Yãmb sogsgã leoore

◼ D maanda wãn n bãng d sã n tog n basa sebr ne neda?

Bee ne a soabã sẽn kelg to-to wã. A kelgrã sã n wilgdẽ t’a rat n bãng n paasame, d tõe n kõ-a-la periodik a yiibu, bɩ sebr a to, a kõo ligd bilf n na n teel tʋʋmdã, t’a pa kõ me. (Zoob 34:19; Wil. 22:17) D sẽn segd n tẽeg bal yaa tɩ d pa rat n bas d sɛbã ne neb sẽn pa rat n karem-b ye.—Mat. 7:6.

Bõe n wilgd tɩ ned nonga koɛɛgã? A soab sã n sak n na n sõs ne-do, a sã n kelgd tõnd neere, n leokd d sogsgã la a togsd a sẽn tagsde, wilgdame tɩ sõsgã noom-a lame. D sã n lak Biiblã n karemdẽ, t’a soabã sak n tũud karengã, wilgdame t’a nanda Wẽnnaam Gomdã. Naoor wʋsg me, yaa sõma tɩ d sok d kɛlgdã n ges a sã n na n karma sebrã d sẽn dat n kõ-a wã. Koe-moond segd n talla yam n tõog n bãng a sã n tog n basa sebr ne neda. Wala makre, d sã n moond soayã noy, pa segd tɩ d kõt so-loaadbã fãa periodik rãmb bɩ sɛb a taab ye. Y yam sã n yood ne y sã n tog n kõo ned sebr bɩ y pa na n kõ-a, yaa sõma tɩ y kõ-a seb-vãoogo.

Tigingã pʋgẽ me, koe-moond sã n dat n deeg sɛba, a segd n deegame tɩ zems a sẽn na n tõog n bas ne nebã, pa be ne ligd ning a sẽn tar n na n kõ n teel tʋʋmdã ye. Ligdã d sẽn kõtã pa sẽn na yɩl n yao sɛbã d sẽn deesdã ye. Rẽ sõngdame tɩ b get bũmb nins fãa sẽn teend koe-moonegã yelle. D sã n nand Wẽnnaam tʋʋmdã, d tara ligd wʋsg tɩ d pa tar wʋsgo, d na n kõta wa d sẽn tõe fãa sẽn na yɩl n sõng tɩ tʋʋmdã kẽng taoore. (Mark 12:41-44; 2 Kor. 9:7) Naneb kãng na n kɩtame me tɩ d deegd sɛbã tɩ zemsd tõnd mengã sẽn sɩd ratã tɛka, sẽn na yɩl n da sãamd siglgã ligd zaalem ye.

[Goam sẽn tar pãnga, seb-neng a 2]

Koe-moond segd n talla yam n tõog n bãng a sã n tog n basa sebr ne neda