Bõn-bɩʋʋngo

Wẽnnaam kõo a Zeezi tõog sẽn na yɩl t’a welg ãdem-biisã zu-loeesã fãa. A Zeezi sẽn maan yel-soalmã, a wilgame t’a tara tõog n tõe n welg d zu-loees nins fãa d sẽn pa tõe n welg d toorã. Wala makre, a tõe n menesa bũmb ning sẽn wa ne ninsaalbã namsgã, rat n yeel tɩ yel-wẽndã d sẽn dog ne wã, la bãasã ne kũumã rẽ sẽn wa ne wã. (Mat. 9:1-6; Rom. 5:12, 18, 19) Yel-soalmã a Zeezi sẽn maanã wilgdame t’a tõe n sãooga bãas “buud fãa,” la a vʋʋg kũum menga. (Mat. 4:23; Zã 11:43, 44) Sẽn paase, a tara pãng n tõe n kɩt tɩ sob-kãseng yõke, la a tõog zĩn-dãmba. (Mark 4:37-39; Luk 8:2) D sẽn mi t’a Zeova kõo a Bi-riblã pãn-kãseng woto wã, kɩtame tɩ d tar bas-m-yam! D tõe n kɩsa sɩd zãng tɩ bark nins Wẽnnaam Rĩungã sẽn na n wa ne wã pa na n vaal ye. A Zeezi sẽn maan yel-soalem nins a sẽn wa n be tẽngã zugã sõngda tõnd tɩ d bãng t’a sẽn yaa Wẽnnaam Rĩungã sẽn be saasẽ wã Rĩmã, a na n wa maana bõn-kãsems sẽn yɩɩd rẽ. w23.04 3 s. a 5-7

Koe-moondbã sã n yaa wʋsg yãmb tigingã pʋgẽ, tɩ kɩt tɩ sẽn lʋɩt-a taoor sõsgã sasa wã pa paamd n yãkd yãmba, ra koms-y raood n bas ye. Mi-y n segl-y leoor wʋsg tigsg fãa yĩnga. Woto, y sã n pa paam n leok sõsgã sɩngrẽ, y ket n tõe n paam n leokame, nand tɩ tigsgã sa. Y sã n wa segend Gũusg Gasgã zãmsgo, bɩ y gũus n ges sull fãa sẽn tar loees ning ne sõsgã gom-zugã. Y sã n maan woto, sõsgã fãa sasa, y na n tara y sẽn tõe n leoke. Sẽn paase, y tõe n segla sul nins võor wʋmb sẽn yaa toogã, sẽn na yɩl tɩ sã n wa ta be bɩ y tõog n leoke. Bõe yĩnga? Bala neb wʋsg tõeeme n pa zẽk b nug n na n leok wakat kãng ye. Y sã n ket n pa tõe n paam n leok tigsg sasa, y maanda wãna? Y tõe n goma ne sẽn na n lʋɩ-a taoor sõsgã sasa wã, n togs-a sokr ning y sẽn dat n leokã. w23.04 21-22 s. a 9-10

A Zozɛf ra sakdame t’a Zeova wilgd-a sore, tɩ kɩt t’a ra yaa sɩd-sõngo. Na maan naoor a tãab la Wẽnnaam wilg-a bũmb toor-toor a sẽn da segd n maan a zakã rãmb yĩnga. Wakat fãa, a saka zĩig pʋgẽ, baa sã n da pa nana ne-a. (Mat. 1:20; 2:13-15, 19-21) A Zozɛf sẽn da basd t’a Zeova wilgd-a sorã, a tõog n kogla a Maari, n teel-a la a ges a yelle. Tags-y n ges-y a Zozɛf manesmã sẽn da kɩt t’a Maari nong-a la a waoogd-a to-to! Pʋg-sɩdba, y tõe n maana wa a Zozɛfe, n baood Biiblã sagls sẽn na n sõng-y tɩ y ges y zakã rãmb yelle. Y sã n tũud sagl-kãens baa sã n pa nana ne-yã, y wilgdame tɩ y nonga y pagã, la y paasd y kãadmã pãnga. Saam-bi-poak a ye sẽn be Vanuatu, n kẽ kãadem yʋʋm 20 la zak woto yeelame: “M sã n neẽ tɩ m sɩdã baooda sagls a Zeova nengẽ la a tũudẽ, kɩtdame tɩ m maneg n waoogd-a. M yam gãeeme, la m tar bas-m-yam ne a yam-yãkr fãa.” w23.05 21 s. a 5

Zʋɩf-rãmb nins sẽn da na n lebg n wa Babilonnã ra segd n yɩɩ “buud sẽn welg toor” b Wẽnnaamã yĩnga. (Tõo. 7:6) La woto pa rat n yeel tɩ pa na n yɩ tɩlɛ tɩ b bao n toeeme, sẽn na yɩl n ta a Zeova yam ye. Zʋɩf-rãmb wʋsg sẽn dog Babilon ra zoe n tara Babilon nebã tagsgã buudu, la b maand yell kẽer wa bãmba. Zʋɩf-rãmbã sẽn da be yembd Babilonnã, tɩ pipi sullã lebg n wa Israyɛll yʋʋm 69 poorã, guvɛrneer a Neemi me wa n bãngame tɩ kamb kẽer n dog Israyɛlle, n yaool n da pa wʋmd Zʋɩf-rãmbã buud-gomde, hal tɩ ling-a. (Tõo. 6:6, 7; Nee. 13:23, 24) Kom-kãens sẽn da pa wʋmd Ebre wã, b ra na n maana wãn n wa nong a Zeova la b tũud-a, sẽn mik tɩ yaa ne buud-gom-kãng la b gʋls Wẽnnaam Gomdã n tɩ yɩɩdã? (Ɛsd. 10:3, 44) Dẽnd ra yaa tɩlɛ tɩ Zʋɩf-kãens toeem bũmb wʋsg b vɩɩmã pʋgẽ. La ra na n yɩɩ nana ne-b tɩ b toeem bõn-kãensã Israyɛlle, bala yaa be la b sẽn da lebs n lugund tũudum hakɩɩkã.—Nee. 8:8, 9. w23.05 15 s. a 6-7

Bʋko, baa d sã n tar yẽesem, wall d sigl d yɛlã sõma, bũmb tõe n wa tiis-d lame tɩ d pa tõog n pids d raabã ye. Wala makre, “yel-lingdem” tõe n dɩɩ d sẽkã zãnga. (Koɛ. 9:11) D tõe n wa paama zu-loɛɛg me tɩ koms d raood wʋsgo. (Yel. 24:10) D sẽn pa zems zãngã, tõe kɩtame tɩ d wa maan bũmb sẽn pa zemse, tɩ gɩdg-d tɩ d pa tõog n pids d raabã ye. (Rom. 7:23) Yaamsã tõe n wa loog-d lame me. (Mat. 26:43) Bõe n tõe n sõng-y tɩ y ra bas tɩ yel-lingdem tiis-yã? Tẽeg-y tɩ bũmb sã n wa maan tɩ y pa tõog n pids y raabã, pa rat n yeel tɩ y pa na n tol n tõog ye. Biiblã wilgame tɩ d na n mi n paamda zu-loees buud toor-toore. La a wilgame me tɩ d tõe n modg n pidsa d raabã. Y sã n pa komsd raood n bas baa ne zu-loeesã, y wilgda a Zeova tɩ y rat n nooga a sũuri. A Zeova sã n yã tɩ y modgdame n na n maan bũmb ning y sẽn yãk yam n na n maan a yĩngã, noom-a-la wʋsgo. w23.05 30 s. 14-15

Bi-bɩɩg sã n yaa so-pakda, sõngd-a lame t’a bãng a sẽn tõe n naag neb buud toor-toor n tʋm to-to. Leb n sõngd-a lame t’a bãng ligd zãabo. (Fili. 4:11-13) Sẽn na yɩl n wa kẽes f meng zãng Wẽnnaam tʋʋmdã pʋgẽ, sɩngda ne sõngr so-pakre, tɩ sõng-f tɩ f wa lebg wakat fãa so-pakda. So-pakrã tõe n sõngame tɩ f wa tõog n kẽes f meng zãng Wẽnnaam tʋʋmdã pʋgẽ. Wala makre, n sõngd n met siglgã roto, wall n lebg Betɛllẽ tʋm-tʋmda. Saam-biisã segd n modgame n wa tõog n yɩ kãsem-dãmba, n sõngd b tẽed-n-taasã. Biiblã yeelame tɩ rao sã n modgd n na n maan woto, “yaa tʋʋm-sõng la a baooda.” (1 Tɩm. 3:1) Saam-biig segd n deng n modg n yɩɩ kãsem-sõngda. Kãsem-sõngdbã tʋmda tʋʋm buud toor-toor n sõngd kãsem-dãmbã. Kãsem-dãmbã ne kãsem-sõngdbã sõngda b tẽed-n-taasã ne sik-m-menga, la b naagd-b n moond koɛɛgã ne yẽesem. w23.12 28 s. 14-16

A Zoziyas sẽn wa n sɩng a Zeova baoobã t’a yaa bi-bɩɩga. A ra baood n bãnga a Zeova la a maan a raabã. La yɛlã ra pa nana ne-a ye. Wakat kãng tɩ neb wʋsg ra tũuda wẽn-faado. Dẽnd a Zoziyas ra segd n talla raood n teel tũudum hakɩɩkã. A sɩd talla raood me. Nand t’a Zoziyas ta yʋʋm pisi, a sɩnga ziri tũudmã menesg Israyɛll soolmẽ wã. (2 Kib 34:1, 2) Baa y sã n ket n yaa bilfu, y tõe n yãka yam n dɩk a Zoziyas togs-n-taare, n bao a Zeova, la y bao n bãng a sẽn yaa Wẽnnaam ning buudã. Y sã n maan woto, na n kɩtame tɩ y rat n dɩk y meng n kõ-a. Y sã n dɩk y meng n kõ a Zeova, wãn to la y segd n vɩɩmde? A Luk sẽn deeg lisg t’a tar yʋʋm 14 yeelame: “Masã tɛka, yaa a Zeova raabã maanego, la modg t’a sũur yɩ noogã n pak maam n yɩɩda.” (Mark 12:30) Sã n yaa woto la yãmb me rata, y na n paama bark wʋsgo. w23.09 11 s. 12-13

Tẽn-tʋmd a Poll sẽn wa n gʋlsd lɛt-kãngã wã tɩ Tesalonik tigingã luglgã nan pa ta yʋʋmd ye. D tõe n yeelame tɩ rap nins b sẽn da yãk tɩ b lʋɩt taoorã ra pa tar minim wʋsgo, la tɩ b ra tudgdame. La baa ne rẽ, b ra toga ne waoogre. To-kãsengã sẽn kolgdã, d segd n kelgda kãsem-dãmbã sagls n yɩɩd pĩndã. D tõeeme n wa pa le tõe n paam sagls sẽn yit Siglgã taoor lʋɩtb Sull wall filyallã taoor lʋɩtbã nengẽ ye. Dẽnd tara yõod wʋsg tɩ d wilg d kãsem-dãmbã masã meng tɩ d nong-b lame la d waoogd-ba. Sẽn wa n yaa a soab fãa, bɩ d modg tɩ d yamã ket n vẽenẽ, n da get kãsem-dãmbã pãn-komsmã ye. D segd n tẽegdame t’a Zeova tũnugda ne Kiristã n wilgd nin-kãensã sẽn maand sɩdã sore. D sẽn saagd tɩ manegr n watã kogenda d tagsa wã wa kut pugl sẽn kogend sodaag zug to-to wã. D sã n tẽed tɩ manegr n wate, d sakd n deegame tɩ bũmb ning fãa d sẽn tõe n paam dũni-kãngã pʋgẽ wã yõod pa waoog ye. (Fili. 3:8) D sẽn saagd tɩ manegr n watã sõng-d lame tɩ d maagd d yĩng n tagsd sõma. w23.06 11-12 s. 11-12

Neb nins sẽn wʋmd ‘pʋg-yalmã’ boollã segd n yãka b sã n na n sakame bɩ n zãgse. Bũmb nins sẽn kɩt tɩ d segd n zãag d mens ne yoobã waoogame. B wilgame tɩ ‘pʋg-yalmã’ yetame yaa: “Wagdem koom yaa noogo.” (Yel. 9:17) Wagdem koomã yaa bõe? Biiblã pʋgẽ, b rɩka pag ne rao sẽn kẽ kãadem sẽn tõe n kẽ ne taab n paam sũ-noog ningã n mak ne ko-maasga. (Yel. 5:15-18) Pag ne rao sẽn kẽ kãadem tɩ zems laloa wã tara sor n tõe n kẽ ne taaba, n paam sũ-noogo. La yaa toor fasɩ ne “wagdem koom.” Tõe tɩ yaa yoob yell la b sẽn gomdã. Naoor wʋsgo b soosd n maanda rẽ, wa wagdr sẽn soosd n zuudã. “Wagdem koom” tõe n wõnda a yaa noog wʋsgo, sẽn yɩɩd fãa, neb nins sẽn maand woto wã sã n tagsd tɩ b pa na n bãnge. B belgda b mense, bala a Zeova nee bũmb fãa. Bũmb kae n sãamd sũur n yɩɩd d sẽn na n kong a lohormã ye. Dẽnd bũmb kae n yaa “noog” yel-kãngã pʋgẽ ye.—1 Kor. 6:9, 10. w23.06 22 s. a 7-9

Y sã n wa getẽ tɩ y pa le pʋʋsd a Zeova ne y sũur fãa, wall tɩ koɛɛgã mooneg pa le kõt-y sũ-noog wa pĩndã, bõe la y tõe n maane? Ra tags-y t’a Zeova pa le kõt yãmb a vʋʋsem sõngã ye. Y yaa neb sẽn pa zems zãnga, tɩ y sẽn get yɛlã to-to wã tõe n toeemdẽ. Y yẽesmã sã n wa sɩng boogre, bɩ y tags tẽn-tʋmd a Poll yelle. Baa a sẽn da modgd n dɩkd a Zeezi togs-n-taarã, a ra miime tɩ pa wakat fãa la a na n tʋll n maan bũmb nins a sẽn segd n maanã ye. A Poll ra yãka yam n na n moond koɛɛgã, baa a sã n wa pa tʋll n maan dẽ. Woto me, ra tikd-y y sẽn get yɛlã to-to wã n yãkd yam ye. Yãk-y yam ne y sũur fãa n na n kell n maan sẽn yaa tɩrga, baa y yamã sã n wa pa be rẽ maanego. Y sã n modgd n maand sẽn yaa tɩrga, y sẽn get yɛlã to-to wã tõe n wa toeemame.—1 Kor. 9:16. w24.03 11-12 s. 12-13

Tõnd me tõe n yõga zood ne d tẽed-n-taasã la d nong n be ne-ba, n wilg tɩ d nong-b lame. Woto, bãmb me na n wilgame tɩ b nong-d lame. (2 Kor. 6:11-13) Tõnd sʋkã neb wʋsg bee tiging a ye ne d tẽed-n-taas yɛl la b zʋg sẽn yaa toor-toore. D sã n get b zʋg-sõma wã n yɩɩda, d na n maneg n nonga b fãa. D sã n get d taabã wa a Zeova sẽn get-b to-to wã, d wilgdame tɩ d nong-b lame. To-kãsengã sasa, na n yɩɩ tɩlɛ tɩ d nong d tẽed-n-taasã. To-kãsengã sã n sɩnge, yɛ la d na n paam koglgo? Tẽeg-y-yã a Zeova sẽn yeel a nin-buiidã tɩ b maan bũmb ninga, b sẽn wa n na n zab ne pĩnd wẽndẽ Babilonnã. A yeel-b lame yaa: “Mam neba, kẽng-y-yã! Kẽ-y y ro-pʋsẽ wã, n pag kʋɩlensã. Solg-y wakat bilfu, hal tɩ sũ-puugrã looge.” (Eza. 26:20) Tõe tɩ tõnd me na n tũu no-kãensã to-kãsengã sasa. w23.07 6-7 s. 14-16

Wilg-y ne y manesmã tɩ y yaa wʋmda. Y tõe n soka y meng yaa: ‘Nebã getame tɩ m yaa wʋmd la ned sẽn basd taal bɩ, bɩ b getame tɩ m yaa ned sẽn yaa dem-deme, nin-toaaga, wall ned sẽn pa sakd n toeem a tagsgo? Mam kelgda neb a taabã tɩ sã n tõe bɩ m sak b raabã bɩ?’ D sã n yaa wʋmda, wilgdame tɩ d rɩkda a Zeova ne a Zeezi togs-n-taare. D yɛlã sã n wa toeeme, d pa segd n yɩ dem-dem ye. D yɛlã sã n toeeme, tõe n waa ne zu-loees d sẽn da pa tẽede. Yɛlã toeengã tõe n yɩɩ bã-kɛgenga, pa rẽ bɩ laogã yɛl wall politikã yɛl sẽn tiig n toeem d tẽngã pʋgẽ, tɩ kɩt tɩ d vɩɩmã lebg toogo. (Koɛ. 9:11) Baa bũmb kẽer b sẽn toeem d tũudmã wɛɛngẽ tõe n yɩɩ toog ne-do. Ad bũmb a naas sẽn tõe n sõng-d tɩ d tõog toog toeeng sasa: 1) D sak tɩ yɛlã sɩd toeemame. 2) D tagsd bũmb nins d sẽn tõe n maanã yelle. 3) D tags n ges nafa nins d sẽn paamd yɛlã sẽn toeemã pʋgẽ, la 4) d sõngd d taabã. w23.07 21-22 s. a 7-8

Babilon nebã sẽn wa n na n tall no-rɛɛs a Dãniyɛll n kẽng yembd Babilon t’a zãag ne a ba-yirã, rẽ t’a yaa bi-bɩɩga. Baa a Dãniyɛll sẽn da yaa bi-bɩɩgã, Babilon nebã yãame t’a yaa toor ne neb a taabã. B ‘gesa nif sẽn ne’ wã, n yã t’a Dãniyɛll ‘pa tar zanga, n yaa rasãnga,’ la t’a ra yita nin-kãsems zakẽ. (1 Sãm. 16:7) Rẽ n so tɩ Babilon nebã zãms-a bũmb toor-toore, sẽn na yɩl t’a wa tʋm na-yirã. (Dãn. 1:3, 4, 6) A Zeova ra nonga a Dãniyɛlle, a sẽn da yãk yam n na n yɩ ned ning buudã yĩnga. Sɩd me, a Zeova yeelame t’a Dãniyɛll yaa nin-tɩrg wa a Nowe ne a Zoob sẽn yɩ neb sẽn maan sɩd ne-a yʋʋm wʋsgã. A sẽn wa n yeel woto wã t’a Dãniyɛll zemsa yʋʋm 20. (Sɩng. 5:32; 6:9, 10; Zoob 42:16, 17; Eze. 14:14) A Dãniyɛll vɩɩmã sẽn yɩ wok la sẽn tall yamleoogã tõre, a Zeova ra nong-a lame.—Dãn. 10:11, 19. w23.08 2 s. a 1-2

Y sã n dat n da roogo, y na n dat n yãa roogã ne nifu, n gilg n ges-a, n bao n bãng bũmb fãa roogã wɛɛngẽ. Biiblã karengã la a zãmsgã wɛɛngẽ me, d tõe n maana woto. Y sã n karm-a var-vare, yaa zãms-nana wã bal la y na n bãnge, rat n yeel tɩ “Wẽnnaam koeesã pipi yɛlã” bala. (Ebre. 5:12) Vaees-y Biiblã n bao n bãng yel-bõones nins fãa sẽn be a pʋgẽ wã, wa y sẽn na n maan to-to ne roogã. Bũmb sẽn na n sõng-y tɩ y zãms Biiblã sõma, yaa y sẽn na n bao n bãng a goamã sẽn tũud taab to-to wã. Ra bao-y n bãng-y bũmb nins y sẽn tẽedã bal ye. Bao-y bãng-y y sẽn tẽed bõn-kãensã võor me. Sẽn na yɩl n wʋm Wẽnnaam Gomdã võor sõma, bũmb kẽer n be Biiblã pʋgẽ tɩ d segd n maag d yĩng n zãms-ba. Tẽn-tʋmd a Poll sagla kiris-nebã tɩ b maag b yĩng n zãms Wẽnnaam Gomdã sẽn na yɩl n “bãng sɩdã yalem, a woglem, a zãntlem la a zulum sõma.” Woto, b na n tõog n ‘kɩɩ yẽg la b vigl sõma’ tẽebã pʋgẽ. (Efɛɛ. 3:14-19) Tõnd me segd n maana woto. w23.10 18 s. a 1-3

Biiblã gomda neb sẽn tall sũ-mar yelle. Y tõe n baoo sẽk n zãms b kibayã. Wala makre, b sẽn wa n yãk a Davɩɩd t’a na n lebg Israyɛll rĩmã t’a nan ket n paoodame. Yɩɩ tɩlɛ t’a gũ yʋʋm wʋsgo, n yaool n lebg rĩma. A Sɩmeyõ ne a Ann me kell n tũu a Zeova ne b sũur fãa, la b ra gũud Mesi wã b sẽn pʋlmã. (Luk 2:25, 36-38) Y sã n wa zãmsd kibay a woto buudu, y tõe n soka y menga: Yaa bõe n sõng nin-kãngã t’a kell n tall sũ-mare? A sẽn tall sũ-marã, bark-bʋs la a paam-yã? Wãn to la m tõe n dɩk a togs-n-taare? Y leb n tõe n dɩka yam neb nins sẽn pa tall sũ-marã kibay pʋsẽ. (1 Sãm. 13:8-14) Y tõe n soka y meng yaa: ‘Bõe n kɩt tɩ b pa tall sũ-mare? B sẽn pa tall sũ-marã waa ne zu-loe-bʋse?’ w23.08 25 s. 15

Tẽn-tʋmd a Pɩyɛɛr ra maanda sɩda. A pa bas tɩ baa fʋɩ kɩt t’a bas a Zeezi tũub ye. Wala makre, daar a yembre, a Zeezi yeela gomd t’a karen-biisã pa wʋm a võor ye. (Zã 6:68) A Zeezi karen-biis wʋsg basa a tũubu, n pa gũ t’a wa wilg-b a gomdã võor ye. La a Pɩyɛɛr pa maan woto ye. A sak n deegame tɩ yaa a Zeezi bal n tar “vɩɩm sẽn ka sɛt goama.” A Zeezi yõkrã yʋngo, a ra miime t’a Pɩyɛɛr ne tẽn-tʋmdb a taabã na n zoe n bas-a lame. Baa ne rẽ, a Zeezi yeela a Pɩyɛɛr t’a kɩsa sɩd t’a na n teka yam n lebg n wa, la t’a na n kell n maana sɩda. (Luk 22:31, 32) A Zeezi bãngame tɩ “sũurã ratame, la yĩngã ka pãng ye.” (Mark 14:38) Rẽ n so tɩ baa ne a Pɩyɛɛr sẽn kɩɩs t’a pa mi a Zeezi wã, a Zeezi pa raag-a n bas ye. A vʋʋgrã poore, a vẽnega a meng ne a Pɩyɛɛre. Yaa vẽeneg tɩ wakat kãng t’a Pɩyɛɛr da yaa a yembre. (Mark 16:7; Luk 24:34; 1 Kor. 15:5) A sũurã sẽn da sãam wʋsgã, mams-y n ges-y rẽ sẽn keng a raood to-to! w23.09 22 s. a 9-10

Wẽnnaam kõta neb nins sẽn tẽed yẽ wã yel-wẽnã sugri. A kõt-b-la sugr zãng-zãnga, n pa le tẽegd b yel-wẽnã yell baa bilf ye. (Yɩɩn. 32:1, 2) A getame tɩ nin-kãens yaa neb sẽn pa tar taal la nin-tɩrse, b tẽebã yĩnga. Baa ne b sẽn yeel t’a Abrahaam, a Davɩɩd la wẽn-sakdb a taab yaa nin-tɩrsã, b ra ket n yaa yel-wẽn-maandba. La b tẽebã yĩnga, Wẽnnaam gesame tɩ b yaa neb sẽn pa tar taale, sẽn yɩɩd fãa, a sã n mak-b ne neb nins sẽn pa tũud-a wã. (Efɛɛ. 2:12) Tẽn-tʋmd a Poll wilga vẽeneg a lɛtrã pʋgẽ tɩ sẽn na yɩl n paam Wẽnnaam zoodo, yaa tɩlɛ tɩ d tall tẽebo. Yɩɩ woto ne a Abrahaam la a Davɩɩde. Leb n yaa woto ne tõnd me. w23.12 3 s. a 6-7

Rũndã-rũndã, kiris-nebã fãa paamame n tõe n kõ a Zeova maoong n teel a Rĩungã. Yaa b sẽkã, b pãngã la b tarmã la b tar n maand rẽ. D sã n kõt a Zeova bũmb nins d sẽn tar tɩ yaa sõma n yɩɩdã, d wilgdame tɩ d sũur nooma ne d sẽn paam n tũud-a wã. Tẽn-tʋmd a Poll goma bũmb kẽer d sẽn pa segd n deem ne tũudmã wɛɛngẽ yelle. (Ebre. 10:22-25) Wala makre, pʋʋsgã, koɛɛgã moonego, tigissã kẽnd la taab raood kengrã, “sẽn yɩɩd fãa, d sẽn ne t’a [Zeova] daarã kolgdame wã yĩnga.” Vẽnegr sebrã baasg sẽnese, a Zeova malɛkã yeela gomd naoor a yiibu. A yeelame: “Waoog Wẽnnaam!” (Vẽn. 19:10; 22:9) Bɩ d ra tol n yĩm bũmb nins d sẽn bãng a Zeova ro-kãsengã sẽn pa ninsaalb nus n me wã wɛɛngẽ wã, la d sẽn paam n tõe n tũ d Wẽnnaam sẽn ka to wã tɩ yaa zu-zẽkrã ye. w23.10 29 s. 17-18

D fãa rat n “ket n nonga taaba.” La d segd n tẽegame t’a Zeezi yeelame tɩ “neb wʋsg nonglem pãng na n boogame.” (Mat. 24:12) A Zeezi pa yeel tɩ na n yɩɩ woto ne a karen-biis wʋsg ye. Baa ne rẽ, d segd n gũusame tɩ dũniyã nebã nonglmã sẽn boogdã ra mad-d ye. D ning rẽ d yamẽ, la d bao sokr sẽn tar yõod leoore: Bũmb bee d sẽn tõe n maan n bãng d sã n nonga d tẽed-n-taasã sõma bɩ? Bũmb a ye d sẽn tõe n maan n bãng d nonglmã sã n tara pãnga, yaa d sẽn na n ges d manesem sẽn yaa to-to yɛl kẽer taoore. (2 Kor. 8:8) Wala makre, tẽn-tʋmd a Pɩyɛɛr yeelame yaa: “Sẽn yɩɩda, bɩ y nong taab wʋsgo, bala nonglem luta yel-wẽn wʋsgo.” (1 Pɩy. 4:8) D tẽed-n-taag sã n wa tudgi, pa rẽ bɩ n maan bũmb n sãam d sũuri, d manesem sẽn na n yɩ to-to wã tõe n sõng-d lame tɩ d bãng d sã n sɩd nong-a lame. w23.11 10-11 s. 12-13

D sã n nong neb kẽer tigingã pʋg la d yãk sãnda n pa nongẽ, d pa tõe n yeel tɩ d tũuda a Zeezi noorã ye. Yaa sɩd tɩ d tõe n nonga sãnda n yɩɩd wa sẽn yɩ to-to ne a Zeezi wã. (Zã 13:23; 20:2) La tẽn-tʋmd a Pɩyɛɛr tẽeg-d lame tɩ d segd n modgame n tall “saam-biir nonglem,” rat n yeel tɩ n nong d tẽed-n-taasã wa d zakã neba. (1 Pɩy. 2:17) A Pɩyɛɛr sagl-d lame tɩ d “nong taab wʋsg ne nonglem sẽn yit sũurẽ.” (1 Pɩy. 1:22) Vɛrse-kãngã pʋgẽ, b sẽn yeel tɩ “nong taab wʋsgã” rat n yeelame tɩ d nong nebã fãa, baa neb nins d sẽn get tɩ yaa toog tɩ d nong-bã. Wala makre, saam-biig sã n maan bũmb n beeg tõnd wall n sãam d sũuri, d maanda wãna? Tõe tɩ d na n dat n maaname n lebse, n pa wilg nonglem ye. La a Zeezi sõnga a Pɩyɛɛr t’a bãng tɩ maan n lebs pa noom Wẽnnaam ye. (Zã 18:10, 11) A Pɩyɛɛr yeelame: “Bɩ y ra lebs wẽng wẽng yĩnga, wall tʋʋr tʋʋr yĩng ye. Y segd n ningda barka.” (1 Pɩy. 3:9) Y sã n nong neb a taabã wʋsgo, y na n maand-b-la neere. w23.09 28-29 s. a 9-11

D sã n get kambã sẽn bɩt tao-tao to-to wã, bee yamleoogo. Yaa wa b bɩta woto bal tɩ pa baood modgr ye. La f sã n dat n lebg kiris-ned tẽeb sẽn bɩ, yaa tɩlɛ tɩ f modge. (1 Kor. 13:11; Ebre. 6:1) Rẽ baoodame tɩ d modg n yõg zood sõma ne a Zeova. Sẽn paase, yaa tɩlɛ tɩ d paam tɩ vʋʋsem sõngã sõng-d tɩ d bɩɩs zʋg-sõma, n paas d minimã bũmb kẽer wɛɛngẽ, la d segl d mens n wa maan bũmb kẽere. (Yel. 1:5) A Zeova naana ninsaalbã rap la pagba. (Sɩng. 1:27) F sã n ges pag ne raoa, f neeme tɩ b yaa toor-toore. La b sẽn yaa toor-toorã pa nif sẽn ne wã wɛɛngẽ bal ye. Wala makre, a Zeova naana pagbã la rapã tɩ b tar tʋʋm toor-toore, tɩ ned kam fãa segd n tall zʋg-sõma la minim sẽn na yɩl n tõog n tʋm tʋʋm nins a sẽn segd n tʋmã.—Sɩng. 2:18. w23.12 18 s. a 1-2

A Zeezi ra ratame tɩ nebã pʋt a Ba wã yʋ-peellã bɩ? Vẽenega. A Zeezi wakatẽ wã, tũudum taoor dãmb kẽer da tagsdame tɩ Wẽnnaam yʋʋrã yaa sõng wʋsgo, hal tɩ b pa segd n pʋd-a ye. La a Zeezi pa bas tɩ minund a woto sẽn pa zems ne Biiblã sẽn yetã kɩt t’a pa waoog a Ba wã yʋʋrã ye. Tẽeg-y bũmb ning sẽn maan a Zeezi sẽn wa n dig zĩn-dãmb tɩ b yi n bas rao Gerasa nebã soolmẽ wã. Rabeem yõka nebã, tɩ b kos a Zeezi t’a yi bãmb soolmẽ wã, t’a pa tõog n pa soolem-kãng ye. (Mark 5:16, 17) La a Zeezi yaool n da ratame tɩ nebã bãng a Zeova yʋʋrã beenẽ. Rẽ n so t’a yeel rao ning a sẽn dig zĩn-dãmbã tɩ b yi n basã t’a tɩ togs nebã bũmb ning a Zeova sẽn maan n kõ-a wã, la pa yẽ sẽn maan n kõ-a wã ye. (Mark 5:19) Rũndã-rũndã me, a ket n data woto. A ratame tɩ d sõng nebã dũniyã gill zug tɩ b bãng a Ba wã yʋʋrã. (Mat. 24:14; 28:20) D sã n maand woto, d noogda d Rĩm a Zeezi sũuri. w24.02 10 s. 10

D sẽn paam n be a Zeova siglgã pʋgẽ yaoolem wakatã sẽn pa nana wã yaa bark tɛkẽ! Baa ne dũniyã yɛl sẽn tar sãoong n dabdã, a Zeova sõnga tõnd tɩ d tar saam-biis la saam-bi-pogs sẽn zemsd taab wa zag-yɛng neba. (Yɩɩn. 133:1) A sõngda tõnd tɩ d zagsã pʋsẽ vɩɩm noomẽ. (Efɛɛ. 5:33–6:1) Sẽn paase a kõta tõnd yam tɩ d maood ne d zu-loeesã, la d tar sũ-noogo. La sẽn na yɩl n kell n tũ a Zeova ne d sũur fãa, d segd n modga wʋsgo. Bõe yĩnga? Bala d fãa sẽn yaa neb sẽn pa zems zãngã yĩnga, neb a taabã tõe n maana bũmb n sãam d sũuri. Tõnd mengã pãn-komsmã me tõe n komsda d raoodo, sẽn yɩɩd fãa d sã n maand yel-wẽnd ning n yɩlemdẽ. D segd n modgame n kell n tũ a Zeova baa 1) d tẽed-n-taag sã n maan bũmb tɩ sãam d sũuri, 2) d pag wall d sɩd sã n maan bũmb tɩ sãam d sũuri, la 3) tõnd mengã pãn-komsmã sã n sãamd d sũuri. w24.03 14 s. a 1-2

Wakat-wakate, y na n wʋmda kibay sẽn wilgd y saam-biis la y saam-bi-pogs sẽn yãk yam n na n maneg n tʋm a Zeova tʋʋmã n paase. Tõe tɩ b kẽnga Rĩungã koe-moondb lekolle, wall b yik n kẽnga zĩig koe-moondb sẽn pa waooge. Y sã n tõe n yãka bũmb a woto n wa maane, bɩ y modg n maane. Neb nins sẽn tũud a Zeova wã maanda b sẽn tõe fãa sẽn na yɩl n tʋm a tʋʋmã n paase. (Tʋʋ. 16:9) La y sã n nan pa tõe n maan dẽ yẽ? Ra tags-y tɩ neb nins sẽn tõe n maan dẽ wã sãoo yãmb ye. Sẽn tar yõodã yaa y sẽn na n kell n tõog toogo, n maand a Zeova raabã. (Mat. 10:22) Ra yĩm-y tɩ yaa y sẽn na n maand y sẽn tõe fãa a Zeova tʋʋmdã pʋgẽ la a sũur noom ne-y ye. Woto yaa bũmb a ye sẽn tar yõod y sẽn tõe n maane, n kell n pʋg a Zeezi y lisgã poore.—Yɩɩn. 26:1. w24.03 10 s. 11

Tõnd saasẽ Ba wã pʋlmame tɩ d sã n tek yam n kos sugri, a kõt-d-la sugri. (Yɩɩn. 86:5) Rẽnd d sã n sɩd teka yam n kos d yel-wẽnã sugri, d tõe n basa d yam t’a Zeova sẽn yeel bũmb ningã yaa sɩda. A kõ-d-la sugri. D segd n tẽegame t’a Zeova pa dem-dem ye. A zɩ n yeel tõnd tɩ d maan bũmb sẽn yɩɩd d pãng ye. A sũur nooma ne bũmb nins d sẽn maand n kõt-a wã, sã n mik tɩ d maanda d sẽn tõe. D leb n tõe n tagsa neb nins sẽn tũ Wẽnnaam ne b sũy fãa tɩ b gomd b yell Biiblã pʋgẽ wã yelle. Tẽeg-y tẽn-tʋmd a Poll yelle. Yʋʋm wʋsg pʋgẽ, a tʋma Wẽnnaam tʋʋmã ne yẽesem. A toga sor n zãag zĩiga, n lugl tigims wʋsgo. La a yɛlã sẽn wa n toeem t’a pa le tõe n moon koɛɛgã wa pĩndã, a Zeova sũur sãama ne-a bɩ? Pa yɩ woto ye. A ra ket n maanda a sẽn tõe, t’a Zeova ningd-a barka. (Tʋʋ. 28:30, 31) Woto me, tõnd sẽn tõe n tʋm a Zeova tʋʋmã to-to wã tõe n wa toeemame. La sẽn tar yõod n yɩɩd yaa bũmb ning sẽn kɩt tɩ d tũud-a wã. w24.03 27 s. a 7, 9

A Zeezi mengã pʋʋsa a Zeova, n kõ a karen-biisã mak-sõngo. A Zeezi sẽn wa n be tẽngã zugã, a ra wae n pʋʋsdame. Ra yaa tɩlɛ t’a bao sẽk sẽn na yɩl n pʋʋse, bala a ra tʋmda wʋsgo, tɩ neb wʋsg me ra mi n be ne-a. (Mark 6:31, 45, 46) A ra sãta yibeoog pĩnda, sẽn na yɩl n paam wakat yẽ a yembr n pʋʋse. Vugri, a pʋʋsa yʋng tõre, n yaool n yãk yam bũmb sẽn tar yõod wʋsg wɛɛngẽ. (Luk 6:12, 13) Yʋng ning b sẽn yõk a Zeezi wã, a pʋʋsame n yɩlme, sẽn na yɩl n tõog n baas tʋʋmd ning a sẽn da segd n tʋm tẽngã zugã. (Mat. 26:39, 42, 44) A Zeezi mak-sõngã wilgdame tɩ baa d tʋʋmã sẽn yaa wʋsg to-to, d segd n modgdame n baood sẽk n pʋʋsdẽ. Wa a Zeezi, tõnd me segd n yãka wakat pʋʋsgã yĩnga. Wala makre, d tõe n yikda yibeoog pĩnda, wall d pʋʋsd yʋngo. D sã n maand woto, d wilgda a Zeova tɩ d nanda pʋʋsgã sẽn yaa kũun sẽn tar yõod wʋsgã. w23.05 3 s. a 4-5

Vɛrse wã pʋgẽ, b yeelame tɩ b “pʋdga” Wẽnnaam nonglmã. Sebr a ye bilga rẽ võore, n yeel t’a “sigda tõnd zut wa kʋɩlg koom.” Woto bilgda a Zeova sẽn nong sẽn paam-b vʋʋsem sõng zaeebã wʋsg to-to wã. Nin-kãens miime tɩ ‘Wẽnnaam nong-b lame.’ (Ziid 1) Tẽn-tʋmd a Zã goma rẽ yell n yeel yaa: “Ges-y Ba wã sẽn nong tõnd ne nonglem ning buudu, n sak tɩ b na n boond tõnd tɩ Wẽnnaam kambã!” (1 Zã 3:1) Yaa sẽn paam-b vʋʋsem sõng zaeebã bal la a Zeova nong bɩ? Ayo. A Zeova wilgame t’a nonga tõnd fãa. Bũmb nins a Zeova sẽn maan n wilg a nonglmã sʋka, bʋg n yaa kãseng n yɩɩda? Yaa a sẽn tʋm a Zeezi t’a wa ki tɩ yɩ maoongã. A Zeova sẽn sak t’a Zeezi ki wã, a wilga a nonglmã n yɩɩd ned buud fãa.—Zã 3:16; Rom. 5:8. w24.01 28 s. a 9-10

Vɛrse-kãngã wilgda bũmb sẽn sõng a Davɩɩd t’a yam gãande. Baa a vɩɩmã sẽn da be yell pʋgẽ wã, a bʋgsa bũmb ning a Zeova sẽn nan na n maan n kõ-a wã zugu. A Davɩɩd ra miime tɩ wakatã sã n ta, a Zeova na n fãag-a lame. Sɩd me, a Zeova ra yeelame t’a Davɩɩd na n lebga Israyɛll rĩma. (1 Sãm. 16:1, 13) Ne a Davɩɩde, a Zeova sẽn pʋlem fãa yaa waaziba.Bõe la a Zeova pʋlem t’a na n maan n kõo yãmba? D miime t’a Zeova pa na n kogl tõnd tɩ zu-loɛɛg baa a ye ra paam-d ye. La sẽn wa n yaa zu-loɛɛg ning fãa la y segd rũndã-rũndã, a Zeova na n kɩtame t’a sa dũni-paalgã sẽn watã pʋgẽ. (Eza. 25:7-9) D Naandã tara tõog n tõe n vʋʋg kũum, n sãoog d bãas buudã fãa, la a menes nin-wẽnsã fãa.—1 Zã 4:4. w24.01 6 s. 12-13

Tagsd-y y sẽn dɩk y meng n kõ a Zeova n deeg lisgã yelle. Y maana woto, y sẽn dat n zĩnd a Zeova poorẽ wã yĩnga. Tẽeg-y bũmb ning sẽn kɩt tɩ y kɩs sɩd tɩ y bãnga tũudum hakɩɩkã yelle. Y wa n bãnga a Zeova, n waoogd-a la y nong-a a sẽn yaa y saasẽ Ba wã yĩnga. Y tẽebã pãng wa n paasame, tɩ y tek yam n kos sugri. Y basa bũmb nins a Zeova sẽn kisã maanego, n maand bũmb nins sẽn noom-a wã. Y sẽn wa n bãng tɩ Wẽnnaam kõ-y-la sugrã, y paama yolsgo. (Yɩɩn. 32:2) Y ra kẽnda tigissã, la y wilgd neb a taabã bõn-sõma nins y sẽn da bãngdã. Y sẽn dɩk y meng n kõ Wẽnnaam n deeg lisg masã wã, y kẽnda vɩɩmã sor zug n yãk yam n pa na n tol n bʋdg ye. (Mat. 7:13, 14) Bɩ y yals kãn-kãe tẽebã pʋgẽ n da vigsi, la y kell y sakd a Zeova noyã. w23.07 17 s. 14; 19 s. 19

Y sã n tags bũmb ning y sẽn pʋlem a Zeova n dɩk y meng n kõ-a wã yelle, na n kõ-y-la raood tɩ y kell n maan sɩd ne-a makr buud fãa taoore. Wala makre, y na n maanda wala y rooda ned a to pag wall a sɩd bɩ? A bada! Y zoe n yãka yam n pa na n tol n maan a buud ye. Rẽ n so tɩ y pa na n bas tɩ tʋls-wẽns kɩ yẽg y sũyẽ wã, tɩ y yaool n maood n na n yiis-b ye. Y na n lak n basa “nin-wẽnsã sore.” (Yel. 4:14, 15) Y sã n bʋgs a Zeezi mak-sõngã zugu, tõe n sõng-y lame. A ra yãka yam ne a sũur fãa n na n noog a Ba wã sũuri. Bɩ yãmb me yɩt tao-tao n zãagd y meng ne bũmb ning fãa y sẽn mi tɩ pa na n yɩ Wẽnnaam ning y sẽn dɩk y meng n kõ wã noogã. (Mat. 4:10; Zã 8:29) Y sã n wa tar zu-loeese, wall y sã n wa be makr taoore, bũmb ning y sẽn na n maanã tõe n wilga y sã n sɩd rat n pʋga a Zeezi. Sẽn paase, y tõe n basa y yam t’a Zeova na n sõng-y lame tɩ y kell n pʋg a Zeezi. w24.03 9-10 s. a 8-10