Ãnd dãmb n maand a Zeova raabã rũndã-rũndã?
1. Wakat bʋg la d na n sɩng Ãnd dãmb n maand a Zeova raabã rũndã-rũndã? sebrã zãmsgo, la wãn to la na n naf-do?
1 Zĩ-likr kiuug rasem 28 semennã tɛka, tigimsã na n sɩnga Ãnd dãmb n maand a Zeova raabã rũndã-rũndã? sebrã zãmsgo. D paama seb-kãngã d rasem a tãab tigs-kãseng ning gom-zug sẽn yɩ “Bɩ f gũus ne f sũurã tagsgã” sasa. B sẽn maan-a to-to wã yaa sẽn na yɩl tɩ d tall-a n sõng Biiblã karen-biisã tɩ b bãng tõnd siglgã. Seb-kãngã zãmsg na n kɩtame tɩ d maneg n pẽg d sẽn paam n yaa a Zeova siglgã nebã, la sõng-d me tɩ d bãng n tall-a n sõng nebã koe-moonegã pʋgẽ.—Yɩɩl 48:14.
2. Sebrã zãmsg na n yɩɩ wãn-wãna?
2 Zãmsgã sẽn na n yɩ to-to: Sẽn na n lʋɩ-a zãmsgã taoorã segd n maoome tɩ sak fãa zãmsg ra loog wakatã ye. Sebrã sags 28 wã a ye fãa sɩngrẽ, taoor-lʋɩtã na n deng n karma gom-zugã sẽn yaa sokrã, la a kɩt tɩ karemdã karem pipi sullã. A sã n karem n sa, taoor-lʋɩtã na n soka kɛlgdbã sokr a sẽn segl pipi sullã zugu. Rẽ poore, a na n kotame tɩ karemdã karemd sull fãa sẽn sɩngd ne gʋls-bi-tagdã tɩ b sõsd ball-balle. Sull fãa kareng poore, taoor-lʋɩtã na n kɩtame tɩ b wilg a sẽn leokd zãmsgã gom-zug sẽn yaa sokrã to-to. Sebrã tara fot-rãmb wʋsg me tɩ d tõe n gom b yell zãmsgã sasa. Sẽk sã n beẽ, b segd n karma vɛrse rãmb nins sẽn tar yõod n yɩɩdã. Zãmsg fãa baasgẽ, nand tɩ b sɩng sẽn pʋgd-a wã, taoor-lʋɩtã na n soka sogsg nins sẽn be seb-nengã tẽngrã n kɩt tɩ kɛlgdbã kʋms zãmsgã. Zĩ-gũbr ning gom-zug sẽn yaa “Y sẽn tõe n maan me” wã sã n be sak pʋgẽ, bɩ a kɩt tɩ b karm-a la a kos kɛlgdbã tɩ b wilg rẽ sẽn tõe n naf Biiblã karen-biig to-to. Zãmsg fãa baasgẽ, sẽk sã n beẽ, taoor-lʋɩtã tõe n tika gom-zugã n maan lebg-n-gese. La bãng-y tɩ d sẽn wilgã fãa, yaa tigingã Biibl zãmsgã yĩng bala. Y sã n na n tall seb-kãngã n zãms ned Biiblã, pa tɩlae tɩ y maan woto ye.
3. Bõe n na n sõng-d tɩ d tõog n dɩ sebrã zãmsg yõod tɩ pidi?
3 Sẽn na yɩl n dɩ zãmsgã yõod sõma, rẽndame tɩ y segl y meng neere. Modg-y n kõt-y leoore. Sõsgã sasa bɩ y bao n bãng zãmsgã sẽn tõe n naf Biibl karen-biig to-to. Bɩ seb-kãngã sõng-y tɩ y tõog tɩ nebã wa naag-d n maan Wẽnnaam daabã, n wa paam n vɩɩmd wakat sẽn pa sate.—1 Zã 2:17.