D tʋmd ne yam moonegã pʋgẽ
1. Bõe la 1 Korẽnt dãmb 9:26 wilgd tõnd koe-moonegã wɛɛngẽ?
1 Tʋm-tʋmd a Poll yeela woto: “Mam zoetame, la mam ka zoet yaar ye; mam pãbda nug-gila, la mam ka wẽed pemsem ye.” (1 Kor. 9:26) A Poll ra wilgdame t’a yãka yam n na n tʋm Wẽnnaam tʋʋmdã sõma, la t’a pa na n bas tɩ bũmb tiis-a ye. Yaa woto me ne koɛɛgã tõnd sẽn moondã. D tog n tʋma ne yam, sẽn na yɩl tɩ d tʋʋmdã wom biisi. Wãn to?
2. Wãn to la d tõe n dɩk a Poll ne pipi kiris-neb a taabã togs-n-taare?
2 D kẽnd neb wʋsg sẽn beẽ: A Poll ne pipi kiris-neb a taab moona zĩis b sẽn tẽed tɩ b na n yãa neba. (Tʋʋ. 5:42; 16:13; 17:17) Woto yĩnga, sã n yaa zaabr la d moonegã zĩigẽ nebã wʋsg be yiri, yɩta sõma tɩ d moond zak-zak wakat kãngã. D tõe n tags n gesa wakat ning nebã wʋsg sẽn be tẽrã gaarẽ, bɩ biis rãmbã gaarẽ, la wakat ning nebã sẽn yaa wʋsg koosmã zĩisẽ wã, n moond sasa kãense. D sã n maand woto, d na n paama neb wʋsg n taas koɛɛgã.
3. Wãn to la d tõe n moon d moonegã zĩigẽ ne yam?
3 D moon moonegã zĩigẽ ne yam: D segd n moonda d moonegã zĩig me ne yam. Wala makre, koe-moondbã sã n yaa wʋsg tɩ yaa zĩ-yɛng la d yãk n na n tɩ moone, na n yɩɩ toog tɩ nebã fãa paam n moon zags wʋsgo. Sã n yaa woto, yɩta sõma tɩ d pʋɩ nebã zĩis a yiib bɩ sẽn yɩɩd rẽ, la d sõng tɩ b fãa paam zĩis n moone, tɩ ned baa a ye sẽk ra sãam ye. D sã n wa tɩ moond tẽn-bil me, d sã n pʋɩ nebã zĩis wʋsgo, d na n paama neb wʋsg n taas koɛɛgã, la d tõog n sa tao-tao me. D tõeeme me n deeg mooneg zĩig sẽn pẽ ne tõndo, sẽn na yɩl n moon wʋsg n paase.
4. Wala zĩm-yõgdbã, bõe n tõe n sõng tõnd tɩ d tõog n moon neb wʋsgo?
4 A Zezi maka koe-moondbã ne zĩm-yõgdba. (Mark 1:17, MN) Zĩm-yõgdbã tʋʋmd pa b lob b gãmbrã koomã pʋgẽ bal ye. Yaa zĩmã la b rat n yõge. Rẽ n so tɩ b mi n kẽnd zĩig la wakat ning b sẽn tẽed tɩ b tõe n paama zĩmã. La b sã n ta beenẽ, b sɩngda zĩmã yõgb zĩig pʋgẽ. Hakɩka, b tʋmda ne yam. Bɩ tõnd me tʋmd ne yam woto koɛɛgã mooneg pʋgẽ.—Heb. 6:11.