Tall-y raood wa a Zadok

1-2. A Zadok ra yaa ãnda? (1 Kibayã 12:22, 26-28)

MAMS-Y n ges-y rap tus kobs-tã la pis-naas la zak sẽn tigim taaba. B tigma taab n na n kɩt t’a Davɩɩd lebg Israyɛll tõrã rĩma. Rasem a tãab tõre, b ra sõsdame, n yɩɩnd n pẽgd a Zeova la b laadẽ tɩ rãamdã tat tãensã sẽn be Ebrõ sɛɛgẽ wã. (1 Kib 12:39) Bi-bɩɩg a ye n da be kʋʋngã sʋk t’a yʋʋr boondẽ t’a Zadoke. Tõe tɩ neb wʋsg pa bãng t’a ra bee kʋʋngã sʋk ye. La a Zeova yẽ bãngame n dat tɩ tõnd me bãng t’a ra bee be. (Karm-y 1 Kibay 12:22, 26-28.) A Zadok ra yaa ãnda?

² A Zadok ra yaa maan-kʋʋda, n da naag maan-kʋʋdb-kãsem a Abiyataar n tʋmdẽ. A Zadok ra yaa gɛta, n da tõe n bãng Wẽnnaam daab n togse, la sẽn da tar yam-vẽenem wʋsgo. (2 Sãm. 15:27) Nebã sã n da rat saglse, b kẽngda a Zadok nengẽ. A ra yaa ned sẽn tar daood me. Yaa rẽ yell la d na n gom sõs-kãngã pʋgẽ.

3. a) Bõe yĩng t’a Zeova nin-buiidã segd n tall raoodo? b) Bõe yell la d na n gom sõs-kãngã pʋgẽ?

³ Rũndã-rũndã sẽn yaa yaoolem wakatã, a Sʋɩtãan maneg n maoodame n dat n sãam tõnd tẽebã. (1 Pɩy. 5:8) Rẽ n so tɩ d segd n tall raood n gũ wakat ning a Zeova sẽn na n sãam a Sʋɩtãan ne a dũniyã. (Yɩɩn. 31:24) D na n yãa bũmb a tãab d sẽn tõe n maan n tall raood wa a Zadoke.

TEEL-Y WẼNNAAM RĨUNGÃ

4. Bõe yĩng tɩ yaa tɩlɛ t’a Zeova Kaset rãmbã tall raood sẽn na yɩl n tõog n teel Wẽnnaam Rĩungã? (Ges-y fotã me.)

⁴ D sẽn yaa a Zeova nin-buiidã yĩnga, d teenda Wẽnnaam Rĩungã ne d sũur fãa. La mi n yaa tɩlɛ tɩ d tall raood n tõog n maan rẽ. (Mat. 6:33) Wala makre, d sẽn be dũni-kãngã sẽn yaa wẽngã pʋgẽ wã, yaa tɩlɛ tɩ d tall raood n tõog n tũ a Zeova noyã la d moon Rĩungã koe-noogã. (1 Tes. 2:2) Sẽn paase, politikã sẽn kɩt tɩ dũniyã nebã kɩɩsd taab wʋsgã, yɩl n tõog n da kẽes d toog no-koeem-kãens pʋsẽ baooda raoodo. (Zã 18:36) A Zeova Kaset rãmbã sẽn zãgsd tɩ b kõn kẽ sodaarã wall b kẽes b meng politikã yɛlẽ wã yĩnga, wʋsg tara ligd zu-loeese, b pãba kẽere, la b yõg sãnda n pag bãens roto.

5. Bõe yĩng tɩ ra yaa tɩlɛ t’a Zadok tall raood n tõog n teel a Davɩɩde?

⁵ A Zadok sẽn kẽng Ebrõ wã pa sẽn na n tɩ naag n maan tigrã a Davɩɩd sẽn lebg rĩmã yĩng bal ye. A zãa a zab-teedã n kẽnge, n da segl n sa zabr yĩnga. (1 Kib 12:38) A ra sakd n yãagda a Davɩɩd ne yamleoog tɩ b kẽnd n zabd ne Israyɛll bɛɛba. Tõe t’a Zadok ra pa tar minim zabr wɛɛngẽ ye. La a ra tara raood wʋsgo.

6. Wãn to la a Davɩɩd kõ a Zadok mak-sõng raoodã wɛɛngẽ? (Yɩɩn-sõamyã 138:3)

⁶ Bõe n kɩt t’a Zadok sẽn yaa maan-kʋʋdã wa tar raood woto? A ra wae n bee ne rap sẽn tar pãng la raoodo. Yaa vẽeneg tɩ b mak-sõngã naf-a lame. Wala makre, a Davɩɩd sẽn da ‘lʋɩt Israyɛll tãb-biisã taoor tɩ b kẽnd zabrã,’ kɩtame tɩ Israyɛll nebã fãa ra teend-a ne b sũur fãa. (1 Kib 11:1, 2) Wakat fãa a Davɩɩd ra teegda a Zeova t’a sõng-a t’a zab ne a bɛɛbã. (Yɩɩn. 28:7; karm-y Yɩɩn-sõamyã 138:3.) A Zadok rɩka yam neb a taab nengẽ, wala makre a Zehoyada ne a biig a Benaya sẽn da yaa zabr gãndaoogã, ne buud nanambs 22 sẽn da teend a Davɩɩdã. (1 Kib 11:22-25; 12:26-28) Ra-kãensã fãa yãka yam n na n teel a Davɩɩd naamã la b kogl-a.

7. a) Rũndã-rũndã, ãnd rãmb n kõt mak-sõng raoodã wɛɛngẽ? b) Y sẽn ges video wã, yam-bʋg la y tõe n dɩk saam-biig a Nsilu kibarã pʋgẽ?

⁷ D sã n bʋgs neb nins sẽn tall raood n teel a Zeova naamã mak-sõngã zugu, na n sõng-d lame me tɩ d tall raoodo. D Rĩm a Zeezi Kirist sẽn wa n be tẽngã zugã, a talla raood n pa kẽes a toog politikã yɛlẽ ye. (Mat. 4:8-11; Zã 6:14, 15) A ra teegda a Zeova wakat fãa t’a kõ-a raoodo. Rũndã-rũndã me, kom-bɩɩs wʋsg n zãgs tɩ b pa na n kẽ sodaare, wall tɩ b pa na n kẽes b toog politikã yɛlẽ ye. Y tõe n kẽe jw.org pʋgẽ n karem b kẽer kibaya.a

SÕNG-Y Y TẼED-N-TAASÃ

8. Bõe n tõe n kɩt tɩ yɩ tɩlɛ tɩ kãsem-dãmbã tall raood n tõog n sõng b tẽed-n taasã?

⁸ A Zeova Kaset rãmbã nonga taab sõngre. (2 Kor. 8:4) La wakat ninga baoodame tɩ d tall raood n tõog n maan rẽ. Wala makre zabr sã n mi n yik tẽng pʋgẽ, kãsem-dãmbã yãtame tɩ b tẽed-n-taasã rata raood kengre, teelgo, la tõe meng tɩ b rata sõng-vẽenega, wall tɩ b sõng-b tɩ b paam bũmb nins sẽn kengd b tẽebã. Kãsem-dãmbã sẽn nong b tẽed-n-taasã yĩnga, b gẽnegda b yõor sẽn na yɩl n sõng-b tɩ b paam bũmb nins sẽn yaa tɩlɛ ne-bã. (Zã 15:12, 13) B sẽn maand woto wã, b rɩkda a Zadok togs-n-taare.

9. Sã n yaa ne 2 Sãmwɛll 15:27-29 wã, bõe la a Davɩɩd yeel a Zadok t’a maane? (Ges-y fotã me.)

⁹ D ges a Zadok sẽn sõng a saam-biisã to-to toog wakate. A Davɩɩd biig a Absalom ra baood n kʋʋ a Davɩɩd n deeg a naamã. (2 Sãm. 15:12, 13) Yɩɩ tɩlɛ t’a Davɩɩd zoe n yi Zerizalɛm. A yeela a tʋm-tʋmdbã yaa: “Yik-y tɩ d zoe, sã n pa rẽ, tõnd ned baa a ye pa na n põsg a Absalom ye.” (2 Sãm. 15:14) A Davɩɩd ne a tʋm-tʋmdbã sẽn wa n loogdẽ wã, a bãngame tɩ yaa tɩlɛ tɩ ned pa Zerizalɛm n bao n bãng a Absalom sẽn dat n maan bũmb ningã. Rẽ n so t’a yeel a Zadok ne maan-kʋʋdb a taab tɩ b leb tẽngã pʋg n tɩ gũus n ges a Absalom sẽn na n maan bũmb ningã. (Karm-y 2 Sãmwɛll 15:27-29.) B ra segd n maana gũusg wʋsgo. A Davɩɩd sẽn da rat tɩ b maan bũmb ningã ra tõe n waa ne yelle. Ra tõe n tũu ne b yõor menga. A Absalom ra yaa rat-m-ye soaba, ned sẽn nong sũ-dokre, la zãmb soaba. A sã n da bãng t’a Zadok ne maan-kʋʋdb a taabã sõngda a Davɩɩde, mams-y n ges-y a sẽn na n maan-b bũmb ningã.

10. Bõe la a Zadok ne neb nins sẽn da be ne-a wã maan n sõng a Davɩɩde?

¹⁰ A Davɩɩd kosa a Zadok ne a Husayi me sẽn yaa a zoa wã, tɩ b maan bũmbu. (2 Sãm. 15:32-37) A Husayi ra segd n maana wa a teenda a Absalom, n wilg-a a sẽn tõe n zab ne a Davɩɩd to-to, tɩ kõ-a Davɩɩd weer t’a tõog n segl a menga. Rẽ poore, a Husayi togsa a Zadok ne a Abiyataar bũmb ning a Absalom sẽn magd n na n maanã. (2 Sãm. 17:8-16) Nin-kãensã b yiibã kelga a Husayi sẽn yeelã n modg tɩ ta a Davɩɩde. (2 Sãm. 17:17) Ne a Zeova sõngre, a Zadok ne maan-kʋʋdb a taabã tõog n sõngame tɩ b pa paam a Davɩɩd n kʋ ye.—2 Sãm. 17:21, 22.

11. Bõe la d tõe n maan n tall raood wa a Zadok n sõngd d tẽed-n-taasã?

¹¹ D sã n wa segd n sõng d tẽed-n-taasã yel-pakr wakate, wãn to la d tõe n tall raood wa a Zadoke? 1) Tũ-y noyã. Sã n wa yaa woto, yɩta sõma tɩ d yɩ sakdba, sẽn na yɩl tɩ zems-n-taar kell n zĩnd d sʋka. Tũ-y noy nins Betɛllã sẽn na n kõ wã. (Ebre. 13:17) Kãsem-dãmbã segd n mi n lebg n gesa bãmb mensã sẽn sigl bũmb ninsã, la sagls nins siglgã sẽn kõ, n na n sõng tigingã neb tɩ b segl b mens sabab-wẽns yĩngã. (1 Kor. 14:33, 40) 2) Tall-y raoodo, la y yɩ gũusdb me. (Yel. 22:3) Nand tɩ y maan bũmb bɩ y reng n tagse. Ra gẽneg-y y yõor zaalem ye. 3) Teeg-y-yã a Zeova. Tẽeg-y t’a Zeova rata yãmb ne y tẽed-n-taasã fãa neere. A tõe n sõng-y lame tɩ y kogl y meng la y sõng y tẽed-n-taasã.

12-13. Yam-bʋg la d tõe n dɩk a Viktor ne a Vitali kibarã pʋgẽ? (Ges-y fotã me.)

¹² D gom a Viktor ne a Vitali sẽn yaa saam-biis a yiib sẽn tar tẽeb sõma wã yelle. B modga wʋsg n tall rɩɩb ne koom n tɩ kõ b tẽed-n-taasã Ikrɛnne. A Viktor yeelame: “D gilga zĩig fãa n bao rɩɩbo. D ra wae n wʋmda bug-raad rãamde. Saam-biig a ye n kõ rɩɩb a sẽn da bĩngi, tɩ d segd n tɩ wʋke. A sẽn kõ bũmb ningã seka saam-biis wʋsg na paam bũmb nins sẽn yaa tɩlɛ ne-bã wakat a wãna. D sẽn wa n wʋkd rɩɩbã n ningd mobillẽ wã, bõmb n lʋɩ sẽn zems metr pisi ne tõnd sẽn da beẽ wã n pa pusg ye. Daarã tõre, m pʋʋsa a Zeova n kos t’a kõ-m raood tɩ m tõog n kell n sõng m saam-biisã.”

¹³ A Vitali yeelame: “Ra yaa tɩlɛ tɩ d tall raood wʋsgo. M sẽn na n kẽng m yembr pipi wã rɩka lɛɛr 12. M pʋʋsa a Zeova so-toakã tõre.” A Vitali ra tara raoodo, la a ra gũusda a meng me. A paasame: “M da pʋʋsda a Zeova wakat fãa, n kot-a yam la sik-m-menga. M da kẽnda soay nins zut tẽngã taoor dãmb sẽn kõ sor tɩ d tõe n kẽnã bala. Mam sẽn yã saam-biisã la saam-bi-pogsã sẽn naag taab to-to n tʋmdẽ wã paasa m tẽebã pãnga. B yãgsa bũmb toor-toor sẽn da gɩdg sorã. B tigsa rɩɩbo, fut la bũmb a taaba, sẽn na yɩl tɩ d tɩ sõng d tẽed-n-taasã. B wʋka bõn-kãens n ning mobillã pʋgẽ. So-toakã fãa sasa, saam-biisã kõo tõnd gãag zĩig la rɩɩbo.”

KELL-Y N MAAN-Y SƖD NE A ZEOVA

14. Ned d sẽn nong sã n wa bas a Zeova tũubu, d manesem tõe n yɩɩ wãna?

¹⁴ Bũmb paood sẽn sãamd sũur n yɩɩd d zakã ned wall d zoa sẽn na n bas a Zeova tũubu. (Yɩɩn. 78:40; Yel. 24:10) D sã n nong a soabã wʋsgo, yɩl n tõog toog pa nana ye. Yell a woto buud sã n paama yãmba, a Zadok sẽn kell n maan sɩd ne a Zeova wã tõe n kenga y raoodo.

15. Bõe yĩng tɩ ra yaa tɩlɛ t’a Zadok tall raoodo, n tõog n kell n maan sɩd ne a Zeova? (1 Rĩm. 1:5-8)

¹⁵ A Zadok zoa a Abiyataar sẽn wa n yãk yam n bas a Zeova tũubã, a Zadok kell n maana sɩd ne a Zeova. Yɩɩ a Davɩɩd naamã saabẽ. A Davɩɩd sẽn wa n bẽed a yõor bãagã, a biig a Adoniza makame n na n deeg naamã a Zeova sẽn da pʋlem a Salomo wã. (1 Kib 22:9, 10) A Abiyataar yãka yam n teel a Adoniza. (Karm-y 1 Rĩm-dãmb 1:5-8.) A Abiyataar sẽn maan woto wã, pa yɩ ne a Davɩɩd bal la a pa maan sɩd ye. A pa maan sɩd ne a Zeova me ye. Mams-y n ges-y rẽ sẽn sãam a Zadok sũur to-to wã. Yẽ ne a Abiyataar naaga taab n tʋm maan-kʋʋrã tʋʋm yʋʋm pis-naas la zaka. (2 Sãm. 8:17) B ra naagda taab n get “Wẽnnaam koglgã” yelle. (2 Sãm. 15:29) Sɩngrẽ wã, b yiibã fãa teela a Davɩɩd naamã la b maan bũmb wʋsg a Zeova tũudmã yĩnga.—2 Sãm. 19:11-14.

16. Tõe tɩ bõe n sõng a Zadok t’a kell n maan sɩd ne a Zeova?

¹⁶ A Zadok kell n maana sɩd ne a Zeova baa ne a Abiyataar sẽn bas a Zeova tũubã. A Davɩɩd ra miime t’a tõe n kɩsa a Zadok sɩda. A Adoniza yellã sẽn wa n vẽnegã, a Davɩɩd kosa a Zadok, a Natã ne a Benaya tɩ b zae a Salomo kaam t’a lebg rĩma. (1 Rĩm. 1:32-34) A Zadok sẽn da paam n be ne neb sẽn maand sɩd ne a Zeova wã tog n kenga a raoodo. Wala makre, a ra bee ne a Natã la neb a taab sẽn teend a Davɩɩd naamã. (1 Rĩm. 1:38, 39) A Salomo sẽn wa n lebg rĩmã, a kɩtame “t’a Zadok lebg maan-kʋʋd n ledg a Abiyataare.”—1 Rĩm. 2:35.

17. Ned y sẽn nong sã n wa bas a Zeova tũubu, wãn to la y tõe n dɩk a Zadok togs-n-taare?

¹⁷ Wãn to la y tõe n dɩk a Zadok togs-n-taare? Ned y sẽn nong sã n yãk yam n bas a Zeova tũubu, wilg-y vẽeneg tɩ yãmb yẽ rat n kell n maana sɩd ne a Zeova. (Zoz. 24:15) A Zeova na n kõ-y-la pãng la raood tɩ y tõog n kell n maan sẽn yaa tɩrga. Pʋʋs-y-yã-a la y kell n pa ne neb nins sẽn maand sɩd ne-a wã. A Zeova sũur nooma ne y sẽn maand sɩd ne-a wã, la a na n keo-y-la rẽ yĩnga.—2 Sãm. 22:26.

18. Yam-bʋg la y tõe n dɩk a Marko ne a Sidse kibarã pʋgẽ?

¹⁸ D gom a Marko ne a pag a Sidse yelle. B kom-pugli a yiibã sẽn wa n lebg kãsemba, b yãka yam n bas a Zeova tũubu. A Marko yeelame: “F biig rogem tɛka, f nong-a-la ne f sũur fãa. F na n maana f sẽn tõe fãa n kogl-a tɩ bũmb ra maan-a ye. Rẽ n so t’a sã n wa yãk yam n bas a Zeova, bɩ sãamd sũur wʋsgo.” A paasame: “La a Zeova zĩnda ne-do. A sõnga tõnd tɩ d keng taab raoodo. Mam sã n wa koms raoodo, mikdame tɩ m pagã tara raoodo. M pagã me sã n wa koms raoodo, mikdame tɩ m tara raoodo.” A Sidse paasame: “Sã n pa a Zeova sẽn kõ-d pãngã, d ra pa na n tõog toog ye. M da tagsdame tɩ yaa mam yell la m kom-pugli wã sẽn bas a Zeova tũubã, tɩ ra sãamd m sũur wʋsgo. Rẽ n so tɩ m pʋʋs a Zeova n togs-a yellã sẽn namsd-m to-to wã. Rẽ poor bilfu, saam-bi-poak m sẽn da maan yʋʋm n pa yã kolga maam n dɩk a nugã n palg m bãokã, n ges maam n yeel yaa: ‘Sidse, tẽeg tɩ pa fo yell ye!’ Ne a Zeova sõngre, m tõog n kell n talla sũ-noog a tʋʋmdã pʋga.”

19. Y yãka yam n na n maan boe?

¹⁹ A Zeova ratame tɩ neb nins sẽn tũud-a wã fãa tall raood wa a Zadoke. (2 Tɩm. 1:7) La a pa rat tɩ d teeg d meng pãng ye. A ratame tɩ d teeg-a. Dẽnd y sã n wa maood ne zu-loees n dat raoodo, bɩ y kos a Zeova. Y tõe n basa y yam t’a na n sõng-y lame tɩ y tall raood wa a Zadoke!—1 Pɩy. 5:10.