Sa-sika

Vɛrse wã sõngda tõnd tɩ d bãng bũmb a yiib sẽn tar yõod wʋsgo. 1) Nin-tɩrsã paamda zu-loeese. 2) A Zeova fãagda tõnd d zu-loeesã pʋsẽ. Wãn to la a Zeova fãagd tõndo? Bũmb a ye a sẽn maand yaa t’a sõngda tõnd sẽn na yɩl tɩ d tall tagsg sẽn zems dũni-kãngã vɩɩmã wɛɛngẽ. Yaa sɩd t’a Zeova pʋlmame tɩ d sã n tũud-a, d na n paama sũ-noogo. La a pa yeel tɩ d pa na n paam zu-loees ye. (Eza. 66:14) A sagenda tõnd tɩ d tagsd beoog-daarã yelle, rat n yeel tɩ wakat ning d sẽn na n wa paam n vɩɩmd wakat sẽn kõn sa ne sũ-noogo, wa a sẽn datã. (2 Kor. 4:16-18) La nananda, a sõngda tõnd tɩ d ket n tũud-a daar ne a to fãa. (Wiis. 3:22-24) Bɩ d gom wẽn-sakdb sẽn zĩnd pĩndã la rũndã-rũndã yelle, la d ges yam ning d sẽn tõe n dɩk b kibarã pʋgẽ. Wa d sẽn na n yã wã, d tõe n paama zu-loees d sẽn da pa tẽede. La d sã n teeg a Zeova, a pa na n tol n daag-d n bas ye.—Yɩɩn. 55:22. w23.04 14-15 s. a 3-4

D tõe n dɩka yam a Zozɛf ne a Maari nengẽ. B ra sakda nanambsã, baa sã n wa pa nana ne-ba. (Luk 2:1-6) A Maari sẽn wa n tar pʋg sẽn kolg kiuug a wɛ wã, tẽngã taoor dãmb yeelame tɩ b maan bũmb sẽn pa nana. A Ogust sẽn da yaa Rom soolmã naabã yeelame tɩ b sõd nebã. A Zozɛf ne a Maari ra segd n toga sor n dʋʋg tãense, n kẽng Betlehɛm sẽn be kɩlo koabg la pis-nu zĩigẽ wã. So-toakã ra pa na n yɩ nana ne-ba, sẽn yɩɩd fãa ne a Maari. Tõe tɩ b ra maanda yɩɩr bũmb na wa n maan a Maari la biigã sẽn da be a pʋgẽ wã. Rogmã sã n da yik sorã zugu b ra na n maana wãna? Biig ning sẽn da na n wa lebg Mesi wã n da be a pʋgẽ wã. B tika rẽ n padem n pa tũ goosneema wã noorã bɩ? A Zozɛf ne a Maari pa bas tɩ bõn-kãensã kɩt tɩ b pa sak noorã ye. A Zeova ning-b-la bark b sakrã yĩnga. A Maari taa Betlehɛm ne laafɩ, n dog biig sẽn tar laafɩ, la a sõng meng tɩ Biiblã bãngr-gomd pidsi.—Mis. 5:2. w23.10 8 s. a 9; 9 s. 11-12

La yãmb mengã sã n yɛɛsda wʋsg n pa rat n leok tigissã sasa, bõe la y tõe n maane? Reng-y n segl-y tigsg fãa sõma. (Yel. 21:5) Tigsgã sasa, y sã n mi bũmb ning yell b sẽn gomdã sõma, na n yɩɩ nana tɩ y zẽk y nugã n leoke. Sẽn paase, leokd-y koɛɛg-koɛɛga. (Yel. 15:23; 17:27) Rẽ na n kɩtame tɩ y ra yɛɛsd wʋsg ye. Y sã n leok koɛɛg-koɛɛg ne y meng goama, wilgdame tɩ y segla y meng sõma, la tɩ y wʋmda bũmb ning yell b sẽn gomdã võor sõma. La y sã n tũ sagl-kãensã kẽer tɩ ket n yaa toog tɩ y tõog n leok tɩ yɩɩg vugr wall naoor a yiibu, bõe la y tõe n maane? Bãng-y t’a Zeova nanda modgr ning y sẽn maandã. (Luk 21:1-4) A Zeova pa baood tɩ d maan bũmb sẽn yɩɩd d pãng ye. (Fili. 4:5) Bao-y n bãng-y bũmb ning y sẽn tõe n maane, y sẽn tõe n maan rẽ to-to, la y pʋʋs a Zeova t’a kõ-y sũur pʋgẽ bãane. Sɩngrẽ wã, y tõe n yãka yam n na n leokd koɛɛg-koɛɛga. w23.04 21 s. a 6-8

Tẽn-tʋmd a Poll maka tõnd ne sodaas sẽn yaa gũusdba, la sẽn yer b fut zabr yĩnga. Zabr sasa, nebã fãa gũudame tɩ sodaag segl a meng n sa n na n zab wakat buud fãa. Yaa woto me ne tõndo. D yera tẽeb la nonglem kut fuugã, la d fõg saagrã kut puglã, tɩ wilgdẽ tɩ d segla d meng n gũud a Zeova daarã. Sodaag sã n yeelg kut fuugu, kogenda a sũurã. Tẽebã la nonglmã kogenda tõnd me sũurã. B tõe n sõnga tõnd tɩ d kell n tũ a Zeova, la d rɩk a Zeezi togs-n-taare. Tẽebã na n kɩtame tɩ d kɩs sɩd t’a Zeova na n keo-d lame, d sẽn baood-a ne d sũur fãa wã yĩnga. (Ebre. 11:6) Na n kɩtame tɩ d kell n maan sɩd ne a Zeezi sẽn yaa d taoor soabã, baa d sã n wa segd zu-loeese. Rũndã-rũndã, neb n kell n tall b burkĩndã baa b sẽn nams-b b tũudmã yĩnga, wall baa b sẽn segd ligd zu-loeesã. D sã n tags mak-sõng ning nin-kãensã sẽn kõ wã yelle, tõe n sõng-d lame tɩ d bɩɩs d tẽebã, n tõog n mao ne zu-loees buud toor-toore. D sã n dɩk neb nins sẽn pa gĩd b vɩɩmã ne bũmb wʋsgo, n lʋɩɩs Wẽnnaam Rĩungã yɛl taoorã togs-n-taare, d na n tõog n zãaga d meng ne ligdã la teedã nonglem. w23.06 10 s. a 8-9

Yõk-m-mengã sõngda ned t’a tõe n gũus ne a tagsa wã la a yel-manesmã. Yaa tɩlɛ tɩ ned tall yõk-m-meng n tõog n pids a raabo, sẽn yɩɩd fãa sã n yaa tʋʋmd sẽn yaa toogo, wall a sã n wa pa tar yẽesem. Tẽeg-y tɩ yõk-m-mengã naaga vʋʋsem sõngã biisi. Bɩ y kos a Zeova t’a kõ-y a vʋʋsem sõngã, tɩ y tõog n bɩɩs zʋg-kãngã. (Luk 11:13; Gal. 5:22, 23) Ra gũud-y yɛlã sẽn na n wa zems zãng ye. Dũni-kãngã pʋgẽ, d yɛlã pa tol n tõe n zems zãng ye. D sã n zĩ n gũud wakat kãnga, d pa na n tol n maan d sẽn yãk yam n na n maan a Zeova yĩngã ye. Y sẽn yãk yam n na n maan bũmb ningã sã n wõnd yaa toog wʋsgo, y yẽesmã tõe n boogame. Sã n yaa woto, bɩ y sɩng bilf-bilfu. Y sã n yãka yam n na n bɩɩs zʋg-sõngo, y tõe n modg n wilgda rẽ yel-bõones pʋsẽ. Sã n yaa Biiblã tõr la y rat n karme, y tõe n sɩngame n karemd-a minit a wãn daar fãa. w23.05 29 s. 11-13

Yaoolem wakat kãensã, a Zeova tũnugda ne a siglgã, n kõt-d bũmb toor-toor d tẽebã kengr yĩnga, tɩ sõngd tõnd tɩ d ket n kẽnd “sõmblmã sor” zugu. (Eza. 35:8; 48:17; 60:17) D tõe n yeelame tɩ ned sã n sak n sɩng Biiblã zãmsgo, a paama segb n na n dɩk “sõmblmã sore.” Neb kẽer rɩkda sorã, n pa zãag zĩiga, n base. La sãnda yãka yam n na n kell n tũ sorã n tãag a baasgo. A baasgã yaa yɛ? Sã n yaa ne sẽn saagd-b n na n tɩ vɩɩmd saasẽ wã, b “sõmblmã sorã” tekda “Wẽnnaam arzãnã” pʋgẽ saasẽ. (Vẽn. 2:7) Sã n yaa ne sẽn saagd-b n na n wa vɩɩmd tẽngã zugã, b so-kõodrã tɛkã yaa b sẽn na n wa zems zãng yʋʋm tusrã saabẽ. Y sã n kẽnda so-kãng zug rũndã-rũndã, bɩ y ra wẽnemd n ges poorẽ ye. Sẽn paase, ra lak-y n bas-y sorã tɩ y pa ta dũni-paalgã pʋgẽ ye. w23.05 17 s. 15; 19 s. 16-18

Y sã n tags bũmb nins fãa a Zeova sẽn maan n kõ-yã yelle, y na n dat n dɩka y meng n kõ-a. (Yɩɩn. 116:12-14) Sɩd me Biiblã yetame tɩ “kũun sẽn yaa sõma buud fãa, la kũun sẽn zems zãng buud fãa” yita a Zeova nengẽ. (Zak 1:17) Kũun nins a sẽn kõ-dã sʋka, sẽn yaa-a kãseng n yɩɩd yaa a sẽn kɩt t’a Zeezi sẽn yaa a Biigã wa ki tɩ yɩ maoongã. Tags-y n ges-y kũun-kãng yõodã sẽn ta zĩig ningã. A Zeezi sẽn ki tɩ yɩ maoongã kɩtame tɩ y tõe n paam zood sõma ne a Zeova. Leb n kɩtame tɩ y tõe n wa paam vɩɩm sẽn kõn sa. (1 Zã 4:9, 10) Bũmb y sẽn tõe n maan n wilg tɩ y sũur nooma ne a Zeova kũun ning sẽn yaa sõma n yɩɩdã, n paas bõn-sõma a taabã a sẽn kõ-yã, yaa y sẽn na n dɩk y meng n kõ-a.—Tõo. 16:17; 2 Kor. 5:15. w24.03 5 s. a 8

Tõnd sã n get dũniyã nebã sẽn tʋmd tʋʋm-dẽgd nins rũndã-rũndã wã, kɩtdame tɩ d me sũur sãamd wa a Lote. A Lot sẽn da mi t’a saasẽ Ba wã kisa tʋʋm-wẽnsã, a ra ‘sãamda a sũur wʋsg yel-wẽn-maandbã nin-yoolem tʋʋmã yĩnga.’ (2 Pɩy. 2:7, 8) A Lot sẽn da zoet Wẽnnaam la a nong-a wã yĩnga, a pa naag a wakatẽ nebã n tʋm tʋʋm-yoodã ye. Rũndã-rũndã, tõnd me vɩɩ ne neb sẽn pa sakd a Zeova tagsg sẽn yaa a soab ne yoobã ye. Baa ne rẽ, d sã n nong Wẽnnaam la d zoet-a wa sẽn segdã, d tõe n kell n yɩɩ yɩlma. Rẽ wɛɛngẽ, a Zeova kõ-d-la sagls sẽn be Yel-bũn sebrã pʋgẽ n kengd raoodo. Sagls nins sẽn be be wã sɩd tõe n nafa kiris-nebã fãa, b rap la b pagba, b kom-bɩɩs la b nin-kẽemba. D sã n zoet a Zeova, d pa na n bao padems n tũ neb sẽn maand bõn-wẽns ye. w23.06 20 s. a 1-2; 21 s. a 5

Tõe tɩ y zakã rãmb namsa yãmb y tũudmã yĩnga, wall tõe tɩ y zoe n monga y mens bũmb kẽer sẽn na yɩl n deng n bao Wẽnnaam Rĩungã. (Mat. 6:33) Sã n yaa woto, y tõe n basa y yam t’a Zeova nee bũmb nins fãa y sẽn maan a yĩngã. (Ebre. 6:10) Tõe tɩ y zoe n yãame t’a Zeezi sẽn yeel bũmb ningã yaa sɩda. A yeelame: “Ned sã n bas roog wall ba-bi-rap bɩ ba-bi-pogse, pa rẽ bɩ ba wall ma, bɩ kamb wall pʋt mam yĩnga, la koe-noogã yĩnga, masã menga, a na n paama sẽn yɩɩd rẽ naoor koabga, (roto, ba-bi-rapa, ba-bi-pogse, ma-rãmba, kamba, la pʋto, ne namsgo,) la dũni ning sẽn watã pʋgẽ, a na n paama vɩɩm sẽn ka sɛta.” (Mark 10:29, 30) Sɩd-sɩda, bark nins y sẽn paamã yɩɩda bũmb nins y sẽn mong y mengã hal zĩig sẽn zãre.—Yɩɩn. 37:4. w24.03 9 s. a 5

Kom n wa n zĩnd Zide, pipi kiris-nebã wakatẽ wã. Ãntiyoos tigingã neb sẽn wʋm komã kibarã, b “yãka yam tɩ ned kam fãa na n kõ a sẽn tõe n paame, tɩ b tool saam-biisã sẽn be Zide wã sõngre.” (Tʋʋ. 11:27-30) Baa saam-biis nins komã sẽn namsdã sẽn da be zĩ-zãrgẽ wã, Ãntiyoos kiris-nebã yãka yam n na n sõng-ba. (1 Zã 3:17, 18) Tõnd me sã n wa wʋm tɩ sabab-wẽng n paam d saam-biisi, d tõe n wilgame tɩ d yaa nimbãan-zoɛtba. D tõe n yɩɩ tao-tao n sõnge. Tõe tɩ d na n soka kãsem-dãmbã n bãng d sẽn tõe n maan n sõnge. D tõe n kõo d nug bũmb n teel tʋʋmdã sẽn tʋmd dũniyã gill zugã, wall d pʋʋsd neb nins sabab-wẽngã sẽn paamã yĩnga. D tẽed-n-taasã tõe n data sõngr sẽn na yɩl n paam bũmb nins sẽn yaa tɩlɛ wã. D ratame tɩ d Rĩm a Zeezi Kirist sã n wa na n kao nebã bʋʋdo, bɩ a yã tɩ d yaa nimbãan-zoɛtba, n kɩt tɩ d “soog Rĩungã.”—Mat. 25:34-40. w23.07 4 s. a 9-10; 6 s. 12

A Zeezi rɩka a Zeova togs-n-taare, n yaa wʋmda. B tʋm-a-la tẽngã zug t’a wa moon Israyɛll buudã neb sẽn wõnd piis sẽn menemã koɛɛgã. La a sẽn wa n moond koɛɛgã a wilgame t’a yaa wʋmda. Daar a ye, pag sẽn pa Israyɛll ned n wa n yõk a sɛɛg t’a sãoog a bi-pugl ‘zĩn sẽn da tar n nams wʋsgo.’ A Zeezi zoee pagã nimbãanega, n sãoog a bi-puglã wa a sẽn kosã. (Mat. 15:21-28) D gom kibar a to yelle. Sẽn deng rẽ, a Zeezi sẽn wa n zãmsd nebã, a yeelame yaa: “Ned sã n yeel . . . t’a pa mi maam, ma-me na n yeelame . . . tɩ m pa mi-a ye.” (Mat. 10:33) La a Pɩyɛɛr sẽn kɩɩs hal naoor a tãab t’a pa mi a Zeezi wã, a Zeezi raag-a lame n bas bɩ? Ayo. A Zeezi ra miime t’a Pɩyɛɛr teka yam n kos sugri, la t’a ra yaa ned sẽn maand sɩda. A Zeezi vʋʋgrã poore, a vẽnega a meng ne a Pɩyɛɛre. Sãmbg kae t’a wilg-a lame t’a kõ-a-la sugri, la t’a nong-a lame ye. (Luk 24:33, 34) Wẽnnaam a Zeova ne a Zeezi Kirist fãa yaa wʋmdba. La tõnd yẽ? A Zeova pa rat tɩ d yɩ dem-dem ye. w23.07 21 s. a 6-7

D sã n wa seg ned sẽn maand sãmbs rẽ wɛɛngẽ, bõe la d tõe n yeel-a? Pipi, d tõe n wilg-a lame tɩ yaa a Zeova mengã n pʋlme. Vẽnegr sebrã yetame: “Sẽn zao-a geerã yeelame: ‘Ade! Mam maanda bũmbã fãa paalse.’” A tara yam la pãng n tõe n maan dẽ, la a rat me n maand dẽ. Yiibu, a Zeova pʋlengã pidsg yaa waaziba, hal t’a nifẽ yaa wa zoe n pidsame. Rẽ n so t’a yeel yaa: “Gom-kãensã yaa sɩda. . . . Gom-kãensã pidsame!” Tãabo, a Zeova sã n sɩng bũmbu, a tõogd n maan-a lame n baase. Rẽ n so t’a yeel yaa: “Mam yaa Alfa la Omega.” (Vẽn. 21:6) A Zeova na n wilgame t’a Sʋɩtãan yaa pʋ-yagda, la t’a pa tõe t’a pa pids a raab ye. Woto wã ned sã n wa sok yaa: “Bõn-kãensã tõe n pidsame waare?” Y tõe n karma Vẽnegr 21 vɛrse a 5 ne a 6 la y wilg-a b võore. Wilg-y bũmb ning a Zeova sẽn maan tɩ yaa wa a sẽn tik a nug tɩ kɩt tɩ d tõe n bas d yam t’a pʋlemsã na n pidsame wã.—Eza. 65:16. w23.11 7 s. 18-19

A Zeova pʋlma a Abrahaam woto a sẽn wa n tar yʋʋm pis-yopoe la a nu n ket n nan pa tar biigã. A Abrahaam yãa pʋlen-kãngã pidsg bɩ? A pa yã a pidsg zãng ye. A Abrahaam sẽn dʋʋg Efrat kʋɩlgã yʋʋm 25 poore, a yãa a Zeova sẽn maan yel-solemd t’a rog a Izaake. Yʋʋm pis-yoob rẽ poore, a yãa a Izaak kamb a Ezayu ne a Zakoob rogem. (Ebre. 6:15) La a Abrahaam pa tol n yã a yagensã sẽn lebg bu-kãsenga, n so kãabg tẽngã ye. Baa ne rẽ, a Abrahaam sẽn da maand sɩdã kell n talla zood sõma ne a Naandã. (Zak 2:23) A Abrahaam sã n wa vʋʋge, n bãng t’a tẽebã la a sũ-marã kɩtame tɩ buud toɛy-toɛyã fãa neb paam bark wʋsgo, a sũur sɩd na n yɩɩ noogo. (Sɩng. 22:18) Bõe la woto zãmsd tõndo? Tõnd me tõeeme n pa yã a Zeova pʋlemsã fãa pidsg rũndã-rũndã ye. La d sã n yaa sũ-mar soab wa a Abrahaam, d tõe n kɩsa sɩd t’a Zeova na n keo-d-la masã menga, la sẽn yɩɩd fãa, dũni-paalgã a sẽn pʋlmã pʋgẽ.—Mark 10:29, 30. w23.08 24 s. 14

Rĩm a Ozɩyas sẽn wa n yaa bi-bɩɩgã, a ra yaa sik-m-meng soaba. A zãmsa “Wẽnnaam zoeese.” A vɩɩmdame n kaoos yʋʋm 68. La a vɩɩmã fãa la bala, a Zeova ning-a-la barka. (2 Kib 26:1-4) A Ozɩyas zaba ne Israyɛll bɛɛb wʋsg n tõoge, la a maan bũmb toor-toor n kogl Zerizalɛm. (2 Kib 26:6-15) Yaa vẽeneg t’a Ozɩyas sũur da nooma ne bũmb nins fãa Wẽnnaam sẽn sõng-a t’a maanã. (Koɛ. 3:12, 13) Rĩm a Ozɩyas ra minimame tɩ yaa yẽ sẽn yet la nebã maanda. Rẽ kɩtame t’a ra tagsdẽ t’a tõe n maana a sẽn dat fãa bɩ? Daar a ye, a Ozɩyas yãka yam n kẽ a Zeova roogẽ wã, n wuk a meng n na n yõog wisd tẽn-kugrã zugu. Rẽ yaool n yaa bũmb rĩm-dãmbã sẽn da pa tar sor n na n maane. (2 Kib 26:16-18) Maan-kʋʋdb kãsem a Azariya makame n na n gɩdg a Ozɩyase, la a sũurã yika wʋsgo. Bʋko, a Ozɩyas pa kell n maan sɩd ne a Zeova, t’a Zeova lob-a wãoodo. (2 Kib 26:19-21) A Ozɩyas sã n da kell n yɩ sik-m-meng soaba, a vɩɩmã ra na n baasa neere! w23.09 10 s. a 9-10

Baa ne tẽn-tʋmd a Pɩyɛɛr sẽn paam vʋʋsem sõng zaeebã, a ra segd n kell n maoo ne a pãn-komsmã. Yʋʋmd 36, a Korney sẽn yaa ned sẽn da pa kẽ bãongã sẽn na n paam vʋʋsem sõngã zaeebã, a Pɩyɛɛr zĩnda be. Rẽ kõo kaset vẽeneg tɩ “Wẽnnaam pa bakd neda,” la tɩ bu-zẽmsã neb tõe n naaga kiris-nebã. (Tʋʋ. 10:34, 44, 45) Rẽ poore, a Pɩyɛɛr basa a yam n naagd bu-zẽmsã neb n dɩtẽ. Sã n da yaa pĩndã, a ra pa na n tol n maan a buud ye. La Zʋɩf-rãmb kẽer sẽn lebg kiris-neb ra tagsdame tɩ Zʋɩf-rãmbã pa segd n naag bu-zẽmsã neb n dɩ ye. Neb nins sẽn tagsd woto wã kẽer sẽn wa n wa Ãntiyoose, a Pɩyɛɛr basame n pa le naagd saam-biis nins sẽn yaa bu-zẽmsã n dɩtẽ ye. Tõe t’a ra yɛɛsda a na wa n sãam kiris-neb nins sẽn yaa Zʋɩf-rãmbã sũuri. Tẽn-tʋmd a Poll yãa a Pɩyɛɛr sẽn maan bũmb ningã, n gom-a nebã fãa taoore. (Gal. 2:13, 14) Baa a Pɩyɛɛr sẽn le kongã, a pa koms raood n bas ye. w23.09 22 s. a 8

Y sã n fees y meng ne pʋ-peelem, tõe tɩ y na n yãame tɩ bũmb kẽer la y segd n demse, la ra koms-y raood ye. “Zu-soabã yaa sõmblem soaba,” n na n sõng-y tɩ y tõog n demse. (1 Pɩy. 2:3) Tẽn-tʋmd a Pɩyɛɛr yet-d lame yaa: “Wẽnnaam . . . na n baasa yãmb zãmsgã. A na n kɩtame tɩ y yals kãn-kãe.” Wakat n zĩnd t’a Pɩyɛɛr da getẽ t’a pa zems tɩ zĩnd ne Wẽnnaam Biigã ye. (Luk 5:8) La ne a Zeova la a Zeezi sõngre, a Pɩyɛɛr tõog n tũu Kiristã ne a sũur fãa. Rẽ n so t’a Pɩyɛɛr paam tɩ b kõ-a sor t’a “kẽ tõnd Zu-soab la d Fãagd a Zeezi Kirist Rĩungã sẽn ka sɛtã pʋgẽ.” (2 Pɩy. 1:11) Ad sɩd yaa keoor tɛkẽ! Yãmb me sã n tõog toog wa a Pɩyɛɛre, n bas t’a Zeova zãms-y-yã, y na n wa paama vɩɩm sẽn kõn sa tɩ yɩ y keoore. “Y tẽebã na n waa ne yãmb fãagre.”—1 Pɩy. 1:9. w23.09 31 s. 16-17

Pĩnd wẽndẽ sɛk-roogã ra gũbgame n tar saman-yɛnga. Yaa zĩ-yaleng tɩ maan-kʋʋdbã ra tʋmd b tʋʋmã be. Zũud tẽn-kug-bedrã b sẽn da maand maand sẽn yõogd bugum a zugã ra bee samandẽ wã, n paas zũud la-pok koom sẽn be a pʋgẽ tɩ maan-kʋʋdbã tar n yɩlgd b mense, nand tɩ b tʋm b tʋʋmã. (Yik. 30:17-20; 40:6-8) Rũndã-rũndã, Kirist karen-biis nins sẽn paam vʋʋsem sõng zaeeb n ket tẽngã zugã bee wẽnd-doog ning sẽn pa ninsaalb nus n me wã saman-bilã pʋgẽ, n tũud Wẽnnaam ne b sũur fãa. La-pokã ne koomã tẽegd-b lame tɩ b segd n yɩɩ yɩlem vɩɩm manesmã pʋgẽ la tũudmã wɛɛngẽ, wa sẽn segd n yɩ to-to ne kiris-neb a taabã fãa wã. La yɛ la “kʋʋn-kãsengã” be n waoogd a Zeova? Tẽn-tʋmd a Zã yã-b lame tɩ b “yas geerã taoore.” Tẽngã zugu, b sẽn be zĩig ningã makda saman-bedrã. B bee be “n tũud [Wẽnnaam] ne b sũy fãa wĩndg la yʋng a roogã pʋgẽ.” (Vẽn. 7:9, 13-15) D sẽn paam n tõe n tũ a Zeova wẽnd-doog ning sẽn pa ninsaalb nus n me wã pʋgẽ wã noom-d-la wʋsgo. w23.10 28 s. 15-16

A Zeova tũnugda ne kãsem-dãmbã me n kengd d raoodo. (Eza. 32:1, 2) Woto wã, y sã n wa maand yɩɩr bɩ y gom ne kãsem-dãmbã. B sã n wa rat n sõng-y bɩ y sak ne yamleoogo. A Zeova tõe n tũnuga ne-b n keng y tẽebã. Biiblã pʋlmame me tɩ tõnd sʋkã kẽer na n wa vɩɩmda wakat sẽn kõn sa tẽngã sẽn na n lebg arzãnã zugu, tɩ sãnda tɩ vɩɩmd saasẽ. Pʋlen-kãng tõe n kõ-d-la pãng la raood tɩ d kell n tũ a Zeova. (Rom. 4:3, 18, 19) D sẽn tẽed manegrã kõt-d-la raood tɩ d tõogd toog zu-loees sasa, n moond koe-noogã la d tʋmd tʋʋm toor-toor tigingã pʋgẽ. (1 Tes. 1:3) Yaa tẽn-tʋmd a Poll sẽn da tẽed manegrã n kɩt t’a paam raoodo. B ra ‘rɩdgd-a lame,’ a ra ‘pa mi a sẽn maandga,’ b ra ‘namsd-a lame,’ la b ra ‘lubd-a tẽnga.’ A vɩɩmã ra bee yell pʋgẽ menga. (2 Kor. 4:8-10) A Poll sẽn da tagsd manegrã sẽn watã yellã kõ-a-la raoodo. (2 Kor. 4:16-18) A ra tagsda sẽn wat beoogã yell n yɩɩda. A ra bʋgsda a sẽn na n wa paam bũmb ningã zugu, tɩ kɩt t’a paamd raood “beoog sẽn vẽeg fãa.” w23.10 15-16 s. 14-17

Y sã n wa pʋʋs n kos bũmbu, bɩ y sok y meng n ges sã n yaa wakat a Zeova sẽn get tɩ zemsame t’a leok y pʋʋsgã. D tõe n wa ratame t’a leok d pʋʋsgã zĩig pʋgẽ. La a Zeova mii wakat ning sẽn zems t’a sõng-dã. (Ebre. 4:16) D sã n wa pa paamd bũmb ning d sẽn kotã tao-tao, d tõe n wa tagsdame t’a Zeova pa reeg d kosgã ye. La tõe t’a sẽn pa leokã, yaa sẽn na n wilg tɩ wakatã nan pa ta ye. Wala makre, saam-biig sẽn yaa bi-bɩɩg n da pʋʋsd n kot laafɩ, la a bãagã ket n pa são ye. A Zeova sã n da maan yel-solemd n sãoog-a, a Sʋɩtãan tõe n yeelame tɩ saam-biigã sẽn ket n tũud a Zeova wã, yaa a sẽn kɩt t’a paam laafɩ wã yĩng bala. (Zoob 1:9-11; 2:4) Sẽn paase, a Zeova zoe n yãka wakat n na n kɩt tɩ bãag buudã fãa sa. (Eza. 33:24; Vẽn. 21:3, 4) Sã n pa wakat kãng n ta, a pa na n maan yel-solemd n sãoog d bãasã ye. Rẽnd saam-biigã ra tõe n kosa a Zeova t’a kõ-a pãng la sũur pʋgẽ bãan t’a tõog toogo, n kell n maan sɩd ne-a. w23.11 24 s. 13

A Sãmsõ tudga wʋsgo, la a pa bas a Zeova tũub ye. A ra ket n baooda segb n na n zab ne Filisti nebã wa a Zeova sẽn da ratã. (Bʋ. 16:28-30) A Sãmsõ yõka a Zeova sɛɛg n yeele: “Bas-y tɩ m dok m sũur ne Filisti nebã.” Wẽnnaam leoka a Sãmsõ kosgã, n le kõ-a a pãn-kãsengã. Rẽ kɩtame t’a Sãmsõ tõog n kʋ Filisti neb n yɩɩg pĩndã. Baa a Sãmsõ kongrã sẽn kɩt t’a paam zu-loe-kɛgemsã, a pa bas a Zeova raabã maaneg ye. Baa d sã n wa tudg tɩ yaa tɩlɛ tɩ b kibl-du, wall kɩt tɩ d bõn tʋʋmd d sẽn da tar siglgã pʋgẽ, d pa segd n bas a Zeova raabã maaneg ye. D tẽeg t’a Zeova kõta sugri. (Yɩɩn. 103:8, 9) Baa ne d sẽn kongã, a Zeova ket n tõe n kõ-d-la pãng tɩ d maan a raabã, wa sẽn yɩ to-to ne a Sãmsõ wã. w23.09 6 s. 15-16

Y sẽn tõogd toogã kɩtdame tɩ y tat a Zeova yam. La woto pa rat n yeel tɩ y sã n segd zu-loeese, a Zeova sũur noomame ye. Bũmb ning sẽn noom a Zeova wã yaa y sẽn tõogd toog n ket n maand sɩdã. D sẽn mi tɩ d sã n tõogd toogo nooma a Zeova wã kengda d raoodo. (Yɩɩn. 5:12) Tẽeg-y t’a Abrahaam tõoga toog zu-loees taoore, tɩ kɩt t’a ta a Zeova yam. A Zeova bool-a lame t’a zoa, la a yeel t’a yaa nin-tɩrga. (Sɩng. 15:6; Rom. 4:13, 22) Tõe n yɩɩ woto ne tõnd me. Pa tõnd sẽn tʋmd wʋsgo, wall tʋʋm nins d sẽn tar Wẽnnaam siglgã pʋgẽ wã n kɩt tɩ d tat a yam ye. Yaa d sẽn tõogd toog n ket n maand sɩd ne-a wã n noom-a. D fãa tõe n tõoga toogo, baa d yʋʋmã, d yɛlã, wall d minimã sẽn yaa a soaba. Yãmb maooda ne zu-loɛɛg masã meng bɩ? Sã n yaa woto, bɩ y tẽeg tɩ y noogda a Zeova sũuri. D sã n miẽ tɩ d tata Wẽnnaam yam, kɩtdame tɩ d maneg n kɩs sɩd tɩ d na n wa paama keoor ning a sẽn pʋlmã. w23.12 11 s. 13-14

Saam-biig fãa segd n zãmsa goam la kelgre. Woto rat n yeelame t’a segd n maagda a yĩng n kelgdẽ, n baood n bãngd neb a taabã sẽn tagsd to-to wã, la b sẽn tagsd woto wã võore. (Yel. 20:5) A tõe n gesa ned neng yalẽ la a manesem, wall a kelg a koe-zomã n bãng a tagsgo, wall a sũur sã n noomame bɩ pa noome. Sẽn na yɩl n tõog n maan dẽ, yaa tɩlɛ tɩ f mi n be ne nebã. F sã n tũnugd ne ordinatɛɛr wall portaabl n toond nebã mesaaz-rãmb wakat fãa, wat n lebga toog ne-f tɩ f yals ned taoor n sõs ne-a. Woto wã, bɩ f baood weer n sõsd ne nebã. (2 Zã 12) Sẽn paase, saam-biig tẽeb sẽn bɩ segd n tõe n gesa a meng la a zakã rãmb yelle. (1 Tɩm. 5:8) Sẽn wa n yaa a soab fãa, yɩta sõma tɩ f zãms bũmb sẽn na n sõng-f tɩ f wa paam tʋʋmde. (Tʋʋ. 18:2, 3; 20:34; Efɛɛ. 4:28) Modg n yɩ ned sẽn tʋmd ne a sũur fãa, la sẽn pa tʋmd tʋʋmd n bas bɛka, tɩ neb a taabã pẽgd-f rẽ yĩnga. F sã n maand woto, tõe n sõng-f lame tɩ f wa paam tʋʋmde. w23.12 27 s. 12-13

Biiblã pʋgẽ b sã n wa gomd “a Zeova daarã” yelle, yaa wakat ning a sẽn na n sãam a bɛɛbã, la a fãag a nin-buiidã yell la b gomda. Pĩnd wẽndẽ wã, wakat n zĩnd t’a Zeova sãam buud kẽere. (Eza. 13:1, 6; Eze. 13:5; Sof. 1:8) Tõnd wakatã, “a Zeova daarã” na n sɩnga ne Babilon-kãsengã sãoongo, n tɩ baas ne Armagedõ zabrã. D sã n dat n põs ‘ra-kãng’ sasa, yaa tɩlɛ tɩ d segl d mens masã tɛka. A Zeezi pa yeel tɩ d segl d mens bal “to-kãsengã” yĩng ye. A yeelame tɩ d ‘segl d mens n gũ.’ (Mat. 24:21; Luk 12:40) Pipi lɛtr ning tẽn-tʋmd a Poll sẽn gʋls n tool Tesalonik kiris-nebã pʋgẽ, a rɩka makr toor-toor n na n sõng-b tɩ b segl b meng n gũ a Zeova bʋ-kaoorã daar sẽn yaa ra-kãsengã. A Poll ra miime t’a Zeova daarã pa na n wa bãmb wakatẽ wã ye. (2 Tes. 2:1-3) Baa ne rẽ, a sagla a tẽed-n-taasã tɩ b segl b mens ra-kãng yĩng wa a wata beoogo. Tõnd me segd n tũu a saglgã. w23.06 8 s. a 1-2

Yʋʋmd 1970 wã poore, b mee ro-wok sẽn tar etaas pis-yoob Tokiyo, Zapõ soolmẽ wã. Sẽn mik tɩ tẽn-digimdg wae n maanda beenẽ wã, nebã ra sokda b mens roogã sẽn na n maan to-to n kell n yalse, n da lʋɩ ye. Bõe la metbã maan sẽn na yɩl tɩ tẽn-digimdg ra tõog n lub roogã? B mee roogã t’a tar pãnga, la b maan tɩ tẽn-digimdg sasa bɩ a tõe n miime, n yaool n da lʋɩ ye. Kiris-nebã yaa wa ro-kãnga. Wãn to? Kiris-ned segd n yalsa kãn-kãe, la a ra yɩ dem-dem me ye. A segd n yalsa kãn-kãe n da vigs a Zeova noyã sakr wɛɛngẽ ye. A segd n yɩɩ ned “sẽn sakd nana,” n yaool n pa sakd n kɩɩs Wẽnnaam noyã ye. La yell ning taoore, sã n tõe wall sã n yaa tɩlɛ, a pa tog n yɩ dem-dem ye. (Zak 3:17) Kiris-ned sã n tar tagsg a woto, a pa na n yɩ dem-dem tɩ looge, a pa na n sakd bũmb fãa me ye. w23.07 14 s. a 1-2

A Zeezi ra segd n kɩɩsa a Sʋɩtãan sẽn da makd-a t’a maan yel-wẽndã, hal n yeel-a t’a maan bũmb sẽn na n wilg t’a pa le be Wẽnnaam poorẽ ye. (Mat. 4:1-11) A Sʋɩtãan ra rata ne a sũur fãa n kɩt t’a Zeezi maan yel-wẽnde, n pa tõog n kõ a vɩɩmã tɩ yɩ maoong ye. A Zeezi sẽn wa n moond koɛɛgã tẽngã zugã, a sega zu-loees a taaba. B nams-a lame hal n mak n na n kʋ-a. (Luk 4:28, 29; 13:31) A ra segd n modgame t’a karen-biisã pãn-komsmã ra koms a raood ye. (Mark 9:33, 34) B sẽn wa n kaood a Zeezi bʋʋdã, b pãb-a lame la b yaal-a. Rẽ poore, b kʋ-a-la wa b sẽn kʋʋd nin-wẽng to-to hal t’a nams wʋsgo. (Ebre. 12:1-3) A sẽn wa n be namsg ra-lukã zugã, a ra segd n tõoga toogã a yembr tɩ pa tũ ne a Zeova sõngr ye. (Mat. 27:46) Sɩd-sɩdã, a Zeezi namsa wʋsg n yaool n kõ a vɩɩmã tɩ yɩ maoongo. D sã n tags a sẽn sak n nams woto fãa tõnd yĩngã, pa kɩt tɩ d maneg n nong-a wʋsg sɩda? w24.01 10-11 s. a 7-9

Sẽn na yɩl tɩ zems-n-taar zĩnd d sʋka, yaa tɩlɛ tɩ d tall sũ-mare. Sũ-marã sõngd-d lame tɩ d maagd d yĩng n kelgd d taabã, b sã n wa gomda. (Zak 1:19) Sũ-marã sõngdame me tɩ laafɩ be d sʋka. A sõngd-d lame tɩ baa yɛlã sã n wa pa nana ne-do, bɩ d ra yɩ yãg-yãg n maan bũmb wall d togs gomd sẽn na n sãam d to sũur ye. D sã n yaa sũ-mar soaba, ned sã n wa maan-d bũmb sẽn sãamd sũuri, d pa na n yik d sũur tao-tao ye. Wall tɩ d maan n lebsã, d na n ‘maanda sũ-mar ne taaba, la d sakd n kõt taab sugri.’ (Kolo. 3:12, 13) Sũ-marã tõe n sõng-d lame me tɩ d yãkd yam sẽn yaa sõma. D sã n yaa sũ-mar soaba, d pa na n yɩt yãg-yãg n maand bũmb ye. D na n baoo sẽk n tags bũmb nins d sẽn tõe n maanã zugu, n bãng n yãk yam ning sẽn yaa sõma n tɩ yɩɩdã. Wala makre, d sã n baood tʋʋmde, d tõe n yɩɩ yãg-yãg n sak tʋʋmd b sẽn kõ-do. La d sã n yaa sũ-mar soaba, d na n maaga d yĩng n tags n ges tʋʋmdã sã n pa na n kɩt tɩ tõnd ne d zakã rãmb pa le tõe n naagd taab n maand bũmb kẽere, wall n sãam tõnd ne a Zeova zoodã. Dẽnd d sã n tar sũ-mare, tõe n sõng-d lame tɩ d ra yãk yam sẽn pa sõma ye. w23.08 22 s. a 8-9

Y sẽn ket n tar tʋls-wẽnsã sã n komsda y raoodo, y sã n tagsd bũmb ning y sẽn pʋlem a Zeova n dɩk y meng n kõ-a wã yelle, na n kõ-y-la raood tɩ y kell n mao ne y tʋls-wẽnsã. Wãn to? Y sã n dɩk y meng n kõ a Zeova, y kɩɩsa y meng raabo. Woto rat n yeelame tɩ y yãka yam n na n bas tʋlsem buud fãa la magb buud fãa sẽn pa na n yɩ a Zeova noogo. (Mat. 16:24) Woto y sã n wa be makr taoor wall y sã n wa tar zu-loeese, y pa na n sokd y meng bũmb ning y sẽn na n maan ye. Rẽ tɩ y zoe n yãka y sẽn na n maanega, rat n yeel tɩ y na n kell n maana sɩd ne a Zeova. Y na n kell n yãka yam n maan sẽn noom a Zeova. Y na n yɩɩ wa a Zoobe. Baa a sẽn wa n maood ne zu-loe-kɛgemsã, a yeela vẽeneg yaa: “Mam kõn bas m burkĩndã ye!”—Zoob 27:5. w24.03 9 s. a 6-7

A Zeova sẽn yaa ‘nonglem Wẽnnaamã’ bee ne tõndo. (2 Kor. 13:11) Tõnd ned kam fãa yell pak-a lame. D kɩsa sɩd t’a ‘maan-neerã gũbga’ tõndo. (Yɩɩn. 32:10) D sã n bʋgsd a sẽn wilgd to-to t’a nonga tõndã zugu, d na n maneg n neeme tɩ d yell pak-a lame, la kɩt tɩ d kolgd-a n paasdẽ. D tõe n pʋʋs-a-la ne bas-m-yam, n togs-a tɩ d rata a nonglmã ne d sũur fãa. D tõe n togs-a-la bũmb ning fãa sẽn kɩt tɩ d maand yɩɩrã, n kɩs sɩd t’a wʋmda rẽ võore, la t’a rat n sõng-d lame. (Yɩɩn. 145:19) D rata a Zeova nonglmã wa d sẽn dat bugum n wood waood wakatã. A Zeova nonglmã tara pãng wʋsgo. Woto wã, bɩ y maan sũ-noog a Zeova sẽn nong yãmbã yĩnga. Bɩ a nonglmã kɩt tɩ d ned kam fãa yeel yaa: “Mam nonga a Zeova”!—Yɩɩn. 116:1. w24.01 31 s. 19-20

A Zeezi sẽn maanã yɩɩda yeel nebã tɩ Wẽnnaam yʋʋr la a Zeova bala. Zʋɩf-rãmb nins sẽn da kelgd a Zeezi wã ra zoe n mii Wẽnnaam yʋʋrã. La a Zeezi wilg-b-la “Wẽnnaam sẽn yaa a soaba.” (Zã 1:17, 18) Wala makre Biiblã babg ning b sẽn da gʋls ne Ebre wã wilgame t’a Zeova yaa nimbãan-zoɛt la sõmblem soaba. (Yik. 34:5-7) A Zeezi maneg n wilga rẽ võor sõma, a sẽn wa n wẽ biig sẽn sãam a ba paoong yel-bũndã. Yel-bũndã pʋgẽ a Zeezi wilgame tɩ ba wã sẽn wa n yã a biigã t’a “ket n be hal yɩɩg” n watẽ wã, a wudgame n seg-a n mok-a sõma, la a kõ-a sugr ne a sũur fãa. D sã n karem kibarã, d maneg n neeme t’a Zeova yaa nimbãan-zoɛt la sõmblem soaba. (Luk 15:11-32) A Zeezi sõnga nebã tɩ b bãng a Ba wã sẽn sɩd yaa Wẽnnaam ning buudã. w24.02 10 s. a 8-9

A Zeova sigsda neb nins sẽn namsdã sũyã, la a belsd-ba. Nimbãan-zoeerã la d taabã belsgã wɛɛngẽ, wãn to la d tõe n dɩk a Zeova togs-n-taare? Bũmb a ye sẽn tõe n sõng-d yaa d bɩɩs zʋg-sõma sẽn na n kɩt tɩ d rat n bels d taabã. Zʋg-sõma-kãens kẽer la bʋse? Bõe n tõe n sõng-d tɩ d ket n nong taab la d “ket n belsd taab” daar fãa? (1 Tes. 4:18) D segd n bɩɩsa zʋg-sõma wa nimbãan-zoeere, saam-biir nonglem la maan-neere. (Kolo. 3:12; 1 Pɩy. 3:8) Wãn to la zʋg-sõma-kãensã na n sõng tõndo? D sã n bɩɩs nimbãan-zoeer la zʋg-sõma a taab sẽn wõnd rẽ, d pa tõe n pa belsd d taabã b sã n wa tar zu-loees ye. Yaa wa a Zeezi sẽn yeelã: “Yaa sũur sẽn pid ne bũmb ningã la noor yiisda. Nin-sõng noor yiisda bõn-sõma, a sũur sẽn pid ne bõn-sõma wã yĩnga.” (Mat. 12:34, 35) D sã n belsd d tẽed-n-taas nins sẽn namsdã, sɩd wilgdame tɩ d nong-b lame. w23.11 10 s. 10-11

D sã n dat n wʋm Biiblã bãngr-goamã võore, d segd n kosa sõngre. D rɩk makre. Mams-y y sẽn na n togd sore, n dabd zĩig y sẽn pa mi, tɩ y zoa sẽn mi zĩigã sõma yãagd yãmba. A mii y sẽn taẽ, la sor fãa sẽn dabdẽ. Yaa vẽeneg tɩ y sũur na n yɩɩ noog y zoa wã sẽn sak n yãag-yã. A Zeova yaa wa zo-kãng sẽn sõngd yãmbã. A mii bũmb ning sẽn wat beoogã sõma. Rẽnd sẽn na yɩl n wʋm Biiblã bãngr-goamã võore, d segd n sika d meng n kos a Zeova sõngre. (Dãn. 2:28; 2 Pɩy. 1:19, 20) A Zeova yaa wa roagd sẽn nong a kamb sẽn dat tɩ b beoog vɩɩmã yɩ neerã. (Zer. 29:11) La a Zeova yaa toor ne ninsaalbã. A tõe n togsa sẽn wat beoogã tɩ zems kɛpɩ. A kɩtame tɩ b gʋls bãngr-goam Biiblã pʋgẽ, n na n sõng tõnd tɩ d bãng bõn-kãsems sẽn na n maane, nand tɩ b maane.—Eza. 46:10. w23.08 8 s. a 3-4