Pa-zem-taabã Wẽnnaam n tʋlg woto bɩ?

Nana-nana bala, leokrã yaa ayo. D ges a bʋʋmã sẽn ya a soaba.

WẼNNAAM da ratame tɩ ninsaalbã fãa paam zu-noog sẽn zem taab n vɩɩmd la b paam sũ-noogo. Ninsaal naanegã wɛɛngẽ d karemda woto: “La Wẽnnaam yeelame. ‘Tɩ d naan ninsaal t’a yɩ wa tõndo n wẽneg tõndo; la a soog zĩma sẽn be kooma pʋgẽ wã ne bõn-yɩgdɩ wã sẽn yɩgd yĩngrã la rũmsã ne dũniyã fãa, la bõn-saagdsã fãa sẽn be tẽnga zugã.’ ” Tẽnga zug naaneg sẽn sa wã, “Wẽnnaam yãa bũmb nins fãa bãmb sẽn naanã, la gese, a yaa sõama wʋsgo.”—Sɩngre 1:26, 31.

Wẽnnaam tõe n yeelame tɩ rũndã pa-zem-taabã sẽn sãamd sũurã yaa ‘sõama wʋsg’ bɩ? Yaa toogo, bala “Wẽnnaam yaa nonglem.” (1 Zã 4:8) B goma yẽ wɛɛngẽ tɩ “bãmb ka tũusd neb ye” la t’a “tʋʋma zemsa zãnga. Bãmb soɛya fãa yaa tɩrse. Bãmb yaa Wẽnnaam sẽn maand sɩda n ka maand wẽng ye. Bãmb yaa sõngo la tɩrga.” (Tõodo 10:17; 32:4; mak-y ne Zoob 34:19.) La tʋmd-tʋmd a Pɩɛɛr gom n baasa woto: “Yaa sɩda, mam bãnga masã tɩ Wẽnnaam ka tũusd neb ye. La buud fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.”—Tʋʋma 10:34, 35.

Wẽnnaam sẽn yaa nonglem soaba, n ka tũusd neb la a yaa tɩrga yĩnga, wãn to la a ra na n tõogẽ n naan ninsaalb tɩ b pa zem taab b sũ-noogã wɛɛngẽ? Sak tɩ bak-n-sõng zĩnd nebã sʋk la ning-b pa-zem-taab sẽn beẽ ra na n yɩẽ-la lebend meng ne a nedemdã. A ra ratẽ lame tɩ b fãa ‘rog ne paam-m-meng la zem-taab burkĩndlem la durwa rãmba wɛɛngẽ.’ Baasgo yaa vẽeneg tɩ rũndã yɛlã pa woto ye. Bõe yĩnga?

Pa-zem-taabã yẽgre

Wẽnnaam sẽn naan ninsaalbã fãa tɩ b zem taabã pa rat n yeel t’a ra ratame tɩ b fãa zeng taab bũmbã fãa wɛɛngẽ ye. B ra tõe n yɩɩ toor-toor tõodã, tʋlsmã la nedemdã wɛɛngẽ. B ra tõeeme me n yɩ toor taoor-sobendã wɛɛngẽ. Wala makre, pag ne rao pa zem taab bũmbã fãa wɛɛngẽ ye, la Wẽnnaam naana pag “t’a yɩ loakd” rao wã yĩnga. (Sɩngre 2:18, NW ) Yaa vẽeneg tɩ roagdbã la kambã yaa toor-toor taoor-sobendã wɛɛngẽ. Baasg zãnga, baa ne b sẽn yaa toor-toor yel-kãensã wɛɛngẽ wã, roapã, pagbã la kambã fãa ra segd n paama sor Wẽnnaam sẽn kõ-b tɩ b paam segb a yembr sẽn na yɩl n pids b sẽn baood bũmb ninsã n paam sũ-noogã. B fãa ra segd n paama burkĩndlem la yasr sẽn zem taab Wẽnnaam taoore.

Woto me, b ra kõo Wẽnnaam vʋʋsem komdibli wã b sẽn deng ninsaalbã n naanã tʋʋm la taoor-sobend toɛ-toɛya. (Sɩngre 3:24; 16:7-11; Ezai 6:6; Ziid 9) Baa ne rẽ, bãmb fãa ra tõe n paama Wẽnnaam seglsã vɩɩmã la sũ-noogã yĩnga tɩ zems taaba, kogs nins b sẽn da yãk n kõ-bã pʋgẽ. Woto b puka Wẽnnaam sẽn pa tũusd nebã ne manesem sẽn be rasãnde.

Zu-bʋko, yaa Wẽnnaam vʋʋsem bõn-naandg a ye sũur n da ka noom ne Wẽnnaam sẽn maan yɛlã tɩ bak-n-sõng kaẽ wã. A da rata wʋsg n yɩɩd Wẽnnaam sẽn kõ-a wã, n paam yasr sẽn zẽk n yɩɩdã. A sẽn tall tʋlsem wẽng kãnga wã yĩnga, a wagsa ne a Zeova sẽn yaa Naandã sẽn tar wala sẽn zemse, yasr sẽn yɩɩd bũmb fãa wã. Kaoosg poore, Wẽnnaam vʋʋsem biribl kãnga sẽn yaa kɩɩsdã tusa ninsaalbã tɩ b bao tɩ Wẽnnaam kõ-b sẽn yɩɩd bũmb ning A sẽn da kõ-bã. (Sɩngre 3:1-6; mak-y ne Ezai 14:12-14.) Dẽ, wõnda a Zeova sẽn dɩk segls nins sẽn na yɩl tɩ ninsaalbã paam vɩɩmã la sũ-noogã lʋɩɩ vɩʋʋgẽ fasɩ. Vʋʋsem kɩɩsd kãngã yell b sẽn gom Wilgri 20:2 pʋgẽ wala “diable la Sʋɩtãana,” n lebg wẽng soab ning sẽn kɩt tɩ pa-zem-taabã be ninsaalbã sʋkã.

Yɛlã na n tol n toeemame bɩ?

Nana-nana bala, leokrã yaa n-ye!

La yaa ãnd soab n tõe n wa ne toeengã b sẽn baoodã? Sãmbg sẽn ka be, taoor dãmb sẽn yaa ninsaalbã kẽer maoo ne pʋ-peelem yʋʋm kob-gĩn pʋgẽ n na n maan woto. B tõogrã ra tara koaka, tɩ woto kɩt tɩ neb wʋsg wa baas n yeel tɩ ninsaalbã pa-zem-taabã zu-loɛɛg tɩɩm yãab yaa saagr sẽn pa tõe n yɩ sɩda. Baasg zãnga, Wẽnnaam tagsgã bee Ezai 55:10, 11 pʋgẽ sẽn yet tɩ: “Wa saag sẽn niida la sapɩlɩm sẽn yit yĩngri n sigd n ka lebd be t’a ka zãgs tẽnga ne koom n kɩt t’a bõm-biis bul n yi, la a kõt koaadb bõm-buudu la rɩɩb tɩ b rɩ wã, woto me, gomd ninga sẽn yit mam noorẽ wã ka na n le wa mam nengẽ zaalem ye. A na n maana bũmb ninga mam sẽn datã. La a na n tõoga bũmb ninga mam sẽn tʋm a t’a tɩ maanã.”

Ad sɩd yaa belsg menga tɩ d bãng t’a Zeova Wẽnnaam togsame t’a na n pidsa a pipi raabã sẽn yaa kõ ninsaalbã zu-no-yɛng tɩ b paam vɩɩm la sũ-noogo! A sẽn yaa sɩd Wẽnnaam yĩnga, yaa tɩlae ne-a t’a pids a sẽn da kãab bũmb ningã. Zu-noogo a tara tʋlsem la tõog n na n maan woto. Wãn to la a na n pids rẽ?

Leokrã bee ne Rĩung ning yĩng a Zezi sẽn zãms a karen-biisã tɩ b pʋʋs woto wã: “Tõnd Ba sẽn be saasẽ, . . . bɩ f rĩungã wa. Bɩ f raabã maan tẽng zugu, wala a sẽn maand saasẽ wã.” (Matɩe 6:9, 10, NW ) N-yẽe, Wẽnnaam Rĩungã la bõn-tũnugdg ning a Zeova sẽn na n tũnug ‘n wã soolem kãens fãa [sẽn be-b rũndã wã] tɩ b menem n bas-a t’a yaas wakat fãa.’—Daniɛll 2:44.

Saasẽ Rĩungã naam-dɩɩb wakate, ãdem-biis zãmaan-paalg n na n puki. Rẽ wɛɛngẽ, tʋm-tʋmd a Zã gʋlsa Wilgr sebrã sẽn yaa Biiblã yaoolem sebr pʋgẽ tɩ: “Mam yãa yĩngr paalga la dũni paalga; tɩ bõe, dẽenem yĩngr la a tẽnga loogame.” (Wilgri 21:1) Pa-zem-taab sẽn yaa wẽngã buud fãa na n loogame. Talemdo, bãase, zɩɩlem, bak-n-nong la ninsaalbã tood fãa na n loogame.a

Sẽn yɩɩd yʋʋm kob-gĩnd la woto, a Zeova Kaset rãmbã takda nebã yam n sikd Rĩung kãng zugu. (Matɩe 24:14) Ne sɛb la b mens sẽn kõt sõngrã tũnugri, b modga b mens n sõng nebã sẽn na yɩl tɩ b bãng Wẽnnaam daabã sẽn be Biiblã pʋgẽ wã. Baasgo, b dũni gill zãmsgã tʋʋmd pa kõ nebã beoog-daar zem-taab vɩɩm la sũ-noog saagr bal ye, la a waa ne nafa me masã menga, a sẽn boog pa-zem-taabã zu-loɛɛgã yĩnga. D ges wãn to la a pidsd rẽnda.

[Footnotes]

[Blurb on page 5]

Wẽnnaam da ratame tɩ ninsaalbã fãa tall zu-no-yɛng n paam vɩɩm la sũ-noogo