Tʋʋmd ning sẽn tar yõod n yɩɩdã
1. Koe-moonegã sẽn tar yõod n yɩɩdã kɩtame tɩ d modgd n na n maan bõe?
1 Bõe yĩng tɩ b sagend-d wakat fãa tɩ d rɩk d sẽka, d bãngrã, la d tarmã n moond koɛɛgã? Bala yaa tʋʋm-kãngã n tar yõod n yɩɩda! D sã n tags koe-moonegã sẽn tõe n kɩt tɩ nebã maan bũmb ninsã yelle, na n kɩtame tɩ d rat n moon n paase. Bala tʋʋm-kãngã tara tɛka.—Tʋʋ. 20:24.
2. Wãn to la koe-moonegã sõngd nebã tɩ b waoogd Wẽnnaam yʋʋrã sẽn yaa kãsengã?
2 A Zeova yʋʋrã waoogr yĩnga: Koe-moonegã kɩtdame tɩ nebã bãng tɩ ne a Zezi Kirist maasem, a Zeova Rĩungã na n ledga goosneema rãmba la a welg ninsaalbã zu-loeesã fãa. (Mat. 6:9, 10) Koe-moonegã wilgdame tɩ yaa a Zeova bal n tõe n menes bãasã la kũumã. (Ezai 25:8; 33:24) Tõnd sẽn zãad a Zeova yʋʋrã n tar manesem sõma wã la yẽesmã kɩtdame tɩ nebã waoogd-a. (1 Pɩɛ. 2:12) D sẽn paam n sõngd nebã tɩ b bãngd Wẽnnaam yʋʋrã dũniyã gillã sɩd noogda d sũy wʋsgo!—Yɩɩl 83:19.
3. Sẽn sakd-b Rĩungã koe-noogã paamda bark bʋse?
3 Koe-moonegã fãagda yõyã: A Zeova “ka rat tɩ ned ba a ye sãam” ye, a ratame tɩ b ‘fãa tek yam n kos sugri.’ (2 Pɩɛ. 3:9) La wãn to la nebã na n bãng bũmb nins a Zeova sẽn get tɩ yaa sõma la sẽn pa sõma ned sã n kae n na n zãms-ba? (Zon. 4:11; Rom 10:13-15) Ned sã n sak koe-noogã n bas tʋʋm-wẽnsã maanego, a paamdame t’a vɩɩmã manege. (Mii. 4:1-4) Sẽn paase, a na n wa tõog n paama vɩɩm sẽn kõn sa wã. D sã n moon koɛɛgã ne yẽesem la d zãmsd nebã sõma, d na n fãaga d mens la neb nins sẽn kelgd tõndã. (1 Tɩm. 4:16) D sẽn paam n kẽesd d mens tʋʋm-kãng sẽn tar yõod n yɩɩdã pʋgẽ wã, yaa zu-zẽkr tɛka!
4. Bõe yĩng tɩ d segd n maan d sẽn tõe n tɛk fãa koe-moonegã la karen-biisã maaneg wɛɛngẽ?
4 Ka la bilfu, to-kãsengã na n linga nebã n sãam dũni-wẽng kãnga. Sẽn be-b a Zeova poorẽ wã na n põsame. Rẽ n so tɩ rũndã-rũndã d sẽn moond koɛɛgã la d maand karen-biisã yaa yõor yelle. Bɩ d modg tɩ tʋʋm-kãng yell pak-d n yɩɩda!—Mat. 6:33.