D kõ d mens ne yamleoog tʋʋm sõng fãa yĩnga
1 Dũniyã sebr a yembr goma a Zeova Kaset rãmbã yelle, n yeel woto: “Yɩta toog tɩ d yã tũudum neb a taab sẽn tʋmd wʋsg b tũudmã pʋgẽ wala a Zeova Kaset rãmbã.” Bõe yĩng t’a Zeova Kaset rãmbã sakd n tʋmd wʋsg woto?
2 Bũmb a yembr sẽn kɩt tɩ b yaa woto yaa b sẽn tʋmd ne yãgbã yĩngã. A Zezi ra sak n deegame tɩ sẽk ning sẽn da ket-a t’a na n baas a tʋʋmdã tẽngã zugã paoodame. (Zã 9:4) Rũndã-rũndã Wẽnnaam Biriblã sẽn paam ziirã sẽn dɩt naam a bɛɛbã sʋkã wakatã, a Zeova nin-buiidã yãame tɩ sẽk ning b sẽn tar n na n baas b tʋʋmdã paoodame. Rẽ n so tɩ b kõt b mens ne yamleoog baleng tʋʋmdã yĩngã. (Yɩɩl 110:1-3) B rata tʋm-tʋmdb n paas tɩ b maan tigisgã tʋʋmde, dẽ modgr ning b sẽn maand tʋʋmdã pʋgẽ wã ka be saab ye. (Mat. 9:37, 38) Woto yĩnga, b modgdame n na n maan togs-n-taar ne a Zezi, sẽn kõ mak-sõng n yɩ sakd la a modg sõma a tʋʋmdã pʋgẽ wã.—Zã 5:17.
3 Bũmb a to sẽn kɩt t’a Zeova Kaset rãmbã tʋmd ne b sɩɩg fãa wala a Zeova yĩngã yaa b dũni gill siglgã sẽn yaa toor ne tũudum a taaba fãa wã. Dũniyã tũudum sigls ka nong n baood tɩ b neba rɩk sẽk la b maan modgr wʋsg tũudmã pʋgẽ ye. Bũmb nins b sẽn tẽedã pa tar pãn-tusdg b daar fãa vɩɩmã, b manesmã ne b taabã, bɩ b sẽn tʋmd tʋʋm nins b vɩɩmã pʋgẽ wã zug wʋsgo, bɩ pʋd n ka be meng ye. B sẽn ka tar tẽeb hakɩk pãng sẽn tusd-b tɩ b tʋmã yĩngã, b pẽdgdame tɩ b pe-kɩɩmbã ‘togs-b no-noom goama,’ n kõ-b bas-m-yam tɩ modgr ning b sẽn maand yaal-yaal balã sekame. (Ezai 30:10) B tũudmã taoor dãmb sakame n na n “togs koɛɛg sẽn noom bãmba bala,” n ning b yamẽ wã yam-kaalg la tẽeb kʋɩɩngo.—2 Tɩm. 4:3.
4 Ad a Zeova Kaset rãmbã manesem sɩd yaa lebend ne rẽ! Bũmb ning fãa sẽn tɩ loee ne tõnd balengã baoodame tɩ d modge, tɩ d mao sõma, la d tʋme. Tõnd tũuda bũmb nins tõnd sẽn tẽedã daar fãa la bũmb ning fãa d sẽn maandã pʋgẽ. Baa sɩdã sẽn kõt tõnd sũ-noog wʋsgã, d segd n ‘maoo wʋsg’ n tõog n pids bũmb ning a sẽn baood tɩ d maanã. (Mak-y ne 1 Tes. 2:2, NW.) Daar fãa noorã rɩɩb baoob rɩkda neb wʋsg sẽn yɩɩd sẽkã fãa. Ne rẽ fãa tõnd ka basd tɩ yel-kãens gɩdg tõnd tɩ d pa ning Rĩungã yɛl pipi zĩigẽ ye.—Mat. 6:33.
5 Tʋʋmd ning d sẽn tar n na n maan a Zeova balengã pʋgẽ wã bee nafr la a yaa yãgb yell wʋsg hal tɩ rẽ tusd tõnd tɩ d ‘baood sẽk’ tʋʋm a taab pʋsẽ, n maand tẽebã yɛla. (Ef. 5:16, NW) D sẽn mi tɩ d wẽn-zoeerã la sakr yamã nooma a Zeova wã, rẽ tusda tõnd sõmb-sõmb tɩ d ket n tʋmd wʋsgo. Bark nins d sẽn paamd masã wã, la vɩɩmã d sẽn saagd n na n wa paam beoog daarã yĩng kɩtame tɩ d yãk yam n na n ket n ‘tʋmdẽ la d maood’ Rĩungã yɛl yĩnga.—1 Tɩm. 4:10.
6 Sakrã la modgr ne mong-m-meng yamã: Rũndã-rũndã neb wʋsg lʋɩɩsda laogã yɛl bũmb a taabã fãa taoore. B tagsdame tɩ b tara bʋʋm n na n tik b yamã bũmb ning b sẽn na n dɩ, n yũ, la b yeelgã zugu. (Mat. 6:31) Bũmb nins sẽn yaa tɩlae ne vɩɩmã ka sek-b ye, b sũurã tusd-b lame tɩ b rat n noog b yõor ne vɩɩm sẽn tar nuura tɩ pid masã, n ‘tar paoong wʋsg sẽn bĩng sẽn sek yʋʋm wʋsgo, rẽ tɩ b tõe n vʋʋse n dɩ la b yũ, la b maan sũ-noogo.’ (Luk 12:19) Egiliizẽ kẽndb wʋsg sẽn yɩɩd tagsdame tɩ b tũudmã sã n baood tɩ b maan modgr wʋsgo, yaa gɩdgr ne bãmb mensã sẽn tar sor n na n maanã. B getame tɩ arzɛg-baoond basg bɩ a boogr menga, bɩ bũmb sẽn noom-f basg yaa yooko. Neb a woto sẽn tagsd b mens yell balã, b getame tɩ modgr la mong-m-meng yam tallg ka tõeyã, bɩ ka zems ye.
7 Tõnd ka get yɛlã woto ye. Wẽnnaam Gomdã paasa tõnd tagsgã sõmblem, tɩ rẽ kɩt tɩ tõnd tagsd Wẽnnaam tagsa la pa ninsaalb rẽnd ye. (Ezai 55:8, 9) Tõnd bõn-datɩ wã vɩɩmã pʋgẽ sõmblem yɩɩda nug-tʋʋm pʋgbo. Yell sẽn yaa kãseng n yɩɩd ãndũniyã tõr pʋgẽ ya a Zeova naam sẽn ka to wã zemsg wilgr la a yʋʋrã sõmsgo. Yel-kãensã yõod yaa kãseng wʋsg hal tɩ makr pʋgẽ, bɩ a get “buuda fãa wa zaalem” a taoore. (Ezai 40:17) D sã n na n mak n vɩɩmd d vɩɩmã n ka tũ Wẽnnaam daabã, b tog n gesa rẽ wa yalemdo.—1 Kor. 3:19.
8 Woto, baa d sẽn dat laog la bõn-yood a taab n maand d Rĩungã tʋʋma, d ka get bõn-kãens wa ‘bũmb nins sẽn sɩd yaa sõma n yɩɩdã’ ye. (Fil. 1:10) D saka tagsg ning sẽn be 1 Tɩmote 6:8 pʋgẽ wã, n dɩkd sẽk sẽn zems laogã baoob yĩnga, la d modgd ne yam n tikd d sũyã ‘bũmb nins nin sẽn ka ne sẽn paad wakat sẽn ka sɛtã’ zutu.—2 Kor. 4:18.
9 Tõnd sã n tagsd wa Wẽnnaam n paasdẽ fãa, la d yɩɩrã laogã yɛl wɛɛngẽ sẽn boogda. Tõnd sã n ges bũmb ning a Zeova sẽn zoe n maan n kõ-dã, la bark kãsems nins a sẽn kãab tɩ na n pids beoog-daarã, d sakame n na n maan modgr la d tall mong-m-meng buud fãa a sẽn kot tõnd tɩ d maane. (Mark 10:29, 30) Tõnd teega yẽ n beẽ menga. A sã n da ka tallẽ nimbãan-zoeer la nonglem ne tõndo, d ra ka na n vɩɩmdẽ masã meng wɛ, tɩ b ka sʋkd beoog daare. D getame tɩ d segd n kõo d mense, bala bũmb ning fãa d sẽn maand a tʋʋmdã pʋgẽ yaa ‘d sẽn tog n maan bala.’ (Luk 17:10) D kɩta bũmb ning fãa b sẽn kos-d tɩ d lebs n kõ a Zeova wã ne sũ-noogo, n miẽ tɩ d na n “wʋka wʋsgo.”—2 Kor. 9:6, 7.
10 D rata tʋm-tʋmdb sẽn na n kõ b mens ne yamleoog masã: Kiris-neb siglgã talla tʋʋm wʋsg a sɩngrẽ wã menga. B ra segd n kõo kaset sõma-sõma tɩ Zerizalɛm lʋɩɩsã yʋʋmd 70 T.W. nan ka ta ye. Wakat kãnga a Zezi karen-biisã “gesa koe-mooneg yell bala.” (Tʋʋ. 18:5) Fɩɩgrã sẽn maan tʋʋll-tʋʋllã yĩng kɩtame tɩ yɩ tɩlae tɩ b bao neb n zãms-b koe-moonegã la pe-kɩɩngã tʋʋmde, sẽn na yɩl tɩ bãmb me kõ b sõngre. B ra baooda rap sẽn tar minim n tõe n seg pãn-soaadbã, la neb sẽn tar tõog n tõe n ges teedã la rɩɩbã reesg la b pʋɩɩb yelle. (Tʋʋ. 6:1-6; Ef. 4:11) Baa bãmb b wãn sẽn da be taoor tɩ neba ne b tʋʋmdã, ka yɩ woto ne bãmb wʋsg sẽn yɩɩd ye. La b fãa “maoome,” n naag taab n tʋm ne b sũy fãa sẽn na yɩl n maan tʋʋmdã.—Luk 13:24.
11 Yʋʋm kob-gĩn nins sẽn pʋglã pʋgẽ, dũniyã gill zugu, pãng tʋʋm raab ka zĩnd wʋsg ye. La a Zezi sẽn wa n deeg naamã yʋʋmd 1914, b leb n sɩnga Rĩungã tʋʋmd sõma-sõma. Pipi wã, neb wʋsg ka bãng tɩ b ra na n wa rata tʋm-tʋmdb wʋsg woto tɩ b tʋm Rĩungã yĩnga, tɩ ra na n bao tɩ neb milyõ rãmb sẽn yit tẽns toɛy-toɛy dũniyã gill zug kẽes b mens ye.
12 Rũndã-rũndã, siglgã kẽesa a meng tʋʋm kãsems toɛy-toɛy pʋsẽ. Yɩɩ tɩlae tɩ d rɩk d sẽn tara fãa n kẽes tʋʋm kãens pʋsẽ. Rĩungã tʋʋmd ket n kẽngda taoor zĩig fãa. Wakatã sẽn yaa yãgb wakatã, tusda tõnd tɩ d modgdẽ la d tũnugd ne d sẽn tarã fãa n maand tʋʋm nins sẽn be wã. Zamaan wẽng kãngã saab sẽn kolgd wʋsg woto wã yĩngã, d gũudame tɩ ray nins sẽn watã tall tʋʋm wʋsg n yɩɩd menga. B kota a Zeova sõgen fãa sẽn dɩk a meng n kõ Wẽnnaam t’a kõ a meng ne yamleoog n maan tigisgã tʋʋmd sẽn yaa yãgb tʋʋmdã.
13 Bõe la b segd n maane? D tõe n sɩd yeelame tɩ ‘Zusoaba tara tʋʋm wʋsg’ tɩ d segd n maane. (1 Kor. 15:58) Mooneg zĩisẽ wʋsgo pʋtã pelgame, la tʋm-tʋmdbã sõor paoodame. B kota tõnd tɩ d kẽes d mense, n kõ kaset sẽn yaa sõma n yɩɩd d mengã mooneg zĩigẽ yembo, la sẽn paas me, n sak tʋʋm toog ning sẽn yaa tɩ tʋm zĩig ning raab sẽn yaẽ kãseng n yɩɩdã.
14 Yaa bũmb sẽn zems pẽgr tɩ d neẽ tɩ zĩis fãa dũniyã gill zugu, Kaset rãmb kõta b mens ne yamleoog n na n maan tʋʋm a taaba. Tʋʋm kãens tõe n yaa baleng zĩis meebo, tigis-kãsemsẽ tʋʋm maanego, sõngr kũun sabaab wẽng wakate, bɩ tigingã Rĩung Roog pɩɩsg wakat fãa. Rĩungã Roog pɩɩsg wɛɛngẽ, tigisg fãa poore, b segda wakat fãa n modg n bas Rĩung Roog t’a yaa yɩlemd la kɛpɩ. D sã n sak n maan tʋʋm b sẽn get tɩ yaa sik-m-meng tʋʋma, wilgdame tɩ d wʋmda a Zezi gom-kãensã sẽn be Luk 16:10 pʋgẽ wã võor sõma: “Ned ninga sẽn maand sɩd ne bũmb bilfu, a maanda sɩd ne bũmb kãseng me. La sẽn ka maand sɩd ne bũmb bilfu, a ka maand sɩd ne bũmb kãsems me ye.”
◼ D sõng n maan tigingã tʋʋma: Tiging fãa yaa siglgã tõr babg a yembr, n paamd sor-wilgr sẽn yit ‘tʋm-tʋmd sẽn tũud sɩd la sẽn tar yamã’ nengẽ. La yaa Rĩungã koe-moondb yembr-yembr n lagem taab n yaa tiginga. (Mat. 24:45) Tigingã sẽn tõe n maan bũmb ningã bee ne Kaset soab fãa sẽn sak n na n maan la a sẽn tõe n maane. Tigingã tʋʋmd sẽn tik zĩis nins n yɩɩd yaa koe-noogã mooneg a moonegã zĩigẽ, karen-bi-paals maanego, la a nebã kengr tẽebã wɛɛngẽ. Tõnd ned kam fãa tõe n sõng n maana tʋʋm kãngã. D leb n tõe n yãka bõn-datl d meng zãmsgã, kẽes-m-meng tigingã tigissẽ, la tigingã neb a taab sẽn be raab pʋgẽ wã sõngr wɛɛngẽ. Tʋʋm kãensã kõta tõnd soay wʋsg tɩ d tõe n tũnug ne n wilg tɩ d yaa sakdba.
◼ Taoor lʋɩɩs yel-gesgã tʋʋm pʋsẽ: A Zeova rɩka tiging fãa yel-gesg n bobl tigingã kãsem dãmbã b sẽn yãkã. (Tʋʋ. 20:28) Nin-kãensã modgame n tall zʋg-sõma nins sẽn segdã zu-no-kãngã yĩnga. (1 Tɩm. 3:1) Saam-biig fãa sẽn be tigingã pʋgẽ tõeeme n tall zʋg-sõma nins sẽn segdã n tʋk zɩɩb sẽn yaa kãsems n yɩɩda. Saam-biis wʋsg bɩta tẽebã wɛɛngẽ la b segd n ket n bɩta ne tigingã kãsem dãmb sor-wilgr la b sõngr maasem. Nin-kãensã segd n yɩɩ neb sẽn zãmsd Biiblã la tõnd sɛbã sõma. B tõe n wilgame tɩ b yaa sakdba, b sã n sakd kãsem dãmbã vʋʋsem sõngã sẽn yãkã, n maand togs-n-taar ne b tẽebã, la b bɩɩsd zʋg-sõma nins b sẽn baood yel-gɛtb nengẽ wã.—Heb. 13:7, 17.
◼ Wakat fãa tʋʋmdã pʋgẽ kõom: Tigingã pipi tʋʋmd yaa koe-noogã moonego. (Mat. 24:14) Ad yaa bark meng n kõ-do, tɩ d neẽ tɩ neb sẽn tar yẽesem modgd wʋsg n paasdẽ, n dɩkd so-pakrã tʋʋmde! Naoor wʋsgo, woto baoodame tɩ b rems yɛla b mensã vɩɩm pʋgẽ. Tõe n yaa tɩlae tɩ b maneg yɛl a taab n tõog n ket n maand koe-mooneg tʋʋm kãngã sẽn ka wõnd a taabã. La neb nins sẽn ka basd tʋʋm-kãngã yʋʋmd a yembr bɩ sẽn zems woto poore, b sẽn koms raood wakat bilf yĩnga, sɩd na n paama a Zeova bark wʋsgo. Kãsem dãmb sẽn tar nonglem la kiris-neb sẽn bɩ a taab tõe n sõnga so-pakdbã tɩ b tõoge, n kengd b pels ne b goam la b tʋʋma. Ad sɩd yaa yam sõng la kom-bɩɩsã wilgda, b sã n karem lekoll n sa n kell n dɩk so-pakrã tʋʋmde! Yaa woto me ne kãsemb nins sẽn dɩkd wakat fãa so-pakrã tʋʋmdã, b dũniyã pʋgẽ tʋʋmd sã n boog balã. Ad kiris-ned sẽn dɩk a meng n kõ sã n lagem n tʋm ne a Zeova sasa ning a sẽn maand tɩ tigisgã tʋʋmd kẽngd tao-tao wã, a sɩd na paam sũ-noogo!—Ezai 60:22.
◼ D sõng ne tigissã zĩis meeb la b zãabo: Rĩung Rot sẽn yaa sõma kobs n paas Tigis-kãsems Rot wʋsg la b me-yã. Yaa lingri, tɩ yaa tõnd saam-biisã la d saam-bi-pogsã n kõ b sẽk la b tʋʋm minim ne yamleoog n maan tʋʋmdã fãa la bala. (1 Kɩb. 28:21) Yamleoog tʋm-tʋmdb tusa maanda tʋʋm nins sẽn yaa tɩlae wã n manegd zĩ-kãensã tɩ b ket n yaa sõma. (2 Kɩb. 34:8) Sẽn mik tɩ tʋʋm kãngã yaa baleng tʋʋmdã neng a yembrã, b rãmb nins sẽn kõt b mens ne yamleoog n sõngdẽ wã pa kot tɩ b yao b tʋʋmdã, wa b sẽn pa kot tɩ b yao-b tɩ b moon zak-zakã, tɩ b kõ zãma sõss tigingã pʋgẽ wã, bɩ tɩ b sõng ne tigis-kãsengã tʋʋmã. Yamleoog tʋm-tʋmdb kãensã sakame n na n sõng n maan pãlã rãmb la b me baleng zĩis a Zeova pẽgr yĩnga. B saka ne sũ-noog n sõngd n manegd sɛb tẽngã laloa sẽn baood tɩ b maane, n get ligdã gɛɛla sɛba, n daad teedo, la b geend teed nins b sẽn datã ligdi. A Zeova sõgen dãmb kãensã sẽn tar kɩs-sɩdã ka baood tɩ b kõ-b ligd bɩ n paam laog nafa ne manesem buud bɩ a to tʋʋm nins b sẽn maandã yĩng ye, bala b rɩka b tõodã la b sẽn tarã fãa n kõ a Zeova. (Ges-y yʋʋmd 1992, wao-fugdg kiuug Rĩungã Tʋʋmde, seb-neng a 4, sull 10.) Tʋʋm kãngã baooda tʋm-tʋmdb sẽn modgd sõma n maand b tʋʋma ne b “sũyã fãa Zusoaba yĩnga.”—Kol. 3:23.
15 La bõe masã n kɩt t’a Zeova nin-buiidã sẽn yaa neb sẽn kõt-b mens ne yamleoogã ka tar mak-n-taare? Yaa b sẽn yaa kõatbã yĩnga. B sẽn kõtã ka tek ligd bɩ laog bal ye, b ‘dɩka b mens n kõ ne yamleoogo.’ (Yɩɩl 110:3) Tõnd rɩk-m-meng-n-kõ Wẽnnaamã võor meng-meng la woto. Tõnd paamda keoor ne manesem sẽn ka wõnd a taaba. D paamda ‘sũ-noog n yɩɩd’ la d ‘wʋkd wʋsgo,’ bala neb a taabã sẽn wilgd mi-beoog tõnd sẽn maandã yĩngã maanda woto n lebsd tõndo. (Tʋʋ. 20:35; 2 Kor. 9:6; Luk 6:38) Yaa tõnd saasẽ Ba wã la tõnd Sõmsoab sẽn yaa kãseng n yɩɩdã. A nonga “ned ninga sẽn kõt ne su-noogo.” (2 Kor. 9:7) A na n dola tõnd hal tɩ gale, ne bark sẽn ka na n tall saab ye. (Mal. 3:10; Rom 6:23) Rẽ yĩnga, b sã n kõ-y zu-nood a Zeova tʋʋmdã pʋgẽ y na n kõo y meng ne yamleoog la y leok wala a Ezai sẽn leok tɩ: “Ad maam, bɩ y tʋm maam[ã]” bɩ?—Ezai 6:8.