“Koe-moonegã lɛɛr dãmb sõdbo”

Yãmb zoe n soka y meng y sẽn segd n sõd koe-moonegã lɛɛr dãmb to-to bɩ? D tõe n yãa sagls rẽ wɛɛngẽ Organisés sebrã neng 86-87. Wakat-wakate, b mi n gomda rẽ yelle. Wala makre b goma rẽ yell yʋʋmd 2008 bõn-bɩʋʋng kiuugã Rĩungã Tʋʋmd pʋgẽ, yãmb sogsgã leoorã zĩigẽ. Yɛlã sẽn pa yembrã yĩnga, d pa yãk noy takɩ rẽ wɛɛngẽ ye. Dẽnd kãsem dãmbã bɩ neb a taab pa segd n lugl noy dem-dem lɛɛr dãmbã sõdb wɛɛngẽ ye.

Koe-moond sã n wa tar sokr rẽ wɛɛngẽ tɩ tʋm-tʋmdã pa gom rẽ yell sebr baa a ye pʋgẽ, ned kam fãa segd n soka a meng woto: Sẽkã yaa sẽn sɩd rɩk n moon koɛɛgã bɩ, bɩ m dɩkame n maan bũmb a to sẽn pa tar loees ne koɛɛgã? Lɛɛr dãmb sõor ning tõnd sẽn gʋlsd d rapoorã zug kiuug fãa wã segd n kõt-d-la sũ-noogo, lakae pa segd n kɩt tɩ d sũur-kasetã ningd-d taal ye. (Tʋʋ. 23:1) Sẽn segd n pak tõnd n yɩɩdã pa lɛɛr dãmbã sõorã ye. Yaa d sã n sɩd rɩka sẽkã n moon koɛɛgã ne d sũur fãa.—Heb. 6:11.