Ket-y n ningd Rĩungã pipi zĩigẽ
1 Vɩɩmã sẽn yaa toogã la zu-loees a taabã tõe n kɩtame tɩ ka nana tɩ d ning Rĩungã pipi zĩigẽ la d ket n maand woto wakat fãa ye. Zu-loees sã n wa puki, wãn-wãn la d na n ket n ningd Rĩungã pipi zĩigẽ? La yaa wãn to yẽ, b sã n kãab tõnd tʋʋmd sẽn baood tɩ d vaal tigissã bɩ sẽn gɩdgd tõnd koe-moonegã? Sã n yaa woto d tog n lebsa Rĩungã poorẽ d vɩɩmã pʋgẽ bɩ?
2 Tẽeb sẽn tar pãng yaa tɩlae: Tõnd tẽebã sã n paam makr yɛl a woto pʋsẽ, d ka tog n yĩm a Zeova kãabsã, la a Zezi sẽn kɩt tɩ d tall bas-m-yam tɩ Wẽnnaam na n teela tõnd d sã n deng n bao Rĩunga nandã ye. (Yɩɩl 37:25; Mat. 6:31-34) Dũniyã yel-weoogdɩ tõe n libsa tõnd yamã la b kɩt tɩ d ra ket n ningd Rĩungã pipi zĩigẽ ye. Kẽer basame tɩ naam tʋlsem tʋʋm zĩigẽ bɩ ligd raab lebg bũmb ning sẽn yaa kãseng n yɩɩd b vɩɩmã pʋgẽ wã. La wala a Polle, d segd n maga takɩ n bãng bũmb ning sẽn sɩd tar yõod d vɩɩmã pʋgẽ wã.—Fil. 3:7, 8.
3 Yaa tɩlae tɩ d maan toeeng bɩ?: Saam-bi-poak yeelame: “Mam da nonga m tʋʋmdã hal wʋsgo, sɩda, yaa rẽ la m da nong n yɩɩd bũmb fãa. Mam tagsame tɩ m da tõe n ket n ya a Zeova Kaset soab la m dɩkd m sẽkã wʋsg sẽn yɩɩd n kẽesd m tʋʋmdã pʋgẽ.” La a mengã ra ket n neeme t’a ra tõe n tʋma wʋsg n paas a Zeova balengã pʋgẽ. A wa n baas n basa a tʋʋmdã sẽn da gɩdgd-a t’a ka tõe n bɩ tẽebã wɛɛngẽ wã. A sẽn wa n kẽes a meng zãng-zãng Rĩungã tʋʋmd pʋgẽ wã poore, a ra tõe n yeela woto: “Masã, m neeme tɩ m vɩɩmã bee bark a Zeova nifẽ, la bũmb ning sẽn sɩd be yõod n yɩɩd yaa rẽnda.”
4 Sɩd zemsame tɩ d pẽg neb wʋsg sẽn sak n bas nug-tʋʋm ne ligd bɛd tẽeb toɛy-toɛya, n gĩdg b vɩɩmã ne yɛl wʋsgo, n kẽ wakat fãa tʋʋmdã pʋgẽ wã. Kãsem dãmb la kãsemb sõngdb sẽn yaa kom-bɩɩs la sẽn yaa rakõap maana Wẽnnaam tʋʋmdã pʋgẽ formasõ lekolle, n tar zu-nood tʋʋm sẽn be yamleoog masã. B sẽn dɩk togs-n-taar ne a Poll mak-sõngã, b sɩd sekda b mens ne yĩngã bõn-datem kãsemse.—1 Kor. 11:1; 1 Tɩm. 6:6-8; Heb. 13:5.
5 Baa ne dũniyã neb sẽn yaand tõnd tagsgã sẽn yaa to-to ne vɩɩmã, a Zeova ningda tõnd barka. (1 Kor. 1:26-31) Rẽ yĩnga, ka bũmb sẽn sɩd kengd raoodo, tɩ d bãng t’a na n tũnuga ne tõnd wa sẽn tõe tɛka, la t’a na n sõng-d lame tɩ d maan a tʋʋmdã sɩda? Tõnd sẽn tar zu-noog n tõe n moon Wẽnnaam Rĩungã b sẽn luglã rũndã-rũndã wã ka na n leb n maan n yɩlem abada. Dẽ yaa masã la wakat ning d sẽn segd n ket n ningd Rĩungã pipi zĩigẽ d vɩɩmã pʋgẽ wã.