D sẽn tõe n moon sor noor to-to tɩ wom biisi
1. Wilg-y bũmb d sẽn tõe n maan n wilg tɩ d rɩkda a Zezi togs-n-taare.
1 A Zezi sẽn wa n moond koɛɛgã, a ra moonda soayã noy la zĩig ning fãa a sẽn tõe n yã neba. (Luk 9:57-61; Zã 4:7) A ra ratame t’a koɛɛgã sẽn tar yõod wʋsgã ta neb wʋsgo. Rũndã-rũndã, ne soayã noy moonegã maasem, d tõe n sõnga neb wʋsg tɩ b bãng Wẽnnaam. (Yel. 1:20) D sã n bãng d sẽn na n yekd nebã to-to n sõsd ne-ba, la d tʋm ne yam, na n woma biisi.
2. Bõe la d tõe n maan n paam n sõs ne ned sor noor tɩ wom biisi?
2 Yãmb n segd n yek nebã: Naoor wʋsgo, yaa sõma tɩ y kolg nebã n gom ne-ba, la y ra zĩ zĩ-yɛng bɩ n yas n gũudẽ tɩ bãmb wa gom ne-y ye. Zẽk-y y neng n ges a soabã t’a bãng tɩ y rat n goma ne-a, la y pʋʋs-a. Y sã n yaa wʋsg n moondẽ, yɩta sõma tɩ ned fãa yek neda, la y ra naag taab n gom ne nin-yend ye. Y togame me n bãng y sẽn na n maaneg n wa paam n sõs ne-a nindaare. Sõsgã poore, y tõe n kosa a soabã telefõn nimero bɩ a adɛrse. Koe-moondb kẽer yãka zĩ-yɛng n wat be n yekd nebã n moondẽ, tɩ kɩt tɩ b paamd n lebd n sõsd ne neb nins b sẽn da zoe n moonã.
3. D sã n moond sor noore, wãn to la d tõe n wilg tɩ d tʋmda ne yam?
3 Tʋm-y ne yam: Tall-y yam, n bãng y sẽn na n yals zĩig ningã, la y sẽn na n gom ne neb ninsã. Pa tɩlae tɩ y gom ne so-loaagdbã fãa ye. Y sã n gũus n ges t’a soabã yãgdame, y tõe n bas-a lame t’a looge. Sã n yaa koosem zĩigẽ, wala makre butik noore, y pa segd n maan tɩ koosmã soab tags tɩ y rat n sãama a raag ye. Yɩta sõma tɩ y sõs ne neb nins sẽn yit butikẽ wã, la y ra yek sẽn nan kẽed-bã ye. Y sã n yek ned bɩ y gũus n da maan t’a tags tɩ yell n be ye. Tall-y yam sɛbã kũun wɛɛngẽ me. Ned sã n kelg la a pa wilg t’a nonga koɛɛgã wʋsgo, y tõe n kõ-a-la seb-vãoog la y ra kõ-a periodik ye.
4. Bõe yĩng tɩ soayã noy moonegã tar yõodo?
4 Soayã noy moonegã sõngda tõnd tɩ d bʋt sɩdã neb wʋsg sũyẽ wakat bilf pʋgẽ. (Koɛ. 11:6) Tõe tɩ neb kẽer tõnd sẽn segdã yaa neb d sẽn da pa tõe n mik yir abada. Bɩ d fãa modg n moond soayã noy me, bala kõta sũ-noogo, la womda biisi.