D gũus n da sãam siglgã sɛbã ye

A Zeezi yeelame: “Yãmb deega zaalem, bɩ y kõ zaalem.” (Mat. 10:8) Tõnd tũuda a Zeezi sẽn yeelã, n pa koosd Biibl-dãmbã la sɛbã d sẽn yiisdã ye. (2 Kor. 2:17) Goam nins sẽn be d sɛbã pʋsẽ wã yaool n yita Wẽnnaam Gomdã pʋgẽ. D yiisda ligd wʋsgo, la d modgd sẽn na yɩl tɩ sɛbã ta tigimsã sẽn be dũniyã gill zugã. Rẽ wã yĩnga, koe-moond fãa pa segd n deeg tɩ zʋʋg a sẽn na n tall n moonã ye.

Baa yaa zãma sʋk la d moonda, d gũus ne sɛbã kũuni. (Mat. 7:6) D pa segd n pʋɩt sɛbã yaar ye. D tog n modgame n sõs ne a soabã n bãng koɛɛgã sã n sɩd noom-a lame. Karm-y sogsg nins sẽn be zĩ-gũbrã pʋgẽ wã n ges y sã n tõe n leokame tɩ n-ye, baa yaa a yembre. Y sã n pa tõe n bãng koɛɛgã sã n nooma neda, yɩta sõma tɩ y kõ-a seb-vãoogo. La a sã n kos periodik bɩ sebr a to, bɩ y kõ-a.—Yel. 3:27, 28.