Pa-zem-taabã Zu-loɛɛg Tõogre
Ka la bilfu Naandã na n waa ne zem-taabã ninsaalbã sẽn tʋll ne b sũur fãa wã. Hal tɩ wakat kãng ta, d tõe n dɩka segls sẽn na yɩl n tõog pa zem-taabã zu-loɛɛg sẽn namsd tõnd ne d zakã rãmbã. Wala a Nelson Mandela sẽn yɩ Afirik di siid pĩnd perzidã wã sẽn togsã, “yaa d sẽn dɩkd d sẽn tarã n maand bũmb ningã lakae pa b sẽn kõ-dã n welgd ned ne a to ye.”
KƲDEMDÃ wilgdame t’a goama yaa sɩda. Roap la pagb wʋsg sẽn da pa tar wʋsg b rogmã wakat sẽn yaool n dɩk b sẽn da paama n tʋm sõma yĩng kɩtame tɩ b paam tõogo, tɩ rẽ kɩt tɩ b yɩ toor ne b taabã sẽn da tar wʋsg n yɩɩdã. Woto yaa lebend ne neb a taab sẽn dog n mik laogo, n sãam-a n pa tõog n dɩk-a n tʋm sõma zãngã.
Rɩk-y y sẽn tarã n tʋm wa y sẽn tõe tɛka!
A Zeova Kaset rãmbã tʋlla ne b sũur fãa n sõng nebã tɩ b paam Wẽnnaam daabã bãngre, n tũnugd ne Biiblã zãmsgo. Baasgo b miimi tɩ sẽn na yɩl n bãng Biiblã tɩ seke, nebã segd n bãnga sebr karengo. Rẽ n kɩt t’a Zeova Kaset rãmbã zãms neb tus-pi-gĩn kareng la gʋlsgo. Bãmb sʋka, neb 23 000 n zãms kareng la gʋlsg Afirik nin-taoor tẽng a yembr (hal tɩ ta yʋʋm pi-gĩnd ning sẽn sɩng ne yʋʋmd 1990 wã sʋk sẽne). A sẽn waa n gomd a Zeova Kaset rãmbã sẽn pidsd tʋʋm kãsems nins nin-buiidã yĩngã, sebr a ye (San Francisco Examiner) yeelame: “Yãmb tõe n ges-b-la wa tẽng-n-biis sẽn kõt mak-sõngo. B yaooda lampo rãmb sõma-sõma, n get bãad rãmbã yell la b maood ne sebr zɩɩlmã.”
Sẽn paase, b sẽn paamd zãmsg bilf-bilf sẽn na yɩl n gom zãma sʋkã yĩnga, a Zeova Kaset rãmbã kõo neb tus kobs formasiõ tɩ b lebg sõasdb sẽn tar tõogo, sẽn tõe n gom nana-nana zãma sʋka. Neb kẽer sẽn da tar goam zu-loe-kãsems pĩnd bee neb tus kãensã sʋka. D rɩk makr ne Afirik di Siid rao wã sẽn gʋls woto wã: “Mam bidemdã ra yaa wẽng wʋsg n kɩt tɩ m lebg nin-sĩndri. Mam da nong n teegda neb a taab tɩ b gomd mam yĩnga. . . . Mam sẽn kẽes m meng Teokaratik Ministɛɛr Lekollẽ wã n da segd n maan Biiblã kareng kɛlgdb bilf taoorã. . . , mam bidemdã waa wʋsg hal n kɩt tɩ m pa tõog n baas karengã b sẽn kõ wakat ningã pʋgẽ ye. Tigisgã poore, [sagendã] kõo maam sagls sẽn zems ne nonglem. A sagl-m lame tɩ m minim n zẽkd m koɛɛg n karemd Biiblã m yembre. Mam maana rẽ n zẽkd m koɛɛg n karemd Biiblã la Gũusg Gasgã periodik rãmb daar ne a to wakat fãa.” Rao kãnga kẽnga taoor sõma wʋsg hal tɩ masã a kõt zãma sõss kɛlgdb sõor sẽn yaa kobs bɩ tusa meng taoore.
Zem-taab paoong saam-biisã sʋka
Sã n yaa ne dũni wã pʋgẽ karengo, laafɩ wã yell gesgo, la laogã ne dũniyã pʋgẽ yasrã wɛɛngẽ, a Zeova Kaset rãmbã yɛlã sẽn yaa to-to wã yaa toor-toor hal kẽengo. B sẽn yaa toor-toorã pukda dũni ning pʋgẽ b sẽn vɩ wã yɛl sẽn pa zems zãngã. La sẽn yaa lebend ne tũudũm sul a taabã, wẽgb buud yĩnga, dũniyã pʋgẽ yasre, la laogã tarem wɛɛngẽ wã yaa bũmb b sẽn yiis a Zeova Kaset rãmbã sʋk zãng la bala.
B sẽn pids rẽ wã yaa b sẽn maan b sẽn tõe tɛk n tũ sagls nins b sẽn zãms Biiblã pʋgẽ wã yĩnga. B sakda Biiblã noy ne b sũur fãa wala bãmba sẽn yet tɩ: “Wẽnnaam ka get wa ninsaal sẽn getã ye. Ninsaal geta nin sẽn ne, la Wẽnnaam geta sũuri.” (1 Sãmwɛll 16:7) “Wẽnnaam ka tũusd neb ye. La buud fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.” (Tʋʋma 10:34, 35) “Da lebs ned wẽng wẽng yĩng ye. Bɩ y maan sẽn zems pẽgr neba fãa nifẽ. Bɩ y maan yãmb sẽn tõe tɛka t’a sã n tõe, bɩ laafɩ zĩnd yãmb ne neba fãa sʋka.”—Rom dãmba 12:17, 18; ges-y 1 Tɩmote 6:17-19; Zak 2:5, 9 me.
B sẽn gãd Biiblã noy kãensa sẽn daoond lagem-n-taarã kãn-kãe yĩnga, a Zeova Kaset rãmbã pa sakd tɩ pa-zem-taab manesem sẽn yẽbg buudu, dũniyã pʋgẽ yasr bɩ laogã tarem sẽn yaa toor-toorã zug zĩnd b sʋk ye. Wala makre, yel-kãensa pa kẽed sʋka b sã n yãkd neb n na n kõ zu-nood tʋʋm kiris-neb tigingã pʋgẽ ye. Taoor-sobend yasr wala zãmsgã la yɛl-gesgã yaa tẽebã yɛl b sẽn baood tɩ b pidsã zut bal la b tikd n yãke.-—1 Tɩmote 3:1-13; Tɩt 1:5-9.
Ad sɩd yaa sũ-noog n kõ neb nins sẽn nams dũni kɛgrã pa-zem-taabã pʋgẽ, tɩ b paam tɩ neb a taab get-b wa saam-biis la saam-bi-pogs sẽn yaa yembr b Naandã taoore! A Martina tõe n kɩsa kaset ne rẽnda. A ba wã sẽn yi n bas zakã poore, b wub-a-la zak sẽn tar roagd a yembr sẽn be naong pʋgẽ. B ra nong n get-a-la wa ned b sẽn yiis buudẽ. A ra pa tar bas-yard ne a meng ye, la ra yaa toog ne-a t’a zems ne neb a taabã. A talla yam-kaalg manesem. La a sẽn waa n sɩng Biiblã zãmsg ne a Zeova Kaset rãmbã poore, yɛlã toeemame la a lebga a Zeova Kaset soaba. A togsa woto: “M ket n segd n maooda ne tags-wẽnsã, la masã m tõe n vɩɩmda ne zu-loɛɛgã n yɩɩd pĩnda. Mam nonga m mengã n yɩɩd pĩnda, la m gomda ne bas-yard wʋsg n yɩɩda. Sɩdã kɩtame tɩ m dat n pids m zɩɩbã. Masã mam miimi t’a Zeova nong-m lame, la tɩ vɩɩmã tara yõodo.”
B sẽn yaa tẽn-tẽns kiris-neb sullã yĩngã, a Zeova Kaset rãmbã sẽn be sẽn yɩɩd tẽns 230 pʋsẽ wã tara zem-taab vɩɩm sẽn sɩd ka tar to rũndã dũniyã pʋgẽ. Tũudũm siglg a to ye beeme n tõe n yeel woto me n tik yel-sɩd zug n kõ kaset ne rẽ sɩda?
Yaa sɩda, a Zeova Kaset rãmbã ka belgd b mens ye. B sakda tao-tao n deegdẽ tɩ b sẽn yaa dũni sẽn pa-zems-zãng nebã, b pa tõe n yiis ninsaalbã pa zem-taabã n yɩɩd neb a taabã sẽn mak n na n maan yʋʋm kob-gĩn la n pa tõogã ye. Baasg zãnga, b maanda sũ-noog bãmb sʋk b sẽn tõog n tʋm wʋsg sẽn na yɩl n boog zu-loe-kʋʋdg kãnga. La b sẽn tar tẽeb sẽn yaa kãn-kãe ne Wẽnnaam kãabgã yĩngã, b gẽegda tɩrlem dũni paalgã, zĩig ning pa-zem-taabã sẽn pa na n le tol n zĩnd abada wã.
N-yẽe, ka la bilfu, b na n lebs n lugla ninsaan-sakdsã fãa zem-taab “burkĩndlem la durwa rãmb” nins b Naandã sẽn da rat tɩ b paam sɩngrẽ wã. Ad sɩd yaa tagsg sẽn yaa sõma! La na n yɩɩ yel-sɩd so-kãngã!
[Picture on page 7]
A Zeova Kaset rãmbã maooda ne sebr zɩɩlem n zãmsd neb tus pi-gĩn kareng la gʋlsgo
[Picture on page 8]
Biiblã sɩdã sõngdame n yiisd wẽgb buud yĩnga, dũniyã pʋgẽ yasr la laogã tarem wɛɛngẽ