Bõn-bɩʋʋngo

D sã n tar no-goam sẽn yaa sõma, d wilgdame tɩ d tũuda a Zeova. D sõngda nebã tɩ b bãng “welgr ning sẽn be ned sẽn tũud Wẽnnaam, ne ned sẽn pa tũud-a sʋka.” (Mal. 3:18) Yɩɩ woto ne saam-bi-poak a ye yʋʋr sẽn boond t’a Kimbɛrli. Daar a ye, a ra segd n naaga a karen-bi-taag n tʋm tʋʋmd b sẽn da kõ-b lekollẽ wã. Rẽ poore, a karen-bi-taagã yãame t’a Kimbɛrli yaa toor ne karen-biis a taabã. A ra pa wɩt neb a taabã, a ra pa gomd gom-dẽgd me ye. A goamã ra kengda raoodo. A Kimbɛrli karen-bi-taagã sũur yɩɩ noogo, tɩ kɩt t’a sak n na n zãms Biiblã. Sɩd-sɩdã, d no-goamã sã n kɩt tɩ nebã rat n bãng a Zeova n paase, noom-a-la wʋsgo. D fãa ratame tɩ d no-goamã waoogda a Zeova. w22.04 5-6 s. a 5-7

A Zeezi riga zĩn-dãmb a yopoe sẽn da namsd a Maari sẽn yit Magdala wã, t’a paam a menga. Sẽn na yɩl n wilg a Zeezi t’a yaa sõm-mita, a sakame n lebg a karen-biiga, la a rɩk a paoongã n teel koe-moonegã. (Luk 8:1-3) Yaa sɩd t’a Maari sũur yɩɩ noog wʋsg ne a Zeezi sẽn maan bũmb ning n kõ-a wã, la a ra pa mi tɩ bũmb sẽn yaa kãseng n yɩɩd rẽ la a Zeezi ra na n wa maan kõ-a ye. A ra na n wa kõo a vɩɩmã tɩ yɩ maoong “sẽn na yɩl tɩ ned ning fãa sẽn tẽed yẽ” wa paam vɩɩm sẽn ka sɛta. (Zã 3:16) A Maari kell n maana sɩd ne a Zeezi, n wilg t’a sũur nooma ne a sẽn maan bũmb ning n kõ-a wã. Baa a Zeezi sẽn da wa n be ra-lukã zug n namsdẽ wã, a Maari ra bee beenẽ n teend a Zeezi ne neb a taabã sẽn da be be wã. (Zã 19:25) A Zeezi sẽn wa n ki wã, a Maari ne pagb a yiib baoo kaam toor-toor sẽn tar yũ-noog n na n tɩ ning a kũumã. (Mark 16:1, 2) A Maari paam n yãa a Zeezi a vʋʋgrã poor n sõs ne-a. Woto yaa bũmb a Zeezi karen-biis wʋsg sẽn pa paam n maane.—Zã 20:11-18. w23.01 27 s. a 4

D pa segd n tags tɩ d sẽn maan bũmb ning a Zeova tʋʋmdã pʋgẽ pĩndã sekame ye. Tõe tɩ d pa le tar pãng n tõe n tʋm tʋʋmdã sõma wa pĩndã ye. La d segd n ket n wɩngda ne “Zu-soabã tʋʋmdã,” la d ket n gũusdẽ hal n tãag saabã. (1 Kor. 15:58; Mat. 24:13; Mark 13:33) D segd n tũu a Zeova ne yẽesem, la ne d sũur fãa. Koɛɛg ning a Zeezi sẽn taas Laodise tigingã nebã wilgdame tɩ bãmb me ra tara b zu-loɛɛga. B ra yaa “zal-zal” a Zeova tũubã wɛɛngẽ. B sẽn da pa tar yẽesmã yĩnga, a Zeezi yeelame tɩ b yaa ‘nimbãan-neba, la noang rãmba.’ B ra segd n tũu a Zeova ne yẽesem wʋsgo. (Vẽn. 3:16, 17, 19) Woto wilgda tõnd bõe? D yẽesmã sã n boogame, d segd n maneg n tagsa bũmb nins a Zeova ne a siglgã sẽn maand n kõt tõndã yelle, la d nand rẽ. (Vẽn. 3:18) D pa segd n bas tɩ naar vɩɩmã baoob tiis-du, tɩ d pa le lʋɩɩsd a Zeova tũubã taoor ye. w22.05 3-4 s. a 7-8

Yʋʋm tusa la woto a Zeova sẽn tar sebr sẽn yaa toor zalle, n gʋlsd neb yʋy a pʋgẽ. Yaa a Abɛll sẽn yɩ pipi wẽn-sakdã yʋʋr la a reng n gʋls be. (Luk 11:50, 51) Rẽ tɛka, a Zeova paasa neb a taab yʋy. La masã, lebga neb milyõ-rãmb yʋy n be be. Biiblã pʋgẽ, b boonda seb-kãng tɩ “tẽegr sebre,” “vɩɩm sebrã,” la “vɩɩm seb-pindmã.” (Mal. 3:16; Vẽn. 3:5; 17:8) Yaa neb nins sẽn tũ a Zeova ne b sũy fãa, la b nong-a wã yʋy n be sebrã pʋgẽ. B tõe n wa paama vɩɩm sẽn kõn sa. Rũndã-rũndã, d tõe n paamame t’a Zeova gʋls d yʋʋrã vɩɩm sebrã pʋgẽ, d sã n modg n paam zood sõma ne-a, a Bi-ribl a Zeezi Kirist maoongã maasem yĩnga. (Zã 3:16, 36) D saagdame n na n tɩ vɩɩmd saasẽ tɩ yaa tẽngã zugu, d fãa ratame t’a Zeova gʋls d yʋʋrã a sebrã pʋgẽ. w22.09 14 s. a 1-2

Vẽnegr sebrã gomda “wag-bedr sẽn yaa miuug wa bugum” yelle. (Vẽn. 12:3) Wag-bed-kãng zabda ne a Zeezi la ne a malɛgsã. (Vẽn. 12:7-9) A zabda ne Wẽnnaam nin-buiidã, la a kõt we-rũng ning sẽn tar zut a yopoe wã tõogo, rat n yeel tɩ goosneema-rãmbã. (Vẽn. 12:17; 13:4) Wag-bed-kãngã makda ãnda? Yaa yẽ la “wag-kʋdrã b sẽn boond tɩ Munaafɩɩk la Sʋɩtãanã.” (Vẽn. 12:9; 20:2) Yaa yẽ n kõt a Zeova bɛɛb a taabã fãa pãnga. Bõe n na n paam wag-bedrã? Vẽnegr 20:1-3 pʋgẽ, b wilgame tɩ malɛk n lob a Sʋɩtãan bog-zulung pʋgẽ, tɩ yaa wa b sẽn kẽes-a bãens roogo. A Sʋɩtãan sã n wa be bog-zulungã pʋgẽ, a pa na n tõog n “le belg buud toɛy-toɛyã hal tɩ yʋʋm tusrã looge.” Sẽn na n baase, b na n sãama a Sʋɩtãan ne a zĩn-dãmbã wakat fãa yĩnga. B maka rẽ ne b sẽn lob-a “bugum la kidbr mogrã pʋgẽ.” Mams-y n ges-y-yã a Sʋɩtãan ne a zĩn-dãmbã sẽn na n wa ka le beẽ. Wakat kãng na n yɩɩ sũ-noog wakat meng-menga! w22.05 14 s. 19-20

A Zeezi ra tʋmda wʋsgo. A sẽn wa n yaa bi-bɩɩga, a ra tʋmda ra-wãarã tʋʋmde. (Mark 6:3) Sãmbg kae t’a roagdbã sũur da nooma ne-a, a sẽn da tʋmd n sõngd n get b zakã rãmb yellã. A Zeezi sẽn da yaa ra-wãad sẽn zems zãngã yĩnga, tõe tɩ neb wʋsg ra nong n bolgd-a-la tʋʋma. A Zeezi sũur da nooma wʋsg ne a tʋʋmdã. Baa ne a sẽn da nong a tʋʋmdã ne a sũur fãa wã, a ra modgd n baooda sẽk a Zeova tũubã yĩnga. (Zã 7:15) Kaoosg zugẽ, a sẽn wa n kẽes a meng zãng koɛɛgã mooneg pʋgẽ wã, a sagla a kɛlgdbã yaa: “Bɩ y ra tʋm rɩɩb ning sẽn sãamdã yĩng ye. Tʋm-y rɩɩb ning sẽn pa sãamde, n kõt vɩɩm sẽn ka sɛtã yĩnga.” (Zã 6:27) Sẽn paase, a sẽn wa n sõsd ne nebã tãngã zugã, a yeel-b lame yaa: “Bĩng-y yãmb paoongã saasẽ.” (Mat. 6:20) D sã n tũud sagls nins a Zeova sẽn kõt tõndã, sõngd-d lame tɩ d tall tagsg sẽn zems nug-tʋʋmdã wɛɛngẽ. D sẽn yaa kiris-nebã, b sagend-d lame tɩ d ‘wɩsg d meng n tʋme, n tʋm tʋʋmd sẽn yaa sõma.’ w22.05 22 s. a 9-10

A Eniis kõo a Tɩmote mak-sõngo. A Tɩmote ra nee vẽeneg t’a ma wã tʋʋm-tʋmdɩ wã wilgdame t’a nonga a Zeova ne a sũur fãa la t’a sũur nooma ne a sẽn paam n tũud a Zeova wã. Rũndã-rũndã me, ma-rãmb wʋsg tõog n sõnga b zakã rãmb tɩ b wa tũud a Zeova, “tɩ pa tũ ne goam” ye. (1 Pɩy. 3:1, 2) Yãmb me tõe n maana woto. Wãn to? Lʋɩɩs-y yãmb ne a Zeova zoodã taoor y vɩɩmã pʋgẽ. (Tõo. 6:5, 6) Wa ma-rãmb wʋsgo, yãmb me mongda y mens bũmb wʋsgo. Y rɩkda y sẽka, y ligdi, la y maand bũmb kẽer sẽn na yɩl tɩ y kambã paam sẽn yaa tɩlɛ ne-bã. Wakat ning menga, y pa gõe ye. La y pa segd n bas tɩ yel-kãensã fãa kɩt tɩ y pa le tar sẽk n maand bũmb nins sẽn na n paas yãmb ne a Zeova zoodã pãngã ye. Baood-y sẽk wakat fãa n pʋʋsdẽ, n zãmsd Biiblã y toore, la y modg n da vaand tigissã ye. Y sã n maand woto, y zoodã ne a Zeova wã pãng na n paasdame. Y na n yɩɩ mak-sõng me n kõ y zakã rãmba, la neb a taaba. w22.04 16 s. a 1; 19 s. 12-13

D sũur noomame, d sẽn mi tɩ pa tõnd n yãkd b sẽn segd n kao ned bʋʋd to-to wã. Yaa a Zeova sẽn yaa Bʋ-kaood sẽn ka to wã n na n ges rẽ yelle. (Rom. 14:10-12) D tõe n basa d yam t’a na n ket n kaooda bʋʋd tɩ zemsd ne noy nins sẽn zems zãngã a sẽn lugl sẽn yaa sõma ne wẽngã wɛɛngẽ wã. (Sɩng. 18:25) A pa na n maan bũmb sẽn pa tɩrg a bada. D gũuda wakat ning a Zeova sẽn na n wa kɩt tɩ yɛl nins fãa ninsaalbã sẽn pa zems zãngã ne yel-wẽndã sẽn wa ne wã sa fasɩ wã. Wakat kãnga, d toogã, d namsgã la d sũ-sãamsã fãa na n saame. (Yɩɩn. 72:12-14; Vẽn. 21:3, 4) D pa na n tol n le tẽeg rẽ yell ye. Nand tɩ wakat kãng d sẽn gũud ne d sũur fãa wã ta, d sẽn paam t’a Zeova naan tõnd tɩ d tõe n dɩk a togs-n-taar n kõt d taabã sugrã noom-d-la wʋsgo. w22.06 13 s. 18-19

Bʋ-kaood sẽn tʋmd a tʋʋmd sõma mii laloa wã sõma. A segd n mii sẽn yaa sõma ne sẽn yaa wẽng n bake. Bõe me la bʋ-kaood sẽn tʋmd a tʋʋmd sõma maanda? Nand t’a kao bʋʋdo, a baood n bãnga yellã vɩʋʋg sõma. Zĩ-kãng wɛɛngẽ, a Zeova n yaa Bʋ-kaood sẽn ka to. A yaa Bʋ-kaood sẽn mii yɛlã fãa vɩʋʋg sõma. A pa wa ninsaalb nins sẽn yaa bʋ-kaoodbã ye. (Sɩng. 18:20, 21; Yɩɩn. 90:8) A pa tikd ninsaal nin sẽn ne, wall a sẽn wʋmdã bal zug ye. A mii zʋg nins d sẽn dɩk d roagdbã nengẽ wã, d sẽn paam wubr ningã, d laafɩ wã, la d yel-manesmã sõma. Sẽn paase, a Zeova mii sẽn be d sũurẽ wã. A mii ned fãa tʋlsem la a yam-tagsgã sõma. Baa fʋɩ pa solg ne a Zeova ye. (Ebre. 4:13) Dẽnd a Zeova sã n wa kõ ned sugri, yaa a sẽn mi a soabã yɛlã fãa vɩʋʋg sõma wã yĩnga. w22.06 4 s. a 8-9

D segd n tagsa bũmb nins a Sʋɩtãan sẽn maan n nams a Zoobã yelle, bala a tũnugda ne manesem a woto buud me n na n kɩt tɩ d bas a Zeova tũubu. A Sʋɩtãan yeelame tɩ d pa nong a Zeova ne d sũur fãa, la tɩ sẽn na yɩl n kogl d vɩɩmã, d na n basa a tũubu. A pʋd n yeelame t’a Zeova pa nong-do, la tɩ baa ne d sẽn maand modgr nins fãa wã, d pa tat a yam ye. D sẽn mi a Sʋɩtãan raabã yĩnga, d pa tẽed a ziri wã ye. Namsgã bɩ zu-loeesã sõngda tõnd tɩ d bãng d sẽn sɩd yaa ned ninga. A Zoob sẽn mao ne zu-loees ninsã sõng-a lame t’a bãng a pãn-komsmã, la a bãng a sẽn segd n maan rẽ wɛɛngẽ. Wala makre, a bãngame t’a segd n yɩɩ sik-m-meng soab n yɩɩd pĩndã. (Zoob 42:3) Zu-loeesã me tõe n sõnga tõndo, tɩ d bãng bũmb wʋsg d mengã zugu. D sã n wa bãng zʋg-sõma d sẽn segd n bɩɩs n paase, bɩ d modg n bɩɩs-ba. w22.06 23 s. 13-14

A Zeova yeelame t’a na n sõng-d lame. Wala makre, nand t’a Zeova yeel tɩ ‘yãmb yaa mam kaset rãmbã,’ a yeelame: “Fo sã n wa pasgd koom, mam na n zĩnda ne foom, la fo sã n wa rʋʋgd kʋɩlse, koomã pa na n lim-f ye. Fo sã n wa kẽnd bugmẽ, bugmã pa na n yõog foom, bug-witmã me pa na n vʋʋl-f ye.” (Eza. 43:2) D sã n wa moond koɛɛgã, d segda yɛl kẽer sẽn tõe n gɩdg tõndo, tɩ yaa wa kʋɩlg koom sẽn tõe n loog ne-do, la zu-loe-kɛgems sẽn wõnd bugum. Baa ne rẽ, a Zeova sõngda tõnd tɩ d ket n taasd nebã koɛɛgã. (Eza. 41:13) Rũndã-rũndã, nebã fãa la bal pa rat n kelg koɛɛgã ye. La d segd n tẽegame tɩ woto pa rat n yeel tɩ d pa moond koɛɛgã sõma ye. D sẽn mi tɩ d sã n ket n moond koɛɛgã n pa base nooma a Zeova wã, kengda d raoodo. Tẽn-tʋmd a Poll yeelame tɩ “ned kam fãa na n deega a keoor wa sẽn zems a tʋʋmde.”—1 Kor. 3:8; 4:1, 2. w22.11 4 s. a 5-6

D nee Biiblã bãngr-goamã sẽn pidsd rũndã-rũndã. Neb sẽn “gomd buud-goam toɛy-toɛy” zãmsda “buud-gomd sẽn yaa yɩlemdã,” rat n yeel tɩ sɩdã sẽn be Biiblã pʋgẽ wã. (Zaka. 8:23; Sof. 3:9) D sẽn tõogd n maand woto fãa wã yaa d sẽn paam t’a Zeezi Kirist sẽn yaa d taoor soabã wilgd-d sorã yĩnga. A Zeova siglgã nebã yaa milyõ a nii la zaka, n be tẽns 240 pʋsẽ. Yʋʋmd fãa, neb tusa n deegd lisgu. La pa nin-kãensã sõorã n tar yõod n yɩɩd ye. Yaa b sẽn bɩɩsd zʋg-sõma wã, rat n yeel tɩ b sẽn “yeelg nin-paalgã.” (Kolo. 3:8-10) B wʋsg ra yaa yoaadba, nen-kɛglem dãmba, bu-welsdba, la neb sẽn da nong b tẽngã tɩ loog noore. Ezayi 2:4 bãngr-gomdã pidsdame. B pa ‘le zãmsd zabr ye.’ D sẽn modgd n yeelgd nin-paalgã, sõngda neb wʋsg tɩ b wat a Zeova siglgã pʋgẽ, la wilgdẽ tɩ d pʋgda a Zeezi Kirist sẽn yaa d taoor soabã. (Zã 13:35) Yaa a Zeezi sẽn sõngd tõndã yĩng n kɩt tɩ d tõogd n maand woto fãa wã. w22.07 9 s. a 7-8

D sã n wa pʋʋsd a Zeova, segd n yɩɩ ne waoogr wʋsgo. Tags-y n ges-y-yã a Zeova sẽn vẽneg a Ezayi, a Ezekɩyɛlle, a Dãniyɛll la a Zã tɩ b yã bũmb ninsã. La b fãa sẽn yã bũmb ninsã wilgdame t’a Zeova yaa Rĩm sẽn ka to. A Ezayi “yãa a Zeova sẽn zao geer sẽn zẽk n be yĩngri.” (Eza. 6:1-3) A Ezekɩyɛll yãa a Zeova sẽn zao saar sẽn yaa kãsenga, tɩ ‘vẽenem sẽn yãgd gũbg-a, wa saag-gomtɩʋʋgo.’ (Eze. 1:26-28) A Dãniyɛll yãa ‘Soab ning sẽn be wakat fãa’ wã t’a yer fut sẽn yaa peels faddd, tɩ bug-witim yit a geerẽ wã. (Dãn. 7:9, 10) La a Zã yãa a Zeova sẽn zao naam-geer zugu, tɩ saag gomtɩʋʋg gũbg geerã, t’a yalẽ wã wõnd emerood kugri. (Vẽn. 4:2-4) D sã n tags a Zeova ziirã sẽn ka to wã zugu, kɩtdame tɩ d bãng tɩ d sẽn paam n tõe n pʋʋs-a wã yaa zu-zẽkr meng-menga, la tɩ d segd n maana rẽ ne waoogr wʋsgo. w22.07 20 s. a 3

Kom-bɩɩse, a Sʋɩtãan na n makame n kɩt tɩ y sẽn nong a Zeova to-to wã pãng booge, tɩ y wa bas a tũubu. A tõe n kɩtame tɩ y wa maand sãmbs ne bũmb kẽer Biiblã sẽn yete. Wala makre, lekollẽ wã, b tõe n yeta yãmb tɩ bũmb fãa wa n bee woto tɩ pa tũ ne Naand sabab ye. Rẽ la b sẽn boond tɩ evolisɩõ wã. Tõe tɩ y sẽn wa n yaa bi-bilfu, y ra pa tagsd rẽ yell ye. La masã, b zãmsda yãmb rẽ lekollẽ wã. Y karen-saam-dãmbã sẽn yet bũmb ning evolisɩõ wã wɛɛngẽ wã tõe n wõnda yaa sɩda, la kɛpɩ. La tõeeme tɩ b zɩ n bao n bãng bũmb sã n beeme n wilgd vẽeneg tɩ Naand n be ye. Tẽeg-y Yel-bũn 18:17 sẽn yet bũmb ningã. B yeta be yaa: “Sẽn yɩ-a pipi n togs a yell bʋʋd zĩigẽ wõnda a tara bʋʋm, hal t’a zabd-n-taagã wa sok-a sogsg sẽn na yɩl tɩ b bãng yɛlã sẽn sɩd yɩ to-to wã.” Dẽnd y pa segd n tẽ bũmb nins fãa b sẽn togsd yãmb lekollẽ wã zond-yaar ye. Maag-y y yĩng n bao n bãng Biiblã sẽn yet rẽ wɛɛngẽ, la d sɛbã me sẽn yet rẽ wɛɛngẽ wã. w22.08 2 s. a 2; 4 s. a 8

D segd n modgame n wʋm bũmb nins d sẽn karemd Wẽnnaam Gomdã pʋgẽ wã võore. Sã n pa rẽ, d karengã pa na n naf-d sõma ye. Wala makre, d ges a Zeezi sẽn sok “Tõogã karen-saamb” a ye sogsg ninsã. (Luk 10:25-29) Raoã sẽn sok a Zeezi n na n bãng a sẽn segd n maan bũmb ning n paam vɩɩm sẽn kõn sa wã, a Zeezi sõng-a lame t’a paam a sokrã leoor Wẽnnaam Gomdã pʋgẽ. A Zeezi sok-a lame yaa: “Bõe la b gʋls Tõogã pʋgẽ? Fo wʋmda f sẽn karemdã võor wãn-wãnã?” Raoã leoorã zemsame, bala a wilgame tɩ Wẽnnaam Gomdã yetame tɩ f segd n nonga Wẽnnaam, la f nong f to. (Maan. 19:18; Tõo. 6:5) La rẽ poore, raoã sokame yaa: “La yaa ãnda soab la mam to?” Woto wilgdame t’a ra pa wʋmd a sẽn karemdã võor sõma ye. Rẽ kɩtame t’a ra pa mi a sẽn na n tũ gom-kãensã to-to a vɩɩmã pʋgẽ ye. Sẽn na yɩl n wʋm Wẽnnaam Gomdã võor sõma, yaa tɩlɛ tɩ d paam a Zeova sõngre. Rẽ wã, kos-y-yã-a a vʋʋsem sõngã, tɩ sõng-y tɩ y yamã ra yuusi, la y kos-a t’a sõng-y tɩ y tũ bũmb ning y sẽn karmã. w23.02 9 s. a 4-5

“Yãmb maana wãn n bãng sɩdã?” Sãmbg kae tɩ b zoe n soka yãmb woto naoor wʋsgo. Sok-kãngã naaga sogsg nins d sẽn mi n sok d tẽed-n-taaga, d sã n dat n bãng-a sõma n paasã. D rat n bãnga d tẽed-n-taasã sẽn maan to-to n bãng a Zeova la b nong-a wã. D nongame me n togs-b d sũur sẽn noom to-to, d sẽn bãng sɩdã. (Rom. 1:11) Woto sõngda tõnd tɩ d ket n tagsd d sẽn bãng sɩdã sẽn nafd tõnd to-to wã yelle. Sõngd-d lame me tɩ d yãk yam n ‘ket n kẽnd sɩdã pʋgẽ,’ rat n yeel tɩ n modg tɩ d sẽn vɩ to-to wã tat a Zeova yam, tɩ d paamd a barkã. D sũur nooma ne d sẽn paam n be sɩdã pʋgẽ wã, bʋʋm wʋsg yĩnga. Sẽn yɩɩd fãa, yaa d sẽn nong Wẽnnaam a Zeova, soab ning sẽn so sɩdã. Ne Biiblã sẽn yaa a Gomdã maasem, d bãngame t’a yaa pãng sẽn ka to soab sẽn naan saasã la tẽngã, la t’a leb n yaa d saasẽ Ba sẽn nong-do, la a get d yell sõma.—1 Pɩy. 5:7. w22.08 14 s. a 1, 3

Tẽn-tʋmd a Poll sagla a tẽed-n-taasã tɩ b tʋm “tʋʋm-sõma,” n wilg tɩ b nonga taaba. (Ebre. 10:24) A Poll ra pa sõngd a tẽed-n-taasã ne a no-goamã bal ye. Ra yaa ne a tʋʋm-tʋmdɩ wã me. Wala makre, kom-kãseng sẽn wa n kẽ Zide wã, a toola a tẽed-n-taasã sẽn da be be wã sõngre. (Tʋʋ. 11:27-30) Baa ne a sẽn da moond koɛɛgã la a zãmsd nebã Wẽnnaam Gomdã n pa tar sẽk wʋsgã, wakat fãa a ra baooda a sẽn tõe n maan n sõng naong rãmbã. A sẽn da maand woto wã ra sõngda a tẽed-n-taasã tɩ b bas b yam t’a Zeova na n gesa b yelle. Rũndã-rũndã me, d sã n dɩkd d pãngã, d sẽkã la d minimã n sõngd d tẽed-n-taasã sabab-wẽng sasa, paasda b tẽebã pãnga. Yaa woto me, d sã n kõt ligd n teend tʋʋmdã d sẽn tʋmd dũniyã gill zugã. Ne manesem a woto la ne manesem a taaba, d sõngda d tẽed-n-taasã tɩ b kɩs sɩd t’a Zeova pa na n tol n daag-b n bas ye. w22.08 24 s. 14

Biiblã tara bãngr-goam wʋsg sẽn pidsi. Kẽer pidsa yʋʋm kobs b sẽn togs-bã poore. Kʋdemdã yɛl wilgdame tɩ bãngr-gom-kãens sɩd pidsame. Rẽ pa ling tõnd ye. Bala d miime tɩ yaa a Zeova n togs Biiblã bãngr-goamã. D gom bãngr-gomd ning sẽn gomd pĩnd wẽndẽ Babilon sãoongã yellã. Yʋʋm kobs-yopoe la zak sẽn deng a Zeezi rogmã, Wẽnnaam vẽnega no-rɛɛs a Ezayi t’a pĩnd n togs tɩ b na n deega Babilon tẽngã sẽn da tar pãng wakat kãngã. A togsame tɩ ned ning sẽn na n deeg tẽngã yʋʋr la a Sirus. A leb n wilga b sẽn na n maan to-to n deeg tẽngã vẽenega. (Eza. 44:27–45:2) Sẽn paase, a Ezayi togsame tɩ Babilon na n wa sãama zãnga, n lebg raboogo. (Eza. 13:19, 20) Meed-rãmbã ne Pɛrs-rãmbã tõoga Babilon yʋʋmd 539 sẽn deng a Zeezi rogmã. Rũndã-rũndã, Babilon sẽn da yaa tẽn-kãsengã lebga raboogo. w23.01 4 s. 10

A Zeova yãka tõnd n naag a nin-buiidã sẽn yaa wa zak a ye neb n be dũniyã gill zugã, tɩ d tũud-a. Woto sɩd yaa zu-zẽkr meng-menga, la bũmb sẽn nafd tõnd wʋsgo! (Mark 10:29, 30) Dũniyã gill zugu, d tara tẽed-n-taas sẽn nong a Zeova wa tõndo, la sẽn modgd n tũud a noyã. D buud-gomdã, d minimdã la d fu-yerdɩ wã tõe n yaa toor ne bãmb rẽndã. La d nong-b lame, baa d sã n nan bãng-b-la paalem. La sẽn noom tõnd n tɩ yɩɩd yaa d sẽn naagd taab n pẽgd d saasẽ Ba wã sẽn nong tõnd la d waoogd-a wã. D segd n bao n pẽneg-b lame. (Yɩɩn. 133:1) Wakat ninga, b sõngda tõnd tɩ d tõog n mao ne d zu-loeese. (Rom. 15:1; Gal. 6:2) B leb n kengda d raood sẽn na yɩl tɩ d ket n wɩngd ne a Zeova tũubu, tɩ d tẽebã me kell n tall pãnga. (Ebre. 10:23-25) Tags-y n ges-y sẽn da na n yɩẽ to-to, d sã n da pa paamd d tẽed-n-taasã sõngr sẽn na yɩl n tõog n yals kãn-kãe d bɛɛbã sẽn yaa a Sʋɩtãan ne a dũniyã taoore. w22.09 2-3 s. a 3-4

D sã n wa tʋmd ne rezo sosiyo, tõe n yɩɩ toog tɩ d tall yõk-m-menga. D sã n pa gũusi, d tõe n wa maaname tɩ neb ka tɛk bãng yell neb a taab sẽn pa segd n bãng ye. D sã n paam n ning bũmb ẽntɛrnetã pʋgẽ n sa, d pa tõe n bãng nebã sẽn na n maan bũmb ning ne rẽ, wall a sẽn tõe n wa ne zu-loees ninsã ye. Yõk-m-mengã leb n tõe n sõng-d lame tɩ d kell n sĩndi, neb sã n wa pirsd tõnd n dat tɩ d taas-b kibay sẽn tõe n kɩt tɩ d tẽed-n-taasã paam yelle. D segd n maana woto, d sã n bee tẽng b sẽn gɩdg d tũudmã wall d tʋʋm kẽere, tɩ polɩɩs-rãmbã wa na n sokd-d sogsgo. Yel-kãensã buud la yɛl a taab wɛɛngẽ, d segd n ‘ninga d noorã yʋk’ wa Biiblã sẽn sagend tõndã. (Yɩɩn. 39:1) D sã n wa be ne d zakã neba, d zo-rãmba, d tẽed-n-taas wall sẽn yaa ned ning fãa, d segd n modgame n wilg tɩ d yaa ned b sẽn tõe n kɩs sɩda. La sẽn na yɩl n yɩ ned a woto, d segd n talla yõk-m-menga. w22.09 13 s. 16

Sẽn na yɩl n paam sũ-noog hakɩɩka, yaa tɩlɛ tɩ d karemd Biiblã la d zãmsd-a. Yaa tɩlɛ tɩ d sɩd maan woto. Rẽ n so t’a Zeezi yeel yaa: “Ninsaal pa tog n vɩ ne rɩɩb bal ye. A tog n vɩɩ ne gomd ning fãa sẽn yit a Zeova noorẽ wã.” (Mat. 4:4) Dẽnd d pa segd n bas daar tõr n pa karem Wẽnnaam Gomdã sẽn yaa Biiblã ye. A Zeova sẽn nong-dã yĩnga, a wilga Biiblã pʋgẽ d sẽn tõe n maan n paam sũ-noogo. Be, d bãngda a sẽn dat tɩ d vɩɩmã yɩ to-to, d sẽn tõe n maan tɩ tõnd ne yẽ zoodã pãng paase, la d sẽn tõe n maan n paam d yel-wẽnã sugri. D bãngda a sẽn pʋlem bũmb nins beoog-daarã wɛɛngẽ tɩ na n yɩ bark meng-mengã. (Zer. 29:11) D sẽn zãms Biiblã n bãng woto fãa wã noom-d-la wʋsgo! Baa y sũur sã n wa sãam wʋsg zu-loeesã yĩnga, bɩ y maneg n wɩng ne a Zeova Gomdã karengo, la y bʋgsd-a zugu. w22.10 7 s. a 4-6

Be bʋʋm la Biiblã sẽn yet tɩ d ra pa zɩɩlem pʋgẽ wã. Yaa d sã n tũud Biiblã saglsã d vɩɩmã pʋgẽ la d paamd yam hakɩɩka. Bilf-bilfã, d wat n bãnga sagl-kãensã sẽn tõe n sõng-d tɩ d gil zu-loees to-to, la d yãk yam n tʋmd tʋʋm-sõma. Yɩta sõma tɩ d mi n tags d sẽn yãk yam n maand bũmb ninsã yelle. D sã n zãmsda Biiblã ne a Zeova Kaset rãmbã la d kẽnd tigissã, d segd n soka d meng n ges bõe yĩng tɩ d nan pa rɩk d meng n kõ a Zeova n deeg lisgu. D sã n zoe n deega lisg me, rẽ yĩnga d modgdame tɩ d minimã paasd koe-moonegã la nebã zãmsgã wɛɛngẽ bɩ? D sẽn yãkd yam n maand bũmb ninsã wilgdame tɩ d tũuda Biiblã noyã bɩ? D manesmã sẽn yaa to-to ne nebã yaa wa a Zeezi manesem sẽn da yaa to-to ne-bã bɩ? Sã n mikame tɩ bũmb kẽer la d segd n manege, bɩ d tags a Zeova sẽn yet bũmb ninsã zugu, bala yẽ n ‘kõt sẽn pa tar-a yamã yam.’—Yɩɩn. 19:7. w22.10 20 s. a 8

A Ezekɩyɛll yãa Wẽnnaam vʋʋsem sõngã pãng sẽn ta zĩig ninga. Wẽnnaam vẽneg-a lame t’a yã a vʋʋsem sõngã sẽn sõngd malɛgsã sẽn tar pãngã, la a sẽn kɩtd tɩ saasẽ saarã ruzãnt-rãmbã sẽn yaa kãsems wʋsgã kẽnda. (Eze. 1:21) A Ezekɩyɛll manesem yɩɩ wãna? A yeelame yaa: “Mam sẽn yã-a wã, mam lʋɩɩme n fõgen m neng tẽnga.” A Ezekɩyɛll yɛɛsa wʋsgo, n lʋɩ tẽnga. (Eze. 1:28) Rẽ poore, a Ezekɩyɛll sẽn tags bũmb nins a sẽn yã wã zugã, tog n sõng-a lame t’a kɩs sɩd tɩ ne vʋʋsem sõngã sõngre, a na n tõog n moona koɛɛgã n baase. A Zeova yeela a Ezekɩyɛll yaa: “Ninsaal biiga, yik n yaas f naoã zut tɩ m gom ne-fo.” Gom-kãensã, n paas vʋʋsem sõngã kõo a Ezekɩyɛll pãng t’a tõog n yik n yalse. (Eze. 2:1, 2) Wakat kãng tɛka, a Ezekɩyɛll koe-moonegã sasa fãa, Wẽnnaam sõng-a-la ne a “nugã,” rat n yeel t’a vʋʋsem sõngã.—Eze. 3:22; 8:1; 33:22; 37:1; 40:1. w22.11 4 s. a 7-8

No-rɛɛs a Ezayi gomdã wilgdame t’a Zeova yaa wa karen-saamb sẽn kẽnd a karen-biis poorẽ, n wilgd-b sor ning b sẽn segd n tũ. Rũndã-rũndã, d wʋmda Wẽnnaam koɛɛgã sẽn yit d poorẽ. Wẽnnaam kɩtame tɩ b gʋls a goamã Biiblã pʋgẽ hal sẽn kaoose. Dẽnd d sã n wa karemd Biiblã, yaa wa d sẽn wʋmd Wẽnnaam koɛɛg sẽn yit d poorẽ. (Eza. 51:4) Bõe la d tõe n maan t’a Zeova sẽn zãmsd tõndã naf-d sõma? Tẽeg-y t’a Ezayi goma bũmb a yiib yelle. A yeelame yaa: “Ad sorã.” La a yeel me: “Tũ-y-yã-a!” D sã n mi “sorã” bala, pa sek ye. D segdame me n ‘tũ-a.’ A Zeova Gomdã ne a siglgã sẽn zãmsd tõnd bũmb ninsã sõngda tõnd tɩ d bãngd a Zeova sẽn dat tɩ d maane. D bãngda d sẽn tõe n tũ d sẽn zãmsdã me to-to. D sã n dat n kell n tũ a Zeova ne sũ-noogo, yaa tɩlɛ tɩ d maand bõn-kãensã a yiibã. Yaa d sã n maand woto la d tõe n paam t’a Zeova ning-d barka. w22.11 11 s. 10-11

A Zeezi tẽn-tʋmdbã fãa la bal kũum poore, tigingã neb kẽer n lebg sɩdã kɩɩsdba. (Mat. 13:24-27, 37-39) B ra zãmsda nebã “zãms-goalma, sẽn na yɩl tɩ karen-biisã lak n pʋg bãmba.” (Tʋʋ. 20:30) Wala makre, b ra yetame tɩ Kiristã pa kõ a meng “vugr wakat fãa yĩng sẽn na yɩl n tʋk neb wʋsg yel-wẽna,” wa Biiblã sẽn yetã ye. B ra yetame me tɩ Kiristã segd n kõo a vɩɩmã n yɩlem naoor wʋsgo. (Ebre. 9:27, 28) Rũndã-rũndã, neb kẽer tẽeda zãmsg a woto sẽn yaa ziri wã. B kẽnda wẽnd-dotẽ semen fãa, wakat ninga daar fãa, n deegd kominiyõ b sẽn boond tɩ Kiristã yĩngã, n yetẽ tɩ b maanda a Zeezi Kirist kũumã tẽegre. Tũudum kẽer yẽ pa maand a Zeezi kũumã tẽegr semen fãa wall daar fãa ye. La b pa wʋmd a Zeezi sẽn ki tɩ yɩ maoongã võor sõma ye. w23.01 21 s. a 5

A Zeezi yʋʋm tusr naamã sasa, a na n vʋʋga sẽn ki-bã, la a sõng wẽn-sakdbã tɩ b wa lebg neb sẽn zems zãnga. A Zeova sẽn kao neb nins bʋʋd n yeel tɩ b yaa tɩrsã “na n sooga tẽngã. B na n vɩɩmda a zug wakat sẽn kõn sa.” (Yɩɩn. 37:10, 11, 29) D sũur na n yɩɩ noogo, b sẽn na n kɩt tɩ kũumã sẽn yaa “yaoolem bɛ” wã “lebg zaalmã.” (1 Kor. 15:26) D sẽn saagd n na n wa vɩɩmd wakat sẽn kõn sa wã tika Wẽnnaam Gomdã zugu. D sẽn saagd woto wã sõngd-d lame tɩ d ket n maand sɩd ne a Zeova yaoolem wakatã sẽn pa nana wã. La d sã n dat n ta a Zeova yam, d sẽn tʋll n vɩɩmd wakat sẽn kõn sa wã bal pa sek ye. Pipi bũmb sẽn kɩt tɩ d rat n kell n maan sɩd ne a Zeova la a Zeezi wã yaa d sẽn nong-b ne d sũur fãa wã. (2 Kor. 5:14, 15) Rẽ kɩtame tɩ d rat n dɩk b togs-n-taare, la d moond koɛɛgã sẽn na yɩl n sõng neb a taabã tɩ bãmb me wa saagd n na n vɩɩmd wakat sẽn kõn sa. (Rom. 10:13-15) D sã n maand d taabã neere, la d pa rat-m-yembr dãmba, d lebgda neb nins buud a Zeova sẽn dat tɩ b yɩ a zo-rãmb wakat fãa yĩngã. w22.12 6-7 s. 15-16

B sã n wa namsd tõnd d tẽebã yĩnga, tõe n kɩtame tɩ d pa le tõe n maan bũmb nins sẽn da sõngd-d tɩ d tar sũur pʋgẽ bãanã ye. D tõe n wa maanda yɩɩre, la d yɛɛsd yɛlã sẽn na n wa baas to-to. Manesem a woto pa wẽng ye. La d segd n maana gũusgu. A Zeezi ra yeelame tɩ namsgã tõe n kɩtame t’a karen-biisã lak n lʋɩ. (Zã 16:1, 2) Yaa sɩd t’a Zeezi yeelame tɩ b na n wa namsa tõnd d tẽebã yĩnga, la a paasame me tɩ d tõe n kell n maana sɩd ne a Zeova. (Zã 15:20; 16:33) B sã n wa gɩdg d tũudmã, wall d tũudmã tʋʋm kẽere, filyallã la kãsem-dãmbã tõe n kõ-d-la noy rẽ wɛɛngẽ. Woto fãa yaa sẽn na n kogl tõnd tɩ d ket n paamd bũmb nins sẽn yaa tɩlɛ d tẽebã kengr yĩngã, la sõng-d tɩ d ket n maand d sẽn tõe fãa n moond koɛɛgã. Maan-y y sẽn tõe fãa n tũ noy nins b sẽn kõt yãmbã. (Zak 3:17) Ra tol-y n vẽneg-y kibay d tẽed-n-taasã zug n togs ned sẽn pa segd n bãng rẽ ye.—Koɛ. 3:7. w22.12 20-21 s. 14-16

Rũndã-rũndã, a Zeezi ket n sõngda a karen-biisã tɩ b moond Wẽnnaam Rĩungã koe-noog dũniyã gill zugu. A Zeezi pidsda a pʋlengã. A tũnugda ne a Zeova siglgã n wilgd-d d sẽn segd n moond koɛɛgã to-to, la a kõt-d tʋʋm-teed koɛɛgã mooneg yĩnga. (Mat. 28:18-20) Tõnd me sẽn segd n maan yaa d wɩngd ne koɛɛgã mooneg la nebã zãmsgã, la d ket n maand gũusgu, n gũud wakat ning a Zeova sẽn na n wa sãam dũni-wẽn-kãngã wã. D sã n tũud saglg ning sẽn be Ebre-rãmb 6:11, 12, d na n kell n kɩsa sɩd ne bũmb nins d sẽn saagd n na n wa paamã, “n tãag saabã.” A Zeova zoe n yãka daarã, la wakat ning takɩ a sẽn na n sãam a Sʋɩtãan dũniyã. Daar-n-kãng sã n ta, a Zeova na n pidsa pʋlems nins fãa a sẽn kɩt tɩ b gʋls a Gomdã pʋgẽ wã. La wakat ninga, d tõe n wa getame tɩ dũniyã saab kaoosda waoongo. La a Zeova daarã na n waa “a wakatã bal kɛpɩ.” (Hab. 2:3) Woto wã, bɩ d kell n yãk yam n gũ a Zeova, n wilg tɩ d ‘maaga d yĩng n gũud Wẽnnaam ning sẽn yaa tõnd fãagdã.’—Mis. 7:7. w23.02 19 s. 15-16

Ned sã n wa rʋʋd tãnga, yaa a sẽn dat n ta a zugẽ wã. La a sã n wa rʋʋda, zĩis n be a sẽn tõe n mi n yals n tool n get zĩ-neeba. Woto me, baa y sẽn ket n maood ne zu-loeesã, mi n yals-y n tags-y bũmb nins a Zeova sẽn maand n sõngd yãmb tɩ y tõogdẽ wã yelle. Daar fãa zaabre, bɩ y sok y meng yaa: ‘Bõe la a Zeova maan n sõng maam rũndã daarã? Baa ne m zu-loɛɛgã sẽn nan pa sa wã, bõe la a Zeova maand n sõngd maam tɩ m tõogd toogo?’ Modg-y n tẽeg-y baa yaa bũmb a yembr a Zeova sẽn maan n sõng-y tɩ y tõoge. Yaa sɩd tɩ tõe tɩ y pʋʋsdame n dat tɩ y zu-loɛɛgã sa. (Fili. 4:6) La d pa segd n yĩm bark nins d sẽn zoe n tarã yell ye. A Zeova yeelame meng t’a na n kõ-d-la pãnga, la a sõng-d tɩ d tõog toogo. Wilgd-y wakat fãa tɩ y sũur nooma ne bũmb nins a Zeova sẽn maand n sõngd yãmbã. Y sã n maand woto, y na n yãame t’a Zeova sõngda yãmb tɩ y paamd tõogre, baa y sẽn ket n maood ne zu-loeesã.—Sɩng. 41:51, 52. w23.01 19 s. 17-18

D sok d meng yaa: ‘Mam sẽn vɩ to-to wã wilgdame tɩ m miime tɩ dũni-kãngã saabã sɩd ta n saame bɩ? Mam sẽn get karengã la tʋʋmã to-to wã wilgdame tɩ yaa a Zeova tũubã n tar yõod n yɩɩd m vɩɩmã pʋgẽ bɩ? M tara tẽeb t’a Zeova na n gesame tɩ maam ne m zakã rãmb paam bũmb nins sẽn yaa tɩlɛ ne-dã bɩ?’ A Zeova sũur noomame, a sã n neẽ tɩ d maanda d sẽn tõe fãa n na n vɩɩmd tɩ zems ne a raabã. (Mat. 6:25-27, 33; Fili. 4:12, 13) D segd n feesda d tagsa wã wakat fãa, la d toeemd bũmb nins d sẽn segd n toeem d vɩɩmã pʋgẽ wã. A Poll yeela Korẽnt kiris-nebã yaa: “Bɩ y feesd y mens n get y sã n bee tẽebã pʋgẽ. Makd-y y mens n get y sẽn yaa neb nins buudu.” (2 Kor. 13:5) Dẽnd sẽn na yɩl n ket n manegd d yamã, d segd n karemda Wẽnnaam Gomdã, n modgd n get yɛlã wa Wẽnnaam sẽn get-b to-to wã, la d maand d sẽn tõe fãa n na n ta a yam.—1 Kor. 2:14-16. w23.01 9 s. a 5-6