Y sã n bẽed bã-kɛgenga

A Linda sẽn tar yʋʋm 71 wã yeelame: “M sẽn wa n bãng tɩ kãnsɛɛr n yõk mam fulfuudã ne m yãadã, m ninga m yamẽ bal tɩ m na n kiime. M sẽn yi logtor yirã n kulã, m yeela m menga: ‘Yaa sɩd tɩ m da pa tẽed tɩ na n yɩɩ kãnsɛɛr ye. La masã m tog n bãnga m sẽn na n maanegã.’”

A Elise sẽn tar yʋʋm 49 wã yeelame: “Mam bẽeda bã-toaag sẽn kɩt tɩ mam nengã goabg babgã rat n ki. Wakat ninga, toogã loogd-m lame hal tɩ m yamã ka le be m meng ye. Naoor wʋsgo, m tagsdame tɩ m yell ka pak ned ye, hal n dat n kʋ m menga.”

Rao sẽn yaa bãad n zao põor weefo, tɩ neb sẽn nong-a be ne-a

LOGTOƐƐMBÃ sã n zoe n togsa yãmb bɩ ned y sẽn nong t’a bẽeda bãag sẽn tõe n wa tũ ne a yõore, y mii rẽ sẽn sãamd sũur to-to. Sẽn paase, yãmb ne y roagdbã segd n maoo ne zu-loees nins fãa bãagã sẽn na n wa ne wã. Y sã n segd n kẽnga logtor yir wakat fãa, wall yaa toog tɩ y paam tɩbsg sẽn zems ne y bãagã, bɩ yaa tɩtã volb n wat ne zu-loees a taaba, tõe n paasa y rabeemã la y yɩɩrã. Rẽ fãa n paas bãagã sẽn yaa bã-kɛgengã tõe n kɩtame tɩ yɛlã lebg toog wʋsg ne-yã.

Yɛ la y tõe n paam sõngre? Neb wʋsg yeelame tɩ b sẽn teeg Wẽnnaam n pʋʋsd-a wã, la b karemd Biiblã vɛrse-rãmbã, b sɩd paamda belsg menga. Y zakã rãmb la y zo-rãmbã sã n nong yãmb la b teend-y-yã, na n sõng-y lame me.

NEB KẼER SẼN MAAN TƖ B SŨ-SÃANGÃ BOOGE

A Robert sẽn tar yʋʋm 58 wã yeelame: “Y sã n bẽed bãaga, kell-y n teeg-y-yã a Zeova. A na n sõng-y lame tɩ y tõog n mao. Pʋʋs-y-yã-a. Togs-y-yã-a yellã sẽn namsd-y to-to. Kos-y-yã-a t’a kõ-y a vʋʋsem sõngã, t’a sõng-y tɩ y tall raood y zakã rãmb yĩnga, la a sõng-y me tɩ y tõog toogo.

A Robert paasame yaa: “Mam sẽn paam tɩ m zakã rãmb sõngd-m m bãagã pʋgẽ, la b be ne-m m sẽn dat sasa ning fãa wã, sɩd sõngd-m-la wʋsgo. Daar fãa b nin-yɛng wall neb a yiib boonda maam ne telefõn n sok m gãase. M zo-rãmb sẽn yit zĩis toɛy-toɛy kengda m raoodo. B fãa sɩd kõta maam pãnga. Rẽ n sõngd-m tɩ m pa komsd raood zãng ye.”

Yãmb sã n kẽng n na n tɩ kaag y zoa sẽn bẽede, tags-y a Linda sẽn yeelã zugu. A yeelame: “Yaa vẽeneg tɩ bãadã ratame n paam laafɩ wa neb a taabã. Rẽ n so t’a pa rat wakat fãa n gomd a bãagã yell ye. Woto yĩnga, gom-y bũmb nins yãmb sẽn nong n gomdã yell ne-a.”

Baa y sã n bẽeda bã-kɛgenga, ne Wẽnnaam la a Gomdã belsgo, n paas y zakã rãmb ne y zo-rãmbã sõngre, y na n tõog n kɩsa sɩd zãng tɩ y vɩɩmã ket n tara yõodo.

Biiblã vɛrse-rãmb sẽn tõe n sõng-yã

Teeg-y Wẽnnaam.

“Mam baoo Sẽn-Ka-Saabo, la bãmb leoka maam. Mam dabeemã fãa pʋga, bãmb fãaga maam. Naong soab sã n kelem, Sẽn-Ka-Saab wʋmdame.”—Yɩɩn-sõamyã 34:5, 7.

A Linda, pag ning yell d sẽn zoe n gomã yeelame: “M zɩ n pʋʋs Wẽnnaam n kos tɩ m bãagã sa ye. Wakat fãa m pʋʋsdame n kotẽ t’a kõ-m pãnga, la a sõng-m tɩ m tõog toog m bãagã pʋgẽ.”

Karemd-y Wẽnnaam Gomdã n paam raoodo.

“Tẽngã ned kõn yeel t’a ka keem ye!”—Ezayi 33:24.

Bʋgsd-y Wẽnnaam sẽn pʋlem bũmb nins beoog daarã wɛɛngẽ wã. Rẽ na n sõng-y lame tɩ y tẽ manegre, la kõ-y pãng tɩ y tõog toogo.

Kos-y y roagdbã la y zo-rãmbã sõngre.

“Zood . . . n be n yaa noog n yɩɩd rogem.”—Yel-bũnã 18:24.

A Elise, pag ning yell d sẽn zoe n gomã yeelame: “Ra zãag-y y meng ne neb a taabã ye. Bas-y tɩ y zo-rãmbã sõng-yã. Baa y sã n wa tagsdẽ tɩ y yell ka pak neda, la tɩ Wẽnnaam meng pa kelgd yãmba, ra zãag-y y meng ne-b ye.”