D sõng nebã tɩ b kelg Wẽnnaam
1. a) D tigs-kãseng ning gom-zug sẽn yɩ “Bɩ Wẽnnaam Rĩungã wa!” wã sasa, brochure bʋs la d paam-yã? b) La bõe yĩng tɩ b na n tall yõod wʋsgo?
1 D tigs-kãseng ning gom-zug sẽn yɩ “Bɩ Wẽnnaam Rĩungã wa!” wã sasa, d paama brochure paal a yiibu: Kelg-y Wẽnnaam n paam n vɩɩmd wakat sẽn kõn sa, la Kelg-y Wẽnnaam. B goamã sẽn pa waoogã yĩnga, b lebgr yaa tao-tao la nana. Sɩd me, b sakame tɩ b na n yiis Kelg-y Wẽnnaam n paam n vɩɩmd wakat sẽn kõn sa wã ne buud-goam 431.
2. Ãnd dãmb la brochure kãensã na n sõnge?
2 Ãnd dãmb la brochure kãensã na n sõng n yɩɩda? Bɩ d rɩk makr a naase. Yaa bũmb sẽn wae n maandẽ:
• Koe-moond n sõsd ne neda, n wa bãng t’a soabã pa mi karengo, bɩ a karemdame la pa fasɩ ye.
• Koe-moond n taasd neb koɛɛgã, tɩ d sɛb sẽn be nin-kãens buud-gomdã pʋgẽ wã pa waooge, bɩ pʋd n kae ye. Wall a moonda zĩig nebã wʋsg sẽn pa tõe n karem buud-gomd ning b sẽn wʋmd sõma wã ye.
• Koe-moond sẽn mi mugsã goam n moond ned sẽn yaa muka.
• Roagd n dat n zãms a biig Biiblã, tɩ biigã yaool n nan pa mi kareng ye.
3. B maana Kelg-y Wẽnnaam sebrã t’a yaa wãn-wãna?
3 Seb-kãensã sẽn yaa to-to: Kelg-y Wẽnnaam sebrã pʋgẽ, goamã pa waoog n ta a to wã ye. Seb-nensã fãa la bal tẽngre, b togsda gomd a ye, la b paas vɛrse sẽn teend gomdã. Bõe yĩnga? D rɩk makr ne b sẽn na n kõ yãmb sebr sẽn gʋls ne buud-gomd y sẽn pa tõe n karme. Tõeeme meng tɩ yãmb pa mi gʋls-biisã sẽn yaa to-to wã ye. Baa a sã n tara fot-neeba, rẽ yĩnga a yamleoog na kẽ-y sɩda? Ayo! Woto me, ned nin sã n pa ne sabl tɩ b yaool n kõ-a sebr sẽn tar gʋlsem, a sũurã sãamdame tɩ sebrã yamleoog pa tar-a ye. Rẽ n so tɩ Kelg-y Wẽnnaam sebrã yaa fot-rãmb bala. La seb-neng fãa zugu, fot-rãmbã sã n welgame, b ningda bãnd sẽn wilgd b sẽn pʋgd taab to-to wã, tɩ d tõe n tũ rẽ n sõs pʋgd-pʋgdga.
4. B maana Kelg-y Wẽnnaam n paam n vɩɩmd wakat sẽn kõn sa sebrã t’a yaa wãn-wãna?
4 Brochure a yiibã fãa fot-rãmbã yaa a ye. B yiisa Kelg-y Wẽnnaam n paam n vɩɩmd wakat sẽn kõn sa sebrã, sẽn na yɩl tɩ d tall-a n zãms Biiblã ne neb nins sẽn pa mi kareng sõma wã, bɩ sẽn nan zãmsd-b karengã. D sã n zãmsd ned Biiblã ne Kelg-y Wẽnnaam sebrã, d tõe n geta Kelg-y Wẽnnaam n paam n vɩɩmd wakat sẽn kõn sa sebrã pʋgẽ n sõsd ne-a. Zãmsg fãa tara gom-zug sẽn yaa sokre, n be goabg seb-nensã yĩngri. Goam la b gʋls fot-rãmbã sɛɛgẽ, tɩ vɛrse rãmb be goam kẽer tẽngre. Seb-nens wʋsg tẽngr me, zĩ-gũbr buud n be, tɩ y tõe n sõs rẽ zug n paase, la bee ne karen-biigã minim.
5. Wakat bʋgo, la wãn to la y tõe n kãab ned seb-kãensã?
5 D sẽn tõe n tʋm ne seb-kãensã to-to: Baa pa brochure dãmb la d kãabd nebã kiuugã pʋgẽ, y tõe n kãaba ned brochure kãensã zak-zak moonegã sasa, sã n mikame tɩ na n sõng-a lame. (Ges-y zĩ-gũbrã gom-zug sẽn yet tɩ: “D sẽn tõe n kãab-b to-to” wã.) Y sã n lebg n na n tɩ kaag ned sẽn kelg koɛɛgã, y tõe n yeel-a lame tɩ y tara bũmb n na n kõ-a, la y yiis sebrã n kõ-a, n kell n sɩng Biibl zãmsgo.
6. Wãn to la y tõe n tall brochure kãensã n zãms ned Biiblã?
6 Kelg-y Wẽnnaam sebrã sẽn pa tar sogsgã yĩnga, y sã n sõsd a zug ne neda, pa na n yɩ sogsg la leoor wa y sẽn maand to-to ne Biiblã yetame sebrã ye. Zĩig fãa, nebã nonga kibay kelgre. Woto yĩnga, bɩ y tũnug ne fot-rãmbã n sõng nebã tɩ b bãng kibay nins sẽn be Biiblã pʋgẽ wã. Wilg-y fot-rãmbã sẽn bilgd bũmb ninsã. Gom-y ne yẽesem. Mi n kos-y karen-biigã tɩ yẽ me wilg a tagsgo. Karm-y vɛrse nins sẽn be seb-nensã tẽngrã, la y sõs rẽ zugu. Lebg-y n sok-y sogsg kẽer t’a leoke, tɩ y bãng a sã n wʋmda y sẽn yetã võore. Sã n yaa Kelg-y Wẽnnaam n paam n vɩɩmd wakat sẽn kõn sa wã la y fãa zãada, bɩ y karemd goamã la vɛrse rãmbã.
7. Wãn to la d tõe n sõng karen-biigã t’a paas a bãngrã Biiblã zugu?
7 Sõng-y Biibl karen-biigã t’a paas a bãngrã: Hakɩka, y sẽn maand to-to ne karen-biigã na n sõng-a lame t’a tʋll n bãng sebr karengo, sẽn na yɩl n tõog n zãms Wẽnnaam Gomdã a toore, n bãng a Zeova sõma. (Luk 11:28; Zã 17:3) Karen-biigã sã n pa mi kareng tɩ yaa Kelg-y Wẽnnaam sebrã zug la y sõsd ne-a, a sã n sak bɩ y zãms-a karengo, tɩ rẽ poor bɩ y zãms Kelg-y Wẽnnaam n paam n vɩɩmd wakat sẽn kõn sa wã. Sẽn yaa brochure ning fãa la y zãms-yã, rẽ pa sek karen-biigã na reeg lisg ye. Rẽndame tɩ y reng n zãms-a Biiblã yetame sebrã, bɩ sebr a to sẽn na n sõng-a t’a wʋm Biiblã goam võor sõma.
8. Bõe yĩng tɩ d sũy noomẽ, d sẽn paam tʋʋm-te-paal kãensã wã?
8 Sẽn na yɩl n paam n vɩɩmd wakat sẽn kõn sa, nebã segd n kelga yĩngr la tẽng naabã. (Ezai 55:3) A Zeova ratame tɩ ‘nebã buud fãa’ bãng b sẽn tõe n maan to-to n kelg-a, baa sẽn pa mi-b karengã. (1 Tɩm. 2:3, 4) D sũy nooma wʋsgo, d sẽn paam seb-paal-kãensã, n na n tall n sõng nebã tɩ b bãng b sẽn tõe n maan to-to n kelg Wẽnnaamã.
[Zĩ-gũbri, seb-neng a 3]
D sẽn tõe n kãab-b to-to
Lak-y seb-neng a 2-3 n wilg y sõsd-n-taagã la y sok-a woto: “Yãmb nongẽ lame n wa vɩɩmd dũni sẽn yaa woto pʋgẽ bɩ? [Bas-y t’a leoke.] Wẽnnaam sebrã yetame tɩ ka la bilfu, Wẽnnaam na n kɩtame tɩ dũniyã gill lebg arzãna, tɩ laafɩ la bãan beẽ, tɩ naong la bãas kae ye. Kelg-y bũmb ning ned fãa sẽn segd n maan n paam vɩ-kãnga. [Karm-y Ezai 55:3 sẽn be seb-neng a tãabã yĩngrã.] Be b yetame tɩ d ‘kolg’ Wẽnnaam n ‘kɩll d tʋba.’ La d maanda wãn n kɩll d tʋbr n kelg Wẽnnaam?” Lak-y seb-neng a 4-5 wã tɩ y sõse, t’a bãng leoorã. A sẽkã sã n paoodẽ, bɩ y bas sebrã ne-a la y rɩk sɛk n lebg n wa leoke.