Ãdem-biisa fãa sẽn na n zem taaba: yaa bũmb sẽn tõe bɩ?

A JOHN ADAMS sẽn yɩ Etazĩni perzidã a yiib-n-soabã ra zĩnda neb nins sẽn da tik b nug Soog-m-meng Togsgã zugã sʋka. Togs-kãng ra tara gom-kãensã sẽn yaa sõma wã: “Tõnd tagsdame tɩ sɩd kãensã yaa vẽenese: tɩ b naana ninsaalbã fãa tɩ b zem taaba.” La vẽenega, a John Adams ra sãmbda nebã sã n sɩd zema taaba, bala a gʋlsame: “Wẽnnaam sẽn yaa Pãng sẽn-tõe-fãa soabã sẽn wa n maan ninsaal t’a yaa to-to wã, a maaname tɩ yɩɩg taab bãngrã la yĩngã pãn-tõog wɛɛngẽ wã yaa vẽeneg hali n kɩt tɩ bũmb ba a ye pa tol n kɩt tɩ b zeng taab ye.” Sẽn yaa lebend ne rẽ, Ãngeletɛɛr pĩnd yel-mit a Herbert George Wells tõogame n mams ãdem-biis fãa sẽn zem taaba, tɩ rẽ tik yɛl a tãab zutu: tũudum a yembr sẽn yaa yɩlemd dũniyã neb fãa yĩnga, zãms yɛng nebã fãa yĩnga, tɩ sodaas kaẽ ye.

La ninsaalbã pa tol n kɩt tɩ nebã fãa zeng taab wa a Wells sẽn da mamsdã ye. Nebã zãr ne b zeng taaba. Yɩɩg taabã ket n bee wʋsg nebã sʋka. La yɩɩg taabã nafa ãdem-biisã bɩ? Ayo. Yɩɩg taabã welga nebã, tɩ rẽ wa ne sũ-kiiri, kisgri, sũ-zaba, la zɩɩm daagr wʋsgo. B sẽn da wa n yik n tagsdẽ tɩ nin-peelsã n yɩɩd nin-sablsã Afiriki, Ostrali la Amerikdinoorã waa ne nimbãaneg n kõ sẽn pa-b nin-peelsã, n paas Van Diemen tẽngã b sẽn boond masã tɩ Tasmani wã tẽng-n-neb kʋʋb zãnga. Erope, b reng n tagsame tɩ Zʋɩf rãmbã pa zem nasaar dãmbã, tɩ rẽ kɩt tɩ b nams la b kʋ Zʋɩf rãmb wʋsgo. Sẽn da so-b taoorã arzɛk sẽn yaa kãsengã, la talsã nimbãaneg yɩɩ yɛl sẽn wa ne Revolisiõ wã Fãrens tẽngã yʋʋm kob-gĩnd 18 soabã sasa, n paas Revolisiõ Bolsevikã sẽn zĩnd yʋʋm kob-gĩnd 20 soabã sasa Risi tẽngã.

Yam soab a yembr gʋlsa woto: ‘Ninsaal dɩɩ naam ninsaal zug a wẽng yĩngã.’ (Koɛɛg Soaba 8:9, NW ) Gom-kãensã yaa sɩda, b sẽn dɩt naam neb nins zutã sã n yaa neb yembr-yembr bɩ neb sula. Neb kẽer sã n zẽk b mens b taab zutu, nimbãaneg la namsg n wat tɩ sik ka be ye.

Neba fãa zema taab Wẽnnaam taoore

Neb kẽer n dog ne yɩɩdem neb a taab taoor bɩ? Pa woto Wẽnnaam nifẽ ye. Biiblã yetame: “[Wẽnnaam] da naana ninsaalb buud fãa ne ned a yembre, n zĩndg bãmb dũniyã faa zugu.” (Tʋʋma 17:26) Sẽn paase, Naandã “ka get nanams n yɩɩd tals ye, la b ka get arzɛgs rãmb n yɩɩd naong rãmb ye. Tɩ bõe, yaa bãmb n naan b fãa.” (Zoob 34:19) Ãdem-biisã fãa kĩi ne taaba, la Wẽnnaam taoore, b fãa zema taab b rogmẽ wã.

Tẽeg-y me tɩ ned sã n ki, yẽ sẽn tẽed t’a yɩɩda a taaba fãa wã lebgda zaalem. Pĩnd Ezipt nebã ra pa tagsd woto ye. B naabã (Faraõ) sã n da ki, b ra rɩkda teed ligd sẽn yaa toog wʋsg n ning a yaoogẽ wã, n tẽed t’a na n kell n paama naam a kũumã poor laasre, tɩ teedã tall yõod ne-a. Sɩd da yaa woto n yɩt bɩ? Ayo. Arzɛg-kãng wʋsg kẽe yaad wagda nusẽ, la teed nins wagda wã sẽn pa paam n zu wã bee te-kʋd bĩngr zĩisẽ rũndã-rũndã.

Faraõ wã sẽn da ki wã yĩnga, a ra pa tõe n dɩ te-kãensã ligdã sẽn yaa toog wʋsgã yõod ye. Kũumẽ wã, pa be m yɩɩda bãmbã bɩ m pa ta bãmba ye, pa be bãmba yaa arzɛk rãmb tɩ bãmba yaa naong rãmb ye. Biiblã yetame: “Yam dãmb kiidame. Yalma ne mog-mog soaba na n kiimi. B na n basa b paoonga ne neb a taaba. La nin-saal kõn tol n kaoos a ziir pʋgẽ ye. Yẽ yaa wa rũms neb sẽn kʋʋda.” (Yɩɩl Sõamyã 49:11, 13) Tõnd yaa rĩm dãmb tɩ d yaa yembse, gom-kãensã vʋʋsem sõng sẽn vẽneg tɩ b gʋlsã paka d fãa: “Bala, nin-vɩɩs miime tɩ b na n kiime. La kũum ka mi bũmb ye, la bãmb ka le paamd tʋʋmd yaood ye . . . Tɩ bõe, tʋʋmd ne tagsgo la yam ne bãngre ka be kɩɩm-kulg fo sẽn dabd zĩig ninga ye.”—Koɛɛg Soaba 9:5, 10.

Wẽnnaam nifẽ, tõnd fãa rogame n zem taaba, la d fãa sã n ki d zema taaba. Rẽnd yaa faoor tɩ d ges buud a yembr wa a yɩɩda a to tõnd yõorã sẽn yaa koɛɛgã sasa!

Wãn to la yɩɩg taab na n wa sa ãdem-biisã sʋka?

La saagr beeme tɩ daar a yembre ãdem-biisã na n wa vɩɩme tɩ yɩɩg taab ka le be bɩ? N-ye, saagr beeme. Sẽn pẽneg yʋʋm 2 000 sẽn looge, a Zezi sẽn da wa n be tẽng zugu, a maana yẽbgr dẽ yĩnga. A Zezi kõo a vɩɩmã tɩ yɩ maoong sẽn yaa rondo, ãdem-biis nins fãa sẽn tẽedã yĩnga, tɩ “ned ninga fãa sẽn tẽed bãmb kõn sãam ye, la a na paam vɩɩm sẽn-ka-sɛta.”—Zã 3:16.

Sẽn na yɩl n wilg t’a karen-biig ba a yembr pa segd n zẽk a meng n yɩɩg a tẽed-n-taasã, a Zezi yeelame: “Bɩ yãmb da bao tɩ neb bool yãmb tɩ Karensaamb ye, tɩ bõe, yãmb karen-saamb ya a ye bala, la yãmb fãa yaa ba-biisi. Bɩ y ra bool ned dũniyã zug tɩ yãmb ba ye, tɩ bõe, yãmb Ba ya a ye bala n be arzãna. Bɩ yãmb da bao tɩ neb bool yãmb tɩ kãsem dãmb ye, tɩ bõe, yãmb Kãsem ya a ye bala, yaa Kirist. Ned ninga sẽn yaa yãmb nin-kãsenga, yẽ na n yɩɩ yãmb sõangda. Ned sã n waoog a menga, a na n paama paoogre.” (Matɩe 23:8-12) Wẽnnaam nifẽ, a Zezi karen-biis hakɩkã fãa zema taab tũudum hakɩkã pʋgẽ.

Pipi kiris-nebã ra getame tɩ b zema taab bɩ? Neb nins sẽn wʋm a Zezi zãmsgã võorã ra getame tɩ b zema taaba. B tagsame tɩ b ra zema taab tẽebã pʋgẽ, la b wilga rẽ n da boond taab tɩ ‘ba-biisi.’ (Filemo 1, 7, 20) B ra pa kɩtd tɩ ned ba a yembr ges a mengã wa ned sẽn são a taabã ye. Wala makre, ges-y sik-m-meng ning a Pɩɛɛr sẽn talle, a sẽn da wa n bilgd a mengã, a lɛtr a yiib-n-soabã pʋgẽ wã: “Maam a Sɩmo Pɩɛɛr sẽn yaa a Zezi Kirist nonglem yamba la b tʋm-tʋmda n tʋmd seb-kãngã neb nins sẽn paam tẽeb wa tõnd sẽn paama nengẽ.” (2 Pɩɛɛr 1:1) Ya a Zezi meng n zãms a Pɩɛɛre, la a sẽn da ya a Zezi tʋm-tʋmdã, a ra tara taoor sobend sẽn yaa kãsenga. Ne rẽ fãa, a ra geta a meng wa yamba, la a sak n deeg tɩ kiris-neb a taabã ra tara zu-nood sẽn zem yẽ rẽndã tẽeb pʋgẽ.

Kẽer tõe n yeelame tɩ zeng taabã sẽn zems zãngã yaa lebend ne Wẽnnaam manesmã, a sẽn yãk Israɛll n welg-a toor t’a yɩ yẽ buud sẽn deng kiris-nebã wakatã. (Yikri 19:5, 6) Bãmb tõe n yeelame tɩ woto yaa makr sẽn wilgd buud yɩɩdem, la yaool n pa woto ye. Yaa sɩd tɩ Israɛll nebã sẽn ya a Abrahaam yagensã, b paama zems-n-taar sẽn yaa toor zall ne Wẽnnaam, t’a tũnug ne-b n wilg bũmb nins a sẽn dat n taas ãdem-biisã. (Rom dãmba 3:1, 2) La woto wã pa bãmb la Wẽnnaam da rat n zẽk ye. La ra yaa sẽn na yɩl tɩ ‘buudã fãa paam barka.’—Sɩngre 22:18; Galat dãmba 3:8.

Wa n mikame tɩ Israɛll neb wʋsg pa rɩk togs-n-taar ne b yaab a Abrahaam tẽebã ye. B pa tall kɩs-sɩd ne Wẽnnaam ye, sẽn paase b zãgsa a Zezi sẽn yaa Mesi wã. Rẽ wã yĩng kɩtame tɩ Wẽnnaam bas-ba. (Matɩe 21:43) Baasg zãnga, ãdem-biis nins sẽn yaa sik-m-mens rãmbã pa kong barkã b sẽn kãabã ye. Kiris-neb tigingã roga yʋʋmd 33 T.W. Pãntekotã. B ra boonda kiris-neb sigl-kãngã sẽn paam zaeeb ne vʋʋsem sõngã tɩ “Israɛll sẽn yaa Wẽnnaam dẽnda,” la a tũnuga ne-a n na n kõ bark nins sẽn na n wa wã.—Galat dãmba 6:16.

Tiging kãng neb sãnda ra rata zãmsg zeng taabã wɛɛngẽ. Wala makre, karen-biig a Zak sagla neb nins sẽn da get kiris-neb nins sẽn tar arzɛgs ne waoogr n yɩɩd sẽn yaa b naong rãmbã. (Zak 2:1-4) Manesem kãngã ra pa zems ye. Tʋm-tʋmd a Poll wilgame tɩ kiris-neb nins sẽn da yaa bu-zẽms nebã ra pa neb sẽn pa ta kiris-neb nins sẽn da yaa Zʋɩf rãmbã ye, la tɩ kiris-nin-pogsã ra pa neb sẽn pa ta kiris-nin-dapã ye. A gʋlsa woto: “Tɩ bõe, yãmb fãa yaa Wẽnnaam kamba yãmb sẽn tẽed Kirist Zezi wã yĩnga. Yãmb fãa sẽn paam lisg Kirist pʋgẽ wã, yãmb yeelga Kirist. Ka le be tɩ m yaa Zʋɩf bɩ Gerɛk ye; ka le be tɩ m yaa yamb bɩ burkĩn ye; ka le be tɩ m yaa rao bɩ pag ye; tɩ bõe, yãmb fãa yaa yembr Kirist Zezi pʋgẽ.”—Galat dãmba 3:26-28.

Neb sẽn zem taab n be rũndã-rũndã

Rũndã-rũndã, a Zeova Kaset rãmbã modgdame n na n vɩɩmd tɩ zems ne Gʋlsg Sõamyã noyã. B miimi tɩ yɩɩg taab pa tar yõod Wẽnnaam nifẽ ye. Woto yĩnga, b pa tar tũudum taoor dãmba, sẽn welg toor ne tũudmã neb a taaba ye. B leb n pa welg taab b yĩn-kõbgã bɩ b paoongã sẽn yaa toor-toorã yĩng ye. Baa bãmb kẽer sẽn tar arzɛkã, pa “wilg-m-meng arzɛkã” n pak-b ye, bala b miimi tɩ bõn-kãensã loogdame. (1 Zã 2:15-17, NW ) Sẽn yaa lebende, nebã fãa tara lagem-n-taare, Ãndũniyã fãa Naab sẽn yaa Wẽnnaam a Zeova wã balengã pʋgẽ.

Tõnd ned kam fãa sak n deegame t’a segd n moona Rĩungã koe-noog neb a taabã. B maanda wa a Zezi n waoogd b rãmb nins b sẽn namsd la b pa nandẽ wã, n tʋgd n get-b b yiya, n yet-b tɩ b sã n data b tõe n zãms-b-la Wẽnnaam Gomdã. Neb nins sẽn yaa talsã naagda neb nins b sẽn get tɩ b nusã zãadame wã n tʋmdẽ. Yaa tẽebã zʋgd n tar yõod n yɩɩda, lakae pa tarma ye. Wala pipi yʋʋm kob-gĩndẽ wã, b fãa yaa saam-bi-rap la saam-bi-pogs tẽebã pʋgẽ.

Zeng taab pa gɩdgd tɩ nebã yɩ toor-toor ye

Yaa sɩd tɩ zeng taab pa rat n yeel tɩ nebã fãa segd n yɩɩ yembr bũmba fãa pʋgẽ ye. Kiris-nebã siglg pʋgẽ, d segda rap la pagba, nin-kẽemb la kom-bɩɩse, neb sẽn yit buud wʋsg pʋsẽ, sẽn gomd buud-goam toɛy-toɛy la b yit tẽns toɛy-toɛy pʋsẽ, tɩ b paoongã yaa toor-toore. B ned fãa bãngr pa a to bãngre, b yĩngã wɛɛngẽ me, b pãn-tõogã pa yembre. La b sẽn yaa toor-toor woto wã pa kɩtd tɩ kẽer yɩɩd b taab ye. Sẽn yaa lebende, b sẽn yaa toor-toor woto wã bee rasãnde. Kiris-nin-kãensã sak n deegame tɩ pãn-tõod buud fãa b sẽn tar yaa kũun sẽn yit Wẽnnaam nengẽ, la pa bʋʋm tɩ b na n tags tɩ b yɩɩda b taab ye.

Yɩɩg taabã sẽn be wã yaa ninsaal sẽn mak n na n dɩ naam a toor n pa bas tɩ Wẽnnaam wilg-a sorã yĩnga. Ka la bilfu, Wẽnnaam Rĩungã na n deega dũni-kãngã naama, tɩ yɩɩg taabã sẽn tar welsgã, n paas bũmb nins sẽn wa ne namsg hal pĩnd n tõk masã wã sa. Rẽ, sɩd-sɩda, “sũ-maasem dãmba na n sooga dũniyã.” (Yɩɩl Sõamyã 37:11) Yɛl nins zut nebã sẽn tikd n tagsd ne wuk-m-meng tɩ b yɩɩda b taabã na n menemame. B kõn leb n bas abada tɩ yɩɩg taabã ãdem-biisã sʋkã welg saam-biirã sẽn be dũniyã gill zugã ye.

[Foto rãmba, seb-neng a 5]

Kiris-neb hakɩkã sʋka yaa tẽebã zʋgd n tar yõod n yɩɩda