Keng taab raood wakat sẽn ka wõnd a taaba
1 Daar ka be a Zeova nin-buiidã tẽeb sẽn ka paamd makr ye. A Sʋɩtãan Munaafɩɩk sẽn mi t’a wakatã yaa koɛɛgã yĩngã, a zabda ne tõnd a tɛkem-tɛkem zabr sẽn na n yɩl n sãam tõnd burkĩndã ne a Zeova. (Wil. 12:12) Tara yõod wʋsg tɩ d ket n ‘paamd daood Zusoaba tũudum pʋgẽ n deeg bãmb pãng kãsengã,’ sẽn na yɩl tɩ d “tõe n tõog wẽng wakate, la tɩ [tõnd] sã n zab n tõoge, [tõnd] na yals kãn-kãe.”—Ef. 6:10, 13.
2 Tigim ne d tẽed-n-taasã yaa segls a Zeova sẽn maan sẽn na yɩl n sõng-d tɩ d paam pãnga. Tʋm-tʋmd a Poll ra mii rẽ yõod sẽn ta zĩig ninga. A ra tʋlla wʋsg n na n tɩ lagem ne a saam-biisã sẽn yaa kiris-nebã sẽn na yɩl tɩ b “lagem taab n paam daood” la b “kɩ yẽga.” (Rom 1:11, 12) Sẽn na yɩl n keng tõnd pãng n paas Wẽnnaam daabã maaneg pʋgẽ, ne nonglem Siglgã Taoor lʋɩtb sull maana segls sẽn na yɩl tɩ d paam sor n keng taab raood “Rĩungã koe-moondb sẽn tar yẽesem” tigims gĩn sull tigis-kãsengã sẽn watã sasa.
3 Zĩnd-y be n dɩ a nafa: Maan-y y sẽn na maaneg n zĩnd tigis-kãsengẽ wã rasem a tãabã fãa. Tõnd ‘sõngda d mense,’ d sã n ta pĩnd tɩ b nan ka yɩɩl pipi yɩɩllã, la d kell n zĩnd be n tãag d sẽn na n wa yeel tɩ “Ãmina” ne d sũurã fãa yaoolem pʋʋsgã poorã. (Ezai 48:17, 18) Sẽn na yɩl n tõog n wa paam sẽk n zĩnd tigis-kãsengẽ wã rasem a taabã fãa, yaa tɩlae tɩ neb wʋsg reng pĩnd n maan segls b tʋʋma zĩigẽ. Yaa sɩd tɩ tõe n yaa toog tɩ d paam tɩ tʋʋmdã taoor soab kõ-d sẽk rẽ yĩnga, la a Zeova kõo tõnd bas-m-yam t’a na n sõng-d lame tɩ d maan a raabã. (1 Zã 5:14, 15) Sã n mik tɩ d ka zoe n maan rẽ, yaa masã tɛk la d segd n maan segls takɩ rɩkrã la ro-gãagã wɛɛngẽ, n da maandẽ tɩ sẽn ya a soab me wat n zemsame ye. D tõe n kɩsa sɩd t’a Zeova na n ninga tõnd modgrã bark tɩ d zĩnd tigis-kãsengẽ wã rasem a taabã fãa.—Yel. 10:22.
4 Reng-y n tags raood kengr ning y sẽn na n paamã yelle: Rẽ yĩnga, yãmb zoe n maana tigis-kãseng n sa, n yeel woto: “Mam zɩ n yã tigis-kãseng woto buud ye!” Bõe yĩng tɩ y ra yeel woto? Rẽ yaa tõnd sẽn yaa ninsaalb sẽn ka zems zãng tɩ yaams tõe kẽ-d bilf-bilfu, tɩ d wa neẽ tɩ d ratame tɩ b keng-d raood tẽebã wɛɛngẽ wã yĩnga. (Ezai 40:30) Saam-bi-poak a yembr yeela woto: “Zamaan kãngã kõta maam yaams wʋsgo, la tigis-kãsemsã sõngda maam tɩ m lebs n dems m tagsgã tẽebã pʋgẽ, n kõt maam kengr ning m sẽn datã tẽebã wɛɛngẽ. Wõnda saglsã wata wakat ning m sẽn dat-b n yɩɩdã menga.” Tõeeme tɩ yãmb me zoe n tagsa woto.
5 Tigis-kãsemsã sõssã la bool-n-sʋgsã kengda tõnd tẽebo, la ka rẽ bal ye, tigis-kãsengã yɛl a taab me kengda tõnd tẽebo. Saam-biig a yembr yeela woto: “Bũmb ning mam sẽn nong wʋsg yaa b sẽn wilgd tõnd d sẽn tõe n tũ Biiblã noy vẽeneg to-to wã. Dram dãmbã me tara yõod wʋsgo, bala b wilgda tõnd d sẽn tõe n dɩ pĩnd neb mak-sõma bɩ b mak-wẽns yõod to-to. Seb-paalã yaa bũmb m sẽn gẽegd wakat fãa, tɩ m sã n paam-b n leb yiri kaoosg zug m ket n dɩta b nafa.”
6 Tigis-kãsemsã yaa segls sẽn tar yõod wʋsg sẽn yit a Zeova nengẽ ‘wakat kãngã sẽn yaa toogã’ pʋgẽ. (2 Tɩm. 3:1) B sõngda tõnd tɩ d tũ sagl-kãngã vʋʋsem sõng sẽn vẽneg tɩ b gʋlsã: “Bɩ y gũus y mense n yals kãn-kãe tẽeb pʋgẽ, bɩ y maan wa sẽn zems neb sẽn bɩ, la bɩ y keng y mense.” (1 Kor. 16:13) Woto yĩnga, bɩ d rɩk sard kãn-kãe n zĩnd “Rĩungã koe-moondb sẽn tar yẽesem” tigis-kãsengẽ wã rasem a tãabã faa, n paam n keng taab raood wʋsgo!
[Zĩ-gũbri, seb-neng a 3]
Maan-y segls n zĩnd be rasem a tãabã fãa
■ Kos-y sẽk y tʋʋmdã zĩigẽ.
■ Kɩt-y tɩ b bao ro-gãag yãmb yĩng tigis-kãsengã galʋ-tẽngẽ.
■ Maan-y segls rɩkrã yĩnga.