Waoog-y a Zeova ne tʋʋm sõma
1 Sa-kãseng sã n ling-yã, ad sɩd na yɩ yolsg n kõ-yã, y sã n paam zĩig n soolge! Soolgã zĩig sã n kogend yãmb ne saaga tɩ sẽn be-b be wã sak n deeg yãmbã, y datame n kell n pa be. Neba ratame tɩ b kogl-b ne a Sʋɩtãan siglgã. Rĩungã mooneg tʋʋmd wilgd-b-la b sẽn na n maan to-to n paam koglg a woto. La tõnd daar fãa yel-manesmã yẽ? A tõe n sõnga neb a taabã tɩ b yã tɩ koglg zĩig a woto bee yamleoog bɩ? Sɩd tõeeme, bala a Zezi yeelame tɩ neba na n ‘yãa tõnd tʋʋm sõama n waoog tõnd Ba’ sẽn be saasẽ wã.—Mat. 5:16.
2 Wãn to la tõnd tʋʋma na n kɩt t’a Zeova ne a siglgã zĩnd yamleoog ne nebã? Yaa d sẽn na n basdẽ t’a Zezi goam nins sẽn be Luk 6:31 la 10:27 pʋsẽ wã toeemd d vɩɩmã daar fãa. Rẽ na n sõnga tõnd tɩ d tall nonglem ne neb a taabã. Woto na n kɩtame tɩ d yɩ toor ne dũniyã neb sẽn ka wilgd nonglmã.
3 Saam-bi-poak n da be koom koglg pʋgẽ n togd sore. Beenẽ a yãa pag sẽn da bẽed hal tɩ kɩt t’a ka tõe n ges a biig yell ye. Saam-bi-poakã sakame n na n ges a biigã yelle. Pagã sʋka saam-bi-poakã bũmb ning a sẽn da tõe n maan n wilg a mi-beoogo. Dẽ saam-bi-poakã yeela woto: ‘Nindaar a Zeova Kaset rãmbã sã n wa y nengẽ bɩ y kelg-ba.’ Pagã sɩd maana woto. La masã, yẽ ne a sɩdã yaa Kaset rãmba. Yaa tʋʋm sõma n kɩt tɩ b sak Rĩungã koɛɛga.
4 Tõnd vɩɩmã fãa segd n wilga rẽ: Neba sẽn na n ges tõnd la d tũudmã to-to wã bee ne tõnd yel-manesmã sẽn ya a soab tõnd sakẽ wã, d tʋʋmã zĩigẽ bɩ lekollẽ wã, la reem wakate. Rẽ n so tɩ d segd n sʋk d mens woto: ‘Wãn to la neb a taabã get maam la m zakã rãmba? Yagsã getame tɩ mam zakã yaa yɩlemd bɩ? Tõnd tʋmd-n-taasã la d karen-bi-taasã getame tɩ tõnd yaa ned sẽn wat lɛɛre, la sẽn tʋmd sõma bɩ? Neb a taabã na n yãame tɩ mam yalẽ wã bee burkĩnd bɩ?’ Tõnd tʋʋm sõma wã tõe n kɩtame t’a Zeova balengã tall yamleoog ne neb a taabã n paase.
5 A Pɩɛɛr keoogame tɩ nebã na n yaala kiris-nebã. (1 Pɩɛ. 4:4) D tog n modgame tɩ tõnd yel-manesmã ra kɩt tɩ neb a taabã gom tõnd wẽng ye. (1 Pɩɛ. 2:12) Tõnd tʋʋma sã n waoogd Wẽnnaam, d na n yɩɩ wala fɩtl dãmb sẽn kõt vẽenem sõma. Woto d na n wilgda neb a taabã koglg ning a Zeova sẽn kõtã.—Mat. 5:14-16.