Yãmb sɛbã sakda gesg bɩ?

D sã n wa na n kãab ned sebre, d segd n soka d meng n ges sebrã sã n sakda gesgo. D sã n kõ ned sebr sẽn põd-põd bɩ sẽn yõbe, sẽn bol rẽgd wall sẽn pãrge, na n sãama a Zeova siglgã yʋʋre. Tõe n kɩtame meng t’a soabã pa bao n na n ges koɛɛg ning sẽn be a pʋgẽ n tõe n fãag-a wã ye.

Wãn to la d tõe n zã d sɛbã sõma? Neb wʋsg mikame tɩ b sã n kɩt tɩ sebr fãa tar a zĩig b koe-moonegã korg pʋgẽ, sõngd-b lame. Wala makre, b yãkda seb bɛdã zĩig toore, periodik rãmbã la seb-biyã zĩig toore, tɩ seb-vãadã la sɛb a taabã me zĩig yaa toore. B sã n yiis Biiblã bɩ sebr a to n wa rat n lebs-a b korgẽ wã, b maagda b yĩng n sui-a sõma tɩ sebr da wa kɩt t’a to põd bɩ n pãrg ye. Koe-moondb kẽer me baooda sũud sẽn yaa yɩlemd n suiid periodik rãmbã ne seb-biyã. D sẽn maand to-to fãa, d segd n modgame n da kõ ned sebr sẽn pa sakd gesgo, sẽn na yɩl tɩ nina ra wa yã bʋʋm n gom Wẽnnaam tʋʋmdã wẽng ye.—2 Kor. 6:3.