Sõngr hakɩk zagsã yĩnga
“Yaa bũmb sẽn zems tɩ b yeel tɩ zak bee yɛl wɩngr pʋgẽ Amerik tẽngẽ wã. Yaa woto bal la d tõe n kʋmb n yeele, d sã n tik kãadmã kaoob tʋʋlem, kamb sẽn dogd tɩ pa tũ ne kãadmã sõore, [la] kom-bɩɩs bi-beer ne kẽed-n-taas maan-taab pãngã zutu.”
Gom-kãensã a Tom Brokaw sẽn gomd Etazĩni televiziõ n wã tõe n tɩ loee ne tẽnsã wʋsg sẽn yɩɩde. Yɛl wɩngr kãngã võor yaa bõe?
Ne zĩis wʋsg pʋsẽ zakã yaa zãma wã kug-yẽbgdga. Zakã sã n be gudgr pʋgẽ, zãma wã me bee gudgr pʋgẽ. Sẽn paase, zakã yaa yĩn-sidg la ligd teelg zĩiga n kõ kambã. Yaa zĩig ning b sẽn be la b zãmsd vɩɩmã pipi yɛl sẽn tar yõod n yɩɩdã. Zagsã sã n be gudgr pʋgẽ, bõe la kambã zãmsda? B bãana bee yɛ? Yaa kom-kãsems bʋs buud la b na n bɩ n yɩ?
Rẽ yĩnga, sõngr beeme n kõ zakã sẽn be yɛl wɩngr wakat pʋgẽ wã bɩ? N-yẽe. Zak yaa siglg Wẽnnaam meng sẽn lugli. (Sɩngre 1:27, 28) La a ra kõo zak sor-wilgr sẽn tar yõod wʋsg a Gomdã sẽn yaa Biiblã pʋgẽ. (Kolos rãmba 3:18-21) Sɩda, d pa tõe n toeem zãmaana gill ye, la d tõe n tũu Biiblã sagls d meng zak pʋgẽ. D da rat n togs-y-la neb kẽer sẽn maan dẽ la bi-sõma nins b sẽn paame.
D sẽn na n gil kãadem kaoob to-to
Tẽns wʋsg pʋsẽ kãadma fãa koabg zugu, 50 wã baasda ne kaoobo. Woto yaa sõor sẽn sãd n yɩɩd ninsaalbã zems-taab kaalem pʋgẽ! Sɩda, neb wʋsg sẽn baas b vɩɩm wala roagd a yembr bʋʋm kãngã yĩnga, tʋmda wʋsg sẽn na yɩl n wub b kambã. La bãmb wʋsg na n sak n deegame tɩ yaa sõma n yɩɩd wakat ningã, kẽed-n-taasã sã n tõe n welg b zu-loeesã la b pa ne taaba.
Ɩll Salomo, kẽed-n-taas a yiib kãadem n da rat n baas ne yel-beedo. Sɩdã, sẽn yaa naab biigã, ra yaa nen-kɛglem soaba la a ra tara zʋg-wẽnse. Vɩɩmã ra yaa toog wʋsg ne a pagã t’a mak meng n na n kʋ a menga. Dẽ poore, sɩdã sak n na n karma Biiblã ne a Zeova Kaset rãmbã. A zãms n bãngame tɩ ned ning fãa sẽn dat n maan Wẽnnaam daab segdame, pa n bãng sẽn yaa wẽng bal ye, la a segd n ‘kisga wẽngã’ me. (Yɩɩl Sõamyã 97:10) Woto rat n yeelame tɩ f kisg yɛl wala zɩlem-beedo, wagdem, nen-kɛglem, la rã-tɩgre. A ninga rẽ a sũurẽ n sak saglgã, la pa kaoos la a tõog a zʋg-wẽnsã la a nen-kɛglmã ye. A toeengã linga a pagã, la b kãadmã lebg n manega wʋsgo, Wẽnnaam Gomdã pãn-tusdg maasem yĩnga.
Afirik di Siid pag a yembr sẽn yaa a Zeova Kaset soab wʋmame t’a patrõ poakã ne a sɩdã ra tagsda b na kao b kãadmã. Kaset soabã goma ne a patrõ poakã Wẽnnaam tagsg ne kãadem wɛɛngẽ la a wilg-a-la sebr gom-zug sẽn yaa Zak pʋgẽ sũ-noogã kʋɩlen-biiga. Seb-kãngã a Zeova Kaset rãmbã sẽn yiisã, gomd n tadgda Biiblã noy sẽn tɩ loe ne kãadmã n wilgd Biiblã sẽn sõngd kẽed-n-taasã tɩ b welg b zu-loeesã to-to. Patrõ poakã ne a sɩdã b yiib fãa karma sebrã la b mak ne b sũur fãa n na n tũ Biiblã saglg a sẽn kõ wã. A baasgã yaa tɩ b rɩka sard n pa na n kao b kãadmã ye, tɩ woto yaa kãadem a to sẽn põs ne Biiblã noy tũub maasem yĩnga.
Tũudum toɛ-toɛya
Yaa wãn to ne kãadem kẽed-n-taas sẽn be tũudum toɛ-toɛ pʋgẽ? Sɩd-sɩda, Biiblã sagenda kiris-nebã tɩ b kẽ kãadem “Soaala pʋgẽ bala.” (1 Korẽnt dãmba 7:39, NW ) Yaa sɩd tɩ wakat ninga kẽed-n-taag a yembr toeemda tũudum. La woto saasda kãadmã bɩ? Pa woto lɛ-lɛ ye.
B ra sʋka pag a yembr sẽn be Botswana tẽngẽ wã sẽn lebg a Zeova Kaset soab sẽn nan pa kaoos tɩ wãn to la yẽ tẽeb paalgã toeem-a. A kosa a sɩdã t’a leok a yĩnga, la ad a sɩdã sẽn yeele: “Mam pagã sẽn lebg a Zeova Kaset soab tɛka, mam yãa toeems wʋsg sẽn yaa sõma a nengẽ. Masã a tara bãane, la pãng a sẽn zɩ n paam pĩnd abada. A paama pãng la tẽeb kãn-kãe n bas sɩgaar yũubu, sẽn yaa minung mam sẽn ket n pa tõog n bas ye. Mam pagã nonglem la a yĩn-sidg ne mam kambã la maam la ne neb a taabã paasame. A tara sũ-mar wʋsgo, sẽn yɩɩd fãa ne kambã. Mam yãt-a lame t’a rɩkd a sẽkã n kẽesd a ministɛɛrã pʋgẽ, n makd n sõngd neb a taabã tɩ b vɩɩmã manegdẽ. Mam leb n yãa toeems sẽn yaa sõma mam meng vɩɩmẽ wã. M tẽeda zãng tɩ woto yaa yẽ mak-sõngã yĩnga.” Ad yaa pãn-tusd-sõng la Biiblã noy tall kãadem kãnga zugu! Neb wʋsg sẽn pa Kaset rãmb talla goam a woto buud ne b kẽed-n-taas sẽn yaa Kaset rãmba.
Ba wã sã n pa get a taoor-sobendã yell sõma
Ba wã ne kambã sʋk loees yaa zags sẽn yaa kãn-kãe meeb kʋɩlen-biiga. Tʋm-tʋmd a Poll saglame: “Ba rãmba, bɩ y ra maan bũmb sẽn yikd yãmb kamba sũy ye, la bɩ y wub bãmb ne Zusoaba saglgo la zãmsgo.” (Efɛɛz rãmba 6:4) Dẽ, yaa wa sẽn zems la gom-zu-raoog sẽn be The Wilson Quarterly sebrẽ wã wilgẽ tɩ zu-loees wʋsg sẽn be zãmaana pʋgẽ wã yaa ba rãmb nins sẽn pa pidsd b taoor-sobendã yĩnga. Sõsgã yeelame: “Yʋʋmd 1960 la yʋʋmd 1990 wã sʋka, koabg zug sõor pʋɩɩb kamb nins sẽn pa vɩ ne b ba-rogsã sõor paasa naoor a yiibu . . . Baandã kaalem paasg yaa pãn-tusd-kãseng sẽn wat ne zu-loees ne gudgr sẽn namsd Amerik zãmaanã.”
Rẽ yĩnga, woto rat n yeelame tɩ yaa tɩlae tɩ kamb nins ba rãmb sẽn pa get-b yellã vɩɩm sãam bɩ? Ayo. Pĩnd wẽndẽ yɩɩl-gʋlsdã yeelame: “Mam ba ne m ma sã n bas maam, Zusoaba na n reega maam.” (Yɩɩl Sõamyã 27:10) Tailãnd yʋʋm a wɛ biribl yãame tɩ woto yaa sɩda. A ma wã maana kaalem a sẽn da yaa bi-pɛɛlg wakate, la a ba wã sẽn da pa rat-a wã yĩnga, a rɩk-a lame n kõ a yaab-poaka. A sẽn da tagsd tɩ b pa rat-a la b pa nong-a wã yĩnga, biriblã da lebga tõat n paam yʋʋr wala nin-toaaga. A ra namsda a yaab-poakã menga. Saam-bi-pogs a yiib sẽn yaa a Zeova Kaset rãmbã wakat fãa koe-moondb sẽn gũus n yã t’a nong n yasa sakẽ be Rĩungã Roog yɩnga, daar a yembre b bool-a-la b yirã.
B goma ne-a Wẽnnaam wɛɛngẽ n yeel-a tɩ wala ba, Wẽnnaam nonga a kambã. B leb n goma ne-a tẽng zug Arzãna yell Wẽnnaam sẽn kãab ãdem-biis nins sẽn yaa kɩs-sɩd dãmbã. (Wilgri 21:3, 4) La woto fãa yɩɩ biigã noogo, la a lebg n waa daar fãa n zãms n paase. Kaset rãmbã yeel-a lame t’a segd n basa nin-toolmã maanego, t’a sã n sɩd rat tɩ Wẽnnaam yɩ a Ba. Woto zemsa ne a Poll goam nins a sẽn taas Rom dãmbã: “Bɩ y maan yãmb sẽn tõe tɛka t’a sã n tõe, bɩ laafɩ zĩnd yãmb ne neba fãa sʋka.” (Rom dãmba 12:18) A ra segdame me n tall sõmblem manesem ne a yaab-poakã. (1 Tɩmotɩ 5:1, 2) Tao-tao bala, a sɩnga Biiblã noy tũubu, tɩ sãmbg pa be tɩ woto paasa zaka vɩɩm sõmblem wʋsg ne a yaab-poakã ye. (Galat rãmba 5:22, 23) Yagsã sũur yɩɩ noog wʋsg ne a toeengã b sẽn yã wã tɩ b ra rat tɩ b mens kambã zãms Biiblã ne a Zeova Kaset rãmbã!
Laafɩ yam
Tʋm-tʋmd a Poll gʋlsa Kolos rãmbã: “Bɩ y [“yeelg,” NW] nonglem sẽn yaa bũmb fãa loɛtg sɩd-sɩdã. La bɩ Kirist laafɩ bãmb sẽn bool yãmb a pʋgẽ tɩ y yɩ yĩng a yembrã soog yãmb sũyã.” (Kolos rãmba 3:14, 15) Laafɩ yam la sũur nonglem sɩd na n loeya zak rãmb ne taaba. La b tõe n manega zak welgr sẽn kaoose. Sẽn yɩɩd yʋʋm 17 la a Rukia sẽn be Albani pa gom ne a yao biribl zak pʋgẽ pa zems-taab yĩnga. A sẽn zãms Biiblã ne a Zeova Kaset rãmbã, a bãngame tɩ b sagenda Wẽnnaam sõgen fãa t’a bao laafɩ ne a taabã. “Bɩ a bao laafɩ la tũ-a.”—1 Pɛɛr 3:11.
A Rukia bãngame t’a ra segd n baoa laafɩ ne a yao biriblã. A pʋʋsa yʋngã tõre, la vẽk-n-beoog yibeoogo, ne sũ-kiuusgu, a kẽnga a yao biriblã zakẽ. A Rukia yagen-poak n pak kʋɩlengã la ne lingri a sʋkame: “Bõe la fo maand ka?” A Rukia maaga a meng n yeel t’a rat n yãa a yao biriblã, n wilgdẽ t’a da ratame n maan laafɩ ne-a. Bõe yĩnga? Bala a bãnga masã tɩ ra yaa Wẽnnaam daab la woto. A yao biriblã sakame, la b seg-taabã ra yɩɩ ne pʋʋs n mobg taab la ne sũ-noog nintãm, b sẽn tũ Biiblã noyã yĩngã zakã leb n paama zems-n-taare.
Tũud-n-ta-wẽnse
“Rũndã-rũndã, kamb wʋsg rɩkda lɛɛr a yopoe n get televiziõ wã daar fãa. Biig sã n karem lekoll pirmeerã n sa poore, rẽ t’a zoe n yãa sẽn yɩɩd nin-kʋʋr tus a nii la nen-kɛglem tʋʋm tus koabga.” Woto la The 7 Habits of Highly Effective Families sebrã yeta. Pãn-tusdg bʋg la wilgr a woto talld biig zugu? “Mitbã” pa zemsd taab zĩ-kãng wɛɛngẽ ye, la Biiblã keoogda vẽeneg tɩ tũud-n-ta-wẽns pa sõma ye. Wala makre, a yetame: “Ned sa n tũud yalma, a na n paama toogo.” (Yelbũna 13:20) A leb n yetame: “Tũud-n-ta-wẽns sãamda zʋg-sõma.” (1 Korẽnt dãmba 15:33, NW) Zak vɩɩm tõe n manegame tɩ d sã n maan gũusg n tũ no-kãnga tũud-n-ta-wẽns sã n wa yaa neb mens bɩ televiziõ wã program pʋgẽ.
Lugzãmbuur ma a yembr ra zãmsda Biiblã ne a Zeova Kaset soaba. Daar a yembre a togsa Kaset poakã tɩ zaabr sã n ta fãa, yẽ kom-pugli a yiib sẽn taar yʋʋm a yopoe la a nii da yaa zab-zabdb la nen-kɛglem dãmba. Kaset poakã sʋk-a lame tɩ bõe la kom-pugli wã maand zaabr fãa. Ma wã yeelame tɩ b geta televiziõ wakat ning yẽ sẽn yẽesd ragen-doogã. Yaa bõe program? “Ooh, yaa desẽ anime rãmba,” woto la ma wã leok-yã. A sãana sẽn yeel tɩ program a woto buud nong n yaa nen-kɛglem, kom-pugli wã ma wã kãabame t’a na n gũus-b lame n gese.
Rẽ vẽk-n-beoogo, ma wã wilgame t’a pɛleng da yɩka ne desẽ anime rãmb nins a kom-pugli wã sẽn da getã. B ra wilgda bõn-bãn b sẽn mams tɩ be yĩngr n yaa wẽns n sãamd bũmb fãa sẽn be b sor zugu. A wilga a kom-pugli wã t’a Zeova kisa nen-kɛglem, la t’a sũur pa noom d sã n get wẽnem a woto buud ye. (Yɩɩl Sõamyã 11:5) Kom-pugli wã sẽn dat n noog a Zeova sũurã yĩnga, b sak n na n maana desẽ rãmb la gʋlbo, la b pa get televiziõ wã ye. Zĩig pʋgẽ bala bãmb nen-kɛglem manesmã toeemame, la zakã vɩɩm manegame.
Woto yaa makr bilf bal sẽn wilgd tɩ Biiblã noy tũub manegda zak vɩɩm. Biiblã sagls sõngda vɩɩmã nens fãa. A togsda sɩda la a tara pãn-tusd-kãseng neer maaneg yĩnga. (Hebre dãmba 4:12) Nebã sã n zãmsd Biiblã la b modgd n tũud a sẽn yetã ne pʋ-peelem, zagsã paamda kengre, nebã nedemd manegdame, la b ginda kongre. Baa yaa zakã pʋgẽ ned a yembr n tũud Wẽnnaam saglsã, yɛlã manegd n paasdame. Sɩd-sɩda, vɩɩmã nens fãa pʋsẽ, d segd n gesa Wẽnnaam Gomdã wala yɩɩl gʋlsdã sẽn maanã, a gʋlsame: “Yãmb goama yaa mam nao wã fɩtla la m sor vẽenem.”—Yɩɩl Sõamyã 119:105.
[Picture on page 5]
Zags zu-loees paama welgr ne b sẽn na n tũ Biiblã noya