Sak piig la a yoobe
“Bɩ y paam nonglem wʋsg yãmb sʋka”
1. Bõe n nong n noom sẽn kẽnd-b a Zeova Kaset rãmbã tigissẽ paalma?
NAOOR wʋsgo, nebã sã n wa a Zeova Kaset rãmbã tigisgẽ pipi, bũmb ning sẽn yɩt b noog n yɩɩd yaa nonglem ning b sẽn yãt be wã, b sẽn pʋʋsd-b ne b waoong la b sõsd ne-b sõma wã yĩnga. Yaa woto me ne sẽn wat-b tõnd tigis-kãsemsẽ wã pipi wã. Kɩba-kõt gʋlsa tigis-kãseng a yembr zug n yeel tɩ: ‘Ned ba a ye pa yũ dorg bɩ rãam ye. Kaasg la tãsg ka be ye. Tus-taab ka be ye. Gom-yood ne tʋy ka be ye. Reem yood la gom-dẽgd ka be ye. Sɩga-yũudb ka be ye. Wagdem ka be ye. Ned ba a yembr pa lobd sagd zĩigẽ wã ye. Woto sɩd ra yaa bõn-sãanga.’ Woto fãa kõta kaset tɩ nonglem buud ning sẽn ‘ka maand sẽn ka zemse, la a ka baood a meng sõngr balã’ n be b sʋkã.—1 Korẽnt dãmba 13:4-8.
2. a) Sã n wa beẽ-beẽ, bõe n segd n yɩ vẽeneg ne tõnd sẽn wilgd nonglem ne nebã to-to wã? b) D segd n dɩka Kirist togs-n-taar n tall nonglem bʋg buudu?
2 Saam-biir nonglmã yaa bãnd ning sẽn kɩtd tɩ b bãng kiris-neb hakɩkã n bakã. (Zã 13:35) D sã n bɩt tẽebã wɛɛngẽ, d bãngda nonglem wilgr ne nebã n paasdẽ. Tʋm-tʋmd a Poll pʋʋsame n kos t’a kiris-nin-taasã nonglem “paam paasg daar fãa.” (Filip rãmba 1:9) Tʋm-tʋmd a Zã wilgame tɩ tõnd nonglmã segd n kɩtame tɩ d kɩɩs d mengã raabo. A gʋlsa woto: “Ne bõn-kãnga tõnd bãnga nonglem sẽn yaa bũmb ninga, a yaa tɩ bãmb kõo bãmb [Wẽnnaam Biriblã] vɩɩm tõnd yĩnga. A zemsame tɩ tõnd me kõ tõnd vɩɩm ba-biis yĩnga.” (1 Zã 3:16; Zã 15:12, 13) Tõnd na n sɩd kõo d vɩɩmã d saam-biisã yĩng bɩ? Yɛl wʋsg pa baood tɩ d maan woto ye, la hal sẽn ta zĩ-bʋg la tõnd sõngd-ba, baa sã n yaa tiisg ne tõndo?
3. a) Wãn to la d tõe n tall nonglem ne nebã n paase? b) Bõe yĩng tɩ tar yõod tɩ d tall nonglem wʋsg ne taab masã?
3 D sẽn na n wilg ne tʋʋm tɩ d sakdame n na n kɩɩs d mengã raabã toor sẽn ka be, d segd n nonga d saam-biisã ne nonglem sɩd-sɩda. Wẽnnaam Gomdã sagenda tõndo: “Bɩ y nong taab wʋsg ne ba-biis nonglem.” (Rom dãmba 12:10) D fãa tara nonglem kãngã buud ne neb kẽere. La rẽ yĩnga, d pa tõe n bao n nong neb a taab me woto sɩda? Dũni kʋd-kãngã saabã sẽn kolgdã, tara yõod wʋsg tɩ d pẽnegd kiris-neb a taabã n paasdẽ. Biiblã yetame: “Bũmb fãa sɛɛb wakat kolgame. . . . La sẽn yɩɩda, bɩ y paam nonglem wʋsg yãmb sʋka, tɩ bõe, nonglem luta yel-wẽn wʋsgo.”—1 Pɩɛɛr 4:7, 8.
Zu-loees sã n wa wa
4. a) Bõe yĩng tɩ zu-loees tõe n wa zĩnd tigingã neb sʋka? b) Baa tõnd sã n pa rat n tũ Biiblã sagls wakat ninga, bõe yĩng tɩ yaa sõma tɩ d tũ-ba?
4 Yaa sɩd tɩ tõnd sã n ket n yaa koangdb fãa, wakat-wakate d na n maana yɛl n beeg neb a taabã. Tõnd saam-biisã me tõe n beega tõnd ne manesem toor-toore. (1 Zã 1:8) Y sã n wa be yell woto buud pʋgẽ, y segd n maana bõe? Gʋlsg Sõamyã kõta saglg ning d sẽn datã. La tõe tɩ Gʋlsg Sõamyã sẽn yet bũmb ningã kɩɩsda tõnd sẽn yaa yel-wẽn-maandbã sẽn dat n maana. (Rom dãmba 7:21-23) Baasg zãnga, d sã n tũud Biiblã sagls ne d sũy fãa, na n wilga vẽeneg tɩ d sɩd rat n taa a Zeova yam. Rẽ maaneg na n paasa tõnd nonglmã ne neb a taabã.
5. Ned sã n beeg tõndo, bõe yĩng tɩ d pa segd n dok d sũuri?
5 B sã n beeg nebã tɩ zab-ba, wakat ninga b baood n na n doka b sũur ne bɛɛgdã. La rẽ yãngda yellã bala. Sũ-dokr sã n yaa tɩlae, d segd n basa rẽ ne Wẽnnaam. (Yelbũna 24:29; Rom dãmba 12:17-21) Neb a taab tõeeme n lakd b meng ne bɛɛgdã. La d pa segd n maan woto ne sẽn balemd-b a Zeova wa tõndã ye, bala sẽn na yɩl tɩ Wẽnnaam sak tõnd balengã, rẽnda d nong d saam-biisã me. (1 Zã 4:20) Woto kɩtame t’a Poll gʋlse: “Bɩ y maan sũ-mar ne taaba la y kõ taab sugri, ned sã n tar yell ne a to, a wa [a Zeova] sẽn kõ yãmb sugrã, bɩ yãmb me kõ taab sugr woto.” (Kolos rãmba 3:13) Yãmb tõe n maana woto bɩ?
6. a) Naoor a wãn la d segd n kõ d saam-biig sugri? b) Bõe la d segd n bãng sẽn na yɩl tɩ ned sã n wa beeg-d bɩ d tõog n tall manesem sẽn zemse?
6 La yaa wãn to, ned sã n beeg tõnd n yɩlem tɩ yaool n pa beeg-kãsems sẽn baood tɩ b yiis-a tigingã pʋgẽ? Yel-wẽn-kãensã buudã wɛɛngẽ, tʋm-tʋmd a Pɩɛɛr yeelame tɩ d kõ sugr “naoor a yopoe.” La a Zezi yeelame: “Mam ka yet foom tɩ naoor a yopoe ye, la hal tɩ ta naoor pis-yopoe [la] a yopoe.” A wilga vẽeneg tɩ tõnd samdã zɩsa Wẽnnaam taoore, b sã n mak ne ninsaalb a taabã fãa sẽn tar tõnd samdã. (Matɩe 18:21-35) Daar fãa, tõnd beegda Wẽnnaam ne manesem wʋsgo. Wakat ninga yaa ne rat-m-yembr tʋʋmde, bɩ ne d sẽn na n yeel bɩ d tags bũmb ningã, walla ne d sẽn pa maan bũmb d sẽn da segd n maane, hali n pa bãng meng tɩ d maanda yel-wẽnd ye. (Rom dãmba 3:23) Ne rẽ fãa, Wẽnnaam ket n zoeta tõnd nimbãanega. (Yɩɩl Sõamyã 103:10-14; 130:3, 4) A ratame tɩ tõnd me maan woto ne d taabã. (Matɩe 6:14, 15; Efɛɛz rãmba 4:1-3) Rẽ, d na n talla nonglem buud ning sẽn ‘ka tẽegd beegrã.’—1 Korẽnt dãmba 13:4, 5, Sebr Sõngo; 1 Pɩɛɛr 3:8, 9.
7. Bõe la d segd n maane, saam-biig sũur sã n pa noom ne tõndo?
7 Tõe n wa zĩndame tɩ baa tõnd sũur sã n pa sãam ne d saam-biiga, bɩ d neẽ tɩ yẽ sũur pa noom ne-d ye. D tõe n yãka yam n ‘lud yellã ne nonglem,’ wa 1 Pɩɛɛr 4:8 sẽn sagend tɩ d maanã. D tõeeme me n yãk yam n tɩ gom ne-a la d mao n ye zems taaba.—Matɩe 5:23, 24.
8. Tẽed-n-taag sã n maand bũmb tɩ sãamd tõnd sũuri, bõe la d tõe n maan dẽ wɛɛngẽ?
8 Tõe tɩ tẽed-n-taag maanda bũmb sẽn sãamd tõnd la neb a taab me sũyã. Pa são tɩ d gom ne-a yel-kãng zug sɩda? Tõe tɩ rẽ n zemse. Yãmb mengã sã n tɩ wilg-a yellã ne sõmblem, tõe tɩ manege. La pipi, rɩlla y sok y menga: ‘A sɩd maanda bũmb sẽn kɩɩsd Gʋlsg Sõamyã bɩ? Bɩ yellã yaa maam ne nin-kãng soabã sẽn pa yit zĩ-yɛngã?’ Gũus-y n da wa yãk y mens noy n tik rẽ zug n kao neb a taabã bʋʋd ye. (Zak 4:11, 12) A Zeova sakda neb sẽn yit buud la zĩis toɛy-toɛy n pa maand welsg ye, la a maanda sũ-mar ne-ba, b sã n bɩt tẽebã pʋgẽ.
9. a) Yel-wẽn-kãsems sã n wa maan tigingã pʋgẽ, ãnd dãmb n get rẽ yelle? b) Wakat bʋg la ned ning b sẽn beegã segd n maan bũmb pipi, la yaa ne yam bʋgo?
9 Tigingã pʋgẽ ned sã n maan yel-wẽn-kãseng wala yoobo, b segd n yɩɩ tao-tao n welg yel-kãngã. La yaa ãnd dãmb n segd n welg-a? Yaa kãsem dãmbã. (Zak 5:14, 15) Baasg zãnga, sã n yaa ned la b beeg-yã, tõe tɩ yaa ligd yɛl wɛɛngẽ, bɩ ne no-goam sẽn pa zemse, rẽ, b sẽn beeg a soabã segd n modgdame n gom ne bɛɛgdã bãmb b yiib bala. (Matɩe 18:15) Rẽ sã n pa welg yellã, bũmb a taab la b segd n maan wa b sẽn wilg Matɩe 18:16, 17 pʋgẽ wã. Nonglem ning d sẽn tar ne saam-biig ning sẽn beegã, la d sẽn tʋll n ‘paam-a’ wã na n sõng-d lame tɩ d bao n gom ne-a tɩ kẽ a sũurã.—Yelbũnã 16:23.
10. Zu-loɛɛg sã n wa wa, bõe n na n sõng-d tɩ d tall tagsg sẽn zemse?
10 Zu-loɛɛg sã n wa wa, a yaa kãseng t’a yaa bilf me, d sã n modg n bãng a Zeova sẽn tagsd to-to yellã zugu sõngd-d lame. A kisa yel-wẽnd buudã fãa, la wakat sã n ta, a yiisda neb nins sẽn maand yel-wẽn-kãsems n pa tekd yam n kos sugrã a siglgã pʋgẽ. La yaa d ra yĩm tɩ d fãa beegda yel-bõones pʋsẽ n dat tɩ Wẽnnaam tall sũ-mar ne-d la a zoe d nimbãaneg ye. Woto, a Zeova kõta tõnd mak-sõng tɩ d segd n dɩk a togs-n-taare, neb a taab sã n wa beeg tõndo. Tõnd sã n tar nimbãan-zoeere, d rɩkda togs-n-taar ne a nonglmã.—Efɛɛz rãmba 5:1, 2.
Bao-y soay ‘n pak y sũurã yalengo’
11. Bõe yĩng t’a Poll sagl Korẽnt kiris-nebã tɩ b ‘pak b sũyã yalengo’?
11 A Poll rɩka kiis n keng Korẽnt tigingã sẽn da be Gɛrɛs soolmẽ wã neb tẽebo. A tʋma wʋsg n sõng saam-biisã be, la a ra nong-b lame. La bãmb kẽer da pa tar nonglem wʋsg ne-a ye. B ra sãbgd-a-la wʋsgo. A sagl-b lame tɩ b ‘pak b sũurã yaleng’ n tall nonglem. (2 Korẽnt dãmba 6:11-13, Sebr Sõngo; 12:15) Yaa sõma tɩ d fãa ges hal sẽn ta zĩ-bʋg la d wilgd d nonglem ne neb a taabã, la d bao soay n pak d sũurã yaleng n paase.—1 Zã 3:14.
12. Wãn to la d tõe n paas d nonglmã ne tigingã neb fãa?
12 Yaa toog ne tõnd tɩ d pẽneg neb kẽer tigingã pʋgẽ bɩ? Tõnd sã n sak tɩ nebã zʋg pa taaba, wa d sẽn dat tɩ bãmb me sak tõnd woto wã, na n sõng-d lame tɩ d tall zems-n-taar ne taaba. Tõnd tõe n nong-b lame n paas me, d sã n baood b zʋg-sõma wã wakat fãa. Rẽ na n sɩd kɩtame tɩ d nonglmã ne-b paase.—Luk 6:32, 33, 36.
13. Wãn to la d tõe n pak d sũurã yaleng n wilg tɩ d nonga d tigingã neba?
13 Yaa sɩd tɩ tõnd sẽn tõe n maan bũmb ning neb a taabã yĩngã tara koaka. Tõe tɩ d pa tõog n pʋʋs nebã fãa tigisg fãa sasa ye. Tõe tɩ d pa tõe n bool nebã fãa d sã n wa boond neb tɩ b wa rɩ ne-d ye. La rẽ yĩnga, d pa tõe n pak d sũyã yaleng n dɩk minit a wãn bal n bao n bãng ned a to n paas d tigingã pʋgẽ sɩda? D pa tõe wakat-wakat n bool ned d sẽn pa mi sõma t’a wa yãag-d koe-noogã mooneg pʋgẽ sɩda?
14. D sã n wa be ne kiris-neb a taab d sẽn zɩ n yã, wãn to la d tõe n wilg tɩ d tara nonglem wʋsg ne taaba?
14 Tõnd tigis-kãsemsã kõta soay sõma tɩ d tõe n pak d sũyã yaleng n wilg nonglem ne neba. Tõe tɩ yaa neb tusa n wat be. D pa tõe n sõs ne b fãa ye, la d tõe n talla manesem sẽn wilgd tɩ d rata b neer n yɩɩd sẽn noom tõndã bala. Tigis-kãsengã vʋʋsg sasa, d tõe n wilgame tɩ d nonga nebã, d sã n sõs ne sẽn pẽ-b tõndã kẽer sẽn na yɩl n bãng-ba. Daar n wat tɩ neb nins fãa sẽn na n vɩɩmd tẽngã zugã na n yɩ saam-biis la saam-bi-pogse, n lagem taab n balem sɩd Wẽnnaamã sẽn yaa nebã fãa Ba wã. Ad d sũy na n yɩɩ noogo, d sã n bãng taaba! Nonglem wʋsg na n kɩtame tɩ d rat n maan woto. Bõe yĩng tɩ d pa na n sɩng masã?
Lebg-n-gese
• Zu-loees sã n wa wa kiris-nebã ne taab sʋka, wãn to la b segd n welg-ba, la bõe yĩnga?
• D sã n bɩt tẽebã wɛɛngẽ, wãn to la d nonglmã me segd n paase?
• Wãn to la d tõe n wilg tɩ d tara nonglem wʋsg ne neb a taaba, n pa tek tõnd zo-rãmbã bala?
[Foto, seb-neng 148]
Kiris-neb nonglmã wilgda ne manesem toor-toore, wala makre tigissẽ wã