Koɛɛgã mooneg baoodame tɩ d yals kãn-kãe
1 Tʋm-tʋmd a Poll moona koɛɛgã ne sũ-noog sẽn yɩɩd yʋʋm 30. A koe-moonegã pʋgẽ, a sega zu-loees wʋsgo. (2 Kor. 11:23-29) La rẽ pa kɩt t’a bas koɛɛgã mooneg ye. (2 Kor. 4:1) A bãngame tɩ yaa a Zeova bal n tõe n kõ-a pãng t’a tõog n yals kãn-kãe. (Fil. 4:13) A sẽn yals kãn-kãe wã kɩtame t’a tõog n yeel woto: “Bɩ yãmb yɩ mam togs-n-taas wa mam me sẽn yaa Kirist togs-n-taagã.”—1 Kor. 11:1.
2 D sẽn maood ne zu-loeesã rũndã-rũndã to-to: Beoog sẽn vẽeg fãa, d saam-biis wʋsg n paamd namsgo, yaalgo, bɩ b zags rãmbã, b tʋmd-n-taas bɩ b karen-bi-taas maand b toog kae ne-ba. (Mat. 10:35; Zã 15:20) Tõe tɩ yãmb segda zu-loe-kãensã buudu. Tõe me tɩ y ka laafɩ, pa rẽ bɩ y maooda wakat fãa n na n gɩdg yɛl sẽn tiisd yãmbã, bɩ bũmb a taab sẽn kɩt tɩ yaa toog ne yãmb tɩ y kell n tall y tẽebã. D sã n bʋgs pĩnd-wẽn-sakdbã, la kiris-neb a taab sẽn mao ne zu-loeesã mak-sõng zugu, d tẽebã pãng na n paasame.—1 Pɩɛ. 5:9.
3 D sã n kell n yals kãn-kãe koɛɛgã mooneg pʋgẽ la d “bob Wẽnnaam zab-teed fãa,” d tẽebã pãng na n paasame. (Ef. 6:10-13, 15) Segdame tɩ d pʋʋsd Wẽnnaam t’a sõngd-d tɩ d yalsd kãn-kãe. Wẽnnaam kõta tõnd a vʋʋsem sõngã sẽn na yɩl tɩ d mao ne zu-loeesã n tõoge. (2 Kor. 6:4-7) Sẽn na yɩl n mao ne a Sʋɩtãan la ne a dũni-wẽngã n tõoge, d segd n tũu Wẽnnaam noyã tɩ sõng-d tɩ d tall yam. (Yɩɩl 119:24, 85-88) Wala biig sẽn na n karemd lɛtr a ba sẽn tool-a n yɩlemdẽ wã, tõnd me sã n karemd Biiblã daar fãa, zood ning d sẽn tar ne a Zeova wã pãng na n paasame. D sã n zãmsd Biiblã daar fãa, d paamda yam n tõog n mao ne zu-loeesã, la d get yɛla wa Wẽnnaam sẽn get-b to-to wã tɩ sõng-d tɩ d tõog n maan yam-yãkr sẽn yaa sõma, la kɩt tɩ d kell n yɩ burkĩna.—Yel. 2:10, 11.
4 D sã n tõog n yals kãn-kãe, d na n paama barka: Wa sẽn yɩ to-to ne a Pollã, tõnd me sã n tõogd n yalsd kãn-kãe koe-moonegã pʋgẽ, d noogda a Zeova sũuri, la tõnd ne neb a taabã na n paama barka. (Yel. 27:11) Bɩ b modg n kell n moon koɛɛgã n wilg tɩ d tẽebã yõod yɩɩda sãnem b sẽn tõe n sãame, baa ne b sẽn mak-a ne bugmã.—1 Pɩɛ. 1:6, 7.