Gũusg Gasgã la Réveillez-vous ! wã yaa sɛb sẽn taasd sɩdã wakat fãa
[Adapted for Burkĩna Faso]
1. Bõe la pag a ye sẽn yit Afirik yeel periodik rãmbã zugu?
1 Pag a ye sẽn vɩ Fãrens sẽn nong n karemd periodik rãmbã gʋlsame n yeel woto: “Mam yita Afiriki, la mam pa karem n zãag ye. Mam sɩnga yãmb sɛbã kareng sẽn pa kaoose. Sõs nins sẽn be y sɛbã pʋsẽ wã nooma maam, b kɩtdame tɩ f bãng sɛbã kareng yõodo. Yãmb sɛbã maasem yĩnga mam goamã wʋgb sõmblem paasame. La kɩtame tɩ m tõe n gʋls lɛtr nana-nana masã. Y sɛbã pʋsẽ sõs nins sẽn gomd ninsaalbã, ãndũniyã la Naandã yellã bee yamleoog wʋsgo. Sõs-kãens yaa vẽeneg hal tɩ f pa rat n bas b kareng ye. Siglg kae n tõe n zãms nebã buud fãa wakat yɛng wala yãmb ye. Mam sẽn bãng tɩ yãmb sẽn maand woto fãa wã pa ligd baoob yĩng la tɩ yaa a Zeova yʋʋrã waoogr yĩngã, linga maam wʋsgo. Mam miime t’a Zeova sũur nooma ne-yã, la m pʋʋsd-y-la barka. Bɩ tõnd Naandã kell n sõng yãmb wakat fãa tɩ y tõogd n zãmsd nebã.”
2. Wãn to la y tõe n wilg tɩ y nonga Gũusg Gasgã la Réveillez-vous ! wã?
2 La yãmb yẽ? Rẽ yĩnga yãmb zoe n karma sõsg Gũusg Gasgã bɩ Réveillez-vous ! wã pʋgẽ t’a goamã kẽ yãmb bɩ? Sã n yaa woto, yaa vẽeneg tɩ y sũur yaa noog wʋsg ne seb-kãensã. Wãn to la y tõe n wilg tɩ y nonga seb-kãensa? Yaa y sẽn na n karemd sebr fãa y toore. Sẽn paase, y tõe n sõngame tɩ neb wʋsg paam seb-kãensã sẽn tar yõod wʋsgã. Wãn to la y tõe n maan dẽ?
3. Bõe la tigimsã tõe n maan n sõng tɩ neb wʋsg paam periodik rãmbã?
3 Tigimsã tõe n yãka daar takɩ n kãabd nebã periodik rãmbã: Yʋʋmd 1952 zĩ-likr kiuugã Informateurã sẽn lebg Rĩungã Tʋʋmd sebrã pʋgẽ, b yeela woto: “Sẽn na yɩl n tõog n kãab neb wʋsg periodik rãmbã, yaa f sẽn na n kẽed zak ne zak la butigsã pʋsẽ. Rẽ n so tɩ Sosiete wã yeel tɩ periodik rãmbã kãabg raar bɩ b maand woto.” Sagl-kãng ket n tara yõod rũndã-rũndã. Sã n yaa ne tigims wʋsgo, b na n yãka sibr daar n kãabd nebã periodik rãmbã. Bɩ tiging fãa yãk raar bɩ zaabr takɩ n kãabd nebã periodik rãmbã zak ne zaka, butigsã pʋsẽ, soayã noy, la b kẽnd n kõt neb nins sẽn nong n deegd periodik rãmbã. La bõe la koe-moond fãa tõe n maan n sõng tɩ neb wʋsg paam periodik rãmbã?
4. Bõe la d tõe n maan tɩ neb wʋsg paam Gũusg Gasgã la Réveillez-vous ! wã?
4 Tagsd-y Gũusg Gasgã la Réveillez-vous ! wã yell wakat fãa: D reng n karem periodik rãmbã n yaool n kãab-ba. Y sã n karem sõsg fãa bɩ y sok y meng woto: ‘Ãnd la sõs-kãngã tõe n sõnge?’ Tags-y y sẽn na n yeel bũmb ning n kɩt tɩ sõsgã kareng yamleoog kẽ nebã. Periodik rãmbã kãabg raar sẽn yãk a toogo, y tõe n zã-b lame n kãab nebã y sã n wa togd sore, y sã n wa debd raaga, y sã n wa sõsd ne y tʋmd-n-taase, y yagse, y karen-bi-taas wall y karen-saam dãmba.
5. Bõe yĩng tɩ yaa sõma tɩ d sã n wa kãabd nebã periodik rãmbã, bɩ d gomd koɛɛg-koɛɛg la takɩ?
5 Da gom-y wʋsg ye: Yʋʋmd 1956 yʋʋm-sar kiuugã pipi daar Gũusg Gasgã ne ãngilindã pʋgẽ, b yeela woto: “Y sã n wa kãabd nebã periodik rãmbã, yaa sõma tɩ y gom koɛɛg-koɛɛg la takɩ. Rẽ na n sõngame tɩ y tõog n kãab neb wʋsg periodik rãmbã. Rẽ poore yaa periodik rãmbã n na n sõng nebã tɩ b paam zãmsgo.” Koe-moondb kẽer yãame tɩ b sã n yãk goam a wãn sõsg a ye pʋgẽ n tũnug ne rẽ, b tõogd n kãaba neb wʋsg periodik rãmbã.
6. Bõe n wilgd tɩ yaa sõma tɩ d modg tɩ periodik rãmbã tat nebã zagsẽ?
6 Ned sã n deeg periodik rãmbã, pa nin-kãng bal la na n sõng ye. Tõe n sõnga neb a taab me. Irlãnde, inivɛrsite karen-biig karma yʋʋmd 1991 bõn-bɩʋʋng kiuugã pipi daar Gũusg Gasgã a ba wã sẽn deeg a Zeova Kaset soab nengẽ. A sẽn yã sõs nins sẽn gomd yẽs ne taabã, la yɛl a taab yellã, a sũur yɩɩ noog t’a rat n karem-ba. A sẽn karem sebrã n sa, a gẽesa a Zeova Kaset rãmbã nimero n bool-b ne telefõnne. Tao-tao bala, a sɩnga Biiblã zãmsgo, la a reega lisg yʋʋmd 1993 sẽoog kiuugã tigis-kãseng ning gom zug sẽn yɩ “Wẽnnaam zãmsgã” sasa. Sẽn yaa a soab fãa, bɩ d modg tɩ periodik rãmbã tat nebã zagsẽ, tɩ periodik rãmbã na n yõdg n sõnga nin-kãensã. Yel-gɛt sẽn kaagd tigimsã yeela woto periodik rãmbã kãabg wɛɛngẽ: “Yiis-y periodik rãmbã y korgẽ wã n zãada.” Baa y sẽn yet bũmb ningã sã n pa kɩt tɩ nebã reeg periodik rãmbã, fot rãmbã sẽn be b zugã tõe n kɩtame tɩ b reeg-ba.
7. Bõe la d tõe n maan n sõng tɩ neb buud toor-toor paam periodik rãmbã n karem?
7 Toeemd-y y goamã wakat ninga: (Ges-y 1 Korẽnt dãmb 9:19-23.) Segl-y bũmb koɛɛg-koɛɛg y sẽn na n yeel n kãab nebã periodik rãmbã. Bao-y n bãng-y sõsg takɩ sẽn na n yɩ rapã noogo, la sẽn na n yɩ pagbã me noogo. Sã n yaa ne kom-biisã, y tõe n wilg-b la sõsg ning gom-zug sẽn yaa “ Les jeunes s’interrogent . . . . ” Y sã n wa kãabd nebã periodik rãmbã, bɩ y bao n bãng wakat ning y sẽn tõe n yã neb wʋsgo. Periodik rãmbã kãabg daar sẽn yãk a toogo, y sã n yãk zaabr ning n na n kãabd nebã periodik rãmbã zak ne zaka, tõe tɩ y paam neb wʋsgo.
8. Bõe la y tõe n maan n tõog n kõ neb wʋsg periodik rãmbã kiuug fãa?
8 Yãk-y periodik sõor takɩ y sẽn dat n kõ nebã: Yʋʋmd 1984 tʋʋlg kiuugã Rĩungã Tʋʋmd seb-paasdmã pʋgẽ, sõsg ning gom-zug sẽn yaa: “Periodik rãmbã sõngda nebã tɩ b bãngd vɩɩmã sorã” wilgame tɩ “koe-moond fãa tõe n ninga a yamẽ tɩ kiuug fãa a na n kõo nebã periodik rãmb 10. Wakat fãa so-pakd fãa me tõe n ninga a yamẽ t’a na n kõo bãmb 90 kiuug fãa. La yaa vẽeneg tɩ koe-moondb kẽer na n tõog n kõo sẽn yɩɩd bãmb 10 kiuug fãa. Sã n yaa ne neb kẽere, b laafɩ wã, nebã sẽn pa kelgd-bã, bɩ yɛl a taab yĩng tõeeme n kɩt tɩ b pa tõog n kõ sẽn ta bãmb 10 kiuug fãa ye. La ne rẽ fãa, b sẽn maandã tata a Zeova yam. (Mat. 13:23; Luk 21:3, 4) Sẽn tar yõod n yɩɩd yaa tɩ koe-moond fãa yãk periodik sõor takɩ a sẽn dat n kõ nebã kiuug fãa.”
9. Bõe la d tõe n maan n wilg tɩ d sũur yaa noog ne a Zeova sẽn kõt tõnd periodik rãmbã sẽn sõngd nebã tɩ b bãngd sɩdã?
9 D sũy yaa noogo, “Wẽnnaam sẽn so sɩdã” sẽn tũnugd ne tʋm-tʋmd sẽn tũud sɩd la sẽn tar yamã la Siglgã taoor lʋɩtb Sullã n kõt tõnd periodik rãmbã sẽn sõngd nebã tɩ b bãngd sɩdã. (Yɩɩl 31:6) A Zeova sã n ket n data, sɛb-kãensã na n ket n sõngda nebã. Seb-kãensã na n kell n sõnga nebã tɩ b bãng tɩ noy nins a Zeova sẽn kõ manesmã wɛɛngẽ wã yaa sõma, la sõng-b tɩ b bãng Biiblã sẽn sɩd yet bũmb ninga. Sẽn paase, b na n kell n sõnga nebã tɩ b bãng tɩ bãngr-goamã sẽn pidsdã wilgda vẽeneg tɩ Wẽnnaam Rĩungã rɩta naam, la b bãng me tɩ neb nins sẽn maand a Zeova raabã sõor tara paasgo. (Mat. 6:10; Wil. 11:15) D sẽn tar Gũusg Gasgã la Réveillez-vous ! wã sɩd yaa bark tɛkẽ! Bɩ d modg n tũnug ne segb buud fãa n kãab pʋ-peelem dãmbã periodik rãmbã sẽn tar yõod wʋsgã. Bala b sõngda nebã, la kɩtdẽ tɩ b bãngd sɩdã Wẽnnaam Rĩungã zugu.