Pa-zem-taabã yaa zu-loɛɛg rũndã-rũndã
“Tõnd sak n deegame tɩ sɩd kãensã pa be kɩɩsg ye, tɩ b naana ninsaalbã fãa tɩ b zem taaba, tɩ b Naandã kõ-b-la dʋrwa rãmb kẽer sẽn pa tõe n deege, la tɩ bãmb sʋka vɩɩm, paam-m-meng la sũ-noog baoob beeme.”—Soog-m-meng toagsg Etazĩni sẽn sak yʋʋmd 1776.
“Ninsaalbã fãa roga ne paam-m-meng la b zema taab dʋrwa rãmbã wɛɛngẽ.”—Toagsg ninsaalbã la tẽng-n-biisã durwa rãmb yĩnga, Farãns Asãmble Nasional sẽn sak yʋʋmd 1789.
“Nebã fãa roga ne paam-m-menga, la b zema taab burkĩndlmã la dʋrwa rãmbã wɛɛngẽ.”—Andũni wã toagsga, ninsaalbã durwa rãmb wɛɛngẽ, NasiõzĨni Asãmble zeneral sẽn sak yʋʋmd 1948.
SÃMBG pa be ne rẽ ye. Zem-taab tʋlsmã bee zĩig fãa ninsaalbã sʋka. Zu-bʋko, b sẽn gom ninsaalb zem-taab yell n yɩlem naoor yakã yaa kaset tɩ hal sẽn ta masã ãdem-biisã nan pa zem taab ye.
Ned bee sẽn tõe n togs vẽeneg tɩ d sẽn kolg yʋʋm kob-gĩnd 20 soabã baasgẽ masã wã yɛlã toeemame n lebg sõma n yɩɩd bɩ? Etazĩni la Fãrans tẽng-n-biisã fãa, bɩ tẽns 185 wã sẽn be Nasiõzĩni pʋgẽ wã paamda durwa rãmb nins sẽn zem taab b sẽn yet tɩ b roga ne wã nafa bɩ?
Baa ne zem-taabã tagsg nebã fãa sʋkã sẽn tõe n yaa “vẽeneg mengã,” dʋrwa rãmb sẽn tɩ loe ne ‘vɩɩmã, paam-m-mengã la sũ-noog baoobã’ zãr ne b yɩ yembr ne nebã fãa. Wala makre, zem-taab bee yɛ tɩ Afirik biig segd n tall logtor a yembr ne neb 2 569 a taaba, tɩ Erop biig tar logtor a yembr ne neb 289 bala? Bɩ bõe zem-taab dʋrwa rãmb paam-m-mengã la sũ-noogã wɛɛngẽ n be Ẽnd biribl a ye tãab zug la kompugl a yiib tãab zug sã n segd n bɩ n ka bãng karengo, tɩ zĩis a taab wa Zapõ, Alemayn la Gãrãnd Bertayn tẽnsẽ wã bɩ biig fãa la bal paamd zãmsg lekollẽ?
Rẽ yĩnga neb nins sẽn be Amerik sãntrall tẽnsẽ wã ned fãa sẽn paamd Amerik dolaar 1 380 yʋʋmd fãa wã tara ‘bũrkindlem la durwa rãmb’ a yembr vɩɩmã pʋgẽ wa b rãmb nins sẽn be Fãrans sẽn paamd yʋʋmd fãa Amerik dolaar 24 990 sɩda? Bõe zem-taab n be Afirik bipugl sẽn dog paalem sẽn tõe n saag n vɩɩmd yʋʋm 56 ne Amerik di Noor bipugl sẽn tõe n saag n vɩɩmd yʋʋm 79 wã sʋka?
Pa-zem-taabã tara nens toɛ-toɛya, bãmb fãa ka neer ye. Bãmb sʋka, pa-zem-taabã paoongã, la tɩbsgã ne karengã paoong wɛɛngẽ wã yaa yɛl kẽer bala. Wakat ninga yaa b sẽn yaa toor politikã, buudã, bɩ tũudmã wɛɛngẽ wã n kɩt tɩ neb kẽer pa tar b burkĩndlmã la b paam-m-mengã. Baa ne b sẽn gomd zem-taab yell wʋsg woto wã, d vɩɩ dũni sẽn pa tar zem-taab pʋgẽ. Wala zu-loɛɛgã b sẽn bilg tɩ yaa “bũmb sẽn wat ne nams-kãseng zĩig fãa wã,” sẽn dat n yeel tɩ pa zem-taabã bee ninsaalbã vɩɩm nens toɛ-toɛ fãa pʋsẽ. A sẽn wat ne tood ninsã sẽn yaa talemdã, bãasã, zɩɩlmã, tʋʋmã kaalmã la bu-welsgã sãamda sũur wʋsgo.
“B naana nebã fãa tɩ b zem taaba.” Ad sɩd yaa tags-sõngo! Ad yaa yel-beed meng tɩ d neẽ tɩ nebã sẽn vɩ bũmb ningã yaa lebend fasɩ ne rẽ!
[Picture Credit Line on page 3]
UN PHOTO 152113/SHELLEY ROTNER