“Wẽnnaam tõee bũmb fãa”
1 Tʋʋmd ning kiris-nebã sẽn segd n maan n yɩɩdã yaa moon Rĩungã dũniyã gill zugu. (Mat. 24:14) Tʋʋm-kãngã sɩd yaa tʋʋmd tɛkẽ. Ne neb wʋsgo, tʋʋm kãngã yɩɩda tõnd pãnga. Ne neb a taaba, neba sẽn paoogd tõnd, n kɩɩsdẽ bɩ b namsd-dã yĩngã, b tagsdame tɩ tʋʋmd a woto d ka tõe n maan-a ye. (Mat. 24:9; 2 Tɩm. 3:12) Sãmb-sãmb rãmbã kɩsa sɩd tɩ tʋʋm kãngã yaa bũmb tõnd sẽn ka tõe n pidsi. Baasg zãnga, a Zezi yeelame: “Wẽnnaam tõee bũmb fãa.”—Mat. 19:26.
2 Neb sẽn kõ mak-sõma tɩ d segd n dɩk b naoa: A Zezi sẽn da wa n sɩng a tʋʋmdã t’a zãmaana neb fãa la bal ra ka rat n kelg-a ye. Sẽn na yɩl n gɩdg a tʋʋmdã, a bɛɛbã nams-a-la ne namsg sẽn ka tõe n bãng n bilgi. B wa n baas n nams-a lame hal tɩ ta a kũum. Baasg zãnga, ne bas-m-yam a Zezi baas n yeela woto: “Mam tõoga dũniyã.” (Zã 16:33) Sã n yet tɩ tõogre, sɩd yɩɩ tõogr menga!
3 A Zezi karen-biisã me talla raood la yẽesem a woto kiris-neb tʋʋmdã pʋgẽ. Bãmb wʋsgo, b pãb-b lame, n sui roto, bɩ n kʋ menga. Baasg zãnga, b ra maana “su-noogo b sẽn zems tɩ paam namsg a Zezi yʋʋra yĩngã.” (Tʋʋ. 5:41) Yel-gɩdgdɩ wã ra waoogame, la b tõog n maana tʋʋmd ning sẽn da wõnd ka tõe wã, n moon koe-noogã “dũniyã tɛk fãa.”—Tʋʋ. 1:8; Kol. 1:23.
4 D sẽn na n maan to-to n tõog tõnd wakatã: Tõnd me moonda Rĩungã koɛɛg ne yẽesem, baa d sẽn segd yel-gɩdgdɩ sẽn wõnd b ka tar tɩɩmã. Neba gɩdgda tõnd tʋʋmdã, n namsd-do, n kẽesd-d roto, la b tũnugd ne nen-kɛglem tʋʋm a taab sẽn na yɩl n yals tõnd tʋʋmdã. Ne rẽ fãa, d tʋʋmdã ket n kẽngda taoore. Wãn-wãn la woto fãa tõe n yɩ? Biiblã yetame: “Ka ne tãpo, walla pãng ye, yaa ne m sɩɩgã. Mam yaa Zusoaba, yaa maam n yeele.” (Zak. 4:6) A Zeova sẽn be ne tõndã yĩngã, bũmb ka tõe n yals tõnd tʋʋmdã ye!—Rom 8:31.
5 D sã n moondẽ, d ka segd n zoe nifu, n zoe rabeem bɩ n tags tɩ d ka tõe tʋʋmdã ye. (2 Kor. 2:16, 17) D tara bʋʋm hal sõma n na n ket n nangd pãng ne Rĩungã koe-noog taasgo. Ne a Zeova sõngre, d na n tõog n pidsa ‘bũmb nins sẽn yaa toogã.’!—Luk 18:27.