Rẽ segd n gɩdga tõnd tɩ d ka moon bɩ?
1 Neb wʋsg vɩɩm pida ne tʋʋm wʋsgo. A Zeova Kaset rãmbã bee b rãmb nins vɩɩm sẽn pid ne tʋʋm n yɩɩdã sʋka. Sɩda, b zãmsda Wẽnnaam Gomdã, n kẽnd tigissã, la b moond koe-noogã. Sẽn paase, nug-tʋʋma, zak pʋgẽ bɩ lekollẽ tʋʋma, la zɩɩb wʋsg a taab me rɩkda sẽka. Sẽn yɩɩd fãa, woto yaa yell sẽn ka nana n kõ zak soben dãmbã.
2 Vɩɩmã sẽn yaa toog zĩis wʋsgã yĩngã, zak soben dãmb tõeeme n segd n tʋm tʋʋm toogo, n kaoos lɛɛr dãmb wʋsg n yaool tõog n paam b noor dɩɩbo. Nug-tʋʋm a woto sẽn dɩkd sẽk la a sẽn baood modgr wʋsgã pa kõt weer wʋsg tɩ d tõe n moon koe-noogã ye. Sẽn mik tɩ b segd n tʋmame n ges b zagsã yellã, kẽer tõe n tagsdame tɩ b ka tõe n paam sẽk wʋsg n moon koe-noogã ye. (1 Tɩm. 5:8) Yaa sɩd tɩ rũndã-rũndã bao n kõ noorã wata ne zu-loees wʋsgo. La ned ka segd n bas t’a nug-tʋʋmd gɩdg-a t’a ka moon koe-noogã ye. (Mark 13:10) Yaa rẽ yĩng la d sẽn segd n vaees d mengã yɛl sẽn sɩd yaa to-to wã n gesã.
3 Dũniyã sẽn tar toeeng wakat fãa wã yĩng kɩtame tɩ zak soab tõe n wa minim n dɩkd sẽk wʋsg a nug-tʋʋm yĩnga, sẽn na yɩl n paam ligd wʋsg tɩ bala a ka mi yel-lingdem na n wa wa ye. (1 Kor. 7:31) Yaa sɩd tɩ sẽk rɩk n paas nug-tʋʋmd pʋgẽ tõe n wõnda a paasda zak arzɛka, bɩ a kõta tõog n paas tɩ b tõe n kok pemsem bɩ b maan deem. La rẽ yĩnga, sã n mikame tɩ yaa sẽk ning b sẽn da segd n dɩk n maand tẽebã yɛl la b rebd tigissã la b rɩk n kẽes nug-tʋʋmdã pʋgẽ, woto na paas zakã sũ-noog sɩda? Sãmbg sẽn ka be, d ratame n gil bũmb ning fãa sẽn na n sãam tõnd tẽebã. Yaa yam tʋʋmde, d sã n kelg a Zezi saglg ning sẽn yet tɩ d ‘bĩng paoong’ saasẽ la d tall ‘Wẽnnaam arzɛgsã.’—Mat. 6:19-21; Luk 12:15-21.
4 Reng-y n bao Rĩungã yɛla: A Zezi sagla a karen-biisã tɩ b lʋɩɩs Rĩungã yɛl bũmba fãa taoore. A yeel-b-la woto: “Bɩ yãmb da maan yɩɩr ye, la ra yeele: Tõnd na n dɩɩ bõe? Tõnd na n yũu bõe? Tõnd na n yeelga bõe?” Bõe yĩng t’a ra tõe n yeel woto? A wilga woto: “Yãmb Ba sẽn be arzãna miimi tɩ yãmb data bõn-kãense.” Tõnd sã n sɩd kɩsa sɩd ne rẽ, bũmb ka tõe n gɩdg-d tɩ d ka maan bõn-kãngã a Zezi sẽn yeel n paasã ye: “Bɩ y reng n bao Wẽnnaam soolem ne bãmb tɩrlem, la bõn-kãens fãa [yĩngã yɛl nins sẽn yaa tɩlae wã] na paas yãmba.” Wẽnnaam na n gesame tɩ d paam bõn-kãense! (Mat. 6:31-33) Pa sasa kãngã la d segd n bas tɩ yɩɩr sẽn loog nug ne noorã rɩɩb baoobo, bɩ naar vɩɩm zãmaan kãngã sẽn na n loogã pʋgẽ tʋlsem tiisd-d ye.—1 Pɩɛ. 5:7; 1 Zã 2:15-17.
5 Nug-tʋʋmdã pipi bõn-datl yaa sõng ned t’a paam a sẽn dat n ges a meng yelle. La d sẽn datã waooglem taa wãn-wãn to? Tʋm-tʋmd a Poll gʋlsame: “Tõnd sã n tar dɩɩb ne futu, yõ wã sekda tõndo.” Tõnd baooda sẽn yɩɩd rẽ bɩ? Sã n yaa woto, tõeeme tɩ d wa paam zu-loe-kãensã a Poll sẽn keoog tõnd ne wã: “Neb nins sẽn dat n yɩ arzɛgs rãmba kẽeda makre la kũusr pʋgẽ la ratem wʋsg sẽn yaa yalemdo sẽn sãamd bãmba n kẽesd bãmb toog ne sãoong pʋgẽ.” (1 Tɩm. 6:8, 9; Mat. 6:24; Luk 14:33) D na n maana wãn n bãng rat-tɩ-loog sã n yaa gɩdgr ne-do?
6 Dũniyã yɛl pʋgb sã n kɩt tɩ d ka le moond koe-noogã la bala, bɩ d ka le ne tɩ yaa tɩlae tɩ d maan modgr koe-noogã yĩnga, dẽ, yaa tɩlae tɩ d maan demsg sã n yaa ne yɛl nins d sẽn ningd pipi zĩigẽ wã . (Heb. 13:15, 16) Vɩɩm sẽn ka gĩd ne yɛl na n sõngame n yiis gɩdgr a woto tɩ d tõog n moon koe-noogã. Segda wakat fãa tɩ d sã n wa rɩkd d sẽkã la d pãngã n tʋmdẽ bɩ Rĩungã yɛl zĩnd pipi zĩigẽ.
7 Tʋʋmd sẽn ka na n yɩ zaalem: A Poll sagenda tõnd wakat fãa tɩ d “maan Zusoaba tʋʋmd wʋsgo, tɩ [d] miimi tɩ [tõnd] sẽn tʋmd Zusoaba tʋʋmda ka na n yɩ zaalem ye.” (1 Kor. 15:58) “Zusoaba tʋʋmd” ning sẽn tar yõod n yɩɩdã yaa Rĩungã mooneg la karen-biisã maanego. (Mat. 24:14; 28:19, 20) D sã n dat n kẽesd d mens rẽ maaneg pʋgẽ zãng wa d sẽn tõe tɛka, d segd n yãka wakat koe-moonegã yĩng semenã pʋgẽ, n modg n da rɩk sẽk kãng n maan bũmb a to ye. (Ef. 5:15-17, NW) Dẽ, nug-tʋʋmd bɩ bũmb a to ka na n gɩdg tõnd tɩ d ka moon koe-noogã ye.
8 D mensã sã n sak n na n taas neb a taabã Biiblã sɩda, d na n paama sũ-no-kãseng ning kũun sẽn wat ne wã. (Tʋʋ. 20:35) D sã n ket n kẽngd taoor ne Rĩungã tʋʋmde, d tõe n gũu beoog-daar ne bas-yardo, “tɩ bõe, Wẽnnaam yaa tɩrga, la bãmb kõn yĩm [tõnd] tʋʋmda ne [d] nonglma [tõnd] sẽn wilg bãmb yʋʋra yĩnga. . . ye”—Heb. 6:10.