D moond koɛɛgã ne seb-vãadã
1. Bõe n wilgd tɩ Wẽnnaam nin-buiidã sɩng n moonda koɛɛgã ne seb-vãado?
1 A Zeova Kaset rãmbã sɩng n moonda koɛɛgã ne seb-vãadã. Yʋʋmd 1880 wã, saam-biig a C. T. Russell ne a tʋmd-n-taasã yiisa seb-vãad b sẽn da boond tɩ Bible Students’ Tracts (Tracts des Étudiants de la Bible). B ra kõta neb nins sẽn karemd Gũusg Gasgã, tɩ bãmb pʋɩt nebã. Yʋʋmd 1884, a C. T. Russell ne a tʋmd-n-taasã baoo yʋʋr n pʋd siglgã sẽn tʋmd Wẽnnaam Rĩungã yɛl na kẽng taoor yĩng la pa ligd yĩngã. B maana woto sẽn na yɩl n tũ laloa wã. La seb-vãadã sẽn da tar yõod wʋsg b nifẽ wã yĩnga, b pʋda siglgã tɩ Zion’s Watch Tower Tract Society, tɩ b boond masã tɩ Watch Tower Bible and Tract Society of Pennsylvania. Gom-bil ning sẽn yaa “Tract” võor yaa seb-vãoogo. Yʋʋmd 1918 tɛk tɩ Biiblã Zãmsdbã zoe n pʋɩɩ seb-vãad sẽn yɩɩd milyõ 300. Seb-vãadã tall n moonã ket n womda biis hal sõma.
2. Bõe n kɩt tɩ seb-vãadã tall n moon womd biisi?
2 Bũmb ning sẽn kɩt tɩ womd biisã: Seb-vãadã yaa neere, tɩ b gesg me be yamleoogo. B goamã sẽn pa waoogã kɩtame tɩ b kareng be yamleoog la kẽed ned sõma. Naoor wʋsgo, neb nins sẽn tagsd tɩ periodik rãmbã la seb-bɛdã kareng yaa toogã nonga seb-vãadã. Seb-vãadã wilgr yaa nana, baa ne sẽn nan sɩng-b koe-moonegã la kambã. Sẽn paase, b sẽn yaa kɩdsã kɩtame tɩ b zãab yaa nana.
3. Togs-y kibar y sẽn tare, wall y sẽn karem tõnd sɛbã pʋgẽ, sẽn wilgd seb-vãadã yõodo.
3 Tũu ne seb-vãadã tɩ neb wʋsg wʋm koɛɛgã pipi. Wala makre, Haiti pag a ye n yã d seb-vãoog sor zug n dɩke. A sẽn karmã, a yeela woto: “M bãnga sɩdã.” A wa n kẽnga Rĩungã roogẽ, la a sak n na n zãms Biiblã. A reega lisgu. La woto fãa yaa a sẽn yã Wẽnnaam goam nins sẽn da be seb-vãoogã pʋgẽ wã.
4. Sã n wa yaa seb-vãadã la d kãabd nebã, d raabã segd n yɩɩ bõe?
4 Zak-zak moonegã sasa: Sẽn mik tɩ seb-vãadã tall n moon womda biis sõma wã, sɩpaolg kiuugã tɛka, b na n mi n kɩtame tɩ d kãabd nebã rẽ. D sẽn datã pa d basd seb-vãad ne nebã ye. D ratame n tall-b n sɩng sõsg ne nebã. Yaa d pipi sõsgã sasa tɩ yaa d sẽn lebg n na n tɩ kaag neda, d sã n mik t’a rat n bãng n paasame, d tõe n talla Biiblã yetame sebrã bɩ Biibl zãmsg sebr a to, n wilg-a Biiblã zãmsg sẽn maand to-to. D sã n wa moond zak-zaka, d maanda wãn n kãab ned seb-vãoogo? Seb-vãadã sẽn yaa toor-toorã yĩnga, d tog n bao n bãnga d sẽn tõe n kãab d sẽn tar-b rãmbã to-to.
5. Wãn to la d tõe n tall seb-vãadã n moon zak-zaka?
5 D segd n tɩʋʋsa d goamã n zems ne moonegã zĩigẽ nebã la seb-vãad nins d sẽn tarã. D sã n na n sɩnge, d tõe n kõo d kelgdã seb-vãoogã. A neermã tõe n kɩtame t’a rat n karm-a. D leb n tõe n wilg-a-la seb-vãad wʋsgo, n yeel t’a yãk sẽn noom yẽ. D sã n moond zĩig nebã sẽn pa basd tɩ b kẽed b zagsẽ, bɩ d gãd seb-vãoogã t’a soab sã n lɩk bal bɩ a tõe n yã, wall d yeel-a t’a sã n sake, d na n lɩka kʋɩlengã tẽngr n kõ-a seb-vãoog t’a ges la a togs-d a sẽn tagsde. Seb-vãoogã gom-zugã sã n yaa sokre, d tõe n yeel-a lame t’a sã n tõe bɩ a leoke. Tõnd mengã tõe n tags n baoo sokr sẽn na n kɩt t’a rat n karem seb-vãoogã. Rẽ poore, d tõe n yãka zĩig n karem t’a kelge, tɩ d sã n seg sokr bɩ d kos-a t’a wilg a sẽn tagsde, la d yãk vɛrse n karme, n yaool n kʋ sõsgã la d rɩk sɛk n lebg n tɩ sõs ne-a. Sã n mik tɩ yãmb tigingã neb minim n basda sɛb neb nins sẽn ka yirã yĩnga, y tõe n basda seb-vãadã me.
6. Wãn to la d tõe n tall seb-vãadã n moon soayã noy?
6 Soayã noy moonegã: Yãmb zoe n talla seb-vãadã n moon soayã noy bɩ? So-loaadbã sẽn wae n yãgdẽ wã yĩngã, b tõeeme n pa rat n yals n sõs ne-d ye. Kɩtame tɩ nong n yaa toog tɩ d bãng sẽn sɩd rat-bã. Dẽnd yɩta sõma tɩ d kõt-b seb-vãadã, la d ra kɩt periodik paalã n yaool n pa mi b sã n na n sɩd karmame ye. Seb-vãadã sẽn yaa neeba, tɩ b goamã pa waoogã tõe n kɩtame tɩ nebã tʋlg n karem-ba, b sã n wa paam vɩʋʋg bilfu. La yaa vẽeneg tɩ d sã n seg ned sẽn pa yãgde, d tõe n talla seb-vãoogã n sõs ne-a.
7. Togs-y kibay sẽn wilgd d sẽn tõe n tall seb-vãadã n moon to-to, baa d pa yi koe-moonegã yĩnga.
7 Koe-mooneg sẽn pa yãk wakate: Baa d pa yi koɛɛgã mooneg yĩnga, d tõe n talla seb-vãadã n moon segb buud fãa sasa. Saam-biig a ye minim n suiida seb-vãadã a loaabẽ a sã n wa yita. A sã n seg neda, wa ned sẽn koosd teedo, a yetame t’a na n kõ-a-la sebr t’a karme, n yãk seb-vãoog n kõ-a. Pag ne a sɩd n da rat n kẽng Niuyork n tɩ gilg n ges tẽngã. B tẽegame tɩ b na n paam n sega tẽn-zẽms neb wʋsgo. Rẽ n so tɩ b rɩk Une bonne nouvelle pour toutes les nations sebrã, n paas seb-vãad ne buud-goam toɛy-toɛya. B sã n wʋm ned sẽn gomd buud-gom-zẽnga, yaa ned sẽn koosd teedo, wall b mik-a-la parkẽ bɩ rɩɩb koosg zĩigẽ, b kõta a soab seb-vãoog ne a buudã gomde.
8. Bõe yĩng tɩ d tõe n yeel tɩ seb-vãadã yaa wa bõn-buudu?
8 “Bʋd f bõn-buudu”: Seb-vãadã yaa wa bõn-buudu. Naoor wʋsgo, ka-koaad sẽn pa tõe n bãng bõn-buud nins sẽn na n sak n bul n yi wã yĩnga, a mi n fẽrgd-b lame. Koɛɛg Soab 11:6 yeta woto: “Bʋd f bõn-buud yibeoogo, la ra bas f nus tɩ yɩ zaalem zaabr ye. Tɩ bõe, fo ka mi a yembr wall a to sã n na n tõogame, wall a yiibã fãa sã n na n yɩɩ sõma ye.” Seb-vãadã tall n moon sẽn womd bɩɩs sõma wã, bɩ tõnd me wɩng n ket n yelgd “yam goamã” zĩig fãa ne rẽ maasem.—Yel. 15:7.
[Zĩ-gũbri, seb-neng a 3]
Sẽn mik tɩ seb-vãadã tall n moon womda biis sõma wã, sɩpaolg kiuugã tɛka, b na n mi n kɩtame tɩ d kãabd nebã rẽ