D tall-a n moon wakat fãa
1. Yãmb dat n bãnga sɩdã bɩ? seb-vãoogã na n sõnga tõnd tɩ d maan bõe?
1 B yiisa Yãmb dat n bãnga sɩdã bɩ? seb-vãoogã sẽn na yɩl n sõng tõnd tɩ d sɩng Biiblã zãmsg ne nebã. A leb n tõe n sõnga nebã tɩ b bãng yɛl kẽer sẽn be Biiblã pʋgẽ. (Koɛ. 11:6) D ges sagls a wãn sẽn tõe n sõng tõnd tɩ d tall seb-vãoogã n sõng nebã.
2. Wãn to la d tõe n tall seb-vãoogã n sɩng sõsg ne neda?
2 Y sẽn tõe n sɩng sõsg to-to: Y tõe n kõo ned seb-vãoogã la y wilg-a sogsg a yoobã sẽn be a zugã, tɩ rẽ poor bɩ y sok woto: “Sogsg a yoobã sʋka, bʋg leoor la yãmb rat n bãnge?” A sã n leoke, bɩ y lak seb-vãoogã n karem zĩig ning leoorã sẽn beẽ wã, la y yãk Biiblã vɛrse a ye n karem. Rẽ poore, bɩ y karem wall y kʋms bũmb ning sẽn be seb-vãoogã neng a naasã, la y sã n ges tɩ sakdame bɩ y kãab-a Biiblã yetame sebrã. Baa y sã n pa kõ-a sebrã, a sẽn deeg seb-vãoogã, tõe n sõng-a lame t’a bãng yɛl kẽer Biiblã sẽn yete.—Mat. 13:23.
3. Ned sã n pa tar sẽka, bõe la d tõe n yeele?
3 Ned sã n pa tar sẽka: Y tõe n yeela woto: “Sẽn mik tɩ y pa tar sẽkã yĩnga, m na n basa seb-vãoog ne-yã. Sogsg a yoob nebã sẽn nong n sokd b mens n be a pʋgẽ, la a wilgda Biiblã sẽn leokd sogs-kãens to-to. M sã n lebg n wa nindaare, d na n sõsa a zugu.”
4. Wãn to la d tõe n kãab ned seb-vãoogã sor noore?
4 Y sã n wa moond sor noore: Y sã n yã neda, y tõe n pʋʋs-a lame, n wilg-a sogsg a yoobã la y sok woto: “Yãmb zoe n soka y meng sogs-kãensã buud bɩ? [Bas-y t’a leoke.] Seb-vã-kãngã pʋgẽ, b wilgda Biiblã sẽn leokd-b to-to wã tɩ yaa vẽenega.” A soabã sã n pa yãgdẽ, y tõe n sõsa seb-vãoogã pʋgẽ sokr a ye leoor zug ne-a, la y ges tɩ sã n zemsame bɩ y kãab-a Biiblã yetame sebrã.
5. D sã n pa mik ned a zakẽ, bõe la d tõe n maan ne seb-vãoogã?
5 Y sã n pa mik ned a zakẽ: Zĩis kẽere, koe-moondbã sã n pa mik ned a zakẽ, b rɩgenda sebr zĩig neb a taab sẽn pa tõe n yã. Yãmb tigingã neb sã n mi n maand woto, yãmb me tõe n maana woto ne Yãmb dat n bãnga sɩdã bɩ? seb-vãoogã. Y sã n lebg n kẽng a soabã nengẽ, y tõe n yeela woto: “Tõnd da waa ka n pa mik-y ye. La d rɩgla seb-vã-kãngã buud ka n bas n looge. Sogs-kãensã sʋkã, bʋg leoor la yãmb rat n bãnge?”
6. Bõe n kɩt tɩ Yãmb dat n bãnga sɩdã bɩ? seb-vãoogã tall n moon be yamleoogo?
6 Yãmb dat n bãnga sɩdã bɩ? seb-vãoogã wilgda Biiblã sẽn yet bũmb ningã, t’a võorã wʋmb yaa nana. Ned buud fãa tõe n karm-a lame tɩ yɩ-a noogo, baa a tũudmã sẽn yaa a soaba. Koe-moondbã fãa tõe n tall-a lame n sõs ne nebã. Baa kambã la neb nins sẽn nan sɩng koɛɛgã moonegã tõe n kãab-a-la nebã. Yãmb nong n tallda seb-vãoogã n moond nebã bɩ?