Dũniyã gill zugu, sodaasã zab-teedã raab ligd yɩɩga dolaarã ligd milyaar tus a yiibu: Bõe la Biiblã yet rẽ wɛɛngẽ?

Yʋʋmd 2022 wã, dũniyã gill zugu, sodaasã zab-teedã raab ligd zẽk n taa dolaarã ligd milyaar tus a yi la kobs-yi la pis-naase. A buud zɩ n zĩnd ye. Sẽn yɩɩd fãa, yaa Risi ne Ikrɛn zabrã n kɩt tɩ lebg woto. Yʋʋmd 2023 tʋʋl-nif kiuugã, tʋʋmd noor a ye b sẽn boond tɩ l’Institut international de recherche sur la paix de Stockholm (SIPRI) taasa koɛɛga, n yeel tɩ yʋʋmd 2022 wã pʋgẽ:

• ‘Erop sodaasã zab-teedã raab ligd paasa wʋsgo. Yʋʋmd 1991 wã tɛka, Erop goosneema-rãmbã zɩ n kẽes ligd a woto zab-teedã raab pʋgẽ ye.’

• “Risi soolmã kẽesa ligd wʋsg sodaasã zab-teedã raab pʋgẽ. Dũniyã gill zugu, tẽns nins sẽn kẽesd ligd wʋsg n tɩ yɩɩd sodaasã zab-teedã raab pʋgẽ wã sʋka, yaa Risi n lebg tãab-n-soaba. Pĩndã, a ra yaa nu soaba.”

• ‘Dũniyã gill zugu, yaa Etazĩni soolmã n ket n be taoore, yiis ligd wʋsg sodaasã zab-teedã raab pʋgẽ wã.’

A Nan Tian sẽn sõng SIPRI n taas koɛɛgã, n leb n yaa bãngdã yeelame yaa: “Yʋʋma noorã, ligd ning b sẽn kẽesd sodaasã zab-teedã raab pʋgẽ wã sẽn tar paasgã wilgda vẽeneg tɩ dũni ning pʋgẽ d sẽn be wã, yõ-koglgã kaalem paamda pãnga.”

Biiblã ra pĩnd n goma dũni gill pãn-soaadbã zabã sẽn be rũndã-rũndã wã yelle, la b wilg bũmb ning bal sẽn tõe n wa ne laafɩ la bãan hakɩɩka.

Biiblã ra pĩnd n goma zabã sẽn tar paasgã yelle

• Biiblã boonda wakat ning tõnd sẽn vɩ wã tɩ “saabã wakate.”—Dãniyɛll 8:19.

• Dãniyɛll sebrã pʋgẽ, b wilgame tɩ saabã wakatã, dũni gill pãn-soaadbã na n wagsda taaba. Dũni gill pãn-soaadbã na n yikame n “teeg taaba,” pa rẽ bɩ n zab taab naamã poorẽ. Zab-kãensã na n yɩɩ sabab tɩ b sãam “paoong” wʋsgo, pa rẽ bɩ ligd wʋsgo.—Dãniyɛll 11:40, 42, 43.

Y sã n dat n bãng n paas bãngr-gom-kãngã wɛɛngẽ, bɩ y ges video ning gom-zug sẽn yaa: Une prophétie qui s’accomplit : Daniel chapitre 11.

Laafɩ la bãan hakɩɩkã sẽn na n zĩnd to-to

• Biiblã wilgdame tɩ Wẽnnaam na n sãama ninsaalbã goosneema-rãmbã. A “na n lugla rĩung sẽn pa na n tol n sãame. Buud baa a ye pa na n tol n deeg rĩun-kãng ye. A na n wãa rĩun-kãensã fãa, n kɩt tɩ b meneme, tɩ yẽ a ye pa wakat fãa.”—Dãniyɛll 2:44.

• Ka a bilfu, a Zeovaa na n maana bũmb ninsaablã sẽn pa tol n tõe n maane. A na n kɩɩtame tɩ laafɩ la bãan hakɩɩk zĩnd wakat sẽn kõn sa. Wãn to? Ne a saasẽ Rĩungã maasem, a na n sãama zab-teed buudã fãa, la a kɩt tɩ nen-kɛglmã sa.—Yɩɩn-sõamyã 46:8, 9.

Y sã n dat n bãng n paas Wẽnnaam Rĩungã sẽn na n wa maan bũmb ninsã wɛɛngẽ, bɩ y karem sõsg ning gom-zug sẽn yaa: “Sous le royaume de Dieu, ‘la paix abondera.’”