D tʋmd ne Biiblã sõma
1. Bõe yĩng tɩ d segd n tʋm ne Biiblã sõma?
1 D sã n tʋmd ne Biiblã sẽn yaa Wẽnnaam Gomdã sõma, na n kɩtame tɩ d tõog n moon koɛɛgã neere, la d sõng nebã tɩ b bãng zãmsg nins sẽn yaa ziri wã, la rog-n-migs nins sẽn pa zems ne Wẽnnaam noyã.—2 Tɩm. 2:15; 1 Pɩɛ. 3:15.
2. Bõe la d tõe n maan tɩ sõng-d tɩ d yãt vɛrse rãmbã Biiblã pʋgẽ nana-nana?
2 D modg n bãng Biiblã n paase: Naoor wʋsgo, yaa ned sẽn na n tʋmd ne tʋʋm-teoog wakat fãa la a tõe n wa bãng n tʋmd ne-a sõma. D sã n karemd Biiblã zãnga, na n kɩtame tɩ d bãng a sẽn gomd bũmb ning yell takɩ wã bɩ a gom-zugã. Sẽn paase, na n sõng-d lame tɩ d tẽegd vɛrse rãmbã, la d tõe n yã-b Biiblã pʋgẽ tao-tao. D sã n modg n bãngd Biiblã sõma n paasdẽ, na n kɩtame tɩ d gomd ne raood la ne yẽesem d sã n wa moond koɛɛgã d moonegã zĩigẽ bɩ zĩig a to.—1 Tes. 1:5.
3, 4. a) Bõe ne bõe la d tõe n maan sẽn na yɩl n bãng Biiblã sõma n paase? b) Sẽn na yɩl n bãng vɛrse rãmbã sõma, bõe la yãmb maanda?
3 Tigissã sasa, d segd n lakda d Biiblã n tũud vɛrse rãmbã b sẽn karemdã. D sã n wa zãmsd sɛb nins tʋm-tʋmdã sẽn yiisã bɩ n segend tigissã, d segd n karemda vɛrse rãmbã, la d tagsd d sẽn na n tũ-b to-to. Neb wʋsg bãngame tɩ d sẽn na n karemd vɛrse rãmbã d Biiblã pʋgẽ n são d sẽn na n karemd-b ordinatɛɛr pʋgẽ bɩ seb-vãoog zugu, bala koe-moonegã sasa, rẽ sõngd-d lame tɩ d yãt-b tao-tao Biiblã pʋgẽ.—Zã 14:26.
4 Zags kẽer yãka wakat n dɩkd vɛrse rãmbã ne zugu. Sẽn na yɩl n maan woto, b gʋlsda vɛrse rãmbã seb-peds zutu, la b gʋls b poorã b sẽn yet bũmb ningã. B lebgd n dɩkda vɛrse rãmbã ne zugu, bɩ n tẽegd taab zĩis nins b sẽn tõe n yã-b Biiblã pʋgẽ wã. D sã n makd d sẽn tõe n kãab nebã sɛbã n wilgd taaba, la d baood n bãngd d sẽn tõe n leok bũmb nebã sẽn yet tɩ wilgdẽ tɩ b pa rat n kelg koɛɛgã bɩ sokre, d na n tõog n tʋma ne Biiblã sõma.
5. Bõe yĩng tɩ d segd n modg n bãng d sẽn tõe n tʋm ne Biiblã sõma to-to n paase?
5 Biiblã yõod yɩɩda sɛb a taabã fãa. Yaa goam nins sẽn be a pʋgẽ wã bal n tõe n ‘vẽneg nebã tɩ b wa paam fãagre.’ (2 Tɩm. 3:15) Sẽn mik tɩ d moonegã zĩigẽ neb wʋsg pa mi bũmb ning Biiblã sẽn sɩd yetã, d segd n modgame n bãng Biiblã sõma sẽn na yɩl n wilg-ba.—Yel. 2:1-5.