D sẽn na n zãms nebã Ãnd dãmb n maand a Zeova raabã rũndã-rũndã? sebrã to-to
D na n tall n sõnga Biiblã karen-biisã tɩ b bãng tõnd siglgã
1. B yiisa sebrã bʋʋm a tãab yĩnga. Yaa bʋse?
1 Yãmb zoe n sɩngame n zãmsd ned Ãnd dãmb n maand a Zeova raabã rũndã-rũndã? sebrã bɩ? Sebrã na n sõnga Biiblã karen-biisã tɩ b bãng 1) tõnd sẽn yaa neb ninsi, 2) tʋʋmd ning tõnd sẽn tʋmdã, la 3) tõnd siglgã sẽn maand bũmb ninsã. A Zeova raabã sebrã zãmsg fãa yaa seb-neng a ye, tɩ y tõe n dɩk minit a nu bɩ piig n sõs a zug ne y karen-biigã, Biibl zãmsg fãa poore.
2. Wilg-y sebrã sẽn yaa to-to.
2 Sebrã sẽn yaa to-to: Sebrã tara babs a tã, tɩ babg fãa gomd bũmb takɩ yell a Zeova siglgã zugu, wa d sẽn zoe n gom pipi sullã pʋgẽ wã. Sebrã tara zãmsg 28. Zãmsg fãa gom-zug yaa sokre, tɩ gom-zu-bõones nins sẽn yaa tagd-tagdã leokd sokrã. Yaa tẽns 50 la zak fot-rãmb n be seb-kãngã pʋgẽ, n wilgd tõnd sẽn maand bũmb ning dũniyã gill zugu. Sebrã zãmsg kẽer tara zĩ-gũbr gom-zug sẽn yaa “Y sẽn tõe n maan me.” Sagls n be be y sẽn tõe n tall n sõng y karen-biiga.
3. Wãn to la d tõe n zãms ned A Zeova raabã sebrã?
3 D sẽn tõe n zãms ned sebrã to-to: Reng-y n wilg-y-yã a soabã zãmsgã gom-zugã sẽn yaa sokrã. Rẽ poor bɩ y naag taab n karem sullã, la y sõs gom-zu-bõonesã sẽn yaa tagd-tagdã zugu. Baasgo, bɩ y sok-a sogsg nins sẽn be tẽngrã t’a leoke. Y sã n data y tõe n karma seb-nengã tõr tɩ y yaool n sõs a zugu, pa rẽ bɩ y karemd sull fãa, la y sõsd a zugu. Reng-y n yãk-y vɛrse nins y sẽn na n karmã. Gom-y fot-rãmbã yelle, la y sõs zĩ-gũbr ning gom-zug sẽn yaa “Y sẽn tõe n maan me” wã zugu. Y tog n sɩnga sõsgã ne pipi zãmsgã n tãag yaoolem soabã. La pa wẽng tɩ y long zãmsg n sõs zãmsg a to sẽn pak karen-biigã n yɩɩdã zug ye. Wala makre, sã n mikame tɩ tigs-kãseng n kolge, y tõe n long n kẽnga zãmsg 11 wã.
4. Bõe n kɩt tɩ d sũur noom ne seb-paalgã?
4 D sã n zãmsd ned Biiblã, d sõngd-a lame t’a bãng d saasẽ Ba wã sõma. La sẽn paase, d tog n sõng-a lame t’a bãng a Zeova siglgã. (Yel. 6:20) Ad d sũy nooma wʋsgo, d sẽn paam seb-kãngã n na n tall n sõng nebã rẽ wɛɛngẽ wã!