D sã n pa mikd nebã b zagsẽ
1. Zak-zak moonegã pʋgẽ, bõe n lebgd toog ne-do?
1 Zĩis wʋsgo, lebgda toog tɩ d mik nebã b zagsẽ. Rũndã-rũndã sẽn yaa toog wakatã, kɩtame tɩ yaa tɩlae ne neb wʋsg tɩ b tʋm lɛɛr wʋsg sẽn na yɩl n paam bũmb nins sẽn yaa tɩlae ne-bã. (2 Tɩm. 3:1) Neb wʋsg yita b zagsẽ wã n kẽng raaga, pa rẽ bɩ n kẽng reem bɩ pemsem kokre. Wãn to la d tõe n paam nin-kãensã n moon koe-noogã?
2. Bõe la d tõe n maan n tõog n moon neb nins d sẽn pa mikd b zagsẽ wã?
2 Tʋmd-y ne not rãmbã: D sã n pa tɩ mik ned a zakẽ, d sẽn segd n maan bũmb ning pipi yaa d rɩk not rãmba. Not rãmbã rɩkr tara yõod wʋsg y sã n moond wakat fãa y moonegã zĩiga. Rẽ yĩnga yãmb gʋlsda sorã nimero, moonegã zĩig nimero, y yʋʋrã, la daarã bɩ? Y tõe n basa vɩʋʋg note de maison en maison rãmbã zutu, sẽn na yɩl tɩ koe-moond a to bɩ yãmb meng sã n na n wa lebg n tɩ ges nebã bɩ y tõog n gʋls not rãmb a taaba. Y sã n wa moon n sa, bɩ y tẽeg n kɩs not rãmb nins yãmb sẽn gʋlsã saam-biig ning sẽn so moonegã zĩigã. A sã n kõ-y sor tɩ y lebg n tɩ ges neb nins y sẽn pa tɩ mik b zagsẽ wã, y tallda y not rãmbã. Y sã n yã neb sẽn dat n bãng n paase, bɩ y gʋls b rãmbã sẽn dat n bãng bũmb ninsã note de maison en maison toɛy-toɛy zut sẽn na yɩl n lebg n tɩ ges-ba.
3. Bõe ne bõe la d tõe n maane, d sã n pa tɩ mik neb b zagsẽ?
3 Lebg-y n kẽng-y sasa a to: Tõe tɩ zaabr bɩ wɩkɛn sasa, d tɩ mik neb kẽer sẽn da ka b zagsẽ wã rasem a taabã. Rẽ yĩngã y tõe n manega y sẽkã n lebg n tɩ ges-b sasa a to bɩ? (1 Kor. 10:24) Sã n mik tɩ y pa tõeyã, y tõe n kõo nin-kãensã adɛrs sẽn be note de maison en maison rãmbã pʋsẽ wã koe-moond a to t’a lebg n tɩ ges-b sasa a to. Koe-moondb nins sẽn pa tõe n kẽes b mens zak-zak moonegã pʋgẽ b sẽn pa tar laafɩ wʋsgã yĩng sũur na n yɩɩ noogo, y sẽn na n kɩt tɩ b sõng-y n tʋm tʋʋm kãngã wã.
4. Bõe n wilgd tɩ d sã n lebg n tɩ bao neb nins d sẽn da pa mik b zagsẽ wã tara yõodo?
4 Ad kibar a yembr sẽn wilgd tɩ tara yõod tɩ d lebg n tɩ ges d sẽn pa tɩ mik-b rãmbã. Sẽn na maan yʋʋm a tãabo, koe-moondb n kẽn zak a ye pʋgẽ naoor wʋsg n pa mik a soabã ye. La daar a yembre, b wa n tõog n yã-a lame. Mikame tɩ wakat kãngã fãa a soabã ra baooda a Zeova Kaset soaba, sẽn na yɩl n lebg n sɩng Biiblã zãmsgo, a sẽn da sɩng nand t’a wa zĩ-kãngã.
5. Wakat bʋg la d tõe n yeel tɩ d moona moonegã zĩig fãa n sa?
5 Moon-y y moonegã zĩig fãa: Wakat bʋg la d tõe n yeel tɩ d moona d moonegã zĩig fãa n sa? Naoor wʋsgo, yaa d sẽn maan d sẽn tõe fãa n paam ned fãa a zakẽ. Yita sõma tɩ d maan yam ne yam n dɩgl seb-vãoog wall seb-kʋd tɩ neb nins d sẽn pa mikã wa yã, sẽn yɩɩd fãa zĩis nins d sẽn pa moond wakat fãa wã. D segd n moona moonegã zĩig fãa n sa kiis a naas pʋgẽ. B sã n wa moon zĩigã n sa, b segd n togsa saam-biig ning sẽn get moonegã zĩig yellã tao-tao t’a maaneg moonegã zĩig sɛba.
6. Bõe yĩng tɩ d segd n modgd tɩ koe-noogã ta ned fãa d moonegã zĩigẽ?
6 D ratame tɩ neb wʋsg tõog n bãng b sẽn tõe n pʋʋs ne a Zeova yʋʋr to-to n paam fãagre. (Rom 10:13, 14) Neb nins fãa d sẽn da pa mik b zagsẽ wã bee nin-kãens sʋka. Wala a Polle, d raabã yaa d tõog n “kõ kaset sõma ne Wẽnnaam sõmblem d sẽn ka segd ne wã koe-noogã.” —Tʋʋ. 20:24, NW.