D tall Koe-noogã sebrã n zãms neb Biiblã
1. Wãn to la b gʋls Koe-noogã sebrã?
1 Sẽoog kiuug Rĩungã Tʋʋmd sebr pʋgẽ, d wilgame tɩ Koe-noogã sebrã yaa d tʋʋm-teoog a ye sẽn tar yõod wʋsgo. D pa gʋls vɛrse-rãmbã goam sebrã pʋgẽ ye. Yaa sẽn na yɩl tɩ kɛlgdã lak a Biiblã n karem vɛrse-rãmbã. D sẽn gʋls d sɛbã d sẽn tar n zãmsd nebã Biiblã to-to wã kɩtame tɩ ned ning fãa sẽn karemd sɛbã tõe n wʋm a võore, tɩ pa tũ ne tõnd sõngr ye. La seb-kãngã yaa toore. B gʋls-a lame tɩ ned sã n dat n wʋm a võore, rẽnda koe-moond sõng-a. Dẽnd nand tɩ d kõ ned sebrã, d segd n wilg-a-la d sẽn zãmsd nebã Biiblã to-to, tɩ sõng-a t’a bãng tɩ Biiblã koe-nood sɩd bee yamleoogo.—Mat. 13:44.
2. Wãn to la y tõe n tall Koe-noogã sebrã n sõs ne ned y pipi kaagrã sasa?
2 Pipi kaagrã sasa: Y tõe n yeela woto: “Neb wʋsg tagsda dũni-kãngã sẽn na n baas to-to wã yelle. Yãmb tagsdame tɩ d tõe n tẽe manegr bɩ? [Bas-y t’a leoke.] Koe-nood n be Biiblã pʋgẽ n kɩt tɩ d tẽed manegre. Ad sogsg kẽer Biiblã sẽn leokde.” Kõ-y y kɛlgdã sebrã, la y yeel-a t’a ges yaoolem nengã n yãk sokre. Dẽ poor bɩ y tik zãmsg ning a sẽn yãkã pipi sullã, n wilg-a d sẽn zãmsd nebã Biiblã to-to. Y leb n tõe n sok-a-la sokr sẽn be sebrã pʋgẽ, la y wilg-a sebrã sẽn tõe n sõng-a t’a bãng Biiblã sẽn leokd sokrã to-to. Video sã n be jw.org pʋgẽ n zems ne zãmsgã, koe-moondb kẽer mi n ningame tɩ b kɛlgdã gese.
3. Wãn to la y segd n tall sebrã n zãms ned Biiblã?
3 Y sẽn segd n zãms ned sebrã to-to: 1) Sok-y sokr ning b sẽn gʋls tagd-tagdã n sõng kɛlgdã t’a tags zãmsgã zug neere. 2) Karm-y sull ning sẽn be sokrã tẽngrã. 3) Karm-y vɛrse nins b sẽn yeel tɩ b karmã, la y sok kɛlgdã sogsg sẽn na n sõng-a t’a bãng Biiblã sẽn yete. 4) Sã n yaa sul wʋsg n be sokrã tẽngre, bɩ y tũ saglg a yiib-n-soabã ne a tãab-n-soabã. Video sẽn zems ne zãmsgã sã n beẽ tɩ y na n pa ningi, bɩ y bao wakat n ning tɩ y kɛlgdã gese. 5) Sẽn na n baase, kos-y kɛlgdã t’a leok sokr ning b sẽn gʋls tagd-tagdã n bãng a sã n wʋma sullã võor sõma.
4. Bõe n tõe n sõng-d tɩ d tall sebrã n zãms nebã Biiblã sõma?
4 Bao-y n bãng-y bũmb nins sẽn be sebrã pʋgẽ wã sõma. Y sã n paam segb fãa, bɩ y tall sebrã n zãms neb Biiblã. Nand tɩ y tɩ zãms ned Biiblã, bɩ y reng n tags a soabã yell neere, la y bao n bãng y sẽn tõe n tik vɛrse-rãmbã sẽn be sebrã pʋgẽ wã, n sõs ne-a tɩ kẽ-a. (Yel. 15:28; Tʋʋ. 17:2, 3) Y minimã sã n paasdẽ, tõe tɩ y na n maneg n nonga sebrã wʋsgo, n tar-a n zãmsd neb Biiblã.