Y SẼN TÕE N MAAN N DA LE KISG Y TAABÃ

2 | Da bao-y n dok y sũur ye

Biiblã sẽn yete:

“Ra lebs-y ned baa a ye wẽng wẽng yĩng ye. . . . Sã n tõeyã, la sã n bee ne yãmb bɩ y kɩt tɩ laafɩ zĩnd yãmb ne nebã fãa sʋka. . . . Da rok-y y sũur y toor ye. . . . Bala, b gʋlsame: ‘A Zeova yeelame yaa: “Sũ-dokr yaa maam n so.” Maam n na n keo.’”—ROM DÃMBÃ 12:17-19.

Rẽ sẽn dat n yɛɛlga:

Ned sã n maan-d wẽnga, sãamda d sũuri. La Wẽnnaam pa rat tɩ d maan a soab wẽng n lebs ye. A pʋd n datame tɩ d tall sũ-mar n gũ-a, bala ka la bilfu, a na n kɩtame tɩ wẽng buudã fãa sa.—Yɩɩn-sõamyã 37:7, 10.

Y sẽn tõe n maane:

Ninsaalbã sẽn pa zems zãngã sã n dokd b sũuri, kɩtdame tɩ kisgrã tar yelgre. Dẽnd ned sã n sãam y sũur bɩ n maan y wẽnga, bɩ y ra maan-a n lebs ye. Modg-y n da yik y sũur ye. Tall-y yõk-m-menga, sẽn na yɩl tɩ laafɩ le zĩnd y sʋka. Wakat ninga, yɩta sõma tɩ y bas yellã tɩ sa. (Yel-bũnã 19:11) La wakat ning me, yɩta sõma tɩ y bao n welg yellã. Wala makre, b sã n maan-y bũmb sẽn kɩɩsd tẽngã laloa wã, y tõe n yãka yam n tɩ togs tẽn-gãand-bãan-dãmbã.

Kisgrã wãada neda

La sã n wõnda yaa toog tɩ y welg yellã n paam tɩ laafɩ zĩndi? Wall y sã n zoe n maana y sẽn tõe fãa n na n welg yellã tɩ ket n pa yãk nenga? Da rok-y y sũur ye. Bala rẽ tõe n maneg n zẽna yellã. Y sã n pa bao n dok y sũuri, tõe n kɩtame tɩ kisgrã sa. Y tõe n basa y yam tɩ Wẽnnaam sẽn dat tɩ y welg yellã to-to wã la sõma n yɩɩda. Biiblã yetame: “Teeg bãmba, la bãmb na manege.”—Yɩɩn-sõamyã 37:3-5.

Ned vɩɩm kibare—A ADRIYÃN

A tõogame n pa rok a sũur ye

A Adriyãn sẽn wa n yaa bi-bɩɩga, a ra nonga zaba, tɩ ned sã n da maan-a wẽng bɩ a maan-a n lebse. Ad a sẽn yeele: “M da nong n naagda neb sẽn zabd ne bug-raado. B zoe n tãoo maam ne bug-raoog n da tẽed tɩ m kiime, n loog n bas maam. La pa yɩ vugr bal ye.”

A Adriyãn sɩnga Biiblã zãmsgo, a sẽn wa n tar yʋʋm 16. A yeelame yaa: “M sẽn da ket n zãmsd Biiblã, m bãngame tɩ m da segd n toeema bũmb wʋsg m vɩɩmã pʋgẽ.” Ra yaa tɩlɛ t’a Adriyãn bas nebã kisgri, la nen-kɛglem tʋʋmã. A sẽn bãng tɩ Rom-dãmb 12:17-19 wã yetame tɩ d ra lebs wẽng wẽng yĩngã sõng-a-la wʋsgo. A yeelame: “M wa n sakame tɩ yaa a Zeova n tõe tɩ wẽgb buudã fãa sa, la tɩ na n yɩɩ wakat ning a sẽn yãkã. Bilf-bilfã, m wa n tõog n basa nen-kɛglem tʋʋmã.”

Daar a ye zaabre, bi-bees sull n wa n na n zab ne a Adryiãn. B taoor soabã yeel-a lame yaa: “Wa tɩ d zabe.” Ad a Adriyãn sẽn yeele: “M da rata ne m sũur fãa n wẽ-a n lubi.” La a pa maan woto ye. A pʋʋsa a Zeova a sũurẽ koɛɛg-koɛɛga, la a kẽng n looge.

A Adriyãn paasame yaa: “Vẽkembeoogã m sega bi-beesã taoor soab sẽn da kẽnd a yembre. M sẽn yã-a wã, m sũurã yikame tɩ m dat n zab ne-a. La m le pʋʋsa a Zeova m sũurẽ, n kos-a t’a sõng-m tɩ m tõog m sũurã. Bi-bɛɛgã maana bũmb sẽn ling-ma. A wa n yalsa mam taoor n yeel-m yaa: ‘Maan m sugr ne bũmb ning m sẽn maan zaamẽ wã. Sɩd-sɩdã, m dat n lebga wa foo. M datame me n zãms Biiblã.’ M sũurã yɩɩ noog wʋsgo, m sẽn tõog n yõk m mengã. Rẽ poore, d naaga taab n zãmsd Biiblã.”