Rũmsã kẽnda saasẽ bɩ?
Biiblã sẽn yete
Biiblã wilgdame tɩ bõn-naandsã fãa sẽn be tẽngã zugã sʋka, yaa neb bilf bal n na n kẽng saasẽ. (Vẽnegre 14:1, 3) B na n tɩ yɩɩ rĩm-dãmb la maan-kʋʋdb n dɩ naam ne a Zeezi. (Luk 22:28-30; Vẽnegre 5:9, 10) Ninsaalbã wʋsg na n vʋʋgame n vɩɩmd arzãnã pʋgẽ tẽngã zugu.—Yɩɩn-sõamyã 37:11, 29.
Biiblã pʋgẽ, b pa yeel zĩig baa a ye tɩ rũng n na n tɩ vɩɩm saasẽ ye. La yaa bʋʋm toor-toor yĩnga. Rũmsã pa tõe n maan bũmb nins sẽn yaa tɩlɛ sẽn na n yɩl n paam “saasẽ boollã” ye. (Ebre-rãmbã 3:1) Sẽn na yɩl n paam boollã, b segd n paama bãngre, n tall tẽebo, la b tũud Wẽnnaam noyã. (Matiye 19:17; Zã 3:16; 17:3) Yaool n yaa ninsaalbã bal la Wẽnnaam naan tɩ b tõe n wa paam n vɩɩmd wakat sẽn kõn sa.—Sɩngre 2:16, 17; 3:22, 23.
Sẽn na yɩl tɩ ninsaal bɩ rũng tõog n kẽng saasẽ, a segd n deng n vʋʋgame. (1 Korẽnt rãmbã 15:42) Biiblã gomda neb toor-toor b sẽn vʋʋg yelle. (1 Rĩm-dãmbã 17:17-24; 2 Rĩm-dãmbã 4:32-37; 13:20, 21; Luk 7:11-15; 8:41, 42, 49-56; Zã 11:38-44; Tʋʋma 9:36-42; 20:7-12) La b fãa yɩɩ ninsaalba. Rũms pa naag ye.
Rũng tara sɩɩg bɩ?
Ayo. Biiblã yetame tɩ ninsaalbã ne rũmsã fãa yaa sɩɩse. (Sõdbo 31:28, notã) Wẽnnaam sẽn wa n naan d yaab a Ãdmã, a pa kõ-a sɩɩg ye. A “lebga sɩ-vɩɩga.” (Sɩngre 2:7, notã) Sɩɩgã yaa bũmb a yiib sẽn naag taaba: Yaa “tẽngã tom,” ne “vɩɩm vʋʋsem.”
Sɩɩg tõe n kiime bɩ?
N-ye. Biiblã wilgdame tɩ sɩɩg tõe n kiime. (Maan-kʋʋre 21:11, notã; Ezekɩyɛll 18:20) Ninsaal bɩ rũng sã n ki, a lebda tẽngã tomẽ. (Koɛɛg soaba 3:19, 20) Rat n yeelame t’a pa le vɩ ye.a
Rũng maanda yel-wẽnd bɩ?
Ayo. Yel-wẽnd yaa f sẽn na n tall tagsgo, yel-manesem, bɩ n maan bũmb sẽn kɩɩsd Wẽnnaam noyã. Yaa f sã n tõe n yãk yam n maan sẽn yaa sõma la f tõe n maan yel-wẽnde. Rũmsã yaool n pa tõe n maan rẽ ye. Wakat fãa b maanda wa sẽn zems ne yam ning b sẽn dog ne wã bala. (2 Pɩyɛɛr 2:12) Rũng wat n kiime, baa a sẽn pa maand yel-wẽndã.
D tara sor n na n maan rũmsã wẽng bɩ?
Ayo. Wẽnnaam kõo ninsaalbã noor tɩ b soog rũmsã, la a pa kõ-b sor tɩ b tõe n nams-b ye. (Sɩngre 1:28; Yɩɩn-sõamyã 8:6-8) Rũng fãa yell paka Wẽnnaam, baa liuun-kɩdsã. (Zonas 4:11; Matiye 10:29) Wẽnnaam sagla neb nins sẽn tũud-a wã tɩ b ges rũmsã yell neere.—Yikri 23:12; Tõodo 25:4; Yel-bũnã 12:10.