Zagsã tõe n maana wãn n tall pãng tẽebã wɛɛngẽ?
1 Kiris-neb zagsã zemsa ne pẽgre, b ‘yir dãmbã sẽn sakd Wẽnnaamã’ yĩnga. (1 Tɩm. 5:4) La sẽn mik tɩ bõn-wẽns sẽn tõe n koms tõnd tẽebã pãng bee wʋsgo, tara yõod wʋsg tɩ zagsã neb modg n kell n tall pãng tẽebã pʋgẽ. Wãn to la rẽ tõeyã?
2 Wilg-y zu-sobend wa Kiristã sẽn wilg-a to-to wã: Zak soben dãmbã segd n dɩka togs-n-taar ne a Zezi Kirist sã n yaa ne b sẽn tʋkd b zɩɩbã to-to wã, n keng b zagsã neb tẽebo. A Zezi wilga a nonglem ne tõnd n sak n ki tɩ yɩ maoong tõnd yĩnga. La a ka tek woto bal ye, a ket n ‘dɩlgdame la a get a tigingã yelle.’ (Ef. 5:25-29) Roagdb sẽn tar nonglem tũuda mak kãngã sẽn wilgd nonglmã n pidsd b zakã neb ratem tẽebã wɛɛngẽ daar fãa. Zak pʋgẽ Biibl zãmsgã semen fãa, sõss sẽn kengd tẽeb sõma sasa ning b sẽn tõeyã, la yell sẽn puk fãa welgrã bee bõn-kãens b sẽn segd n maana sʋka.—Tõo. 6:6, 7.
3 Koe-moonegã pʋgẽ: Zakã neb fãa segd n bãngame tɩ b balengã nen-kãseng a yembr yaa kõ neb a taabã kaset a Zeova ne a raabã zutu. (Ezai 43:10-12) Roagdba, y sã n dat tɩ y kambã wa yɩ a Zeova Kaset rãmb sẽn tar kɩs-sɩda, bɩ y sɩng pĩnd n segl b sũyã tɩ b nong koe-moonegã. Togs-y-b bũmb nins sẽn kɩt tɩ b segd n maan modgr koe-moonegã pʋgẽ la b kẽesd b mens a pʋgẽ semen fãa wã. (Mat. 22:37-39) Rẽ poor bɩ y maan segls tɩ b yit ne-y n moond wakat fãa.
4 Kɩt-y tɩ zakã neb tall naneb ne moonegã tʋʋmde, n maan weer zak pʋgẽ zãmsgã wakate, sẽn na yɩl n segl b sẽn na n sõs ne nebã to-to moonegã wakate, n mak n maan sõasgã goam n minim sõma. Zãms-y y biig fãa moonegã tʋʋmde, n sõng-a t’a bɩ wa sẽn zems a yʋʋm la a pãn-tõogo. Y sã n moon ne-b poore, sʋk-y-b n ges bãmb mensã sẽn tagsd to-to ne Zeova sõmblmã. Togs-y kɩbay sẽn kengd tẽebo. Bũmb ning sẽn na n keng zagsã tɩ b mao ne “wẽng buud fãa” (NW ) wã yaa b sã n “lemb Zusoabã n bãng b noom” n paase, tɩ rẽ kɩt tɩ b zems-n-taarã ne a Zeova pãng sẽn paase.—1 Pɩɛ. 2:1-3.
5 Tigissẽ wã: Ad sɩd yaa bõn-sõng tɛkẽ, tɩ zakã neb sõngd taab sẽn na yɩl n debd tigingã tigiss fãa, sẽn yɩɩd fãa, sã n mik tɩ ned n be bãmb sʋkã n yɛ, n koms raood bɩ tɩ yɛla loog-a! Saam-bi-poak sẽn yaa bi-bɩɩg yeela woto: “M baaba yita tʋʋma n wa yir ne yaamse. La mam togsd-a-la tags-sõng a yembr b sẽn na n gom a yell tigisgẽ wã zaab-kãnga, la rẽ tusd-a lame t’a kẽnge. La mam me sã n yɛ fãa la yẽ me sẽn yãt tags-sõng n keng maam tɩ m kẽnge.”—Heb. 10:24, 25.
6 Lagemd-y taab n tʋmdẽ: Zagsã neb segd n naagda taab n maand yɛla, wala sõng taab ne zakã tʋʋma. B leb n segd n yãka sẽk pemsem kokr yĩnga. Pemsem kokrã wakate, b tõe n maana yel-sõma sẽn kõt sũ-noog b sẽn tõe n wa tẽegd b yell ne yamleoogo. Yel-kãens tõe n yaa yi ne zakã neb kɛɛng n tɩ kok pemsem, reem ne taaba, roagdb la zo-rãmb kaagre.—Koɛ. 3:4.
7 Zags sẽn tar pãng maoodame n tõogd daar fãa yɛl nins sẽn dat n sãam b tẽebã. B sã n pẽneg a Zeova n paas la b sẽn paamd pãng a nengẽ.—Ef. 6:10.