D sõng nebã tɩ b sak n deeg Biiblã sẽn yetã
1. Sẽn na yɩl n moon koɛɛgã sõma, bõe la d pa segd n yĩmi?
1 Wala tʋm-tʋmd a Polle, neb nins sẽn moond koɛɛgã sõma wã miime tɩ sẽn na yɩl n ‘togs sɩd koɛɛgã tɩrga,’ pa baood tɩ b togs nebã Biiblã sẽn yetã bal ye. (2 Tɩm. 2:15) D sã n moond koɛɛgã, bõe la d tõe n maan tɩ nebã sak n deeg Biiblã sẽn yetã?—Tʋʋ. 28:23.
2. Bõe n na n sõng nebã tɩ b sak n deeg Biiblã sẽn yetã?
2 D lak Biiblã n karem: Pipi, d segd n sõnga nebã tɩ b bãng tɩ Biiblã yita Wẽnnaam nengẽ. D sã n kɩt tɩ nebã bãng tɩ d kɩsa sɩd ne Wẽnnaam Gomdã, na n kɩtame tɩ d sã n karemd vɛrse, bɩ a soabã maag a yĩng n kelge. (Heb. 4:12) D tõe n yeela woto: “Yɩta sõma tɩ d bao n bãng Wẽnnaam tagsg yel-kãngã zugu. Bɩ d ges Biiblã sẽn yet bũmb ning rẽ wɛɛngẽ.” Sã n tõe fãa bɩ y lak Wẽnnaam Gomdã n karem.
3. Y sã n karem vɛrse, bõe la y tõe n maan tɩ sõng kɛlgdã t’a wʋm a võore?
3 Yiib-n-soaba, wilg-y vɛrse ning y sẽn karmã võore. F sã n karem vɛrse Biiblã pʋgẽ, yaa toog ne neb kẽer tɩ b wʋm a võore. Vɛrse rãmbã võor wilgr tara yõod wʋsgo, bala sõngda kɛlgdã t’a bãng bũmb ning sẽn kɩt tɩ y karem vɛrse wã. (Luk 24:26, 27) Lebs-y n karm-y gom-biis nins sẽn na n sõng kɛlgdã t’a wʋm y sẽn yetã võorã. Y sã n sok y kɛlgdã sokre, y na n tõog n bãnga a sã n wʋma y sẽn yetã võor bɩ a pa wʋme.—Yel. 20:5; Tʋʋ. 8:30.
4. Bõe me la d tõe n maan tɩ kɩt tɩ nebã sak n deeg Biiblã sẽn yetã?
4 D sõng nebã tɩ b tags vɛrse rãmbã zug neere: Tãab-n-soaba, modg-y tɩ y goamã kẽ kɛlgdã. Sõng-y kɛlgdã t’a bãng a sẽn tõe n tũ y sẽn yetã to-to. Y sã n sõng ned t’a tags vɛrse rãmbã zugu, tõe n kɩtame t’a sak n bas a tags-kɛgã. (Tʋʋ. 17:2-4; 19:8) Wala makre, y sã n wa karem Wilgri 21:4 poore, sõng-y kɛlgdã t’a bãng Wẽnnaam sẽn na n menes kũumã sẽn sõngd tõnd to-to. Rẽ poor bɩ y sok-a woto: “Yãmb sẽn bãng tɩ Wẽnnaam na n menesa kũumã, wãn to la rẽ tõe n sõng yãmb y ned kaalem sasa?” Y sã n wilg kɛlgdã vɛrse wã sẽn tõe n sõng-a to-to, a na n yãa a yõodã. Zãmsg woto sẽn yit Wẽnnaam Gomdã pʋgẽ wã kɩtdame tɩ pʋ-peelem dãmbã rat n tũ a Zeova sẽn yaa Wẽnnaam sẽn vɩyã.—Zer. 10:10.