne nebã la rũmsã fãa b sẽn yõgã n looge. 12 B talla b sẽn yõg b rãmbã ne teedã la rũmsã, n kẽng a Moyiiz ne maan-kʋʋd a Eleazaar la Israyɛll nin-buiidã nengẽ sik-zĩigẽ wã, Mowaab we-rasempʋɩɩgã+ sẽn yaa tẽn-nabrẽ wã. Rẽ tɩ b bee Zʋrdẽ kʋɩlgã rʋʋnde, zĩig sẽn pa zãr ne Zeriko.

13 Dẽ, a Moyiiz ne maan-kʋʋd a Eleazaar n paas nin-buiidã nanambs fãa yiime n tɩ seg-b sik-zĩigã kɩrenga. 14 La a Moyiiz sũurã puuga ne tãb-biisã taoor dãmba, rat n yeel tɩ tãb-biis tusr-tusr nanambsã ne tãb-biis koabg-koabg nanambsã sẽn yi zabrã n watẽ wã. 15 A Moyiiz yeel-b lame yaa: “Yãmb basa pagbã fãa n pa kʋ la? 16 Yaa bãmb n sak a Balaam goamã, n tus Israyɛll nebã tɩ b bas a Zeova+ n waoog Pewoor wẽn-faoogã,+ tɩ kɩt tɩ bã-loangdg kẽ a Zeova nin-buiidã sʋkã.+ 17 Yãmb segd n kʋʋ kom-dibli wã fãa, la y kʋ pagb nins fãa sẽn zoe n kẽ ne raoã. 18 La yãmb tõe n basa kom-pugli nins fãa sẽn zɩ n kẽ ne raoã.+ 19 Yãmb segd n paa sik-zĩigã kɩreng rasem a yopoe. Ned ning fãa sẽn kʋ neda,* la ned ning fãa sẽn sɩɩs ned b sẽn kʋ+ segd n yɩlga a meng+ rasem a tãab-n-soabã ne rasem a yopoe-n-soabã. Yaa yãmb ne neb nins y sẽn yõgã fãa. 20 Sẽn paase, yãmb segd n yɩlga fuug buud fãa, teoog buud fãa sẽn maan ne gãongo, bũmb ning fãa sẽn maan ne bʋʋs kõbdo, la teoog buud fãa sẽn maan ne raoogo.”

21 Maan-kʋʋd a Eleazaar yeela rap nins sẽn kẽng zabrã yaa: “Ad noor a Zeova sẽn kõ a Moyiizi: 22 ‘Sãnemã, wanzuri wã, zũudã, kutã, waasdã la namdã, 23 rat n yeel tɩ bũmb nins fãa sẽn pa zoet bugmã, yãmb segd n ning-b-la bugmẽ n yɩlg-ba. La yãmb segd n yɩlg-b-la ne yɩlgrã koom me.+ Bũmb ning fãa sẽn zoet bugum, yãmb segd n pek-b-la ne koom. 24 Yãmb segd n pegsa y futã rasem a yopoe-n-soabã n lebg yɩlma. Rẽ poore, y tõe n kẽe sik-zĩigẽ wã.’”+

25 A Zeova yeela a Moyiiz yaa: 26 “Sõd b sẽn yõg b rãmbã la rũmsã tãb-biisã sẽn tall n wa wã. Yaa foo ne maan-kʋʋd a Eleazaare, la nin-buiidã buudã rot taoor dãmb n na n maan dẽ. 27 Welg bũmb nins b sẽn tall n wa wã zĩis a yiibu, n kõ tãb-biis nins sẽn kẽng zabrã, la Israyɛll neb a taabã.+ 28 Sodaas nins sẽn kẽng zabrã nengẽ, fo segd n deega nin-yend* neb kobs-nu zugu, nag-yɛng niis kobs-nu zugu, bõang a ye bõens kobs-nu zugu, la rũng a ye rũm-bõoneg kobs-nu zug n kõ a Zeova. 29 Yaa pʋɩ-sʋk ning sẽn yaa tãb-biisã rẽndã pʋgẽ, la fo segd n deeg rẽ n kõ maan-kʋʋd a Eleazaar tɩ yɩ a Zeova kũuni.+ 30 Pʋɩ-sʋk ning sẽn yaa Israyɛll nebã rẽndã pʋgẽ, reeg nin-yend neb pis-nu zugu, nag-yɛng niis pis-nu zugu, bõang a ye bõens pis-nu zugu, la rũng a ye rũm-bõoneg pis-nu zugu, la rũng a ye yir dũms buud fãa pis-nu zugu, n kõ Levi buudã neb+ sẽn tʋmd a Zeova sɛk-roogã tʋʋmã.”+

31 Dẽ, a Moyiiz ne maan-kʋʋd a Eleazaar maana wa a Zeova sẽn yeel a Moyiizã. 32 Bũmb nins sẽn kẽng-b zabrã sẽn tall n wa wã sẽn da ketã ra yaa rũm-bõoneg tus-kobs-yoob la pis-yopoe la a nu, 33 niis tus-pis-yopoe la a yiibu, 34 la bõens tus-pis-yoob la a ye. 35 Kom-pugli nins sẽn zɩ n kẽ ne raoã+ ra yaa bãmb tus-pis-tã la a yiibu. 36 Pʋɩ-sʋk ning sẽn yaa sẽn kẽng-b zabrã pʋɩɩrã ra yaa rũm-bõoneg tus-kobs-tã la pis-tã la a yopoe, la kobs-nu. 37 Rũm-bõoneg nins b sẽn da segd n yãk n kõ a Zeova wã yaa bãmb kobs-yoob la pis-yopoe la a nu. 38 Niisã ra yaa bãmb tus-pis-tã la a yoobe, tɩ b sẽn segd n yãk n kõ a Zeova wã yaa niis pis-yopoe la a yiibu. 39 Bõensã ra yaa bãmb tus-pis-tã la kobs-nu, tɩ b sẽn segd n yãk n kõ a Zeova wã yaa bõens pis-yoob la a ye. 40 Nebã* ra yaa bãmb tus-piig la a yoobe, tɩ b sẽn segd n yãk n kõ a Zeova wã yaa neb pis-tã la a yiibu. 41 A Moyiiz rɩka bũmb nins fãa b sẽn kõ tɩ yaa a Zeova kũunã n ning maan-kʋʋd a Eleazaar nugẽ,+ wa a Zeova sẽn yeel-a wã.

42 Pʋɩ-sʋk ning sẽn yaa Israyɛll nebã rẽndã, rat n yeel t’a Moyiiz sẽn yãk sẽn kẽng-b zabrã pʋɩɩrã n kellã, 43 pʋɩ-sʋg-kãng rũm-bõonegã ra yaa bãmb tus-kobs-tã la pis-tã la a yopoe, la kobs-nu, 44 tɩ niisã yaa tus-pis-tã la a yoobe, 45 tɩ bõensã yaa tus-pis-tã la kobs-nu, 46 tɩ nebã yaa tus-piig la a yoobe. 47 Pʋɩ-sʋk ning sẽn yaa Israyɛll nebã rẽndã pʋgẽ, a Moyiiz reega nin-yend neb pis-nu zugu, la rũng a ye rũms pis-nu zugu, n kõ Levi buudã neb+ sẽn tʋmd a Zeova sɛk-roogã tʋʋmã,+ wa a Zeova sẽn yeel-a wã.

48 Rẽ poore, rap nins sẽn lʋɩ tãb-biis tusa+ wã taoorã, rat n yeel tɩ tãb-biis tusr-tusr nanambsã ne tãb-biis koabg-koabg nanambsã kolga a Moyiizi, 49 n yeel-a yaa: “Yãmb tʋm-tʋmdbã sõda rap nins d sẽn tall n kẽng zabrã, la ned baa a ye ka pa moog ye.+ 50 Woto wã, bɩ y sak tɩ tõnd ned kam fãa kõ a sẽn paam tɩ yɩ a Zeova kũuni. Yaa sãnem teedo, zũy sẽn ningd karse, zũya, nugbĩns sẽn tar n ningd bãnde, tʋb-londo, la nag-teed a taaba. Yaa sẽn na n maan paasg* d mens* yĩng a Zeova taoore.”

51 Dẽ, a Moyiiz ne maan-kʋʋd a Eleazaar sak n deega sãnemã b nengẽ, rat n yeel tɩ nag-teedã fãa. 52 Sãnemã fãa tãb-biis tusr-tusr nanambsã, ne tãb-biis koabg-koabg nanambsã sẽn kõ a Zeova wã yɩɩ sɩkl* tus-piig la a yoobe, la kobs-yopoe la pis-nu. 53 Tãb-biisã ned kam fãa paama pʋɩɩr bũmb nins b sẽn wa ne wã pʋgẽ. 54 A Moyiiz ne maan-kʋʋd a Eleazaar reega sãnemã tãb-biis tusr-tusr nanambsã ne tãb-biis koabg-koabg nanambsã nengẽ, n tɩ bĩng sɛk-roogã pʋgẽ, sẽn na yɩl tɩ Israyɛll nebã tõe n tẽegd bũmb ning a Zeova sẽn maan b yĩngã.*

32 A Rubɛn yagensã+ ne a Gaad yagensã+ ra tara rũms wʋsgo. B yãame tɩ Yazɛɛr+ ne Galaad soolmã zemsa ne gʋʋlgo. 2 A Gaad yagensã ne a Rubɛn yagensã kolga a Moyiizi, maan-kʋʋd a Eleazaar ne nin-buiidã nanambs n yeele: 3 “Atarote, Dibonne, Yazɛɛre, Nimra, Hɛsbonne,+ Eleyale, Sebam, Nebo+ ne Beyõ+ 4 sẽn yaa tẽns nins a Zeova sẽn sõng Israyɛll nebã tɩ b zab n deegã+ zemsa ne gʋʋlgo, tɩ yãmb tʋm-tʋmdbã yaool n tar rũms wʋsgo.”+ 5 B paasame: “Tõnd sã n taa yãmb yam, bɩ y kõ y tʋm-tʋmdbã tẽn-kãens tɩ d sooge. Ra kɩt-y tɩ tõnd rʋʋg Zʋrdẽ kʋɩlgã ye.”

6 Dẽ, a Moyiiz yeela a Gaad yagensã ne a Rubɛn yagensã yaa: “Yãmb saam-biisã segd n kẽnga zabrã, tɩ yãmb kell n pa ka bɩ? 7 Bõe yĩng tɩ yãmb na n koms Israyɛll nebã raood tɩ b pa rʋʋg kʋɩlgã n kẽ soolem ning a Zeova sẽn na n kõ-bã pʋgẽ? 8 Yaa woto la yãmb ba-rãmbã maan-yã, mam sẽn wa n pa Kadɛɛs-barneya n tʋm-b tɩ b tɩ ges soolmã.+ 9 B sẽn wa n kẽng Ɛskoll longẽ*+ wã n tɩ ges soolmã, b komsa Israyɛll nebã raoodo, tɩ b ra pa rat n kẽ soolem ning a Zeova sẽn da kõ-bã pʋgẽ ye.+ 10 Baraare, a Zeova sũurã puuga wʋsg t’a wẽen n yeele:+ 11 ‘Rap nins sẽn yi Ezɩptã sʋka, sẽn tar-b yʋʋm pisi bɩ sẽn yɩɩd rẽ wã pa na n yã soolem ning+ mam sẽn wẽen tɩ m na n kõo a Abrahaam ne a Izaak la a Zakoobã ye.+ Bala b pa tũ maam ne b sũy fãa ye. 12 Yaa Keniiz ned a Yefune biig a Kalɛɛbe,+ n paas a Nun biig a Zozuwe+ bal n na n yã soolmã, b sẽn tũ a Zeova ne b sũy fãa+ wã yĩnga.’ 13 Dẽ, a Zeova sũurã puuga wʋsg ne Israyɛll nebã t’a kɩt tɩ b yeeb we-raoogã pʋgẽ yʋʋm pis-naase,+ hal tɩ zãmaan ning sẽn maan sẽn yaa wẽng a Zeova nifẽ wã wa sa.+ 14 Yãmb a yel-wẽn-maandba, yãmb maanda wa y ba-rãmbã, n kɩtdẽ t’a Zeova sũurã puugd ne Israyɛll nebã n paasdẽ. 15 Yãmb sã n bas-a tũubu, a na n le basa nin-buiidã we-raoogẽ wã. Yãmb na n kɩtame tɩ nebã fãa sãame.”

16 B le wa n kẽnga a Moyiiz nengẽ n tɩ yeele: “Bɩ y bas tõnd tɩ d bao kug n me yãg d rũmsã yĩnga, la d me tẽns d kambã yĩnga. 17 La tõnd na n kell n boba zab-teedo,+ n kẽn Israyɛll nebã taoore, hal n wa tall-b n kẽng b zĩigẽ wã. Wakat kãnga, tõnd kambã na n zĩnda tẽns sẽn gũbg lals pʋsẽ, tɩ soolmã nebã ra tõog n paam-b ye. 18 Tõnd pa na n leb d zagsẽ, hal n tãag Israyɛll ned fãa sẽn na n paam zĩig tɩ yɩ a pʋɩɩre.+ 19 Bala tõnd pa na n naag bãmb n deeg pʋɩɩr Zʋrdẽ kʋɩlgã rʋʋnde, tõnd sẽn paam d pʋɩɩrã Zʋrdẽ kʋɩlgã yaangã yĩnga.”+

20 A Moyiiz leok-b lame n yeele: “Yãmb sã n na n maana woto, n bob y zab-teedã a Zeova taoor zabrã yĩnga,+ 21 yãmb ned kam fãa sã n bob a zab-teed n dʋʋg Zʋrdẽ kʋɩlgã n zab a Zeova yĩng a sẽn wat n digd a bɛɛbã,+ 22 hal n wa tõog soolmã a Zeova taoore,+ yãmb tõe n lebgame+ n pa tall taal a Zeova ne Israyɛll nebã nifẽ ye. Dẽ, soolem-kãngã na n lebga yãmb dẽnd a Zeova taoore.+ 23 La yãmb sã n pa maan dẽ, yãmb na n beega a Zeova. Sã n yɩ woto, bɩ y bãng tɩ y yel-wẽndã na n pʋg-y lame. 24 Woto wã, yãmb tõe n mee tẽns y kambã yĩnga, la y me yãg y rũmsã yĩnga.+ La yãmb segd n pidsa y sẽn pʋlmã.”

25 A Gaad yagensã ne a Rubɛn yagensã yeela a Moyiiz yaa: “Yãmb tʋm-tʋmdbã na n maana wa d zu-soabã sẽn yeelã. 26 Tõnd kambã, d pagbã, d rũm-bɛdã la d rũm-bõonegã fãa na n paa Galaad soolmã tẽnsẽ wã.+ 27 La yãmb tʋm-tʋmdbã na n dʋʋga kʋɩlgã, tɩ ned kam fãa bob a zab-teed zabr yĩng a Zeova taoore,+ wa d zu-soabã sẽn yeelã.”

28 Dẽ, a Moyiiz kõo maan-kʋʋd a Eleazaare, a Nun biig a Zozuwe, la Israyɛll buud toor-toorã rot taoor dãmb noor bãmb wɛɛngẽ. 29 A Moyiiz yeel-b lame yaa: “A Gaad yagensã ne a Rubɛn yagensã sã n tũ yãmb n dʋʋg Zʋrdẽ kʋɩlgã, tɩ b ned kam fãa bob zab-teed zabrã yĩng a Zeova taoore, tɩ y tõog soolmã, yãmb na n kõ-b-la Galaad soolmã tɩ yɩ b rẽnda.+ 30 La b sã n pa bob zab-teed n tũ yãmb n dʋʋg kʋɩlgã, b segd n zĩnda ne yãmb Kanaã soolmẽ wã.”

31 Rẽ la a Gaad yagensã ne a Rubɛn yagensã yeel yaa: “Yaa bũmb ning a Zeova sẽn togs yãmb tʋm-tʋmdbã la d na n maane. 32 Tõnd na n boba zab-teed n dʋʋg kʋɩlgã a Zeova taoore, n kẽ Kanaã soolmẽ wã.+ La zĩig ning sẽn na n yɩ tõnd pʋɩɩrã na n yɩɩ Zʋrdẽ kʋɩlgã rʋʋndẽ ka.” 33 Dẽ, a Moyiiz kõo a Gaad yagensã ne a Rubɛn yagensã+ la a Zozɛf biig a Manase buudã pʋɩ-sʋk+ Amoor nebã rĩm a Siyon soolmã,+ ne Basan rĩm a Oog soolmã.+ Yaa soolem-kãens ne b galʋ-tẽnsã, la tẽns nins sẽn gũbg-bã.

34 A Gaad yagensã mee* Dibonne,+ Atarote,+ Arowɛɛre,+ 35 Atrot-sofanne, Yazɛɛre,+ Yogbeha,+ 36 Bɛt-nimra,+ la Bɛt-haran+ sẽn yaa tẽns sẽn gũbg lalsã, la b me yãg b rũmsã yĩnga. 37 A Rubɛn yagensã mee Hɛsbonne,+ Eleyale,+ Kiryatayim,+ 38 Nebo,+ la Baal-meyõ,+ sẽn yaa tẽns nins yʋy b sẽn toeemã, n paas Sibma. B toeema tẽns nins b sẽn lebs n me wã yʋya.

39 A Manase biig a Makɩɩr yagensã+ tɩ zaba ne Galaad n tõoge, n dig Amoor neb nins sẽn da be be wã. 40 Dẽ, a Moyiiz rɩka Galaad n kõ a Manase biig a Makɩɩr yagensã, tɩ b tɩ tilg be.+ 41 A Manase yageng a Zayɩɩr tɩ zaba ne Amoor nebã, n dees b tẽn-bõonegã, n pʋd tẽn-kãens tɩ Havot-zayɩɩre.*+ 42 A Noba tɩ zaba ne Kenat la tẽns nins a sẽn so wã* n tõoge. A pʋda Kenat tɩ Noba wa a mengã yʋʋrã.

33 Ad Israyɛll nebã sẽn tek n yaas zĩis ninsi, b sẽn wa n yi Ezɩpt soolmẽ wã+ ne b tãb-biis sulã,*+ t’a Moyiiz ne a Aarõ lʋɩ b taoorã.+ 2 A Moyiiz ra gʋlsda zĩis nins b sẽn da tekd n yalsdẽ wã wa sẽn zems a Zeova noorã. Ad b sẽn tek n yaas zĩis ninsã:+ 3 B yii Ramsɛs+ pipi kiuugã rasem piig la a nu soabã.+ Pakã+ vẽkembeoogã bala, Israyɛll nebã looga ne bas-m-yam* Ezɩpt nebã fãa nifẽ. 4 Wakat kãng tɩ Ezɩpt nebã mumda b kom-dẽemsã fãa a Zeova sẽn kʋ wã,+ bala a Zeova sɩbga b wẽnnaam-dãmbã.+

5 Woto, Israyɛll nebã yii Ramsɛs n tɩ tilg b sik-zĩigã Sukote.+ 6 B wa n yii Sukot n tɩ sig Etam+ sẽn be we-raoogã noorã. 7 Rẽ poore, b yii Etam n gõdg n dɩk Pihahirot sẽn tees Baal-zefõ wã sore,+ n tɩ tilg b sik-zĩigã Migdoll noore.+ 8 B wa n yika Pihahirot n pasg mogrã sʋk+ n kẽ we-raoogã.+ B kẽna rasem a tãab Etam we-raoogẽ wã,+ n tɩ tɩlg b sik-zĩigã Maara.+

9 B yii Maara, n kẽng Elim. Ko-bunds piig la a yiib la koms pis-yopoe n da be Elim. Dẽ, b tilga b sik-zĩigã be.+ 10 Rẽ poore, b yika Elim n tɩ sig Mog-miuugã noore. 11 B wa n yika Mog-miuugẽ wã n tɩ tilg b sik-zĩigã Sin we-raoogẽ wã.+ 12 B yika Sin we-raoogẽ wã, n tɩ sig Dofka. 13 B wa n yii Dofka n tɩ tilg b sik-zĩigã Aluusi. 14 Rẽ poore, b yii Aluus n tɩ sig Refidim.+ Be, koom da kae nin-buiidã sẽn na n yũ ye. 15 B wa n yii Refidim n tɩ tilg b sik-zĩigã Sinayi we-raoogẽ wã.+

16 B yii Sinayi we-raoogẽ wã, n tɩ sig Kibrot-hataava.+ 17 B wa n yika Kibrot-hataava n tɩ sig Hazerote.+ 18 Rẽ poore, b yii Hazerot n tɩ tilg b sik-zĩigã Ritma. 19 B wa n yii Ritma n tɩ sig Rimon-perɛɛze. 20 B yii Rimon-perɛɛz n tɩ sig Libna. 21 B yika Libna n tɩ tilg b sik-zĩigã Risa. 22 Rẽ poore, b yii Risa n tɩ sig Kehelata. 23 B yii Kehelata n tɩ tilg b sik-zĩigã Sefɛɛr tãngẽ wã.

24 B wa n yii Sefɛɛr tãngẽ wã, n tɩ sig Arada. 25 B yii Arada n tɩ tilg b sik-zĩigã Makelote. 26 Rẽ poore, b yii+ Makelot n tɩ sig Tahate. 27 B wa n yika Tahat n tɩ sig Teera. 28 B yii Teera n tɩ tilg b sik-zĩigã Mitka. 29 B wa n yii Mitka n tɩ sig Asmona. 30 Rẽ poore, b yika Asmona n tɩ tilg b sik-zĩigã Moserote. 31 B yii Moserot n tɩ sig Bene-zaakanne.+ 32 B yika Bene-zaakan n tɩ tilg b sik-zĩigã Hoor-hagidgaade. 33 Rẽ poore, b yii Hoor-hagidgaad n tɩ sig Zotbata.+ 34 B wa n yii Zotbata n tɩ sig Abrona. 35 B yika Abrona n tɩ tilg b sik-zĩigã Eziyon-gebɛɛre.+ 36 Rẽ poore, b yii Eziyon-gebɛɛr n tɩ sig Zĩn we-raoogẽ wã,+ rat n yeel tɩ Kadɛɛse.

37 B wa n yii Kadɛɛs n tɩ tilg b sik-zĩigã Hoor tãngã+ sẽn be Edom soolmã toadgẽ wã. 38 Maan-kʋʋd a Aarõ rʋʋ Hoor tãngã wa sẽn zems a Zeova noorã, n maan kaalem be. Yɩɩ Israyɛll nebã sẽn yi Ezɩpt soolmẽ wã tɩ yʋʋm pis-naaslẽ. Yɩɩ kiuug a nu soabã pipi daare.+ 39 A Aarõ sẽn wa n na n ki Hoor tãngã zugã t’a tara yʋʋm koabg la pisi la a tãabo.

40 Araad rĩmã+ sẽn yaa Kanaã neda, n da be Negɛɛb sẽn be Kanaã soolmẽ wã, wʋmame tɩ Israyɛll nebã watame.

41 B wa n yii Hoor tãngẽ wã,+ n tɩ tilg b sik-zĩigã Zalmona. 42 Rẽ poore, b yii Zalmona n tɩ sig Punon. 43 B yii Punon n tɩ tilg b sik-zĩigã Obote.+ 44 Rẽ poore, b yii Obot n tɩ sig Iye-abarim sẽn be Mowaab toadgẽ wã.+ 45 B wa n yii Iyim n tɩ tilg b sik-zĩigã Dibon-gaade.+ 46 B yii Dibon-gaad n tɩ sig Almon-diblatayim. 47 B yii Almon-diblatayim n tɩ tilg b sik-zĩigã Abarim tãensẽ wã+ sẽn tees Nebo wã.+ 48 Sẽn na n baase, b yii Abarim tãensẽ wã n tɩ sig Mowaab we-rasempʋɩɩgã sẽn yaa tẽn-nabrẽ wã, Zʋrdẽ kʋɩlgã rʋʋnde, zĩig sẽn pa zãr ne Zeriko.+ 49 B kell n paa Zʋrdẽ kʋɩlgã wogelle, sẽn sɩng ne Bɛt-zesimot n tɩ tãag Abɛll-sitim,+ Mowaab we-rasempʋɩɩgã sẽn yaa tẽn-nabrẽ wã.

50 A Zeova goma ne a Moyiiz Mowaab we-rasempʋɩɩgã sẽn yaa tẽn-nabrẽ wã. Rẽ tɩ b bee Zʋrdẽ kʋɩlgã rʋʋnde, zĩig sẽn pa zãr ne Zeriko. A yeelame: 51 “Gom ne Israyɛll nebã n yeel-b yaa: ‘Yãmb na n dʋʋga Zʋrdẽ kʋɩlgã n kẽ Kanaã soolmẽ wã.+ 52 Yãmb segd n diga soolmã neb fãa la y sãam b bõn-naands nins sẽn maan ne kugã,+ ne b bõn-naands nins sẽn yõgã+ la y sãam b zĩ-zãntsã* fãa.+ 53 Yãmb segd n deega soolmã n zĩnd a pʋgẽ, bala mam na n kõ-a-la yãmb tɩ y sooge.+ 54 Yãmb segd n maana bãnd n pʋɩ soolmã+ n kõ y buud toor-toorã. Buud neb sã n yaa wʋsgo, b pʋɩɩrã segd n yɩɩ bedre. La buud neb sã n pa waoogẽ, b pʋɩɩrã segd n yɩɩ bilfu.+ Ned kam fãa pʋɩɩr na n yɩɩ zĩig ning a bãndã sẽn lʋɩ wã. Yãmb na n paama zĩig tɩ yɩ y pʋɩɩr wa sẽn zems y yaab-rãmbã buudu.+

55 “‘La yãmb sã n pa rig soolmã nebã n yiisi,+ yãmb sẽn na n bas b rãmbã na n yɩɩ wa sagd sẽn kẽ y ninã, la wa gõos sẽn kõsd y lʋgã. B na n namsa yãmb soolem ning pʋgẽ yãmb sẽn na n zĩndã.+ 56 Mam na n maana yãmb bũmb ning mam sẽn magd n na n maan bãmbã.’”+

34 A Zeova le goma ne a Moyiiz n yeele: 2 “Gom ne Israyɛll nebã n yeel-b yaa: ‘Yãmb sã n wa kẽ Kanaã soolmẽ wã,+ ad soolmã yãmb sẽn na n paam tɩ yɩ y pʋɩɩrã todse:+

3 “Yãmb goabg toadgã na n sɩnga ne Zĩn we-raoogã sẽn yɛgd Edom soolmã. Yaangã, yãmb goabg toadgã na n sɩnga Yamsem mogrã* satmẽ.+ 4 Yãmb toadgã na n gõdg n tɩ yii Akrabim+ goabga, n tɩ yek Zĩn la a tɩ baas Kadɛɛs-barneya+ goabgã. Toadgã na n tall n tãaga Hazaar-adaare,+ n sãag n ta Azmonne. 5 Azmonne, toadgã na n gõdgame n tɩ yek Ezɩpt Kosoogã,* n tɩ baas ne Mogrã.*+

6 “‘Yãmb nin-taoor toadgã na n yɩɩ Mog-kãsengã* wogelle. Rẽ n na n lebg yãmb nin-taoor toadgã.+

7 “‘Ad yãmb rɩtg toadgã: Yãmb na n sɩnga ne Mog-kãsengã n dẽeg y toadgã n tãag Hoor tãngã.+ 8 Yãmb na n sɩnga ne Hoor tãngã n dẽeg toadgã n tãag Lebo-hamate,*+ n tɩ baas Zedaade.+ 9 Toadgã na n tall n tãaga Zɩfron n tɩ baas Hazaar-enanne.+ Rẽ n na n lebg yãmb rɩtg toadgã.

10 “Rẽ poore, yãmb na n dẽega y yaang toadgã, n sɩng Hazaar-enan n tɩ tãag Sefam. 11 Toadgã na n sɩnga Sefam n tɩ tãag Ribla sẽn be Ayin yaangã. Toadgã na n sãagame n tɩ pasg sigdg ning sẽn be Kinerɛt Mogrã*+ yaangã. 12 Toadgã na n tall n tãaga Zʋrdẽ kʋɩlgã, n tɩ baas ne Yamsem mogrã.+ Woto n na n yɩ yãmb soolmã+ ne a todsã.’”

13 Dẽ, a Moyiiz goma ne Israyɛll nebã n yeel-b yaa: “Ad soolem ning yãmb sẽn na n maan bãnd n pʋɩ tɩ yɩ y rẽnda,+ wa a Zeova sẽn yeel tɩ b kõ buud a wɛ la pʋɩ-sʋkã. 14 Bala Rubɛn buudã ne Gaad buudã la Manase buudã pʋɩ-sʋkã zoe n deega b pʋɩɩre.+ 15 Buud a yi la pʋɩ-sʋkã zoe n deega b pʋɩɩr Zʋrdẽ kʋɩlgã yaang sẽn tees Zeriko wã, rat n yeel tɩ wĩndg sẽn pukdẽ sẽnese.”+

16 A Zeova le goma ne a Moyiiz n yeele: 17 “Ad rap nins sẽn na n pʋɩ soolmã n kõ yãmb tɩ y soogã yʋya: Yaa maan-kʋʋd a Eleazaar+ ne a Nun biig a Zozuwe.+ 18 Sẽn paase, yãmb na n yãka naab a ye buud fãa sʋka, tɩ b pʋɩ soolmã n kõ-yã.+ 19 Ad b yʋya: Zida buudã+ pʋgẽ, na n yɩɩ a Yefune biig a Kalɛɛbe.+ 20 Sɩmeyõ buudã+ pʋgẽ, na n yɩɩ a Amiwuud biig a Semuyɛlle. 21 Bẽnzame buudã+ pʋgẽ, na n yɩɩ a Kislon biig a Elidaade. 22 Dan buudã+ pʋgẽ, na n yɩɩ naab a ye, a Yogli biig a Buki. 23 A Zozɛf yagensã+ sʋka: Manase buudã+ pʋgẽ na n yɩɩ naab a ye, a Efood biig a Haniyɛlle, 24 tɩ Efrayim buudã+ pʋgẽ me yɩ naab a ye, a Siftan biig a Kemuwɛlle. 25 Zabulõ buudã+ pʋgẽ, na n yɩɩ naab a ye, a Parnak biig a Elisafanne. 26 Isakaar buudã+ pʋgẽ, na n yɩɩ naab a ye, a Azan biig a Paltɩyɛlle. 27 Asɛɛr buudã+ pʋgẽ, na n yɩɩ naab a ye, a Selomi biig a Ahiwuudi. 28 Naftali buudã+ pʋgẽ, na n yɩɩ naab a ye, a Amiwuud biig a Pedayɛlle.” 29 Yaa nin-kãensã la a Zeova yeel tɩ b pʋɩ Kanaã soolmã n kõ Israyɛll nebã.+

35 A Zeova le goma ne a Moyiiz Mowaab we-rasempʋɩɩgã sẽn yaa tẽn-nabrẽ wã. Rẽ tɩ b bee Zʋrdẽ kʋɩlgã rʋʋnde,+ zĩig sẽn pa zãr ne Zeriko. A yeelame: 2 “Yeel Israyɛll nebã tɩ b segd n yãka tẽns zĩis nins b sẽn na n soogã pʋgẽ, n kõ Levi buudã nebã tɩ b zĩndi.+ B segdame me n kõ Levi buudã neb rũms wãbneg zĩis sẽn gũbg tẽnsã.+ 3 B na n zĩnda tẽn-kãens pʋsẽ. Rũmsã wãbneg zĩisã na n yɩɩ b rũm-bõonegã la rũm-bɛdã ne b rũms a taabã fãa yĩnga, la b paoongã yĩnga. 4 Rũmsã wãbneg zĩisã yãmb sẽn na n kõ Levi buudã neb tẽnsã kɩremsã na n sɩnga ne tẽngã lalg n tãag kãntɩɩg* tusri, n gũbg tẽngã fãa. 5 Yãmb segd n sɩnga tẽngã kɩrenga, n mak kãntɩɩg tus a yi yaang sẽnesã, kãntɩɩg tus a yi goabg sẽnesã, kãntɩɩg tus a yi nin-taoor sẽnesã, la kãntɩɩg tus a yi rɩtg sẽnesã, tɩ tẽngã be tẽn-sʋka. Rẽ n na n yɩ b tẽnsã rũms wãbneg zĩisi.

6 “Tẽns nins yãmb sẽn na n kõ Levi buudã nebã na n yɩɩ soondg tẽns a yoobe,+ y sẽn na n yãk tɩ ned sẽn kʋ a to tõe n zoe n kẽnge,+ n paas tẽns pis-naas la a yiibu. 7 Tẽns nins yãmb sẽn segd n yãk n kõ Levi buudã nebã sõor na n yɩɩ pis-naas la a nii, n paas rũms wãbneg zĩisi.+ 8 Yaa tẽns nins Israyɛll nebã sẽn so wã pʋsẽ la y na n yãk n kõ Levi buudã nebã.+ Buud sã n yaa bedre, yãmb na n yãka tẽns wʋsgo. La buud sã n yaa kɩdga, yãmb na n yãka tẽns bilfu.+ Buud fãa na n yãka tẽns n kõ Levi buudã neba, wa sẽn zems soolmã pʋɩɩr ning a sẽn deegã.”

9 A Zeova le goma ne a Moyiiz n yeele: 10 “Gom ne Israyɛll nebã n yeel-b yaa: ‘Yãmb na n dʋʋga Zʋrdẽ kʋɩlgã n kẽ Kanaã soolmẽ wã.+ 11 Yãmb na n yãgsa tẽns kẽngr sẽn yaa nana, tɩ yɩ yãmb soondg tẽnse, tɩ ned sã n kʋ a to ne yĩdg bɩ a segd n zoe n kẽng be.+ 12 Tẽn-kãens na n yɩɩ yãmb soondg zĩisi, sẽn na yɩl tɩ sũ-roakdã*+ ra kʋ ned ning sẽn kʋ a to wã, tɩ bʋ-kaoodbã* nan pa kao a bʋʋd ye.+ 13 Yaa bõn-kãng yĩng la yãmb sẽn na n yãk soondg tẽns a yoobã. 14 Yãmb na n yãka tẽns a tãab Zʋrdẽ kʋɩlgã rʋʋndẽ ka,+ la y yãk tẽns a tãab Kanaã soolmẽ wã,+ tɩ b yɩ soondg tẽnse. 15 Tẽn-bãmb b yoobã na n yɩɩ soondg zĩis Israyɛll nebã yĩnga, la sãambã sẽn be b sʋkã yĩnga,+ sẽn na yɩl tɩ ned sã n kʋ a to ne yĩdgu, bɩ a tõe n zoe n kẽng be.+

16 “‘La ned sã n dɩk bũmb sẽn maan ne kut n wẽ a to t’a ki, a yaa nin-kʋʋda. B segd n kʋ-a lame n da bas-a ye.+ 17 A sã n dɩk kugr sẽn tõe n kʋ ned n wẽ a to t’a ki, a yaa nin-kʋʋda. B segd n kʋ-a lame n da bas-a ye. 18 A sã n dɩk bũmb sẽn maan ne raoog sẽn tõe n kʋ ned n wẽ a to t’a ki, a yaa nin-kʋʋda. B segd n kʋ-a lame n da bas-a ye.

19 “‘Yaa ned ning sẽn dokd sẽn ki-a wã sũurã* n na n kʋ nin-kʋʋdã. A sã n wa seg-a, yẽ mengã n na n kʋ-a. 20 Ned sã n tus a to n lub t’a ki a sẽn kis-a yĩnga, wall a lobg-a-la ne bũmb ne pʋ-toog* t’a ki,+ 21 pa rẽ bɩ a sã n wẽ-a ne nug a sẽn kis-a yĩng t’a ki, b segd n kʋʋ ned ning sẽn wẽ a to wã. A yaa nin-kʋʋda. Ned ning sẽn dokd sẽn ki-a wã sũurã* na n kʋʋ nin-kʋʋdã, wakat ning a sẽn na n seg-a.

22 “‘La sã n yaa ne yĩdg la a tus-a n lubi, tɩ pa a sẽn kis-a yĩnga, wall a lobg-a-la ne bũmb tɩ pa ne pʋ-toogo,*+ 23 pa rẽ bɩ a maaname tɩ kugr lʋɩ a to wã zug a sẽn pa yã-a yĩnga, la tɩ pa a sẽn yaa a bɛ wall a sẽn dat n pogl-a yĩnga, nedã sã n ki, 24 bʋ-kaoodbã* segd n bʋʋ ned ning sẽn kʋ a to wã, ne ned ning sẽn dokd sẽn ki-a wã sũurã* sʋka, wa sẽn zems no-kãensã.+ 25 Bʋ-kaoodbã* segd n fãaga sẽn kʋ-a a to wã ned ning sẽn dokd sẽn ki-a wã sũurã* nugẽ, la b tall-a n leb soondg tẽng ning a sẽn da zoe n kẽngã. A segd n zĩnda be n tãag maan-kʋʋdb kãsmã b sẽn zae kaam sẽn yaa sõngã kũum.+

26 “‘La sẽn kʋ-a a to wã sã n yi soondg tẽng ning pʋgẽ a sẽn zoe n kẽngã toadgẽ, 27 tɩ ned ning sẽn dokd sẽn ki-a wã sũurã* yã-a t’a pa be soondg tẽngẽ wã, a sã n kʋ-a, zɩɩm taal pa be a zug ye. 28 Bala a segd n zĩnda soondg tẽngẽ wã n tãag maan-kʋʋdb kãsmã kũum. La maan-kʋʋdb kãsmã kũum poore, a tõe n leba a meng soolmẽ wã.+ 29 Woto n yaa noy nins y sẽn na n tikd n kaood bʋʋd y zãmaan-dãmbã fãa pʋsẽ, zĩis nins fãa y sẽn be wã.

30 “‘Ned sã n kʋ a to, b segd n tika kaset rãmb kaset*+ zug n kʋ-a a sẽn yaa nin-kʋʋdã+ yĩnga. La b pa segd n tik nin-yɛng bal kaset zug n kʋ ned* ye. 31 Yãmb pa segd n deeg yaood n bas nin-kʋʋd sẽn segd ne kũum t’a vɩɩmd ye. Yãmb segd n kʋ-a lame n da bas-a ye.+ 32 Yãmb pa segd n deeg yaood ned sẽn zoe n kẽng soondg tẽngẽ yĩnga, n bas-a t’a le tɩ zĩnd a meng soolmẽ tɩ maan-kʋʋdb kãsmã nan pa ki ye.

33 “‘Yãmb pa segd n dẽgem soolem ning pʋgẽ yãmb sẽn be wã ye. Bala zɩɩm dẽgemda tẽnga.+ Zɩɩm sã n daag tẽnga, bũmb kae sẽn na n maan paasgo,* tɩ sã n pa ned ning sẽn daag zɩɩmã zɩɩm ye.+ 34 Yãmb pa segd n dẽgem soolem ning pʋgẽ yãmb sẽn be wã, rat n yeel tɩ mam sẽn beẽ wã ye. Bala maam a Zeova bee Israyɛll nebã sʋka.’”+

36 A Galaad yagensã taoor dãmbã kolgame n gom ne a Moyiiz la Israyɛll nebã nanambsã. A Galaad yaa a Makɩɩr biiga,+ t’a Makɩɩr yaa a Manase biiga, t’a Manase yaa a Zozɛf biiga. 2 B yeelame: “A Zeova yeela d zu-soabã t’a maan bãnd n pʋɩ soolmã+ tɩ yɩ Israyɛll nebã pʋɩɩre. Sẽn paase, a Zeova yeela d zu-soabã t’a rɩk tõnd ba-biig a Zelofehaad pʋɩɩrã n kõ a kom-pugli wã.+ 3 B sã n kẽ kãadem ne Israyɛll buud a to rapa, b na n yãka kom-pugli wã pʋɩɩr tõnd ba-rãmbã pʋɩɩr sʋka, n tɩ paas buud ning pʋgẽ b sẽn kẽ kãadmã pʋɩɩre. Woto, tõnd na n bõna d pʋɩɩrã b sẽn maan bãnd n yãk n kõ tõndã bogr a ye. 4 Israyɛll nebã kɩdeng yʋʋmdã+ sasa, b na n dɩka kom-pugli wã pʋɩɩr n tɩ paas buud ning pʋgẽ b sẽn kẽ kãadmã pʋɩɩr wakat fãa yĩnga. Woto, tõnd na n bõna d ba-rãmbã pʋɩɩrã bogr a ye.”

5 A Moyiiz togsa Israyɛll nebã a Zeova sẽn yeelã. A yeelame: “Bũmb ning a Zozɛf yagensã sẽn yeelã zemsame. 6 Ad a Zeova sẽn yeel a Zelofehaad kom-pugli wã wɛɛngẽ: ‘B tõe n kẽe kãadem ne rao ning b sẽn date. La segd n yɩɩ bãmb ba wã buudã roog neda. 7 B pa segd n dɩk Israyɛll buud a ye pʋɩɩr n kõ buud a to ye. Bala Israyɛll nebã segd n kell n sooga b yaab-rãmbã pʋɩɩre. 8 Israyɛll buudã sʋka, bi-pugl ning fãa sẽn tar pʋɩɩr segd n lebga a ba wã buudã rao paga,+ sẽn na yɩl tɩ Israyɛll nebã kell n soog b yaab-rãmbã pʋɩɩre. 9 B pa segd n dɩk Israyɛll buud a ye pʋɩɩr n kõ buud a to ye. Bala Israyɛll buud fãa segd n kell n sooga a pʋɩɩre.’”

10 A Zelofehaad kom-pugli wã maana wa a Zeova sẽn yeel a Moyiizã.+ 11 Dẽ, a Maala, a Tɩrza, a Ogla, a Milka ne a Nowa sẽn yaa a Zelofehaad kom-pugli wã+ kẽe kãadem ne b ba wã ba-biis kamba. 12 B lebga a Zozɛf biig a Manase buudã neb pagba, sẽn na yɩl tɩ b pʋɩɩrã kell n pa b ba wã buudã roogẽ.

13 Woto yaa noy nins a Zeova sẽn tũnug ne a Moyiiz n kõ Israyɛll nebã, Mowaab we-rasempʋɩɩgã sẽn yaa tẽn-nabrẽ wã. Rẽ tɩ b bee Zʋrdẽ kʋɩlgã rʋʋnde, zĩig sẽn pa zãr ne Zeriko.+