Bõe la Wẽnnaam zoe n maane?

Y sã n bao n bãng ned sẽn zoe n maan bũmb ninsã, la a sẽn tõog n mao ne zu-loees ninsã, sõngd-y lame tɩ y bãng-a sõma. Woto me, y sã n dat n bãng Wẽnnaam sõma, y segd n bao n bãnga a sẽn zoe n maanã. Rẽ, y na n yãame tɩ bũmb nins a Zeova sẽn zoe n maanã nafda yãmb rũndã-rũndã, la na n naf-y-la beoog-daar me.

WẼNNAAM NAANA BŨMB FÃA TÕND NEER YĨNGA

A Zeova la Naandã. Biiblã yetame yaa: “Hal dũniyã naaneg tɛka, ninsaal tõe n bãngame tɩ Wẽnnaam yaa pãng sẽn ka sɛt soaba, la tɩ b sɩd yaa Wẽnnaam, rẽ sẽn yaa vẽeneg bõn-naandsã sʋkã yĩnga.” (Rom dãmbã 1:20, MN) Biiblã leb n yetame yaa: ‘Sẽn-Ka-Saab naana tẽngã ne b meng pãnga. Bãmb yamã kɩtame tɩ dũniyã beẽ, la b yɛdga sa-gãongã ne b bãngrã.’ (Zeremi 10:12) Wẽnnaam sẽn naan bũmb fãa sõma woto wã, wilgdame t’a rata d neere.

Tags-y-yã a Zeova sẽn naan ninsaalbã to-to wã. A naan-b lame ‘n wẽneg a menga.’ (Sɩngre 1:27) Woto rat n yeelame tɩ d tõe n dɩka a togs-n-taar yɛl kẽer pʋgẽ. A kõ-d-la tõog tɩ d tõe n bao n bãng-a, rat n yeel tɩ d bãng a tagsg sẽn yaa a soaba, la a noyã. D sã n tũud a noyã d vɩɩmã pʋgẽ, d na n paama sũ-noogo, tɩ d vɩɩmã me tall võore. Sẽn yɩɩd fãa, d tõe n wa paama a zoodo.

Bũmb nins fãa a Zeova sẽn naanã wilgda a tagsg sẽn yaa a soab ninsaalbã wɛɛngẽ. Tʋm-tʋmd a Poll yeelame yaa: ‘Wẽnnaam maana kaset n wilg tɩ bãmb beeme. Bãmb maana neere, n kõ yãmb saag t’a niid tɩ sẽoog ne bõn-bɩʋʋng beẽ, tɩ rɩɩb sekd yãmb n pids y sũyã ne sũ-noogo.’ (Tʋʋma 14:17) Wẽnnaam kõo tõnd tɩ yɩɩd bũmb nins sẽn yaa tɩlɛ ne d vɩɩmã. A naana bũmb wʋsgo, sẽn yaa toor-toor me, tɩ paasd vɩɩmã noom. La Wẽnnaam sẽn dat n wa maan n kõ ninsaalbã yɩɩda woto.

A Zeova naana tẽngã tɩ ninsaalbã tõe n zĩnd a zug wakat sẽn kõn sa. Biiblã yetame: ‘Wẽnnaam rɩka tẽngã n kõ ninsaalbã.’ B paasame t’a ‘ka naan-a t’a yaa zaalem ye. A naan-a lame tɩ neb tõe n zĩnd a pʋgẽ.’ (Yɩɩn-sõamyã 115:16; Ezayi 45:18) Ãnd rãmb n na n zĩnd a pʋgẽ? La na n kaoosa wakat a wãna? Ad Biiblã sẽn yete: “Nin-tɩrsã na n sooga tẽngã, la b na n paa beenẽ wakat sẽn kõn sa.”—Yɩɩn-sõamyã 37:29.

A Zeova naana d yaab a Ãdem ne a Awa tẽngã zugu, n ning-b zĩ-neerẽ, tɩ b ‘ko-a la b ges a yelle.’ (Sɩngre 2:8, 15) Wẽnnaam kõ-b-la tʋʋm-kãseng sẽn da na n kõ-b sũ-noogo. A yeel-b lame yaa: “Rog-y kamb n fɩɩg n pid dũniyã, la y soog-a.” (Sɩngre 1:28) Dẽnd b ra tõe n paam n vɩɩmda wakat sẽn kõn sa tẽngã zugu. Bʋko, b yãka yam n kɩɩs Wẽnnaam. Rẽ kɩtame tɩ b ra pa le tõe n paam n naag “nin-tɩrsã” sẽn ‘na n soog tẽngã’ ye. La d na n wa yãame tɩ b yel-manesmã pa kɩt t’a Zeova toeem a raabã ninsaalbã la tẽngã wɛɛngẽ ye. La nananda, d gom bũmb a to me a Zeova sẽn zoe n maan yelle.

WẼNNAAM KÕO TÕND A GOMDÃ

Biiblã yaa Wẽnnaam Gomde. Bõe yĩng t’a Zeova kõ-d Biiblã? Pipi, yaa sẽn na yɩl tɩ d tõog n bãng-a. (Yel-bũnã 2:1-5) Yaa sɩd tɩ Biiblã pa leokd sogsg nins fãa d sẽn sokd d meng Wẽnnaam zugã ye. La sebr pʋd n kae n tõe n maan dẽ ye. (Koɛɛg soaba 3:11) Bũmb nins fãa b sẽn gʋls Biiblã pʋgẽ wã sõngda tõnd tɩ d bãng Wẽnnaam. A manesem sẽn yɩ to-to ne nebã sõngda tõnd tɩ d bãng a sẽn yaa Wẽnnaam ning buudã, neb nins buud a sẽn nong la a sẽn pa nonge. (Yɩɩn-sõamyã 15:1-5) D bãngda a sẽn dat tɩ d tũ-a to-to, sẽn yaa sõma la sẽn pa sõma, la a tagsg sẽn yaa a soab arzɛkã baoob wɛɛngẽ. Biiblã pʋgẽ, b sẽn wilg a Zeezi sẽn zãms nebã bũmb ninsã, la a manesem sẽn yɩ to-to wã sõngdame tɩ d tõe n bãng a Zeova sẽn yaa Wẽnnaam ning buudã sõma n yɩɩda.—Zã 14:9.

A Zeova leb n kõo tõnd a Gomdã sẽn yaa Biiblã, sẽn na yɩl n sõng-d tɩ d bãng d sẽn tõe n maan to-to tɩ d vɩɩmã tall võore, la d paam sũ-noogo. Ne Biiblã maasem, a wilgda d sẽn tõe n maan to-to n paam sũ-noog d zakã pʋgẽ, d sẽn tõe n maand sũ-noog ne bũmb nins d sẽn tarã, la d sẽn tõe n mao ne d zu-loeesã to-to. Seb-kãngã pʋgẽ, b na n wa wilgame tɩ Biiblã sõngda tõnd tɩ d paam d sogsg kẽer leoore. Makre, bõe yĩng tɩ ninsaalbã namsd wʋsgo? Bõe n wat beoog-daare? Sẽn paase, d na n bãnga bũmb ning Wẽnnaam sẽn maane, sẽn na yɩl n pids a sẽn da sɩng n datã.

Bũmb wʋsg me n wilgd tɩ Biiblã sɩd yaa sebr sẽn pa wõnd a taaba, Wẽnnaam meng sẽn kɩt tɩ b gʋlse. Yaa sẽn yɩɩd yʋʋm 1 600 la b rɩk n gʋls Biiblã. Yaa sẽn zems neb 40 n gʋls-a. La sɛbã fãa gom-zu-raoog yaa a yembre, bala yaa Wẽnnaam n kɩt tɩ b gʋls-a. (2 Tɩmote 3:16) Biiblã yaa toor fasɩ ne pĩnd sɛb-kʋdã, bala hal n tãag masã, Wẽnnaam kogl-a lame. B sẽn gʋls bũmb nins a pʋgẽ wã zemsa ne pĩnd Biibl-dãmbã b sẽn gʋls ne nugã. Sẽn paase, neb n bao n na n gɩdg Biiblã lebgr buud-goam a taab pʋsẽ, a pʋɩɩbo, la a karengo. La baa ne rẽ, Biiblã ket n bee hal ne rũndã. Rũndã-rũndã, sebr kae b sẽn lebg la b yiis tɩ ta Biiblã ye. Biiblã sẽn ket n be hal ne rũndã wã yaa kaset tɩ tõnd “Wẽnnaamã gomd paada wakat fãa.”—Ezayi 40:8.

WẼNNAAM NA N PIDSA A RAABÃ

Bũmb a to me la Wẽnnaam maan tɩ yaa kãsenga, tɩ wilgdẽ t’a sẽn pʋlem ninsaalbã bũmb ningã na n pidsame. Wa d sẽn zoe n yãa wã, Wẽnnaam raabã yaa tɩ ninsaalbã vɩɩmd tẽngã zug wakat sẽn kõn sa. La a Ãdem sẽn yãk yam n kɩɩs Wẽnnaam n maan yel-wẽndã, yẽ ne a kambã la a yagensã ra pa tõe n le paam n vɩɩmd wakat sẽn kõn sa ye. Biiblã yetame yaa: “Yaa woto yĩnga, a wa yel-wẽna sẽn wa dũni ned a yembr maasem yĩngã, tɩ yel-wẽnã wa ne kũum, tɩ nebã fãa kiidẽ, b fãa sẽn maan yel-wẽnã yĩngã.” (Rom dãmbã 5:12) A Ãdem kɩɩsgã yĩngã, wõnda Wẽnnaam raabã ra pa na le tõog n pids ye. Bõe la a Zeova maan-yã?

A Zeova sẽn maandã fãa zemsa ne a sẽn yaa Wẽnnaam ning buudã. A sẽn yaa tɩrgã yĩnga, a ninga a Ãdem ne a Awa taale. La a nonglmã yĩnga, a maana bũmb sẽn na n wa naf b yagensã. A Zeova yamã sẽn yaa kãsengã yĩnga, a gesa a sẽn na n welg yellã to-to. Zĩig pʋgẽ, a togsa yellã tɩɩm. (Sɩngre 3:15) Yaa Wẽnnaam Bi-ribl a Zeezi Kirist maasem yĩng la ninsaalbã na n wa paam b mens ne yel-wẽnã la kũumã. Woto rat n yeelame tɩ bõe?

Sẽn na yɩl n fãag Ãdem-biisã, a Zeova tʋma a Zeezi tẽngã zugu, t’a wa zãms nebã b sẽn tõe n maan n paam vɩɩm sẽn kõn sa, la a ‘kõ a vɩɩmã, n yao n fãag neb wʋsgo.’a (Matye 20:28; Zã 14:6) A Zeezi ra tõe n kõo a vɩɩmã tɩ yɩ maoongo, bala a ra zemsa zãng wa a Ãdem. La a Zeezi pa maan wa a Ãdem ye. A kell n saka Wẽnnaam hal n tãag kũum menga. A Zeezi sẽn da pa segd ne kũumã yĩngã, a Zeova vʋʋg-a lame t’a leb saasẽ. A Zeezi maana bũmb a Ãdem sẽn pa tõog n maane. A paka sor tɩ wẽn-sakdbã tõe n wa paam vɩɩm sẽn kõn sa. Biiblã yetame yaa: “Sɩd me, a wa ned a yembr tãa kɩɩsg yĩng sẽn kɩt tɩ neb wʋsg lebg yel-wẽn maandba, woto me, ned a yembr tãa sakr yĩnga, b na n kɩtame tɩ neb wʋsg lebg tɩrse.” (Rom dãmbã 5:19) Ne a Zeezi maoongã maasem, Wẽnnaam na n pidsa a raabã. Ninsaalbã na n wa tõog n vɩɩmda wakat sẽn kõn sa tẽngã zugã.

A Zeova sẽn maan to-to n na n welg yell ning a Ãdem kɩɩsgã sẽn wa ne wã kɩtame tɩ d bãng bũmb wʋsg a zugu. D neeme tɩ baa fʋɩ pa tõe n gɩdg a Zeova t’a pa baas a sẽn sɩng fãa ye. A gomdã na n pidsa kɛpɩ. (Ezayi 55:11) D bãngame me t’a Zeova nonga tõnd hal wʋsgo. Biiblã yetame: “Ad Wẽnnaam sẽn puk b nonglmã to-to tõnd yĩnga: Bãmb tʋma b Bi-ribl yendã dũniyã pʋgẽ tɩ tõnd tõe n paam vɩɩm bãmb maasem yĩnga. Nonglem-kãng ka tõnd sẽn nong Wẽnnaam yĩng ye, yaa bãmb sẽn nong tõndo, n tʋm b Bi-riblã tɩ b yɩ maoong tõnd yel-wẽnã sugr kũun yĩnga.”—1 Zã 4:9, 10.

Wẽnnaam ‘sẽn pa bas b meng Biigã, la b sẽn dɩk-b n kõ tõnd fãa yĩngã,’ dẽnd d tõe n kɩsa sɩd tɩ wa a sẽn pʋlmã, a na n ‘kõo tõnd bũmb a taabã fãa me ne yamleoogo.’ (Rom dãmbã 8:32) Wẽnnaam pʋlmame t’a na n maana bõe n kõ tõndo? Karm-y sõsg ning sẽn pʋgdã tɩ y na bãnge.