D sã n bʋd bũmbu, d segd n zãgsd-a-la koom
1. Koɛɛgã mooneg wɛɛngẽ, bõe la d segd n maan tɩ wom biisi?
1 Ned sã n sel tɩɩg bɩ n bʋd bũmb n dat t’a bɩ n wom biisi, yaa tɩlae t’a zãgsd koom. Yaa woto me koɛɛgã mooneg wɛɛngẽ. D sã n taas ned koɛɛgã, yaa wa d sẽn bʋd bũmbu. (1 Kor. 3:6) D sã n lebgd n tʋgd n sõsd ne-a sẽn na yɩl tɩ koɛɛgã kẽ a soabã sũurẽ n wom biisi, yaa wa d sẽn kẽnd n zãgsd koom.
2. Bõe la d tõe n maan n wa tõog n lebg n tɩ sõs ne neda?
2 Baas-y ne sokre: Y sã n wa segend y sẽn na n yeel bũmb ning koe-moonegã sasa wã, bɩ y bao sokr y sẽn tõe n sok a soabã n wa leok nindaare. Sok-y sokrã y sõsgã baasgẽ, la y rɩk sɛk ne a soabã n lebg n tɩ leoke. Koe-moondb wʋsg yãame tɩ b sã n yãk sokr Biiblã yetame sebrã pʋgẽ, b tõe n tũnuga ne rẽ n sɩng Biiblã zãmsgo, t’a soabã bãng sẽn maand to-to.
3. Y pipi sõsgã poore, bõe ne bõe la y segd n gʋls n da yĩmi?
3 Gʋls-y n da yĩm ye: Y pipi sõsgã poor bal bɩ y tẽeg n gʋls a soabã yʋʋr la a adɛrse. Yaa sõma me tɩ y gʋls daarã, wakat ning y sẽn sõs ne taabã, y sẽn gom bũmb ning yellã, tɩ y sã n basa sebr me bɩ y gʋls sẽn yaa sebr ningã. Sõsgã pʋgẽ, a soabã togsa yãmb a tũudum bɩ? A vɩɩ a ye bɩ a bee ne a zak rãmba? A goamã wilga bũmb sẽn pak-a bɩ? Y sã n bãng woto fãa, na n sõng-y lame tɩ y bãng bũmb nins yell y sẽn tõe n gom ne-a, wakat ning fãa y sẽn na n kẽng a nengẽ. Tẽeg-y n gʋls-y sɛkã wakatã, la sokr ning y sẽn na n leokã.
4. Bõe yĩng tɩ d segd n ket n kẽnd nebã nengẽ baa d pa yãt-ba?
4 Ket-y n kẽnd-y: Wakat fãa, a Sʋɩtãan modgdame n dat n ‘yiis goam nins’ d sẽn taas ned tɩ kẽ a sũurẽ wã. (Mark 4:14, 15) Woto yĩnga, baa y sã n lebg n kẽnd n pa yãt a soabã, bɩ y ket n kẽnda. Y tõe n gʋlsa lɛtr n kɩs tɩ b kõ-a wall y gʋls sebr n ning a roogã noore. So-pakd a ye sɩnga Biiblã zãmsg ne paga, la rẽ tɛka, a ra kẽndame n pa yãt-a ye. La a gʋlsa lɛtr n tool-a. La so-pakdã sẽn wa n kẽng n tɩ yã-a wã, pagã yeelame t’a sũur yɩɩ noogo, a sẽn wilg t’a yell pak-a lame wã. D sã n lebgd n tʋgd n sõsd ne nebã, bũmb nins d sẽn taas-b tɩ kẽ b sũyã na n woma biisi. Kẽer na n taa pis-tã, kẽer pis-yoobe, la kẽer koabga, tɩ woto kõ-d sũ-noogo.—Mark 4:20.