Yaa Wẽnnaam n yãkd yel-gɛtbã la ministɛɛrã sõgen dãmbã
“Gũus-y y mensã la y gũus bãgrã neb fãa, vʋʋsem sõngã sẽn yãk yãmb tɩ y yaa yel-gɛtb b sʋkã.”—Tʋʋma 20:28, NW.
1, 2. Wãn to la Ezai 60:22 paamd pidsg masã?
HAL sẽn kaoose, a Zeova reng n togsame tɩ bõn-kãseng n da na n zĩnd saabã wakate. A tũnuga ne no-rɛɛs a Ezai n yeel woto: “Ned ninga sẽn yaa bilf n yɩɩd a taaba na n lebga tusri. La ned ninga sẽn paooda na n lebga bu-kãsenga. Mam yaa Zusoaba. A wakata sã n ta, mam na n maan-a-la tao-tao.”—Ezai 60:22.
2 Bũmb beeme n wilgdẽ tɩ bãngr-gom-kãngã paamda pidsg rũndã-rũndã bɩ? N-ye! Yʋʋmd 1870 n tɩ ta yʋʋmd 1880 sʋka, a Zeova nin-buiidã tiging a ye la b ra maan Allegheny sẽn be Pensilvani, sẽn be Etazĩni wã. Tigimsã sõor sẽn da yaa bilfã fɩɩgame n lebg bãmb tus wʋsg sẽn tar pãng dũniyã gill zugu. Rĩungã koe-moondb milyõ rãmb sẽn yaa wa buud sẽn tar pãng n be tigims sẽn yɩɩd 91000 pʋsẽ tẽns 235 pʋsẽ dũniyã gill zugu. Sãmbg sẽn ka be, rẽ wilgdame t’a Zeova maandame t’a balemdb hakɩkã kõom maan tʋʋll-tʋʋlle, tɩ ‘to-kãsengã’ sẽn kolg wʋsg masã wã nan pa wa ye.—Matɩe 24:21; Wilgri 7:9-14.
3. ‘Reeg lisg Ba wã, Biigã la sɩɩg sõngã yʋʋr yĩng’ dat n yeelame tɩ bõe?
3 Neb milyõ kãensã rɩka b mens n kõ a Zeova. Rẽ poore, wa sẽn zems ne a Zezi noyã, b reega lisg “ne Ba la Biiga la Sɩɩg Sõng yʋʋre.” (Matɩe 28:19) Paam lisg ‘Ba wã yʋʋr yĩng’ dat n yeelame tɩ nin-kãensã sẽn dɩk b mens n kõ wã sakame t’a Zeova yaa b saasẽ Ba la b Vɩɩm Kõta. Rat n yeelame me tɩ b sakda a naam sẽn ka to wã. Reeg lisgã ‘Biiga yʋʋr yĩng’ rat n yeelame tɩ b sakame t’a Zezi Kirist yaa b Zusoab la b Rĩma, la ned ning sẽn yao b yel-wẽndã samdã. B sakame me tɩ Wẽnnaam vʋʋsem sõngã, bɩ a pãng sẽn tʋmdã n wilgd b vɩɩmã sore. Rẽ wilgdame tɩ b reega lisg ‘vʋʋsem sõngã yʋʋr yĩnga.’
4. Wãn to la Wẽnnaam kõt kiris-nebã sor tɩ b moon a koɛɛgã?
4 Karen-bi-paalsã lisg poore, b kõt-b-la sor tɩ b moon Wẽnnaam a Zeova koɛɛgã. Ãnd n kõt-b sor tɩ b moone? B tõe yeelame tɩ goam nins sẽn be 2 Korẽnt dãmba 3:5 pʋgẽ wã pidsda bãmb zutu: “Tõnd tõogr [wa koe-moondbã] yita Wẽnnaam nengẽ.” B pa tõe n paam waoogr sẽn yaa kãseng n yɩɩd paam tɩ Wẽnnaam a Zeova mengã kõ-b sor tɩ b yɩ a koe-moondb ye! B lisgã poore, b na n ket n bɩta tẽebã wɛɛngẽ, n yaa ‘koe-noogã’ moondba, b sã n sakd Wẽnnaam vʋʋsem sõngã la b ket n tũud a Gomdã.—Matɩe 24:14; Tʋʋma 9:31.
Yaa Wẽnd n yãkde, pa nin-buiidã ye
5. Yaa nin-buiidã n yãkd yel-gɛtbã la ministɛɛrã sõgen dãmbã bɩ? Wilg-y a võore.
5 Kẽem dãmb nins sẽn yaa yel-gɛtb sẽn tar tõogã la ministɛɛrã sõgen dãmbã sõngr yaa tɩlae. Sɩda, rẽ yaa tɩlae sẽn na yɩl n ges koe-moondbã sõor sẽn fɩɩgdã tẽeb yelle. (Filip rãmba 1:1, NW ) Yaa wãn to la b yãkd ra-kãensã sẽn tar tẽebã? B pa maand wa dũni kiris-nedemdã sẽn maandã ye. Wala makre, pa tigingã neb n yãkd kiris-neb yel-gɛtbã ye. B yãkrã tũuda ne Wẽnnaam sor-wilgri. Rat n yeelame tɩ bõe?
6. a) Wẽnnaam goosneema yaa bõe? b) Bõe yĩng tɩ b yãkd yel-gɛtbã la ministɛɛrã sõgen dãmbã tɩ zemsd ne Wẽnnaam sor-wilgri?
6 Wẽnnaam goosneema ya a sẽn dɩt naam a nin-buiidã zugã. A Zeova Kaset rãmbã sakda a naama ne yamleoogo. B leb n tʋmda ne taab sẽn na yɩl n maan Wẽnnaam daabã. (Yɩɩl Sõamyã 143:10; Matɩe 6:9, 10) B yãkda kiris-neb yel-gɛtbã bɩ kẽem dãmbã la ministɛɛrã sõgen dãmb tɩ zems ne Wẽnnaam sor-wilgrã. Yaa woto, bala b sẽn wilgd tɩ ra-kãensã b sẽn tõe n kɩs sɩd ne wã zemsa ne zɩɩbã la b sẽn yãkd-b to-to wã zemsa ne Wẽnnaam sẽn gãneg yɛlã to-to tɩ be Gʋlsg Sõamyã pʋgẽ wã. Sẽn paase, a Zeova sẽn yaa “rĩm n so fãa” wã, a sɩd tara sor n na n yãk a siglgã ninsaal nif sẽn ne wã sẽn na n tʋm to-to.—1 Kɩbaya 29:11; Yɩɩl Sõamyã 97:9.
7. Yaa wãn to la b wilgd a Zeova Kaset rãmbã sore?
7 A Zeova Kaset rãmbã pa maand wa dũni kiris-nedemdã tũudum dãmb ye. Pa bãmb mens n yãkd tũudum siglg ning b sẽn dat n tũ wã ye. Sɩd kiris-nin-kãensã maoodame n na n tũ a Zeova noyã sõma. B pa yãkd yel-gɛtbã a Zeova Kaset rãmbã sʋk wala dũniyã egiliiz rãmb sẽn maand to-to wã ye. Dũniyã sigls sã n dat n gɩdg yãk-kãense, a Zeova nin-buiidã pa sakd rẽ ye. Wakat fãa, b tũuda yʋʋm kob-yendẽ tʋm-tʋmdbã makre. Ad tʋm-tʋmdbã sẽn yeele: “A zemsame tɩ tõnd sak Wẽnnaam n yɩɩd nebã.” (Tʋʋma 5:29) Woto, Kaset rãmbã sakda Wẽnnaam bũmb fãa pʋgẽ. (Hebre dãmba 12:9; Zak 4:7) Wẽnnaam sor-wilgrã sakr kɩtdame tɩ d ta a yam.
8. Wãn to la nin-buiidã sẽn yãkd to-to wã yaa toor ne Wẽnnaam sẽn yãkd to-to wã?
8 A Zeova yaa Sorwilgd Kãsenga. D segd n ninga d yamẽ tɩ nin-buiidã yãkr ne Wẽnnaam yãkrã pa yembr ye. Nin-buiidã yãkr baoodame tɩ sẽn tara sor fãa yãke, la ned ning fãa sẽn dat tɩ b yãk-a bɩ a yeel tɩ nebã yãk-a. La pa woto la Wẽnnaam yãkd ye. Yãkr a woto pa yit neb nengẽ ye. A leb n pa yit ninsaalb siglsẽ ye. Tʋm-tʋmd a Poll sẽn gom a meng yell n yeel t’a yaa ‘bu-zẽms nengẽ tʋm-tʋmdã,’ a ra wilgdame tɩ ya a Zezi la a Zeova n yãk-a. A yeela Galat rãmbã tɩ yẽ ya ‘a Zezi Kirist ne tõnd Ba a Wẽnnaam sẽn vʋʋgã n yãk-a, la ka ned ye.’—Rom dãmba 11:13; Galat dãmba 1:1.
Yaa vʋʋsem sõngã n yãkde
9. Yaa bõe la Tʋʋma 20:28 (NW ) yet kiris-neb yel-gɛtbã yãkr wɛɛngẽ?
9 A Poll tẽega yel-gɛtb nins sẽn da be Efɛɛzã tɩ Wẽnnaam da tũnuga ne vʋʋsem sõngã n yãk-ba. A yeelame: “Gũus-y y mensã la y gũus bãgrã neb fãa, vʋʋsem sõngã sẽn yãk yãmb tɩ y yaa yel-gɛtb b sʋkã, sẽn na yɩl n kɩɩm Wẽnnaam tigingã, yẽ sẽn da ne a mengã [Biribl] zɩɩmã.” (Tʋʋma 20:28, NW ) Kiris-neb yel-gɛtb kãensa ra ket n datame tɩ vʋʋsem sõngã wilg-b sore, b sã n wa kɩɩmd Wẽnnaam bãgrã. B sã n yãk rao tɩ wa mik t’a ye pa le tũud Wẽnnaam noyã, wakat n na n zĩnd tɩ vʋʋsem sõngã kɩt tɩ b sik-a.
10. Bõe yĩng tɩ vʋʋsem sõngã tar tʋʋm-kãseng yãkrã sẽn maand tɩ zems ne Wẽnnaam sor-wilgrã?
10 Bõe yĩng tɩ vʋʋsem sõngã tʋʋmd yaa kãseng woto? Pipi, yaa vʋʋsem sõngã n vẽneg Gomd ning sẽn wilgd yɛl nins b sẽn segd n tũ n ges tẽebã yɛl yellã. A Poll taasa lɛta a Tɩmote la a Tɩte. Lɛt kãens pʋsẽ, a wilga noy nins yel-gɛtbã la ministɛɛrã sõgen dãmb sẽn segd n tũ wã. A goma noy 16 yelle. Wala makre, yel-gɛtbã ra segd n yɩɩ neb sẽn pa tar yelle, sẽn tar maan tɩ zemse, sẽn tar yam-sõngo, sẽn pa zũnd-zãnd rãmba, sẽn yaa sãamb rɛɛgdba, sẽn tõe n zãms neb a taaba, sẽn yaa zak soben dãmb sẽn kõt mak-sõngo. B ra pa segd yũ rãam tɩ looge, b ra pa segd n yɩ neb sẽn nong ligdi, la b ra segd n talla yõk-m-menga. Yaa noy sẽn yaa sõma wʋsg woto me la rap nins sẽn dat n yɩ ministɛɛrã sõgen dãmba segd n tũ.—1 Tɩmote 3:1-10, 12, 13; Tɩt 1:5-9.
11. Noy kẽer bʋs la b baood tɩ rap nins sẽn dat n paam zɩɩb tigingã pʋgẽ wã tũ?
11 No-kãensã wilgdame tɩ neb nins sẽn lʋɩt taoor a Zeova balengã pʋgẽ wã segd n yɩɩ kiris-neb sẽn kõt mak-sõngo. Rap nins sẽn dat zɩɩb tigingã pʋgẽ wã segd n wilgame tɩ vʋʋsem sõngã n wilgd-b sore. (2 Tɩmote 1:14) Segd n yɩɩ vẽeneg tɩ Wẽnnaam vʋʋsem sõngã womda a biisã b nengẽ. Yaa “nonglem la sũ-noogo la laafɩ la sũ-mare la maan neere la sũ-maasem la tẽebo la sũ-bʋgsem la yõk-m-menga.” (Galat dãmba 5:22, 23) Nebã segd n yãa biis a woto, b manesma ne b saam-biisã la ne neb a taabã pʋgẽ. Yaa sɩda, kẽer tõe n tara vʋʋsem sõngã biis sãnda n yɩɩd b taaba. La neb a taab me tõe n tũuda yɛl nins b sẽn baood tɩ yel-gɛtbã tũ wã n yɩɩd b taaba. Baasg zãnga, b vɩɩmã fãa pʋgẽ, neb nins sẽn dat tɩ b yãk-b tɩ b yɩ yel-gɛtb bɩ ministɛɛrã sõgen dãmbã segd n wilgame tɩ b tara tẽebo. B segd n tũu yɛl nins Wẽnnaam Gomdã sẽn baood tɩ b tũ wã.
12. B tõe n yeelame tɩ vʋʋsem sõngã n yãk ãnd dãmba?
12 A Poll sagla kẽem dãmbã tɩ b rɩk togs-n-taar ne yẽ. A ra tõe n yeela woto ne pʋ-peelem, bala yẽ mengã ra rɩkda a Zezi Kirist togs-n-taare. Sɩda, a Zezi ‘basa mamsg ne tõnd tɩ d tũ a nao wã.’ (1 Pɩɛɛr 2:21; 1 Korẽnt dãmba 11:1) Woto yĩnga, b tõe n yeelame tɩ yel-gɛtbã la ministɛɛrã sõgen dãmb yãkr wakate, yaa vʋʋsem sõngã n yãk-ba. B ra tũuda bũmb nins Gʋlsg Sõamyã sẽn baood tɩ b tũ wã.
13. Wãn-wãn la vʋʋsem sõngã sõngd kẽem dãmbã tɩ b bãng tɩ ned zemsa ne zɩɩb tigingã pʋgẽ?
13 Bũmb a to me n wilgd vʋʋsem sõngã sẽn tʋmd to-to b sẽn yãkd yel-gɛtbã to-to wã pʋgẽ. A Zezi yeelame tɩ ‘Ba sẽn be yĩngr kõta vʋʋsem sõngã neb nins sẽn bõosd-a wã.’ (Luk 11:13, Sebr Sõngo) Woto, tiging kẽem dãmb sã n tigim taab n na n ges ned sã n zemsa ne zɩɩb tigingã pʋgẽ, b pʋʋsdame n kos Wẽnnaam vʋʋsem sõngã sõngre. B sã n wa wilgdẽ tɩ saam-biig zemsa ne zɩɩbo, b tikda bũmb ning b sẽn yeel Wẽnnaam Gomdã vʋʋsem sõng sẽn vẽneg tɩ b gʋlsã zugu. Sẽn paase, vʋʋsem sõngã sõngd-b lame tɩ b bãnge, ned ning b sẽn dat n yãkã sã n tũuda noy Gʋlsg Sõamyã sẽn wilgã. Neb nins sẽn wilgd tɩ ned zemsa ne zɩɩbã pa segd n tik a soabã sẽn yaa to-to, a sẽn karem n ta zĩig ningã, bɩ a sẽn tõe n maan bũmb ninsã zug ye. Sẽn segd n pak-b n yɩɩg yaa b ges a soabã sã n yaa ned sẽn tar tẽebo. La b ges tigingã neb sã n tõe n pẽneg-a-la nana-nana n kos sagls tẽebã wɛɛngẽ.
14. Yaa bõe la Tʋʋma 6:1-3 zãmsd tõndo?
14 Kẽem dãmbã sul naagda bab-sak sull yel-gɛtã n wilg tɩ saam-biis zemsa ne yɩ kẽem dãmb la ministɛɛrã sõgen dãmba. La yãkrã meng-mengã maanda wala yʋʋm kob-yendẽ tigingã sẽn maan to-to wã. Vugri, b ra rata rap sẽn tar tõog tẽebã wɛɛngẽ sẽn na yɩl n ges tʋʋm-kãseng yelle. Siglgã zug Sull kõo noor woto: “Bɩ y bao rap a yopoe yãmb sʋka sẽn tar kaset sõama la sẽn pid ne Sɩɩg Sõngo la yam tɩ tõnd ning yell kãng bãmb zutu.” (Tʋʋma 6:1-3) Yaa sɩd tɩ yaa rap nins sẽn da be beenẽ wã n wilg tɩ rap kẽer zemsa ne yãkr zɩɩb kãng yĩnga. La ra yaa rap nins sẽn da tar taoor-sobend n be Zerizalɛmã n yãke. Yaa woto me la b maand rũndã-rũndã.
15. B sã n wa yãkd rap n na n bobl zɩɩbo, wãn to la Siglgã zug Sull kẽesd a toogo?
15 Ya a Zeova Kaset rãmbã Siglg zug Sull a toor n yãkd sẽn get-b tʋʋmdã yell tẽnsã fãa pʋsẽ wã. Siglgã zug Sull sã n wa rɩkd sard n na n gese ãnd n tõe n tʋk zɩɩb sẽn yaa kãseng a woto, a ningda a Zezi gom-kãngã a yamẽ: “Ned ninga b sẽn kõ wʋsgo, b na n soka yẽnda ne bũmb wʋsgo, la b sẽn kõ a soab wʋsgo, b na n soka yẽ wʋsgo n yɩɩda.” (Luk 12:48) Neb nins sẽn get tʋʋmdã yell tẽngã pʋgẽ wã yãkr toor sẽn ka be, Siglgã zug Sull yãkda Betɛll kẽem dãmb la so-toak yel-gɛtba. Baasg zãnga, b kõta saam-biis b sẽn tar bas-yard ne sor tɩ b tʋm b yʋʋr yĩnga, n yãk rap kẽere. Tikr n be Gʋlsg Sõamyã pʋgẽ n kõt sor ne rẽ maanego.
‘Yãk kãsem dãmb wa mam sẽn yeel foomã’
16. A Poll basa a Tɩt Kɛrɛt t’a maan bõe, la bõe la rẽ wilgd neb yãkr tigingã pʋgẽ wɛɛngẽ rũndã-rũndã?
16 A Poll yeela a tʋmd-n-taag a Tɩt woto: “Mam basa foo Kɛrɛt tɩ f maneg yɛla fãa sẽn keta wa mam sẽn da yeel fooma, la f yãk kãsem dãmb tẽng-tẽnga.” (Tɩt 1:5) Woto, a Poll wilga zʋg-sõma nins a Tɩt sẽn da segd n bao rap nins sẽn da zems ne yãkrã nengẽ. La rũndã-rũndã, Siglgã zug Sull yãkda saam-biis nins sẽn get tʋʋmdã yell tẽngã pʋgẽ wã tɩ b tʋm a yʋʋr yĩng n yãk kẽem dãmb la ministɛɛrã sõgen dãmba. B kɩta sɩd tɩ neb nins sẽn tʋmd Siglgã zug Sull yʋʋr yĩngã mii Gʋlsg Sõamyã noy nins b sẽn tikd n maand yãkrã sõma, la b nã n sɩd tũu rẽ. Woto, yaa Siglgã zug Sull sor-wilgr pʋgẽ la b yãkd rap nins sẽn tar tõogã. B yãkd-b lame tɩ b sõgen a Zeova Kaset rãmbã tigims sẽn be dũniyã gill zugã pʋsẽ.
17. Wãn to la Sosiete wã biru get yel-gɛtbã la ministɛɛrã sõgen dãmb yãkr yelle?
17 B sã n ges tɩ saam-biis zemsa ne yɩ yel-gɛtb la ministɛɛrã sõgen dãmba, b gʋlsda lɛtr n taas Sosiete Wats Tawa biru wã. Rap sẽn tar minimã sẽn be be wã baooda Wẽnnaam vʋʋsem sõngã sor-wilgr n yãk-ba. Ra-kãensã miime tɩ b na n kolgame n togs Wẽnnaam taoore. B miime tɩ b pa segd n yãg n tik b nus ned zug n yãk-a, n wa lagem ne-a a yel-wẽna pʋgẽ ye.—1 Tɩmote 5:22.
18, 19. a) Wãn to la b wilgd yãkr kẽere? b) Wãn to la b wilgd tɩ ned zemsa ne yãkre, la wãn to la b maand yãkrã?
18 B tũnugda ne lɛtr sẽn tar tãmpõ Sosiete wã sẽn toole, n wilg yãkr kẽere. B tõe n tũnuga ne lɛt-kãens buud n yãk saam-biis tɩ b yɩ kẽem dãmb bɩ ministɛɛrã sõgen dãmba.
19 Yãkrã b sẽn maand tigingã pʋgẽ wã tũuda ne Wẽnnaam a Zeova sor-wilgri. A Zeova tũnugda ne a Biriblã la a tẽng zug siglgã sẽn yaa “kɩs-sɩd la gũusd yambã” la a Siglgã zug Sullã. (Matɩe 24:45-47, NW ) Yaa vʋʋsem sõngã n wilgd yãkrã sẽn tog n maan to-to wã. Yaa woto, bala, bũmb nins b sẽn baood tɩ b maana bee Wẽnnaam Gomdã pʋgẽ. La sẽn paase, Gom-kãng yaa vʋʋsem sõngã n vẽneg tɩ b gʋlse, la ned ning b sẽn yãkdã wilgdame t’a womda vʋʋsem sõngã biisi. Woto yĩnga, b getame tɩ yaa vʋʋsem sõngã n yãkd a soabã. Rũndã-rũndã, b yãkda yel-gɛtbã la ministɛɛrã sõgen dãmb wa b sẽn da yãkd-b tɩ zems ne Wẽnnaam sor-wilgr yʋʋm kob-yendẽ wã.
D tara mi-beoog ne a Zeova, a sor-wilgrã yĩnga
20. Bõe yĩng tɩ d tagsd wa a Davɩɩde, a sẽn wa n gʋls Yɩɩl Sõamyã 133:1 wã?
20 Masã wakatã yaa tẽeb bark sasa. A leb n yaa sasa ning Wẽnnaam sor-wilgrã sẽn wat ne fɩɩgr Rĩungã mooneg tʋʋmd pʋgẽ. D tara mi-beoogo, sẽn ya a Zeova n dengd n yãk yel-gɛtbã la ministɛɛrã sõgen dãmbã. Yɛlã maandame tɩ zems ne Gʋlsg Sõamyã. Rẽ sõngdame tɩ tõnd sẽn ya a Zeova Kaset rãmbã ket n tũud Wẽnnaam no-tɩrsã sẽn yaa sõma wʋsgã. Sẽn paase, ra-kãensã sẽn tar Kirist tagsgã la b tʋmd wʋsgã kɩtame t’a Zeova sõgen dãmbã tar laafɩ la zems-n-taar hal sõma. Woto kɩtdame tɩ d yeel wa yɩɩl gʋlsd a Davɩɩde: “Gese, ned ne a ba-biis sã n zĩ ne taaba yaa neere, a yaa noogo.”—Yɩɩl Sõamyã 133:1.
21. Wãn to la Ezai 60:17 paamd pidsg rũndã-rũndã?
21 Ad d sɩd tar mi-beoog ne a Zeova, a sẽn tũnugd ne a Gomdã la vʋʋsem sõngã n kõt sor-wilgrã! Sɩda, goam nins sẽn be Ezai 60:17 pʋgẽ wã tara pãnga: “Mam na n waa ne sãnem t’a reeg zũud zĩiga la m wa ne wanzũri n kɩt t’a reeg kut zĩiga tɩ zũud reeg raad zĩiga tɩ kut me reeg kug zĩiga. Mam na n kɩtame tɩ laafɩ soog foom tɩ tɩrlem lebg fo tʋʋm soaadba.” Bilf-bilfu, a Zeova Kaset rãmbã tũu Wẽnnaam sor-wilgrã yɛlã maaneg pʋgẽ n paase. Yaa rẽ la sẽn kɩt tɩ d tar bark woto Wẽnnaam tẽng zug siglgã fãa pʋgẽ wã.
22. Bõe yĩng tɩ d tar mi-beoogo, la d segd n dɩka sard kãn-kãe n maan bõe?
22 D tara mi-beoog wʋsgo, b sẽn maand yɛlã tõnd sʋk tɩ zems ne Wẽnnaam sor-wilgrã. Sẽn paase, d tara naneb wʋsg ne tʋʋm-toog sẽn be yamleoog ning yel-gɛtbã la ministɛɛrã sõgen dãmb b sẽn yãk tɩ zems ne Wẽnnaam sor-wilgrã sẽn maandã. D pẽgda d saasẽ Ba sẽn tar nonglmã ne d sũy fãa. Sɩda, a ning-d-la bark wʋsg tẽebã wɛɛngẽ. (Yelbũna 10:22) Woto yĩnga, bɩ d rɩk sard kãn-kãe n ket n kẽnd ne a Zeova siglgã. Sẽn yɩɩd fãa, bɩ d ket n naagd taab n sõgend zems-n-taar pʋgẽ, tɩ yɩ waoogre, pẽgre, la a ziir n kõ a Zeova yʋ-kãsengã sẽn yaa sõngã.
Y na n leokẽ lame tɩ bõe?
• Bõe yĩng tɩ d tõe n yeel tɩ yaa ne Wẽnnaam sor-wilgr la b yãkd yel-gɛtbã la ministɛɛrã sõgen dãmba, la pa nin-buiidã n yãkd-ba?
• Wãn to la vʋʋsem sõngã yãkd kiris-neb nins sẽn tar tõogã?
• Wãn to la Siglgã zug Sull kẽesd a toog yel-gɛtbã la ministɛɛrã sõgen dãmb yãkr pʋgẽ?
• Bõe yĩng tɩ d segd n tall mi-beoog ne a Zeova, yãkrã sẽn maand tɩ zemsd ne a sor-wilgrã?
[Foto rãmba, seb-neng a 9]
Yaa Wẽnnaam sor-wilgr pʋgẽ la b yãkd kẽem dãmbã la ministɛɛrã sõgen dãmba